1. Lé wotɔnɔ exlɔ nyinyi koɖo mɛɖe doɔ?

GBƆXWE ànyi exlɔ bakpomadɔn koɖo mɛɖeɔ, èɖo anɔnɔ ju koɖi. Nɔ mínunɔ míwo susuwo koɖo seselelanmɛwo nɔ míwonɔnɔwoɔ, míanyi exlɔ. Vɔ hweɖewonuɔ, dele fafɛɖe mɔ mìanyi xlɔ adodwi koɖo Yesu o. Nyi yí taɖoɔ?

2. Cukaɖa ŋkɔtɔ ci yí atɛnŋ ana exlɔnyinyi koɖo Yesu agbɔnnuɔ?

² Cukaɖa ŋkɔtɔ yí nyi mɔ, mìdekpɔ Yesu le fiɖe kpɔ o. Exwe sanŋdi ŋkɔtɔ mɛ Kristotɔ sugbɔtɔ dekpɔ Yesu kpɔ o. Ele ahan gan, apotru Piɛ nu mɔ: “Mí de kpɔ Kristo o, vɔ, mí lwin. Mí de kpɔɛ kakayɛ o, vɔ mí xɔɛ ji se.” (1 Piɛ 1:8) Eyi taɖo nɔ mìdekpɔ Yesu kpɔ can ɔ, mìatɛnŋ anyi yi xlɔ adodwiwo.

3. Cukaɖa amɛvetɔ ci yí atɛnŋ ana exlɔnyinyi koɖo Yesu agbɔnnuɔ?

³ Cukaɖa amɛvetɔ yí nyi mɔ, mìdatɛnŋ axo nuxu nɔ Yesu o. Yehowa yí mìxonɔ nuxu nɔ le gbedodoɖa mɛ. Le nyɔnɔnwi mɛɔ, mìdonɔ gbe ɖaɖa le Yesu ŋkɔ mɛ, vɔ denyi eyi mìxonɔ nuxu nɔ o. Can hɛnnɛ, Yesu ŋtɔ deji mɔ mìwo le do gbe ɖaɖa nɔ ye o. Nyi yí taɖoɔ? Ðo gbedodoɖa nyi akpaxwe ɖe nɔ mìwo sɛnsɛn yí Yehowa ɖekɛ yí mìɖo asɛn. (Mt. 4:10) Ele ahan gan, mìɖo adasɛ nɔ Yesu mɔ mìluin.

4. Cukaɖa amɛtɔntɔ ci yí atɛnŋ ana exlɔnyinyi koɖo Yesu agbɔnnuɔ, yí nyi mɛ mìagbeje le nyɔta cɛ mɛɔ?

 ⁴ Cukaɖa amɛtɔntɔ yí nyi mɔ, Yesu le jeŋkwimɛ, eyi taɖo mìdatɛnŋ anɔ ju koɖi o. Vɔ mìatɛnŋ anya enu sugbɔ so Yesu nu, nɔ mìdele ju koɖi can. Mìakpɔ enu amɛnɛ ciwo mìawa yí asɔ do ŋsɛn ekacaca ci yí le mìwo koɖo Yesu gblamɛ. Vɔ doŋkɔɔ, mìaxo nuxu so enu ci yí taɖo ele veviɖe mɔ, mìanyi exlɔ bakpomadɔnwo koɖo Kristo.

5. Nyi yí taɖo mìɖo anyi exlɔ koɖo Yesuɔ? (Kpɔ dakavi ciwo yí nyi “ Exlɔnyinyi koɖo Yesu na wonyinɔ Yehowa xlɔ” koɖo “ Susu nywi ɖoɖo do akpaxwe ci Yesu wakɔ nu.”)

⁵ Mìɖo anyi xlɔ koɖo Yesu nɔ mìji mɔ, mìanyi xlɔ koɖo Yehowa. Nyi yí taɖoɔ? Mìakpɔ susu amɛve kpaŋ. Ŋkɔtɔɔ, Yesu nu nɔ yi nukplaviwo mɔ: “Eda ŋtɔ lɔn mí, ɖo mí lɔn Ŋ.” (Ӡan 16:27) Égbenu mɔ: “Amɛ ɖe da yì Eda gbɔ yí ma toto Ŋ ji o.” (Ӡan 14:6) Nɔ mɛɖe mɔ yeatekpɔ anyi exlɔ koɖo Yehowa yí denyi exlɔ koɖo Yesuɔ, ele shigbe mɔ éjikɔ aɖo axwe ɖe mɛ, ehɔn mahun hannɛ. Yesu can zan kpɔwɛ cɛ han, ci eyɔ yiɖeki mɔ yenyi “emɔnu nɔ lɛngbɔwo.” (Ӡan 10:7) Susu amɛvetɔ yí nyi mɔ, Yesu sran Dalɔ nɔnɔmɛwo pɛpɛpɛ. Énu nɔ yi nukplaviwo mɔ: “Amɛ ci yí kpɔ Ŋ ɔ, é kpɔ Eda.” (Ӡan 14:9) Eyi taɖo enuvevitɔ ci mìawa yí ajeshi Yehowa ɖɛ yí nyi mɔ, mìakpla nu so Yesu gbenɔnɔ nu. Nɔ mìkpla nu so Yesu nu nywiɖeɔ, mìavaluin doji. Yí nɔ ekacaca ci yí le mìwo koɖo Yesu gblamɛ sɛnŋ ɔ, mìavanyi exlɔ bakpomadɔnwo koɖo Edalɔ.

6. Susu bu ci yí taɖo ele veviɖe mɔ, mìanyi exlɔ koɖo Yesuɔ? Ðe mɛ.

 ⁶ Mìɖo anyi exlɔ koɖo Yesu gbɔxwe woaɖo mìwo gbedodoɖawo ŋci. Ecɛ dasɛ mɔ mìdanunɔ le vɔvɔnu nɔ mìwo gbedodoɖawo mɔ, “to Yesu ŋkɔ mɛ” kpoŋ o, vɔ mìawa nu wu ahan. Mìɖo anya lé Yehowa zannɔ Yesu do yí sɔ ɖonɔ mìwo gbedodoɖawo ŋci. Yesu nu nɔ apotruwo mɔ: “Na wa enuwo pleŋ ciwo yí mí a byɔ le Anyi ŋkɔ mɛ.” (Ӡan 14:13) Ci enyi mɔ Yehowa yí senɔ mìwo gbedodoɖawo yí ɖonɔ wo ŋci can ɔ, éna acɛ Yesu nɔ awa do Mawu gbetasɔsɔwo ji. (Mt. 28:18) Eyi taɖo gbɔxwe Mawu aɖo mìwo gbedodoɖawo ŋciɔ, ékpɔnɔ mɔ mìwa do enu ci Yesu kpla mì ji ma. Le kpɔwɛ mɛ, Yesu nu mɔ: “Nɔ́ mí sɔ agɔjejewo sɔ ke amɛwo ɔ, míwo Da ci yí le jeŋkwi mɛ can a sɔ ke míwo hɛnnɛ. Ganke nɔ́ mí de sɔ agɔjejewo ke amɛwo ɔ, kpɔ míwo Da da sɔ agɔjeje míwotɔwo sɔ ke mí o.” (Mt. 6:14, 15) Edasɛ mɔ ele veviɖe mɔ, mìawanɔ nu do amɛwo nu shigbe lé Yehowa koɖo Yesu wanɔ nu do mì nu nɛ!

7. Miwo yí akpɔ nyɔna so Yesu tafɛn vɔnsa lɔ mɛɔ?

⁷ Mɛ ciwo yí nyi Yesu xlɔwo ɖekɛ yí akpɔ nyɔna so tafɛn vɔnsa ci ewa mɛ. Lé mìwɛ yí nyaɔ? Ðo Yesu nu mɔ yeasɔ ‘yeŋtɔ gbe sɔ na dota nɔ ye xlɔwo.’ (Ӡan 15:13) Mɛɖewo sɛn Yehowa le egbejinɔnɔ mɛ gbɔxwe Yesu va nyigban ji. Eɖewo yí nyi Abraxamu, Sara, Moizi koɖo Raxabu. Nɔ wofɔn wo so kuɔ, woɖo akpla nu so Yesu nu keŋ aluin gbɔxwe anɔ agbe tɛgbɛɛ.​—Ӡan 17:3; Edɔ. 24:15; Ebre. 11:8-12, 24-26, 31.

8-9. Shigbe lé Ӡan 15:4, 5 nui nɛ ɖe, nyi mìɖo awa gbɔxwe anyi Yesu xlɔɔ, yí nyi yí taɖo ele veviɖeɔ?

⁸ Enyi jijɔ nɔ mì mɔ mìawa dɔ koɖo Yesu le Fyɔɖuxu ŋɛnywidradra koɖo enukplakpladɔ lɔ mɛ. Hwenu Yesu le nyigban jiɔ, ényi enukplamɛtɔ. Yesu yí nyi eta nɔ hamɛ lɔ, eyi taɖo ci etrɔ yi jeŋkwimɛɔ, ékpɔtɔ kpɔkɔ kunuɖeɖe koɖo enukplakpladɔ lɔ ji. Ci ekpɔkɔ agbla ciwo èjekɔ keŋ akpedo amɛwo nu nɔ woajeshi yɛ koɖo Dalɔɔ, ejenɔŋ ni sugbɔ. Le nyɔnɔnwi mɛɔ, nɔ Yehowa koɖo Yesu dekpedo mì nu le edɔ cɛ mɛɔ, mìdatɛnŋ awɛ o.​—Hlɛn Ӡan 15:4, 5.

⁹ Mawu Nyɔ lɔ dasɛ nɔ mì petii mɔ, mìɖo akpɔtɔ alɔn Yesu gbɔxwe mìwo nu ajɔ ji nɔ Yehowa. Eyi taɖo mìakpɔ enu amɛnɛ ciwo mìatɛnŋ awa keŋ anyi Yesu xlɔwo.

10. Enu ŋkɔtɔ ci mìɖo awa yí anyi Yesu xlɔɔ?

¹⁰ (1) Tekpɔ ajeshi Yesu ɖɛ. Nɔ mìhlɛnnɔ Bibla wema ciwo yí nyi Matie, Maki, Luiki koɖo Ӡan ɔ, atɛnŋ ana mìajeshi ɖɛ. Le Bibla mɛɔ, mìakpɔ exolɔlɔ ciwo yí dasɛ lé Yesu wa nu do amɛwo nu nywiɖe do. Tamɛbubukpɔ so exolɔlɔ cɛwo nu akpedo mì nu mìalɔn Yesu yí abui. Le kpɔwɛ mɛ, Yesu nyi Axwetɔ nɔ yi nukplaviwo, gan dewa nu do wo nu shigbe hwashiwo nɛ o. Vɔ énunɔ yi susu koɖo yi seselelanmɛwo nɔ wo. (Ӡan 15:15) Nɔ Yesu nukplaviwo le vevisese mɛɔ, Yesu senɔ vevi koɖo wo. (Ӡan 11:32-36) Yesu ketɔnɔwo can vado jeshi mɔ, nɔ mɛɖe xɔ eŋɛnywi lɔɔ, ényinɔ Yesu xlɔ. (Mt. 11:19) Yesu wanɔ nu do yi nukplaviwo nu nywiɖe. Eyi taɖo nɔ mìsrin ɔ,  mìwo koɖo amɛwo gblamɛ anyɔ doji yí mìakpɔnɔ jijɔ. Gbesɔ kpe niɔ, lɔnlɔn koɖo bubu ci mìɖo nɔ Kristo asɛnŋ doji.

11. Enu amɛvetɔ ci mìɖo awa gbɔxwe anyi Yesu xlɔɔ, yí nyi yí taɖo ele veviɖeɔ?

¹¹ (2) Bunɔ tamɛ yí awanɔ nu shigbe Yesu nɛ. Nɔ mìtekpɔ yí nya lé Yesu bunɔ tamɛ kpɔ do keŋ yí srin ɔ, mìanyi yi xlɔ bakpomadɔnwo. (1 Kor. 2:16) Lé mìawɛ asran Yesuɔ? Kpɔ kpɔwɛ cɛ. Yesu dejinɔ yiɖeki tɔ o, vɔ lé awɛ akpedo mɛbuwo nu yí ebunɔ tamɛ kpɔ so. (Mt. 20:28; Rɔm. 15:1-3) Ci ebunɔ tamɛ kpɔ ahan ɔ, ena ele gbesɔsɔ yí sɔ yiɖeki sanɔ avɔn yí gbesɔ enu kenɔ amɛ. Deɖe blɛ donɔ dɔmɛzi so enyɔ ci amɛwo nu so nu nu o. (Ӡan 1:46, 47) Dekpɔnɔ do nuvɔn ci mɛɖe wa vayi xoxoxo nu keŋ asɔ wa nu do nu o. (1 Tim. 1:12-14) Yesu nu mɔ: “Ecɛ yí amɛwo pleŋ akpɔ anya mɔ mínyi anyi nukplaviwo, nɔ lɔnlɔn le mí mɛ.” (Ӡan 13:35, NWT) Anyɔ mɔ àbiɔ eoɖeki se mɔ: “Ŋwakɔ ci ji ŋkpe keŋ ana fafa anɔ nyɛ koɖo nɔviŋsu koɖo nɔvinyɔnuwo gblamɛ shigbe lé Yesu wɛ nɛa?”

12. Enu amɛtɔntɔ ci mìɖo awa gbɔxwe anyi Yesu xlɔɔ, yí lé mìatɛnŋ awɛ doɔ?

¹² (3) Kpenɔdo Kristo nɔviɛwo nu. Yesu kpɔɛ mɔ nɔ mìwa ŋɖe nɔ ye nɔviye amɛshiaminɔwoɔ, eye yí mìwɛ nɔ. (Mt. 25:34-40) Enuvevitɔ ci mìawa asɔ kpedo amɛshiaminɔwo nu yí nyi mɔ, mìadra Fyɔɖuxu ŋɛnywi lɔ yí aɖo nukplaviwo shigbe lé Yesu dɔ yi dokplɔtɔwo nɛ. (Mt. 28:19, 20; Edɔ. 10:42) Nɔ “lɛngbɔ bu” mɛ tɔwo tɔ dɛn le mɛɔ, Kristo nɔviɛwo datɛnŋ wa kunuɖeɖedɔ gangan cɛ le xexeɛ pleŋ mɛ o. (Ӡan 10:16) Nɔ lɛngbɔ bu mɛ tɔ yí ènyiɔ, nya mɔ gaxoxo nɛni ci èzannɔ le kunuɖeɖedɔ lɔ mɛ, danasɛ lɔnlɔn gangan ci èɖo nɔ amɛshiaminɔwo koɖo Yesu.

13. Lé mìatɛnŋ awa do Yesu nukplamu ci yí le Luiki 16:9 mɛ ji doɔ?

¹³ Mìagbenyi Yehowa koɖo Yesu xlɔwo nɔ mìna nu yí sɔ kpenɔdo edɔ ci ji wokpɔkɔ nu. (Hlɛn Luiki 16:9.) Le kpɔwɛ mɛ, mìatɛnŋ ana eho yí asɔ do alɔ edɔ ci wowakɔ le xexeɛ pleŋ mɛ. Edɔ ɖewo yí nyi eŋɛnywidradra le afi jinjinwo, Fyɔɖuxuxɔwo koɖo exɔ buwo cucu koɖo wowo dradrado. Mìatɛnŋ agbena nu asɔ kpedo mɛ ciwo ji jɔjɔmɛfɔku alo afɔku buwo jɔ do nu. Gbesɔ kpe niɔ, mìatɛnŋ ana nu nɔ woasɔ kpɔ mìwo hamɛ ӡanwo gbɔ yí agbekpenɔdo mìwo nɔvi ciwo le ӡan mɛ nu. (Elo. 19:17) Mìatɛnŋ ato emɔ cɛwo ji yí akpedo Kristo nɔviɛwo nu.

14. Sɔ koɖo Efezitɔwo 4:15, 16 ɖe, enu amɛnɛtɔ ci mìawa yí anyi Yesu xlɔɔ?

¹⁴ (4) Wanɔ dɔ koɖo Yehowa habɔbɔ lɔ alɔlealɔmɛ. Yesu yí nyi eta nɔ hamɛ lɔ, écan mɛɖewo nɔ woakpɔnɔ mì ji. Nɔ mìwanɔ dɔ koɖo mɛ cɛwo alɔlealɔmɛɔ, anyi mìnyi Yesu xlɔ adodwiwo. (Hlɛn Efezitɔwo 4:15, 16.) Le kpɔwɛ mɛ, evyɛɔ, mìjekɔ agbla veviɖe mɔ mìazan mìwo Fyɔɖuxuxɔwo nywiɖe. Eyi taɖo wosɔ hamɛ ɖewo xoca, wogbetrɔ ashi so wowo nyigbanmamawo nu. Ecɛ na yí habɔbɔ lɔ ɖe ehozanzanwo kpɔtɔ. Ci enyi ahan ɔ, eӡan mɔ eŋɛnywidratɔ ɖewo atrɔdo nɔnɔmɛ yoyu lɔ nu. Eŋɛnywidratɔ egbejinɔtɔ cɛwo tɛnŋ nyi xlɔ koɖo nɔviŋsu koɖo nɔvinyɔnu ɖewo le hamɛ ɖe mɛ na nɔ exwe sugbɔ. Vɔ  ecɛyɛɔ, woma wo do hamɛ vovovowo mɛ. Nɔ nɔvi egbejinɔtɔ cɛwo lɔn do trɔtrɔ cɛ ji keŋ yí wa nu alɔlealɔmɛɔ, ajɔ ji nɔ Yesu sugbɔ!

15. Lé exlɔnyinyi ci yí le mìwo koɖo Yesu gblamɛ avasɛnŋ doji doɔ?

¹⁵ Mɛ ciwo yí wosɔ gbɔngbɔn kɔkɔɛ shi ami nɔ, kpɔkɔ emɔ mɔ yewoavaɖu fyɔ koɖo Yesu le Mawu Fyɔɖuxu lɔ mɛ keke asɔyi mavɔ mɛ. Woanɔ ju koɖo Kristo, ecɛ dasɛ mɔ woakpɔɛ yí akannɔ seŋwo koɖi ŋmɛŋmɛ. (Ӡan 14:2, 3) Yesu alɔn mɛ ciwo yí anɔ agbe le nyigban ji yí ale bu nɔ wowo hɛnnɛ. Ci wodavakpɔ Yesu can ɔ, exlɔnyinyi ci yí le wowo koɖo Yesu gblamɛ asɛnŋ doji yí woavase vivi nɔ agbe ci Yehowa koɖo Yesu ana wo.​—Ezai 9:6, 7.

16. Nyɔna ciwo yí mìakpɔ nɔ mìnyi Yesu xlɔwoɔ?

¹⁶ Nɔ mìlɔn do amɛyɔyɔ Yesu tɔ ji yí vanyi yi xlɔwoɔ, mìakpɔ nyɔna sugbɔ. Le kpɔwɛ mɛ, élɔn mì yí kpekɔdo mì nu le kakacɛ mɛ. Emɔ hun nɔ mì yí mìavanɔ agbe tɛgbɛɛ. Ci yí gbewu cɛwo pleŋ yí nyi exlɔnyinyi koɖo Yesu ana mìanyi exlɔ bakpomadɔnwo koɖo Edalɔ, Yehowa. Mɔnukpɔkpɔ ŋtɔteŋ yí enyi nɔ mì mɔ mìnyi Yesu xlɔwo!