1. Mahevbulelo muni ma thumisidwego khu ndriyathu Russell ni vaphasedzeyi vaye nigu khu ginani ma phasidego?

GUVBINDRA lizana myaga hwane, ndriyathu C. T. Russell ni tsawanyana nya simbe sihevbuli nya Lito la Nungungulu va di pheya gu tshangana gumogo. Avo va di gu vbweta gu hevbula esi Bhibhiliya yi si hevbudzago khu lisine maningano ni Jehovha Nungungulu, Jesu Kristo, giemo gya vale va fudego ni gudzegiswa. Mahevbulelo yawe ma di gu vbevbugide. Moyo a di gu gira giwudziso nyo khaguri, khavbovbo, tsawa watshavbo wu khedzisisa lowo ni lowo wu gimbileyanago ni mahungu yoyo. Khu gu hegisa, avo va di gu lova esi va si tugudego. Jehovha phaside vama vava gu pwisisa matshina nya lisine nya sihevbudzo nya Bhibhiliya ma gu ngari ni lisima kala muhuno.

2. Ginani gi nga girisago gu dzimbe dzitepo hi pwisisa giprofeto nyo khaguri nya Bhibhiliya khu ndziya nyo hosege?

² Nya mba hweya sihevbuli sesi nya Bhibhiliya si di tugula gu khiso si ngu garadza ngudzu gu pwisisa siprofeto nya Bhibhiliya guvbindra gu pwisisa sihevbudzo nya litshina nya Bhibhiliya. Khu ginani? Gimwegyo nya sighelo khu gu gutala nya dzitepo giprofeto nya Bhibhiliya gya gu pwisiswa gwadi tepo gi tadzisegago mwendro hwane nya gu ba gi tadzisegide. Ganiolu gu na ni gimbe gighelo. Gasi gu pwisisa gwadi giprofeto nyo khaguri, gu vbwetega hi pwisisa satshavbo si pategago avbo nya giprofeto gyogyo. Ha gu vega gupima avba nya gipandre gimwegyo basi nya giprofeto, simbe hi si diga khu phuvbo hi na tshuka hi gi pwisisa khu ndziya nyo hosege. So wonega gu khatshi isoso khiso si nga girega ni giprofeto nyo khaguri gya omu nya libhuku la Joyele. Hongoleni hi khedzisisani gambe giprofeto gyogyo hi bwe hi wona gu khethu khu ginani hi yedego gu vbindrugedza mapwisiselo yagyo.

3-4. Kala olu hi di gu gi pwisisa kharini giprofeto gi gomogo omu ga Joyele 2:7-9?

 ³ Leri Joyele 2:7-9. Joyele profetide gu khuye tungu nya khaba wu na tshungunula litigo la Israyeli. Khu magwaha ni wuhaya nya nga sa nghala, sirengwanana soso si lambidego si na hodza dzimbewu dzatshavbo tigoni ga Israyeli. (Joyele 1:4, 6) Gukhugeya gale hi di gu pwisisa gu khethu giprofeto gegi gi di gu vbweta gu khigyo vathu va Jehovha va gu simama gu tshumayela nga tungu nya khaba si si kodzegigo gu wu emisa. Hi di gu pwisisa gu khethu thumo wowu wu di gu tshungunula litigo mwendro vathu va woneledwago khu vathangeyi nya wukhongeyi. *

⁴ Ha gu leri basi Joyele 2:7-9, uwowo khuwo wu wonegago nari uwo tshamuselo wakona. Ganiolu, tepo hi khedzisisago gwadi satshavbo si pategago avba nya giprofeto gegi, ha gu tugula gu khethu hi yede gu gi pwisisa khu yimbe ndziya. Hongoleni hi wona sighelo sina nya guvbindrugedza gogu.

5-6. Giwudziso muni hi dzi girago tepo hi lerigo a) Joyele 2:20? b) Joyele 2:25?

⁵ Nyo pheye, nga wona gitumbiso gya Jehovha maningano ni tungu wowu nya khaba: “Wule a tago khu Wuronga [khaba] nyi na mu gira a hongola hwindzo nanu.” (Joy. 2:20) Abari gu khaba ga gu thudwa Dzifakazi dza Jehovha dzi landreyago gileletelo gya Jesu nya gu tshumayele ni gu gira vapizane, si nga kodzega kharini gu Jehovha a tumbisa gu wu tutumisa wu hongola hwindzo? (Ezek. 33:7-9; Mat. 28:19, 20) Khu lisine, egi gi na tutumiswago khu Jehovha khandri sithumi saye nyo tumbege ganiolu gilo nyo khaguri mwendro muthu nyo khaguri nyo vivbedwe khu monyo a tshanisago vathu vaye.

⁶ Gighelo nya wuvili khegi gi lovidwego omu ga Joyele 2:25. Jehovha wari khuye: “Nyi na mi bweledzela nyaluphye myaga yile dzimbewu dzanu dzi nga mbembiswago khu mbasa, khaba, sibukhwa, mipungu ni libutho langu nya likhongolo nyi nga mi rumelago.” Wona gu khuwe Jehovha a gu tumbisa gu hi “bweledzela” silo khu kotani nya esi si ghohetedwego khu khaba. Abari gu khaba ga gu thudwa vatshumayeli nya Mufumo, ina gyomo gighelo nya gu Jehovha a tumbisa gu bweledzeya esi wu si ghohetedego? Isoso si di hadzi gira khatshi mahungu ma huweledwago khavo ma gu ghoheteya. Nari gu khu lisine ayo ma gu vbanyisa vathu nigu ma ngu gira gu vathu nya gu vivbedwe khu monyo va dzi laya. (Ezek. 33:8, 19) Ayoyo makategwa gwawe!

7. Malito ma gu khayo “khu hwane nya isoso,” ma gomogo omu ga Joyele 2:28, 29, ma gu hi phasa gu pwisisa ginani?

⁷ Leri Joyele 2:28, 29. Gighelo nya wuraru gya gu gimbileyana ni edzi si landreyanago khidzo sigiro nya giprofeto gegi. U wonide gu khuwe Jehovha a di khuye: “Khu hwane nya isoso, Eni nyi na guhula Liphuvbo langu”; ina isoso sa gu thula hwane nya gu ba khaba wu vbedzide gu gira thumo wawo? Abari gu khaba go thudwa vatshumayeli nya Mufumo wa Nungungulu, si nga kodzega kharini gu Jehovha a guhula liphuvbo laye vbatshani gwawe hwane nya gu ba va vbedzide thumo wawe nya gutshumayele? Lisine kheli, nya mba phaswa khu liphuvbo nya guage nya tshivba la Nungungulu avo gima na va sa si kodza gu tshumayela khu mazanazana nya myaga na va gu wugedwa, dzimbe dzitepo na va gu himbedzedwa gu gira thumo wawe.

8. Mbasa yi tshamusedwago omu ga Gutuledwa 9:1-11, ya gu thula mani? (Wona foto yi gomogo avba nya kapa.)

⁸ Leri Gutuledwa 9:1-11. Hongoleni hi wona gighelo nya wuna. Gale hi di gu ganeya gu khethu tungu nya mbasa mwendro khaba wu ganedwago omu nya libhuku la Joyele wu di gu tshamuseya thumo wathu nya gu tshumayele khu kotani nya giprofeto nyo fane, gi gomogo omu nya libhuku la Gutuledwa. Giprofeto gyogyo gya gu ganeya  khu tsawa nya mbasa yi gu na ni dzikhovbe nya vathu, ‘hungoni na yi ambade kha nga gihugu nya wufumu nya gugirwe khu ndralama.’ (Gutu. 9:7) Iyo ya gu tshanisa “vathu vale [valala va Nungungulu] va nga bani va sa vegwa gifungo gya Nungungulu vbagiwombotunu” ndrani nya livbandre migima a gu matshigu nya guvbanye nya mbasa. (Gutu. 9:4, 5) Esi sa gu wonega nari go thudwa sithumi sa Jehovha si todzidwego. Avo va gu tiya hwambo va huweleya gu khavo Nungungulu a na lamula litigo leli nyo vivbe nigu isoso sa gu gira gu vale va seketeyago litigo leli va garadzega.

9. Guhambana muni gu gomogo avba nya khaba wu tshamusedwego khu Joyele ni owu wu tshamusedwego khu Johane?

⁹ Gu na ni silo si fanago avba nya giprofeto gi gomogo omu ga Gutuledwa ni egi gi lovidwego khu Joyele. Ambari ulolo, gu na ni silo nya lisima si hambanago. Nga dundrugeya khesi: Omu nya giprofeto gya Joyele, khaba wa gu saseya dzimbewu. (Joy. 1:4, 6, 7) Omu nya giwoniso gya Johane, mbasa ya gu “leletedwa gumba sasela mwasi nya guvbanye.” (Gutu. 9:4) Khaba wu wonidwego khu Joyele wu di guta khu wuronga. (Joy. 2:20) Owu wu wonidwego khu Johane wu di guta khu phalani nya guete ngudzu. (Gutu. 9:2, 3) Khaba wu wonidwego khu Joyele wa gu tutumiswa. Owu wa omu ga Gutuledwa kha wu tutumiswi ganiolu wa gu dzumeledwa gu vbedzisa thumo wawo. Gimwalo gilo omu nya Bhibhiliya gi yeyedzago gu khigyo uwo kha wu tsakedwi khu Jehovha. — Wona kwadru “Giprofeto gi ganeyago khu khaba — gi fanago ganiolu na gi gu hambana.”

10. Ninga giyeyedzo gya omu nya Bhibhiliya gi yeyedzago gu khigyo khaba wu tshamusedwego khu Joyele ni owu wu tshamusedwego khu Johane wu nga thula silo nya guhambane?

 ¹⁰ Guhambana gu gomogo avba nya siprofeto sesi sa sivili ga gu hi phasa gu pwisisa gu khethu kha si tshamuseyi silo nya gu fane. Ina ho vbweta gu khethu khaba wu thudwago omu nya libhuku la Joyele wu ngu hambana ni khaba wu thudwago omu nya libhuku la Gutuledwa? Ina. Omu nya Bhibhiliya gilo gyagimwegyo gi ngu tshuka gi manega ni tshamuselo nyo hambane tepo gi thumiswago khu yimbe ndziya. Khu giyeyedzo, omu ga Gutuledwa 5:5, Jesu a gu ranwa pwani “Nghala nya lihundzu la Judha” narigu omu ga 1 Pedro. 5:8, Dhiyabhulosi a gu fananiswa nuye ni nghala yi dzumadzumago. Sighelo nya sina hi ganedego khiso ni siwudziso hi si manidego so yeyedza gu khiso gu vbwetega hi mana wumbe tshamuselo nya giprofeto gya Joyele. Khu wevbi?

11. Ginani gi gomogo omu ga Joyele 1:6 ni 2:1, 8, 11, gi hi phasago gu pwisisa gu khethu khu mani khaba?

¹¹ Tepo hi khedzisisago gwadi simbe sipandre nya giprofeto gya Joyele ha gu pwisisa gu khethu muprofeti yoyu a di gu ganeya khu guwugedwa khu masotshwa. (Joy. 1:6; 2:1, 8, 11) Jehovha ganede gu khuye a na thumisa ‘libutho laye nya likhongolo,’ (masotshwa ya Bhabhiloni) gasi gu tsayisa vaIsrayeli nya mba engisa. (Joy. 2:25) Libutho leli la gu ranwa pwani khya “wuronga” kholu vaBhabhiloni va di hadzi dhumeya Israyeli khu wuronga. (Joy. 2:20) Libutho lolo la gu fananiswa ni tsawa nya khaba wu sasamedzidwego gwadi. Na gu ganeya khilo, Joyele a di khuye: “Moyo ni moyo a na thonona guya . . . madhoropani; va tutumatutuma vbatshani nya mabhiyo, va lita dzinyumbani, va bela khu sihogo nga mbafa.” (Joyele 2:8, 9) U ngu si kodza gu dundrugeya silo sesi na si girega? Gwatshavbo gu na ni masotshwa. Gumwalo wulanga nyo sihale. Mwalo a kodzago gu vbuluga masotshwa ya Bhabhiloni.

12. Giprofeto gya Joyele maningano ni khaba gi tadzisegide kharini?

¹² Kha nga khaba, vaBhabhiloni mwendro (vaKalidhiya), va dhumede lidhoropa la Jerusalema khu 607 A.E.C. Bhibhiliya yari khiyo: “Mufumeli wa Vakalidhiya a [di] va sasela a songetela madzaha yawe khu matshari . . . kha pwela gisiro madzaha ni vanyamahegyane, ambari khu sikhosane nya dzinvi; vatshavbo Nungungulu a di va ningela mandzani gwaye. Va di vbisa Nyumba ya PFHUMU Nungungulu, va khungumulela makhokhola ya Jerusalema, dzinyumba dzawe nya wufumu dzi di vbiswa khu nilo, va pandrelela mikanvu yawe yatshavbo nya lisima.” (2 Dzik. 36:17, 19) Hwane nya gu ba vaBhabhiloni va dhumede ni gu saseya litigo, vathu va nga si wona va di ganeya basi khavo: “Litigo leli. . . . giwula, kha gu vbanyi vathu ambari sirengo; li ningedwe mandzani ga Vakalidhiya.” — Jer. 32:43.

13. Lowo wa Jeremiya 16:16, 18, wo tshamuseya ginani?

¹³ Tanga nya 200 myaga hwane nya giprofeto gya Joyele, Jehovha thumiside Jeremiya gasi gu profeta gimbe gilo maningano ni gusasedwa gogu. A di khuye vasaseyi vava va na vbwetedzeya gwadi vaIsrayeli va giridego silo nya guvivbe va va mola vatshavbo. “‘Nyi na rumela tengo nya wungi nya vagogi [wuta] va goga; khu hwane nya isoso, nyi na rumela wumbe tengo nya vasoti, vaya va sota sigomoni ni sigomwanani, gumogo ni dziphagoni nya siwindri. . .  nyi na va bweledzela khu nyondro mbili tshatshazelo nya sighoho ni wuvivbi’” wawe. Ne yiphwa, ne likhabi, gimwalo gi nga hadzi gu kodza gu siha vaIsrayeli nya sindraga milayo ga vaBhabhiloni. — Jer. 16:16, 18.

14. Joyele 2:28, 29 tadzisegide lini?

¹⁴ Joyele a ngu ganeya khu mahungu nya yadi nya guwusedzwa. Litigo li na pheledza gu fuma dzimbewu. (Joy. 2:23-26) Khu kharato, teponi yi tago gu na manega guhodza nya gungi ga liphuvboni. Jehovha a di khuye: “Eni nyi na guhula  Liphuvbo langu vbatshani ga vathu vatshavbo. Sanana sanu nya sikhwathana niso nya sagadzyana si na profeta . . . nyi na guhula gambe Liphuvbo langu ga sithumi nya vama niso nya vanyamayi.” (Joyele 2:28, 29) Isoso kha sa dzegeya gu girega gitepwana hwane nya gu ba vaIsrayeli va wide khu Bhabhiloni. Si giregide na gu vbindride mazanazana nya myaga, khu Pentekosta nya 33 E.C. Ha gu dziti kharini?

15. Guya khu Mithumo 2:16, 17, guvbindrugedza muni gu giridwego khu Pedro avba nya lowo wa Joyele 2:28 nigu isoso so yeyedza ginani?

¹⁵ Na gu thangedwa khu liphuvbo nya guage, mupostoli Pedro thumiside Joyele 2:28, 29 avba nya gigiro nyo samadzise gi giregidego khu litshigu lile nya Pentekosta. Khu dzi 9 ora, khu ndziya nya gilewugiso Nungungulu a di guhula liphuvbo laye nya guage nigu vale va hakhidego liphuvbo lolo va di pheya gu “huwelela siliwugiso sa Nungungulu.” (Mith. 2:11) Na gu thangedwa khu liphuvbo nya guage, Pedro thumiside maganelelo ma hambanagonyana tepo a nga ba a ganeya khu giprofeto gya Joyele. U si tugude esi a nga vbindrugedza? (Leri Mithumo 2:16, 17.) Wulangani nyo pheye khu malito yaya, “khu hwane nya isoso,” Pedro a di khuye: “Si na dugelela matshiguni nya guhegise.” Avba a di gu ganeya khu matshigu nya guhegise nya vaJudha, khu tepo yoyo liphuvbo la Jehovha li di hadzi guhudwa “vbatshani nya vathu vatshavbo.” Isoso sa gu thula gu khiso gu vbindride tepo nyo khaguri na gi si gu tadzisegi giprofeto gya Joyele.

16. Liphuvbo nya guage li khuhide kharini thumo nya gutshumayele ga lizana myaga nya gupheye? Ahati muhuno ke?

¹⁶ Hwane nya gu ba Nungungulu a guhude liphuvbo laye vbatshani nya maKristo ya lizana myaga nya gu pheye, ayo ma di pheya thumo nya gutshumayele owu khu gu gimbiya nya tepo wu nga hadzi enedza mafu yatshavbo. Khu gu gimbiya nya tepo, mupostoli Pawulo a lovede lidangaliya laye vaKolosi khu 61  E.C., na gu ganeya gu khuye mahungu nya yadi ma di gu tshumayedwa  “ga vathu vatshavbo va tigoni.” (Kol. 1:23) Tepo Pawulo a nga khuye “vathu vatshavbo,” a di gu ganeya khu sipandre nya litigo omu Pawulo ni vambe va nga ba va kodza gu si vboheya. Khu gu phaswa khu liphuvbo nya guage nya tshivba la Jehovha, thumo nya gutshumayele wu dandride ngudzu matshiguni yathu “kala mahegiso nya litigo.” — Mith. 13:47; wona kwadru “Eni nyi na guhula Liphuvbo langu.”

17. Giprofeto gya Joyele maningano ni khaba, gi vbindrugedzide kharini?

¹⁷ Ginani gi vbindrugedzidego? Olu hi gi pwisiside gwadi giprofeto gi gomogo omu ga Joyele 2:7-9. Somo guagani gu khiso mavhesi yaya kha ma ganeyi khu thumo wathu nya gutshumayele hi wu girago ganiolu ma gu ganeya khu thumo nya libutho la Bhabhiloni li dhumedego Jerusalema khu 607 A.E.C.

18. Ginani gi nga mba vbindrugedza ga vathu va Jehovha?

¹⁸ Ginani gi nga mba vbindrugedza? Vathu va Jehovha va ngo simama gu tshumayela mahungu nya yadi ni hayini, khu magirelo nyo hambanehambane. (Mat. 24:14) Wu mwalo mufumo wu kodzago gu hi digisa gu landreya gileletelo nya gu tshumayele. Nigu khu gu phaswa khu Jehovha, hi ngu thuma ngudzu khu sighingi ni gutiya--hwambo, hi tshumayela mahungu nya yadi nya Mufumo! Hi nga gu simama gu dzi nogisa hi tumba Jehovha gasi a hi phasa gu pwisisa siprofeto nya Bhibhiliya kholu hi ngu tumba gu khethu khu tepo yakona uye a na hi “yisa Iisineni nya guvbelele”! — Joh. 16:13.