1. Wanem kaen wei for study nao Brata Russell and olketa nara brata duim, and why nao datwan hem gudfala wei for study?

WINIM wan handred year go finis, Brata Charles Russell and olketa fren blo hem, wea hem wanfala smol grup blo olketa Bible student, olketa start for hipap tugeta. Olketa laek for faendaot wanem nao Bible really teachim abaotem Jehovah God, Jesus Christ, wanem nao happen lo olketa wea dae, and datfala ransom. Hao olketa duim study hem simpol. Wanfala bae askem wanfala kwestin, then evriwan lo grup bae trae for faendem evri scripture wea join witim datfala subject. Then, olketa bae raetem wanem olketa lanem from research wea olketa duim. Jehovah helpem olketa brata hia for minim staka important truth lo Bible, and olketa truth hia still important for iumi distaem.

2. Taem iumi trae for minim wanfala Bible profesi, why nao hem hard samfala taem for kasem stretfala mining blo hem?

² Bat gogo olketa Bible student luksavve hem isi nomoa for minim wanem Bible teachim abaotem wanfala subject bat for faendem stretfala mining blo wanfala Bible profesi hem no isi. Why nao olsem? Hem bikos staka taem iumi only minim gud wanfala Bible profesi bihaen hem fulfill or taem hem gohed fulfill. Bat nara reason tu stap. For savve lo stretfala mining blo wanfala profesi, iumi mas lukluk lo wanem nao full story, or context. Sapos iumi lukluk lo wanfala part lo datfala profesi nomoa and no luk lo olketa nara part, maet hao iumi minim hem no stret. Luk olsem datwan nao happen lo wanfala profesi lo buk blo Joel. Iumi bae lukluk lo datfala profesi and story raonem why iumi need for changem hao iumi minim datfala profesi.

3-4. Lo bifor, hao nao iumi minim disfala profesi lo Joel 2:7-9?

³ Readim Joel 2:7-9. Joel profesi abaotem hao staka grashopa bae barava spoelem land blo Israel. From teeth and jaw  blo olketa hem olsem teeth and jaw blo lion, olketa insect hia finisim evri samting wea olketa lukim! (Joel 1:4, 6) For staka year finis, iumi sei disfala profesi abaotem olketa grashopa wea no eniwan fit for stopem, hem piksarem wei wea pipol blo Jehovah duim disfala preaching waka. Iumi tingse disfala waka hem barava spoelem datfala “land,” wea minim hem affectim pipol wea stap anda lo olketa leader blo olketa religion. *

⁴ Sapos iumi readim nomoa Joel 2:7-9, iumi maet tingse datwan nao stretfala mining blo hem. Bat, sapos iumi lukluk lo full story blo datfala profesi, iumi bae luksavve dat iumi need for changem hao iumi minim datfala profesi. Bae iumi storyim fofala reason.

5-6. Wanem kwestin nao kamap taem iumi ting raonem (a) Joel 2:20? (b) Joel 2:25?

⁵ First reason, tingim wanem Jehovah talem abaotem staka grashopa hia, hem sei: “Bae mi ronemaot disfala ami blong grashopa wea hemi kamdaon from not.” (Joel 2:20) So sapos olketa grashopa hia piksarem olketa Jehovah’s Witness wea obeyim komand blo Jesus for preach and mek disaepol, why nao Jehovah sei hem bae raosem olketa? (Esikiel 33:7-9; Matt. 28:19, 20) Hard for Jehovah raosem olketa faithful servant blo hem, so hem klia dat hem raosem samting or samwan wea kosim trabol for pipol blo hem.

⁶ Mek-tu reason, tingim scripture lo Joel 2:25. Lo there Jehovah sei: “Mi nao mi sendem kam disfala ami long grashopa fo spoelem yufala. Bat evrisamting wea yufala lusim, wea olketa grashopa ya i spoelem, bae mi givimbaek moa long yufala.” Lukim hao Jehovah promis for ‘givim bak moa’ evri samting wea olketa grashopa spoelem. So sapos olketa grashopa piksarem olketa wea talemaot Kingdom, datwan bae minim message wea olketa talemaot hem spoelem man. Bat really, datfala message savve sevem laef and muvim samfala wea wicked for repent. (Esikiel 33:8, 19) Datwan savve kamap blessing for olketa!

7. Lo Joel 2:28, 29, datfala toktok “bihaen,” hem helpem iumi for minim wanem samting?

⁷ Readim Joel 2:28, 29. Mek-thri reason, hem join witim hao datfala profesi storyim olketa taem wea samting happen. Lukim wanem Jehovah talem, hem sei: “Bihaen, bae mi givim kamdaon Spirit blong mi.” So datwan hem bihaen olketa grashopa duim finis waka blo olketa. Sapos olketa grashopa nao olketa wea preachim Kingdom, why nao Jehovah bae givim kam spirit blo hem lo olketa bihaen olketa duim finis datfala preaching waka? Pipol blo Jehovah gohed preach for staka year nomata pipol againstim olketa and banim waka blo olketa. Tru samting nao, hem hard for olketa duim datwan sapos paoa blo holy spirit no helpem olketa.

8. Olketa grashopa lo Revelation 9:1-11 hem piksarem hu? (Lukim piksa lo kava.)

⁸ Readim Revelation 9:1-11. Distaem bae iumi storyim mek-foa reason. Lo bifor iumi sei olketa grashopa wea Joel storyim hem piksarem preaching waka bikos nara profesi wea lelebet semsem hem stap lo buk blo Revelation. Disfala profesi storyim staka grashopa wea feis blo olketa luk olsem feis blo man, and “samting wea luk olsem olketa gold kraon hem stap long hed bilong olketa.” (Rev. 9:7) Olketa mekem “olketa [enemy blo God] wea no garem datfala mark bilong God long forhed bilong olketa” for safa for faevfala month, wea datwan nao hao long  wanfala grashopa savve laef. (Rev. 9:4, 5) Luk olsem diswan really piksarem olketa anointed servant blo Jehovah. Olketa no fraet for talemaot judgment blo God againstim disfala nogud world and datwan mekem olketa wea sapotim world for feel nogud tumas.

9. Lo olketa wanem wei nao olketa grashopa wea Joel lukim hem difren from olketa grashopa wea John lukim?

⁹ Hem tru, datfala profesi lo Revelation and datwan wea Joel raetem hem semsem lelebet. Bat staka important information insaed hem barava difren. Tingim diswan: Lo profesi blo Joel, olketa grashopa spoelem olketa tree and plant. (Joel 1:4, 6, 7) Lo vision blo John, olketa grashopa kasem komand “for no spoelem olketa grass and olketa nara plant and olketa tree long earth.” (Rev. 9:4) Olketa grashopa wea Joel lukim kam from north. (Joel 2:20) Olketa wea John lukim kamaot from wanfala hol. (Rev. 9:2, 3) Joel storyim hao Jehovah raosem olketa grashopa. Lo Revelation, Jehovah no raosem olketa grashopa bat hem letem olketa for finisim waka blo olketa. And tu, luk olsem olketa no duim eni samting wea mekem Jehovah no hapi lo olketa.—Lukim box “ Tufala Profesi Abaotem Olketa Grashopa—Klosap Semsem Bat Difren.”

10. Storyim wanfala example lo Bible wea showimaot grashopa wea Joel and John storyim hem savve piksarem olketa difren samting.

¹⁰ From staka samting lo tufala profesi hia hem barava difren, datwan helpem iumi luksavve  tufala profesi hia no storyim sem samting. So waswe, datwan minim olketa “grashopa” wea Joel storyim hem difren from olketa “grashopa” wea buk blo Revelation storyim? Yes. Lo Bible, staka taem wanfala samting savve piksarem olketa difren samting. Example lo datwan hem lo Revelation 5:5, wea sei “datfala Lion wea kam from tribe bilong Judah” hem piksarem Jesus, bat datfala “lion wea singaot big” wea 1 Peter 5:8 storyim hem piksarem Devil. Fofala point wea iumi just storyim, and olketa kwestin wea kamap abaotem mining blo datfala profesi blo Joel showimaot iumi need for faendem narafala wei for minim disfala profesi. Wanem nao datwan?

11. Hao nao Joel 1:6 and Joel 2:1, 8, 11 helpem iumi for luksavve hu nao olketa grashopa?

¹¹ Taem iumi lukluk gud lo olketa verse wea stap raonem disfala profesi blo Joel, iumi luksavve hao Joel hem profesi abaotem wanfala attak blo army. (Joel 1:6; 2:1, 8, 11) Jehovah sei hem bae iusim bigfala army blo hem (olketa soldia blo Babylon) for panisim olketa Israelite wea no obey. (Joel 2:25) Hem storyim hao datfala army hem from north bikos olketa blo Babylon bae attakim Israel from north. (Joel 2:20) Datfala army hem olsem staka grashopa wea go stret followim gogo blo olketa. Joel sei olsem abaotem olketa: “No eniwan hemi satem gogo blong narawan. . . . Olketa kam kuiktaem an klaem long wolston blong taon ya, an kam insaet fo spoelem ples ya. Olketa klaem long olketa haos, an gotru long olketa windo olsem olketa man fo stil.” (Joel 2:8, 9) Waswe, iu savve piksarem datwan lo mind blo iu? Staka soldia kam insaed lo datfala taon. Pipol bae no garem eni ples for haed. No eniwan savve ranawe from sword blo olketa lo Babylon!

12. Hao nao datfala profesi blo Joel abaotem olketa grashopa hem fulfill?

¹² Olsem olketa grashopa, olketa lo Babylon (or, olketa Chaldean) tekovarem taon lo Jerusalem lo 607 B.C.E. Bible sei: “King blong Babilonia . . . no sore long olketa, so hemi kilim dae olketa yanga blong olketa. Nomata, yangman, o yang gele, o man, o olo, God hemi letem olketa evriwan dae long han blong [king]. Olketa bonem Tambuhaos blong God, . . . an [distroem] evri gudfala samting tu. Olketa brekemdaon bikfala wolston blong Jerusalem tu.” (Mektu Kronikols 36:17, 19) Taem olketa blo Babylon finis for distroem datfala land, olketa pipol sei olsem: “Olketa blong Babilonia bin tekova long disfala lan an spoelem hem, mekem hemi kamap wanfala ravis ples olsem drae eria nomoa wea no eni man o animol save stap long hem.”—Jeremaea 32:43.

13. Explainim wanem profesi lo Jeremaea 16:16, 18 hem minim.

¹³ Samting olsem 200 years bihaen profesi blo Joel, Jehovah iusim Jeremiah for profesi abaotem nara samting wea join witim disfala attak. Hem sei olketa bae lukaotem olketa Israelite wea duim olketa nogud samting, and tekem olketa olsem prisoner. “[Jehovah] hemi gohed fo tok olsem, ‘Mi seleva nao bae mi sendem toktok go long olketa enemi, mekem olketa kam pulum yufala, olsem man hemi pulum fis. An bihaen bae mi sendem samfala enemi moa, mekem olketa lukaotem yufala evriwea long lan, olsem man fo [hunting] hemi lukaotem mit . . . long olketa maonten an hil, an long olketa hol long ston. . . . Bae mi dabolem panis blong yufala from olketa sin blong yufala.’” Nomata lo sea or lo maunten, olketa Israelite wea no repent bae no garem eni ples for haed from olketa blo Babylon wea kam for attakim olketa.—Jeremaea 16:16, 18.

14. Wanem taem nao Joel 2:28, 29 hem kamap tru?

¹⁴ Then, Joel talem wanfala gud nius abaotem wei wea evri samting bae kamap gud moa. Datfala land bae garem staka gud samting moa. (Joel 2:23-26) And lo future, bae evriwan savve kasem staka spiritual kaikai. Jehovah sei: “Bae mi givim kamdaon Spirit blong mi fo stap long evri pipol. Olketa san an dota blong yufala, bae i save talemaot mesij blong mi. . . . Long taem ya, bae mi givim kamdaon Spirit blong mi fo stap long olketa evriwan, nomata olketa i man slev o woman slev.” (Joel 2:28, 29) Wei wea God givim spirit blo hem, hem no happen stretawe bihaen olketa Israelite kam bak from Babylon. Bat, datwan happen lo Pentecost 33 C.E wea hem staka handred year bihaen. Hao nao iumi savve lo datwan?

15. Olsem iumi lukim lo Acts 2:16, 17, wanem toktok nao Peter changem lo Joel 2:28, and wanem nao datwan showimaot?

¹⁵ Thru lo holy spirit, aposol Peter storyim hao profesi lo Joel 2:28, 29 hem fulfill taem wanfala spesol samting happen lo day blo Pentecost. Lo samting olsem naen o’klok lo morning, God pourim kam holy spirit lo olketa disaepol and olketa start for story “abaotem olketa nambawan samting wea God duim.” (Acts 2:11) Holy spirit muvim Peter for iusim toktok wea lelebet difren taem hem quotem toktok blo Joel. Waswe, iu luksavve lo wanem toktok nao change? (Readim Acts 2:16, 17.) Profesi blo Joel start witim datfala toktok “bihaen,” bat Peter startim toktok blo hem olsem: “Long taem wea end hem kakam klosap,” wea hem minim olketa last day blo system blo olketa Jew lo datfala taem, Jehovah pourim kam spirit blo hem lo “evri difren kaen pipol.” Datfala toktok showimaot longfala taem mas go pas bifor profesi blo Joel hem fulfill.

16. Hao nao holy spirit affectim preaching waka lo first century, and lo distaem?

 ¹⁶ Bihaen datfala spesol wei wea God pourimaot spirit blo hem lo olketa disaepol lo first century, preaching waka hem kamap moa big. Taem aposol Paul raetem leta lo olketa lo Colossae, lo samting olsem 61 C.E., hem fit for sei datfala gud nius hem kasem nao “evriwan long earth.” (Col. 1:23) Lo taem blo Paul, “evriwan long earth” hem minim evri ples wea Paul and olketa narawan fit for kasem. From help blo holy spirit blo Jehovah, distaem preaching waka hem kamap moa big and hem kasem “evri ples long earth”!—Acts 13:47; lukim box “ Bae Mi Givim Kamdaon Spirit Blong Mi.”

17. Wanem nao hem change lo mining blo profesi blo Joel abaotem olketa grashopa?

¹⁷ Wanem nao change? Distaem iumi kasem stretfala mining blo datfala profesi lo Joel 2:7-9. Iumi luksavve olketa verse hia no piksarem disfala preaching waka, bat hem piksarem hao army blo Babylon tekovarem Jerusalem lo 607 B.C.E.

18. Wanem nao hem no change for olketa pipol blo Jehovah?

¹⁸ Wanem nao hem no change? Pipol blo Jehovah gohed for preachim gud nius lo evri ples and olketa duim lo eni wei wea olketa fit for duim. (Matt. 24:14) No eni samting wea gavman duim savve stopem iumi for obeyim komand for preach. And from Jehovah blessim iumi, iumi kamap moa strong winim eni nara taem, and iumi no fraet for preachim gud nius abaotem Kingdom! Iumi hambol for gohed depend lo Jehovah for helpem iumi minim olketa Bible profesi, and iumi barava sure hao lo taem wea barava fitim, hem bae helpem iumi for “minim gud olketa samting wea tru”!—John 16:13.