1. Njilanyi yakudizilamu yazatishiliyi manakwetu Russell niakwawu, nawa yawahililidi?

KUBADIKA yaaka 100 yinahitihu, Manakwetu C. T. Russell nizanvu danyanya dawakwawu atudizi Ezu daNzambi atachikili kubulakana hamu. Akeñeleña kwiluka chatañishaña Bayibolu kutalisha hadi Yehova Nzambi, Yesu Kristu, afu nihefutu danyiloña. Azatishileña njila yapela hakudiza. Neyi wumu yehula lwihu, izanvu dadiña nakukeñakeña ñakwilu munsona kwesekeja nalwihu. Kuhiñahu, asonekeleña nsañu yinasandujoliwu. Nawukwashu waYehova, awa amayala akwaKristu ashinshika awanini yuma yalema yayivulu kutalisha hachalala chamuBayibolu njila yitwazatishaña nimakonu.

2. Yumanyi yaleteshaña mpinji yikwawu kukunkulula mwaluwa neyi tunakufwila kutiyishisha mwatalisha wuprofwetu?

² Hela chochu, awa atudizi aBayibolu elukili nawu chapela kwiluka chatañishaña Bayibolu hayuma yikwawu, ilaña chakala kutiyishisha mwatalisha wuprofwetu wamuBayibolu. Chinekalilidi mwenimu? Kakavulu twatiyishishaña wuprofwetu wamuBayibolu neyi wunakushikijewa hela neyi wunashikijewi dehi. Ilaña kudi chuma chikwawu. Hakwila tutiyishishi muwatalisha wuprofwetu, twatela kutaña wuprofwetu wejima wunakuhosha hanoyu nsañu. Neyi tushinshika hohu kabadi kamu kawuprofwetu nawa tudiwula kakwawu, tukukunkulula mwaluwa. Chinamwekani nawu dichuma chamwekeni hawuprofwetu wekala mumukanda waYoweli. Tushinshikenu haniwu wuprofwetu nawa tuhanjeki muloña waweni chitwatela kuhimpila ntiyishishilu yetu.

3-4. Twelukili netudi kutalisha hawuprofwetu wekala haYoweli 2:7-9?

³ Tañenu Yoweli 2:7-9. Yoweli wahosheleñahu dehi nindi atuboola akakisañana ituña daIsarela. Adi namaji nimbaña  neyi jamutupa, awa atububu alukisa akada yuma yejima! (Yoweli 1:4, 6) Hadi yaaka yayivulu yinahitihu, twelukili netu iwu wuprofwetu wunakwimenaku mudimu wakushimwina wazatañawu antu jaYehova neyi atuboola amavulu anateli kubula kukañeshawu. Twelukili netu iwu mudimu wakisañeneña chikupu ‘ituña’ niantu alombolañawu kudi akulumpi jansakililu. *

⁴ Neyi tutañaña hohu Yoweli 2:7-9, tukwiteja netu chalumbululawu iwu wuprofwetu dimu. Hela chochu, neyi tushinshika chinahoshi iwu wuprofwetu wejima, tukumona netu ntiyishishilu yayiha yinakukeñeka. Tuhanjekenu yikuma yiwana yikuletesha tuhimpi iyi ntiyishishilu.

5-6. Malwihwinyi itunateli kudihula neyi tutaña (a) Yoweli 2:20? (b) Yoweli 2:25?

⁵ Chatachi, shinshikenu hachikaninu chaYehova kutalisha hadi atuboola: “Antu akukabeta kakuchimunswa [atuboola] nakayifumishaku.” (Yoweli 2:20) Neyi chakwila atuboola emenañaku aYinsahu jaYehova ovwahilaña lushimbi lwaYesu lwakushimwina nikwilisha atumbanji, muloñadi Yehova chakaniniyi kuyifumishamu? (Ezek. 33:7-9; Mat. 28:19, 20) Chakadi nikujina, bayi neyi Yehova nakufumishamu ambuña indi ashinshikaku, ilaña chiña chuma hela muntu wakabishaña antu jindi.

⁶ Chamuchiyedi, shinshikenu chahosha Yoweli 2:25. Yehova wahosheli nindi: “Nukuyifuntishila nyaka yadiili atuboola, niatuboola amotokaña, niatuboola akisañanaña, niansenya, yoyi njita yami yeneni yinatemesheli mukachi kenu.” Neyi chimunamoni, Yehova nakani ‘kuyifuntishila’ yuma yejima yakisañeniwu atuboola. Neyi atuboola anakwimenaku akwakushimwina aWanta, dikwila nawu nsañu yashimwinañawu yakisañanaña. Ilaña iyi nsañu yahandishaña wumi wamuntu nawa yinateli kuletesha muntu watama kubalumuka. (Ezek. 33:8, 19) Chumichi chachiwahi nankashi!

7. Kwesekeja naYoweli 2:28, 29, izu dakwila nawu “hakulondelahu” dinakutuleja chumanyi?

⁷ Tañenu Yoweli 2:28, 29. Chamuchisatu chinakushimuna handonda yayuma yinashimuniwu muniwu wuprofwetu. Komana himunamoni nenu Yehova wahosheli nindi: “Hakulondelahu, ami nakechila spiritu yami”; dikwila nawu hanyima yakwila atuboola anamanishi dehi mudimu wayinkeliwu? Neyi chakwila atuboola hiyakwakushimwina aWanta waNzambi, muloñadi Yehova chikwichililayi spiritu yindi hadi wena hanyima yakumanisha mudimu wawu wakushimwina? Chinamwekani hatooka nawu chakadi wukwashu waspiritu yaNzambi yajila yabadika ñovu, hiyadi kutwesha kutwalekahu kushimwina hadi yaaka yayivulu iku anakuyidimbulula nikulekesha mudimu wawu wakushimwinaku.

8. Atuboola iyatenawu haChimwekeshu 9:1-11 anakwimenaku anyi? (Talenu mwevulu wudi hakava.)

⁸ Tañenu Chimwekeshu 9:1-11. Ichi dinu tushinshikenu hachikuma chamuchiwana. Kunyima twelukili netu atuboola ashimwiniyi Yoweli emenañaku mudimu wetu wakushimwina muloña wawuprofwetu wadifwanaku wudi muChimwekeshu. Iwu wuprofwetu wayilumbulula awa atuboola nawu kumesu awu kudi neyi kumesu awantu ‘niyuma yamwekeneña neyi yibaaba yawuru’ hanyitu yawu. (Chim. 9:7) Akabishaña “hohu  antu [ayilumbu jaNzambi] abula chilamiku chaNzambi hamahama awu” hadi tukweji tutanu, dikwila nawu mafuku akuhanda kwatu. (Chim. 9:4, 5) Ichi chinjikijilu chakwilukilaku nachu ambuña aYehova awayishewa. Ashimwinaña nakuhamuka wunsompeshi waNzambi wakaletayi hadi kanu kaayi katama nikukojeja akahakwilañaku kutiya woma chikupu.

9. Chaambwinyi chidi hakachi katuboola twamweniyi Yoweli nitwashimwiniyi Yowanu?

⁹ Chakadi nikujina, wuprofwetu wudi muChimwekeshu niwasonekeliyi Yoweli wadifwanaku. Hela chochu, hadi chaambu. Talenu chumichi: Muwuprofwetu waYoweli atuboola adiña nakukisañana yuma yamenaña. (Yoweli 1:4, 6, 7) Muchimwenu chaYowanu, tuboola atulejeli “nawu, bayi tukisañana yuma yamenaña hamaseki.” (Chim. 9:4) Atuboola amweniyi Yoweli afumini kuchimunswa. (Yoweli 2:20) Ilaña amweniyi Yowanu afumini mwikela. (Chim. 9:2, 3) Atuboola ashimwiniyi Yoweli anayifumishimu. Ilaña muChimwekeshu, atuboola anayifumishimu wanyi, ilaña anayiteji kumanisha mudimu wawu. Kwosi wunsahu wamwekeshaña nawu Yehova wayikaaniniku.—Talenu chikasha chinakwila nawu “Wuprofwetu Wahosha Hadi Atuboola-Wadifwanaku Ilaña Wambuka.”

10. Hanenu yakutalilahu yamuNsona yinakumwesha nawu tuboola twateneniyi Yoweli natwateneniyi Yowanu twemenañaku yuma yambuka.

 ¹⁰ Chaambu chidi hakachi kaniwu wuprofwetu wuyedi walema chinatukwashi kukunkulula netu wambuka. Komana hadi chaambu hakachi ‘kawatuboola’ ashimwiniyi Yoweli niatuboola ashimunawu mumukanda waChimwekeshu? Eña. MuBayibolu, mpinji yikwawu chuma chimu chinateli kutalisha kuchuma chambukaku neyi achizatisha munjila yacheñi. Chakutalilahu, haChimwekeshu 5:5, Yesu amutena nawu “Mutupa wakumuchidi waYuda,” ilaña ha 1 Petulu 5:8, Diyabolu amulumbulula nawu “mutupa wunakubuluma.” Kwesekeja nayikuma yiwana yitunahanjekihu kutalisha hantiyishishilu yetu yayiha, twatela kuwuna njila yacheñi yakulumbulwilamu mwatalisha wuprofwetu waYoweli. Njilanyi yeniyi?

11. Nsañwinyi yidi haYoweli 1:6 ni 2:1, 8, 11 yinatukwashi kwiluka mwatalisha atuboola?

¹¹ Neyi tushinshika chiwahi mumavasi amakwawu aniwu wuprofwetu waYoweli, tukuwana netu iwu kaprofwetu wateneneña kulukuka kwawamashidika. (Yoweli 1:6; 2:1, 8, 11) Yehova wahosheli nindi wukazatisha ‘amashidika asweja ñovu’ (mashidika aweniBabiloni) kubabesha aIsarela adikañileña. (Yoweli 2:25) Awa amashidika anakulukuka ayiteneneña nawu “antu akukabeta kakuchimunswa” muloña aBabiloni alukukilili aIsarela kukabeta kakuchimunswa. (Yoweli 2:20) Awa amashidika anayesekeji nawatuboola anakulukuka. Yoweli wahosheli kutalisha hadi awa amashidika nindi: “[Amashidika] adimakenaña iwu nahindi, iwu nahindi. . . . Hiyakulotokela mukala; hiyakuhitahita lufuchi hewulu dampwembu; hiyakukandama mumatala; hiyakwiñila munjanina neyi chelaña ikombi.” (Yoweli 2:8, 9) Fwikijenu chumichi. Amashidika ananyeñumuki kwejima. Kwosi kwakuswamaku. Nawa kwosi muntu hela wumu wukutwesha kuyitemuka mashidika awaBabiloniku!

12. Wuprofwetu waYoweli kutalisha hadi atuboola washikijeweli ñahi?

¹² Neyi chalukukaña atuboola, eniBabiloni (hela aKaladeya) alukukili musumba waYerusalema mu 607 B.C.E. Bayibolu yashimuna nayu: “Mwanta wawaKaladeya yena hakutapa anyikwenzi awu nampoku yakabali . . . . hela mukwenzi hela chañadima hela kashinakaji hela ipala dadeni kumutiyila wushona nehi; wakuminini dakuhana ejima kudi yena. Hiyakwocha itala daNzambi hiyakuhumona mpwembu yaYerusalema hiyakwocha nimatala awanta ejima nakesi hiyakukisañana niyuma yejima yasweja kuwaha yadiñumu.” (2 Kushi. 36:17, 19) Chelili aBabiloni ajilumuni musumba, antu amweneña ahosheleña nawu: “Hichihembi chakadi antu hela anyama. Nenu Adihana dehi kudi aKaladeya.”—Yere. 32:43.

13. Lumbululenu mwatalisha Yeremiya 16:16, 18.

¹³ Chimwahitili yaaka 200 kufuma haprofweteliyi Yoweli, Yehova wamuzatishili Yeremiya kushimunañahu dehi nsañu yikwawu kutalisha haniku kulukuka. Wahosheli nindi akwakulukuka akakeñakeña chikupu nikukwata aIsarela elileña yuma yatama, dikwila nawu kuyikwata ejima wawu. ‘Tiyenu Yehova nindi Ami nakatambeka akwakulowa anshi amavulu akayilowa. Nakalondeshamu ayibinda amavulu akayizombazomba kumpidi jamaneni jejima nikumpidi janyanya jejima nimumpaku jamumalola. . . . Nakayifwetesha kuluwa kwawu nanshidi yawu.’ Tuluñalwiji  hela yinkalampata hiyatwesheli kuyisweka awa aIsarela abulileña kubalumuka mumuchima kudi eniBabiloniku.—Yere. 16:16, 18.

14. Yoweli 2:28, 29 yashikijeweli mpinjinyi?

¹⁴ Ichi dinu Yoweli nakuhosha nsañu yayiwahi yakufuntisha yuma. Mwituña mwakasoña cheñi nyikabu. (Yoweli 2:23-26) Kuhiñahu kumbidi, yakuda yakuspiritu yikavula. Yehova nahoshi nindi, “Nakechila spiritu yami hadi antu ejima; anyanenu amayala nawambanda akaprofweta . . . Hadi ambuñenu amayala nihadi ambuñenu awambanda . . . nakechila spiritu yami.” (Yoweli 2:28, 29) Nzambi hashikeneni kwichila spiritu yindi hanyima yakwila aIsarela anayifumishi dehi muwuduñu muBabiloniku. Ilaña wechilili spiritu yindi haPentekosta mu 33 C.E. henohu munahiti dehi yaaka yayivulu. Tuneluki ñahi?

15. Kwesekeja naYilwilu 2:16, 17, mazwinyi ahimpiliyi Petulu ekala haYoweli 2:28, nawa chumichi chamwekeshañadi?

¹⁵ Chamwoneneniwu, kapostolu Petulu wazatishili Yoweli 2:28, 29 kuchuma chakuhayamisha chamwekeni hefuku daPentekosta. Nampinji ya 9 koloku yabwididi, Nzambi wechilili spiritu yindi yajila nawa antu atambwilili spiritu atachikili kuhosha “hanyidimu yaNzambi yañovu.” (Yilw. 2:11) Petulu wazatishili mazu ambukaku chanti hakuzatisha mazu adi muwuprofwetu waYoweli. Mazwinyi azatishiliyi? (Tañenu Yilwilu 2:16, 17.) Chatela yatachiki namazu adi muYoweli akwila nawu “hanyima yayumiyi,” ilaña Petulu wahosheli nindi: “Nawa mumafuku akukuminina,” munawa mazu, dikwila nawu mumafuku akukuminina awaYudeya, spiritu yaNzambi akayichila “hadi antu ejima.” Chumichi chinakumwekesha nawu hahitili  mpinji hakwila nawu wuprofwetu waYoweli wushikijewi.

16. Spiritu yaNzambi yakwashili ñahi mudimu wakushimwina mumafuku awapostolu, indi makonu?

¹⁶ Hanyima yakwila Nzambi nechili dehi spiritu yajila mumafuku awapostolu, mudimu wakushimwina watachikili kuyilaku hambidi mwahita kaayi kejima. Hampinji yayisonekeleliyi Pawulu mukanda aKolosi mu 61 C.E., wahosheli nindi nsañu yayiwahi anakuyishimwañena “kuyuma yejima yekala mwishina dewulu.” (Kol. 1:23) Mumafuku akapostolu Pawulu, ‘yuma yejima’ yemeneneñaku maluña amukaayi mwashimwinineñawu. Nawukwashu waspiritu yaYehova yajila yabadika ñovu, mudimu wakushimwina wunakuyilaku hambidi nimakonu “kushika kwakumina iseki dejima.”—Yilw. 13:47; talenu chikasha chinakwila nawu “Nakechila Spiritu Yami.”

17. Chumanyi chinahimpiki kuntiyishishilu yawuprofwetu waYoweli kutalisha hadi atuboola?

¹⁷ Chumanyi chinahimpiki? Ichi dinu tuneluki mwatalisha wuprofwetu wudi haYoweli 2:7-9. Awa mavasi atalisha kukulukuka kwalukukiliwu Yerusalema kudi amashidika aweniBabiloni mu 607 B.C.E. bayi kumudimu wetu wakushimwinaku.

18. Chumanyi chinabuli kuhimpika kudi antu jaYehova?

¹⁸ Chumanyi chinabuli kuhimpika? Antu jaYehova anatwalekihu kuzatisha njila jamboka-mboka kushimwina nsañu yayiwahi. (Mat. 24:14) Kwosi nfulumendi yidi yejima yinateli kutukañesha kuzata mudimu wakushimwinaku. Nawukwashu waYehova, tunakudikita chikupu nawa tunakushimwina nsañu yayiwahi yaWanta nakuhamuka! Tukutwalekahu kumushindamena Yehova kulonda yatukwashi kutiyishisha wuprofwetu, nikumukuhwelela chikupu netu hampinji yatelela wakatulombola “muchalala chejima”!—Yow 16:13.