EMHUOGHAẠPH ITUUGHẠ PHỌ 17
“Mị Kighol Ghụn Inyina Mọ Arighirị”
“Mị kighol ghụn inyina mọ arighirị Ioor esi dị oomo phọ ipẹ mị anaghạn bọ esi Odẹ phọ mị miḅenị ni inyina.”—JỌN 15:15.
AḌUỌR PHỌ 13 Christ, Our Model
OGHAẠPH OOKARAGH *
1. Ika kụ idị nạ katue aḍigh righirị dị ekpạr r’oye?
EḄẸL edạ dị rogbatạn ghan oḍigh arighirị dị ekpạr pọ ogbor ghan olhọgh amem orolạn r’ophoriphọ oye phọ. Iduọn nyinha regbor bọ keghaaphạn, oniin kanhaghạn aani ḍiitughiạn oniin r’idị imiteghunhaan inyinha, bịn nyinha meḍigh righirị. Toroboiperolbọ, eḍighi ni ipaanhaạn oḍigh arighirị r’aZizọs, Ighẹn kụ iniin ipaanhaạn phọ iphẹn phọ?
2. Eeghe kụ iḅẹl ipaanhaạn phọ yira osoman bọ?
2 Eḅẹl phọ, yira ko”mhiịn ghan Zizọs r’aloor. Ibadị aKristẹn oḅẹl okuron asiạ phọ usoman aani ni iniin phọ ipaanhaạn phọ. Ghalhamọ r’iduọn phọ ni, otelhedom mọ aPita aḅẹm ni mọ: “Nyina nyodị k”emiịn ghan ni kụ nyina epomoghiạn ni nyodị. Nyina nyodị nyiidiphọ re/miịn ni, kụ nyina emeeraam bọ ni nyodị.” (1 Pit. 1:8) Kụ iḍighi kụ, edugh ni dị yira kotue oḍigh righirị r’aZizọs ghalhamọ yira k”omhiịn ghan ni nyodị.
3. Eeghe kụ omhunhenhiom iyạl ipaanhaạn phọ yira osoman bọ?
3 Omhunhenhiom iyạl, yira ko/tue oḅaanhaạn nyodị. Mem dị yira rooḅereghị, yira roḅenhị ghan aZihova iiḅaghamhị ayira. Ii, yira roḅẹm ghan ni mem dị yira rooḅereghị mọ esi aḍien phọ aZizọs, kuolọ yira ro/ḅaanhaạn ghan Zizọs onyen. Ogbạ agey, aZizọs kẹn bịn o/wạ mọ ooḅereghị oḅenhị nyodị. Eeghe kụ iḍighi? Loor esi idị iiḅereghị eḍighi pakirị iiseeny phọ ayira, kụ ogina aZihova bịn kụ akpẹ okpuḍian ongọ iiseeny. (Mat. 4:10) Ghalhamọ r’iduọn phọ ni, yira kotue ni oḍeenhaan mọ yira opomhoghiạn ni Zizọs.
4. Eeghe kụ omhunhenhiom iraạr ipaanhaạn phọ, kụ yira kooḅeghiọn eeghe siẹn emhuoghaạph phọ ephẹn phọ?
4 Omhunhenhiom iraạr, aZizọs odi ghan k’akẹ, loor esi iduọn phọ yira ko/tue omoọgh mem orolhạn r’odị. Kuolọ yira kotue ni olegheri ilọ aZizọs ghalhamọ r’iduọn odị u/lo bọ r’ayira eye. Kụ iḍighi kụ, yira kooḅeghiọn inya araraạr dị yira kotue oḍighi kụ okparamhị siya arighirị phọ ayira r’odị. Uguạ, ophụr ooḅeghiọn iyaạr phọ eḍighi bọ kụ emhạn bọ ni maạr dị yira koḍigh righirị r’aZizọs Kraist.
EEGHE KỤ IḌIGHI KỤ EWẠ BỌ NI DỊ YIRA KOḌIGH RIGHIRỊ R’AZIZỌS?
5. Eeghe kụ iḍighi kụ ewạ bọ ni mọ oḍigh righirị r’aZizọs? (Miịn kẹn igbe phọ “Oḍigh Arighirị r’AZizọs Retorori Ghan Kengọ Oḍigh Arighirị r’AZihova” r’igbe phọ “Omhoọgh Ephoghom Dị Eeleeny Ilọ aZizọs.”)
5 Yira omoọgh oḍighi oyaghirị aZizọs eḍighi maạr dị yira rowạ omhoọgh imạ asiya r’aZihova. Eeghe kụ iḍighi? Ooḅeghiọn iyạl ariphigh. Eḅẹl phọ, aZizọs aḅenhị bumatuạn phọ odị mọ: “Odẹ phọ r’aIoor odị iphomoghiạn ni inyina. Idị eḍighi bọ nyina iphomoghiạn ni imị.” (Jọn 16:27) Odị aḅẹm kẹn mọ: “Oye dị kateẹny Odẹ phọ amị o/lo, omuton oḍuạ esi amị kụ oghị oteẹny odị.” (Jọn 14:6) Oye dị rakparaghạ oḍigh arighirị r’aZihova dị u/pụr umoọgh igey asiya r’aZizọs akịgh idiphọ oye dị rakparaghạ ghan oḍigh otu kụ uu/go okạr onhụ aḍibuo phọ. AZizọs aḍighinhom ni oghaạph omaaniọm dị arọl iduọn phọ mem dị aghaạph ilọ odị idiphọ “onhụ aḍibuo oghoony iyooI igạ phọ.” (Jọn 10:7) Omhunhenhiom iyạl ephigh phọ pọ, aZizọs aaghironhaan oomo araagharạ odẹ phọ odị. Odị aḅenhị bumatuạn phọ odị mọ: “Olọ mumiịn imị mamiịn ni Odẹ phọ.” (Jọn 14:9) Kụ iḍighi kụ, ekpanhạ eten dị yira kotue olegheri aZihova pọ otuughạ ilọ adọl aghuḍum mọ aZizọs. Iduọn yira rotuughạ bọ ilọ aZizọs, ephomhoghiạn phọ yira omhoọgh bọ oghị esi odị kebụgh ghan bịn. Kụ idiphọ arighirị phọ ayira r’aZizọs rekpạr bọ, kụ idị ephomhoghiạn phọ yira omhoọgh bọ oghị esi Odẹ phọ kebụgh aani.
6. Eeghe kụ enhọn ephigh phọ ekpẹ bọ dị yira kotuạn oḍigh righirị r’aZizọs? Gbạ.
6 Ewạ dị yira koḍighi righirị aZizọs pidị Enhaạn epagharanhaạn ghan iiḅereghị phọ ayira. Iphẹn phọ epelhom oḅẹm ghan mọ “esi aḍien phọ aZizọs” siphẹ iiḅereghị phọ ayira bịn. Ewạ dị yira kolegheri ipẹ aZihova rasighẹ ghan bọ Zizọs kaphagharanhaạn iiḅereghị phọ ayira. AZizọs aḅenhị butelhedom mọ odị mọ: “Torobọ iyaạr dị nyina eghoI ḍien amị kụ epuru Odẹ phọ, mị kaḍighi ni.” (Jọn 14:13) Ghalhamọ r’iduọn aZihova kụ ranaghạn ghan bọ kaḅilhẹ aphagharanhaạn iiḅereghị ayira, odị mangọ Zizọs iikpọ oḍighi ghan ipẹ Odị maghaạph bọ. (Mat. 28:18) Esi iduọn phọ, tutụ Enhaạn kenaghạn iiḅereghị ayira, odị rapụr ghan kaphogh mughumọ yira modaphạn ni oroma phọ aZizọs. Esi omaạm, aZizọs aḅẹm mọ: “Eḍighi iyaạr dị nyina rebilenaạn ghan bunọn awe lọ iḍighi inyina ikarạph, pọ Odẹ phọ anyina odi bọ k’akẹ phọ kasạr ikarạph iwiIenaạn inyina; Kụ nyina i/bilenaạn ghan bunọn awe lọ iḍighi inyina ikarạph, pọ Odẹ phọ anyina ka/sạr ikarạph iwilenaạn inyina.” (Mat. 6:14, 15) P’eeghe idị emhạn maạr dị yira kozoọm ghan bunhọn eten phọ epẹ aZihova r’aZizọs ruzoọm ghan bọ iyira!
7. Abuọ anhiạn kụ komooghọm suọ ekiạ etagharạn phọ aZizọs?
7 Abuphẹ oḍighi bọ bugey arighirị aZizọs bịn kụ kotue omooghọm suọ ekiạ etagharạn phọ. Yira ulhegheri ika? AZizọs aḅẹm mọ odị “aghoI righirị odị bịn [kụ] aphiemi [bọ] ghuḍum odị.” (Jọn 15:13) Abuphẹ okpẹ bọ oḍuom olhoghi phọ orọl bọ mem mọ aZizọs ko/ru bọ siẹn ade phọ, utuughạ ni ilọ odị oḅilhẹ ophomhoghiạn nyodị. Koḅerion ni we idiphọ abuọ Ebraham, Sera, Mozis, ḅilhẹ r’aRehab, kuolọ ghalhamọ abuọ elhiom eḍighinhom iyaạr phọ abuẹn phọ bịn kemoghi ni oḍigh arighirị r’aZizọs kụ ogbi omhoọgh aghuḍum k’agee-pọ.—Jọn 17:3; Iiḍighi 24:15; Hib. 11:8-12, 24-26, 31.
8-9. Odaphạn Jọn 15:4, 5, asiya phọ ayira r’aZizọs kinyu iyira oḍighi eeghe, kụ eeghe kụ iḍighi kụ emhạn bọ ni maạr oḅạr aZizọs?
8 Yira omoọgh ni ibo okumuan aani r’aZizọs oghaạph oḅilhẹ otughemhị awe iiḅi iinhaghạn Omhạr phọ. Mem mọ aZizọs arọl bọ siẹn ade phọ, odị aḍighi ni otughemhiạ. Kụ k’amem mọ aḅulha bọ epẹ k’akẹ phọ, idiphọ uw-emhụ ookpomhoghan aKristẹn phọ, akiọm ni ghisigh raaḅakị oḍighi iphelhegbeel phọ. Odị ramiịn ni ḅilhẹ amaghamhị ni maạr ikuph phọ nạ alhọgh bọ, oḍighi idị awe kotu olegheri aani nyodị r’Odẹ phọ odị. Okạr agey, yira ko/tue oḍighi oḍighi phọ ophọn phọ dị aZihova r’aZizọs kụ iyira u/bakị.—Bạl Jọn 15:4, 5.
9 Dị eegholhaan ni, Ekpo onhụ phọ Enhaạn etughemhị mọ amem dị yira ophomhoghiạn kụ oḅilhẹ ophamhanhạm ephomhoghiạn phọ ayira esi aZizọs kụ edị yira kotue oḅeraạn aZihova. Uguạ ooḅeghiọn inya araraạr dị yira koḍighi kụ oḍigh righirị r’aZizọs.
IKA KỤ IDỊ NẠ KATUE AḌIGH RIGHIRỊ R’AZIZỌS?
Nạ katue ni aḍighi oyaghirị aZizọs esi (1) okuamhị olhegheri aZizọs, (2) otuughaạny aani eten phọ epẹ aZizọs raatughiạn ghan bọ kaḅilhẹ azọ, (3) obakị aani abumor phọ aKraist, ḅilhẹ (4) r’obakị aani ghan iikolhobian oḍighom mọ aZihova (Miịn siikpịgh phọ 10-14) *
10. Eghẹn kụ eḅẹl edạ dị yira kogbatạn orue oḍigh arighirị r’aZizọs?
10 (1) Kuamhị alhegheri Zizọs. Yira kotue olegheri Zizọs esi aạl ghan arinyạ phọ aMatiu, Mạk, Luk r’aJọn. Idiphọ yira rogbirima bọ rinyạ phọ iphẹn eghaạph bọ ilọ adọl aghuḍum mọ aZizọs, yira kopomoghiạn kụ oḅilhẹ olọgh eegu Zizọs loor eyoghoyoghọ eten phọ epẹ odị azoọm ghan bọ we. Esi omaạm, ghalhamọ r’iduọn odị kụ aḍighi bọ ni Odẹ otu phọ, odị o/zoọm ghan bumatuạn phọ odị mudị arebenhẹ. Kparipẹ ghụn, odị aghaạph ghan ni iitughiạn phọ odị ḅilhẹ r’ipẹ odị alhoghoma ghan bọ aḅenhị bidị. (Jọn 15:15) Olhoghi abidị kụ o/ḅaạl pọ olhoghi aZizọs ra/ḅaạl aani. (Jọn 11:32-36) Ghalhamọ r’abuphẹ ogbagharạn ghan bọ nyodị bịn ulhọgh ni elhegh mọ odị aḍighi ni oyaghirị oomo abuphẹ omhegheron bọ oghị esi adom mọ odị. (Mat. 11:19) Yira otuughaạny aani eten phọ epẹ aZizọs azoọm ghan bọ bumatuạn phọ odị, pọ yira komoọgh igey asiya r’abunhọn, yira omoọgh ogbaanyạn r’oḅaạl olhoghi, ḅilhẹ yira okuamhị osereghiạn Kraist.
11. Eghẹn kụ emhunhenhiom iyạl edạ dị yira kogbatạn orue oḍigh arighirị r’aZizọs, kụ eeghe kụ iḍighi kụ emhạn bọ ni maạr?
11 (2) Tuughaạny aani eten phọ epẹ aZizọs aatughiạn ghan bọ aḅilhẹ azọ. Mem dị yira olhegheri kụ oḅilhẹ otuughaạny ghan eten iitughiạn phọ odị, pọ kụ amem dị arighirị phọ ayira r’odị kegbiạn. (1 Kọr. 2:16) Ika kụ idị yira kotue otuughaạny Zizọs? Omhiịn eniin eḍeenhaan. AZizọs atughemhị ghan olhoghonhaạn aḍighaạgh bunhọn kụ apuemhi otughemhị ilọ odị. (Mat. 20:28; Rom. 15:1-3) Iphẹn phọ ilhoghonhaạn nyodị ḍighaạgh omhoọgh eegharạ osighẹ aloor ophighironọm ekiạ ḅilhẹ r’osạr ghan owilhenhaạn. Idị awe oghaạph ilọ odị, i/nuụn ghan i/pin esi odị. (Jọn 1:46, 47) Ḅilhẹ odị o/mheera ghan opiomạn dị oye apiomạn mem dị meten etir eten phọ epẹ odị kazoọm bọ oye phọ. (1 Tim. 1:12-14) AZizọs aḅẹm mọ: “Oniin aphomoghiạn ghan nyoniin—kụ oomo awe olegheriom mọ nyina kụ abumatuạn phọ amị ni.” (Jọn 13:35) Enighenị opuruan aloor mọ, “Mị radaphạn ni eḍeenhaan phọ aZizọs, esi oḍighi ghan oomo ilọ mị katue ophamanhạm eephọ r’abumor r’abumarani phọ amhị ḍughụm?”
12. Eghẹn kụ emhunhenhiom iraạr edạ dị yira kogbatạn orue oḍigh arighirị r’aZizọs, kụ ika kụ idị yira kotue bọ oḍighi iduọn phọ?
12 (3) Bakị aani bumor phọ aKraist. AZizọs asighẹ torobọ iyaạr lọ yira oḍighi ongọ buphẹ osagharạn bọ idiphọ iyaạr dị oḍighi ongọ nyodị. (Mat. 25:34-40) Ekpanạ eten dị yira kobakị buphẹ osagharạn bọ pọ ophinhom aani abin dị amhunhughan oḍighi iphelhegbeel phọ r’oḍighi awe bumatuạn. (Mat. 28:19, 20; Iiḍighi 10:42) Amem dị “[abueriphọ] iyool” phọ olhoghonhaạn ḍighaạgh, kụ edị abumor phọ aKraist kotue omuneni ogbogh oḍighi phọ ophọn phọ rakị bọ ni ghisigh nyiidiphọ. (Jọn 10:16) Nạ aḍighi aani oniin siphẹ aḍieriphọ iyool phọ, pọ torobọ amem lọ nạ amite aani epẹ erugh phọ, nạ raḍeenhaan ghan ephomhoghiạn buẹn osagharạn bọ r’aZizọs.
13. Ika kụ idị yira kotue odaphạn oroma phọ aZizọs ogẹ bọ siphẹ Luk 16:9?
13 Yira oḅilhẹ kẹn roḍighi ghan righirị aZihova r’aZizọs esi osogh aani ghan asipenị dị kobakiọm oḍighi phọ bidị rooḅakị bọ. (Bạl Luk 16:9.) Esi omaạm, yira rosogh ghan kongọ oḍighi oomo isiẹn aḅirinhi phọ, ipẹ rosighẹ ghan bọ kobakiọm oghaạph iiḅi iinhaghạn phọ rikpisi dị ekelhọgh, kolhoghoḍiọm oḅilhẹ oselemiom ruutu iiseeny, ḅilhẹ r’oghoom araraạr oghị ongooghị awe dị ekperenhom iyaạr emitenaan. Yira oḅilhẹ rosogh ghan sipenị olhoghonhaạn aḍighaạgh maliom ookpomhoghan phọ ayira ḅilhẹ r’olhoghonhaạn aḍighaạgh bulọ ekuom. (Prov. 19:17) Iphẹn phọ kụ areten dị yira kobakị aani bumor phọ aKraist.
14. Odaphạn Efesọs 4:15, 16, eghẹn kụ omhunhenhiom inya edạ dị yira kogbatạn orue oḍigh arighirị r’aZizọs?
14 (4) Bakị aani iikolhobian oḍighom mọ aZihova. Asiya arighirị phọ ayira r’aZizọs uw-emhụ ookpomhoghan phọ kelegheri kụ ekpạr mem dị yira odaphạn iiḅakiọm abuphẹ omạ bọ ophogh ayira. (Bạl Efesọs 4:15, 16.) Esi omaạm, ookpomhoghan phọ rowạ ni mọ omhaạr oḍighinhom siKindọm Họl phọ ayira. Esi iduọn phọ, mosighẹ iniin arookpomhoghan oḅophoghiọm inhọn, oḅilhẹ ooḅenhion ruukụ arokool phọ rokaạph ghan bọ iiḅi iinhaghạn phọ. Iikolhobian phọ iphẹn phọ meḍighi iyaạr dị ookpomhoghan phọ romaạr koḍighinhom iisogh phọ. Toroboiperolbọ, rewạ ghan ni mọ buniin abukaaphọm ooḅenion sidọl abidị. Eeni abukaaphọm mọ abuẹn phọ morọl li ibadị asiạ iniin arookpomhoghan, ooḍikuan bumor r’abumarani phọ epẹ phọ. Kụ oḅenhị bọ m’oghị onhọn ookpomhoghan. Reḅeraạn ghan ni Zizọs omhiịn dị abumor phọ abuphẹ phọ osooromi loor bịn odaphạn iikolhobian phọ.
ARIGHIRỊ AZIZỌS BỊN K’AGEE-PỌ
15. Ika kụ idị arighirị phọ ayira r’aZizọs kekpạr bọ epẹ ghisigh?
15 Buphẹ osagharạn bọ uwaloor iigbia phọ omoọgh oḍuomolhoghi orọl r’aZizọs bịn k’agee-pọ, kụ otooghị r’odị siphẹ Omhạr phọ k’Enhaạn. Bidị kokạr otọl r’aKraist—omiịn nyodị, okaaphạn nyodị, otọl ghan r’odị oomo amem. (Jọn 14:2, 3) Buẹn omhoọgh bọ oḍuomolhoghi orọl isiẹn ade phọ kokạr kụ olhoghoma ephomhoghiạn phọ aZizọs ḅilhẹ r’ozuumaam mọ odị. Ghalhamọ r’iduọn bidị ko/miịn bọ ni Zizọs, arighirị phọ abidị r’aKraist kekpạr agey, kụ bidị okelọm ghan ghuḍum mọ aZihova r’aZizọs konmoom bọ bidị.—Isa. 9:6, 7.
16. Ighẹn kụ aḍisẹph kirokirọ dị yira komoọgh esi arighirị phọ ayira r’aZizọs?
16 Mem dị yira omheera oḍigh arighirị r’aZizọs, yira komoọgh ni ḍisẹph kirokirọ. Esi omaạm, yira rokelọm ni ephomhoghiạn phọ r’olhoghonhaạn aḍighaạgh phọ odị nyiidiphọ. Yira oḅilhẹ omoọgh eepoogh orọl k’agee-pọ. Edị emhạn maạr epelhom, pọ arighirị phọ ayira r’aZizọs kingọ iyira ephua dị enhighẹ epelhom—omhoọgh asiya dị ekpạr r’Odẹ phọ aZizọs, Zihova. P’eeghe eepoogh dị yira omhoọgh dị kumhạgh aani iyira mọ arighirị aZizọs!
AḌUỌR PHỌ 17 “I Want To”
^ par. 5 Abutelhedom mọ ughaaphạn oḅilhẹ okumuan ghan r’aZizọs esi ibadị asiạ, kụ oḍighi bugey arighirị odị. AZizọs rawạ mọ yira oḍighi aani righirị odị, kuolọ yira osoman ni ipaanhaạn dị abutelhedom mọ u/soman aani. Kụ iḍighi kụ yira kooḅeghiọn siẹn emhuoghaạph phọ ephẹn phọ, iniin ipaanhaạn phọ iphẹn phọ oḅilhẹ omiịn idị yira kotue oḍigh righirị oḅilhẹ opamanạm siya arighirị phọ ayira r’aZizọs.
^ par. 55 ILỌ AFOTO: (1) Mem iiseeny eghunotu, yira kotue ni otuughạ ilọ adọl aghuḍum mọ r’arukumuan phọ aZizọs. (2) Yira kotue ni owạ eephọ okị esi abumor phọ ayira siphẹ ookpomhoghan phọ. (3) Obakị aani bumor phọ aKraist, esi ophinhom aani abin dị emhanhạm rukumuan epẹ erugh phọ. (4) Mem dị oḅophoghị rookpomhoghan, yira odaphạn iiḅakiọm ikumor awe phọ.
