1. Библиез эскерон понна кыӵе амал кутӥзы Расселл агай но со кадь малпаськись адямиос? Малы та амал туж умой вал?

 СЮ АРЛЭСЬ но тросгес талэсь азьло Чарлз Тейз Расселл агай но со кадь малпаськись эшшо кӧня ке адямиос ӵош люкаськылыны кутскизы, Инмарлэсь Кылзэ эскерон понна. Соос ужпум пуктӥзы Библиысь зэмлык шедьтыны Иегова Инмар, Иисус Христос, дун тырон сярысь но со сярысь, мар луэ адямиосын кулэмзы бере. Эскерон амалзы туж огшоры вал. Кин ке но юан сётъяз, но ваньзы эскеризы Библиысь кылбуръёсты, кудъёсыз та юанэн герӟаськемын вал. Собере соос гожъязы сое, мае тодӥзы эскеронзы дыръя. Иегова бакель кариз та христианъёслэсь сюлмысь тыршемзэс: соос тодӥзы Библиысь валтӥсь зэмлыкъёсты, кудъёсыз милемлы туннэ но дуно пото.

2. Кыӵе мугъёсын сэрен азьпалзэ ивортонэз ми шонертэм валаны быгатӥськомы?

² Ӝоген Библиез эскерисьёс валазы, Инмарлэн Кылысьтыз валтӥсь зэмлыкъёсын ӵошатыса, азьпалзэ ивортонъёсты валаны трослы секытгес шуыса. Малы? Нырысетӥез, Библиысь азьпалзэ ивортонъёсты тужгес но умой валаны луэ быдэсмонзы дыръя яке быдэсмемзы бере. Кыкетӥез, азьпалзэ ивортонэз шонер валан понна, солэсь оглюкетсэ интые, сое быдэсак эскероно. Азьпалзэ ивортонлэн одӥг гинэ малпанэзлы саклыкмес висъяса, ми быгатӥськомы сое шонертэм валаны. Озьы ик луиз, вылды, Иоильлэн книгаысьтыз азьпалзэ ивортонэн но. Ойдолэ тодамы ваёмы, мар сярысь отын вераське, но эскеромы, малы сое мукет сямен валаны кулэ.

3, 4. Кызьы ми та дырозь валамы азьпалзэ ивортонэз, кудӥз гожтэмын Иоильлэн 2:7—9?

 ³ Лыдӟе Иоильлэсь 2:7—9. Иоиль азьпалзэ тодытыса вера, Израиль музъемез саранча сиыса быдтоз шуыса. Та саранча аспӧртэмлыко: «солэн пиньёсыз сьӧсь пӧйшурлэн кадесь, анлыосыз... левлэн кадесь». Со сие ваньзэ, мар солэн пумитаз сюре (Иоиль 1:4, 6). Трос аръёс ӵоже ми малпамы: дугдытыны луонтэм саранча возьматэ Иеговалэсь калыксэ, кудӥз солэсь иворзэ тодытэ. Озьы ик ми малпамы: та тодытон уж «музъемез» тырттэм каре, яке шарае поттэ адямиослэсь ужъёссэс, кудъёсыз религиозной кивалтӥсьёслэн киулазы возисько b.

⁴ Лыдэ басьтоно ке сое гинэ, мар гожтэмын Иоильлэн 2:7—9, таӵе валэктон валамон потыны быгатоз. Нош та азьпалзэ ивортонэз быдэсак эскероно ке, ми адӟомы, сое мукет сямен валаны кулэ шуыса, но солы ньыль мугъёс вань.

5, 6. Кыӵе юанъёс кылдо, куке ми лыдӟиськомы: а) Иоильлэсь 2:20? б) Иоильлэсь 2:25?

⁵ Нырысетӥ мугез тодон понна, саклыкмес висъяломы Иеговалэн кылсётонэзлы, кудӥз герӟаськемын саранчалэн лыктонэныз: «Уйпалась лыктэмез [саранчаез] тӥ дорысь... улляло» (Иоиль 2:20). Саранча Иеговалэсь Адӟись-Ивортӥсьёссэ возьматэ ке, кудъёсыз, Иисуслэсь курон-косонзэ быдэстыса, тодыто но дышетскисьёсты дасяло, соку малы Иегова кылзэ сётэ соосты улляны? (Иез. 33:7—9; Матф. 28:19, 20). Валамон, Иегова оскымон ужась-тыршисьёссэ уг улля, нош улля соосты, кинъёс солэн калыкезлы пумитъясько.

⁶ Кыкетӥ муг сярысь тодыны луэ, Иоильлэсь 2:25 лыдӟыса. Иегова вера: «Тӥ вылэ лэзем туж бадӟым войское — саранча, нумыръёс, бӧчыос-дургалиос, гоно нумыр — будосъёстэс сием аръёс понна, Мон тӥледлы пунэмзэ берыкто». Висъялэ саклыктэс: Иегова пунэмзэ берыктыны малпа, саранчаен ваем изъян понна. Саранча Эксэйлыкез тодытӥсьёсты возьматысал ке, соку солэн иворез изъян вайыны кулэ вал. Нош зэмзэ вераса, та ивор улонэз уте, но сьӧлыко адямиослэсь ӧпкельыны мылкыдзэс ӝутэ (Иез. 33:8, 19). Луэ-а сое изъян шуыны? Уг, уг луы. Соос понна со зэмос бакель карон!

7. Маин тунсыко «собере» кыл, кудӥз гожтэмын Иоильлэн 2:28, 29?

⁷ Лыдӟе Иоильлэсь 2:28, 29. Куинетӥ муг герӟаськемын соин, кыӵе радлыкъя мыно учыръёс, кудъёсыз сярысь вераське та азьпалзэ ивортонын. Висъялэ саклыктэс: Иегова вераз, святой духсэ «собере» кисьтоз шуыса, яке собере, куке саранча ужзэ быдэстоз. Саранча Инмарлэсь Эксэйлыксэ тодытӥсьёсты возьматэ ке, соку малы Иегова вераз, святой духсэ тодытон ужзэс быдтэмзы бере кисьтоз шуыса? Зэмзэ вераса, Инмарлэн кужмо святой духез ӧз юрттысал ке, соос трос дасо аръёс ӵоже тодытыны ӧй быгатысалзы, пумитъяськонъёс но ужзэс нуыны лэзьымтэос шоры учкытэк.

8. Кинэ возьматэ саранча, кудӥз сярысь вераське Усьтӥськонын 9:1—11? (Учке вылбамысь суредэз.)

⁸ Лыдӟе Усьтӥськонэз 9:1—11. Табере эскеромы ньылетӥ мугез. Азьвыл ми малпамы: саранчалэн лыктэмез, кудӥз сярысь Иоиль вераз, тодытон ужмес возьматэ, малы ке шуоно со выллем азьпалзэ ивортон Усьтӥськон книгаын вань. Отын гожтэмын: «Саранчалэн йыр вылаз зарни венецлы  укшась макеез вал. Солэн ымнырыз адями ымныръёслы укша» (Усьт. 9:7). Соос изъян ваё «кымесазы Инмарлэн печатез луымтэ адямиослы гинэ». Со вить толэзь ӵоже кыстӥське — ӵапак сомында улэ саранча (Усьт. 9:4, 5). Та кылъёсты ик вераны луэ Иеговалэн зырӟем ужась-тыршисьёсыз сярысь но. Соос кышкатэк верало приговоръёсты, кудъёссэ Инмар та лек дуннелы ялӥз. Со туж уг кельшы соослы, кин та дунне пала дурбасьтэ.

9. Кыӵе пӧртэмлыкъёсыз вань саранчалэн, кудзэ адӟиз Иоиль но кудзэ адӟиз Иоанн?

⁹ Зэм но, Усьтӥськонысь но Иоильлэн книгаысьтыз азьпалзэ ивортонъёслэн трос огкадез вань. Озьы ке но соослэн вань пӧртэмлыкъёссы, кудъёссэ лыдэ басьтыны кулэ. Кыӵе со пӧртэмлыкъёс? Иоильлэн азьпалзэ ивортонысьтыз саранча вань будосъёсты быдтэ (Иоиль 1:4, 6, 7). Иоаннлэн адӟоназ саранчалы «верамын вал, музъем вылысь турынлы... изъян медаз лэсьты» шуыса (Усьт. 9:4). Саранча, кудзэ Иоиль адӟиз, уйпалась лыктӥз (Иоиль 2:20). Нош соиз, кудзэ Иоанн адӟиз, пыдэстэм дуннеысь потӥз (Усьт. 9:2, 3). Иоильлэн азьпалзэ ивортонысьтыз саранчаез Иегова улля. Нош Усьтӥськонысь адӟонын Иегова саранчаез уг улля, нош лэзе солы ужзэ йылпумъяны. Номыр уг возьматы, со Инмарлы ярамон ӧвӧл шуыса. (Учке « Саранча сярысь азьпалзэ ивортонъёс» рамкаез.)

10. Малы вераны луэ, Иоилен адӟем саранча но Иоаннэн адӟем саранча пӧртэм мае ке возьматыны быгато шуыса?

 ¹⁰ Та кык азьпалзэ ивортонъёслэн кулэ луись пӧртэмлыкъёссы валаны юртто, соос герӟаськемын ӧвӧл шуыса. Луэ-а вераны, саранча, кудӥз сярысь Иоиль вераз, но саранча, кудӥз сярысь Усьтӥськонын вераське, одӥг мае ке уг возьмато шуыса? Луэ. Но татын номыр паймымонэз ӧвӧл. Библиын одӥг символ пӧртэм мае ке возьматыны быгатэ. Кылсярысь, Усьтӥськонын 5:5 Иисус «Иуда выжыысь лев» шуыса нимаське, нош 1 Пётрлэн 5:8 «бурсӥсь лев» шуыса Дьявол нимаське. Ньыль малпанъёс, кудъёссэ ми эскеримы, но соосын герӟаськем шуг-секытъёс возьмато, милемлы мукет валэктон утчано шуыса. Кыӵе валэктон?

11. Кызьы кылъёс, кудъёсыз гожтэмын Иоильлэн 1:6 но 2:1, 8, 11, валаны юртто, кинэ возьматэ саранча?

¹¹ Иоильлэн азьпалзэ ивортонысьтыз мукет кылбуръёслы саклыкез висъяса, валаны луэ, отын ожгарчиослэн урдсконзы сярысь вераське шуыса (Иоиль 1:6; 2:1, 8, 11). Иегова вераз, кылзӥськисьтэм израиль калыкез кылкутытон понна, туж бадӟым войскозэ (Вавилонысь ожгарчиосты) лэзёз шуыса (Иоиль 2:25). Иегова та ожгарчиосты уйпалась лыктэмъёсын нима, малы ке шуоно вавилон калык Израиль вылэ ӵапак со паласен урдскыны кулэ вал (Иоиль 2:20). Вавилон ожгарчиос кельшо туж умой радъям саранча уллёлы. Соос сярысь Иоиль вера: «Огзэс огзы уг лёгало, котькудӥз мынэ ас сюрес кузяз... Город кузя бызьыло, борддоръёс йылэ ӝутско, коркаос йылэ тубо, лушкаськись кадь укноостӥ пыро» (Иоиль 2:8, 9). Пуктэ син азяды: котькытын вавилон ожгарчиос, соослэсь ватскыны уг луы, соослэн мечсылэсь нокин но утиськыны уг быгаты!

12. Кызьы быдэсмиз Иоильлэн саранча сярысь азьпалзэ ивортонэз?

¹² Асьме вакытлэсь азьло 607-тӥ арын вавилон калык (яке халдейёс), саранча сямен, Иерусалимез киултӥзы. Библиын со сярысь тазьы вераське: «Соку соос вылэ Со [Иегова] халдейёслэсь эксэйзэс лэзиз, святой корказы егит пиоссэс со мечен виылӥз, Седекияез но, егит пиосты но, егит нылъёсты но, пересь муртъёсты но, пурысьтам пересьёсты но ӧз жаля: Инмар ваньзэ солэн киулаз сётӥз. Инмар коркаез сутӥзы, Иерусалимлэсь борддоръёссэ куашкатӥзы, эксэй коркаосты тылын сутӥзы, отысь вань дуно тӥрлыкъёсты быдтӥзы» (2 Пар. 36:17, 19). Адямиос та киултэм музъем сярысь вераны быгатысалзы: «Та — калыктэм, пудотэм кыр дунне; со халдейёс кие сётэмын» (Иер. 32:43).

13. Валэктэ, мае возьматэ азьпалзэ ивортон, кудӥз гожтэмын Иеремиялэн 16:16, 18.

¹³ Иоильлэн азьпалзэ ивортонзэ гожтэмез бере ог 200 ар ортчыса, Иегова Иеремия пыр та урдскон сярысь эшшо мае ке но усьтӥз. Инмар азьло ик вераз, киултӥсьёс утчалозы израиль калыкысь со адямиосты, кудъёсыз лек ужъёс лэсьто, но соосты пленэ нуозы шуыса. Иеремиялэн 16:16, 18 гожтэмын: «Тани, Мон трос чорыгасьёсты ысто,— шуэ Кузё-Инмар,— израиль пиосты кутылозы; собере трос пӧйшурасьёсты ысто но, соос вань гурезьёсысь, вырйылъёсысь, изгурезьлэн пасьёсысьтыз израиль пиосты улляса поттылозы. ...Пунэмзэ берыкто соослэн шонертэм улэмзы понна, нимысьтыз секыт сьӧлыксы понна». Израиль калыкысь ӧпкелисьтэм адямиос уз быгатэ ватскыны вавилон ожгарчиослэсь мур вуосын но, бадӟым нюлэсъёсын но.

14. Ку быдэсмизы кылъёс, кудъёсыз гожтэмын Иоильлэн 2:28, 29?

¹⁴ Иоильлэн книгаяз умой иворъёс но вань. Музъем нош ик умой емыш сётоз (Иоиль 2:23—26). Со сяна, азьланяз трос адямиос зэмлыкез тодыны быгатозы. Иегова кылзэ сётӥз: «Аслэсьтым Духме вань адямиос вылэ кисьто. [...] Ляльчи пиос вылэ но, ляльчи нылъёс вылэ но со нуналъёсы Аслэсьтым Духме кисьто» (Иоиль 2:28, 29). Инмар святой духсэ ӧз кисьты соку, куке израиль калык Вавилонысь вордӥськем музъемаз берытскиз, нош трослы берлогес, асьме вакытысь 33-тӥ арын ортчем Витьтонэтӥ нуналэ. Кытысь ми сое тодӥськомы?

15. Апостолъёслэсь ужъёссэс 2:16, 17 лыдэ басьтыса, кызьы Пётр воштӥз кылъёсты, кудъёсыз гожтэмын Иоильлэн 2:28, но мар сярысь со вера?

¹⁵ Инмарлэн святой духезлэн валтэмез улсын апостол Пётр уже кутӥз азьпалзэ ивортонэз, кудӥз гожтэмын Иоильлэн 2:28, 29, паймымон учыр сярысь веракуз, кудӥз луиз асьме вакытысь 33-тӥ арын Витьтонэтӥ нуналэ. Со нуналэ ӵукна, укмыс час котырын, Инмар паймымон амалэн Христослэн дышетскисьёсыз вылэ святой духсэ кисьтӥз. Собере соос «Инмарлэн быдӟым ужъёсыз сярысь» вераны кутскизы (Ап. уж. 2:11). Иегова Пётрлэсь мылкыдзэ ӝутӥз Иоильлэн азьпалзэ ивортонысьтыз кылъёсты кӧня ке воштыны. (Лыдӟе Апостолъёслэсь ужъёссэс 2:16, 17.) Адӟиды-а тӥ со воштӥськонъёсты? «Собере тазьы луоз» кылъёс интые Пётр уже кутэ «берпум нуналъёсы» кылъёсты. Со валэктӥз: Инмар «вань адямиос вылэ» святой духсэ кисьтоз «берпум нуналъёсы». Татын вераське дыр сярысь, кудӥз кылиз асьме вакытысь 70-тӥ арын Иерусалимез но храмез куашкатон  дырозь. Озьыен, Иоильлэн азьпалзэ ивортонэз кӧня ке дауръёс ортчыса гинэ быдэсмиз.

16. Кызьы Инмарлэн духез тодытон ужез нуыны юрттӥз нырысетӥ даурын но кызьы со асьме нуналъёсы юрттэ?

¹⁶ Куке нырысетӥ даурын Инмар христианъёс вылэ святой духсэ кисьтӥз, соос тодытыны кутскизы, но та уж быдэс дунне вылын вӧлмиз. Со дыре, куке апостол Павел колоссыослы гожтэтсэ гожтӥз (асьме вакытысь 61-тӥ ар котырын), вераны луэ вал, ӟеч ивор «ин улын улӥсь вань калыкъёслы тодытэмын» шуыса (Кол. 1:23). «Вань калыкъёслы» кылъёсын Павел вераз дунне сярысь, кудӥз со дыре улӥсь адямиослы тодмо вал. Иеговалэн туж кужмо святой духезлы луыса асьме нуналъёсы тодытон уж туж вӧлмиз — ӟеч иворез «музъемлэн вань сэрегъёсаз» иворто! (Ап. уж. 13:47). (Учке « Аслэсьтым Духме кисьто» рамкаез.)

17. Кызьы ми табере валаськомы Иоильлэсь саранча сярысь азьпалзэ ивортонзэ?

¹⁷ Мар воштӥськиз? Табере ми умойгес валаськомы азьпалзэ ивортонэз, кудӥз гожтэмын Иоильлэн 2:7—9. Та кылбуръёсын уг вераськы ӟырдыт мылкыдын тодытэммы сярысь, нош асьме вакытлэсь азьло 607-тӥ арын вавилон ожгарчиослэн Иерусалим вылэ урдскемзы сярысь.

18. Мар ӧз воштӥськы, Иеговалэн ужась-тыршисьёсыз сярысь верано ке?

¹⁸ Мар ӧз воштӥськы? Иеговалэн ужась-тыршисьёсыз азьланьто котькытын ӟеч иворез тодытыны но тыршо тупась амалъёсты уже кутыны (Матф. 24:14). Кивалтӥсьёс ужмес нуыны люкето ке но, ми тодытэмысь ум дугдӥське. Иеговалэн юрттэменыз, азьвыл дыръёсын ӵошатыса, туннэ ми мылысь-кыдысь тодытӥськомы — Эксэйлык сярысь ӟеч иворез кышкатэк вераськомы! Азьло кадь ик ми зӥбыт-востэмен валаськомы: Библиысь азьпалзэ ивортонэз, Иеговалэн юрттэменыз гинэ, валаны луэ, но ми оскиськомы, ас дыраз Инмар милемыз «котькыӵе но зэмлыклы дышетоз» (Иоанн 16:13).