1. a) ¿Russell aune nitre sribikä ben nämäne ja tötike ño? b) ¿Ye köböire dre namani bare?

KÄ NIKANINA 100 biti bäri ta yete, ja mräkä Russell aune nitre sribikä ben jatani ja tötike Biblia tä dre driere Jehová, Jesukristo, gata aune ni kökanintari yebätä. Nämänentre ja tötike nuäre. Ni iti nämäne kukwe ngwentari, ye bitikäre niaratre nämäne texto nämäne blite kukwe yebätä ye jökräbätä ja tötike. Kukwe nämäne nüke gare ietre ye nämänentre tike täräbätä. Jehová köböire, kukwe ütiäte drieta Bibliabätä ye keta kabre namani gare nitre kristiano yei aune kukwe ye täbe ütiäte ni kräke nengwane.

2. ¿Ñobätä ruäre ngwane profecía Bibliabätä raba nüke gare jene nie?

² Akwa ja mräkätre yei nükani gare, kukwe metre Bibliabätä rükadre gare kwin nie ye bäri nuäre profecía Bibliabätä mikadre gare kwin jai ye kräke. ¿Ñobätä profecía Bibliabätä mikadre gare kwin jai ye ñaka nuäre? Kena, profecía kite nemen bare o namanina bare ngwane tä nemen bäri nuäre ni kräke mikakäre gare jai. Ketebukäre, profecía niebare ngwane, dre nämäne nakainkä ye mikadre gare jai ye ütiäte krubäte ne kwe rükadre gare kwin nie. Nikwe kukwe keteitibe mikadre gare jai profeciabätä ngwane, kukwe raba nüke gare jene nie. Aune ye erere namani bare profecía keteiti niebare Joelkwe yebätä. Ani ngwenta törö jai aune ñobätä ni rabadre mike gare bäri kwin jai ye ani mike ñärärä.

3, 4. ¿Joel 2:7-9 ye nämäne nüke gare ño käne nie?

 ³ (Ñäkädre Joel 2:7-9 yebätä). * Tröda kwati krubäte käkwe kä Israel juain ngwarbe mikani gare Joelkwe. Tröda ye krärä aune tu kwra león kwrere aune dre dre tä jiete juanta ngwarbe kwe (Joel 1:4, 6). Kä kwati krubäte te, kukwe ye nämäne juta Jehovakwe tä kukwe driere jankunu bämike ni nämäne nütüre. Tröda kwati tä kä juen ngwarbe ye kwrere kukwe drie ye nämäne mate tare nitre iglesia ngwarbe yebätä ni nämäne nütüre. *

⁴ Nikwe ñäkädre Joel 2:7-9 ye aibebätä ngwane, kukwe mikata garebätä raba tuin metre nie. Akwa, kukwe nieta profecía ye känenkri aune bitikäre ye nikwe mikadre gare jai ngwane, kukwe ye dre gärätä ni rabadre mike gare jene mada. ¿Ñobätä? Kukwe ketabokäbätä ye ani mike gare jai.

5, 6. a) ¿Kukwe meden nita nemen ngwentari jai Joel 2:20 yebätä? b) ¿Kukwe meden nita nemen ngwentari jai Joel 2:25 yebätä?

⁵ Kena, Jehovakwe dre käbämikani Joel 2:20 ye ani mike gare jai. Jondron kite ngwitärikri ye abokän tröda kwati yebätä blitata, ye Jehová näin ngwena mobe mentokwäre nitrebätä käbämikani kwe. Ni testiko Jehovakwe tä kukwe driere aune nitre tötike Jesukwe niebare erere ye bämikata tröda yebiti. Ye erere akräke, ¿ñobätä Jehová rikadre ngwena mobe mentokwäre? (Ezeq. 33:7-9; Mat. 28:19, 20). Dreta ja mike Ngöbö rüere yebrä niarata kitekä mobe, akwa ye erere ñaka nuainta kwe nitre niara mikaka täte yebätä.

⁶ Ketebukäre, Jehovakwe dre niebare Joel 2:25 yebätä ani töbike. Niebare kwe: “Kä kwäbe te tröda ngwikebiti, tröda ngwike ñaka, tröda jondron gatekä aune tröda jondron kwetaka käkwe nura ngwä kwetani munkän ye jökrä tikwe ütiä biainta munye, ye jondron kwati krubäte tikwe juani mun rüere”. Tröda käkwe dre nuainbare ye Ngöbökwe ükaiteta käbämikani kwe. Tröda ye tä ni testiko Jehovakwe bämike akräke, ¿ñobätä kukwe drieta nikwe ye tä kukwe tare mike nemen bare niedre kwe? Erametre, kukwe drieta nikwe ye tä nitre mike kwäre aune raba nitre käme töi kwite (Ezeq. 33:8, 19). Kukwe ye ñaka käme nitre kräke, ¿ñan ererea?

7. Tröda kä juandre ngwarbe ünä “ye bitikäre” Jehovakwe ja üai deme mikai bititre nieta Joel 2:28, 29, ¿ye tä dre mike gare?

⁷ (Ñäkädre Joel 2:28, 29 yebätä). * Ketamäkäre, profecía ye rakadrekä ño jatäri ye ani mike gare jai. Tröda käkwe kä juandre ngwarbe ünä ye bitikäre Jehovakwe ja üai deme mikai bititre niebare kwe. Tröda tä ni Gobran Ngöbökwe kukwei driekä ye bämike akräke, ¿ñobätä kukwe driedre ünä ye bitikäre Jehovakwe ja üai deme mikadre nibiti? Erametre üai deme ñaka ni dimikadre akräke, ni ñaka raba kukwe driere kä kwati krubäte te ni rüe rakadrekä o gobrantre sribi ñäkäidre nie yebiti ta.

8. ¿Trödabätä blitata Apocalipsis 9:1-10 ye tä nire nire bämike? (Üai kena täräkwatabätä mikadre ñärärä).

⁸ (Ñäkädre Apocalipsis 9:1-10 yebätä).  Ketabokäkäre, tröda kwati niebare Joelkwe ye nämäne kukwe drie bämike ni nämäne nütüre ñobätä ñan aune tärä Apocalipsis yebätä profecía ye kwrere tärä keteiti. Yete tröda kwati ngwäre ni kä nebätä erere aune “korona orore” tä dokwäbiti mikata gare (Apoc. 9:7). Ye tä nitre “Ngöbö kä ñakare ketaninkä okokrä btä” mike ja tare nike sö krärike te nieta, ñobätä ñan aune tröda tä nüne sö ye näre te. Nitre ngwain ja tare nike ye abokän nitre ja mikaka Jehová rüere gärätä (Apoc. 9:4, 5). Profecía yebrä tä blite Jehovakwe nitre dianinkä nänkäre kä kwinbiti yebätä, ñobätä ñan aune Ngöbökwe kukwe tare nuaindi nitre blobätä ye mikata gare metre kwetre aune ye ñaka tä mate kwin nitrebätä.

9. ¿Tröda tuani Joelkwe aune tuani Juankwe ye ñobätä ñaka ja erebe?

⁹ Profecía tä Apocalipsis aune profecía niebare Joelkwe ye kukwe ruäre känti ja erebe, akwa kukwe mada känti ñaka ja erebe. Ñodre, trödabätä blitabare Joelkwe yekwe krikä jökrä kwetani, akwa tröda tuani Juankwe “ye abko käkwe ñan mikä kwetadre” niebare (Joel 1:4, 6, 7; Apoc. 9:4). Tröda tuani Joelkwe ye jatani ngwitärikri, akwa tuani Juankwe ye jatani Kä Timon yekri (Joel 2:20; Apoc. 9:2, 3). Tärä Joel yete Jehová näin tröda ngwena mobe mentokwäre nieta, akwa tärä Apocalipsis yete tröda ye tuainmetre kwe sribi ngwen krüte mikata gare. Trödabätä blitata Apocalipsis ye Ngöbö ñaka kain ngäbiti  nie ñaka jire (Recuadro “ Profecía ketebu tä blite trödabätä: bäsi ja erebe akwa kukwe jene jene mikaka gare” ye mikadre ñärärä).

10. ¿Bibliabätä kukwe keteiti arabebiti kukwe jene jene bämikata texto madakänti ye ñobätä gare nie?

¹⁰ Kukwe ye tä mike gare, profecía ketebu ye ñaka tä blite kukwe arabebätä. Tröda tärä Joelbätä ye ñaka ja erebe tröda tärä Apocalipsis yebe. Ye ñaka rabadre ni töi mike ñan krütare, ñobätä ñan aune Bibliabätä kukwe keteiti arabebiti kukwe jene jene bämikata texto madakänti. Ñodre, Apocalipsis 5:5 yete, Jesús ye “kwra lion” kite Judá mräkätre yekri nieta, akwa 1 Pedro 5:8 yete Diablu ye bämikata “kwra lion” tä niken ngwäne krikri ye kwrere. Profecía Joelkwe yebätä nikwe kukwe ketabokä kädrite yekänti kukwe jene mikata gare, aisete ni rabadre profecía ye mike gare bäri kwin jai.

11. Tröda ye tä nire bämike, ¿ye Joel 1:6 aune 2:1, 8, 11 tä ni dimike ño mike gare jai?

¹¹ Nita bersikulo mada mada tä profecía Joelkwe ye mike ñärärä ngwane, Joel nämäne blite nitre rükä käkwe rü gaikä yebätä nüke gare nie (Joel 1:6; 2:1, 8, 11). Jehovakwe nitre rükä babilonio bämikani “jondron kwati krubäte” ye kwrere, abokänbiti nitre israelita mikai ja ngie nuin niebare kwe (Joel 2:25). Nitre rükä kä dianka jai ye jatai ngwitärikri nieta, ñobätä ñan aune nitre babilonio jatadre yekri kä Israel diankäre jai (Joel 2:20). Nitre rükä babilonio ye bämikata tröda kwati tä ja ükaninte kwin ye erere. Nitre rükä yebätä Joel tä ne niere: “Ükaninte jatäri erere tätre näin. [...] Tätre juta den jai, tätre nen kibiti kwinta. Tätre näin jubätä kwin, tätre näin ventanante ta ni gokä kwrere” (Joel 2:8, 9). Mä tädre yete ye bämike ja töite: nitre rükä tä kä jökrä känti, kä ñaka ja ükakäre aune ni ñaka raba ngitie jire iti nitre babilonio yebätä.

12. ¿Joel kukwe niebare trödabätä ye namani bare ño?

¹² Tröda tä kä juen ngwarbe ye erere, nitre babilonio (o nitre caldeo) käkwe Jerusalén diani jai kä 607 Kristo känenkri. “Rei nitre caldeokwe” dre nuainbare juta yekänti ye Biblia tä mike gare krörö: “Monsotre bati kämikani ngitrabiti [...]. Monsotre bati, meritre bati kaibe, nitre umbre aune nitre di ñakare ye ñaka mikani tuin bobre kwe jai. Ngöbökwe jondron jökrä mikani kisete”. Biti tä niere: “Ju Ngöbö metre yekwe kukwani kwe, ki Jerusalén ye dikaninte kwe, torre sribebare kwin ye jökrä kukwani kwe aune jondron ütiäte ye jökrä juani ngwarbe kwe” (2 Crón. 36:17, 19). Nitre babilonio käkwe kä ye juani ngwarbe ye bitikäre, nitre nämäne niken kä yekänti ta nämäne niere: “Kä tä nötare, ni nire ñaka, jondron nire ñaka aune kä ne mikani nitre caldeo kisete” (Jer. 32:43).

13. ¿Jeremías 16:16, 18 ye dre gärätä?

¹³ Profecía niebare Joelkwe ye bitikäre kä nikani 200 ta ngwane, Jehovakwe Jeremías mikani kukwe mada mike gare kukwe yebätä. Ye abokän nitre rükä käkwe nändi kisere nitre israelita töi käme jiebiti aune niaratre jökrä kai ngite kwetre. Jeremías 16:16, 18 tä niere: “Tikwe nitre gwakitaka kwati ye käräi nieta Jehovakwe, aune niaratre käkwe mun kai. Ye bitikäre tikwe nitre muntiaka kwati ye käräi, aune niaratre käkwe mun muntiadi kä tokwäte, ngudrebiti aune jäkwata mäkäre yete”. Biti tä niere: “Dre nuainbare kwetre aune ja mikani ngite kwetre yebätä tikwe mikai ja ngie nuin täte”. Nitre israelita ñaka ja töi kwitani yei kä ñaka kwani ja ükakäre mren yete aune  kä tokwäte. Ja ükani medente kwetre akwa nitre rükä babilonio käkwe kani ngite.

14. ¿Joel 2:28, 29 ye ñongwane namani bare?

¹⁴ Ye bitikäre Joelkwe kukwe kwin mikani gare. Ye abokän nura ngwä rabaita kä Israel yete (Joel 2:23-26). Aune kä ja känenkäre yete mrö ja üaire rabai krubäte. Jehovakwe käbämikani: “Tikwe ja üai deme mikai nitre bätäkäbiti. Ngäbriänkätre merire brare käkwe kukwe rakaikä mikai gare [...]. Aune tikwe ja üai deme mikai nitre klabore merire brare tikwe yebiti” (Joel 2:28, 29). ¿Joel kukwe niebare ye ñongwane namani bare? Ye ñaka namani bare nitre israelita nükaninta ja käite ye ngwane. Ñakare aune kukwe ye namani bare kä nikani 600 ta ye bitikäre. Pentecostés kä 33 yete namani bare. ¿Ñokänti gare nie?

15. Hechos 2:16, 17 yekänti Pedrokwe Joel 2:28 kädekaninte ngwane, ¿kukwe meden ñaka ja erebe niebare kwe aune ye dre gärätä?

¹⁵ Kukwe nakaninkä Pentecostés kä 33 ye Ngöbökwe Pedro töi mikani kete Joel 2:28, 29 yebe. Ñänä okwä krä ökän näre dekä Ngöbökwe üai deme mikani nitrebiti aune namanintre “blite jondron kri Ngöbökwebätä” kukwe jene jenebiti (Hech. 2:11, NGT). Akwa Joel kukwe niebare ye Pedrokwe kädekaninte ngwane, kukwe kena ye ñaka kädekaninte ja erebe kwe (Ñäkädre Hechos 2:16, 17 yebätä). Jehovakwe Joel mikani profecía ye kömike krörö: “Ye bitikäre tikwe ja üai deme mikai nitre bätäkäbiti”. Akwa Jehovakwe Pedro mikani kukwe ye kädeketeta krörö: “Kä mrä angwane ni nünanka kä ketareketare te kwäräkwärä, btä tikwe ja Üai Deme mikadi täte”. “Kä mrä” o kä krütai niebare ye abokän kä namanina braibe ne kwe Jerusalén  aune templo gadrete meden gärätä. Ye tä mike gare kä nikani kwati krubäte ta ngwane profecía Joelkwe namani bare.

16. a) ¿Ngöbö üai deme köböire kukwe driebare ño siklo kena yete? b) ¿Ngöbö üai deme köböire kukwe drieta ño ni näire?

¹⁶ Ngöbökwe üai deme mikani nitre kristiano siklo kenabiti ye bitikäre kukwe drie jatani krubäte. Apóstol Pablo tärä Colosenses tikani kä 61 ye näire ngwane, kukwe kwin ye driebarera “kä jökräbti temen” niebare kwe (Col. 1:23). Ye abokän kä meden känti nitre nämäne nüne kä ye näire yekänti kukwe driebare meden gäräbare kwe. Ni näire, üai deme Jehovakwe dite krubäte ye köböire kukwe drieta nikwe ye jätä niken “kä jökräbti temen” (Hech. 13:47; recuadro “ Tikwe ja üai deme mikai nitre bätäkäbiti” ye mikadre ñärärä).

17. ¿Joel kukwe niebare trödabätä ye nüke gare ño nie nengwane?

¹⁷ ¿Kukwe mrä meden mikata gare? Nengwane profecía Joel 2:7-9 ye nüke gare bäri kwin nie. Bersikulo ye ñaka tä blite kukwe drieta nikwe kä jutobiti yebätä, ñakare aune tä blite nitre rükä babilonio käkwe Jerusalén diani jai kä 607 Kristo känenkri yebätä.

18. ¿Ni Jehová mikaka täte ye tä dre nuainne jankunu?

¹⁸ ¿Dre ñaka mikata gare jene? Ni Jehová mikaka täte tä kukwe kwin driere jankunu kä jökräbiti tibien aune nita drekwa nuainne nuainkäre täte (Mat. 24:14, TNM). Gobrantre sribi nikwe ñäkäidre akwa ye ñaka ni ketaibätä kukwe driekäre jankunu. Aune Jehová die köböire ni ñaka kä jürä ngwain jabätä Gobran Ngöbökwe ye mikakäre gare jankunu. Jehovakwe ni jie ngwandre ye nita känene jankunu ne kwe profecía Bibliabätä ye rükadre gare nie. Aune kä debe näre te Jehová näin ni ngwena “kukwe era metre jire jökrä” yekänti (Juan 16:13).