1. Ко саво начин о пхрал о Расел хем лескере соработникија истражинена сине и Библија, хем соске адава сине шукар?

АНГЛЕДЕР повише таро јекх веко, о пхрал Чарлс Расел хем јекх тикни група соработникија почминѓе те кхеден пе те шај те истражинен е Девлескоро Лафи. Ола мангле те дикхен со шај те сикљовен тари Библија башо Јехова, башо Исус Христос, башо адава со овела е муленцар хем баши откупнина. Проучинена сине ко едноставно начин. Најангле некој ка пучел сине несаво пучибе, а пало адава и група испитинела сине секова стихо сој поврзимо адале темаја. Ко крајо, пишинена сине адава со аракхле џикоте истражинѓе. О Јехова поможинѓа адале искрена христијаненге те откринен бут важна чачипа тари Библија, хем адала чачипа тане важна аменге да авдиве.

2. Соске понекогаш шај те ава џи ко погрешно заклучок кеда трудинаја амен те хаљова несаво библиско пророштво?

² Ама, адала истражувачија е Библијакере сигате халиле кај тано бут попхаро точно те хаљовел пе јекх библиско пророштво него несаво основно библиско сикљојбе. Соске? Јекх причина тани адаја со бут пути најшукар хаљоваја о библиска пророштвија џикоте исполнинена пе или откеда ка исполнинен пе. Ама, иси јавер да причина. Те шај точно те хаљова несаво пророштво, обично мора те дикха о контекст. Ако концентриринаја амен само ко јекх аспекти таро пророштво бизо те дикха о јавера аспектија, шај те ана погрешно заклучок. Акава случинѓа пе е пророштвоја таро лил Јоил. Те испитина акана панда јекх пути акава пророштво хем те дикха соске ваљани те кера промена ко адава сар хаљоваја акава пророштво.

3-4. Сар објаснинаја сине џи акана о пророштво таро Јоил 2:7-9?

 ³ Читин Јоил 2:7-9. О Јоил пророкујнѓа кај и израелско пхув ка овел уништими таро баро број скакулција. Адала алчна инсектија, со сине лен сар лавескере данда хем вилице, ка хан са англи песте! (Јоил 1:4, 6). Бершенцар хаљоваја сине кај акава пророштво керела лафи башо адава кај е Јеховаскоро народо ка проповединел сар баро број скакулција колен со никој хем ништо нашти те чхинавел лен. Мислинаја сине кај амаро проповедибе тано баро мучибе е „пхувјаке“, јавере лафенцар е манушенге упро кола со силно влијајнена о верска водачија. *

⁴ Ако читинаја само Јоил 2:7-9, акава објаснување башо пророштво дикхјола логично. Ама, ако иси амен ки годи цело контекст, дикхаја кај ваљани појавер објаснување. Те дикха штар причине баши акаја промена ко хаљојбе.

5-6. Кола пучиба шај те пуча амен кеда читинаја а) Јоил 2:20? б) Јоил 2:25?

⁵ Прво, приметин саво ветување денѓа о Јехова башо баро број скакулција кола со ка керен штета: „Околе таро север [е скакулцон] ка палдав ле дур тумендар“ (Јоил 2:20). Ако о скакулција претставинена е Јеховаскере сведокон кола со шунена и заповед е Исусескири те проповединен хем те сикавен е манушен, соске о Јехова би мангела те палдел лен? (Езек. 33:7-9; Мат. 28:19, 20). Јасно тано кај на сине ле намера те палдел пле верна слуген, него некас сој душмани лескере народоске.

⁶ Сар дујто причина, те дикха о лафија таро Јоил 2:25. Адатхе о Јехова вакерела: „Ка иранав туменге о берша кола со хале лен о скакулцо, о терно скакулцо бизо пака, и лебарка хем и гасеница — мли бари војска која со бичхалѓум ла туменде“. Приметин кај о Јехова ветинѓа кај ка иранел и штета со керѓе ла о скакулција. Ако ола претставинена е Јеховаскере народо со проповединела башо Царство, акава ка значинел кај адава хабери керела штета. Ама, наместо адава, акава хабери спасинела живото хем шај те поттикнинел несаве лошна манушен те каинен пе (Езек. 33:8, 19). Адава ка овел ленге чачутно берекети!

7. Со шај те хаљова таро лафија „пало адава“ сој пишиме ко Јоил 2:28, 29?

⁷ Читин Јоил 2:28, 29. Те дикха и трито причина — о редо сар овена о настанија сој спомниме ко пророштво. О Јехова вакерѓа: „Пало адава ка дав таро мло духо“. Јавере лафенцар, ов вакерѓа кај ка дел пло духо откеда о скакулција ка завршинен пли задача. Ако о скакулција тане адала со проповединена башо е Девлескоро Царство, соске о Јехова би дела лен пло духо откеда ка завршинен е сведочибаја? Факти тано кај бизи и помош таро лескоро моќно свети дух, ола на би шај сине бершенцар те проповединен иако сине лен бут противење, па чак забране баши ленгири активност.

8. Кас претставинена о скакулција таро Откровение 9:1-11? (Дикх и слика тари насловно страна.)

⁸ Читин Откровение 9:1-11. Акана те дикха и штарто причина. Џи акана вакерѓем кај о баро број скакулција башо кола со керела лафи о Јоил претставинена о проповедибе со кераја ле адалеске со иси јекх слично пророштво ко лил Откровение. Ки лесте керела пе лафи башо баро број скакулција колен со иси манушикано муј хем  пхиравена „нешто сар златна круне“ ко шере (Отк. 9:7). Ко периоди таро панџ масек — кобор со просечно живинела јекх скакулцо — ола мучинена е „манушен [е Девлескере душманен] колен со нане лен е Девлескоро печати ко пумаро чекат“ (Отк. 9:4, 5). Акава бут шукар опишинела е Јеховаскере помазиме слуген. Ола храбро објавинена е Девлескере осуде против акава лошно свето, а адава ни хари на керела те осетинен пе шукар окола со поддржинена ле.

9. Кола важна разлике иси машкар о скакулција таро е Јоилескоро пророштво хем о скакулција со опишинѓа лен о Јован?

⁹ Точно тано кај иси слична буќа машкар о пророштво таро Откровение хем о пророштво со пишинѓа ле о Јоил. Ама, машкар ленде исто аѓаар иси бут важна разлике. На пример, ко е Јоилескоро пророштво, о скакулција уништинена о растенија (Јоил 1:4, 6, 7). Ама, ки е Јованескири визија, е скакулцонге „сине вакердо те на уништинен о растенија ки пхув“ (Отк. 9:4). О скакулција со дикхља лен о Јоил але таро север (Јоил 2:20). Ама, окола со дикхља лен о Јован иклиле тари бездна (Отк. 9:2, 3). О скакулција со дикхља лен о Јоил сине палдиме. Ама, окола сој спомниме ко Откровение нане палдиме него дозволимо ленге те завршинен пумари задача. Ништо ки Библија на сикавела кај о Јехова на сине  задоволно лендар. (Дикх и рамка „ Пророштвија башо скакулција — слична, ама сепак различна“.)

10. Кова пример тари Библија сикавела кај о скакулција со опишинѓе лен о Јоил хем о Јован шај те значинен различна буќа?

¹⁰ О важна разлике машкар акала дуј пророштвија поможинена аменге те хаљова кај ола нане поврзиме. Акава значинела кај о скакулција со опишинѓа лен о Јоил нане о иста скакулција сој спомниме ко лил Откровение. Ки Библија, несаве симболе понекогаш иси ле различно значење кеда тано користимо ко различно начин. На пример, ко Откровение 5:5 башо Исус вакерела пе „о лави таро е Јудаскоро племе“, а ко 1. Петрово 5:8 о Бенг тано опишимо сар „лави со викинела кеда тано бокхало“. О штар причине со дикхлем лен сикавена кај е Јоилескере пророштво мора те овел ле несаво јавер значење. Кова тано адава?

11. Сар о Јоил 1:6 хем 2:1, 8, 11 поможинена аменге те хаљова кас претставинена о скакулција?

¹¹ Ако пошукар дикхаја о контекст таро е Јоилескоро пророштво, ка дикха кај ов, уствари пророкујнѓа јекх воено напад (Јоил 1:6; 2:1, 8, 11). О Јехова вакерѓа кај ка користинел пли „бари војска“ (е вавилонско војникон) те шај те казнинел е Израелцон со на сине послушна (Јоил 2:25). Точна тане о лафија кеда о Јоил баши вавилонско војска вакерела „окова таро север“ адалеске со ој нападинѓа е Израеле тари северно страна (Јоил 2:20). Адаја војска тани споредими скакулцонцар кола сој организириме ко баро број. Баши ленде, о Јоил вакерела: „Сар силно мануш ко пло дром, [о војникија] џана англе... Сигате кхувена ки диз. Прастана ко ѕидо. Уклена ко кхера. Кхувена сар чора таро џамија“ (Јоил 2:8, 9). Шај те замислине туке акава? Сегде иси војникија. Никој нане кај те гаравел пе. Никој нашти те спасинел пе тари вавилонско војска!

12. Сар исполнинѓа пе о пророштво башо скакулција со денѓа ле о Јоил?

¹² Сар скакулција, о Вавилонција (или о Халдејција) нападинѓе о Ерусалим ко 607 берш а.а.е. И Библија вакерела: „О халдејско цари, кова со мударѓа мачеа ленгере тернен... на сине ле милост ни тернеске ни чхајаке, ни пхуреске ни некаске со нане ле сила. О Девел денѓа леске са ко васта. Ов тхарѓа о кхер е чачутне Девлескоро, рушинѓа о ѕидија таро Ерусалим. Са о зорале куле тхарѓа лен јагаја, хем исто аѓаар уништинѓа са сој скапоцено ки ленде“ (2. Лет. 36:17, 19). Откеда о Вавилонција нападинѓе хем уништинѓе и пхув, баши лате шај сине само те вакерел пе: „Акава тано пусто тхан, бизо мануша хем бизи стока. Денди тани ко васта е Халдејцонге“ (Ерем. 32:43).

13. Со значинена о лафија сој пишиме ко Еремија 16:16, 18?

¹³ Околу 200 берша откеда о Јоил денѓа пло пророштво, о Јехова користинѓа е Еремија те пророкујнел панда нешто башо акава напад. О Девел вакерѓа кај о душмања темелно ка роден цели пхув те шај те аракхен са е Израелцон кола со керѓе лошнипе, хем кај ка заробинен лен. „’Аке, ка бичхалав бут рибарија‘, вакерела о Јехова, ’кола со ка астарен лен. Пало адава ка бичхалав бут ловџије, хем ола ка астарен лен ко са о планине, ко са о уче тхана, хем ко са о оштра карпе... Целосно ка казнинав лен баши ленгири грешка хем башо ленгоро грево‘“. О Израелција со на каинѓе пе ка нашти сине нигде те гаравен пе таро  Вавилонција — ни ко море ни ко шуме (Ерем. 16:16, 18).

14. Кеда исполнинѓе пе о лафија таро Јоил 2:28, 29?

¹⁴ Е Јоиле иси ле шукар да хабери! И Пхув палем ка бијанел (Јоил 2:23-26). Ки иднина, о Јехова ка дел бут духовно храна. Ов вакерѓа: „Ка дав таро мло духо различна манушенге, хем тумаре чхаве хем чхаја ка пророкујнен... Чак е слугенге хем е слугинкенге ка дав таро мло духо“ (Јоил 2:28, 29). Ама, о Јехова на денѓа таро пло духо одма само со о Израелција иранѓе пе таро Вавилон ки пли пхув. Адава случинѓа пе шов векија пало адава, ки Педесетница 33 берш тари а.е. Котар џанаја?

15. Спрема Дела 2:16, 17, со вакерѓа о Петар кеда цитиринѓа о лафија таро Јоил 2:28, хем со сикавела адава?

¹⁵ Водимо таро е Девлескоро духо, о апостол Петар применинѓа о лафија таро Јоил 2:28, 29 ко јекх посебно настан со случинѓа пе ки адаја Педесетница. Адава сабај, ко околу ења о саати, о свети дух сине дендо ко јекх чудесно начин упро е Христосескере ученикија, хем ола почминѓе те керен лафи „башо баре буќа со керѓа о Девел“ (Дела 2:11). О Девел водинѓа е Петаре те користинел хари појавер лафија кеда цитиринѓа е Јоилескоро пророштво. (Читин Дела 2:16, 17.) Приметин кај, наместо те почминел е лафенцар „пало адава“, кола со користинѓа лен о Јоил, о Петар вакерѓа „ко последна диве“. Ко акава контекст, е лафенцар „последна диве“ мислинела пе ко периоди англедер те овен уништиме о Ерусалим хем о храми. Ко адава време, е Девлескоро духо сине дендо „различна манушенге“. Акава сикавела кај накхља бут време англедер те исполнинел пе е Јоилескоро пророштво.

16. Саво влијание сине е Девлескере свети духо упри проповедничко активност ко прво веко, хем сар влијајнела упро проповедибе авдиве?

 ¹⁶ Откеда о Девел денѓа пло духо упро христијања таро прво веко, и проповедничко активност барили бут хем сар со накхља о време ширинѓа пе ко цело свето. Џи ко 61 берш тари а.е., кеда пишинѓа пло писмо џи ко Колошања, о апостол Павле шај сине те вакерел кај о шукар хабери проповединела пе „машкар са о створиме буќа сој тело небо“ (Кол. 1:23). Кеда о Павле вакерѓа „са о створиме буќа“, мислинѓа ко са о тхана коте со ов хем о јавера шај сине те патујнен. Адалеске со поможинела амен е Јеховаскоро моќно свети дух, авдиве и проповедничко активност керела пе ки панда побари мера — са „џи ко крајо е пхувјакоро“! (Дела 13:47; дикх и рамка „ Ка дав таро мло духо“.)

17. Сој тано менимо ко амаро хаљојбе башо пророштво е скакулцонцар со денѓа ле о Јоил?

¹⁷ Значи, сој тано менимо? Акана поточно хаљоваја о пророштво таро Јоил 2:7-9. Едноставно вакердо, акале стихонцар на мислинела пе ко амаро ревносно проповедибе, него ко напад е вавилонско војскакоро упро Ерусалим ко 607 берш а.а.е.

18. Со нане менимо е Јеховаскере народоја?

¹⁸ Со нане менимо? Е Јеховаскоро народо понадари да проповединела о шукар хабери сегде хем ко секова начин (Мат. 24:14). Нисави забрана таро властија нашти те чхинавел амен те шуна и заповед те проповедина. Адалеске со иси амен е Јеховаскоро берекети, амен сием позафатиме ки акаја активност таро било кеда англедер аѓаар со храбро пренесинаја е јаверенге о шукар хабери башо Царство! Понизно родаја таро Јехова те водинел амен хем те поможинел амен те хаљова о библиска пророштвија хем сием увериме кај кеда ка авел време башо адава, ов ка ингарел амен „ко са о чачипе“! (Јован 16:13).