1. Enamuna xeeni ya osoma egrupu ya Russell yaarumeela aya? Xeeni enamuna eyo yaari aya yooloka?

IYAAKHA 100 sivinre, Munna Charles Taze Russell ni egrupu awe yaamukhaani ya anamasoma a Nuulumo na Muluku, yaahipacerya othukumana. Awo yaaphavela osuwela ele Biibiliya oniixuttiha awe voohimya sa Yehova Muluku, Yesu Kristu, mukhalelo wa alipa-ookhwa ni mukuttho wowoopola wa Yesu. Enamuna yaarumeela aya wira asome yaari yookhweya. Mmosa aanipaka nikoho, nto egrupu yotheene yaanitokosa iversiikulu sa mBiibiliyani saavarihana ni mwaha owo. Wanikisa, awo yaanilepa ele yiixuntta aya okathi yaatokosa aya. Enamuna eyo ya osoma yaari yooloka, maana akhaliheriwaka ni Yehova yaahiphwanya ikeekhai sa mBiibiliyani seiyo ninvaha ahu efaita yinceene mpakha olelo-va.

2. Xeeni okathi mukina nikhanle ahu oowiiwexexa mwa enamuna yoohiloka eprofesia ya mBiibiliyani?

² Moohipisa, anamasoma ale a Biibiliya yaahiphwanya etthu ya faita yinceene. Etthu ene tiila: Awo yaahiixutta ele Biibiliya oniixuttiha awe voohimya sa myaha sootthuneya sa mBiibiliyani. Masi wiiwexexa oratteene iprofesia sa mBiibiliyani khivanikhweya. Mwaha wa xeeni? Mwaha woowi, ikwaha sinceene yaasuwela paahi yootaphulela aya, okathi eprofesia eyo yiiraneya aya aahiiso nuumala wiiraneya. Masi yaahikhala etthu ekina. Wira yiiwexexe oratteene eprofesia emosa, yaahaana ohela muhina eprofesia yotheene. Akhala wira ninvarexexa mpantta mmosa paahi wa eprofesia nnaahiya mpantta mukina, pooti wiiwexexa mwa enamuna yoohiloka. Vanikhala ntoko wira eyo ti etthu yiiraneyale ni eprofesia ya Yoweli. Nrowe nuupuwelele eprofesia ela ni niwehe nthowa naya vanireerela aya olokiherya wiiwexexa wahu.

3-4. Okhuma khalai naatthokiherya sai eprofesia ya Yoweli 2:7-9?

³ Mmusome Yoweli 2:7-9. Yoweli aahihimya vahinatthi wira muttitthi wa nasope waamuhonona elapo ya wIsarayeli. Maino  aya, yaalikana ni maino a kharamu, isoope iyo soovoliwa etala saarowa okhuura itthu sotheene saarowa aya ophwanya! (Yow. 1:4, 6) Mwa iyaakha sinceene, hiyo nuupuwela wira eprofesia ela yaahimya atthu a Yehova. Naahimya wira, ntoko siisaale nasope, atthu a Yehova khiyaarowa ohiya olaleya, nto olaleerya iwo waamukumiherya mixankiho “elapo”, eyo piiyo, atthu yaale aneettihiwa ni ahooleli a etiini yoowootha. *

⁴ Akhala wira nimmusoma Yoweli 2:7-9, vanikhala ntoko wira enamuna yaatthokiheriwe aya ti yooloka. Masi, vaavo ninthokorerya ahu eprofesia yotheene ya Yoweli moovarihana ni enamuna elempwale aya, vannooneya wira nihaana olokiherya enamuna naiwexexa ahu iversiikulu iyo. Vano nrowe noone itthu xexe sinniiriha opaka eyo.

5-6. Nikoho xeeni ninkhumelela vaavo ninthokorerya ahu yoolepa ya (a) Yoweli 2:20? (b) Yoweli 2:25?

⁵ Etthu yoopacerya, nkahaya moone ele Yehova aaleihenrye awe voohimya sa nasope owo oriki: “Kinomomola nasope okhumme onikela epheyo [oNorte]”. (Yow. 2:20) Nto eyo ennikumiherya nikoho nna: Akhala wira nasope onitaphulela Anamoona a Yehova, yaawo aniiwelela yooruma ya Yesu ya olaleerya ni waapaka awiixutti, xeeni Yehova aarowa awe oleiherya wira aarowa ‘omomolela’ ottaiwene? (Ezek. 33:7-9; Math. 28:19, 20) Tthiri vannooneya wira khahiyo wira Yehova oniwoomolela ottaiwene arumeyi awe oororomeleya, masi oniwoomolela ottaiwene atthu ale aahiiso etthu yaarowa waakumiherya mixankiho arumeyi awe.

⁶ Etthu ya nenli, nwehe ele Yehova onihimya awe yoolepa ya Yoweli 2:25. Owo onihimya so: “Miyo kinnohokoloxeryani sohepha sakhuriwe nnasope ni mipalaka n’iperere n’akaripe. Ti miyo kovelelinheni muttitthi uwo wa nasope”. Yoolepa ela ennikumiherya nikoho nikina: Akhala wira nasope anitaphulela Anamalaleerya, xeeni Yehova aarowa awe ‘wahokoloxerya’ mwaha wa muteko yaavanre aya? Eyo yaarowa wooniherya wira muhupi ninlaleya ahu onnikumiherya mixankiho sinceene. Masi muteko ahu woolaleerya onnikumiherya etthu yoovirikana ni eyo. Maana onniwoopola atthu, ni onniwiiriha atthu ootakhala murima ottharuwa itampi saya. (Ezek. 33:8, 19) Tthiri eyo enooniherya wira onnaaphwanyiha mireerelo ohiya mixankiho!

7. Moolumo oowi “mahiku awo [aahiiso nuumala-vo]” ari Yoweli 3:1, 2, antaphulela exeeni?

⁷ Mmusome Yoweli 3:1, 2. Vano nkahaya nwehe etthu ya neeraru, enamuna itthu sinikhumelela aya eprofesia ela. Moone wira Yehova onihimya wira: “Mahiku awo [nuumala-vo], kinimwamwarexela-tho eroho [ikuru saka]”, eyo piiyo, nuumala nasope omaliha muteko awe. Akhala wira nasope onithoonyerya anamalaleerya a Omwene wa Muluku, xeeni Yehova aarowa awe waamwarexela ikuru sawe sowaarya nuumala omaliha muteko woolaleerya? Musuweleke wira, okathi ninlaleerya ahu ninkhaliheriwa ni ikuru sowaarya sa Muluku. Vaakhanle wira ikuru sa Muluku khasinnikhaliherya, khinaarowa owerya olaleerya hata nilupatthiwaka aahiiso okhoottiheriwa ni guvernu.

8. Nasope oniromoliwa Wisupulula 9:1-11, onithoonyerya exeeni? (Nwehe elatarato ya ekaapa.)

⁸ Mmusome Wisupulula 9:1-11. Vano nrowe niwehe etthu ya neexexe. Khalai naahimya wira nasope onilavuliwa eprofesia ya Yoweli aathoonyerya muteko ahu woolaleerya, mwaha woowi eprofesia ela enlikana ni ele eniphwanyaneya eliivuru ya Wisupulula. Eprofesia eri Wisupulula ennimuhimya nasope yoowo minupi sawe saakhala ntoko owiitho wa mutthu ni “vamuru  vawe vahikhala ntoko ikhara sa wero”. (Wis. 9:7) Eriyari ya myeeri 5, myeeri seiyo isoope sinikhala aya ikumi, iyo saahiwiiriha itthu sotakhala “atthu yale pahi [awanani a Muluku] yahatthittiwe vayuji nlepa na Muluku”. (Wis. 9:4, 5) Tthiri eprofesia ela enikhala ntoko wira enaahimya arumeyi oothanliwa a Yehova. Moolipa murima, awo annilaleya wira Muluku onoophukela olumwenku ola wootakhala, nto eyo ennaanyoonya vanceene ale anikhaliherya olumwenku ola wootakhala.

9. Ovirikana xeeni okhanle eriyari ya nasope a eprofesia ya Yoweli ni nasope a Wisupulula?

⁹ Ekeekhai wira itthu sikina siri eprofesia ya Yoweli sinoolikana ni eprofesia ya Wisupulula. Hata vari siiso, sookhala itthu sivirikanne. Mwa ntakiheryo, eprofesia ya Yoweli, nasope onnikhuura itthu sotheene. (Yow. 1:4, 6, 7) Masi yowoonihiwa ya Yohani, nasope onnileeliwa wira “ahìrihé yotakhala malaxi, nnákhala sowima sikithi walá mwiri ti mwiri”. (Wis. 9:4) Nave nasope anwenhe awe Yoweli aakhuma oNorte. (Yow. 2:20) Masi nasope anwenhe awe Yohani, aakhuma mmwiixini aahiiso nlitti nowiixa. (Wis. 9:2, 3) Ohiya-vo, eprofesia ya Yoweli Yehova onnimoomola nasope. Masi eprofesia ya Wisupulula, Muluku onnimweemererya nasope omaliha muteko awe. Nave khiivo etthu enooniherya wira Yehova khaasiveliwa ni nasope a Wisupulula.—Nwehe ekaaxa eni: “ Iprofesia sa Nasope—Sinoolikana Masi ti Soovirikana”.

10. Nvahe ntakiheryo nnooniherya wira nasope a eliivuru ya Yoweli toovirikana ni nasope a Wisupulula.

 ¹⁰ Okhala wira iprofesia iya soopiili sookhala itthu sinceene soovirikana, vannooneya wira khahiyo sinihimya etthu emosaru. Nto niireke nasope a eprofesia ya Yoweli khahiyo nasope mmosaru a eprofesia ya Wisupulula? Aayo, khahiyo. Okathi mukina, Biibiliya onnirumeela itthu simosaru sithoonyeryaka itthu soovirikana. Yootaphulela aya enivarihana ni moota enilavuliwa aya. Mwa ntakiheryo, eliivuru ya Wisupulula 5:5, ennimuhimya Yesu okhala “kharamu a nloko na Yuda”. Masi 1 Pedru 5:8, onnimuhimya Diabo okhala “kharamu onòpa murukulu”. Moovarihana ni itthu sotheene niwenhe ahu, vannireerela ophwanya enamuna yooloka ya otthokiherya saana eprofesia ya Yoweli. Enamuna xeeni?

11. Yoweli 1:6 ni 2:1, 8, 11, onnikhaliherya sai omusuwela nasope onilavuliwa eprofesia ela?

¹¹ Vaavo nintokosa ahu oratteene eprofesia yotheene ya Yoweli, ninnoona wira enilavula sa otupheliwa ni anakhotto. (Yow. 1:6; 2:1, 8, 11) Tthiri Yehova aahimya wira aarowa orumeela muttitthi wa anakhotto (anakhotto a oBabilonia) wira yaahukhumu aIsarayeli oohiiwelela. (Yow. 2:25) Anakhotto ale ootupa yaahimmwa wira yaakhuma “onikela epheyo [oNorte]” mwaha woowi aBabilonia yaarowa opwetexa wIsarayeli mpantta wa oNorte. (Yow. 2:20) Nave anakhotto ale yaalikanyihiwa ni muttitthi wa nasope wowiiraana. Elavulaka voohimya sa nasope owo, eprofesia ya Yoweli enihimya so: “Khavo [nakhotto] onimukakha mukhw’awe: . . . Owo onnituphela mittetthe, atthyawaka vasulu va makokoro, onnimwarela vapuwani, onnikela ipa sothene, aviraka vajanelani, ntoko nawiye”. (Yow. 2:8, 9) Nkahaya mmananihe oweha etthu yiiraneyale. Anakhotto yaari khula opuro. Khiwaakhanle opuro nnakhala mmosa wira mutthu iipithe. Nave khuuvo mutthu oniwerya woopowa mmatatani mwa anakhotto!

12. Yiiraneyale sai eprofesia ya Yoweli voohimya sa nasope?

¹² Mwaakha wa 607 ohinatthi Kristu orwa, aBabilonia (aahiiso aKhaldeya) yaahituphela epooma ya oYerusalemu ntoko nasope. Biibiliya onihimya so: “Mwené òKhaldeya orowa watuphela. Mwené owo ahiwivakasa aximiravo aya . . . ahimònelaka othunku mutthu, nnákhala mmiravo nnákhala mwali, nnákhala mahumu walá atthu òwuluvala. Apwiya yahavahererya othene mmatatani mwawe. Numalá, yahipaha empa ya Muluku, yahipwanyula makokoro òYerusalemu, yahipaha ipa sothene sa mmuttettheni, khupwanyulasa itthu sorera sothene”. (2 Wah. 36:17, 19) Nuumala aBabilonia opwetexa itthu sotheene sa elapo ele, khula mpantta atthu yaaweha aya oYerusalemu yaahimmya wira: “Elapo ela yothuwa, khina atthu walá inama, evahereriwe mmatatani mw’anakhotto òBabilonia”.—Yer. 32:43.

13. Mutthokiherye etthu enitaphulela aya yoolepa ya Yeremiya 16:16, 18.

¹³ Nuuvira iyaakha 200 okhuma vaavale Yoweli aalempe awe eprofesia awe, Yehova aahimuruma Yeremiya ohimya vahinatthi etthu ekina voohimya sa otuphela wa aBabilonia. Owo aahimmye wira anakhotto yaamwaphavelasa oratteene aIsarayeli yaapaka itthu soohiloka wira yaavare. “Kinimwaruma awanani aya òwatta, anrowa wavara, ntoko anamatotha sinvaraya ihopa. Kinimwaruhela alipa-òxaya òwatta, anrowa walupattha mothakoni ni mmiyakoni, mpakha mmakhukuni mwa miyalá. . . . Kinopajerya wahukhumu mwaha wa sotakhala sulupale sìralyaya”. Khiivo etthu yaarowa waakhaliherya wiipitha aIsarayeli ale ootakhala, nnakhala iphareya wala itakhwa.—Yer. 16:16, 18.

14. Okathi xeeni yiiraneyale aya eprofesia ya Yoweli 3:1, 2?

¹⁴ Yoweli aahikhalana ihapari sooreera wira ohimmye. Owo aalavula sa ottikixeriwa. Maana elapo ele yaamutthikela okhala yoolya. (Yow. 2:23-26) Muhoolo mwaya, Yehova aamukumiherya yoolya yinceene ya omunepani. Yehova aahimmye so: “Mahiku òkiserya, miyo kinimwamwarexela eroho aka atthu othene. An’inyu axilopwana n’an’inyu axithiyana anolavula ni nsina naka. . . . Mahiku awo, kinimwamwarexela-tho eroho aka arumeyi aka othene, alopwana n’athiyana”. (Yow. 3:1, 2) Masi eyo khiyiiraneyale moohipisa nuumala aIsarayeli okhuma oBabilonia arowaka elapo aya, maana yiiraneyale iseekulu sinceene muhoolo mwaya mwaakha wa 33 nuumala Kristu orwa. Ninsuwela sai eyo?

15. Moovarihana ni Miteko 2:16, 17, marukunuxo xeeni murummwa Pedru aapanke awe ni eprofesia ya Yoweli 3:1, 2, nto eyo enooniherya exeeni?

¹⁵ Nihiku nne na Pentekoositi a 33 nuumala Kristu orwa, ewoora yeettaka 9, yaahikhumelela etthu yootikiniha. Muluku aahaamwaraxela ikuru sawe sowaarya awiixutti yaathukumanne mwa enamuna yootikiniha, nto yaahipacerya olavula “miteko sulupale sa Muluku”. (Mit. 2:11) Murummwa Pedru aahuupuxeriwa olikanyiha yowiiraneya ele ya nihiku na Pentekoositi ni eprofesia ya Yoweli 3:1, 2. Masi, okathi uupuxeriwe awe olepa eyo, murummwa Pedru aahipaka marukunuxo vakhaani a eprofesia ya Yoweli. Niireke munniwerya woona marukunuxo awo? (Musome Miteko 2:16, 17.) Ohiya opacerya ni moolumo oowi nuumala-vo, murummwa Pedru aahimmye wira “mahiku òkiserya”, eyo piiyo, mahiku ookiserya a makhalelo a aYuda. Mahiku awo ookiserya, ikuru sowaarya sa Muluku saarowa omwarexeliwa “atthu othene”. Eyo enooniherya wira waahivira okathi eprofesia ya Yoweli ehiiraneyale.

16. Eseekulu yoopacerya, etthu xeeni ikuru sowaarya sa Muluku saakumihenrye aya ni muteko woolaleerya, ni sinipaka exeeni olelo-va?

 ¹⁶ Nuumala Muluku waamwarexela ikuru sawe sowaarya maKristau a eseekulu yoopacerya, awo yaahipaceriha muteko woolaleerya waarowa omwareela olumwenku wotheene. Tivonto, okathi murummwa Paulo aalepenle awe ewarakha aKolosi, mwaakha 61 nuumala Kristu orwa, owo aahimmye wira ihapari sooreera aahilaleeriwa “khula mutthu vathí-va”. (aKol. 1:23) Vaavo Paulo aahimmye awe wira ihapari sooreera aahilaleeriwa “khula mutthu vathí-va”, owo aahimya ilapo aalaleeryale awe. Nikhaliheriwaka ni ikuru sowaarya sa Muluku, olelo-va ihapari sooreera sinnilaleiwa ilapo sinceene “mpakha wokiseryani w’elapo”.—Mit. 13:47; nwehe ekaaxa eni: “ Kinimwamwarexela Eroho Aka”.

17. Marukunuxo xeeni akhumelenle voohimya sa wiiwexexa wahu eprofesia ya Yoweli 2:7-9?

¹⁷ Etthu xeeni eturukeyale? Vano ninniiwexexa mwa enamuna yooloka yootaphulela ya eprofesia ya Yoweli 2:7-9. Olavula mookwasa, iversiikulu iya khasinihimya muteko ahu woolaleerya, masi sinihimya ele yaapanke aya anakhotto a oBabilonia okathi yaatuphenle aya elapo ya oYerusalemu mwaakha wa 607 nuumala Kristu orwa.

18. Exeeni ehiturukeyale ni atthu a Yehova?

¹⁸ Exeeni ehiturukeyale? Atthu a Yehova nlelo annilaleya ihapari sooreera khula opuro arumeelaka inamuna soovirikana. (Math. 24:14) Hata nikhoottiheriwaka ni guvernu, khaninhiya ovara muteko woolaleerya nirummwale ahu. Nave nireelihiwaka ni Yehova, ninnitepa oluttuweliwa ovara muteko ahu woolaleya ihapari sooreera sa Omwene moolipa murima ovikana khalai! Moowiiyeviha, khaninhiya omuroromela Yehova wira onoonikhaliherya wiiwexexa iprofesia sa mBiibiliyani ni okathi wooreerela onoonisuweliha ‘ekekhai yothene’!—Yoh. 16:13.