1. Anni nga metodo na paggigiammu i kingngua ni Brother Russell anna na kakavvuluna, anna ngatta efektibo yatun?

MATURU tu tanga-siglo i nappasa, nigafu ni Brother C. T. Russell anna na kakavvuluna, i baddi nga grupo na estudiante ira na Uvovug na Dios, i maggarammammung. Kayàda ammuan nu anni talaga i ituttuddu na Biblia meyannung kani Jehova nga Dios, Jesu-Cristo, i situasion na natay, anna i tavvu. Simple laman i metodo na paggigiammuda. Egga i mamalattuag tu pakkiavu, tapus usitakkan na grupo i kada teksto meyannung tatun nga topiko. Kabalinna, iturada i nositoda tu punto ira. Gukaban na uffun ni Jehova, nadiskubre danatun nga sinsero nga Cristiano nga lallaki i napakaru nga importante nga kinakurug ta Biblia nga tagibalorattam adde ta maddaggun.

2. Ngatta makkamali nu karuan i konklusiottam ta pangalippawa ta profesiya ta Biblia?

² Ngem ari nabbayag, nammuan danatun nga estudiante na Biblia nga mas mariga alippawatan i tadday nga profesiya ta Biblia anne ta alippawatan i tadday nga tuddu ta Biblia. Ngatta kunnatun? Angngariganna, mas alistu nga malippawa i profesiya ira ta Biblia durante nga mesissimmu onu kabalin nga nesimmu yatun. Ngem egga paga i tanakuan nga rason. Tapenu fustu i pangalippawa ta tadday nga profesiya, mawag tu mekonsidera i kontekstona. Nu maffokus ittam laman ta tadday nga aspeto na profesiya anna ariattam ikonsidera i karuan nga detalye, baka mali i konklusiottam. Gittana kunnatun i nesimmu ta tadday nga profesiya ta libru na Joel. Repasuattam yatun nga profesiya anna gigiammuattam nu ngatta kawagan nga moli i maddaggun nga pakalippawa tam tatun.

3-4. Anni i maddaggun nga pakalippawa tam ta profesiya nga mabibbig ta Joel 2:7-9?

 ³ Bibbigan i Joel 2:7-9. Niprofesiya ni Joel nga daralan na durun ira i davvun na Israel. Megafu ta i ngipan anna apangalda ay kagitta na ngipan anna apangal na leon ira, kanan danaw nga insekto i ngamin nga mulu-mula ta Israel! (Joel 1:4, 6) Aru nga dagun nga i pangalippawa tam tatun nga profesiya ay isimbolona i pallayyagayya na totolay ni Jehova nga kagitta na ari mapagimmang nga pangatake na napakaru nga durun. Nalippawa tam nga makadaral i efekto naw nga pallayyagayya ta ‘davvun,’ onu ta totolay nga kontroladu na lider ira na relihion. *

⁴ Nu bibbigattam laman i Joel 2:7-9, gittana fustu yatun nga pakalippawa. Ngem nu ikonsidera tam i konteksto natun nga profesiya, masingattam nga mawag tu uliattam i pakalippawa tam. Usitakkattam i appa nga rason nu ngatta.

5-6. Anni nga pakkiavu i ikonsidera tam nu bibbigattam i (a) Joel 2:20? (b) Joel 2:25?

⁵ Ollu, kunnaw i promesa ni Jehova meyannung ta pangatake na durun ira: “Papanawakku i taga-sigiran ira [i durun ira] nikamu.” (Joel 2:20) Nu irepresenta na durun ira i Saksi ira ni Jehova nga tumuttul ta bilin ni Jesus nga mallayyagayya anna mangngua tu disipulos, ngatta gafu nipromesa ni Jehova nga papanawanna ira? (Eze. 33:7-9; Mat. 28:19, 20) Manawag nga ari nga papanawan ni Jehova danuri matalo nga aripanna, nu ari, yuri kumokkontra ta totolena.

⁶ Mekadua, ikonsidera i netura ta Joel 2:25. Tatun, kinagi ni Jehova: “Itolì i nawawan ira nikamu ta daga-ragun nga zinaral nakamu na napakaru nga durun, awan tu payana nga durun, vutu nga durun, anna na manaral nga durun, i dakal nga armadà nga zinog ku nikamu.” Sifutan nga nipromesa ni Jehova nga ‘itolina i nawawan’ megafu ta zinaral ira na durun. Nu irepresenta na durun danuri totolay ni Jehova nga mallayyagayya, gittana mallawan nga makadaral i mensahe nga iproklamada. Ngem makepaliag-inango yatun nga mensahe anna mapaguyu natun i karuan nga marake nga mabbabawi. (Eze. 33:8, 19) Anni mabba kastana nga bendision natun para nira!

7. Ta Joel 2:28, 29, anni i ipalippawa nittam na uvovug ira nga “kabalin natun”?

⁷ Bibbigan i Joel 2:28, 29. Ikonsidera i mekatallu nga rason—i patturunug na nesimmu ira ta profesiya. Nasingammu kari nga kinagi ni Jehova: “Kabalin natun, iyaluvù noka i espiritù”; kayàna kagian, kabalin nga netuppal na durun ira i trabahuda? Nu danuri mangilayyagayya ta Pappatulan na Dios i durun ira, ngatta gafu ta iyaluvu laman nira ni Jehova i espirituna kabalidda nga metuppal i pallayyagayyada? Kakuruganna, nu awan tu uffun na makapangngua nga masanto nga espiritu na Dios, ariadda vuluvuga nga nakapattulu-tuloy nga mallayyagayya ta piga dekada ta arubang na pangokkontra anna maski paga lagu ta pangigamma ta trabahuda.

8. Sinni i irepresenta na durun ira nga nadeskriba ta Nepakannammu 9:1-11? (Innan i letratu ta vungun.)

⁸ Bibbigan i Nepakannammu 9:1-11. Innattam ngana i meka-appa nga rason. Ta nappasa, kagiattam nga i pangatake na durun ira nga dineskriba ni Joel ay irepresentana i trabahu tam nga pallayyagayya megafu ta tadday nga parehu nga profesiya nga mabibbig ta libru na Nepakannammu. Dineskriba natun nga profesiya i napakaru nga durun nga  nammuka tu kagitta na tolay anna egga i “kagitta na korona nga vulawan” ta uluda. (Nep. 9:7) Parigatadda “danuri laman i totolay [kalaban ira na Dios] nga awan tu marka na Dios ta frente da” ta unag na lima vulan, i kapaddu na inango na tadday nga durun. (Nep. 9:4, 5) Kagitta na ideskriba naw i nazelugan ira nga aripan ni Jehova. Magutuda nga iproklama i pamanunnu na Dios kontra taw nga marake nga sistema na ganna-gannug anna megafu tatun, ari nga makapagimammo danuri massussuporta tatun.

9. Anni i dakal ira nga nadduman na durun ira nga nasingan ni Joel ta nasingan ni Juan?

⁹ Fustu nga egga napparehuan na profesiya ta Nepakannammu anna ta Joel. Ngem, egga ira i dakal nga naddumadda. Ikonsidera yaw: Ta profesiya ni Joel, daralan na durun ira i mulu-mula. (Joel 1:4, 6, 7) Ta sirmata ni Juan, ‘netaddan ta durun ira tu ariadda nga daralan i anni laman nga mula.’ (Nep. 9:4) I durun ira nga nasingan ni Joel ay naggafu ta sigiran. (Joel 2:20) Danuri nasingan ni Juan ay nallawan ta avvu. (Nep. 9:2, 3) I durun nga dineskriba ni Joel ay napapanaw. Ta Nepakannammu, ari nga napapanaw i durun ira, nu ari, nepamavulun nga balinadda i trabahuda. Awan tu mabibbig ta Biblia nga mangipasingan nga ari magayayya nira si Jehova.—Innan i kahon nga “ Profesiya ira Meyannung ta Durun Ira​—I Napparehuan Anna Naddumadda.”

10. Mangiyawa tu angngarigan nga mangipasingan nga i durun ira nga dineskriba ni Joel anna ni Juan ay madduma i irepresentada.

 ¹⁰ Ipalippawa nittam na dakal nga nadduman ira na dua nga profesiya nga awan tu koneksiodda ta kataggi-tadday. Kakkagiattam kari nga i durun ira nga dineskriba ni Joel ay ari tu parehu ta durun ira nga nerekord ta libru na Nepakannammu? Wan. Ta Biblia, gagangay ngana laman nga egga i madduma nga kebalinan na tadday nga simbolo nu tanakuan i keyusan natun. Angngariganna, ta Nepakannammu 5:5, nagalan si Jesus bilang ‘i Leon nga naggafu ta tribu ni Juda,’ ngem ta 1 Pedro 5:8, nadeskriba i Diablo bilang “mangngana-nganangngar nga leon.” Ipasingan gafu naw nga appa nga rason nga ginigiammu tam nga kawagan i panguli ta eksplanasion ta profesiya ni Joel. Anni gafu yatun?

11. Kunnasi ittam moffunan na Joel 1:6 anna 2:1, 8, 11 meyannung ta panakkilalan na durun ira?

¹¹ Nu usitakkattam i karuan nga versikulo ta profesiya ni Joel, malippawa tam nga iprofesiyana i tadday nga pangatake na suddalu ira. (Joel 1:6; 2:1, 8, 11) Kinagi ni Jehova nga usanna i ‘dakal nga armadana’ (i Babilonio ira nga suddalu) tapenu kastigowan danuri ari minattuppal nga Israelita. (Joel 2:25) Fustu laman nga magalan nga “taga-sigiran” danuri manakup nga suddalu megafu ta i Babilonio ira ay sakupadda i Israel maggafu ta sigiran. (Joel 2:20) Neyarig yatun nga armada ta tadday nga organisadu nga pangatake na napakaru nga durun. Meyannung nira, kunni Joel: “Dara-darechu laman i kada [suddalu]. . . . Atakeyadda i siudad anna kareladda i pader. Kayatadda i babalay anna tullung ira ta bentana ira nga kunna makkoko.” (Joel 2:8, 9) Maimajimmu kari i eksena? Egga i suddalu ira ta interu pallevu. Awan tu pattaguan. Awan tu makatammang ta espada na Babilonio ira!

12. Kunnasi nga netuppal i profesiya ni Joel meyannung ta durun ira?

¹² Kunna pangatake na durun ira i pinassakup na Babilonio ira (onu, Caldeo ira) ta siudad na Jerusalem ta 607 B.C.E. Mabibbig ta Biblia: “I patul na Caldeo ira, nga namatay ta abbarabbing nga lallaki gukaban na espada . . . , arianna nikabbi i mabbing nga lalaki onu i birhen, lallakay anna babbako onu i mataki. Niyawa na Dios i ngamin nga gannug ta limana. Sinuggina i balay na kurug nga Dios, zinabbana i pader na Jerusalem, sinuggida gukaban na afi i ngamin nga tore, anna zinaralda ngamin i gannug nga egga balorna.” (2 Cro. 36:17, 19) Turi ta nadaral ngana na Babilonio ira i siudad, kakkagian danuri makasingan: “Awan tu serbi naw nga lugar nga awan tu tolay anna ayamna anna neyawa ngana yaw ta Caldeo ira.”​—Jer. 32:43.

13. Iyesplika i kebalinan na Jeremias 16:16, 18.

¹³ Ma-200 dagun kabalin na profesiya ni Joel, inusa ni Jehova si Jeremias tapenu iprofesiya i tanakuan paga meyannung taw nga pangatake. Kinagina nga danuri manakup ira ay alegadda tu mapia i Israelita ira nga nagangngua tu marake ira nga gannug anna gafutadda ira ngamin. “‘Mangidog ngà tu aru nga gumaggimmanango,’ kunni Jehova. ‘Anna alegan ira danatun tapenu gafutan. Kabalin natun ay maddog ngà tu aru nga gumangnganu, anna alegan ira danatun ta kada vukig anna kada bakulug anna ta bassi ira na dadda. Ipapagà labbi nira tu buu i ngamin nga liwa anna tagarulida.’” Ari nga metagu maski na bebay anna vuku-vukig ira danuri ari mabbabawi nga Israelita ta manakup ira nga Babilonio.​—Jer. 16:16, 18.

14. Kanni nga natuppal i Joel 2:28, 29?

¹⁴ Egga i makasta nga balita nga tumunug nga kagian ni Joel. Mabbalin tu produktibo uli i davvun. (Joel 2:23-26) Anna duttal i tiempo ta mappange nga napakaru i espiritual nga makan nga mala. “Iyaluvù noka i espiritù ta kada klase na totolay,” kunni Jehova, “anna i ánanu nga lallaki anna i ánanu nga babbay ay mapprofesiya . . . Anna maski i lallaki anna babbay nga aripakku ay iyaluvuakku noka tu espiritù.” (Joel 2:28, 29) Ari nga insigida nga nesimmu yatun nga pangiyaluvu tu espiritu na Dios turi ta nanoli i Israelita ira ta lugarda naggafu ta Babilonia. Lallagu, nesimmu yatun piga siglo i nappasa, ta Pentecostes 33 C.E. Kunnasi tam nammuan yatun?

15. Segun ta Kingngua 2:16, 17, anni i inuli ni Pedro ta Joel 2:28, anna anni i ipalippawa natun?

¹⁵ Nainspiran si apostol Pedro nga iyaplika i Joel 2:28, 29 ta tadday nga kappabbaw nga gannug nga nesimmu ta aggaw na Pentecostes. Magalas-nuebe na umma tatun nga aggaw, niyaluvu na Dios i masanto nga espirituna, anna danuri nakalawa tatun ay namegafu nga maguvovug meyannung “ta makapabbaw ira nga kingngua na Dios!” (King. 2:11) Egga i baddi nga neruman na uvovug nga inusa na nainspiran nga si Pedro turi ta kinagina i profesiya ni Joel. Nasingannu kari i inulina? (Bibbigan i Kingngua 2:16, 17.) Imbes nga igafuna ta uvovug ira nga “kabalin natun,” kinagi ni Pedro: “Ta pangurianan ira nga aggaw”​—taw nga konteksto, i pangurianan ira nga aggaw na Judio nga sistema na ganna-gannug—​meyaluvu i espiritu na Dios “ta ngamin nga totolay.” Ipalippawa natun nga apaddu nga tiempo i nappasa nige nga natuppal i profesiya ni Joel.

16. Anni i efekto na espiritu na Dios ta trabahu nga pallayyagayya ta ollu-siglo, anna kunnasi gapa ta maddaggun?

 ¹⁶ Kabalin nga niyaluvu na Dios i espirituna ta Cristiano ira ta ollu-siglo, nigafuda i pallayyagayya nga makadde ta interu mundo. Turi ta nattura si apostol Pablo ta taga-Colosas ira, ma-61 C.E., makagina nga melayyagayya ngana i mapia nga dumug “ta ngamin nga totolay ta utun na davvun.” (Col. 1:23) Ta uffun na makapangngua nga masanto nga espiritu ni Jehova, mas ngana nga nalawa ta kaggawattam i trabahu nga pallayyagayya​—“ta tanga-ravvunan”!​—King. 13:47; innan i kahon nga “ Iyaluvù Noka i Espiritù.”

17. Anni i nanguli ta pakalippawa tam ta durun ira ta profesiya ni Joel?

¹⁷ Anni ngana i nanguli? Mas fustu ngana i pakalippawa tam ta profesiya nga mabibbig ta Joel 2:7-9. Manawag gafu nga ari tukuyan danaw nga versikulo i matalikarag nga pallayyagayya tam, nu ari, i pangatake na suddalu ira na Babilonia nga nanakup ta Jerusalem turi ta 607 B.C.E.

18. Anni i ari nanguli meyannung ta totolay ni Jehova?

¹⁸ Anni i ari nanguli? Ilayyagayya lagapa na totolay ni Jehova i mapia nga dumug maski sitaw, anna usadda i ngamin nga metodo tapenu matuppal yatun. (Mat. 24:14) Awan tu restriksion na gobiernu nga mangigamma nittam ta pattuppal tam ta bilin nga mallayyagayya. Anna gukaban na bendision ni Jehova, mas aktibo ittam ngana ta maddaggun anna magutu nga ilayyagayya i mapia nga dumug na Pappatulan! Sigga-pakalinno ittam nga mappegiya kani Jehova tapenu malippawa i profesiya ta Biblia anna mattalo ittam nga ta mepangngo nga tiempo, igiyana ittam ta ngamin nga “kurug”!​—Juan 16:13.