1. Adenle boni a Adiema Russell nee ɔ gɔnwo mɔ luale zo zukoale debie a, na kɛzi ɔboale ɛ?

WƆ ƐVOLƐ mɔɔ bo ɛya ko mɔɔ ɛze la, Adiema C. T. Russell nee ɔ gɔnwo mɔ, Baebolo sukoavoma ekpunli ekyi bie bɔle ɔ bo kɛ bɛyia nu. Ɛnee bɛkulo kɛ bɛnwu nɔhalɛ mɔɔ Baebolo ne kilehile fale Gyihova, Gyisɛse, tɛnlabelɛ mɔɔ mowuamra wɔ nu yɛɛ ɛkpɔnedeɛ ne anwo la. Ɛnee adenle mɔɔ bɛdua zo bɛsukoa la le sikalɛ. Bɛmaa bɛ nuhua ko biza kpuya, ekpunli ne anu amra kpondɛ ngɛlɛlera biala mɔɔ fale kpuya ne anwo la. Akee bɛyɛ mɔɔ bɛkɛnwu ye la anwo kɛlɛtokɛ. Ɔlua Gyihova moalɛ zo, Kilisiene mrenyia ɛhye mɔ mɔɔ lɛ ahonle kpalɛ la nwunle Baebolo ne anu nɔhalɛ dɔɔnwo, na yɛ nye die nɔhalɛ ɛhye mɔ anwo ɛnɛ.

2. Duzu ati a ɔyɛ a ɔnla ze kɛ yɛbade Baebolo ngapezo bie abo kpalɛ ɛ?

² Yeangyɛ Baebolo sukoavoma zɔhane nwunle nɔhalɛ edwɛkɛ bie. Ɔnyɛ se kɛ ɛbade Baebolo nu nɔhalɛ bie abo, noko Baebolo ngapezo bo ɛdelɛ ɛnla aze. Duzu ati ɔ? Mɔɔ ɔde la a le kɛ, saa Baebolo ngapezo ɛlɛba nu anzɛɛ ɔba nu ɔwie a yɛɛ yɛte ɔ bo kpalɛ a. Noko debie fofolɛ wɔ ɛkɛ. Amaa yɛade Baebolo ngapezo bie abo kpalɛ la, ɔwɔ kɛ yɛsuzu edwɛkɛ gyɛne mɔɔ boka nwo la anwo. Saa yɛfa yɛ adwenle yɛsie ngapezo ne foa ko ala azo na yɛgyakyi nwolɛ edwɛkɛ gyɛne mɔɔ ɛha la a, yɛnrɛhola yɛnrɛhile ɔ bo kpalɛ. Ɔzɔho kɛ ɛhye bie a zile wɔ ngapezo bie mɔɔ wɔ Dwowɛle buluku ne anu la anwo a. Bɛmaa yɛzuzu ngapezo zɔhane anwo na yɛnlea deɛmɔti ɔhyia kɛ yɛyɛ nzenzaleɛ wɔ ndelebɛbo mɔɔ yɛlɛ ye kɛkala anu la.

3-4. Kɛzi yɛva ngapezo mɔɔ wɔ Dwowɛle 2:7-9 la yɛli gyima badwu ɛnɛ ɛ?

³ Kenga Dwowɛle 2:7-9. Dwowɛle hanle dole ɛkɛ ne kɛ, mbɛbɛ dɔɔnwo bie bazɛkye Yizilayɛma azɛlɛ ne. Kɛmɔ ngɛkɛba  zɔhane mɔ agye le kɛ awenade ɛdeɛ la ati, bɛfa anyebolo bɛsɛkye debie biala mɔɔ bɛbanwu ye la! (Dww. 1:4, 6) Wɔ ɛvolɛ dɔɔnwo anu, yɛha kɛ ngapezo ɛhye le kɛzi Gyihova menli ɛlɛfa mɔdenlebɔlɛ aha edwɛkɛ ne la anwo sɛkɛlɛneɛ, bɛle kɛ mbɛbɛ mɔɔ awie ɛngola ɛnzi bɛ adenle la. Yɛdele ɔ bo kɛ, gyima ɛhye ɛlɛnyia sɛkɛlɛneɛ adenle zo “azɛlɛ” ne anzɛɛ menli mɔɔ wɔ adalɛ ɛzonlenlɛ nu la anwo zo tumi kpalɛ. *

⁴ Saa yɛkenga Dwowɛle 2:7-9 ala a, yɛbaha kɛ ndelebɛbo wɔ ngilenu zɔhane anu. Noko saa yɛsuzu edwɛkɛ gyɛne mɔɔ boka nwo la anwo a, ɔmaa yɛnwu kɛ ɔwɔ kɛ yɛyɛ nzenzaleɛ wɔ ndelebɛbo mɔɔ yɛlɛ la anu. Bɛmaa yɛzuzu ndelebɛbo nna mɔɔ ɔti ɛhye le zɔ la anwo.

5-6. Saa yɛkenga ngɛlɛlera ɛhye mɔ a, kpuya boni a ba adwenle nu a? (a) Dwowɛle 2:20 (b) Dwowɛle 2:25.

⁵ Mɔɔ limoa, yɛ ɛwɔkɛ mɔɔ Gyihova bɔle ye wɔ mbɛbɛ ne mɔ anwo la nzonlɛ: “Mebavoa sɔlɔ amra [mbɛbɛ ne mɔ] meavi bɛ nwo ɛkɛ meahɔ moamoa.” (Dww. 2:20) Saa mbɛbɛ ne mɔ gyi ɛkɛ ne maa Gyihova Alasevolɛ mɔɔ bɛlɛdi Gyisɛse mɛla mɔɔ se bɛha edwɛkɛ ne na bɛyɛ menli ɛdoavolɛma la azo a, ɛnee duzu ati a Gyihova bɔle ɛwɔkɛ kɛ ɔbavoa bɛ a? (Yiz. 33:7-9; Mat. 28:19, 20) Nɔhalɛ nu, menli mɔɔ bɛkile Gyihova menli ne nyane la a ɔlɛfoa bɛ a, na tɛ ye nɔhalɛ azonvolɛ ɔ.

⁶ Ndelebɛbo mɔɔ tɔ zo nwiɔ, suzu mɔɔ Dwowɛle 2:25 ka la anwo. Ɛkɛ ne, Gyihova ka kɛ: “Mebava ninyɛne mɔɔ abɛbɛ mgbole, abɛbɛ ngyikyi, abɛbɛ mɔɔ sɛkye ninyɛne yɛɛ mɔɔ abɛbɛ mɔɔ di ninyɛne zɛkyele ye wɔ ɛvolɛ dɔɔnwo anu la meazia meamaa wɔ, me ɛlɔne kpole ne mɔɔ menzoanle bɛ wɔ ɛ nwo ɛkɛ la.” Yɛ ye nzonlɛ kɛ, Gyihova bɔle ɛwɔkɛ kɛ, ‘ɔbazia yeava ninyɛne mɔɔ mbɛbɛ ne mɔ ɛzɛkye ye la yeamaa bɛ.’ Saa mbɛbɛ ne mɔ gyi ɛkɛ ne maa Belemgbunlililɛ edwɛkpakavolɛma a, anrɛɛ ɔbahile kɛ yɛ edwɛkɛhanlɛ gyima ne sɛkye ninyɛne. Noko ɔnle zɔ, ngoanelielɛ edwɛkɛ ne mɔɔ yɛka la maa amumuyɛma bie mɔ kakyi bɛ subane. (Yiz. 33:8, 19) Nea kɛzi ɛhye le nyilalɛ a!

7. Duzu a edwɛkɛ ‘ɛhye anzi’ mɔɔ wɔ Dwowɛle 2:28, 29 la maa yɛnwu ye a?

⁷ Kenga Dwowɛle 2:28, 29. Suzu ndelebɛbo mɔɔ tɔ zo nsa la anwo​—kɛzi ninyɛne doɔdoale zo wɔ ngapezo ne anu la. Yɛ ye nzonlɛ kɛ Gyihova hanle kɛ: “Ɛhye anzi [mekɛ mɔɔ mbɛbɛ ne mɔ bawie gyima mɔɔ bɛvale bɛmaanle bɛ yɛ la] mebawola me sunsum ne.” Saa mbɛbɛ ne mɔ gyi ɛkɛ ne maa Nyamenle Belemgbunlililɛ ne nolobɔlɛma a, duzu ati a Gyihova bawola ye sunsum ne agua bɛ nwo zo wɔ mekɛ mɔɔ bɛwie bɛ edwɛkɛhanlɛ gyima ne yɛ la ɛ? Nɔhalɛ ne a le kɛ, saa tɛ Nyamenle sunsum nwuanzanwuanza ne moalɛ zo a, anrɛɛ bɛnrɛhola bɛnrɛha edwɛkɛ ne wɔ mekɛ mɔɔ bɛyia ɛkpɔlɛ na bɛfa bɛ sa bɛto bɛ gyima ne azo la.

8. Mbɛbɛ ne mɔɔ bɛha bɛ nwo edwɛkɛ wɔ Yekile 9:1-11 la gyi ɛkɛ ne maa duzu? (Nea ɔ nyunlu nvoninli ne.)

⁸ Kenga Yekile 9:1-11. Akee bɛmaa yɛnlea ndelebɛbo mɔɔ tɔ zo nna la. Yɛhanle kɛ, mbɛbɛ ne mɔɔ Dwowɛle hanle bɛ nwo edwɛkɛ la fale yɛ daselɛlilɛ gyima ne anwo ɔluakɛ ngapezo mɔɔ zɔho ye la wɔ Yekile buluku ne anu. Wɔ Yekile buluku ne anu, bɛhanle abɛbɛ ɛlɔne bie mɔɔ bɛ nyunlu le kɛ sonla nyunlu na ‘debie mɔɔ zɔho nvutuke abotile bobɔ bɛ ti’ la anwo edwɛkɛ. (Yek. 9:7) “Bɛkile bɛdabɛ  [Nyamenle agbɔvolɛ] mɔɔ Nyamenle nzonlɛ ne bie ɛnle bɛ nwoma azo la” nyane too siane nnu, mɔɔ le mekɛ tendenle mɔɔ abɛbɛ fa tɛnla ngoane nu la. (Yek. 9:4, 5) Ɔkɛyɛ kɛ ɛhye fale Gyihova azonvolɛ mɔɔ bɛkpokpa bɛ la anwo. Bɛfa akɛnrasesebɛ bɛka Nyamenle ndɛnebualɛ edwɛkɛ bɛtia ewiade ɛtane ɛhye, na ɔmaa menli mɔɔ gyi ewiade ne anzi la anwo dwɛne bɛ.

9. Ngakyile kpole boni a wɔ mbɛbɛ mɔɔ Dwowɛle nwunle bɛ nee mɔɔ Dwɔn hanle nwolɛ edwɛkɛ la anu a?

⁹ Ɔle zɔ, ngapezo ne mɔɔ wɔ Yekile buluku ne anu la nee mɔɔ wɔ Dwowɛle buluku ne anu la zɔho bɛ nwo. Noko akee ngakyile kpole wɔ nu. Suzu nwo nea: Wɔ Dwowɛle ngapezo ne anu, mbɛbɛ ne mɔ sɛkye ninyɛne. (Dww. 1:4, 6, 7) Wɔ Dwɔn yekile ne anu, bɛhanle bɛhilele mbɛbɛ ne mɔ kɛ “bɛmmagyegye azɛlɛ ye azo ndile anzɛɛ nya amolɛ.” (Yek. 9:4) Mbɛbɛ ne mɔ mɔɔ Dwowɛle nwunle bɛ la vi sɔlɔ a rale a. (Dww. 2:20) Noko mbɛbɛ ne mɔɔ Dwɔn nwunle bɛ la vi kuma kuloonwu ne anu a rale a. (Yek. 9:2, 3) Bɛvoanle mbɛbɛ mɔɔ Dwowɛle hanle bɛ nwo edwɛkɛ la. Noko wɔ Yekile ɛdeɛ ne anu, bɛanvoa bɛ, emomu bɛmaanle bɛwiele gyima mɔɔ bɛvale bɛmaanle bɛ la. Debie biala ɛngile kɛ Gyihova anye ɛnlie mɔɔ bɛyɛle la anwo.​—Nea ɛlɛka “ Mbɛbɛ Nwo Ngapezo Ngakyile​—Bɛzɔho Bɛ Nwo Noko Bɛngile Debie Ko.”

10. Maa Baebolo nu neazo mɔɔ kile kɛ mbɛbɛ mɔɔ Dwowɛle nee Dwɔn hanle bɛ nwo edwɛkɛ la kile ninyɛne ngakyile la.

 ¹⁰ Ɔluakɛ ngakyile kpole wɔ ngapezo nwiɔ ne anu la ati, yɛbahola yɛaha kɛ bɛngile debie ko. Asoo mɔɔ yɛlɛka la a le kɛ mbɛbɛ ne mɔɔ Dwowɛle hanle nwolɛ edwɛkɛ nee mɔɔ Yekile buluku ne hanle nwolɛ edwɛkɛ la le ngakyile ɔ? Ɛhɛe. Wɔ Baebolo ne anu, ɔdwu mekɛ ne bie a, debie ko kola gyinla ɛkɛ ne maa ninyɛne ngakyile wɔ tɛnlabelɛ ngakyile nu. Kɛ neazo la, wɔ Yekile 5:5, bɛvɛlɛle Gyisɛse kɛ “Dwuda abusua nu Awenade ne,” yɛɛ wɔ 1 Pita 5:8, bɛha Abɔnsam anwo edwɛkɛ kɛ “awenade mɔɔ ɛlɛkpo.” Kɛmɔ yɛnwu kɛ edwɛkɛ ekyi wɔ ndelebɛbo mɔɔ yɛlɛ ye kɛkala anwo la ati, ɔwɔ kɛ yɛnwu mɔɔ Dwowɛle ngapezo ne kile amgba la. Ngapezo ne abo kile duzu?

11. Kɛzi Dwowɛle 1:6 yɛɛ 2:1, 8, 11 maa yɛnwu mbɛbɛ ne mɔ kpalɛ ɛ?

¹¹ Saa yɛnea Dwowɛle ngapezo ne nee edwɛkɛ gyɛne mɔɔ boka nwo la kpalɛ a, yɛnwu kɛ ɛnee ngapezonli ne ɛlɛka sogyama ɛtetalɛ nwo edwɛkɛ. (Dww. 1:6; 2:1, 8, 11) Gyihova hanle kɛ, ɔbava ye “ɛlɔne kpole” (Babelɔn sogyama) yeahwe Yizilayɛma mɔɔ yɛ anzosesebɛ la anzo. (Dww. 2:25) Ɔle kpalɛ kɛ bɛvɛlɛle ɛlɔne zɔhane “sɔlɔ amra” la, ɔluakɛ ɛnee Babelɔnoma bɛavi sɔlɔ ateta Yizilayɛma. (Dww. 2:20) Bɛvale sogyama zɔhane bɛtotole mbɛbɛ dɔɔnwo mɔɔ bɛziezie bɛ nwo la anwo. Dwowɛle hanle bɛ nwo edwɛkɛ kɛ: “[Sogyanli] ko biala lua ye adenle nu fɔɔnwo. . . . Bɛtu twi bɛkɔ suakpole ne azo, bɛnriandi bane ne mɔ anwo. Bɛfo azua, bɛdua nvɛnzɛlɛ ne mɔ anu bɛwolo kɛ awule.” (Dww. 2:8, 9) Pɛ nwolɛ nvoninli nea. Sogyama ɛyi ɛleka biala. Ɛnnyia ɛleka bɔbɔ na wɔavea. Ɛnee awie biala ɛnrɛhola ɛnrɛnriandi Babelɔnoma ne!

12. Kɛzi Dwowɛle ngapezo mɔɔ fale mbɛbɛ ne mɔ anwo la rale nu ɛ?

¹² Le kɛ mbɛbɛ la, Babelɔnoma (anzɛɛ Kaledeama) tetale suakpole Gyɛlusalɛm wɔ ɛvolɛ 607 K.Y.M. Baebolo ne bɔ amaneɛ kɛ: “Kaledea belemgbunli ne rale bɛ nwo zo na ɔvale konle dadeɛ ɔhuhunle bɛ mgbavolɛ . . . , ɔ kunlu anyelɛyela ye ammaa kpavolɛ anzɛɛ bɛlɛra, kpanyinli anzɛɛ mɔɔ ɛnlɛ anwosesebɛ la. Nyamenle vale debie biala wulale ɔ sa nu. Ɔyelale nɔhalɛ Nyamenle ne sua ne, ɔbubule Gyɛlusalɛm bane ne ɔguale aze, ɔvale senle ɔyelale ye tawa ne mɔ amuala, na ɔzɛkyele debie biala mɔɔ sonle bolɛ la.” (2 Ek. 36:17, 19) Mɔɔ Babelɔnoma zɛkyele debie biala mɔɔ wɔ azɛlɛ ne azo wiele la, menli hanle kɛ: “Azɛlɛ ɛhye ɛdɔ mgbane, menli nee nane ɛnle zo, bɛva bɛwula Kaledeama asa anu.”​—Gyɛ. 32:43.

13. Kilehile Gyɛlɛmaya 16:16, 18 anu?

¹³ Mɔɔ Dwowɛle hanle ngapezo ɛhye la anzi ɛvolɛ 200, Gyihova luale Gyɛlɛmaya anwo zo hanle ɛtetalɛ ɛhye anwo edwɛkɛ dole ɛkɛ. Ɔhanle kɛ bɛbakpondɛ Yizilayɛma mɔɔ bɔle amumuyɛ ɛbɛla la kɔkpula kɛ bɛbahye bɛ muala. Ngapezo ne hanle kɛ: “‘Nea melɛsoa meamaa bɛahɔvɛlɛ menli mɔɔ kye fɛlɛ la dɔɔnwo meamaa bɛara,’ Gyihova a se a, ‘na bɛbakpondɛ bɛ bɛahye bɛ. Yemɔ anzi, mebazoa meamaa bɛahɔvɛlɛ menli mɔɔ di ɛbɔlɛ la dɔɔnwo bɛara, na bɛbali ɛbɔlɛ bɛahye bɛ wɔ awoka mgbole nee awoka ngyikyi kɔsɔɔti azo yɛɛ awolɛ mgbole adokule nu. . . . Mebadua bɛ kakɛ wɔ bɛ nvonleɛ nee bɛ ɛtane ne mɔ anwo.’” Yizilayɛma mɔɔ bɛannu bɛ nwo la ɛnrɛhola ɛnrɛvea nyevile nu anzɛɛ kpɔkɛ nu mɔɔ Babelɔnoma asa ɛnrɛha bɛ a.​—Gyɛ. 16:16, 18.

14. Mekɛ boni a Dwowɛle 2:28, 29 rale nu a?

¹⁴ Akee Dwowɛle hanle edwɛkpa bie anwo ngapezo. Ɔhanle kɛ bɛbazia bɛara azɛlɛ ne azo bieko. (Dww. 2:23-26) Akee ɔbadwu mekɛ bie wɔ awieleɛ mekɛ ne anu la, sunsum nu aleɛ babu. Gyihova ka kɛ: “Mebawola me sunsum ne meagua nwonane biala anwo zo, na bɛ mra mrenyia nee bɛ mra mraalɛ baha ngapezo . . . Mebawola me sunsum ne bie meagua me ngɛkɛlɛ mrenyia nee ngɛkɛlɛ mraalɛ bɔbɔ anwo azo.” (Dww. 2:28, 29) Tɛ ɛkɛ ne ala mɔɔ Yizilayɛma vi akɛlɛzonlenlɛ nu wɔ Babelɔn rale bɛ sua zo la yɛɛ bɛwolale sunsum ne bɛguale bɛ nwo zo a. Emomu, wɔ ɛvoya dɔɔnwo anzi wɔ Pɛntekɔso ɛvolɛ 33 Y.M. Kɛzi yɛnwu ye ɛ?

15. Kɛ mɔɔ Gyima ne 2:16, 17 kile la, mɔɔ Pita ka edwɛkɛ mɔɔ wɔ Dwowɛle 2:28 la, nzenzaleɛ boni a ɔyɛle ye wɔ nu a, na duzu a ɛhye maa yɛnwu ye a?

¹⁵ Sunsum ne hanle ɛzoanvolɛ Pita maanle ɔvale edwɛkɛ mɔɔ wɔ Dwowɛle 2:28, 29 la ɔhanle nwanwane debie mɔɔ zile wɔ Pɛntekɔso kenle ne la anwo edwɛkɛ. Wɔ kɛyɛ nwonlomɔ dɔne ngɔnla, bɛluale nwanwane adenle zo bɛwolale sunsum nwuanzanwuanza ne bɛguale menli bie mɔ anwo zo, na bɛbɔle ɔ bo bɛhanle “ninyɛne mgbole mɔɔ Nyamenle ɛyɛ la anwo edwɛkɛ.” (Gyi. 2:11) Mɔɔ Pita fa Dwowɛle ngapezo ne aha edwɛkɛ la, sunsum ne hanle ye maanle ɔhakyile edwɛkɛ ne anu ekyi. Wɔyɛ ye nzonlɛ kɛ ngakyile ekyi wɔ nu ɔ? (Kenga Gyima ne 2:16, 17.) Pita anva edwɛkɛ “ɛhye anzi” ambɔ ye ɛdeɛ ne abo, emomu ɔbɔle ɔ bo kɛ: “Mekɛ mɔɔ li awieleɛ la anu​—wɔ edwɛkɛ ɛhye anu, kile kɛ wɔ Dwuuma ngyehyɛleɛ ne awieleɛ​—Nyamenle bawola ye sunsum ne bie agua nwonane biala anwo zo.” Ɛhye kile kɛ, mekɛ ekyi guale nu kolaa na Dwowɛle ngapezo ne ara nu.

16. Kɛzi Nyamenle sunsum ne nyianle daselɛlilɛ gyima ne azo tumi wɔ ɛvoya mɔɔ limoa la anu ɛ, na ɛnɛ noko ɛ?

 ¹⁶ Mɔɔ bɛluale nwanwane adenle zo bɛwolale Nyamenle sunsum ne bɛguale wɔ ɛvoya mɔɔ limoa anu la yɛɛ bɛbɔle ɔ bo kɛ bɛyɛ daselɛlilɛ gyima ne kpalɛ a. Ɔkadwu mekɛ mɔɔ ɛzoanvolɛ Pɔɔlo hɛlɛle ye kɛlata ne hɔmaanle Kɔlɔsaema wɔ kɛyɛ ɛvolɛ 61 Y.M. la, ɔholale ɔhanle kɛ bɛbɔ edwɛkpa ne nolo bɛhile “abɔdeɛ muala mɔɔ wɔ aleɛabo la.” (Kɔl. 1:23) “Abɔdeɛ muala” ne a le ewiade ne mɔɔ ɛnee wɔ ɛkɛ wɔ Pɔɔlo mekɛ zo la. Ɔlua Gyihova sunsum ne moalɛ zo, daselɛlilɛ gyima ne ɛnyia anyuhɔlɛ kpalɛ wɔ yɛ mekɛ ye azo​—yehɔdwu “azɛlɛ ye azo ɛleka biala”!​—Gyi. 13:47; nea ɛlɛka “ Mebawola Me Sunsum Ne.”

17. Kɛzi yɛ ndelebɛbo mɔɔ yɛlɛ wɔ Dwowɛle ngapezo mɔɔ fale mbɛbɛ ne mɔ anwo la ɛhakyi ɛ?

¹⁷ Boni a ɛhakyi a? Kɛkala yɛde ngapezo mɔɔ wɔ Dwowɛle 2:7-9 la abo kpalɛ. Ye sikalɛ nu, ngyehyɛnu ɛhye ɛngile edwɛkpakavolɛma mɔɔ bɛlɛfa mɔdenlebɔlɛ bɛaha edwɛkɛ ne la, emomu ɔkile Babelɔn sogyama mɔɔ tetale Gyɛlusalɛm wɔ ɛvolɛ 607 K.Y.M. la.

18. Duzu a ɛtɛkakyile wɔ Gyihova menli nwo a?

¹⁸ Boni a ɛtɛkakyile a? Gyihova menli ɛlɛkɔ zo abɔ edwɛkpa ne nolo wɔ ɛleka biala, bɛlɛdua ndenle ngakyile zo yɛɛ bɛlɛfa nwolɛ adenle biala mɔɔ bɛbanyia ye la bɛayɛ zɔ. (Mat. 24:14) Yɛmmaa bɛ sa mɔɔ bɛfa bɛto yɛ gyima ne azo la ɛnzi yɛ adenle kɛ yɛbabɔ edwɛkpa ne nolo. Ɔlua Gyihova moalɛ zo, yɛlɛfa mɔdenlebɔlɛ nee akɛnrasesebɛ yɛabɔ Belemgbunlililɛ ne anwo edwɛkpa ne nolo yɛadɛla mekɛ biala! Yɛfi mɛlɛbɛnwoaze nu yɛsɛlɛ Gyihova kɛ ɔboa yɛ ɔmaa yɛde Baebolo ngapezo bo, na yɛlɛ anwodozo kɛ wɔ mekɛ kpalɛ nu, ɔbamaa yɛade “nɔhalɛ ne kɔsɔɔti abo”!​—Dwɔn 16:13.