1. Hadia lala wamahaʼö nifalua dalifusöda Russell hegöi ira awönia, ba hana wa sökhi sibai lala niʼogunaʼöra andrö?

TÖRA otu fakhe silalö, no ibörötaigö owulo dalifusöda C. T. Russell hegöi si sambua ngawawa side-ide ndraono zekola Zura Niʼamoniʼö. Omasi lafahaʼö ira ba zindruhu si so ba Zura Niʼamoniʼö sanandrösa khö Lowalangi Yehowa, Yesu Keriso, salua ba niha si no mate, hegöi höli. Lö abua lala wamahaʼö nifaluara. So samösa zameʼe fanofu, aefa daʼö lafareso ero sambua ayati soʼamakhaita ba wanofu daʼö. Ba gafuriata, lasura hadia wamahaʼö si no lasöndra. Börö wanolo moroi khö Yehowa, oya zindruhu si no lasöndra moroi ba Zura Niʼamoniʼö, ba irugi iadaʼa, moguna sibai nasa khöda zindruhu andrö.

2. Hana wa itaria fasala waʼaboto ba dödö niʼokhögöda sanandrösa ba wamaʼeleʼö si so ba Zura Niʼamoniʼö?

² Hizaʼi, aboto ba dödö ndraono zekola Zura Niʼamoniʼö wa abölö abua wangokhögö faʼaboto ba dödö sanandrösa ba wamaʼeleʼö, moroi ba dane-dane wamahaʼö si so ba Zura Niʼamoniʼö. Hadia mbörö? Si oföna, awena aboto ba dödöda wamaʼeleʼö si so ba Zura Niʼamoniʼö ba ginötö alua mazui na no aefa alua daʼö. Hizaʼi, so mbörö tanö böʼö. Enaʼö taʼokhögö waʼaboto ba dödö si tefaudu sanandrösa ba zi sambua famaʼeleʼö, moguna tafareso fefu waö-waönia. Na ha ba zi sambua faosatö wamaʼeleʼö taʼosambuaʼö dödöda, ba taʼosilöʼögö danö böʼönia, tola manö fasala waʼaboto ba dödö niʼokhögöda. Te daʼö zalua ba wamaʼeleʼö si so ba mbuku Yoeli. Datafuli tatutunö wamaʼeleʼö daʼö ba tafaigi hadia mbörö wa moguna taʼatulöʼö waʼaboto ba dödö niʼokhögöda.

3-4. Irugi iadaʼa, hadia waʼaboto ba dödö niʼokhögöda sanandrösa ba wamaʼeleʼö nisura ba Yoeli 2:7-9?

³ Baso Yoeli 2:7-9. Ifaʼeleʼö Yoeli wa so dania ngawawa damo samakiko danö Gizaraʼeli. Hulö nifö zingo niföra  hegöi bohara, ba laʼogunaʼö daʼö ba wamakiko fefu hadia ia niʼilara! (Yoe. 1:4, 6) Ba zi hauga fakhe, faduhu dödöda wa famaʼeleʼö andre manandrösa ia ba nono mbanua Yehowa si lö tebulö wamalua halöwö fanuriaigö, hulö simane ngawawa damo si tebai mubatogö. Faduhu dödöda wa halöwö andre zamakiko ’tanö’, yaʼia daʼö niha si so barö wamatörö ndra sondröniaʼö ba agama. *

⁴ Hulö atulö waʼaboto ba dödö andrö na ha Yoeli 2:7-9 nibasoda. Hizaʼi, na tahaogö taʼangeragö fefu nösi wamaʼeleʼö andrö, taʼila wa moguna tabulöʼö waʼaboto ba dödö niʼokhögöda. Datatutunö öfa dane-dane wa moguna tafalua daʼö.

5-6. Hadia manö wanofu-nofu zi tumbu ba dödöda na tabaso (a) Yoeli 2:20? (b) Yoeli 2:25?

⁵ Si oföna, nehegö mbuʼusa li Yehowa sanandrösa ba ngawawa damo, ”Ba soroi yöu andrö [ngawawa damo], ba ba zaröu utimba ira khömi.” (Yoe. 2:20) Na ngawawa damo andrö yaʼia daʼö ira Samaduhuʼö Yehowa soloʼö oroisa Yesu ba wamalua fanuriaigö hegöi ba wombaliʼö nifahaʼö, hana wa ifabuʼu Yehowa wa itimbagö ira? (Hez. 33:7-9; Mat. 28:19, 20) Sindruhunia, tenga nono mbanuania si lö faröi nitimbagö Yehowa, hizaʼi si fatuwu ba nono mbanuania.

⁶ Si dua, nehegö nisura ba Yoeli 2:25. Imane Yehowa, ”Usalahini khömi zi löʼö ba ndröfi andrö, me no laʼa tamo lea ba era ba föla ba siliwi soya andrö khögu, nidudugu khömi.” Nehegö mbuʼusa li Yehowa me iwaʼö wa ’isalahini’ fefu nifakiko ngawawa damo andrö. Na ngawawa damo andrö yaʼia daʼö ira sanuriaigö Famatörö Lowalangi, daʼö geluahania wa möi famakiko ba niha duria nifaʼemara. Hizaʼi sindruhunia, turia andre zamarou tödö niha si lö sökhi ba wamalalini era-erara, ba tola teʼorifi ira. (Hez. 33:8, 19) No howu-howu si sökhi sibai daʼö!

7. Hadia zaboto ba dödöda moroi ba wehede ”na no aefa daʼö”, si so ba Yoeli 3:1, 2?

⁷ Baso Yoeli 3:1, 2. Dane-dane si tölu—manandrösa ia ba waö-waö salua ba wamaʼeleʼö andrö. Nehegö hadia niwaʼö Yehowa, ’Ba na no aefa daʼö, ba ulau gehehagu ba niha fefu.’ Ngawua wehede ”na no aefa daʼö”, zangoromaʼö wa awena dania ifalua daʼö Yehowa na no laʼasiwai zinangea lafalua ira ngawawa damo andrö. Na ngawawa damo yaʼia daʼö ira sanuriaigö Famatörö Lowalangi, hana wa awena ibeʼe gehehania Yehowa na no aefa lafalua halöwö fanuriaigö nibeʼe khöra? Sindruhunia, na tenga börö wanolo geheha Lowalangi, hasambalö wa tebai latohugö halöwö fanuriaigö, börö me oya zanaisi yaʼira hegöi si lö manehegö halöwö nifaluara.

8. Haniha ngawawa damo nitutunö ba Wamaʼeleʼö 9:1-11? (Faigi gambara ba guli majalah.)

⁸ Baso Famaʼeleʼö 9:1-11. Iadaʼa, datatutunö dane-dane si öfa. Me föna, faduhu dödöda wa faʼatohare ngawawa damo nitutunö Yoeli manandrösa ia ba halöwö fanuriaigö, börö me so wamaʼeleʼö si fakhili-khili ba daʼö ba mbuku Wamaʼeleʼö. Ba wamaʼeleʼö daʼö, so ngawawa damo sangokhögö sikhala simane bawa niha, ba ”ba högöra so zi hulö dakula anaʼa”. (Fam. 9:7) Lafakao ”niha [udu Lowalangi] si lö mubeʼe tandro ba gangangora moroi khö Lowalangi”. Lafalua daʼö lima waŵa faʼara, simane faʼara waʼauri damo. (Fam. 9:4, 5) Andrö, tola tahalö gangetula wa famaʼeleʼö andre, manandrösa ia ba nono mbanua  Yehowa si no tebayoini. Si fao faʼabarani, laturiaigö wa hasambalö ihuku gulidanö si lö sökhi andre Lowalangi. Daʼö mbörö wa tefakao niha sangoʼawögö ulidanö andre.

9. Hadia manö gamaehuta si tohude sanandrösa ba damo si so ba wamaʼeleʼö Yoeli hegöi ba gangilata Yohane?

⁹ Sindruhu sa, so ösa waʼafagölö wamaʼeleʼö si so ba mbuku Yoeli hegöi ba mbuku Wamaʼeleʼö. Hizaʼi, so göi ösa gamaehuta si tebai muʼaohasi ba dödö. Ba wamaʼeleʼö Yoeli, ahori laʼa fefu zinanö ngawawa damo andrö. (Yoe. 1:4, 6, 7) Ba gangilata Yohane, ”Lö tetehegö khöra ba wamakiko . . . ngawalö zinanö ba gulidanö.” (Fam. 9:4) Moroi yöu tohare ngawawa damo niʼila Yoeli. (Yoe. 2:20) Hizaʼi, moroi ba mbaho sabakha tohare ngawawa damo si so ba gangilata Yohane. (Fam. 9:2, 3) Ba wamaʼeleʼö Yoeli, ifofanö ngawawa damo andrö Yehowa. Hizaʼi, na ba mbuku Wamaʼeleʼö, lö lafofanö ngawawa damo andrö hizaʼi mubeʼe khöra ginötö ba wangasiwai halöwöra. Lö hadöi dandra sangoromaʼö wa fatuwu khöra Yehowa.​—Faigi kotak ” Dombua Wamaʼeleʼö Sanandrösa ba Damo—Fakhili hizaʼi Faböʼö”.

10. Beʼe duma-duma ayati sangoromaʼö wa faböʼö damo nitutunö Yoeli ba damo si so ba mbuku Wamaʼeleʼö.

¹⁰ Me no taʼila hadia manö gamaehuta ba gotalua zi dombua wamaʼeleʼö andrö,  tola tahalö gangetula wa lö moʼamakhaita ira. Na simanö, hadia faehu damo nitutunö Yoeli ba damo si so ba mbuku Wamaʼeleʼö? Faehu. Ba Zura Niʼamoniʼö, tola manö faböʼö geluaha zi sambua amaedola si fagölö, na faböʼö waö-waönia. Duma-dumania, ba Wamaʼeleʼö 5:5, tefotöi Yesu ”zingo si otarai mado Yuda”, hizaʼi ba 1 Fetero 5:8, muʼamaedolagö Gafökha simane ’singo sindröndrö-ndröndrö’. Me no tatutunö zi öfa dane-dane andre, tatu moguna taʼalui waʼaboto ba dödö si tefaudu sanandrösa ba wamaʼeleʼö Yoeli. Andrö, datafuli tatutunö wamaʼeleʼönia.

11. Hewisa Yoeli 1:6 ba 2:1, 8, 11, tola tobali fanoloda ba wangokhögö faʼaboto ba dödö sanandrösa ba ngawawa damo?

¹¹ Na tafaigi ayati tanö böʼö si so ba wamaʼeleʼö Yoeli, aboto ba dödöda wa nitutunönia andre manandrösa ia khö ndra saradadu si möi fasuwö. (Yoe. 1:6; 2:1, 8, 11) Iwaʼö Yehowa wa iʼogunaʼö ”zaradadu sato” (saradadu Mbabilona) ba wanguhuku iraono Gizaraʼeli si lö moloʼö. (Yoe. 2:25, Terjemahan Dunia Baru) Tefaudu na mufotöi khö ndra saradadu andrö niha ”soroi yöu” börö me moroi yöu tohare niha Mbabilona ba wanuwö iraono Gizaraʼeli. (Yoe. 2:20) Muʼamaedolagö ngawawa zaradadu andrö simane ngawawa damo si toföfö. Imane Yoeli, ”Idölö manö ia zamösana. . . . Ladörö-döröi newali, ba sifulö-fulöi ira ba dete göli kara, manöi yomo ira, latörö zandrela, simane sanagö.” (Yoe. 2:8, 9) Hadia tola ökhalaigö hewisa zalua? Gofu hezoso nahia hasambalö so zaradadu. Lö hadöi nahia wolumöʼö ba lö hadöi niha si tola teʼefaʼö moroi khö ndra saradadu Mbabilona!

12. Hewisa waʼalua wamaʼeleʼö Yoeli sanandrösa ba ngawawa damo?

¹² Simane ngawawa damo, lasuwö mbanua Yeruzalema ira niha Mbabilona (mazui niha Galedaia) me döfi 607 SM. Itutunö Sura Niʼamoniʼö, ”Razo Ndrawa Galedaia, ifabunuʼö siʼöli nono matua khöra . . . , lö ihakhösi tödö, he ono matua, ba he ono alawe, ba he satua, he si no tohare huwa. Ahori manö ibeʼe ba dangania. Latunu gosali Yehowa, ba ladudugö göli Yeruzalema, awö gödo khöra fefu, ba latunu, tobali ahori akhozi gama-gamara sebua böli.” (2 Nga. 36:17, 19) Me no awai lasuwö soira ira niha Mbabilona, lamane wangumaʼö, ”Tanö si mate, lö niha ba lö urifö! No mubeʼe ba danga ndrawa Galedaia!”​—Yer. 32:43.

13. Tutunö geluaha Yeremia 16:16, 18.

¹³ Te mato 200 fakhe me no aefa ifaʼema wamaʼeleʼönia Yoeli, iʼogunaʼö Yeremia Yehowa ba wamaʼema salua tanö böʼö sanandrösa ba wanuwö andrö. Iwaʼö Yehowa wa lahaogö wangalui iraono Gizaraʼeli samalua si lö sökhi ira saradadu andrö dania, ba laraʼu ira fefu. ”Hiza, ato uʼoroiʼö si fakiri—iwaʼö Yehowa—enaʼö lafaʼuʼu, amaedola giʼa; ba aefa daʼö, ba ato zui uʼoroiʼö sialu, ba wolohi yaʼira ba hili ba ba hili-hili fefu ba ba dögi gara. . . . Ba uhönagö ufodua winaeta wanulöni olalöwara andrö, awö horöra.” Gofu hezoso labiniʼö ira iraono Gizaraʼeli si lö mamalalini era-era, he ba nasi mazui ba gatua, tebai teʼefaʼö ira moroi ba wanguhuku Yehowa.​—Yer. 16:16, 18.

14. Hamega alua wamaʼeleʼö si so ba Yoeli 3:1, 2?

¹⁴ So göi duria somuso dödö ba wamaʼeleʼö Yoeli andre. Ifuli atabö zinanö ba danö Gizaraʼeli. (Yoe. 2:23-26) Ba zi so miföna, hasambalö fahöna gö ba wamati.  Imane Yehowa, ”Ba ulau gehehagu ba niha fefu; ba mamaʼeleʼö dania nonomi matua ba onomi alawe . . . Numalö ba zawuyu ira matua ba ba zawuyu ira alawe, ba ulau gehehagu, na luo daʼö.” (Yoe. 3:1, 2) Lö iʼanemaiʼö ifaduwa gehehania Lowalangi, ba ginötö mangawuli ndraono Gizaraʼeli moroi ba Mbabilona numalö ba mbanuara. Awena ifalua daʼö Lowalangi ngaotu fakhe aefa daʼö, yaʼia me tefalua Wendrakose 33 M. Hezo tola taʼila daʼö?

15. Moloʼö Halöwö Zinenge 2:16, 17, hezo manö ngawua wehede si so ba Yoeli 3:1 si no ifaböʼöni Fetero, ba hadia zi tola taʼila moroi ba daʼö?

¹⁵ Börö wanuturu lala moroi khö Lowalangi, itutunö sinenge sotöi Fetero wa moʼamakhaita wamaʼeleʼö nisura ba Yoeli 3:1, 2, ba zalua ba ngaluo Wendrakose. Te bözi siwa sihulö wongi, ifaduwa gehehania Lowalangi, ba ibörögö fahuhuo ira ”sanandrösa ba zahöli-höli dödö nifalua Lowalangi”. (Hal. 2:11) Iʼogunaʼö maʼifu ngawua wehede si faböʼö Fetero me itötöi sanandrösa ba wamaʼeleʼö si so ba mbuku Yoeli. Hadia önehegö hezoso manö ngawua wehede nifaböʼöni Wetero? (Baso Halöwö Zinenge 2:16, 17.) Ba wamobörö wehedenia, lö iʼogunaʼö Fetero ngawua wehede ”na no aefa daʼö”. Iwaʼö Fetero wa ”ba ngaluo safuria”, ifaduwa gehehania niʼamoniʼö ”ba ngawalö niha fefu”. Eluaha ngaluo safuria niwaʼö Wetero, yaʼia daʼö ngaluo fatua lö mududugö Yeruzalema hegöi osalinia. Daʼa zangoromaʼö wa awena alua wamaʼeleʼö Yoeli andrö me no ara numalö ginötö.

16. Hadia mbua niʼasogö geheha Lowalangi ba halöwö fanuriaigö nifalua me abad siföföna, ba hewisa göi ba götöda iadaʼa?

¹⁶ Me no ifaduwa Lowalangi gehehania niʼamoniʼö ba niha Keriso me abad siföföna, labörögö wamalua halöwö fanuriaigö misa ba zi sagörö ulidanö. Me isura zurania  Faulo khö ndra niha Kolose, te me döfi 61 M, tola iwaʼö wa no teturiaigö duria somuso dödö ”ba gotalua niwöwöi Lowalangi ba gulidanö”. (Kol. 1:23) Ba götö Waulo, ”niwöwöi” yaʼia daʼö fefu niha si so ba ngawalö nahia ba gulidanö, si tola iʼondrasi Faulo hegöi niha Keriso tanö böʼö. Börö wanolo geheha niʼamoniʼö moroi khö Yehowa, itugu tedou wamalua halöwö fanuriaigö ba götöda andre, ”irugi ba wondrege danö misa”.​—Hal. 13:47; faigi kotak ” Ulau Gehehagu”.

17. Hadia zi tebulö ba waʼaboto ba dödö niʼokhögöda sanandrösa ba ngawawa damo nifaʼeleʼö Yoeli?

¹⁷ Hadia zi tebulö? Iadaʼa no taʼokhögö waʼaboto ba dödö sabölö tefaudu sanandrösa ba wamaʼeleʼö nisura ba Yoeli 2:7-9. Aboto ba dödöda, wa lö manandrösa ayati daʼa ba halöwö fanuriaigö nifaluada si fao faʼaterou dödö. Hizaʼi, manandrösa ia ba zaradadu Mbabilona si möi manuwö Yeruzalema me döfi 607 SM.

18. Hadia zi lö tebulö ba nono mbanua Yehowa?

¹⁸ Hizaʼi, hadia zi lö tebulö? Lö tebulö nono mbanua Yehowa ba wamaʼema turia somuso dödö gofu hezoso manö, ba oya lala niʼogunaʼöra ba wamalua yaʼia. (Mat. 24:14) Hewaʼae na so zamatörö si lö manehegö halöwö nifaluada, lö irai taböhöli ba wamalua halöwö fanuriaigö. Börö howu-howu moroi khö Yehowa, itugu tedou wamaluada halöwö andre moroi ba zilalö. Si fao faʼabarani, taturiaigö duria somuso dödö sanandrösa ba Wamatörö Lowalangi! Si fao fangide-ngideʼö, lö tebulö taʼandrö wanuturu lala moroi khö Yehowa enaʼö aboto ba dödöda wamaʼeleʼö si so ba Zura Niʼamoniʼö. Faduhu dödöda wa ba ginötönia dania, hasambalö itolo ita ’enaʼö aboto ba dödöda fefu zindruhu’!​—Yoh. 16:13.