1. Nguyiphi indlela leyasetjentiswa ngumzalwane Russell analabanye bazalwane, futsi kungani bekuyindlela lekahle?

EMINYAKENI lengetulu kwalelikhulu leyendlulile, umzalwane C. T. Russell kanye nebangani bakhe lebebalicembu lelincane lebafundzi beliVi laNkulunkulu bacala kuhlangana ndzawonye. Bebafuna kubona kutsi kukhona yini labangakufundza kuloko liBhayibheli lelikushoko ngaJehova, ngaJesu Khristu, ngesimo salabafile kanye nangenhlawulo. Indlela yabo yekutadisha beyimelula. Lotsite bekabuta umbuto, bese kutsi lelicembu lihlolisise yonkhe imiBhalo lehlobene naleyondzaba. Nasebayihlolile leyondzaba, bebabese bakubhala phansi loko labakutfolile. Jehova wawasita lamaKhristu kutsi acondze emaciniso labalulekile laseBhayibhelini, futsi lamaciniso solo abalulekile nakitsi lamuhla.

2. Ngaletinye tikhatsi, ngutiphi tintfo letingasenta kutsi singatitfoli timphendvulo letingito nasetama kucondza tiphrofetho letiseBhayibhelini?

² Ngekushesha, labafundzi beliBhayibheli babese bayabona kutsi kumatima kucondza siphrofetho lesiseBhayibhelini kunekucondza imfundziso leyinhloko letfolakala kulo. Kungani kunjalo? Lesinye sizatfu kutsi sivame kuticondza kahle tiphrofetho letiseBhayibhelini natigcwaliseka nobe nasetigcwalisekile. Kodvwa kunalesinye sizatfu. Kuze sisicondze kahle siphrofetho, kufanele sisifundze sonkhe. Nangabe sinaka incenye yinye yesiphrofetho kunekusinaka sonkhe, singahle singasicondzi kahle. Kubonakala shengatsi loku kwenteka ngesiphrofetho lesisencwadzini yaJoweli. Nyalo, sitasihlolisisa lesiphrofetho kuze sibone kutsi kungani kufanele siyishintje indlela lesisicondza ngayo.

3-4. Kuze kube ngunyalo, besisolo sisicondza njani siphrofetho lesitfolakala kuJoweli 2:7-9?

³ Fundza Joweli 2:7-9. Joweli wabiketela kutsi libulo lesikhonyane belitawubhubhisa live laka-Israyeli. Lesikhonyane  sinematinyo lanjengewelibhubesi futsi lelibulo lesikhonyane belitawudla konkhe lokumila emhlabeni! (Jow. 1:4, 6) Sekuphele iminyaka leminyenti lesiphrofetho sisicondza ngekutsi simelela bantfu baJehova labachubeka bashumayela ngekutimisela njengalelibulo lesikhonyane lesinemandla. Siyacondza kutsi loku lokwentiwa ngulesikhonyane kunemiphumela lemibi ‘eveni’ nobe kubantfu labacondziswa baholi benkholo. *

⁴ Lenchazelo yalesiphrofetho ibonakala ingiyo nangabe sinaka kuphela Joweli 2:7-9. Nobe kunjalo, nasicabangisisa ngasosonkhe lesiphrofetho, kubese kuyabonakala kutsi kufanele sisicondze ngalenye indlela. Asesihlolisise tizatfu letine letisenta sifune kuyishintja indlela lesisicondza ngayo lesiphrofetho.

5-6. Ngumuphi umbuto lesitibuta wona nasifundza (a) Joweli 2:20 (b) Joweli 2:25?

⁵ Sizatfu sekucala, naka setsembiso Jehova lasenta ngalokucondzene nalelibutfo lesikhonyane, watsi: “Imphi yesitsa sangasenyakatfo [sikhonyane] ngitayicosha isuke kini.”(Jow. 2:20) Kube lesikhonyane simelela BoFakazi BaJehova labalalela umyalo waJesu wekushumayela nekwenta bafundzi, kungani Jehova etsembisa kusicosha? (Hez. 33:7-9; Mat. 28:19, 20) Kuyacaca kutsi Jehova akacoshi tikhonti takhe letetsembekile, kodwa ucosha umuntfu lotsite lonelunya kubantfu bakhe.

⁶ Sizatfu sesibili, cabanga ngaloko lokubhalwe kuJoweli 2:25. KulomBhalo, Jehova utsi: “Ngitanikhokhela kuloko lokudliwe sikhonyane ngaleyo minyaka, loko lokwadliwa tibotfo nesigegedlana, nelifu letinkumbi, imphi yami lengayitfumela emkhatsini wenu.” Naka kutsi Jehova wetsembisa ‘kusikhokhela’ ngemonakalo lowentiwe ngulesikhonyane. Kube lesikhonyane besimelela bantfu baJehova labashumayela ngekutimisela, loku bekutawusho kutsi lomlayeto labawushumayelako ubanga umonakalo. Kodvwa lomlayeto loshunyayelwa bantfu baNkulunkulu usindzisa kuphila futsi ungasita nalabanye lababi kutsi baphendvuke. (Hez. 33:8, 19) Leyo kungaba yintfo lenhle kakhulu kubo!

7. KuJoweli 2:28, 29, libaluleke ngani ligama lelitsi “emvakwaloko”?

⁷ Fundza Joweli 2:28, 29. Sizatfu sesitsatfu simayelana nekwenteka kwetintfo lokukhulunywe ngato kulesiphrofetho. Unakile yini kutsi Jehova utsi: “Emvakwaloko ngiyawutfulula Moya wami,” futsi loko kutawenteka ngemuva kwekutsi lesikhonyane sesiwucedzile umsebenti waso? Kube lesikhonyane bekubamemeteli beMbuso waNkulunkulu, Jehova bekatawutfululelani umoya wakhe etikwabo ngemuva kwekutsi sebacedzile kushumayela? Liciniso likutsi, ngaphandle kwekusitwa ngumoya longcwele waNkulunkulu futsi lonemandla, bantfu baNkulunkulu ngabe abakakhoni kuchubeka bashumayela iminyaka leminyenti kangaka ngisho nobe baphikiswa futsi nemsebenti wabo wekushumayela uvinjelwa.

8. Sikhonyane lesichazwe kuSembulo 9:1-11 simelela bobani? (Buka sitfombe lesisekhasini lekucala.)

⁸ Fundza Sembulo 9:1-11. Nyalo asesicoce ngesizatfu sesine. Esikhatsini lesendlulile, besitsi lelibulo lesikhonyane lelachazwa nguJoweli limelela umsebenti wetfu wekushumayela ngobe lesiphrofetho saJoweli besisifananisa nesiphrofetho lesisencwadzini yeSembulo. Lesiphrofetho lesikuSembulo sikhuluma ngelibulo lesikhonyane lesinebuso bebantfu  futsi ‘lesinalokufana nemichele yeligolide’ etinhloko taso. (Semb. 9:7) Sihlupha “bantfu [titsa taNkulunkulu] labete luphawu lwaNkulunkulu emabuntini abo” sikhatsi lesingaba tinyanga letisihlanu, lokungaba sikhatsi lesicishe siphilwe sikhonyane. (Semb. 9:4, 5) Loku kubonakala shengatsi kuchaza tikhonti taJehova letigcotjiwe. Titimemetela ngesibindzi tehlulelo taJehova letimayelana nalelive lesiphila kulo, futsi umphumela waloko uba kutsi bonkhe labasekela lelive abakhululeki.

9. Ngukuphi kungafani lokubalulekile lokukhona emkhatsini wesikhonyane lesabonwa nguJoweli naleso Johane lakhuluma ngaso?

⁹ Kuliciniso kutsi kunekufana lokukhona esiphrofethweni lesikuSembulo kanye naleso lesabhalwa nguJoweli. Nobe kunjalo, kunetintfo letingafani letibalulekile. Cabanga nganaku, esiphrofethweni saJoweli, lesikhonyane sidla konkhe lokumila emhlabeni. (Jow. 1:4, 6, 7) Embonweni waJohane, lesikhonyane “satjelwa kutsi singakulimati lokumila emhlabeni.” (Semb. 9:4) Sikhonyane lesabonwa nguJoweli besichamuka enyakatfo. (Jow. 2:20) Lesi lesabonwa nguJohane saphuma emgodzini. (Semb. 9:2, 3) Sikhonyane lesichazwa nguJoweli sacoshwa. Sikhonyane lokukhulunywa ngaso kuSembulo asizange sicoshwe kodvwa savunyelwa kutsi sicedzele umsebenti waso. EBhayibhelini, kute lokukhombisa kutsi Jehova bekangajabuli ngaso.—Buka libhokisi lelitsi “ Tiphrofetho Letimayelana  NeSikhonyane—Tiyefana Kodvwa Tehlukile.”

10. Niketa sibonelo lesiseBhayibhelini lesikhombisa kutsi sikhonyane Joweli lakhuluma ngaso, naleso Johane lakhuluma ngaso simelela tintfo letingafani.

¹⁰ Umehluko lobalulekile lokhona emkhatsini waletiphrofetho letimbili usisita sibone kutsi atisho intfo yinye. Lesikhonyane Joweli lakhuluma ngaso asifani yini nesikhonyane lesichazwe encwadzini yeSembulo? Yebo. EBhayibhelini, luphawu luvame kuba nenchazelo leyehlukile nangabe lusetjentiswe ngalenye indlela. Nasi sibonelo, kuSembulo 5:5 Jesu ubitwa ngekutsi ‘yiNgwenyama levela esiveni sakaJuda,’ kantsi ku-1 Phetro 5:8, Develi uchazwa ngekutsi ‘libhubesi lelibhodlako.’ Lamaphuzu lamane lesesicoce ngawo, kanye nebumatima lobukhona ekucondzeni lesiphrofetho, kukhombisa kutsi kufanele sitfole lenye inchazelo yalesiphrofetho saJoweli. Kungaba nguyiphi lenchazelo?

11. Joweli 1:6 na-2:1, 8, 11, usisita njani kuze sicondze kutsi sibobani lesikhonyane?

¹¹ Nasihlolisisa lamanye emavesi esiphrofethweni saJoweli, siyacondza kutsi lomphrofethi bekabiketela ngemphi lebeyitawuhlasela. (Jow. 1:6; 2:1, 8, 11) Jehova watsi utawusebentisa ‘imphi yakhe’ (emabutfo aseBhabhulona) kuze ajezise ema-Israyeli langalaleli. (Jow. 2:25) Lelibutfo kutsiwa ‘yimphi yesitsa sangasenyakatfo,’ ngobe baseBhabhulona bebatawuhlasela ema-Israyeli ngasenyakatfo. (Jow. 2:20) Lelibutfo lifananiswa nelibulo lesikhonyane lelihleleke kahle. Nakakhuluma ngalo, Joweli utsi; ‘Lelo nalelo [lisotja] lihamba licondze embili. . . . Litselekela lidolobha, ligijime etikwelubondza. Likhwela lingene etindlini, njengemasela lingene ngemafasitelo.’ (Jow. 2:8, 9) Kubone ngeliso lengcondvo loku lokwentekako. Kunemasotja yonkhe indzawo. Kute indzawo yekubhaca. Kute longakhona kubalekela lelibutfo laseBhabhulona!

12. Siphrofetho saJoweli lesimayelana nesikhonyane sagcwaliseka njani?

¹² Njengesikhonyane, baseBhabhulona (nobe emaKhaledi) bahlasela lidolobha laseJerusalema nga-607 B.C.E. LiBhayibheli litsi: “INkhosi yaseBhabhulona [yemaKhaledi] leyafike yabulala onkhe emajaha abo ngenkemba . . . , ingashiyi lutfo loluselusha labadvuna nalabasikati nome talukati nemakhehla. Nkulunkulu wabaniketela bonkhe kuNebukhadnezari. Bokhela lithempeli laNkulunkulu ngemlilo, babhidlita nalolubondza lwaseJerusalema base bashisa tigodlo tonkhe kanye netimphahla letatinelinani lelikhulu lapho.” (2 Khr. 36:17, 19) Ngesikhatsi baseBhabhulona sebalihlasele lelive, bantfu bebatsi: “Lendzawo ilihlane, ayinabantfu natilwane, ngobe seyinikelwe etandleni temaBhabhulona.”—Jer. 32:43.

13. Chaza loko lokushiwo nguJeremiya 16:16, 18.

¹³ Eminyakeni lengaba ngu-200 ngemuva kwesiphrofetho saJoweli, Jehova wasebentisa Jeremiya kutsi abiketele lokutsite ngalokuhlasela. Watsi lamabutfo bekatawafunisisa ema-Israyeli lebekenta tintfo letimbi futsi awabambe onkhe. Jehova wachubeka watsi: “Kodvwa nyalo sengitawutfumela badwebi babe banyenti, futsi batababamba baka-Israyeli. Emvakwaloko ngitawutfumela batingeli babe banyenti, batawubatingela yonkhe indzawo, ngisho nasetintsabeni, nasemagcumeni, nasemifantfwini yemadvwala . . . Ngitabaphindzisela ngalokuphindziwe ngenca yetono tabo nangebubi babo.” Lwandle kanye nemahlatsi bekungeke kukhone kuwafihla ema-Israyeli lebekangaphendvuki kutsi lelibutfo laseBhabhulona lingawaboni.—Jer. 16:16, 18.

14. Wagcwaliseka nini umBhalo waJoweli 2:28, 29?

¹⁴ Joweli wabese ukhuluma ngetintfo letinhle lebetitawenteka. Lelive belitawuphindze libe lihle. (Jow. 2:23-26) Ngemuva kwesikhatsi lesitsite, bekutawuba netintfo letinyenti lebetitawusita bantfu babe nebuhlobo lobuhle naNkulunkulu. Jehova watsi: “Ngiyawutfulula Moya wami etikwabo bonkhe bantfu. Emadvodzana nemadvodzakati enu ayawuphrofetha . . . ngiyawutfululela Moya wami etincekwini nasetincekukatini tami.” (Jow. 2:28, 29) Lokutfululwa kwemoya waNkulunkulu akuzange kwenteke ngekushesha nje ngemuva kwekutsi ema-Israyeli abuyile ekutfunjweni baseBhabhulona. Kodvwa kwenteka ngemuva kwemakhulu eminyaka, ngeliPhentekhoste la-33 C.E. Sati njani?

15. Ngekusho kweMisebenti 2:16, 17, nguluphi lushintjo Phetro lalwenta emavini latfolakala kuJoweli 2:28, futsi loko kukhombisani?

¹⁵ Njengobe umphostoli Phetro bekaphefumulelwe, wasebentisa Joweli 2:28, 29 kuloko lobekwenteka ngelilanga lePhentekhoste. Cishe bekungu 9 ekuseni ngesikhatsi Nkulunkulu atfulula umoya wakhe longcwele, futsi labo labawutfola bacala kukhuluma “tintfo letimangalisako taNkulunkulu.” (Imis. 2:11) Ngenca yekutsi bekaphefumulelwe, Phetro wasebentisa emagama lebekehluke kancane kulawo lawacaphuna esiphrofethweni saJoweli. Ulunakile yini lushintjo lalwenta? (Fundza Imisebenti 2:16, 17.) Kunekutsi acale lamavi lawacaphuna ngekutsi “emvakwaloko,” Phetro watsi: “Emalangeni ekugcina” lobekusho emalanga ekugcina ekuphela kwelive ngesikhatsi semaJuda. Loku kukhombisa kutsi kwendlula sikhatsi lesitsite ngaphambi kwekutsi siphrofetho saJoweli sigcwaliseke.

16. Umoya waNkulunkulu wawutsintsa njani umsebenti wekushumayela ngelikhulu lekucala, futsi lamuhla usisita njani?

 ¹⁶ Ngemuva kwekutsi Nkulunkulu atfululele umoya wakhe longcwele kumaKhristu angelikhulu lekucala, lamaKhristu acala kwenta lomsebenti lobekutawutsi ngemuva kwesikhatsi ufike kuto tonkhe tincenye temhlaba. Ngesikhatsi umphostoli Pawula abhala incwadzi lebeyiya kubaseKholose cishe nga-61 C.E., bekaveta kutsi letindzaba letimnandzi betishunyayelwa “kuyo yonkhe indalo lengephansi kwelizulu.” (Khol. 1:23) Ngesikhatsi Pawula atsi “yonkhe indalo” bekasho tonkhe tincenye temhlaba. Njengobe sisitwa ngumoya longcwele waJehova lonemandla, umsebenti wekushumayela sewentiwa ngelizinga lelisetulu kakhulu lamuhla, wentiwa “kuto tonkhe tincenye temhlaba.”—Imis. 13:47; buka libhokisi lelitsi “ Ngitawutfululela Umoya Wami.”

17. Indlela lesicondza ngayo siphrofetho saJoweli lesimayelana nesikhonyane ishintje kanjani?

¹⁷ Yini leshintjile? Nyalo sisicondza kahle lesiphrofetho lesitfolakala kuJoweli 2:7-9. Kuyacaca kutsi lamavesi akasho umsebenti wekushumayela lesiwentako kodvwa asho loko lokwentiwa libutfo laseBhabhulona lelahlasela iJerusalema nga-607 B.C.E.

18. Yini lengakashintji ngebantfu baJehova?

¹⁸ Yini lengakashintji? Bantfu baJehova bayachubeka bashumayela tindzaba letimnandzi kuyoyonkhe indzawo futsi basebentisa tonkhe tindlela tekushumayela. (Mat. 24:14) Kute hulumende longasivimba kutsi sichubeke nemsebenti wetfu wekushumayela. Ngenca yekutsi sibusiswa nguJehova, siba nemandla kakhulu futsi siba nesibindzi sekushumayela tindzaba letimnandzi teMbuso. Ngekutitfoba, siyachubeka sicela Jehova kutsi asisite siticondze kahle tiphrofetho letiseBhayibhelini, siyaciniseka nekutsi ngesikhatsi lesifanele utasisita silati “lonkhe liciniso”!—Joh. 16:13.