1. Ka gbenda u henen kwagh u nyi nahan yange Anmgbian Russell man ahuraior a na agen la dondo, man er nan ve gbenda shon lu u doono?

YANGE Anmgbian C.T. Russell man mbahenen Bibilo mbagen kpuaa mba lu azende a na yô, hii u kohol imôngo anyom kar hegen hemba 100. Yange ve soo ér vea hen kwagh u Bibilo i tese sha kwagh u Yehova Aôndo kua Yesu Kristu man mlu u mbakpenev kua nagh ku ipaan la jighilii. Gbenda u ve lu henen Bibilo la taver ga cii. Yange or due a mpin, maa ve time sha hanma ivur i i er kwagh a zough sha itinekwagh la cii. Vea been yô, ve nger kwagh u ve hen la shin inya. Yehova yange ver iniôngon ve la doo doo, nahan Mbakristu mba mimi mban hingir u kaven akaa a mimi a vesen a ken Bibilo, man zan zan nyian kpa akaa ne gba se kwagh kpishi je.

2. Ka nyi ia na ve alaghga se kav ma kwaghôron u profeti u ken Bibilo vough ga?

² Yange ica gba ga je mbahenen Bibilo mban kav kwagh ugen. Ve mase kaven nahan ér u fan ma kwagh u Bibilo i tese yô ka ican ga, kpa kwaghôron u profeti yô, ka i lu zange u kaven ga. Er nan ka i lu nahana? Ityôkyaa i môm yô, mba hembe kaven akaaôron a profeti a ken Bibilo la zum u a lu kuren zan ave shin a kur kera yô. Nahan kpa ka cii la ga, kwagh ugen kpa ngu. Cii man se kav kwaghôron u profeti u ken Bibilo tsembelee yô, ka i gba u se ver ishima sha avur agen a a kase kwaghôron shon la kpaa. Aluer se ver ishima sha vegher u kwaghôron u profeti la môm tseegh, akaa agen cii kwagh gba se a mi ga yô, alaghga se kav kwaghôron u profeti shon vough ga. Man a̱ shi nan kpa, lu kwagh u za hemen shighe u i lu tôvon sha kwaghôron u profeti u ken takerada u Yoel la je la. Nahan de se hide se nenge sha kwaghôron u profeti la shi se nenge er i hii ve i doo u se nyôôso gbenda u yange se kav un la yô.

3-4. Se kav kwaghôron u profeti u ken Yoel 2:7-9 la ken anyom a karen ne nena?

 ³ Ôr Yoel 2:7-9. Yoel yange tsengaôron ér ikyomon ia er tahav ken tar u Iserael falegh a gba. Ikyomon ne ia lu a anyi man anomanyiigh er ubegha nahan, ia ya iyiav mbi ken tar u Iserael cii! (Yoel 1:4, 6) Ken anyom a karen la, se hen ser kwaghôron la ngu ôron ka kwagh u ior mba Yehova; er yange i tsengaôron ér vea lu eren tom u pasen kwagh kpoghuloo, ahendan aa fatyô u yangen ve ga yô. Se nenge ser tom ve u pasen kwagh la ua tenger a “tar” shin ior mba mbahemenev mba ukwaghaôndo ve tem tor sha ve la. *

⁴ Aluer se ver ishima sha kwagh u i nger ken Yoel 2:7-9 la tseegh yô, a lu inja er yange i pase kwaghôron u profeti la shami nahan. Nahan kpa, aluer se ver ishima sha avur a a kase avur a i er kwaghôron u profeti shon ker la jimin cii yô, se mase nengen er i doo u kaven kwaghôron u profeti ne sha gbenda ugen kposo yô. De se time sha atôakyaa anyiin a a ne ve kwagh a lu nahan yô.

5-6. Aluer se time sha avur a Yoel ne zulee yô, ka mpin u nyi alaghga se pine? (a) Yoel 2:20. (b) Yoel 2:25.

⁵ Hiihii yô, nenge ase kwagh u Yehova kaa ér una er a ikyomon la yô. A kaa ér: ‘Me kar a mba ken imbusutarimese [ikyomon la] hen a ven kera.’ (Yoel 2:20) Aluer ikyomon la tile ka sha ityough ki Mbashiada mba Yehova mba ve lu kuran tindi u Yesu wa ér ve pase kwagh shi ve gema ior ve hingir mbahenen la yô, hii nan ve shi Yehova a kaa ér una kar a ve kera, shin una zenda ve kera? (Esek. 33:7-9; Mat. 28:19, 20) Jighilii yô, ka mba ve lu civir Yehova sha mimi la a lu zendan ve kera ga, kpa ka kwagh, shin or u nan lu eren ior nav tswam la a lu zendan ye.

⁶ Ityôkyaa i sha uhar yô, nenge ase kwagh u i nger ken Yoel 2:25 ne. Yehova kaa ér: ‘Me hide ne a anyom a ikyomon i purugh man agumaikyomon man ikyomon i oron akaa kua ikyomon i tseren akaa lu ya la, ka zegeikyumutya Yam i M tindi her a ven ne.’ Umbur wer, Yehova tôndo zwa heen ér una “hide” a akaa a ikyomon i vihi la. Aluer ikyomon la tile ka sha ityough ki ior mba Yehova mba ve pasen loho u Tartor la yô, kwagh la una tese ér loho u ve lu pasen la ngu vihin akaa. Nahan kpa jighilii yô, loho la gema ngu wasen a wase aferaior agen u geman ishima. (Esek. 33:8, 19) Kwagh ne ka iveren hen a ve kpishi!

7. Mkaanem ma “a been kera yô” ma i ter ken Yoel 2:28, 29 la, inja i ma ér nyi?

⁷ Ôr Yoel 2:28, 29. Nenge ase ityôkyaa i sha utar ne; ka gbenda u kwaghôron u profeti shon a pase er akaa aa er sha adondo adondo la. Mkaanem ma i hii ivur i Yoel 2:28 a mi la, a fatyô u geman ma kpaa ér: “A been kera yô, me haa jijingi wam.” (NWT) U nenge er Yehova a kaa ér una haa jijingi na a lu shighe u ikyomon la ia bee tom u i kpa? Nahan luun er ikyomon la ka mba pasen kwagh u Tartor u Aôndo yô, a er nan ve a lu shighe u vea er tom u pasen kwagh la a bee kera cii ve, Yehova una haa jijingi na sha a ve? Yange ve a vande lun a jijingi na ga nahan, ma ve kôrcio u eren tom la anyom anyom shin er i lu hendan a ve shi i cir tom shon sha ajiir agen la kpa? Ei, yange ma ve fatyô u eren tom ne a iwasen i jijingi u Aôndo u ageegh la shio ga.

8. Ikyomon i i er kwagh u i ken Mpase 9:1-11 la tile sha ityough ki unô? (Nenge foto u a lu sha igbende la.)

⁸ Ôr Mpase 9:1-11. De se nenge ase sha ityôkyaa i sha unyiin. Kera yô, yange se kaa ser ican i Yoel kaa ér ikyomon ia va a mi la tile sha  ityough ki tom wase u kwaghpasen la sha ci u kwaghôron u profeti ugen u ken Mpase u a nôngo u zuan vea ngula yô. Kwaghôron u profeti la ôr kwagh u ikpela i ikyomon igen i i lu a ishiv mbi uumace shi i lu a kwagh sha ityou “er ka ader a tor a sha zanaria nahan” yô. (Mpa. 9:7) Ikyomon la er “ior mba ve lu a ikyav i Aôndo sha atsul a ve ga la” ican kpishi; ka mbaihyomov mba Aôndo je la. (Mpa. 9:4, 5) Kwagh u i er heen ne zua sha kwagh u mbatomov mba Aôndo mba i shigh ve mkurem la vough. Mba yôôn ijirôron i Aôndo sha tar u ifer ne a mciem shio, nahan vihi ior mba ve te ikyaa a tar ne la kpishi.

9. Ka akaa a vesen a nyi a kaha sha kwagh u ikyomon i Yoel nenge a mi la man i Yohane a er kwagh u i laa?

⁹ Sha mimi yô, akaa agen ken kwaghôron u profeti u a lu ken Mpase la zua vea kwaghôron u profeti u Yoel la. Nahan kpa akaa a vesen agen nga a a zough ga yô. Nenge ase akaa shon. Ken kwaghôron u profeti u Yoel la, ikyomon la vihi imendenev. (Yoel 1:4, 6, 7) Nahan kpa, ken mpase u sha mnenge u Yohane la, i kaa a ikyomon la ér “i̱ de eren ma imendenev ki sha tar . . . kwagh ga.” (Mpa. 9:4) Ikyomon i Yoel nenge a mi la due ken imbusutarimese. (Yoel 2:20) Ikyomon i Yohane nenge a mi la di due shin ihungwa i zan kweng. (Mpa. 9:2, 3) I va zenda ikyomon i Yoel a er kwagh u i la kera. Kpa ken takerada u Mpase yô, i zenda ikyomon la kera ga kpa i de i, i er tom u i, i bee. Kwagh môm ngu ken Bibilo u a tese ér ishima vihi Yehova a ikyomon la ga.—Nenge ngeren u kiriki u a lu a itinekwagh ér “ Akaaôron a Profeti a Sha Kwagh u Ikyomon—A Wa Zuan, kpa A Gema A Kaha” la.

10. Ka akav a ken Ruamabera a han a tese ér ikyomon i Yoel man Yohane ve er kwagh u i la ngi kposo kposo?

 ¹⁰ Akaa a vesen a a kaha kposo ken akaaôron a profeti a ahar ne wase se u kuren ikyaa ser kwagh u akaaôron a profeti ne kaha. Nahan se mba kaan ser ikyomon i Yoel a er kwagh u i la ngi kposo a ikyomon i i lu ken takerada u Mpase laa? Een. Ken Bibilo yô, ashighe agen ikyav i môm ka i tile sha akaa kposo kposo, zum u i er kwagh u ikyav shon sha gbenda ugen yô. Ikyav i tesen yô, i yila Yesu ken Mpase 5:5 ér “begha u ken ipyaven i Yuda,” kpa shi ken 1 Peteru 5:8 di, i kaa ér Satan ka “begha u a lu tan kume” yô. Er mkav u se lu a mi sha kwaghôron u profeti ne hegen la a dugh a mbampin yô, gba u se ker gbenda ugen u pasen kwaghôron u profeti u ken Yoel la. Nahan a pase un nena?

11. Yoel 1:6 man 2:1, 8, 11 wase se u fan ior mba ve lu ikyomon la nena?

¹¹ Aluer se sôr se nenge sha kwaghôron u profeti u ken Yoel la kua avur agen a a kase un la yô, se nenge ser profeti la yange tsengapasen lu kwagh u shoja mba vea va ta num sha ikyurior igen yô. (Yoel 1:6; 2:1, 8, 11) Yehova yange kaa ér una er tom a “zegeikyumutya” na (ka shoja i Babilon je la) u tsahan Mbaiserael mba ve hemba un ato la. (Yoel 2:25) I yila shoja i ia va ta num sha ior mban ne ér ka “mba ken imbusutarimese” sha ci u lu u ior i Babilon ia mough ken imbusutarimese ia va ta num sha Iserael. (Yoel 2:20) I tôô ikyumutya la i kar sha ikpela i ikyomon i i we nongo i lu yemen lugh lugh sha inja sha inja yô. Yoel ôr kwagh ve ér: ‘Hanma [orshoja] nan ngu zan sha gbenda u nan. Ve ta sha gar, ve nyôngoso sha ukpekpe; ve unde ve nyôr ken ayou, ve nyôr sha aan a ayou er ka mbaiv yô.’ (Yoel 2:8, 9) U fatyô u nengen a kwagh ne ken ishima kpa? Shoja ngi hanma ijiir cii. Ape yeren ngu ga. Or môm nana fatyô u waren shoja i Babilon ga!

12. Kwaghôron u profeti u ikyomon u Yoel la yange kure sha mi nena?

¹² Ior i Babilon (shin Mbakaldi) yange ve va ta num sha gar u Yerusalem ken inyom i 607 Cii man Shighe u Yesu la er ka ikyomon nahan. Bibilo kaa ér: ‘Tor u Mbakaldi va wua ve mbayevikyaior sha sanker, mhôônom tsô kpa, kôr un a ma wanyekwaor ga, shin iniunkwase, shin tamenor, shin tseor u kumbul kumbul kpaa ga; Aôndo na ve sha ikyev na cii. Tsô ve nande iyou i Aôndo sha usu, ve yôhôr girgar u Yerusalem, ve nande ayou a tor a ker cii sha usu, ikyav mbi doon cii, ve vihi mbi kera.’ (2 Kron. 36:17, 19) Yange Mbababilon mba te num sha tar la, mba timin hanma kwagh yô, ior mba karen gbenda gba kaan ér: “Ka ice, i or man zendenya kpaa ve kera lu ker ga, i gema u u hingir sha ikyev i Mbakaldi kpaa.”—Yer. 32:43.

13. Pase inja i kwagh u i nger ken Yeremia 16:16, 18 la.

¹³ Yange Yoel nger kwaghôron u profeti la anyom nga kar er 200 nahan yô, Yehova shi ôr kwagh ugen sha kwagh u num u a ta sha ior mban la, sha ikyev i Yeremia. Yange kaa wener a ker ior mba ken Iserael mba ve eren ifer cii, a kôr ve cica. Bibilo kaa ér: ‘Nenge, Me tindi, á yila mbakôronishu kpishi, kape TER A kaa ne, vea va kôr ve; ken masetyô Me tindi, á yila mbayarenikyôr kpishi, vea num ve sha hanma uwo man sha hanma igyungu man ken ikwe i avande kpaa. Me or ve iyev á kuma kwa har sha iferkwagh ve kua isholibo ve.’ Nahan lu u Mbaiserael mba hemban ato mban vea fatyô u yevese ior i Babilon za yeren shin ityeku shin ken ikyô kpaa ga.—Yer. 16:16, 18.

14. Ka hanma shighe kwaghôron u ken Yoel 2:28, 29 la yange kure sha mi?

¹⁴ Nahan cii kpa, Yoel shi lu a loho u dedoo kpaa. Lu u ken hemen yô, tar la shi ua hide a ume iyiav. (Yoel 2:23-26) Nahan shighe a nguren karen yô, kwaghyan u ken jijingi kpaa una dumbur. Yehova kaa ér: “Me haa jijingi wam sha hanma injaor cii, nahan ônov enev mba nomso man mba kasev vea ôr kwaghôron u profeti, . . . Shi me haa jijingi wam sha ikpan yam i nomso man sha ikpan yam i ukase je kpaa, sha ayange la.” (Yoel 2:28, 29, NWT) Kpa yange i haa jijingi u Aôndo la sha Mbaiserael shighe u ve sember moughon ken Babilon hiden ken tar ve la ga. Kwagh ne va er anyom uderi imôngo ken hemen, sha iyange i Pentekosti u inyom i 33 la. Er nan se fe nahana?

15. Sha kwagh u i nger ken Aerenakaa 2:16, 17 yô, ka nyi Peteru yange sôr sha mkaanem ma ken Yoel 2:28 laa, man kwagh ne tese ér nyi?

¹⁵ Kwagh ugen u kpilighyol yange er sha iyange i Pentekosti la, nahan jijingi mgbegha apostoli Peteru kaa ér kwagh u i ôr ken Yoel 2:28, 29 la kure sha mi. Sha iyange shon la, er ahwa ataankaranyiin pepe nahan ivande er, yange i haa icighan jijingi sha ior, maa ve hii u ôron “akaa a kpilighyol a Aôndo a er yô.” (Aer. 2:11) Jijingi mgbegha Peteru ôr kwagh u kwaghôron u profeti u Yoel la, kpa gema musan ankaam sha mi kpuaa. U ver ishima u nenge a kwagh u a sôr sha mi la kpa? (Ôr Aerenakaa 2:16, 17.) Peteru yange kera hii mkaanem mara ér, “a been kera yô” er ngise Yoel ôr la nahan ga, kpa gema kaa ér: “Ken ayange a masejime yô,” inja na yô, ka shighe u a mase shin kpuaa u a tim Yerusalem je la. Lu u hen shighe ne yô, Aôndo una haa jijingi na “sha hanma injaor cii.” Kwagh ne maa tese ér shighe yange kar gôgônan cii ve kwaghôron u profeti u Yoel la va kure sha mi ye.

16. Jijingi u Aôndo yange wase tom u pasen kwagh sha ayange a mbaapostoli la nena, man ngu wasen nyian nena?

 ¹⁶ Yange Aôndo haan jijingi na sha Mbakristu mba sha ayange a mbaapostoli la yô, ve hii tom u pasen kwagh kpoghuloo, man lu u shighe a karen yô, a er tom ne a tser tar cii. Shighe u yange apostoli Paulu nger washika hen Mbakolose er ken inyom i 61 la nahan, lu u una fatyô u kaan ér i pase kwagh “shin tar hen akaa a i gbe a cii.” (Kol. 1:23) Sha ayange a Paulu la yô, “akaa a i gbe a cii” la lu ajiir a shin tar a Paulu kua mbagen vea fatyô u zan her za pasen kwagh yô. Sha iwasen i icighan jijingi u ageegh u Yehova yô, tom u pasen kwagh la hemba samber sha ayange ase ne cii; u ar “ken akighir a tar” je!—Aer. 13:47; nenge ngeren u kiriki u a lu a itinekwagh ér: “ Me Haa Jijingi Wam” la.

17. Ka nyi i gem sha mkav u yange se lu a mi sha kwaghôron u profeti u ikyomon u a lu ken Yoel laa?

¹⁷ Ka nyi i geme? Hegen se hemba kaven kwaghôron u profeti u a lu ken Yoel 2:7-9 la. U ngeen kwagh ga yô, avur la nga ôron ka kwagh u tom u pasen kwagh u se lu eren sha gbashima ne ga, kpa nga ôron ka kwagh u num u shoja i Babilon va ta sha Yerusalem ken inyom i 607 Cii man Shighe u Yesu la.

18. Ka nyi i gem sha kwagh u ior mba Yehova ga?

¹⁸ Kpa ka nyi i gem ga? Ior mba Yehova za hemen u pasen loho u dedoo hanma ijiir cii, shi ka ve er tom a igbenda kposo kposo i pasen loho ne kpaa. (Mat. 24:14) Tindi u gomoti môm kpa una fatyô u yangen se u eren tom u pasen kwagh u i ne se ne ga. Yehova ver se doo doo, nahan se mba eren tom ne hemban ave a tse, se mba pasen loho u dedoo u Tartor ne a mciem shio! Ka u se za hemen u veren ashe hen Yehova a iyol hiden a mi ijime ser a wase se u kaven akaaôron a profeti. Se mba a vangertiôr ser shighe a va kuma vough yô, una wase se u “kaven mimi cii”!—Yoh. 16:13.