1. How Brada Russell an adaz yoostu stodi, ahn wai dat da-mi wahn gud way fi du it?

OAVA wan honjrid yaaz agoa, Brada Charles Taze Russell ahn sohn ada peepl mi staat tu meet tugeda fi stodi Gaad Werd. Dehn mi waahn si if dehn kuda mi laan weh di Baibl reeli teech bowt Jehoava Gaad, Jeezas Krais, di ransom ahn weh hapm tu peepl wen dehn ded. Dehn mi ga wahn eezi way fi stodi. Sombadi wuda aks wahn kweschan, ahn den di groop wuda luk pahn evri skripcha weh taak bowt da tapik. Aftawodz, dehn wuda rait dong evriting weh dehn laan fahn dehn risaach. Jehoava mi bles dehndeh sinsyaa Kristyan bradaz, ahn dehn mi laan di chroot bowt wahn lata Baibl teechinz weh stil impoatant tu wee nowadayz.

2. Wai ih mait bee haad sohntaim fi geh di karek andastandin a wahn Baibl prafesi?

² Dehndeh Baibl styoodents mi fain owt dat ih mait bee eezi fi laan weh di Baibl teech bowt wahn sertn tapik, bot ih noh aalwayz eezi fi geh di karek andastandin a wahn Baibl prafesi. Wai? Wan reezn da dat wi yoozhwali geh fi andastan wahn Baibl prafesi wail di prafesi di kohn chroo er afta di prafesi kohn chroo. Bot wahn nada reezn deh tu. Fi geh di karek andastandin a wahn prafesi, wi yoozhwali haftu kansida wat els di prafit mi seh wen ih giv di prafesi. If wi onli luk pahn wan paat a di prafesi ahn noh pay no main tu di res a it, wi praabli noh wahn andastan it karek. Ih luk laik dat da weh hapm wid di prafesi eena di buk a Joel. Mek wi tek wahn luk pahn da prafesi ahn diskos wai wi haftu chaynj di way how wi andastan it.

3-4. Op tu now, how wi mi andastan di prafesi da Joel 2:7-9?

 ³ Reed Joel 2:7-9. * Joawel mi prafesai dat wahn playg a loakos wuda damij di lan a Izrel. Dehn teet ahn dehn jaa wuda bee laik wahn laiyan wan, ahn dehn mi wahn eet op evriting weh dehn ku fain! (Joel 1:4, 6) Fi wahn lang taim now wi bileev dat Joawel prafesi mi-di taak bowt di way how Jehoava peepl du di preechin werk, laik wahn swaam a loakos weh noh stap fi notn er nobadi. Wi mi andastan dat di preechin werk mi-di damij di “lan” eena di way how ih mi afek peepl weh deh anda di kanchroal a di rilijos leedaz eena di werl. *

⁴ If wi onli reed Joel 2:7-9 ahn notn els, den wi kuda aagyu dat da eksplanayshan karek. Bot wen wi luk pahn di kanteks, wi si dat wahn difrent andastandin moa karek. Mek wi luk pahn foa reezn wai dat da di kays.

5-6. Weh kweschan kom op wen wi luk pahn (a) Joel 2:20? (b) Joel 2:25?

⁵ Fers, noatis weh Jehoava pramis bowt di playg a loakos: “Ah wahn jraiv di aami weh kohn fahn di naat [di loakos dehn] faar fahn unu.” (Joel 2:20) If di loakos dehn stan fi Jehoava Witnisiz wen dehn di obay Jeezas koman fi preech ahn mek disaipl, den wai Jehoava wuda pramis fi jraiv dehn owt? (Ezek. 33:7-9; Mach. 28:19, 20) Ih klyaa fi si dat Jehoava noh di jraiv owt ih faytful servants, soh dis haftu di taak bowt sohnting er sombadi weh deh gens fi hihn peepl.

⁶ Sekant, kansida weh Joel 2:25 seh. Eena da vers, Jehoava seh: “Fi di yaaz weh Ah sen mi grayt aami monks unu, di loakos weh swaam, di loakos weh noh ga wing, di loakos weh eet op evriting, ahn di loakos weh dischrai evriting, Ah wahn pay unu bak fi weh dehn dischrai.” Noatis dat Jehoava pramis fi ‘pay dehn bak’ fi di damij weh di loakos dehn kaaz. If di loakos dehn stan fi peepl weh di preech di gud nyooz a di Kingdom, dat wuda meen dat di mesij weh dehn preech kaaz damij. Bot da mesij sayv peepl laif, an ih eevn mek sohn wikid peepl waahn ripent. (Ezek. 33:8, 19) Dat ku bee wahn reel blesin fi dehn!

7. Weh di werdz “afta dat” weh deh da Joel 2:28, 29 help wi fi andastan?

⁷ Reed Joel 2:28, 29. * Terd, kansida di aada weh di prafesi seh tingz wahn hapm eena. Yu mi noatis weh Jehoava seh? Ih seh, “Afta dat Ah wahn poar owt mi spirit.” Dat meenz dat ih wuda poar owt ih spirit afta di loakos dehn finish di werk weh dehn mi ga fi du. If di loakos dehn stan fi di peepl weh wahn preech bowt Gaad Kingdom, wai Jehoava wuda poar owt ih spirit pahn dehn afta dehn finish dehn preechin? In fak, widowt di help a Gaad powaful hoali spirit, dehn mi wahn kyaahn kip op di preechin werk fi soh lang wid aala di persikyooshan weh dehn fays.

8. Weh di loakos weh geh menshan da Revilayshan 9:1-11 stan fa? (Koment pahn di picha pahn di kova.)

 ⁸ Reed Revilayshan 9:1-11. Now mek wi luk pahn di foat reezn. Wi yoostu kanek di playg a loakos weh Joawel mi prafesai bowt wid di preechin werk weh wi du bikaaz di buk a Revilayshan gat een wahn simila prafesi. Di prafesi eena Revilayshan diskraib wahn swaam a loakos weh ga fays laik hyooman ahn weh wayr “sohnting weh luk laik goal krong” pahn dehn hed. (Rev. 9:7) Dehn taament “di peepl dehn [Gaad enimi dehn] weh noh ga Gaad seel pahn dehn farid” fi faiv monts. Dat da bowt how lang moas loakos liv. (Rev. 9:4, 5) Now dat song laik Jehoava anointid servant dehn! Dehn noh frayd fi preech Gaad jojment mesij gens disya wikid werl, ahn da mesij taament enibadi weh sopoat dis werl tu.

9. Wat da sohn impoatant difrens bitween di loakos weh Joawel ahn Jan mi si?

⁹ Chroo, som paats a di prafesi eena Revilayshan simila tu di prafesi weh Joawel mi rait. Bot som paats difrent, ahn di difrens impoatant. Fi egzampl, eena Joawel prafesi di loakos dehn du wahn lata damij tu aala di graas ahn di chree dehn ahn di plaant dehn weh di groa. (Joel 1:4, 6, 7) Eena Jan vizhan, Gaad “tel di loakos dehn fi noh du no damij tu di graas er tu di chree dehn, ahn fi noh damij no plaant weh di groa.” (Rev. 9:4) Di loakos dehn  weh Joawel mi si mi kohn fahn di naat. (Joel 2:20) Di loakos dehn weh Jan mi si mi kom owta wahn deep deep hoal. (Rev. 9:2, 3) Gaad seh dat ih wahn jraiv owt di loakos dehn eena Joawel prafesi. Nobadi noh jraiv owt di loakos weh menshan eena Revilayshan, bot dehn lef di loakos dehn mek dehn finish dehn werk. Notn eena di Baibl seh dat Jehoava neva pleez wid dehn.—Si di baks “ Too Prafesi Bowt Loakos—Simila Bot Difrent.”

10. Giv wahn egzampl fahn di Skripchaz weh help wi fi si dat di loakos dehn weh Joawel ahn Jan mi si ku stan fi too difrent ting.

¹⁰ Dehndeh impoatant difrens bitween di too prafesi help wi fi andastan dat dehn noh di taak bowt di saym ting. Soh weh wi di seh? Dat di loakos dehn eena Joawel prafesi difrent fahn di loakos dehn eena Revilayshan? Yes. Di Baibl noh aalwayz yooz di saym simbol fi meen di saym ting aal di taim. Fi egzampl, Revilayshan 5:5 kaal Jeezas “di Laiyan weh kohn fahn di chraib a Jooda,” bot 1 Peeta 5:8 diskraib di Devl az “wahn laiyan weh di roar.” Di foa points weh wi jos diskos mek wi kweschan di way wi andastan Joawel prafesi. Sayka dat wi haftu luk fi wahn nada way fi eksplayn it. Weh dis prafesi ku meen?

11. How Joel 1:6 ahn 2:1, 8, 11 ku help wi fi andastan hoo da di loakos?

¹¹ Wen wi tek wahn kloasa luk pahn Joawel prafesi ahn wi luk pahn som a di ada vers dehn, wi si dat di prafit mi-di taak bowt wahn militeri atak. (Joel 1:6; 2:1, 8, 11) Jehoava mi seh dat ih wuda yooz fi hihn “grayt aami” (di Babiloanyan soalja dehn) fi ponish di Izrelait dehn sayka weh dehn neva obeedyant. (Joel 2:25) Joawel seh dat dehn kohn “fahn di naat,” ahn dat da di dairekshan weh di Babiloanyan aami mi kohn fram wen dehn mi invayd Izrel. (Joel 2:20) Joawel seh dat da aami da laik wahn swaam a loakos weh wel aaganaiz. Ih seh: “Eech [soalja] moov faawod eena ih prapa plays. . . . Dehn hori goh eena di siti, dehn ron pahn tap a di waal. Dehn klaim tap a di hows, dehn klaim een chroo di windo laik teef.” (Joel 2:8, 9) Yoo ku imajin dat? Evriway weh yu luk, soalja dehdeh. No way noh deh fi haid. Nobadi kuda mi eskayp di Babiloanyan aami!

12. How Joawel prafesi bowt di loakos mi kohn chroo?

¹² Jos laik loakos, di Babiloanyan (er Kaldeeyan) dehn mi invayd Jeroosalem eena 607 B.C.E. Di Baibl tel wi dat di king a di Kaldeeyanz “mi kil dehn yong man dehn wid di soad . . . . Hihn neva feel no kompashan fi di yong man dehn ner di verjin dehn, needa di oal peepl ner peepl weh sik. Gaad gi ahn evriting eena ih han. Hihn mi bon dong di hows a di chroo Gaad, tayr dong di waal rong Jeroosalem, bon aala di schrang towa dehn wid faiya, ahn dischrai evriting weh ga valyu.” (2 Chron. 36:17, 19) Bai di taim di Babiloanyan dehn mi finish wid Izrel, peepl wuda luk pan it ahn seh: “Da wahn dezert ahn needa man ner bees liv deh, ahn di Kaldeeyanz dehn tek it oava.”—Jer. 32:43.

13. Eksplayn weh Jeremiah 16:16, 18 meenz.

¹³ Bowt 200 yaaz afta Joawel mi giv ih prafesi, Jehoava mi yooz Jerimaiya fi prafesai sohnting els bowt dis atak. Hihn mi seh dat di aami weh invayd wuda saach owt aala di Izrelait dehn weh mi-di du wikidnis ahn dehn wuda kyapcha aala dehn. “Jehoava seh, ‘Ah wahn sen fi lata fishaman, ahn dehn wahn goh fishin fi mai peepl. Afta dat Ah wahn sen fi lata honta,  ahn dehn wahn hont dehn dong pahn evri mongtin ahn evri hil ahn owta evri krak eena aala di big rak dehn. . . . Ah wahn pay dehn bak di ful amonk weh joo dehn fi aala dehn sin.’” Needa di see ner di faris wuda bee aybl fi haid di Izrelait dehn fahn di Babiloanyan aami.—Jer. 16:16, 18.

14. Wen di prafesi da Joel 2:28, 29 mi kohn chroo?

¹⁴ Bot now Joawel ga gud nyooz fi tel. Di lan a Izrel wahn bee bles agen. (Joel 2:23-26) Den som taim eena di fyoocha lata spirichwal food mi wahn deh. Jehoava seh, “Ah wahn poar owt mi spirit pahn aal flesh, ahn yu son ahn yu daata dehn wahn prafesai . . . ahn eevn pahn mi mayl ahn mi feemayl slayv dehn Ah wahn poar owt mi spirit.” (Joel 2:28, 29) Gaad neva poar owt ih spirit pahn di Izrelait dehn az soon az dehn mi kohn bak hoam fahn Babilan. Raada, hihn mi poar owt ih spirit pan ih peepl honjridz a yaaz layta, pahn Pentikaas eena di yaa 33 C.E. How wi noa dat?

15. Akaadn tu Aks 2:16, 17, wich paat a Joel 2:28 Peeta mi chaynj, ahn weh dat tel wi?

¹⁵ Anda di dairekshan a di hoali spirit, di apasl Peeta mi aplai Joel 2:28, 29 tu wahn amayzin ivent weh mi hapm pahn di day a Pentikaas. Bowt nain aklak da maanin, Gaad mi poar owt ih hoali spirit, ahn di peepl weh ih mi poar it pan mi staat tu taak “bowt di grayt ting dehn weh Gaad du.” (Aks 2:11) Wen Peeta mi taak anda di dairekshan a di hoali spirit, ih neva seh di egzak werdz weh Joawel mi seh eena ih prafesi. Yu mi noatis weh Peeta mi chaynj? (Reed Aks 2:16, 17.) Insteda staat aaf di seh “afta dat” laik how Joawel mi seh it. Peeta mi seh: “Eena di laas dayz”—eena  dis kays, di laas dayz a di Jooish sistem a tingz—Gaad mi wahn poar owt ih spirit “pahn aal flesh.” Dis tel wi dat wahn lang taim mi wahn paas bifoa Joawel prafesi mi wahn kohn chroo.

16. How Gaad spirit mi afek di preechin werk eena di fers senchri, ahn how ih spirit di afek da werk tudeh?

¹⁶ Afta Gaad mi poar owt ih spirit pahn di Kristyan bak den eena di fers senchri, dehn mi staat op di preechin werk. Da preechin werk mi wahn spred aal oava di werl az taim paas. Bai di taim di apasl Paal mi rait ih leta tu di kangrigayshan da Koloaseh, rong 61 C.E., hihn kuda mi seh dat di gud nyooz mi-di geh preech “tu evribadi eena di werl.” (Kol. 1:23) Wen Paal seh “evribadi eena di werl,” hihn mi-di taak bowt di paat a di werl weh peepl kuda mi chravl eena dehn dayz. Wid di help a Jehoava powaful hoali spirit, di preechin werk groa wahn lat moa eena fi wee dayz, an ih reech “tu peepl aal oava di werl” fi chroo!—Aks 13:47; si di baks “ Ah Wahn Poar Owt Mi Spirit.”

17. How wi andastandin a Joawel prafesi bowt di loakos chaynj?

¹⁷ Weh chaynj? Now wi ga wahn beta andastandin a di prafesi da Joel 2:7-9. Dehnya vers noh di taak bowt wi preechin werk, bot dehn di taak bowt di Babiloanyan aami weh mi wahn invayd Jeroosalem eena 607 B.C.E.

18. Wat bowt Jehoava peepl neva chaynj?

¹⁸ Weh stay di saym? Jehoava peepl kantinyu fi preech di gud nyooz tu peepl aal oava di werl, an eena evri wich way pasabl. (Mach. 24:14) No govament ban ku stap wi fahn du di preechin werk. Ahn moa dan eva bifoa, wid Jehoava blesin, wi bizi di preech di gud nyooz a di Kingdom! Wi kantinyu fi pen pahn Jehoava fi help wi andastan Baibl prafesi, ahn wi chros dat wen di rait taim kohn, hihn wahn mek wi noa “di hoal chroot”!—Jan 16:13.