1. Ngiyiphi indlela yokufunda ebeyisetjenziswa nguMfowethu uRussell nesiqhema esincani sabafundi beBhayibheli begodu kubayini beyiphumelela?

ESIKHATHINI esingaphezu kweminyaka elikhulu eyadlulako, uMfowethu u C. T. Russell nesiqhema esincani sabafundi beBhayibheli sathoma ukuhlangana ndawonye. Bebafuna ukubona okufundiswa yiBhayibheli malungana noJehova uZimu, uJesu Krestu, abantu abahlongakeleko kuhlanganise nomhlatjelo wesihlengo. Indlelabo yokufunda beyibulula, bekuba nomuntu obuza umbuzo bese kuthi isiqhema senze irhubhululo, siqale yoke imitlolo ehlobene nendaba ekukhulunywa ngayo. Besitlola phasi koke esikufumeneko nasenza irhubhululo. UJehova wawasiza amadoda la bona azwisise iqiniso eliqakathekileko eliseBhayibhelini begodu iqiniswelo lisaqakathekile nanamhlanjesi.

2. Khuyini engenza bona singasizwisisi ngendlela efaneleko isiphorofido seBhayibheli?

² Msinyana abafundi beBhayibheli bafumana ukuthi kubudisi khulu ukuzwisisa isiphorofido seBhayibheli kunokuzwisisa ifundiso esisekelo yeBhayibheli. Kubayini kunjalo? Iimphorofido zeBhayibheli zizwisiseka kuhle nazizalisekako namkha nasele zizalisekile. Kunenye indaba godu. Nasizasizwisisa ngendlela efaneleko isiphorofidwesi, kufuze siqale umongo waso. Nasingaqala ingcenye eyodwa kwaphela yesiphorofidwesi kunokusiqala soke, kungenzeka singasizwisisi kuhle. Endabeni le, kubonakala ngasuthi lokhu ngikho okwenzeka esiphorofidweni sencwadi kaJuweli. Akhesisihlolisiseni godu isiphorofidwesi, sibone ukuthi kubayini kutlhoga sithuthukise indlela esisizwisisa ngayo namhlanjesi.

3-4. Bekubekunje, sisisebenzise njani isiphorofido esifumaneka kuJuweli 2:7-9?

³ Funda uJuweli 2:7-9. UJuweli ubikezela ukuthi isikhonyani  sizokusahlela yoke inarha yakwa-Israyeli. (Isikhonyani liwoma leentethe ebelihlasela iintjalo.) Sinamazinyo nemihlathi enjengeyeengwenyama begodu sizokudla zoke iintjalo ezisenarheni! (Juw. 1:4, 6) Sekuminyaka eminengi sisebenzisa isiphorofidwesi ngokomfanekiso wokuthi abantu bakaJehova bazokutjhumayela njengewoma leentethe ebelingekhe livinjwe. Besizwisisa ukuthi isenzwesi sizokuba nomphumela obuhlungu ‘enarheni’ namkha ebantwini abangaphasi kwelawulo labadosiphambili bekolo. *

⁴ Nasifunda uJuweli 2:7-9 kwaphela sihlolisise kuhle umongo wesiphorofidweso, sikghona ukubona ukuthi kunenye ihlathululo yesiphorofidwesi. Akhesihlolisise iinzathu ezine, sibone ukuthi kubayini kunjalo.

5-6. Ngimuphi umbuzo ekufuze sizibuze wona nasifunda (a) UJuweli 2:20? (b) UJuweli 2:25?

⁵ Kokuthoma, tjheja isithembiso sakaJehova esimalungana nesibetho seentethe: “Ngizakudedisela ibutho letlhagwini kude nani.” (Juw. 2:20) Nangabe iintethe bezifanekisela aboFakazi bakaJehova njengombana balalela umyalo kaJesu wokutjhumayela nokwenza abafundi, kubayini uJehova athi uzozidedisela kude? (Hez. 33:7-9; Mat. 28:19, 20) Kuyakhanya ukuthi uJehova udedisela kude into ethileko namkha umuntu othileko ophikisana nabantu bakhe, ingasi iinceku zakhe ezithembekileko.

⁶ Isizathu sesibili ngilokho okutlolwe kuJuweli 2:25. Evesineli uJehova uthi: “Ngizanibuyisela amabele adliwa sikhonyani, yikumbi, newoma leentethe, okulibutho lami elikhulu engalithumela phakathi kwenu.” Tjheja bona uJehova uthembisa ‘ukulungisa’ umonakalo obangelwe ziintethe. Nangabe iintethe zijamele abantu bakaJehova abatjhumayela ngomBuso, lokho bekuzokutjho ukuthi isigijimi abasitjhumayelako sibanga umonakalo. Ngaphezu kwalokho, isigijimesi sisindisa ukuphila begodu singenza nabantu abambi batjhuguluke. (Hez. 33:8, 19) Lokho bekungaba yinto ehle kibo!

7. Amezwi afumaneka kuJuweli 2:28, 29, athi, ‘ngemuva kwalokho’ asisiza sizwisise liphi ibanga eliqakathekileko?

⁷ Funda uJuweli 2:28, 29. Tjheja ibanga lesithathu eliqakathekileko lezehlakalo ezilandelanako ezivezwa siphorofido. Utjhejile na ukuthi uJehova uthi, ‘Emuva kwalokho ngithululele ummoyami,’ ngemva kokuthi isikhonyani siqede umsebenzaso wokutjhumayela? Yeke nangabe isikhonyani batjhumayeli bomBuso kaZimu, kubayini uJehova angathululela ummoyakhe phezu kwabo ngemuva kokuqeda umsebenzabo wokutjhumayela? Iqiniso kukuthi ngaphandle kwesizo lommoya kaZimu ocwengileko bebangekhe bakghone ukutjhumayela iminyaka eminengi kangaka naphezu kokuphikiswa kuhlanganise nokukhandelwa komsebenzabo.

8. Isikhonyani ekukhulunywa ngaso kusAmbulo 9:1-11 sifanekiselani? (Qala isithombe esingaphandle.)

⁸ Funda isAmbulo 9:1-11. Nje akhesiqale ibanga lesine. Phambilini sifumene isibetho sesikhonyani uJuweli akhuluma ngaso sasimadanisa nomsebenzethu wokutjhumayela, lokho kubangelwe kukuthi kunesiphorofido esifana naso encwadini yesAmbulo. Isiphorofidwesi, sikhuluma ngewoma lesikhonyani ubuso baso obunjengobuso  babantu begodu ‘eenhloko zazo bekunokuthileko okufana neenhlohlo zegolide.’ (IsAm. 9:7) Sasahlela “kwaphela labo abanganalo itshwayo lakaZimu eempandla zabo” isikhathi esingangeenyanga ezihlanu, okusilinganiso sokuphila kwentethe. (IsAm. 9:4, 5) Lokhu mbala kubonakala ngasuthi ziinkhonzi zakaJehova ezizesiweko. Bamemezela ngesibindi isahlulelo sakaZimu malungana nabantu abambi, umphumela kube kukuthi abasekeli baso bangaphatheki kuhle.

9. Ngiziphi izinto ezihlukileko kodwana eziqakathekileko phakathi kwesikhonyani esabonwa nguJuweli nesabonwa nguJwanisi?

⁹ Ngitjho nanyana kunezinto ezifanako phakathi kwesiphorofido sesAmbulo nesiphorofido sakaJuweli. Esiphorofidweni esikuJuweli, isikhonyani sitjhabalalisa iintjalo. (Juw. 1:4, 6, 7) Kuthi embonweni kaJwanisi, isikhonyani ‘satjelwa bona singalimazi iimila zephasi.’ (IsAm. 9:4) Isikhonyani esabonwa nguJuweli sivela ngetlhagwini. (Juw. 2:20) Kuthi leso esabonwa nguJwanisi siphuma emgodini onganamkhawulo. (IsAm. 9:2, 3) Isikhonyani esabonwa nguJuweli sihlathululwa ngokuthi sadediselwa kude. Kuthi encwadini yesAmbulo, isikhonyani asiqothwa, kunalokho sivunyelwa bona siqedelele umsebenzaso. Akunalitho eBhayibhelini elitjengisa ukuthi uJehova bekangakathabi ngomsebenzaso.—Qala ibhoksi elithi, “ Iimphorofido Ezikhuluma Ngesikhonyani.”

10. Nikela isibonelo esisekelwe emTlolweni esitjengisa ukuthi isikhonyani esahlathululwa nguJuweli asifani neentethe ezabonwa nguJwanisi?

 ¹⁰ Umehluko okhona phakathi kweemphorofido ezimbilezi usisiza sizwisise ukuthi iimphorofidwezi azikahlobani. Kghani sithi isikhonyani esabonwa nguJuweli asifani neentethe ekukhulunywa ngazo encwadini yesAmbulo? Iye kunjalo. EBhayibhelini ngezinye iinkhathi itshwayo lingatjho okuhlukileko nalisetjenziswa ngendlela ehlukileko. Ngokwesibonelo, encwadini yesAmbulo 5:5, uJesu ubizwa ngokuthi ‘yibhubezi lekoro yakwaJuda,’ kuthi encwadini yoku-1 kaPitrosi 5:8, uDeveli ubizwa ngokuthi ‘yibhubezi elibhodlako.’ Amabanga amane esele sicoce ngawo asitjengisa ukuthi kufuze siqale enye ihlathululo yesiphorofido sakaJuweli. Kungaba ngiyiphi ihlathululo leyo?

11. UJuweli 1:6; 2:1, 8, 11 usisiza njani bona sizwisise isikhonyani?

¹¹ Nasihlolisisa amanye amavesi wesiphorofido sakaJuweli sizwisisa ukuthi umphorofidi lo bekakhuluma ngokuhlaselwa okuzako. (Juw. 1:6; 2:1, 8, 11) UJehova wathi uzakusebenzisa ibutho lakhe “elikhulu,” amasotja weBhabhiloni bona ajezise ama-Israyeli angalaleliko. (Juw. 2:25) Ibutho elihlaselako libizwa ngokuthi ‘libutho letlhagwini’ ngombana amasotja weBhabhiloni ebewazokuhlasela u-Israyeli bewavela ngetlhagwini. (Juw. 2:20) Ibuthwelo lifaniswa nesikhonyani. UJuweli nakasihlathululako uthi: ‘Omunye nomunye unqophe phambili. . . . Abaphambuki emnqophwenabo. Batheleka emzini, bagijime emthangaleni, bakhwela ezindlini, bangene emafesiderini njengamasela.’ (Juw. 2:8, 9) Kghani ungazakhela isithombe salokho? Amasotja azele kiyo yoke indawo, akunandawo ongabalekela kiyo begodu akekho ongabalekela ibutho leBhabhiloni!

12. Isiphorofido sakaJuweli malungana nesikhonyani sazaliseka njani?

¹² Njengesikhonyani, iBhabhiloni namkha amaKasidi ahlasela idorobho leJerusalema ngo-607. IBhayibheli nalibika ngendaba le, lithi: “UZimu wabanikelela ngekosi yamaKasidi eyabulala amasokanabo ngesabula endaweni ecwengileko. Yona azange irhawukele amasokana, abantazana, abalupheleko neengoga. UZimu wabanikela boke njalo esandleni sakaNebukadinetsari. Amajonakhe athungelela ithempeli lakaSomnini ngomlilo abhuruza umthangala weJerusalema; atjhisa zoke iingodlo, atjhabalalisa koke okuligugu okwakulapho.” (2 Kron. 36:17, 19) Ibutho leBhabhiloni naliqeda ukutjhabalalisa inarha, ababukeleko bathi: “Ayinabantu namkha iinlwana ngombana inikelwe amaKasidi.”—Jor. 32:43.

13. Hlathulula lokho okutjhiwo mtlolo kaJoromiya 16:16, 18.

¹³ Ngemva kweminyaka ema-200 kubikezelwe isiphorofido sakaJuweli, uJehova wasebenzisa uJoromiya bona abikezele ngokhunye ukuhlaselwa, wathi kuzokwenziwa iphenyisiso ngawo woke ama-Israyeli enza izinto ezikhohlakeleko, iphenyisiswelo lizokwenza bona bathunjwe. UJehova uthi: “‘Ngizokubiza abathiyi beenhlambi abanengi, bona-ke bazababamba. Ngemva kwalapho ngibize abazumi abanengi, bababuthe eentabeni nemibundwini kanye nemipharwini yamadwala.’ Kutjho uSomnini. . . . Ngizababuyiselela ngokubuyelelweko mayelana namacala nesono sabo.” Angeze babhace elwandle namkha emahlathini ngombana akukho okungasindisa ama-Israyeli angaphendukiko esahlulelweni  sakaJehova asikhipha ngebutho leBhabhiloni.—Jor. 16:16, 18.

14. UJuweli 2:28, 29 wazaliseka nini?

¹⁴ Njenganje, uJuweli uneendaba ezimnandi zokwakhiwa kabutjha kwenarha. Izokuthela godu. (Juw. 2:23-26) Sekuzokuba nezinto ezinengi ezisiza abantu bona bazi uZimu. UJehova uthi: ‘Kuzakuthi emuva kwalokho ngithululele ummoyami kibo boke abantu.’ ‘Amadodanenu namadodakazenu azakuphorofida . . . ngizakuthululela ummoyami naphezu kweenceku neencekukazi.’ (Juw. 2:28, 29) UJehova akhenge athululele ummoyakhe lokha ama-Israyeli nakasand’ukubuya ekuthunjweni eBhabhiloni. Kunalokho, kwenzeka ngemva kwamakhulu weminyaka, ngepentekoste laka-33, ngeenkhathi zabapostoli. Sikwazi njani lokho?

15. Ngokomtlolo wezEnzo 2:16, 17 ngiwuphi umahluko uPitrosi awenza emtlolweni kaJuweli 2:28 begodu lokho kutjengisani?

¹⁵ Ngemva kokuphefumulelwa, umpostoli uPitrosi wasebenzisa okusemtlolweni kaJuweli 2:28, 29 esenzakalweni sangePentekoste. Bekungo-9 ekuseni, lokha ummoya kaZimu ocwengileko nawubenza bathome ukukhuluma ‘izinto ezicwengileko zakaZimu.’ (IzE. 2:11) Ngemva kokuphefumulelwa nguZimu, uPitrosi wasebenzisa amezwi ahlukileko namkha ukudzubhula isiphorofido sakaJuweli. Uwutjhejile na umehluko awenzileko? (Funda izEnzo 2:16, 17.) Ekuthomeni komtlolo uPitrosi akhenge athome ngokuthi “ngemuva kwalokho.” Kunalokho, wathoma ngokuthi: “Emihleni yokuphela” endabeni le imihla yokuphela yangeenkhathi zamaJuda beyitjho ukuthululelwa kommoya kaZimu “phezu kwayo yoke inyama.” Lokho bekutjengisa ukuthi kuzokudlula  isikhathi esithileko ngaphambi kokuthi isiphorofido sakaJuweli sizaliseke.

16. Ummoya ocwengileko kaZimu wasiza njani emsebenzini wokutjhumayela begodu namhlanjesi usiza njani?

¹⁶ Umsebenzi wokutjhumayela waraga ngendlela ephumelela khulu, ngemva kokuthi uZimu athululele ummoyakhe ocwengileko ngesikhathi sabapostoli. Ngesikhathi umpostoli uPowula atlola incwadi yebeKolose ngo-61 ngeenkhathi zabapostoli, bekahlathulula bona iindaba ezimnandi zizokutjhunyayelwa “kiyo yoke indalo engaphasi kwezulu.” (Kol. 1:23) Ngeenkhathi zakaPowula, ‘indalo yoke’ beyitjho iphasi langesikhatheso. Ngesizo lommoya kaJehova ocwengileko onamandla ukutjhumayela kurhatjheke ephasini loke “bekube semaphethelweni wephasi!”—IzE. 13:47; qala ibhoksi elithi, “Ngizokuthululela UMmoyami.”

17. Indlela ebesizwisisa ngayo isiphorofido sakaJuweli itjhuguluke njani?

¹⁷ Khuyini eyatjhugulukako? Nje sesisizwisisa kuhle isiphorofido esikuJuweli 2:7-9. Ngamezwi abulula, amavesila akakhulumeli umsebenzethu wokutjhumayela esiwenza ngokuzimisela, kunalokho akhulumela amasotja weBhabhiloni nakahlasela iBhabhiloni ngo-607 ngaphambi kwesikhathi sabapostoli.

18. Khuyini engakhenge itjhuguluke ebantwini bakaJehova?

¹⁸ Khuyini engakhenge itjhuguluke? Abantu bakaJehova baragela phambili batjhumayela kiyo yoke indawo basebenzisa imikhakha yoke yokutjhumayela. (Mat. 24:14) Akunanto engasivimbela ukutjhumayela, ngitjho norhulumende angeze asikhandela. UJehova uyasibusisa, lokho kwenza sibe nesibindi begodu sibe majadu ekutjhumayeleni iindaba ezimnandi zomBuso! Siyazithoba, sithembele ekunqotjhisweni nguJehova bona sizwisise iimphorofido zeBhayibheli begodu siyaqiniseka ukuthi ngesikhathi esifaneleko, uzosazisa “iqiniso” elipheleleko!—Jwa. 16:13.