14-تەتقىق ماقالىسى
شىمالدىن كەلگەن خەلقنىڭ ھۇجۇمى
«بىر مىللەت يۇرتۇمغا باستۇرۇپ كەلدى».—يوئېل 1:6.
43-ناخشا ھوشيار تۇر، چىڭ تۇر ۋە قەيسەر بول!
بۇ ماقالىدە a
1. راسسېل ۋە ئۇنىڭ ياردەمچىلىرى مۇقەددەس كىتابنى قانداق تەتقىق قىلغان ۋە بۇ ئۇسۇل نېمە ئۈچۈن نەتىجىلىك بولغان؟
بىر ئەسىردىن كۆپرەك ۋاقىت بۇرۇن، چارلېز راسسېل ۋە ئۇنىڭ ياردەمچىلىرى، يەنى خۇدا سۆزىنى تەتقىق قىلغان باشقا كىچىك بىر توپ ئادەملەر بىلەن بىللە جەم بولۇشنى باشلىغان. ئۇلار يەھۋا خۇدا، ئەيسا مەسىھ، ئۆلگەنلەرنىڭ ئەھۋالى ۋە تۆلەم قۇربانلىقى توغرۇلۇق مۇقەددەس كىتاب نېمىلەرنى ئۆگىتىدىغانلىقىنى بىلىشنى خالىغان. ئۇلارنىڭ ئىزدىنىش ئۇسۇلى بەك ئاددىي بولغان. بىرسى سوئال قويغان ۋە كېيىن ھەممىسى بۇ تېمىغا مۇناسىۋەتلىك ھەربىر ئايەت ھەققىدە ئىزدىنىپ پۇختا تەتقىق قىلغانىدى. ئاخىرىدا، ئۇلار ئىزدىنىشىنىڭ نەتىجىسىنى يېزىپ قويغان. خۇدا بۇ سەمىمىي خىزمەتچىلىرىنىڭ نۇرغۇن مۇھىم ھەقىقەتلەرنى چۈشىنىشىگە ياردەم بەرگەن ۋە بىز بۇ ھەقىقەتلەرنى بۈگۈنمۇ بەك قەدىرلەيمىز.
2. مۇقەددەس كىتابتىكى پەيغەمبەرلىك سۆزنى چۈشىنىشكە تىرىشقاندا، قانداقلارچە ناتوغرا خۇلاسە چىقىرىشىمىز مۇمكىن؟
2 لېكىن، كۆپ ئۆتمەي مۇقەددەس كىتاب تەتقىقاتچىلىرى مۇقەددەس كىتابنىڭ ئاساسىي تەلىملىرىگە قارىغاندا، ئۇنىڭدىكى پەيغەمبەرلىك سۆزلەرنى چۈشىنىشنىڭ قىيىنراق ئىكەنلىكىنى بايقىغان. نېمە سەۋەبتىن؟ بىرىنچىدىن، مۇقەددەس كىتابتىكى پەيغەمبەرلىك سۆزلەر ئەمەلگە ئېشىۋاتقاندا ياكى ئەمەلگە ئېشىپ بولغاندىن كېيىن، ئۇلارنى چۈشىنىش ئاسانراق. ئىككىنچىدىن، پەيغەمبەرلىك سۆزلەرنى توغرا چۈشىنىش ئۈچۈن، ئالدى-كەينىدىكى مەزمۇننى تولۇق كۆرۈپ چىقىش مۇھىم. ئەگەر بىز پەيغەمبەرلىك سۆزىنىڭ بىر قىسىمىغىلا كۆڭۈل بۆلسەك، ناتوغرا خۇلاسە چىقىرىشىمىز مۇمكىن. قارىماققا، يوئېل كىتابىدىكى پەيغەمبەرلىك سۆزى بىلەن شۇنداق بولغان. ھازىر بۇ پەيغەمبەرلىك سۆزىنى كۆرۈپ چىقىپ، نېمە ئۈچۈن چۈشەنچىمىزنى ئۆزگەرتىش كېرەك بولغانلىقىنى مۇھاكىمە قىلايلى.
3، 4. مۇشۇ كەمگىچە يوئېل 2:7—9-ئايەتلەردىكى پەيغەمبەرلىك سۆزىنى قانداق چۈشەنگەنىدۇق؟
3 يوئېل 2:7—9-نى ئوقۇڭ. يوئېل پەيغەمبەر ئىسرائىل زېمىنىنى چېكەتكىلەر بېسىپ ۋەيران قىلىدىغانلىقىنى ئالدىن-ئالا ئېيتقان. چىشلىرى ۋە ئېڭەكلىرى شىرنىڭكىگە ئوخشاش بۇ تويماس ھاشارەتلەر ئىسرائىل زېمىندىكى ھەممە ئۆسۈملۈكلەرنى يەيدۇ (يوئېل 1:4، 6). كۆپ يىللاردىن بويان، بۇ پەيغەمبەرلىك سۆزىنى يەھۋا خىزمەتچىلىرىنىڭ ھېچكىم توختىتالمايدىغان چېكەتكىلەرگە ئوخشاش ۋەز قىلىشى بىلەن مۇناسىۋەتلىك دەپ قارىغان ئىدۇق. ۋەز ئىشىمىز «زېمىنغا»، يەنى دىن رەھبەرلىرىنىڭ قول ئاستىدىكى ئادەملەرگە، زىيان كەلتۈرىدۇ دەپ چۈشەنگەنىدۇق b.
4 ئەگەر پەقەت يوئېل 2:7—9-ئايەتلەرنى ئوقۇغان بولساق، بۇ چۈشەندۈرۈش توغرا بولاتتى. ئەمما، بىز پەيغەمبەرلىك سۆزىنىڭ ئالدى-كەينىدىكى مەزمۇنغا دىققەت ئاغدۇرساق، ئۇنىڭ مەنىسى باشقىچە ئىكەنلىكىنى چۈشىنىمىز. بۇنىڭ تۆت سەۋەبىنى كۆرۈپ چىقايلى.
چۈشەنچىنى ئۆزگەرتىشنىڭ تۆت سەۋەبى
5، 6. بۇ ئايەتلەرنى ئوقۇغاندا قانداق سوئال پەيدا بولىدۇ؟ (1) يوئېل 2:20؟ (2) يوئېل 2:25؟
5 ئـەڭ ئـاۋۋال، چېكـەتكىلەرنىڭ ھـۇجۇمىغا مۇناسىـۋەتلـىك، خۇدانىڭ: «شـىمالـدىن كەلگۈچـىنى [چېكەتكىـلەرنى] سىلەردىن يىراقلاشتۇرىمەن»،— دېگەن ۋەدىسىگە دىققەت ئاغدۇرۇڭ (يوئېل 2:20). ئەگەر چېكەتكىلەر ئەيسانىڭ ۋەز قىلىش ۋە شاگىرتلارنى تەييارلاش بۇيرۇقىنى ئورۇنداۋاتقان يەھۋا گۇۋاھچىلىرىنى بىلدۈرسە، يەھۋا ئۇلارنى نېمە ئۈچۈن يىراقلاشتۇرىدۇ؟ (ھەزق. 33:7—9؛ مەتتا 28:19، 20). ئېنىقكى، يەھۋا ئۆزىنىڭ سادىق خىزمەتچىلىرىنى ئەمەس، ئۇنىڭ خەلقىگە ئۆچ بىر نەرسىنى ياكى بىرەر كىشىنى ھەيدىۋېتىدۇ.
6 ئىككىنچى سەۋەبىنى بىلىش ئۈچۈن، يوئېل 2:25-ئايەتكە دىققەت قىلايلى. بۇ ئايەتتە خۇدا مۇنداق دېگەن: «مەن ئۆزۈم سىلەرگە قارشى ئەۋەتكەن قاناتلىق چېكەتكىلەر، قاناتسىز چېكەتكىلەر، يەپ قىرىۋېتىدىغان چېكەتكىلەر ۋە ئاچكۆز چېكەتكىلەر قوشۇنى يېگەن يىللارنى قايتۇرۇپ بېرىمەن». بايقىسىڭىز، يەھۋا خۇدا چېكەتكىلەر ۋەيران قىلغاننى «قايتۇرۇپ بېرىشكە» ۋەدە قىلغان. پەيغەمبەرلىك سۆزدىكى چېكەتكىلەر ۋەز ئېيتقۇچىلارنى بىلدۈرگەن بولسا، دېمەك ئۇلار يەتكۈزۈۋاتقان خەۋەر زىيان كەلتۈرىدۇ. ئەمما، بۇ خەۋەر ئەسلى ئادەملەرنىڭ ھاياتىنى ساقلايدۇ ۋە رەزىل كىشىلەرنى توۋا قىلىشقا دەۋەت قىلىدۇ (ھەزەك. 33:8، 19). بۇ ئۇلار ئۈچۈن نېمە دېگەن زور بەرىكەت،-ھە!
7. يوئېل 2:28، 29-ئايەتلەردىكى «كېيىن» دېگەن سۆز نېمىنى چۈشىنىشىمىزگە ياردەم بېرىدۇ؟
7 يوئېل 2:28، 29-نى ئوقۇڭ. ئۈچىنچى سەۋەب — پەيغەمبەرلىك سۆزىدىكى ۋەقەلەرنىڭ ئەمەلگە ئېشىش نۆۋىتى بار. يەھۋا خۇدانىڭ چېكەتكىلەرگە تاپشۇرغان ئىشنى، ئۇلار قىلىپ بولغاندىن «كېيىن، مەن ھەر تۈرلۈك ئادەملەرنىڭ ئۈستىگە ئۆز روھۇمنى تۆكىمەن» دېگەنلىكىنى بايقىدىڭىزمۇ؟ چېكەتكىلەر خۇدا پادىشاھلىقىنى جاكارلايدىغان ئادەملەرنى بىلدۈرسە، نېمە ئۈچۈن ئۇلار گۇۋاھلىق بېرىپ بولغاندىن كېيىن، يەھۋا ئۇلارغا مۇقەددەس روھىنى تۆكىدۇ؟ ئەمەلىيەتتە، يەھۋانىڭ مۇقەددەس روھسىز شۇنچە كۆپ يىللار بۇيان، خۇدانىڭ خىزمەتچىلىرى قارشىلىققا ۋە ھەتتا ۋەز پائالىيىتىنىڭ مەنئىي قىلىنىشىغا قارىماستىن ۋەز قىلالمايتتى.
جوسۇف فرېدېرىك رۇتېرفورد ۋە يېتەكچىلىك قىلغان باشقا مەسىھ قىلىنغان بۇرادەرلەر خۇدانىڭ بۇ رەزىل دۇنياغا چىقارغان ھۆكۈمىنى جۈرئەتلىك بىلەن جاكارلىغان (8-ئابزاسىغا قاراڭ)
8. ۋەھىيلەر 9:1—11-ئايەتلەردە تەسۋىرلەنگەن چېكەتكىلەر كىملەرنى بىلدۈرىدۇ؟
8 ۋەھىيلەر 9:1—11-نى ئوقۇڭ. ھازىر تۆتىنچى سەۋەبىنى كۆرۈپ چىقايلى. بۇرۇن بىز يوئېل يازغان پەيغەمبەرلىك سۆزدىكى چېكەتكىلەرنىڭ ھۇجۇمى ۋەز ئىشى بىلەن مۇناسىۋەتلىك دەپ ئويلىغان. چۈنكى، ۋەھىي كىتابىدا ئوخشاش پەيغەمبەرلىك سۆزلىرى بار. ۋەھىي كىتابىدا يۈزى ئادەمنىڭكىگە ئوخشايدىغان ۋە باشلىرىدا ئالتۇندىن ياسالغان تاجغا ئوخشاش بىر نەرسە بولغان چېكەتكىلەر تەسۋىرلەنگەن (ۋەھىي. 9:7). ئۇلار پېشانىسىدە خۇدانىڭ مۆھىرى بولمىغان ئادەملەرنى [خۇدانىڭ دۈشمەنلىرىنى] بەش ئايغىچە (چېكەتكىنىڭ ئوتتۇرىچە ياشاش ئۆمۈرى) ئازابلايدۇ (ۋەھىي. 9:4، 5). بۇ ئايەتلەردە يەھۋا خۇدانىڭ مەسىھ قىلىنغان خىزمەتچىلىرى تەسۋىرلەنگەن. ئۇلار بۇ رەزىل دۇنيا تۈزۈمى ھەققىدە خۇدانىڭ سوت خەۋىرىنى جاسارەت بىلەن جاكارلاپ، بۇ دۇنيانى قوللايدىغان كىشىلەرنى ئازابلىغاندەك بولىدۇ.
9. ۋەھىي ۋە يوئېل كىتابلىرىدىكى پەيغەمبەرلىك سۆزلىرىنىڭ ئارىسىدا قانداق مۇھىم پەرقلەر بار؟
9 ئەلۋەتتە، ۋەھىي ۋە يوئېل كىتابلىرىدىكى پەيغەمبەرلىك سۆزلەرنىڭ ئارىسىدا ئوخشاشلىقلار بولسىمۇ، ئەمما ئۇلارنىڭ ئارىسىدا مۇھىم پەرقلەرمۇ بار. مەسىلەن، يوئېل پەيغەمبەر چېكەتكىلەرنىڭ ئۆسۈملۈكلەرنى يەپ ۋەيران قىلىدىغانلىقىنى ئېيتقان (يوئېل 1:4، 6، 7). ئەلچى يۇھاننا كۆرگەن ۋەھىيدىكى چېكەتكىلەر بولسا، «يەردىكى ھېچبىر ئۆسۈملۈككە» زىيان كەلتۈرمەسلىكى كېرەك ئىدى (ۋەھىي. 9:4). يوئېل كۆرگەن چېكەتكىلەر شىمالدىن كەلگەن (يوئېل 2:20). يۇھاننا كۆرگەن چېكەتكىلەر ھاڭدىن چىققان (ۋەھىي. 9:2، 3). يوئېل كىتابىدا تەسۋىرلەنگەن چېكەتكىلەر يىراققا ھەيدەلگەن. ۋەھىي كىتابىدىكى چېكەتكىلەرگە بولسا، ئىشىنى پۈتتۈرۈشكە يول قويۇلغان. مۇقەددەس كىتابتا خۇدانىڭ ئۇلارنى قوبۇل قىلمايدىغانلىقى توغرۇلۇق ھېچنېمە يېزىلمىغان.—« چېكەتكىلەر توغرۇلۇق پەيغەمبەرلىك سۆزلىرىدىكى مۇھىم پەرقلەر» ناملىق رامكىغا قاراڭ.
10. مۇقەددەس كىتابتىكى بەزى سىمۋوللار (نەرسىلەر) ئىككى تۈرلۈك مەنىدە ئىشلىتىلىشى مۇمكىنلىكىنى كۆرسىتىدىغان مىسالنى كەلتۈرۈڭ.
10 بۇ ئىككى كىتابتىكى پەيغەمبەرلىك سۆزلەرنىڭ ئارىسىدىكى پەرقلەر ئۇلارنىڭ ئۆزئارا باغلىنىشلىق ئەمەسلىكىنى چۈشىنىشىمىزگە ياردەم بېرىدۇ. دېمەك، يوئېل كىتابىدا تەسۋىرلەنگەن چېكەتكىلەر ۋە ۋەھىي كىتابىدا تىلغا ئېلىنغان چېكەتكىلەر ئوخشاش ئەمەس. مۇقەددەس كىتابتىكى بەزى سىمۋوللار (نەرسىلەر) ئىككى تۈرلۈك مەنىدە ئىشلىتىلىشى مۇمكىن. مەسىلەن، ۋەھىيلەر 5:5-ئايەتتە، ئەيسا «يەھۇدانىڭ ئەۋلادى بولغان شىر» دەپ ئاتالغان. 1-پېترۇس 5:8-ئايەتتە بولسا، شەيتان قاتراپ يۈرگەن شىردەك تەسۋىرلەنگەن. يۇقىرىدىكى تۆت سەۋەبلەرگە ئاساسەن، يوئېلنىڭ پەيغەمبەرلىك سۆزى بىلەن مۇناسىۋەتلىك چۈشەنچىمىزنى ئۆزگەرتىشىمىز كېرەكلىكىگە كۆزۈمىز يەتتى. ئۇنداقتا، يوئېلنىڭ پەيغەمبەرلىك سۆزى نېمىنى بىلدۈرۈشى مۇمكىن؟
پەيغەمبەرلىك سۆزىنىڭ مەنىسى
11. يوئېل 1:6 ۋە 2:1، 8، 11-ئايەتلەر چېكەتكىلەرنىڭ كىم ئىكەنلىكىنى چۈشىنىشكە قانداق ياردەم بېرىدۇ؟
11 يوئېلنىڭ پەيغەمبەرلىك سۆزىنىڭ ئالدى-كەينىدىكى مەزمۇنغا دىققەت ئاغدۇرساق، پەيغەمبەرنىڭ ھەربىي ھۇجۇم توغرۇلۇق ئېيتقانلىقىنى چۈشىنىمىز (يوئېل 1:6؛ 2:1، 8، 11). يەھۋا ئىتائەتسىز ئىسرائىللارنى «ئۇلۇغ قوشۇنىنىڭ» (بابىل ئەسكەرلىرىنىڭ) ياردىمى بىلەن جازالايدىغانلىقىنى ئېيتقان (يوئېل 2:25). بۇ قوشۇننىڭ «شىمالدىن كەلگۈچى» دەپ ئاتىلىشى ئورۇنلۇق، چۈنكى بابىللىقلار ئىسرائىلغا شىمالدىن ھۇجۇم قىلىپ كېلەتتى (يوئېل 2:20). بابىل ئەسكەرلىرى تەشكىللەنگەن چېكەتكىلەرگە ئوخشاش بولغان. ئۇلار توغرۇلۇق يوئېل پەيغەمبەر مۇنداق دېگەن: «ھەر [ئەسكەر] ئۆز يولىدا ئىلگىرىلەيدۇ … شەھەر ئىچىگە بېسىپ كىرىدۇ، سېپىل ئۈستىدە يۈگۈرۈپ يۈرىدۇ. ئۆيلەرگە يامىشىپ چىقىدۇ، ئوغرىدەك دېرىزىلەردىن كىرىدۇ» (يوئېل 2:8، 9). بۇنى تەسەۋۋۇر قىلىپ بېقىڭە: ئەسكەرلەر ھەممە يەردە؛ مۆكۈنىدىغان يەر يوق؛ بابىللىقلارنىڭ قىلىچىدىن ھېچكىم قېچىپ قۇتۇلالمايدۇ.
12. يوئېلنىڭ چېكەتكىلەر توغرىسىدىكى پەيغەمبەرلىك سۆزى قانداق ئەمەلگە ئاشقان؟
12 مىلادىدىن بۇرۇنقى 607-يىلى بابىللىقلار (ياكى كالدانلار) چېكەتكىلەرگە ئوخشاش يېرۇسالىمغا بېسىپ كىرگەن. مۇقەددەس كىتابتا مۇنداق يېزىلغان: كالدانلارنىڭ پادىشاھى «ئۇلارنىڭ ياشلىرىنى قىلىچ بىلەن قىردى؛ مەيلى ياش يىگىت ياكى قىز، قېرى ياكى تېنى ئاجىزغا رەھىم-شەپقەت قىلمىدى. خۇدا ھەممە نەرسىنى ئۇنىڭ قولىغا تاپشۇردى. ئۇ ھەق خۇدانىڭ ئىبادەتخانىسىنى كۆيدۈرۈۋەتتى، يېرۇسالىمنىڭ سېپىل تاملىرىنى چېقىپ يىقىتتى، بارلىق مۇستەھكەم مۇنارلىرىنى كۆيدۈرۈۋەتتى، قىممەتلىك ھەممە نەرسىنى ۋەيران قىلىۋەتتى» (2-تارىخ. 36:17، 19). بابىللىقلار ئىسرائىل زېمىنىغا بېسىپ كىرىپ، ئۇنى ۋەيران قىلغاندىن كېيىن، ئادەملەر: «ئۇ ئۆزى نە ئىنسان، نە ھايۋان ياشىمايدىغان زېمىن، ئاللىقاچان كالدانلارنىڭ قولىغا تاپشۇرۇلغان»،— دەپلا ئېيتالىغان.—يەرەم. 32:43.
13. يەرەمىيا 16:16، 18-ئايەتلەرنىڭ مەنىسىنى چۈشەندۈرۈپ بېرىڭ.
13 يوئېل بۇ پەيغەمبەرلىك سۆزىنى ئېيتقاندىن 200 يىل ئۆتكەندىن كېيىن، يەھۋا خۇدا يەرەمىيا ئارقىلىق مۇشۇ ھۇجۇم توغرۇلۇق يەنە بىر بېشارەتنى ئېيتقان. يەرەمىيانىڭ ئېيتىشىچە، ھۇجۇم قىلغۇچىلار رەزىل ئىشلارنى قىلغان ئىسرائىللارنى ئىزدەپ، ھېچبىرى قېچىپ قۇتۇلالمايتتى. «يەھۋا مۇنداق جاكارلايدۇ: ‹مەن نۇرغۇن بېلىقچىلارنى ئەۋەتىۋاتىمەن، ئۇلار بېلىق تۇتقاندەك ئىسرائىللارنى تۇتىدۇ. ئۇنىڭدىن كېيىن، مەن نۇرغۇن ئوۋچىلارنى ئەۋەتىمەن، ئۇلار ئىسرائىللارنى ھەر بىر تاغ ۋە ھەر بىر تۆپىلىكلەردىن، قىيا تاشلارنىڭ يوچۇقلىرىدىن ئوۋلاپ تۇتۇپ كېلىدۇ. … ئاۋۋال، مەن ئۇلارغا خاتالىقلىرى ۋە گۇناھلىرى ئۈچۈن تېگىشلىك بارچە جازاسىنى بېرىمەن». توۋا قىلمىغان ئىسرائىللارنى بابىل ئەسكەرلىرىدىن ھېچقانداق دېڭىز-ئوكيانلار ياكى ئورمانلار ساقلاپ قالالمايتتى.—يەرەم. 16:16، 18.
ئەسلىگە كەلتۈرۈش
14. يوئېل 2:28، 29-ئايەتلەردىكى پەيغەمبەرلىك سۆزى قاچان ئەمەلگە ئاشقان؟
14 يوئېل پەيغەمبەر خۇش خەۋەرنى ئېيتقان: يەر قايتىدىن گۈللىنىپ، مول ھوسۇل بېرىدۇ (يوئېل 2:23—26). كېلەچەكتە بىر ۋاقىت كېلىدۇكى، روھىي ئوزۇق مول، يېتەرلىك بولىدۇ. يەھۋا مۇنداق دېگەن: «مەن ھەر تۈرلۈك ئادەملەرنىڭ ئۈستىگە ئۆز روھۇمنى تۆكىمەن. سىلەرنىڭ ئوغۇل-قىزلىرىڭلار بېشارەت يەتكۈزىدۇ، … مەن ھەتتا ئەر ۋە ئايال چاكارلىرىمنىڭ ئۈستىگە روھۇمنى تۆكىمەن» (يوئېل 2:28، 29). بۇ پەيغەمبەرلىك سۆز ئىسرائىللار بابىلدىن ئۆز يۇرتىغا قايتىپ كەلگەندىن كېيىن دەرھال ئەمەلگە ئاشمىغان. خۇدا ئۇلارغا مۇقەددەس روھىنى مىلادى 33-يىلنىڭ ئەللىكىنچى كۈن بايرىمىدا تۆككەن. بىز بۇنى نەدىن بىلىمىز؟
15. ئەلچىلەر 2:16، 17-ئايەتلەرگە ئاساسەن، پېترۇس يوئېل 2:28-ئايەتتىكى قايسى سۆزلەرنى باشقىچە ئېيتقان؟ بۇ نېمىنى كۆرسىتىدۇ؟
15 مۇقەددەس روھنىڭ تەسىرى ئاستىدا، ئەلچى پېترۇس يوئېل 2:28، 29-دىكى سۆزلەرنى ئەللىكىنچى كۈن بايرىمىدا يۈز بەرگەن ئاجايىپ ۋەقە بىلەن باغلىغان. شۇ كۈنى تەخمىنەن ئەتىگەن سائەت توققۇزدا، مۇقەددەس روھقا ئېرىشكەن كىشىلەر «خۇدانىڭ ئۇلۇغ ئىشلىرى ھەققىدە» سۆزلەشكە باشلىغان (ئەلچى. 2:11). خۇدا روھىنىڭ يېتەكچىلىكى بىلەن ئەلچى پېترۇس يوئېل پەيغەمبەرنىڭ سۆزلىرىنى سەل باشقىچە ئېيتقان. سىز ئۇنىڭ قايسى سۆزلەرنى باشقىچە ئېيتقانلىقىنى بايقىدىڭىزمۇ؟ (ئەلچىلەر 2:16، 17-نى ئوقۇڭ). نەقىل كەلتۈرگەن ئۈزۈندىنى «كېيىن» دېگەن سۆز بىلەن باشلاشنىڭ ئورنىغا، پېترۇس «ئاخىرقى كۈنلەردە»، يەنى بۇ ئالدى-كەينىدىكى مەزمۇندا يەھۇدىي تۈزۈمىنىڭ ئاخىرقى كۈنلىرىدە، خۇدا ئۆز روھىنى «ھەر تۈرلۈك ئادەملەرنىڭ ئۈستىگە» تۆكىدىغانلىقىنى ئېيتقان. بۇ يوئېلنىڭ پەيغەمبەرلىك سۆزى ئەمەلگە ئاشقۇچە بىراز ۋاقىت ئۆتكەنلىكىنى كۆرسىتىدۇ.
16. خۇدانىڭ مۇقەددەس روھى بىرىنچى ئەسىردىكى ۋەز ئىشىغا قانداق تەسىر قىلغان، بۈگۈنكى كۈندىچۇ؟
16 خۇدا بىرىنچى ئەسىردىكى مەسىھىيلەرگە مۇقەددەس روھنى تۆككەندىن كېيىن، ئۇلار كېلەچەكتە پۈتۈن دۇنياغا تارقىلىپ كېتىدىغان ۋەز ئىشىنى باشلىغان. ئەلچى پاۋلۇس مىلادى 61-يىلى كولوسىدىكى ئېتىقادداشلارغا خەت يازغاندا، «ئاسمان ئاستىدىكى بارچە ئىنسانلار ئارىسىدا ۋەز قىلىنغان» دەپ ئېيتالىغان (كولوسى. 1:23). پاۋلۇسنىڭ كۈنلىرىدە «بارچە ئىنسانلار» شۇ زاماندىكى پاۋلۇس ۋە باشقىلار سەپەر قىلالىغان يەرلەرنى بىلدۈرىدۇ. خۇدانىڭ قۇدرەتلىك مۇقەددەس روھىنىڭ ياردىمى بىلەن بۈگۈنكى كۈندە ۋەز ئىشى تېخىمۇ كۆپ جايلارغا، «يەر يۈزىنىڭ چەت ياقىلىرىغىچە» يەتمەكتە!—ئەلچى. 13:47؛ « خىزمەتچىلىرىمگە ئۆز روھۇمنى تۆكىمەن» ناملىق رامكىغا قاراڭ.
نېمە ئۆزگەردى؟
17. يوئېلنىڭ چېكەتكىلەر توغرۇلۇق پەيغەمبەرلىك سۆزىگە مۇناسىۋەتلىك چۈشەنچىمىز قانداق ئۆزگەردى؟
17 شۇنىڭ بىلەن، نېمە ئۆزگەردى؟ ئەمدى يوئېل 2:7—9-ئايەتلەردىكى پەيغەمبەرلىك سۆزىگە قارىتا توغرا چۈشەنچىمىز بار. ئېنىقكى، بۇ ئايەتتىكى سۆزلەر قىزغىن ۋەز ئېتىش ئىشىمىز ئەمەس، بەلكى مىلادىدىن بۇرۇنقى 607-يىلى بابىل ئەسكەرلىرىنىڭ يېرۇسالىمنى بېسىۋالغانلىقى توغرۇلۇق ئېيتىلغان.
18. يەھۋا خۇدانىڭ خەلقى توغرۇلۇق نېمە ئۆزگەرمىدى؟
18 نېمە ئۆزگەرمىدى؟ يەھۋا خۇدانىڭ خەلقى ھېچبىر پۇرسەتنى قولدىن چىقارماي، خۇش خەۋەرنى ھەممە جايلاردا ۋەز قىلماقتا (مەتتا 24:14). ھۆكۈمەت ۋەز ئىشىمىزنى مەنئىي قىلسىمۇ، بىز ئۆز ۋەزىپىمىزنى ئورۇنداشنى توختاتمايمىز. خۇدانىڭ ياردىمى بىلەن، بىز پادىشاھلىق توغرۇلۇق ۋەز قىلىش ئىشىنى بۇرۇنقىغا قارىغاندا، تېخىمۇ پائال قىزغىن قىلىۋاتىمىز. مۇقەددەس كىتابتىكى پەيغەمبەرلىك سۆزلەرنى چۈشىنىش ئۈچۈن، بىز كەمتەرلىك بىلەن يەھۋانىڭ يولباشچىلىقىغا تايىنىپ، ئۇنىڭ ئۆز ۋاقتىدا «تولۇق ھەقىقەتنى» چۈشىنىشىمىزگە ياردەم بېرىدىغانلىقىغا ئىشەنچىمىز كامىل.—يۇھاننا 16:13.
48-ناخشا ھەر كۈنى يەھۋا بىلەن يۈر!
a كۆپ يىللاردىن بۇيان بىز يوئېل كىتابىنىڭ بىرىنچى ۋە ئىككىنچى بابلىرىدا يېزىلغان پەيغەمبەرلىك سۆزلىرىنى بۈگۈنكى كۈندىكى ۋەز پائالىيىتىگە مۇناسىۋەتلىك دەپ ئويلاپ كەلدۇق. لېكىن، يوئېل ئېيتقان بېشارەتنىڭ بۇ قىسىمىنىڭ چۈشەنچىسىنى ئۆزگەرتىشنىڭ مۇھىم تۆت سەۋەبى بار. قانداق سەۋەبلەر؟
b مەسىلەن، «كۈزىتىش مۇنارى» (باشقا تىل) 2009-يىل، 15-ئاپرېل سانى 14—16-بەتلىرىدىكى «مەۋجۇداتلاردىن كۆرۈنىدىغان يەھۋانىڭ دانالىقى» دېگەن ماقالىگە قاراڭ.
