1. Ngera el rolel omesuub a luluusbech er ngii a Brother Russell me a rulebengkel, e ngera me nguluureor?

BETOK el dart el rak er a mla me mong, e a Brother C. T. Russell me a rulebengkel el kekerei el cheldellir a remesuub a Tekingel a Dios, a mlo kldibel. Ngmle sorir el mo medengei el kmo ngera osisecheklel a Biblia el kirel a Jehovah el Dios me a Jesus Kristus, me a blekerdelir a rulekoad, me a olubet. Ngmle beot a teletael el luluusbech er ngii. A tang oker er a ker, e a rebebil a merriter a rokui el bades el kirel tia el ker. Aike el lebetik sel lorriter a bades a lluches. A Jehovah a ulemekngeltengat er tikal blak a rengrir el Kristiano me te miltik a betok el losisechakl er a Biblia el ngii a kmal meklou a belkul el mei er kid er chelechang.

2. Ngera me ngsebechel el mo cheleuid a uldesued sel dolasem el mo medengei a ulaoch er a Biblia?

² Me a Remesuub er a Biblia a mlo metik el kmo, ngmeringel a lebo dodengei a ulaoch er a Biblia e bai beot a bo dodengei a osisecheklel a Biblia. Ngera me nguaisei? A ulaoch er a Biblia a obeketakl sel lultaut me a lechub e ngmla motaut. Engdi ngar ngii a lmuut el tang er a uchul. A bo lungil bleketakl a ulaoch e ngkired el mo medengelii a uchul tia el ulaoch. A di domes er a di telkib er tia el ulaoch e ngsebechel el mo cheleuid a klaodengei er kid er ngii. Me tiaikid a ua el dilubech er a ulaoch el ngar a babier er a Joel. Me bo dorriter er tia el ulaoch e desa uchul me ngmlo er ngii tia el lomelodech.

3-4. Me lmuut er chelechang, e ngua ngera rolel a doltaut er a ulaoch el ngar er a Joel 2:7-9?

 ³ Monguiu er a Joel 2:7-9. A Joel a ulemlaoch el kmo a delebechel el chebud a mo tomelii a beluu er a Israel. A ungelel a mekedorm el ua ungelel a laion me ngdi kmang a rokui el dellomel! (Joel 1:4, 6) Ngmla mo betok el rak el doltaut er tia el ulaoch el kmo a rechedal a Jehovah a uaika el diak le meterrob el delebechel el chebud el melemolem lomerk er a klumech. Kede medengei el kmo tia el lureor a ngar ngii a bo lengedechii er a “beluu,” me tirke el chad el ngar omengederederir a remengeteklel a klechelid. *

⁴ Me a lsekum kede di menguiu er a Joel 2:7-9, e kede mo omdasu el kmo tiang a mera el lomesodel. Engdi sel dorriter er tia el rokir el ulaoch e kede mo mesang el kmo ngkirel el mengodech a klaodengei er kid er ngii. Bo dosaod a euang el rolel me ngkired el meruul er tia el tekoi.

5-6. Ngera el ker a mo duubech sel donguiu aika el bades (a) Joel 2:20? (b) Joel 2:25?

⁵ A kot e dutebengii a telbilel a Jehovah el kirel a telemellel a delebechel el chebud: “Ak mo chorideterir er kemiu tirkel [delebechel el chebud] el mla a diluches el mei.” (Joel 2:20) A lsekum a delebechel el chebud a omtechei er a Resioning er a Jehovah el loltirakl a tekingel a Jesus el lomerk er a klumech el meruul er a remo disaiplo e ngera me a Jehovah a tibir el mo mengeroid er tir? (Ese. 33:7-9; Mt. 28:19, 20) Me kmal bleketakl el Jehovah a diak longeroid er a reblak a rengrir el mesiungel ngbai ta er a tekoi me a lechub a chad el louketui er a rechedal.

⁶ A ongerung e dolebedebek aike el llechukl er a Joel 2:25. A Jehovah a kmo: “Ak lmuut el meskemiu a ikel murriid er a ikel rak er ser a leka dellemeliu a delebechel el chebud. Ng ngak ngikel uleldurech er ngii el urrurt er ngak el omtok er kemiu.” A domes er tiang a Jehovah a tibir “el mo mesterir” aike el lurriid delebechel el chebud a uchul. A lsekum a delebechel el chebud a omtechei er a rumerk er a Rengedel a Dios e tia a belkul a kmo tia el klumech el domerk er ngii a mo uchul a tellemall. Engdi tia el klumech luchul a osobel a sebechel el rulleterir a rebebil el mo melodech a klengar e tir e obult. (Ese. 33:8, 19) Tiang a kmal klou el klengeltengat el mo er tir!

7. Ngar a Joel 2:28, 29, e ngera belkul a tekoi el “e a uriul”?

⁷ Monguiu er a Joel 2:28, 29. A ongedei luchul sel domes a blechebechel a teletael el ngar er tia el ulaoch. A Jehovah a kmo: “E a uriul e ak mo oitelii a Reng er ngak”; tiang a uriul er a bla el rekir a urerir a delebechel chebud. A lsekum a delebechel el chebud a tirke el omerk er a klumech er a Rengedel a Dios, e ngera uchul me a Jehovah a oitelii a reng er ngii el mo er tir er a uriul er a bla el rekir a urerir? A mera er ngii a lsekum e ngdiak a ngelseuil a mesisiich el chedaol el reng er a Dios, e ngdiak el sebechel el melemolem tia lureor er a berkel a klumech el meketeket el taem e lengar er ngii a ultok me a omerrob er ngii.

8. Me aika el chebud el losaod a Ocholt 9:1-11 ngmelutk el kirir a rua techang? (Momes er a siasing er a medal tia el babier.)

⁸ Monguiu er a Ocholt 9:1-11. Chelechang bo desang ongeuang el luchul. Ke de ulemdasu el kmo telemellel delebechel el chebud el losaod er ngii a Joel a omtechei er a berkel a klumech e losisiu el ulaoch a debetik er ngii er a babier er a Ocholt. Tia el ulaoch a mesaod  aika el chebud el ‘ua klidm er a rechad e kldoel a kor a krone el kolt er a bderrir.’ (Och. 9:7) Te omekcharm er “tirkel chad [cherrouel a Dios] el dimlak olengchelel a Dios er a medal a bderrir” el kirel eim el buil, el rekil a klengar er a chebud. (Och. 9:4, 5) Tiang a meketeklii el kmo ngmesaod er a rengellitel el mesiungel a Jehovah. Te oba blekeu el louchais er a kerrekerilel a Dios el kirel tia el mekngit el beluulechad e tiang a rulleterir a rechad el mo ouedikel a rengrir.

9. Ngera klou el klekakerous er a delebechel el chebud el lulemes a Joel me aike el lulsaod a Johanes?

⁹ Kede locha mesang el kmo ngar ngii a osisiu er a ulaoch el ngar a Ocholt me a ngar a Joel. Engdi ngar er ngii a klou el klekakerous er ngii. El ua tiang, ngar a ulochel a Joel e a delebechel el chebud a mla tomellii a beluad. (Joel 1:4, 6, 7) Ngar a ues er a Johanes, e a tekoi a mlo er ngii el chebud el kmo ng “diak molemall a chudel ma kerrekar ma ngii di le dellomel.” (Och. 9:4) A delebechel el chebud el lilsang a Joel a mlara diluches el mei. (Joel 2:20) E aike el lulemes a Johanes a tilobed er a diak a btil deliobech. (Och. 9:2, 3) A delebechel el chebud el lulsaod er ngii a Joel a mo modik. E ngar a Ocholt e a chebud a diak bo el modik e bai nguu a kengei el mo rokir a urerir. Me ngdiak a olechotel el kmo a Jehovah a diak el deu a rengul er tir.​—Momes er a baks el “ Ulaoch el Kirel a Delebechel el Chebud​—A Klekakerous er Ngii.”

10. Msodii a rolel e a bades el kirel a chebud el losaod a Joel me a Johanes a sebechel el lomekesiu a kakerous el tekoi?

 ¹⁰ Me a klou el klekakerous er aika el eru el ulaoch a ngosukid el mo medengei el kmo ngkakerous a belkul. Me kid, kede melekoi el kmo a “chebud” el losaod er ngii a Joel a kakerous ngii me a “chebud” el ngar a Ocholt? Nguaisei. Ngar a Biblia e a lebebil er a taem e a okesiu a kakerous a belkul sel dousbech er a kakerous el rolel. El ua tiang, ngar a Ocholt 5:5, e a Jesus a okedongall el “Laion er a kebliil er a Juda,” e ngar a 1 Petrus 5:8, e a Diabelong a losaod er ngii el ua “ongumk el laion.” Me ngokiu a klemedengei er kid er chelechang e ngochotii el kmo ngkired losiik er a ta er a omesodel a ulochel a Joel. Me tiang locha ngerang?

11. Ngera el tekoi el ngar a Joel 1:6 me a 2:1, 8, 11 a meketeklii a klaodengei er kid el kirel a delebechel el chebud?

¹¹ A bo dungil el merriter a bebil er a bades el ngar er a ulochel a Joel e ngmo bleketakl el kmo ngika el profet a ulemlaoch el kirel a odechelakl er a resoldau. (Joel 1:6; 2:1, 8, 11) A Jehovah a dilu el kmo ngmo ousbech er “ngii” (resoldau ra Babilon) el mo mengelebus er tirke el mekngit el chad er a Israel. (Joel 2:25) Tirka el soldau a okedongall el chad er “a diluches” e le uchul a rechad er a Babilon a lolemall er a Israel e te ulemuchel er a diluches. (Joel 2:20) Te kmal kltmokl el kirel a mekemad el ua teletelel a delebechel el chebud. A Joel a melekoi el kirir el kmo: “Ng rokui el di merael el di melemalt el bedul uchei e diak bo le ngodech a lorael el bedul ngii. . . . Ng orreched el mo oldechelakl er a beluu; ng remurt el oleong a cheuatel, e melemiakl a blai, el mo soiseb er a mado el ua re merechorech.” (Joel 2:7-9) Ka bo molebedebek er tia el teletael? Ke iliuekl er a resoldau. Diak a sebechem el mo mertau er ngii. Ngdiak a chad el sebechel el chemiis er a resoldau er a Babilon.

12. Ngmilekerang e a ulochel a Joel el kirel a delebechel el chebud a mlotaut?

¹² Ngua delebechel el chebud, a rechad er a Babilon (me a lechub e te chad er Kaldea) a tilemellii a beluu er a Jerusalem er a 607 B.C.E. A Biblia a kmo: “A Rubak a ngiluu a king er a Babilonia el mo omtok er tir me ng milkodeterir a re ngeasek el sechelengir er a saider. . . . Ng dimlak le chebteterir a re ngeasek el sechal ma lechub a re dirkak loilil el mekekerei el redil . . .  ma rubak, ma lechub a remechuodel. E silsebii a Templo e ongkengkii a cheuotelel a Jerusalem, e sueseb a rokui el bill a king e tomall a rokui el mekreos el klalo.” (2 Kr. 36:17, 19) Me a rechad er a Babilon er a bo lemerek el tomellii a beluu e a re ulemes a millekoi el kmo: “ng cheloit el beluu el diak a rechad ma charm el kiei er ngii, ele ngmla mora chimorir a re chad er a Babilonia.”​—Jer. 32:43.

13. Ka msodii a belkul a Jeremia 16:16, 18.

¹³ Bekord eru el dart el rak er uriul er a ulochel a Joel e a Jehovah a uluusbech er a Jeremia louchais el kirel tia el odechelakl. Ngmillekoi el kmo ngmo er ngii a klou el siik el mo er tirke el chad er a Israel el meruul a mekngit​—tia el siik a mo uchul e te mudechem. “A Rubak a kmo, “Ak uldurech el mo melai er as re betok el chad er a omenged el me omdechem er tirka el chad. E oldurech el mo melai er a re betok el chad el omoes a charm el mo omekbat e omoes er tir er a bek el rois, ma bukl, ma telongelel a bad er a ii. Te mo meringel el obals el kirel a kngterir, ma mekngit el omerellir.” A daob me a chereomel a diak el sebechel el merteterir tirka el diak lobult el  chad er a Israel er a re soldau er a Babilon.​—Jer. 16:16, 18.

14. Ngoingerang e ngmlo motaut a ulaoch el ngar a Joel 2:28, 29?

¹⁴ A Joel a meskid a ungil chais el kirel a omeleketek. A beluu a lmuut el mo ungil. (Joel 2:23-26) E mo er ngii a taem e ngmo sebeched el ngmai a betok el okelel a klereng. “Ak mo oitelii a Reng er ngak el mor a rokui el chad,” a Jehovah a melekoi, “a re bikiu ma re ekebil er kemiu a mo melekoi a klmechek . . . ak dirrek el mo oitelii a Reng er ngak el mor a re mesiou el sechal ma redil.” (Joel 2:28, 29) Tia el oitelii a reng er a Dios a dimlak lomuchel er a lluut el mei er a belurir ra Babilonia a rechad er a Israel. Ng dilubech er a betok el rak er uriul er sera Pentekost er a 33 C.E. Ke de mekerang e mo medengei?

15. Ngar a Rellir 2:16, 17, e ngera lomelodech el mora Joel 2:28 a lurruul er ngii a Petrus, e tia ngolecholt el kirel a ngerang?

¹⁵ A mlukreng el apostol Petrus a milsaod er a Joel 2:28, 29 el kirel a mengasireng el tekoi el dilubech er a sils er a Pentekost. Ngar a bekord etiu el klok ra tutau e ngdilubech a mengasireng el oitelel a chedaol el reng, me tirke el mlo er tir a chedaol el reng a mlo melekoi a “mengasireng el tekoi el bla leruul a Dios.” (Rel. 2:11) Mlukreng el Petrus a uluusbech a kakerous el tekoi er sera losaod er a ulochel a Joel. Ke mesang a klekakerous er ngii? (Monguiu er a Rellir 2:16, 17.) A Petrus a dimlak lomuchel er a cheldechedechal el kmo “a uriul,” ngdilu el kmo: “A ikel uriul sils”​ —el melutk er a uriul sils er a telemellel a Jerusalem​—e a reng er a Dios a mora “re bek el chad.” Tiang a olecholt el kmo ngmlo kemanget el taem e ngmlochu tmaut a ulochel a Joel.

16. A reng er a Dios ngerang rirellii er a berkel a klumech er a taem er a rekot el Kristiano, me chelecha el taem?

 ¹⁶ Me a uriul er tia el mengasireng el oitelel a reng er a Dios er a taem er a rekot el Kristiano e a ureor er a berkel a klumech a ulemuchel el oberk er a beluulechad el rokir. A apostol Paulus er a loluches el mora rechad er a Kolose er a bekord 61 C.E., e ngmilsaod el kirel a ungil chais el mla mosisechakl el mora “re bek el chad er a beluulchad.” (Kol. 1:23) Sera el temel a Paulus e sel dedu el kmo “re bek el chad” e ngbelkul a kmo, ngikel beluu el sebechir a rechad el mo er ngii. Me ngokiu a ngelseuil a mesisiich el chedaol reng er a Jehovah e a berkel a klumech a mla oberk er chelecha el taem​—“el mor a beluulchad el rokir”!​—Rel. 13:47; momes er a baks el “ Ak Mo Oitelii a Reng er Ngak.”

17. Ngera mla mengodech er a klemedengei er kid el kirel a delebechel el chebud el ngar a ulochel a Joel?

¹⁷ Ngera mla mengodech? Ngmla mo ungil el bleketakl a klemedengei er kid er a ulaoch el ngar a Joel 2:7-9. Aika el bades a diak losaod el kirel a blakerreng er kid er berkel a klumech, ngbai mesaod el kirir a resoldau er a Babilon el tilemellii a beluu er a Jerusalem er a 607 B.C.E.

18. Ng ngera dirkak le mengodech er a rechedal a Jehovah?

¹⁸ Ngera dirkak le mengodech? A rechedal a Jehovah a melemolem el omerk er a ungil chais er a bek el basio el lousbech a betok el kakerous el teletael. (Mt. 24:14) Malta kabelment a diak lekengei er tia el lurered,engdi ngdiak le terebengid el mengedmokl er tia el berkel a klumech. Me ngoeak a klengeltengat er a Jehovah e ngkmal mengal mla mo blak a rengud loba blekeu el lomerk er a ungil chais er a Renged! Bo doba klengariourreng e dolemolem lultuil er a Jehovah me lomekrael er kid me bo dungil medengei a ulaoch er a Biblia e lulterekokl a rengud el kmo sel lungil temel e ngmo omekrael er kid “el mo medengei a rokui el klemerang”!​—Jn. 16:13.