1. Qatan­ngut Rus­sel­l suleqataalu qanoq misis­sueriaaseqar­pat, aam­ma sooq taamaalior­neq pitsaasuua?

UKIUT 100-t sin­nerlugit matuma sior­na qatan­ngut C. T. Russell peqataalu, Guutip oqaasianik atuaq­qis­saar­tar­tut al­lat amerlan­ngitsut, ataatsimoor­taler­put. Paaserusup­paat Jehova Guuti, Jiisusi Kristusi, toqusimasut aam­ma uter­titsis­sutitut akiliut pil­lugit Biibilimi qanor­piaq ajoqersuuteqar­nersoq. Ima periaaseqar­put: Arlaat apeq­quteqar­tar­poq, Biibilimilu al­las­simaf­fiit apeq­qutigineqar­tumut tun­ngasin­naasut tamaasa misis­sor­tar­paat. Taava misis­suinermin­ni paasisatik al­lat­tor­tar­paat. Kristumiut eq­qor­tuliorusut­tut taak­kua Jehovap pil­luaq­qusineratigut sal­lusuis­sutit Biibilimeersut pingaarutilip­pas­suit paasivaat, tamak­kulu ul­lumik­kut suli pingaar­tingaar­pavut.

2. Sooq Biibilimi siulit­tuutit ilaan­nik­kut eq­qun­ngitsumik paasisarsin­naavavut?

² Biibilimil­li atuaq­qis­saar­tar­tut paasiaar­paat Biibilimi siulit­tuutit ajoqersuutinit tun­ngaviusunit paasiuminaan­nerusut. Sooq taamaap­pa? Biibilimi siulit­tuutit eq­quun­neran­ni eq­quutereer­neran­niluun­niit paasinar­nerusarmata. Aam­mali al­lamik pis­suteqar­poq. Siulit­tuut eq­qor­tumik paasis­sagaan­ni pineqar­tumut tun­ngasor­tai tamaasa eq­qarsaatigineqar­tariaqar­put. Ilaan­naat pingaar­tik­kutsigit sin­nerilu sumigin­narlugit paasinerluisin­naavugut. Joelimi siulit­tuum­mut tun­ngatil­lugu taamaat­toqarsimar­pasip­poq. Siulit­tuut taman­na sam­meriar­tigu paasiniarlugulu sooq maan­nak­kut  paasin­nit­taaser­put al­lan­ngor­tit­tariaqarip­put.

3-4. Ul­loq man­na tikil­lugu Joeli 2:7-9 qanoq nas­suiar­tarsimavar­put?

³ Joeli 2:7-9 atuakkit. Joelip siulit­tuutigaa Israelimi pil­ler­tar­pas­suit perlus­sior­titsiumaar­tut. Sul­ler­nit taak­ku løvitut kiguteqarlutil­lu al­lerul­lit suut tamaasa neris­savaat. (Joel 1:4, 6) Ukior­pas­suar­ni isumaqar­pugut siulit­tuut taman­na Jehovap in­nut­taanut, pil­ler­tar­pas­suar­tut unitsitas­saanatik oqaluus­sisunut, as­sersuutaasoq. Isumaqarsimavugul­lu oqaluus­sineq ‘nunamut’, tas­sa inun­nut up­perisarsior­nik­kut siut­tunit sun­ner­neqar­tunut, nuan­niitsumik sun­niuteqar­toq. *

⁴ Joeli 2:7-9 kisiisa atuarutsigit paasin­nit­taaserisimasaq taman­na eq­qor­pasip­poq. Siulit­tuul­li tamaat eq­qarsaatigigutsigu al­latut paasisariaqar­toq paasis­savar­put. Tamatumun­nga pis­sutaasut sisamat misis­soriar­tigit.

5-6. Uku atuar­neran­ni suna apeq­qutaaler­pa: (a) Joeli 2:20? (b) Joeli 2:25?

⁵ Siul­ler­tut, malugiuk pil­ler­tat perlutsitsineran­nut tun­ngatil­lugit Jehova ima neriorsuisoq: ‘Ilis­sin­nit peersis­savak­ka.’ (Joel 2:20) Pil­ler­tat Jehovap Nalunaajaasuinut Jiisusip oqaluus­seq­qusineranik ajoqersugan­ngor­titsior­toq­qusineranil­lu naalat­tunut as­sersuutaap­pata, taava sooq Jehova neriorsuiva taak­ku peersik­kumaarlugit? (Ez 33:7-9; Matt 28:19, 20) Erseq­qip­poq Jehovap kif­fani aalajaatsut peersin­nagit in­nut­taminut akeq­qersimaar­tut peersis­sagai.

⁶ Aap­paat­tut, Joeli 2:25-mi Jehovap oqaasii uku eq­qarsaatigik­kit: “Taarsiivigis­savas­si ukiuni taak­kunani pil­ler­tat nerisaan­nik, qul­lugis­sap, kik­kaasup, pil­ler­tal­lu piaq­qat nerisaan­nik, tas­sa sak­kutoor­pas­suak­ka ilis­sin­nut aal­lar­tis­simasama, nerisaan­nik.” Malugiuk pil­ler­tat ajoqusigaat pil­lugu Jehova neriorsuisoq ‘taarsiis­sal­luni’. Pil­ler­tat Guutip naalagaaf­fianik oqaluus­sisar­tunut as­sersuutaap­pata sooq tusarlius­saat ajoqutaanerar­neqar­pa? Tusarlius­sarli an­nas­sutaasoq taman­na kil­litsis­sutigalugu inuit ajor­tut peq­qis­simisin­naap­put. (Ez 33:8, 19) Taman­na tusar­tunut pil­luaq­qus­sutaas­saaq!

7. Sooq Joeli 3:1, 2-milu oqaatsit “tamatuma kingor­na” maluginiar­nar­pat?

⁷ Joeli 3:1, 2 atuakkit. Pingajuat­tut, siulit­tuum­mi pisut tul­leriiaar­nerat malugiuk. Jehova ima oqar­poq: “Tamatuma kingorna [pil­ler­tat sulias­samin­nik naam­mas­sin­nereer­pata] ima pisoqarumaar­poq: Anersaara kuiumaar­para.” Pil­ler­tat Guutip naalagaaf­fianik oqaluus­sisar­tunut as­sersuutaap­pata, sooq Jehovap anersaani il­ler­nar­toq nalunaajaareer­nerisa kingorna kuis­savaa? Guutim­mi anersaava il­ler­nar­toq sun­niiner­tooq aatsaat ikior­tigalugu akerlilersor­neqar­nermi aam­ma iner­teq­qutaaf­fiusumi ukior­pas­suar­ni oqaluus­sisoqarsin­naavoq.

8. Pil­ler­tat Saq­qum­mersitat 9:1-11 al­laatigineqar­tut kik­kun­nut as­sersuutaap­pat? (Saq­qaani as­sit takuk­kit).

⁸ Saqqummersitat 9:1-11 atuakkit. Pis­sutaasut sisamaat misis­soriar­tigu. Pil­ler­tat perlutsitsinerat Joelimi al­laatigineqar­toq Saq­qum­mersitani siulit­tuum­mut as­singum­mat oqaluus­sinitsin­nut tun­ngatit­taraluar­par­put. Siulit­tuum­mi tamatumani pil­ler­tar­pas­suit inut­tut kiinal­lit aam­ma ‘niaqorutitut it­tunik kuultiusunik niaqormioqar­tut’  al­laatigineqar­put. (Saqq 9:7) “[Inuit] qaamik­kut Guutip naqitsisaanik nalunaaqutser­neqan­ngitsut” an­niar­tis­savaat qaam­matini tal­limani, pil­ler­tap nalingin­naasumik uumaf­figisar­tagaatut sivisutigisumik. (Saqq 9:4, 5) Tas­sani pineqar­pasip­put Guutip kif­fai tanitat. Taak­kua silarsuarmi pis­sutsit aaq­qis­suus­saaneran­nut ajor­tumut Guutip eq­qar­tuus­sutaa sapiil­lutik nalunaarutigaat, taman­nalu silarsuarmik tapersersuisut tujormis­sutigingaar­paat.

9. Pil­ler­tat Joelip takusai Johan­nesil­lu al­laatigisai sutigut pingaarutilitsigut as­sigiin­ngis­suteqar­pat?

⁹ Saq­qum­mersitani Joelimilu siulit­tuutigineqar­tut as­sigiis­suteqaraluarlutik pingaarutilin­nik as­sigiin­ngis­suteqar­put. Uku eq­qarsaatigik­kit: Joelip siulit­tuutaani nunami naasut pil­ler­tanit nungun­neqar­put. (Joel 1:4, 6, 7) Johan­nesip takorruugaani pil­ler­tat “oqarfigineqar­put nunap ivigai ... ajoqusis­san­ngik­kaat”. (Saqq 9:4) Pil­ler­tat Joelip takusai avan­naaneer­put. (Joel 2:20) Johan­nesip takusai itinersuarmeer­put. (Saqq 9:2, 3) Pil­ler­tat Joelip al­laatigisai peersin­neqar­put. Saq­qum­mersitani pil­ler­tat peersin­neqar­natik suliamin­nik naam­mas­sin­nis­sin­naatitaap­put, sumil­luun­niil­lu ersin­ngilaq Jehovamit iluarisaan­ngitsut. – Takuuk ungalusaq “ Pil­ler­tat pil­lugit siulit­tuutit – As­sigiin­ngis­sutaat pingaarutil­lit”.

10. Pil­ler­tat Joelimi aam­ma Saq­qum­mersitani al­laatigineqar­tut as­sigiin­ngitsunut as­sersuutaasin­naap­pat? As­sersuuteqarlutit nas­suiaruk.

 ¹⁰ Siulit­tuutit taak­ku marluk pingaarutilitsigut as­sigiin­ngis­suteqar­neran­nit paasivar­put taak­ku im­min­nut atas­suteqan­ngitsut. Oqar­niar­tugununa pil­ler­tat Joelip al­laatigisai aam­ma pil­ler­tat Saq­qum­mersitani al­laatigineqar­tut as­sigiin­ngitsunut as­sersuutaasut? Aap. Biibilimi as­sersuut ataaseq ilaan­nik­kut as­sigiin­ngitsunik isumaqar­tin­neqar­tar­poq. As­sersuutigalugu Saq­qum­mersitat 5:5-imi Jiisusi tas­saanerar­neqar­poq “løveq Judamit naggueqar­toq”, Petrusil­li al­lagai siul­liit 5:8-mi Diaavulu “løvitut uian­nisaar­tutut” al­laatigineqar­poq. Paasin­nit­taatsimik al­lan­nguinermut pis­sutaasut sisamat eq­qar­tuk­kavut pis­sutigalugit paasivar­put Joelip siulit­tuutaa al­latut nas­suiar­tariaqarip­put. Qanoq?

11. Joeli 1:6 aam­ma 2:1, 8, 11-lu iluaqutigalugit pil­ler­tat kik­kuuneri qanoq paasisin­naavar­put?

¹¹ Joelip siulit­tuutaani versit al­lat misis­sorutsigit paasis­savar­put sak­kutuut saas­sus­sinerat pineqar­toq. (Joel 1:6; 2:1, 8, 11) Jehova oqar­poq ‘sak­kutoor­pas­suani’ (Babylonimiut sak­kutuui) atorlugit Israelik­kut naalan­ngitsut pil­lar­niarlugit. (Joel 2:25) Babylonimiut Israeli avan­naaniit saas­sut­tus­saam­mas­suk sak­kutuut saas­sus­sisut ‘avan­naaneersuunerar­neqar­put’. (Joel 2:20) Sak­kutoor­pas­suit taak­ku pil­ler­tar­pas­suar­tut aaq­qis­sugaal­luar­tutut ip­put. Taak­ku pil­lugit Joeli ima al­lap­poq: ‘[Sak­kutuut] sam­mivim­min­nit sangus­san­ngil­lat; ... Il­loqarfik saas­sup­paat, qarmarsuarmut pitoraal­lutik. Igalaatigut isaap­put til­lin­niatut.’ (Joel 2:8, 9) Takorloorsin­naaviuk? Sak­kutoor­pas­suit sumi tamaniip­put. Toq­qorfis­saqan­ngilaq. Babylonimiunit aniguisoqarsin­naan­ngilaq!

12. Pil­ler­tat pil­lugit Joelip siulit­tuutaa qanoq eq­quup­pa?

¹² Babylonimiut (tas­sa kaldæerit) pil­ler­tanut as­sersuun­neqar­tut Kr.in.si. 607-imi Jerusalemi isaaf­figaat. Biibilimi ima al­las­simavoq: ‘Kaldæerit kun­ngiata angutit inuusut­tor­taat panamik toqup­pai asat­tuus­saqar­nanilu nukap­pis­sanik niviarsianil­luun­niit utoq­qar­nik utoq­qarsuar­nil­luun­niit. Tamaasa akeq­qat as­saan­nut tun­niup­pai. Taava Guutip il­lua ikual­latsip­paat Jerusalemil­lu qarmai aseror­terlugit, pal­lit­taalisaalu tamaasa ikual­latsip­paat pigisaal­lu akisuut tamaasa aseror­lugit.’ (2 Nal 36:17, 19) Babylonimiut nuna suujun­naarsereermas­suk inuit al­lat ima oqar­put: ‘Nuna inuilaajusoq inoqan­ngitsuuvoq uumasoqar­nanilu, kaldæerit as­saan­nut tun­niun­neqarsimavoq.’ – Jer 32:43.

13. Jeremia 16:16, 18-imilu al­las­simasut qanoq paasisariaqar­nersut nas­suiaruk.

¹³ Joelip siulit­tuinerata kingor­na ukiut 200-t mis­siliorlugit qaangiut­tut Jeremia aq­qutigalugu saas­sus­sineq taman­na pil­lugu Jehova siulit­tueq­qip­poq. Oqar­poq Israelik­kut ajor­tulior­tar­tut ujar­neqas­sasut tamarmil­lu tigusaas­sasut. “Maan­nali aggeq­qujumaar­pak­ka aalisar­tor­pas­suit, oqar­poq Naalagaq, taak­kualu aalisas­savaat; kingor­nalu aggeq­qujumaar­pak­ka pisis­saar­tor­pas­suit, taak­kualu piniaaris­savaat qaq­qani tamani, qat­tuner­ni tamani qaarsul­lu qun­nerini. ... Iluan­ngitsuliaasa ajor­tuliaasalu nalis­saan­nik marloriaam­mik pisas­saqar­tik­kal­las­savak­ka.” Israelik­kut peq­qis­simin­ngitsut im­mami or­pip­pas­suar­niluun­niit toq­qorfis­saqan­ngil­lat, tas­sa tigusarineqariaan­naap­put. – Jer 16:16, 18.

14. Joeli 3:1, 2-milu al­las­simasut qanga eq­quup­pat?

¹⁴ Joeli maan­na nuan­nersumik nutaarsias­saateqar­poq. Nuna naggoris­sun­ngoq­qis­saaq. (Joel 2:23-26) Siunis­sami anersaak­kut inuus­sutis­sat naam­mat­torsuit pineqarsin­naalis­sap­put. Jehova ima oqar­poq: “Anersaara kuiumaar­para inun­nut tamanut. Er­nisi panisilu siulit­tuis­sap­put. ... Anersaara kuiumaar­para al­laat inus­siaatis­sin­nut angutinut inus­siaatis­sin­nul­lu ar­nanut.” (Joel 3:1, 2) Israelik­kut Babylonimiit nunamin­nut uter­nerisa kingunin­ngua taama pisoqan­ngilaq. Uter­nerisali kingor­na ukior­pas­suit qaangiut­tut ukiumi 33-mi piinsip ul­luani anersaaq kuineqar­poq. Taman­na qanoq nalun­ngilar­put?

15. Apustilit Suliaat 2:16, 17-ilu naaper­torlugit Petrusip Joeli 3:1 al­lan­ngor­til­lugu qanoq is­suar­paa, taman­nalu qanoq isumaqarunar­pa?

¹⁵ Isumas­sarsisitaal­luni apustilip Petrusip Joeli 3:1, 2-lu piinsip ul­luani pisumut tupin­nar­tumut tun­ngatip­pai. Ul­laap tungaani qulingiluat mis­saan­ni anersaaq il­ler­nar­toq tupin­nar­tulior­nik­kut kuineqar­poq, kuineqar­tul­lu “Guutip tupin­nangaar­tuliai” pil­lugit oqaluus­siler­put. (ApS 2:11) Joelip siulit­tuutaa Petrusip al­lan­ngor­tilaarlugu isumas­sarsisitaal­luni is­suar­paa. Al­lan­ngor­titaa malugiviuk? (Apustilit Suliaat 2:16, 17 atuakkit). Oqaatsit aal­lar­tis­sutaasut “tamatuma kingor­na” ator­nagit Petrusi ima oqar­poq: “Ullus­sani kingul­lerni” – tas­sa juutit aaq­qis­suus­saanerisa ul­lus­saan­ni kingul­ler­ni – Guutip anersaani “inun­nut tamanut” kuis­savaa. Tamatuman­nga erser­poq aatsaat pif­fis­sangaatsiaq qaangiutereersoq Joelip siulit­tuutaa eq­quut­toq.

16. Guutip anersaava kristumiut siul­liit nalaan­ni aam­ma ul­lumik­kut oqaluus­sinermut qanoq sun­niuteqar­pa?

¹⁶ Kristumiut siul­liit nalaan­ni Guutip anersaavata  kuineqar­nerata kingor­na silarsuaq tamarmi oqaluus­sif­figineqaler­poq. Ukiup 61-ip mis­saani apustili Paulusi Kolos­semiunut al­lap­poq nutaarsias­saq nuan­nersoq “qilaap ataani pin­ngor­titanut tamanut” oqaluus­sis­sutigineqarsimasoq. (Kol 1:23) Taamani ‘pin­ngor­titat tamarmik’ tas­saap­put inuit Paulusip al­lal­lu tikis­sin­naasaan­niit­tut. Jehovap anersaava il­ler­nar­toq sun­niiner­tooq iluaqutigalugu ul­lumik­kut siam­masin­nerusumik oqaluus­sisoqar­nerujus­suuvoq – al­laat “nunarsuup isua tikil­lugu”! – ApS 13:47; takuuk ungalusaq “ Anersaara kuiumaar­para”.

17. Pil­ler­tat pil­lugit Joelip siulit­tuutaanik paasin­nit­taaser­put qanoq al­lan­ngor­pa?

¹⁷ Suna al­lan­ngor­pa? Maan­na siulit­tuut Joeli 2:7-9 al­las­simasoq paasil­luar­neruler­par­put. Erseq­qip­poq versini pineqar­tuni oqaluus­sisar­tut aal­lus­sil­luar­tut pineqar­natik Babylonimiut sak­kutoor­pas­sui Kr.in.si. 607-imi Jerusalemimut isaasut pineqar­tut.

18. Jehovap in­nut­taanut tun­ngatil­lugu suna al­lan­ngun­ngila?

¹⁸ Suna al­lan­ngun­ngila? Jehovap in­nut­tai nutaarsias­saq nuan­nersoq pil­lugu sumiluun­niit periaaserisin­naasatil­lu tamaasa atorlugit oqaluus­siuar­put. (Matt 24:14) Naalak­kersuisut qanorluun­niit kil­lilersuigaluarunik oqaluus­siner­put unitsis­sin­naan­ngilaat. Jehoval­lu pil­luaq­qusineratigut Guutip naalagaaf­fia pil­lugu nutaarsias­samik nuan­nersumik sapiil­luta aatsaat taama an­ner­tutigisumik oqaluus­sivugut! Biibilimi siulit­tuutinik paasin­nit­taatsimut tun­ngatil­lugu maniguul­luta Jehovamit siulersor­tik­kusut­tuar­pugut up­peralugu taas­suma pif­fis­sarititani nal­liup­pat ‘sal­lusuis­sut tamaat ilitsersuutigis­sagaa’. – Joh 16:13.