1. Nemene la aqane trongene la ini tusi Charles Russell me Itretre Ini Tusi Hmitrötr ekö, nge pine nemene matre ka loi hi la aqane kuca i angatr?

 AME ekö, hnei Charles Russell me Itretre Ini Tusi Hmitrötr hna nyiqaane icasikeu. Angatr a ajane troa atrepengöne la hna qaja hnei Tusi Hmitrötr göi Iehova, göi Iesu Keriso, göne la itre ka mec me göne la thupene mel. Ka hmaloi hi la aqane trongene la ini tusi angatr. Ame la kola nyiqaan, kola pane hnying hnei ketre. Thupene lai, angatr a isa thel la itre xötr ka ihmeku memine lai hnying, me cinyianyine la itre hnei angatr hna öhn. Hnei Iehova hna xatua angatr troa trotrohnine la itre ini hna hamën hnei Tusi Hmitrötr. Itre ini lai ka nyipiewekë palahi enehila.

2. Pine nemene matre ka tria la aqane trotrohnine së la ketre hna perofetan hnei Tusi Hmitrötr?

² Önine la Itretre Ini Tusi Hmitrötr ka hape, tha jole kö troa trotrohnine la itre ini qa hnine la Tusi Hmitrötr. Ngo jole pe troa trotrohnin la itre hna perofetan. Pine nemen? Ame la pane kepin ke, easë hi a trotrohnine la ketre hna perofetan ngöne la ijine kola eatr, maine e thupene pë hë. Maine easa ajane troa trotrohnine hnyawa la ketre hna perofetan, loi e troa xom asë la itre hna qaja. Maine tro hi sa xome la ketre hnepe götran, tro hë lai a tria la aqane tro sa trotrohnin. Celë hi la ka traqa kowe la hna perofetan hnei Ioela. Tro sa pane ce wang la hna perofetan celë, memine la itre kepin matre nyipiewekë troa saze la aqane troa trotrohnin ej.

3-4. Nemene la aqane trotrohnine së ekö la hna qaja ngöne Ioela 2:7-9?

³ E jë la Ioela 2:7-9. Hnei Ioela hna perofetan ka hape, troa xulu la iume sipa me haöthe la nöje Isaraela. Hna aceitunëne la inyiö ne la iume sipa me inyö ne la liona ke, itre ej a xen la nöjei feja ne la nöj! (Ioela 1:4, 6) Qaan ekö, easa mekun ka  hape, kola qaja la nöje i Iehova ka catre cainöj, nge pëkö ka atreine troa sewe angatr. Easë lo a mekun ka hape, ka hetre thangane la huliwa ne cainöj kowe la “nöj,” ene la itre atr hna musinën hnene la itre hene ne hmi. *

⁴ Maine tro hi sa e la Ioela 2:7-9, kösë ka nyipici hi la aqane qejepengön ekö la hna perofetan. Ngo ame la easa lapa mekun la nöjei hna qaja hnei Ioela perofeta, easa wangatrehmekun laka, loi e tro sa saze la aqane troa trotrohnin la hna perofetan. Tro sa ce wang la foa lao kepin.

5-6. Nemene la itre hnyinge hne së hna mekun ngöne la easa e la (a) Ioela 2:20? (b) Ioela 2:25?

⁵ Ame la hnapan, hnei Iehova hna perofetan göne la iume sipa, ka hape: “Tro ni a aiananyine me nyipunie la ate ne kolopi.” (Ioela 2:20) Maine Itretre Anyipici Iehova ju la ka nyihatrene la iume sipa, hnauëne kö laka, Iehova a qaja ka hape, tro Nyidrëti a aiananyine me helëne itre ej? (Ezek. 33:7-9; Mat. 28:19, 20) Eje hi, tha tro kö Iehova a aiananyine me helëne la itre hlue i Nyidrëti ka mele nyipici. Ngo Iehova pe a aiananyine la ketre ewekë maine ketre atr ka thele troa qanangazone la nöje i Nyidrë.

⁶ Ame la hnaaluene kepin, tre, hnei Iehova hna qaja ngöne Ioela 2:25, ka hape: “Tro ni a nyi hnane koi nyipunie la ite macate lo hna xeni hnene la kökö, me tit, me matro, me sipa, hnënge ishing’ atraqate lo hnenge hna upe koi nyipunie.” Hnei Iehova hna thingehnaean laka, tro Nyidrëti a “nyi hnane” kowe la itre atrene la nöj, la nöjei ewekë hna angazone hnei iume sipa. Celë hi matre, maine Itretre Anyipici Iehova ju la ka nyihatrene la iume sipa ka cainöjëne la Baselaia, tro hë lai a hape, ka hetre ethane kowe la itre atr la maca hnei angatr hna cainöjën. Ngo tha celë kö lai ka traqa pine laka, maca ne iamele la hna tro fë koi nöjei atr, nge kola aijijëne la itre atr ka ngazo troa ietra. (Ezek. 33:8, 19) Drei la ketre manathithi ka tru koi angatr!

7. Ame ngöne Ioela 2:28, 29, nemene la aqane tro sa trotrohnine la hna hape, “thupene lai”?

⁷ E jë la Ioela 2:28, 29. Ame la hnaakönine kepin, tre, ka ihmeku hnyawa la hna perofetan memine la aqane trongene la itre ewekë. Hnei Iehova hna qaja ka hape: “Thupene lai, tro ni a nenge la Ung.” Kolo hi lai a qaja ka hape, thupene la kola pexeje la huliwa hna ahnithe kowe la iume sipa. Ngo maine Itretre Anyipici Iehova ju la ka nyihatrene la iume sipa, hnauëne laka, tro Iehova a nenge la uati hmitrötre i Nyidrë, thupene la kola umuthe la huliwa ne cainöj? Eje hi laka, maine patre kö la ixatua ne la uati hmitrötr, tha tro jë kö a traqa koi itre hadredre lao macatre ne cainöj ne la Itretre Anyipici Iehova. Ketre, tha tro kö angatr a cile catr ngöne la itre ijine icilekeu maine ngöne la kola wathebone la huliwa i Iehova.

8. Drei la hna nyihatrene hnene la iume sipa ngöne Hna Amaman 9:1-11? (Wange ju la pane iatr.)

⁸ E jë la Hna Amaman 9:1-11. Tro pena sa ce wange la hnaafoane kepin. Easa mekun ekö laka, ame la iume sipa ngöne la tusi Ioela tre, kola qaja la huliwa ne cainöj. Hnene hi laka, hetrenyi e hnine la tusi Hna Amaman la ketre hna perofetan ka ceitu memine la hna qaja ngöne la tusi Ioela. Kola qaja lo iume sipa laka, ame la iqëmeken itre ej ke, ceitu me iqëmekene atr. Nge itre ej a ‘petrëne la ketre ewekë kösë korona gool.’ (Hna ama. 9:7) Hna aijijëne la iume sipa troa “akötrëne  la itre atr [ene la itre ithupëjia me Akötresie] ka pë hatre i Akötresie hune la itre göpadri angatr” koi faifi lao treu. Pine laka, celë hi eqeane la mele ne la itre sipa. (Hna ama. 9:4, 5) Eje hi, kola qejepengöne hnyawa e celë la itre hlue i Iehova hna iën. Angatr a catre tro fë la maca ne iameköti Iehova kowe la fene ka ngazo. Celë hi matre, kola hmahma la itre atr ka sine la fene celë.

9. Nemene la isapengönene la iume sipa hna qaja ngöne la tusi Ioela memine la hna qejepengöne hnei Ioane?

⁹ Nyipici laka, hetrenyi la itre mekun ka ceitu ngöne la hna perofetan ngöne la tusi Hna Amaman me Ioela. Ngo hetrenyi fe la itre mekun ka isapengön. Ame ngöne Ia hna perofetan hnei Ioela, tre, kola xeni la nöjei feja hnei iume sipa. (Ioela 1:4, 6, 7) Ame pena ngöne la hna meköle goeën hnei Ioane, kola ‘wathebone [la iume sipa] troa angazone la itre feja e cailo fen.’ (Hna ama. 9:4) Ketre, kola fetra qa kolopi la iume sipa hna öhn hnei Ioela. (Ioela 2:20) Ngo kola fetra qa hnine la hnaop la itre hna öhne hnei Ioane. (Hna ama. 9:2, 3) Öni Ioela perofeta mina fe laka, hna helëne la iume sipa. Ngo ame pena ngöne la tusi Hna Amaman, tre, kola nue la iume sipa troa umuthe la huliwa. Eje hi, tha kolo kö lai a qaja ka hape, tha madrine kö Iehova kowe itre ej.—Wange ju fe la hna eköhagen, “Lue Hna Perofetan Ka Ceitu—Iume Sipa Ka Isapengön.”

10. Qaja jë la ketre ceitun ka amamane laka, ijije hi troa xom la ketre ceitun ngo nyimu alien maine nyimu hna nyihatren hnene ej.

 ¹⁰ Kola amamane hnene la itre mekune cili ka isapengön laka, tha ka ceitu kö la lue tusi hna perofetan. Ngo hapeu, tha ka ceitu kö la iume sipa ngöne la tusi Ioela me Hna Amaman? Eje hi. Ijije hi troa xom e hnine la Tusi Hmitrötr la ketre ceitun. Ngo pine laka, nyimu aqane huliwan easë lai ceitun, haawe, nyimu alien maine nyimu ewekë hna nyihatrene hnene ej. Hanawang la ketre ceitun. Ame ngöne Hna Amaman 5:5, tre, hna hë Iesu ka hape, “Liona ne la lapa i Iudra.” Ngo ame ngöne 1 Peteru 5:8, tre, Diabolo la hna aceitunën me “liona ka ho.” Celë hi matre, thenge la foa lao kepin celë, ijije hi tro sa isa hnying ka hape, “Nemene hë la aliene la hna perofetan hnei Ioela?”

11. Tune kaa la aqane xatua së hnei Ioela 1:6 me 2:1, 8, 11, matre troa atrepengöne la iume sipa?

¹¹ Ame la easa xome la itre xaa xötr ne la tusi Ioela, easa trotrohnine laka, Ioela a perofetane la ketre isi. (Ioela 1:6; 2:1, 8, 11) Tro Iehova a upe la ‘hnënge isi’ (lo trongene isi angetre Babulona) matre troa lepe la angetre Isaraela ka tha idrei. (Ioela 2:25) Ketre, kola xulu qa “kolopi” la trongene isi angetre Babulona pine laka, ej a lepe la götrane kolopi ne la nöje Isaraela. (Ioela 2:20) Hna aceitunëne la trongene isi cili me iume sipa hna eatrongëne hnyawa. Öni Ioela: “Tro [la sooc] a isa trongëne la ite jë i [angeic]. . . . Tro nyudeni a fina agö ngöne la lapa, me nyenyape hune la tra etë, tro nyudeni a elë hune la ite uma, me Iöjë ngöne la ite mamalama kösë ite ate kë ’nö.” (Ioela 2:8, 9) Nemene la ka mama ngöne la ceitun? Kola mama la itre sooc, nge pëkö hnë zae. Ketre, pëkö ka atreine troa kötrene la trongene isi angetre Babulona!

12. Nemene la aqane eatr la hna perofetan hnei Ioela, göne la iume sipa?

¹² Eje hi, tune la iume sipa, kola isi me lep hnei angetre Babulona (maine angetre Kaledaia) la traon e Ierusalema lo 607 M.P.K. Öni Tusi Hmitrötr: “Hnei joxu ne Kaledaia, ate humuthe la ite thupëtesiji angate hnei taua . . . nge tha hnime kö la thupëtesiji me jajiny, me qat, me ka qia; hnei anganyidëti hna nue angat’ asë koi angeic. Nge hnei angate hna deuthe tije la ēnē i Akötesie, me thë tije la hag’ e Ierusalema, me deuthe tije la nöjei uma i joxu hnei eë, me angazone asë la ite inege hna ajan.” (2 A. l. ite jo. 36:17, 19) Celë hi matre, thupene la hna lepe la nöj hnei angetre Babulona, önine la itre atr: “Pë hë wen, nge pë fe kö ate me öni; nge hna nue kowe la ime i angete Kaledaia.”—Iere. 32:43.

13. Qaja jë la aliene la tusi Ieremia 16:16, 18.

¹³ Ame hë e thupene la 200 lao macatre ne perofeta Ioela, hnei Iehova hna upi Ieremia troa thingehnaeane la ketre ewekë ka troa traqa göne la isi cili. Kola qaja ka hape, tro la ithupëjia a thele hnyawa la Itretre Isaraela ka kuca la itre ewekë ka ngazo me othi angatr. “ ‘Hana wang, tro ni a upe la itete nyi thö ka ala nyimu, öni Iehova, mate nyi thö angat; nge thupene lai tro ni a upe la itete weji öni ka ala nyimu mate weji angate qa ngöne la ite wete asë, me ite shashala asë, me qa ngöne la ite kaqa ne git. . . . Tro ni a lu a nyi thupene la thina ka menu i angate memine la ngazo i angat.’ ” Eje hi, tune la hna perofetane hnei Iehova, thatreine kö la itre hnagejë me itre hnaxulu troa juetrëne la Itretre Isaraela ka tha ietra, ngöne la ijine kola troa lepi angatr hnei angetre Babulona.—Iere. 16:16, 18.

14. Eu la kola eatre la hna qaja ngöne Ioela 2:28, 29?

¹⁴ Hnei Ioela fe hna qaja la ketre maca ka loi. Öni angeic, tro hmaca mana la xen ngöne la nöj. (Ioela 2:23-26) Eje hi, tro ha mana elany la xeni ngöne la götrane u. Öni Iehova, “Tro ni a nenge la Unge hune la nöjei ate asëjëihë; nge tro ha perofetane hnei ite nekö i nyipunie trahmanyi me jajiny . . . Nge kete tro ni a nenge la Unge hune la ite hlue trahmanyi me föe.” (Ioela 2:28, 29) Ngo tha hna eatre kö ngöne lo kola bëeke qa Babulona hnei angetre Isaraela. Hna eatre pe lo itre hadredre macatre thupen, ngöne lo Penetekos 33 M.K. Nemene la ka anyipicine lai?

15. Thenge la Itre Huliwa 2:16, 17, nemene la mekun hna saze hnei Peteru qa ngöne la tusi Ioela 2:28, 29 nge nemene la aliene lai?

¹⁵ Jëne la uati hmitrötr, hnei Peteru aposetolo hna qaja ka hape, ka ihmeku la hna qaja ngöne Ioela 2:28, 29 memine la ka traqa ngöne lo ijine Penetekos. Hnei Iehova hna nunuëne la uati hmitrötre i Nyidrë, nge hnene la itre atr hna nyiqaane “ithanatane la itre ewekë nyine haine i Akötresie.” (Itre hu. 2:11) Hnei Peteru fe hna qaja la ijine cili, ngo hetre hnei angeic hna saze memine lo aqane qaja i Ioela perofeta. Nemen la mekun ka saze? (E jë la Itre Huliwa 2:16, 17.) Tha hnei Peteru kö hna nyiqaan memine la hnaewekë, hna hape, “nge thupene lai,” tune lo aqane cinyihan ngöne la tusi Ioela. Hnei angeice pe hna qaja ka hape: “Ngöne la itre drai ne la pun,” ene la itre drai ne la pun ne la nöje i Iudra. Ame hë e cili, tro Akötresieti a nue la uati hmitrötre i Nyidrë “kowe la nöjei pengöne atr.” Celë hi lai ka amamane laka, loi e troa pane nue ijin matre troa eatre la hna perofetan hnei Ioela.

16. Nemene la thangane la uati hmitrötre i Akötresie kowe la huliwa ne cainöj ekö, nge tune kaa fe enehila?

 ¹⁶ Thupene la hnei Akötresieti hna nunuëne la uati hmitrötre i Nyidrë ekö, hnene la itre Keresiano hna nyiqaane tro fë la maca e cailo fen. Celë hi hna qaja hnei Paulo aposetolo ngöne lo nyidrëti a cinyanyi koi angetre Kolose lo macatre 61 M.K. Öni nyidrë, kola cainöj “kowe la nöjei atr e cailo fene hnengödrai.” (Kol. 1:23) Ame la Paulo a xome la hnaewekë hna hape, “nöjei atr”, ke, nyidrëti hi a qaja la nöjei götrane e cailo fen hnei nyidrëti hna tro kow me itre sinatronge i nyidrë. Ketre, jëne la emenene la uati hmitrötre i Iehova, kola kökötre la huliwa ne cainöj enehila, nge “uti hë la cane la fene hnengödrai”!—Itre hu. 13:47; wange ju la hna eköhagen, “ Tro Ni a Nenge La Ung.”

17. Nemene la mekune ka saze ngöne la hna perofetan hnei Ioela, göne la iume sipa?

¹⁷ Nemene la mekun ka saze? Easa trotrohnine hnyawa la hna perofetan ngöne Ioela 2:7-9. Kola amamane ngöne la itre xötr laka, tha kolo kö a qaja la easa catre cainöj. Ngo kolo pe a qaja lo kola lepe la traon e Ierusalema hnei angetre Babulona lo 607 M.P.K.

18. Nemene la mekun hna tha sazene kö, göne la nöje i Iehova?

¹⁸ Nemene la mekun hna tha sazene kö? Hnene la nöje i Iehova e cailo fen hna catre cainöjëne la maca ka loi, jëne la nöjei jiane huliwa me aqane tro fë la maca. (Mat. 24:14) Thatreine kö la itre musi troa sewe së troa cainöj, tune lo hna qaja hnei Iesu. Jëne la ixatua i Iehova, easa catre cainöjëne la itre maca ka lolo! Ketre, easa sipo Iehova cememine la hni ka ipië, matre tro palahi a xatua së troa trotrohnine la itre hna perofetan hnei Tusi Hmitrötr. Xecie koi së laka, ngöne la nyipi ijin, tro Iehova a eatrongë së “kowe la nöjei nyipici”!—Ioane 16:13.