1. Mulad ik wa kwilej wasadinay Mukadivar Russell pamwing nau in kwilej akwau a Bibil, ni mulong wak wading mulad uwamp?

KWASUT kal mivu chitot ni kusut, Mukadivar C. T. Russell wasambisha kukumangan pamwing ni arund nend, kachisak kakemp ka in kwilej akwau a Dizu dia Nzamb. Ading akatin kuman anch akutwish kwilej yom yifundishinay chakin kamu Bibil piur pa Yehova Nzamb, Yesu Kristu, mwikadil wa afu, ni difut. Mulad wasadinau mulong wa kwilej wading uswapela. Muntu umwing walangwishang chipul, ni kupwa chisak chashinshikinang verse win mwawonsu ukwatijadina ni mutu wa mulong winiwa. Kwinsudien afundang yom yajinguninangau mu kukimbijol kwau. Nich ukwash wa Yehova, amakundj inay in kashinsh ajingunina uyakin uvud wa pa dishin wa Bibil tudandamedina kusanger djat ni nlel unou.

2. Chisu tusadina usu wa kutesh uprofet wa Bibil, yom ik yikutwisha kutushikij ku kuutesh nayimp?

² Pakwez pakad kulab in kwilej inay a Bibil ajingunina anch kutesh uprofet wa Bibil chiding chom chimwing chikash nakash kusutamu kutesh mafundish ma pa dishin ma Bibil. Mulong wak? Chakusambish, uprofet wa Bibil ukat kwovakanang nawamp kurumburik kwau anch wasambish kuwanyin ap kupwa kwa kuwanyin. Pakwez kudi kand diyingishin dikwau. Mulong wa kutesh nawamp uprofet, yisu yivud tukat kushinshikinang uprofet wawonsu wa kabuj. Anch twimen kusu kwetu pa kushinshikin ching chikunku chimwing cha uprofet ni kudiul chikwau, tukutwish kuutesh nayimp. Chimeken anch yawiy yom yashikena piur pa uprofet udia mu makand wa Jowel. El tushinshikinany kand katat uprofet winou ni kuman mulong wak chidi cha usey kuswimp mutapu wetu wa kuutesh.

3-4. Kudiosh pakur, mutapu ik tukata kuteshang uprofet udia mu mukand wa Jowel 2:7-9?

 ³ Tang Jowel 2:7-9. Jowel wasambela kulejan anch chisak cha ampasu chikez kashesh ngand ya Isarel. Mulong akwet mazeu ni mbang mudi ja antambu, atupwapu inay apumbina kudia akez kadia mitond yawonsu ya mwi ngand ya Isarel! (Jow. 1:4, 6) Mu mivu yivud, twalondang anch uprofet winou ufanikeshin antu a Nzamb adandamedina kwipan mu mudimu wa kulejan, mudi chisak cha ampasu akad kutwish kukangesh. Twalondang anch mudimu winou ukwet yibudikin yiyimp pa “ngand,” antu atakedinau kudi antakel a chirelijon. *

⁴ Anch twimen ching kusu pa kutang Jowel 2:7-9, tumen anch kwawiy kurumburik kwakin kwa uprofet winou. Pakwez anch twashinshikin nawamp uprofet wawonsu wa kabuj, tumen anch chidi cha usey kuswimp mutapu wetu wa kuutesh. El tushinshikinany mayingishin manying matubachikina kulond mwamu.

5-6. Yom ik tukutwisha kwiyipul chisu tushinshikidina mukand wa (a) Jowel 2:20? (b) Jowel 2:25?

⁵ Chakusambish, shinshikin kushilamu kwa Yehova piur pa chisak cha ampasu: “Nikez kayopat atubwol avudila mudi yisak ya amasalay adiokila kwiyand.” (Jow. 2:20) Anch ampasu afanikeshin Atuman a Yehova aziyidina kwi mbil ya Yesu ya kulejan ni kwikadish in kwilej, mulong wak chad Yehova washilamu anch ukuyopat? (Ezek. 33:7-9; Mat. 28:19, 20) Uyakin udi anch Yehova ukat kwopat, kadiap atushalapol end ashinshamena, pakwez chom ap muntu uletina ubaj kudi antwend.

⁶ Diyingishin dia kaad, shinshikin yom yifundinau mu mukand wa Jowel 2:25. Mwinomu Yehova ulondin anch: “Nikez kakuchirishinany yom yawonsu yiwashadishanya mu mivu yezau atubwol, ni ansansimany, ni andjong, ni amakuril kudia yir yen. Yam kamu natuma yisak yiney ya njit kukurishikishany.” Umen anch Yehova ushidinamu ‘kuchirish’ yom yasheshau kudi ampasu. Anch ampasu afanikeshin in kulejan a Want, komb chinech chirumburikin anch uruu ulejenau udi wa ubaj. Pakwez chinyim ni chinech, uruu winou upandishin mwom ni ukutwish kuyibachik antu ayimp chakwel akarumuk. (Ezek. 33:8, 19) Chinech chifanyidin kwikal chiyukish mud ik kudi antu inay!

7. Mazu “kwinyim kwa yom yiney” madia mu mukand wa Jowel 3:1, 2, marumburikin ik?

⁷ Tang Jowel 3:1, 2. Shinshikin diyingishin dia kasatu—kulondulijan kwa yinship yisambidinau mu uprofet. Ov, wamanang anch Yehova ulondin anch: “Kwinyim kwa yom yiney, nikez kapan [spiritu] wam”; charumburik anch, kupwa kwa ampasu kuwanyish chisend chau? Anch ampasu arumburikin in kulejan a Want wa Nzamb, chad mulong wak Yehova wafanyina kuyinkish spiritu wend kupwa kwa kupwish mudimu wau wa kulejan? Uyakin udi anch pakad ukwash wa usu wa spiritu utumbila wa Nzamb, in kulejan kafanyinap kutwish ap pakemp kudandamen kulejan mu mivu yivud mwamu chikalap nchik rupompat ni kukangesh mudimu wau.

8. Ampasu isambidinau mu Kujingunik 9:1-11 afanikeshin anany? (Tal chipich cha pa chibur.)

⁸ Tang Kujingunik 9:1-11. Katat el tushinshikinany diyingishin dia kanying. Pakur twad kufanikesh chisak cha ampasu chisambidinau mu mukand wa Jowel nich mudimu wetu wa kulejan mulong wa kufanikan kwa uprofet winou nich ukwau udia mu Kujingunik. Uprofet winou wisambidin chisak cha  ampasu akweta yifu mudi ya antu ni ‘amekena mudi adjadin yibangul ya utad wa or’ ku mitu yau. (Kuj. 9:7) Akat kuyimesh mar “antu [akankuny a Nzamb] awonsu akad chijingidij cha Nzamb pa jimpal jau” mu chirung cha angond atan, kulep kwa mwom wawonsu wa ampasu. (Kuj. 9:4, 5) Chimeken anch uprofet winou wisambidin atushalapol azizidilau many a Yehova. Nich kutakaman akat kulejan dirumburish dia Nzamb pantaliken ni mangand minam mayimp ni chinech chikat kuyakamish nakash antu awonsu anungina chikas ku mangand minam.

9. Kushalijan ik kujim kudia pakach pa ampasu amanay Jowel ni isambidinau kudi Yohan?

⁹ Chidi chakin anch kudi yom yimwing yifanikena pakach pa uprofet udia mu Kujingunik ni ufundinau mu Jowel. Pakwez kudi kushalijan kujim. Shinshikin kushalijan kwinoku: Mu uprofet wa Jowel, ampasu akat kushesh mitond. (Jow. 1:4, 6, 7) Pakwez mu uprofet wa Yohan ayilejin ampasu anch “alika kuyipish masuku.” (Kuj. 9:4) Ampasu amanay Jowel adiokala kwiyand. (Jow. 2:20) Pakwez amanay Yohan adiokala mu dibuku diakad musul. (Kuj. 9:2, 3) Ampasu isambidinay Jowel ayopata. Chad mu Kujingunik, ampasu kayopatap pakwez ayilika chakwel apwish mudimu wau. Kwikil uman umekeshina anch kadingap kayisangaredina kudi Yehova.—Tal mushet ulondina anch: “ Uprofet Piur pa Ampasu—Ufaniken Pakwez Ushalijadin.”

10. Let chilakej chidia mu Bibil chimekeshina anch ampasu isambidinay Jowel ni isambidinau kudi Yohan akutwish kurumburik yom kushalijan.

¹⁰ Kushalijan kudia pakach pa uprofet winou  waad kutukwashin kuman anch ukwatijadinap bwat. Ov, chinech chirumburikin anch ampasu isambidinay Jowel kawiyap ampasu isambidinau mu buku wa Kujingunik? Mwaning. Mu Bibil, yisu yimwing chifanakesh chikutwish kwikal ni kurumburik kushalijan anch achisadin mu mitapu kushalijan. Chilakej, mu Kujingunik 5:5, Yesu amutazukin anch “Ntambu wa muchid wa Yuda,” pakwez mu 1 Pita 5:8, amulejen Djabul mudi “ntambu wonyina.” Kukwatijan ni manans twisambina kal, tukwet kuswir kwa kukimb mutapu windj wa kurumburil uprofet wa Jowel. Ukutwish kurumburik ik?

11. Jowel 1:6 ni 2:1, 8, 11 utukwashin mutapu ik kwijik anany afanikeshinau nich ampasu?

¹¹ Anch twashinshikin nawamp uprofet wawonsu wa Jowel, tumen anch muprofet wading wisambidin piur pa kurishikish kwa amasalay. (Jow. 1:6; 2:1, 8, 11) Yehova walonda anch ukusadin “yisak ya njit” (amasalay a in Babilon) mulong wa kuyipup in Isarel abwambwila. (Jow. 2:25) Choviken patok mulong wak ayitazukin amasalay inay anch “adiokila kwiyand” mulong in Babilon afanyina kudiokal kwiyand mulong wa kukwat Isarel. (Jow. 2:20) Amasalay inay ayifanikeshin nich chisak cha ampasu atenchikinau nawamp. Jowel ulondin piur pa amasalay inay anch: ‘Isalay mwawonsu udandamedin mu weny wend. . . . Akat kuwil mu musumb, akandamijan pa jimbumbu, chad asutil mu tupend andam mu yikumbu mudi aij.’ (Jow. 2:8, 9) Ov, ukutwish kutongin mutapu wasadika yom? Amasalay adi ndond jawonsu. Kwikil ndond ja kujingamin. Kwikil muntu ukutwisha kukwasinik kwi mpak ya musamun ya in Babilon!

12. Uprofet wa Jowel piur pa ampasu wawanyina mutapu ik?

¹² Mudi ampasu, in Babilon (ap, in Kalidey) ashesha musumb wa Yerusalem mu muvu 607 K.C.C. Bibil ulondin anch: “Mwant wa in Babilon . . . , ndiy weza wayijip ansangarum au nich mpak ya musamun. . . . Kwikil ap kusu umwing washay, ap ansand, ap ayangadim, ap amakurump, ap amapal. Awonsu Nzamb wayipana mu makas mwa mwant wa in Babilon. Osha Chikumbu cha [Nzamb wakin], apumwona mpwembu ya Yerusalem, osha yikumbu ya ant awonsu, ni kushesh yom yawonsu ya usey ukash.” (2 Jsng. 36:17, 19) Kupwa kwa in Babilon kushesh musumb, antu afanyina ching kusu kulond anch: “Ngand yiney yikez kikal mudi mpay yakad kushakam antu ap annam. . . . Akez kayipan kudi in Babilon.”—Jer. 32:43.

13. Let kurumburik kwa Jeremiy 16:16, 18.

¹³ Piswimp mivu 200 kupwa kwa kulejan uprofet wa Jowel, Yehova wamusadina Jeremiy mulong wa kusambel kulejan chom chikwau piur pa kurishikish kwinoku. Walonda anch amasalay afanyina kuyikimb pakemp pakemp in Isarel awonsu ading asadina yom yiyimp ni afanyina kuyikwat awonsu. Yehova walonda anch “‘Am nikez kayitum ayibind au avud kuya kuyikwat antu inay. Chad nikez katum kand ayibind kuyizomb ku mikandu, ni ku yinanginang, ni mu mandam mawonsu ma mayal. . . . Nikez kayifutish tupamp twaad mulong wa kuyip kwau.’” Ap aturung ap madit mafanyinap kutwish kuyijindjik in Isarel akad kukarumuk kudiokal ku chikas cha amasalay in Babilon.—Jer. 16:16, 18.

14. Chisu ik chawanyina mazu madia mu Jowel 3:1, 2?

¹⁴ Jowel walejana katat rusangu ruwamp ra kuwapishiril yom. Ngand yikusongishiril  kand mabuj. (Jow. 2:23-26) Kupwa pa chisu kanang mu machuku ma kurutu kukwikal yakudia yivud ya mu spiritu. Yehova walonda anch: “Nikez kapan [spiritu wam kudi antu a mitapu yawonsu]. Anen amakundj ni anen amband akez kapalangesh rusangu ram [mudi aprofet] . . . Pa chisu chinicha nikez kapan [spiritu] wam kudi atushalapol ni kudi amilomb.” (Jow. 3:1, 2) Spiritu winou kayishirikinap kapamp kamwing in Isarel kupwa kwa kudiokal ku Babilon mulong wa kuchirik kwol kwau. Pakwez, yom yiney yasadika kupwa kwa yitot ya mivu, pa chisu cha Pentekot wa mu muvu wa 33 C.C. Mutapu ik twija mwamu?

15. Kukwatijan ni mukand wa Midimu 2:16, 17, mazu ik masadinau kudi Pita mulong wa kwovakesh Jowel 2:28, ni chinech chimekeshin ik?

¹⁵ Spiritu utumbila wamubachika Pita kusadin mazu madia mu Jowel 3:1, 2 pantaliken ni chinship chishimwokishena chasadika pa dichuku dia Pentekot. Piswimp saa ya chinan ya pamanch, Nzamb wayizizila antu spiritu utumbila ni spiritu winou wayibachika antu inay kusambish kulond piur pa “midimu yijim yasalay Nzamb.” (Mid. 2:11) Mwinshin mwa usu wa spiritu utumbila Pita wasadina mazu kushalijan chisu chading chijimbwilay mazu ma uprofet wa Jowel. Ov, wajingunin kal mazu mawejayaku mulong wa kwovakesh? (Tang Midimu 2:16, 17.) Pa ndond pa kusambish nich mazu malondina anch “kwinyim kwa yom yiney,” Pita walonda anch: “Machuku piswimp ni kwisudiel” ni pa chisu chinicha wading wisambidin piur pa machuku mading matwadila ku disheshik dia Yerusalem ni tempel wend. Pa chisu chinicha spiritu wa Nzamb ukez kashirik ‘kudi antu a mitapu yawonsu.’ Chinech chimekeshin anch kwasuta chisu chilemp chakwel uprofet wa Jowel uwanyin.

16. Spiritu wa Nzamb wikala ni chibachikin ik pa mudimu wa kulejan mu mivu chitot ya kusambish, ni chidi nchik mu chirung chetu?

 ¹⁶ Kupwa kwa Nzamb kuzizil spiritu utumbila padi in Kristu a mu mivu chitot ya kusambish, asambisha mudimu wa kulejan wafanyina mu kusut kwa chisu kupalangan pa mangand mawonsu. Pa chisu chafunday Paul mukand wend kudi in Kolosay piswimp ni muvu wa 61 C.C., walonda piur pa rusangu ruwamp anch arilejen kal kudi ‘antu a pa mangand mawonsu.’ (Kol. 1:23) Kusutil ukwash wa ukash wa spiritu wa Yehova, mudimu wa kulejan wapalangen kal nakash mu chirung chetu djat ni ‘kwinsudiel kwa mangand’!—Mid. 13:47; tal mushet ulondina anch: ‘ Nikez Kapan Spiritu Wam.’

17. Mutapu ik waswimpina mutapu wetu wa kutesh uprofet wa Jowel piur pa ampasu?

¹⁷ Yom ik yaswimpina? Katat tuteshin nawamp uprofet udia mu Jowel 2:7-9. Choviken patok anch maverse minam misambidinap piur pa mudimu wetu wa kulejan tusadina nich mushiku, pakwez misambidin piur pa yom yasalau amasalay in Babilon mulong wa kukwat Yerusalem mu muvu wa 607 K.C.C.

18. Yom ik yalikina kuswimp piur pa antu a Yehova?

¹⁸ Yom ik yalikina kuswimp? Antu a Yehova adandamedin kulejan rusangu ruwamp kwi ndond yawonsu, akat kusadin milad kushalijan mulong wa kusal mwamu. (Mat. 24:14) Kwikil chikangesh cha guvernema chikutwisha kutwimik mulong wa kuwanyish chisend chetu cha kulejan. Ni kusutil ukwash wa Yehova, tulejen nich kutakaman rusangu ruwamp ra Want kusutamu pakur! Tudandamedin kumuchingejin Yehova nich kwikepish chakwel atutakel piur pa mutapu wetu wa kutesh uprofet wa Bibil, ni tukwet kashinsh anch, pa chisu chiwanyidina ukutukwash kujingunin “uyakin wawonsu”!—Yoh. 16:13.