1. Bhav Russell ani tachea vangddeamnim obheas korunk kosli rit apnnaili, ani hi rit kiteak bori asli?

XEMBORA poros chodd vorsam poilim, Bhav C. T. Russell ani tache vangddi, mhunnche Devachea Utrachea videartheancho ek lhan zomo sangata mellon ietalo. Bible khoreanich Jehova Deva vixim, Jezu Krista vixim, mel’leanchea poristhiti vixim, ani soddvonne vixim kitem xikoita mhunn te zannam zaunk sodhtale. Tanchi obheas korchi rit sadi asli. Konn eklo ek prosn vichartalo, tea uprant te sogle mellon tea vixoi-a sombondit aslolim soglim versam ugddun polloitale. Sodh kelea uprant xevottak te kitem xikle tem te boroun dovortale. Bible-ant aslolim zaitim mhotvachim sotam somzonk Jehovan tea dadleank modot keli, ani tim sotam amkam aiz pasun mhotvachim asat.

2. Bible-antli bhasaunni ami somzonk proitn kortat tednam ami thodde pavtti kiteak chukonk xoktat?

² Punn, ek Bible-antlem mullavem sot somzunchea poros, ek Bible-achi bhasaunni somzonk kotthin mhunn Bible videartheank kollon ailem. Oxem kiteak? Tachem ek karonn mhunnttlear, Bible-antleo bhasaunneo choddxe pavtti purnn zata astanach vo teo purnn zalea uprant amkam anik bore toren somzotat. Punn, anik ek karonn pasun asa. Ek bhasaunni sarki somzonk zai zalear ami tea ak’khea bhasaunnecher dhean diunk zai. Ami bhasaunnechea ekach bhagacher dhean diun her bhag soddun dile zalear amchi somzonni chukonk xokta. Joel pustokant aslolea eka bhasaunnechea somzonne vixim oxench ghoddlam. Ami tea bhasaunnecher portun dhean dium-ia ani amchea somzonnent kiteak bodlav korche poddle tem zannam zaum-ia.

3-4. Atam meren, Joel 2:7-9-ant sangloli bhasaunni ami koxi somzotalim?

³ Joel 2:7-9 vachat. Tollachem bhirem Israel desacho  nas kortolem mhunn Joel-an bhasaunni kel’li. Xinva sarke dant, ani daddvonn aslole he axeche toll tea desant aslolea soglea zhaddank khaun uddoitole! (Joel 1:4, 6) Hi bhasaunni Jehovache lok kortat tea tollachea bhirea sarke addaunk zaina toslea porgottnnechea kamam vixim asa mhunn zaitea vorsam thaun ami chint’talim. Hem porgottnnechem kam desacher vo dhormik fuddaranchea tabeant aslolea lokancher nas korta toslo probhav haddtta mhunn ami somzotalim. *

⁴ Ami fokot Joel 2:7-9 vachlear, hachi somzonni oxich asa mhunn amkam disot. Punn, ami tea ak’khea bhasaunnecher bariksannen chintlem zalear amchea somzonnent bodlav korcho poddttolo mhunn amkam kollon ieta. Oxem korunk ami atam char karonnam polloum-ia.

5-6. (a) Joel 2:20-acher koslo prosn ubo zata? (b) Joel 2:25-acher koslo prosn ubo zata?

⁵ Poile suvater, tollachea bhirea vixim Jehovan kel’lea hea bhasaunnecher dhean diat. To oxem mhunntta: “Ut’torechea dusmanak [tollank] Hanv tumche thaun pois dhaddtolom.” (Joel 2:20) Toll, porgottnnent xis korchea Jezuchea hea adneak pallo ditat tea Jehovachea Sakxeank suchit korta zalear Jehova tankam kiteak pois dhaddttolo, vo dhanvddaitolo mhunn bhasaita? (Ez. 33:7-9; Mt. 28:19, 20) Jehovah aplea visvaxi sevokank nhoi, punn kitem-i vo konnui aplea lokancher add ieta tankam to dhanvddaitolo mhunn ami zannat.

⁶ Joel 2:25-ant sanglam tea vixim ami chint’tat tednam, amkam dusrem karonn melltta. Thoim Jehova oxem mhunntta: “Tumcher dhadd ghalunk Hanvem Mhojem tollanchem ani dhempeanchem, katorpi-kiddinchem ani chabddavpi-kiddinchem vhoddlem loskor dhaddlolem; tannim giraslolim vorsam Hanv tumche khatir bhorun haddtolom.” Dhean diat, tollan jem luksonn kel’lem tem Jehova ‘bhorun haddttolo’ mhunn bhasaita. Tor, toll porgottnni kortat tea Jehovachea lokank suchit korta zalear hacho orth tim porgott’ttat to sondex dusreank luksonn haddtta. Punn khorem mhunnttlear, to sondex thoddea noxttea lokank poschatap korunk modot korta ani tancho jiv salvar korta. (Ez. 33:8, 19) Tor tosleank hem porgottnnechem kam kitlem faideachem!

7. Joel 3:1, 2-ant sanglolim utram, “hea uprant” amkam kitem somzonk modot kortat?

⁷ Joel 3:1, 2 vachat. Hea bhasaunnent aslolea eka-fattlean-ek ghoddnneancher ami dhean ditat tednam amkam tisrem karonn melltta. Dhean diat, Jehova hanga mhunntta: “Hea uprant . . . Hanv Mhozo atmo ghaltolom vo votoitolom,” mhunnche tollanim apleak dilolem kam sompoilea uprant to aplo otmo ditolo. Toll, Devachea Rajeache porgottnnar zalear, tannim porgottnnechem kam kelea uprant Jehova aplo povitr otmo vo povitr xokti tancher kiteak votoitolo? Hem khorem ki tanchea kamacher virodh ani bondi aslear pasun tannim zaitim vorsam porgottnnechem kam kelem. Punn khorem mhunnttlear, te hem kam Devachea povitr xoktechea bogor korunkuch xokonasle.

8. Prokasovnni 9:1-11-ant sanglole toll konnank suchit kortat? (Masikachem fuddlem chitr polloiat.)

⁸ Prokasovnni 9:1-11 vachat. Atam ami chovtem karonn polloum-ia. Prokasovnni pustokant sangloli ek bhasaunni Joel-an sanglolea tollachea bhireachea bhasaunne sarkich asa, dekhun hi donui bhakitam porgottnnechea kamam vixinch asat mhunn ami somzotalim. Prokasovnni pustokant  asloli bhasaunni ek oslea tolleachea bhirea vixim uloita zankam munxanchem tondd asa ani “tanche tokler bhangarache mukutt koxe” asa. (Prok. 9:7) Te “kopalar Devacho xik’ko naslo tea monxank” ek toll jieta titlo vell, mhunnche, panch mhoine tras kortat. (Prok. 9:4, 5) Hem Jehovachea obhixikt sevokam vixim sangta koxem dista. Te hea noxttea sonvsara add Devacho zhoddttecho sondex dhiran porgott kortat. Ho sondex hea noxttea sonvsarak tenko ditat tankam boro lagona.

9. Joel-an polloil’lea tollam modem ani Juanvan polloil’lea tollam modem vegllem kitem asa?

⁹ Prokasovnni pustokant asloli bhasaunni ani Joel pustokant asloli bhasaunni thoddea ritin ek-sarki asa hem khorem, punn thoddea ritimnim veglli pasun asa. Dhean diat: Joel-an sanglolea bhasaunnent, tollan soglim zhaddam kabar korun uddoilim. (Joel 1:4, 6, 7) Juanvan polloilea dorxonant, “zhaddank kitench vaitt” korinaka mhunn tollank sanglolem. (Prok. 9:4) Joel-an polloil’le toll ut’tore vatten ietat. (Joel 2:20) Ani Juanvan polloil’le toll patalla thaun ietat. (Prok. 9:2, 3) Joel-an jea tolla vixim sanglem tankam dhanvddailolem. Punn, Prokasovnni pustokant jea tolla vixim sanglolem tankam dhanvddaunk na. Tankam tanchem kam sompounk dilem. Ani Jehova tancher khuxal naslo mhunn Bible-ant khoinch sangona.—“ Tollam Vixim Bhasaunneo—Ek-sarkem Punn Vegllem,” hem boks polloiat.

10. Joel-an ani Juanvan sanglole toll veg-vegllea vixoi-ank suchit korta mhunn dakhounk Bible-antlem ek udharonn diat.

 ¹⁰ Tor heo don bhasaunneo veglleo asat mhunn amkam kollon ieta. Hacho orth Joel pustokant sanglole te “toll” ani Prokasovnni pustokant sanglole te “toll” veglle asat kai? Hoi. Bible, thodde pavtti eka udharonnacho veg-vegllea poristhitint veg-vegllo orth dita. Udharonnak, Prokasovnni 5:5-ant, Jezuk ‘Judachea kullantlo Xinv’ mhunnttla, punn 1 Pedru 5:8-ant, Denvcharak ek ‘goroz ghaltolo xinv’ mhunnttla. Ami atam meren bhasabhas kel’lea char vixoi-a pormonnem Joel-achea bhasaunne vixim amkam aslolea poilinchea somzonnent bodlav korcho poddtta mhunn kollon ieta. Tor novi somzonni kitem zaun asa?

11. Toll kitem suchit korta tem zannam zaunk, Joel 1:6 ani 2:1, 8, 11 amkam koxi modot kortat?

¹¹ Ami Joel pustokantlim her versam vachtat tednam Joel provadi eka soinikachea akromonna vixim uloitalo mhunn kollon ieta. (Joel 1:6; 2:1, 8, 11) Aplea add voitolea Israelitkarank xikxa diunk, Jehova ek “vhoddlem loskor” (Babilonache soinik) uzar kortolo mhunn sanglolem. (Joel 2:25) Akromonn korpi soinikank ‘ut’torecho dusman’ mhunnttla, karonn Babilonache soinik Israelitkarancher ut’tore vatten akromonn korche asle. (Joel 2:20) Tea soinikank manddavollin voita toslea tollachea bhireak sor kelam. Tanchea vixim, Joel oxem sangta: “Zonn-eklo [soinik] ap-aple vatten nitt fuddem veta . . . Xaracher add te lotton poddtat; tanchea kottancher uddio marun choddtat; ghorancher voir sortat, choram porim zonelantlean bhitor sortat.” (Joel 2:8, 9) Chintun polloiat. Soinik soglea kodden asat. Liponk anik suvatuch na. Babilonkaranchea akromonna thaun konnuch apnnak vattaunk xokona!

12. Tolla vixim Joel-an keloli bhasaunni koxi purnn zali?

¹² Tolla sarke, Babilonkaramnim vo Kaldeikaramnim 607 K.X.A.-ant Jerusalem xaracher akromonn kelem. Hea vixim Bible oxem sangta: “Tanche add Kaldeiachea razak ie-so kelo ani Devmondirachea vonttim bhitor tanchea tornnatteank tannem jivexim marle. Khoincheach tornnattea cheddeak vo cheddvak, zannteak vo osoktak tannem doia dakhoili na . . . Tannem Sorvesporachem Mondir lhasun uddoilem, Jerusaleachim durgam moddlim, sogllea rajmahalancho gobor kelo ani sogllea molachea vostuncho nas kelo.” (2 It. 36:17, 19) Babilonkaramnim to des nas kelea uprant, to des polloita to lok fokot oxem mhunnonk xoktale: “Osadd poddlolo, monxam vo zonavoram ravonant toslo ani atam Kaldeikaranchea tabeant poddlolo des.”—Jer. 32:43.

13. Jeremias 16:16, 18-ant sanglam tem somzaiat.

¹³ Joel-an hi bhasaunni korun sumar 200 vorsam uprant, Jehovan Jeremiasak uzar korun hea akromonna vixim anik kitem bhasailem. Noxttim kamam korpi Israelitkar khoinsorui asum, akromonn korpi tankam sodhun kaddun dhorun vhortole mhunn Jehovan sanglem. “‘Zaitea kharviank apoun haddtolom—uloita to Sorvespor! ani te tankam ramponn marun dhortole; magir Hanv zaitea xikariank apoun haddtolom, ani te tankam dor-eka porvota ani dongra voilim ani khoddpachea khanchintlim sodun kaddun martole . . . Ani Hanv tanchea khotteponnachem ani patkanchem dupett farikponn ghetolom.’” Tor, poschatap korinant te Israelitkar doriant vo ranant liponk proitn kelear pasun, Babilonachea soineam thaun lipon ravonk xokche nant.—Jer. 16:16, 18.

14. Joel 3:1, 2-ant sanglolem tem kednam purnn zalem?

¹⁴ Joel atam borem kitem sangta. Porot stapnnecho sondex to atam dita. To des porot folladik zatolo. (Joel 2:23-26) Fuddarak oslo ek vell ieuncho asa, jednam Deva vixim zannvai bhorpur mellttoli. Jehova mhunntta, “Hanv Mhozo Atmo ghaltolom. Tumche put ani tumcheo dhuvo sodenx ditolim, . . . Gulam dadleam ani bailancher porian tea disamnim Hanv Mhozo Atmo ghaltolom.” (Joel 3:1, 2) Israelitkar Babilona thaun aplea desant porot ailea uprant tancher Devachi povitr xokti rokddich votounk na. Punn, 33 K.X. hea vorsachea Pon’nasavea disa, mhunnche, zaitea xekddea uprant tannem votoili. Hem ami koxim zannant?

15. Itihas 2:16, 17-ant sanglea pormonnem, Pedrun Joel 3:1-a thaun ul’lekh kortana utrant koslo bodlav kelo, ani hantuntlean amkam kitem kolltta?

¹⁵ Apostl Pedrun prerit zaun Joel 3:1, 2-ant sanglolem tem, tea Pon’nasavea disa ghoddlolea eka ojapachea ghoddnnek lagu kelem. Tea disa sokallim sumar nnov vorar Devan apli povitr xokti votoili ani jea konnak ti povitr xokti mell’lli, te “Devachim xrextt kortutvam” vixim sangonk lagle. (Itihas 2:11) Devachea preronnan Pedru Joel-achea bhasaunne thaun ul’lekh kortana, to matxim vegllim utram uzar korta. Tannem tachea utrant kitem bodol kele tacher tumi dhean dilam? (Itihas 2:16, 17 vachat.) To thoim survatek “hea uprant” him utram mhunnchea bodlek, “nimannea disamnim” mhunntta. Mhunnche, Judevanchea kallachea nimannea disamnim, “sogllea monxamkullacher” Dev apli povitr xokti ghaltolo vo votoitolo mhunn tannem sanglem. Hantuntlean, zaito temp soron gelea uprant Joel-an sangloli bhasaunni purnn zali mhunn kollon ieta.

16. Poilea xekddeant Devan apli xokti votoilolean progottnnechea kamacher koslo porinnam zalo, ani amchea kalla vixim kitem?

 ¹⁶ Poilea xekddeantlea Kristanvancher Devan apli xokti votoilea uprant oslem ek porgottnnechem kam suru zalem jem ek dis sonvsarbhor zaunchem aslem. Sumar 61 K.X.-ant, apostl Paulun Koloskarank apli chitt boroili tednam “xubhvortoman mollba khala aslolea sogllea monxam modem porgott zalam” mhunn sangonk pavlo. (Kol. 1:23) Hanga Paulun “sogllea monxam modem” oxem mhunnttlem tednam, to ani her zann provas korunk xoktale tea prithumechea soglea zagea vixim to uloitalo. Ani aiz Jehovachea povitr xoktechea adaran, porgottnnechem kam anik chodd vaddot gelam, mhunnche “prithumechea ximam porian”!—Itihas 13:47; “ Hanv Mhozo Atmo Ghaltolom vo Votoitolom,” hem boks polloiat.

17. Tolla vixim Joel-an kelolea bhasaunnechea somzonnent kitem bodol zala?

¹⁷ Kitem bodol’lam? Joel 2:7-9-ant sanglolea bhasaunne vixim atam amkam anik sarki somzonni mell’llea. Sompea utramnim sangpachem mhunnttlear, him versam amchea urbebhorit porgottnnechea kamam vixim sangona punn Babilonachea soineamnim 607 K.X.A.-ant Jerusalemacher akromonn kel’lem tea vixim sangta.

18. Jehovachea lokam vixim kitem bodlonk na?

¹⁸ Kitem bodlonk na? Jehovacho lok porgottnnecheo sogleo vatto uzar korun, soglea zageancher bori khobor porgott korit asat. (Mt. 24:14) Khoinchench sorkar bondi haddun amchem porgottnnechem kam bond korunk xokchem na. Jehovachea besanvan, poilim kednach korunk na titlea chodd promannan ani dhiran Devachea Rajeachi bori khobor ami porgott korit asat! Bible-antleo bhasaunneo somzonk margdorxonak lagon ami khaltikaien Jehovacher patieun ravtat, karonn to sarkea vellar “purnn sotachea vatten choloitolo” mhunn amkam khatri asa”!—Juanv 16:13.