1. Улус канайып најылажып баштайт?

УЛУС канайып најылажып баштайт? Озо ло баштап олор јаантайын кожо болгылайт. Анайып санааларын, сезимдерин бой-бойына куучындап турала, јуук најылар болуп калат. Је Иисусла јуук најылар болорго, бир кезек кӱчтер болот. Кандый?

2. Баштапкызында, Иисусла најылажарга недеҥ улам кӱч болот?

² Баштапкызында, бис Иисусты качан да кӧрбӧгӧнис. Баштапкы чакта кезик христиандар Иисусты база кӧрбӧгӧн. Андый да болзо, апостол Петр олорго мынайып бичиген: «Оны кӧрбӧй туруп сӱӱп јадыгар. Оны эмдиге кӧрбӧй јадып, Ого бӱдӱп [јӱредигер]» (1 Петр 1:8). Айдарда, бис Иисусла кӧрӱшпеген де болзоос, оныла јуук најылар болор аргалу.

3. Экинчизинде, Иисусла најылажарга недеҥ улам кӱч болот?

³ Экинчизинде, бисте Иисусла куучындажатан арга јок. Бис Иисус та ажыра мӱргӱп турган болзоос, Иисусла эмес, је Иеговала куучындажып јадыс. Бого ло коштой, Иисус бисти ого мӱргӱзин деп кӱӱнзебей јат, нениҥ учун дезе мӱргӱӱл — Кудайга бажырарына кирет. А бис јӱк ле Иеговага бажырар учурлу (Матф. 4:10). Је андый да болзо, бис Иисуска сӱӱжисти кӧргӱзер аргалу.

4. Ӱчинчизинде, Иисусла најылажарга недеҥ улам кӱч болот? Бу јӧрмӧлдӧ нени шӱӱжерис?

⁴ Ӱчинчизинде, Иисус теҥериде јадат. Оныҥ учун бисте оныла кожо болор арга јок. Је бис тӱҥей ле Иисус керегинде  кӧпти билип алар аргалу. Иисусла најылажарга ла ӱргӱлјиге најылар болуп артарга болужатан тӧрт алтам бар. Је озо баштап, нениҥ учун Иисусла најылажар керек деп сурактыҥ каруузын шӱӱжип ийектер.

5. Биске нениҥ учун Иисуска јуук најы болор керек? (Анайда ок « Иисусла најылашсаас, бис Иеговага најылар болодыс» ла « Иисуска чын кӧрӱмду болугар» деген рамкаларды кӧрӱгер.)

⁵ Бис Иисуска јуук најы болзоос, Иеговала јуук колбуларлу болорыс. Нениҥ учун мынайып айдарга јараар? Баштапкы шылтагы, Иисус бойыныҥ ӱренчиктерине: «Ада слерди Бойы сӱӱп јат ине, нениҥ учун дезе, слер Мени сӱӱп [јадыгар]» — деп айткан (Иоанн 16:27, ЈК 2003). Анайда ок Иисус мынайып айдат: «Мен ажыра келбегенче, Адага кем де келип болбос» (Иоанн 14:6). Иисусла јууктада танышпай јадып, Иеговала најылажарга албаданганы — турага эжикти ачпай јадып, кирерге албаданганына тӱҥей. Иисус мындый ла тӱҥдештирӱ эдип, бойын «койлорго эжик» деп адаган (Иоанн 10:7). Экинчи шылтак, Иисус Адазыныҥ кылык-јаҥдарын толо кеминде кӧргӱскен. Ол бойыныҥ ӱренчиктерине: «Мени кӧргӧни, Аданы кӧргӧни ол» — деп айткан (Иоанн 14:9). Оныҥ учун Иеговала јуук таныжып аларга, озо баштап Иисус Христостыҥ јӱрӱмин билип алар керек. Иисус керегинде канча ла кире кӧпти билзеес, ончо ло кире ого сӱӱжис тыҥыыр. А Иисусла канча ла кире јуук најылашсаас, ончо ло кире Иеговага сӱӱжис тыҥыыр.

6. Биске база нениҥ учун Иисусла најылажар керек? Јартап беригер.

⁶ Иисуска јуук најы болзоос, мӱргӱӱлдериске каруу алып турарыс. Оныҥ учун мӱргӱӱлдиҥ учында «Иисус Христостыҥ  адынаҥ» деп сӧстӧрди бодоп ло айдар керек эмес, је Иегова бойыныҥ Уулына кандый јаҥ бергенин оҥдоп турар керек. Иисус апостолдорына: «Мениҥ адымда нени де суразагар... оныгарды бӱдӱрерим» — деп айткан (Иоанн 14:13). Бистиҥ мӱргӱӱлдеристи угатан ла олорго каруу беретен јаҥ јӱк ле Иеговада бар. Је Иегова бойыныҥ чыгарган башкартуларын бӱдӱретен јаҥды Иисуска берип салган (Матф. 28:18). Анайда ок Иегова мӱргӱӱлдерге каруу берердеҥ озо, бисти Иисустыҥ јакылталарын бӱдӱрип турган ба деп, бӱдӱмјиленип јат. Темдектезе, Иисус: «Улустыҥ кинчегин таштазагар, Теҥеридеги Адагар слердийин де таштаар. Улустыҥ кинчегин таштабас болзогор, Адагар да слердийин таштабас» — деп айткан (Матф. 6:14, 15). Оныҥ учун Иегова ла Иисус биске канайып јалакай баштанат, бис те улуска анайып ла баштанар учурлу.

7. Иисустыҥ толынты тайылгазынаҥ улам берилетен алкыштарды кандый улус алар?

⁷ Толынты тайылганаҥ улам берилетен алкыштарды јӱк ле Иисуска јуук најы болгон улус алар. Бис мыны кайдаҥ билерис? Иисус најылары учун бойыныҥ јӱрӱмин берген (Иоанн 15:13). Иисустаҥ озо јаткан Кудайдыҥ чындык улузына база Иисус керегинде билгирлер алып, оны сӱӱрге ӱренип алар керек болор. Темдектезе, Иегова бойыныҥ ишчилерин — Авраамды, Сарраны, Моисейди ле Раавты тиргизип ийзе, ӱргӱлји јӱрӱм јӱрерге, олорго до Иисусла јуук најылажып алар керек болор (Иоанн 17:3; Ап. ижи 24:15; Евр. 11:8—12, 24—26, 31).

8, 9. Иоанн 15:4, 5-ле болзо, Иисусла најылажып алзаас, бис нени эдер аргалу болорыс? Биске нениҥ учун Иисусла најылажар керек?

⁸ Бис Иисусла кожо Каандык керегинде сӱӱнчилӱ јар јарлаарга ла ӱренчиктер белетеп иштенерге сӱӱнип јадыс. Иисус јерде болордо, улусты ӱреткен. Теҥериге де барган кийнинде, јуунныҥ бажы болуп, јарлаар ишти ле ӱренчиктер белетеер ишти оноҥ ло ары башкарып јат. Слердиҥ канча ла кире кӧп улуска Иисусты ла оныҥ Адазын билип алзын деп албаданып турганаарды Иисус кӧрӱп те јат, баалап та јат. Бу ишти бис Иегованыҥ ла Иисустыҥ болужы јогынаҥ бӱдӱрип болбос эдис. (Иоанн 15:4, 5 кычырыгар.)

⁹ Айдарда, Кудайдыҥ Сӧзинде јарт айдылганыла, Иегова Кудайысты сӱӱндирерге, Иисуска сӱӱжисти ӧскӱрип, тыҥыдар керек. Эмди, Иисусла јуук најылажып аларга болужатан тӧрт алтам кӧрӱп ийектер.

10. Иисусла најылажарга болужатан баштапкы алтам кандый?

¹⁰ 1. Иисусты јакшы билип алыгар. Иисусты јакшы билип аларга, Матфейдиҥ, Марктыҥ, Луканыҥ ла Иоанныҥ Сӱӱнчилӱ Јарын кычырыгар. Бу бичиктердеҥ Иисус улуска канайып јалакай баштанганын кычырып, шӱӱп сананып турзаас, бис Иисусты сӱӱп ле тооп баштайдыс. Темдектезе, Иисус бойыныҥ ӱренчиктерине Кайракан да болгон болзо, ол олорго кулдарга чылап баштанбаган. Карын, Иисус олорго бойыныҥ тереҥ санааларын ла сезимдерин куучындап туратан (Иоанн 15:15). Анайда ок ӱренчиктериниҥ ачузын оҥдоп, олорло кожо ыйлаган да тужы бар (Иоанн 11:32—36). Керек дезе, Иисус сӱӱнчилӱ јарды уккан улуска најы болгон деп, оныҥ ӧштӱлери де кӧргӧн (Матф. 11:19). Бис улуска Иисус ла чылап баштанып турзаас, олорло эптӱ-јӧптӱ јӱредис, јӱрӱмнеҥ јаан сӱӱнчи аладыс ла Иисус биске оноҥ јуук болуп калат.

11. Иисусла најылажарга болужатан экинчи алтам кандый? Бу алтамды нениҥ учун эдер керек?

 ¹¹ 2. Санаагар ла эткен керектереер Иисустый ошкош болзын. Иисустыҥ кӧрӱм-санаазын канча ла кире јакшы оҥдоп, алынып турзаас, ончо ло кире бистиҥ оныла најылыгыс бек болор (1 Кор. 2:16). Бис Иисустаҥ неге ӱренер аргалу? Темдектезе, Иисус озо ло баштап бойына јакшы болзын деп эмес, је улуска јакшы болзын деп сананган (Матф. 20:28; Рим. 15:1—3). Андый кӧрӱм-санаалу болгонынаҥ улам, ол јаҥыс бойын сананбаган ла улустыҥ јаманын таштарга белен болгон. Ол улустыҥ оны јамандаганына да ачынбайтан (Иоанн 1:46, 47). Иисус, кижини алдындагы эткен кинчектери учун бир де јаман кӧрбӧй туратан (1 Тим. 1:12—14). Иисус айткан: «Ортогордо сӱӱш болзо, слерди Мениҥ ӱренчиктерим деп, ончозы танып ийер» (Иоанн 13:35). Оныҥ учун бойыгардаҥ сурагар: «Мен Иисустаҥ тем алып, ака-эјелерле амыр јӱрерге бастыра кӱчимнеҥ албаданадым ба?»

12. Иисусла најылажарга болужатан ӱчинчи алтам кандый? Бу алтамды канайып эдер?

¹² 3. Христостыҥ карындаштарына јӧмӧжип туругар. Иисустыҥ кӧрӱмиле болзо, бис оныҥ майлаткан карындаштарына јӧмӧжип турзаас, Иисуска јӧмӧжип јадыс (Матф. 25:34—40). Майлаткандарга јӧмӧжӧтӧн эҥ јаан арга — Иисустыҥ ӱренчиктерине берилген јакылтаны эрчимдӱ бӱдӱрери, ӧскӧртӧ айтса Каандык керегинде јарды јарлаары ла ӱренчиктер белетеери (Матф. 28:19, 20; Ап. ижи 10:42). Христостыҥ карындаштары бӱдӱн јердиҥ ӱстинде јарлаарга, мындый јаан ишти јӱк ле «ӧскӧ койлордыҥ» (ЈТ) болужыла эдип јат (Иоанн 10:16). Слер «ӧскӧ койлордыҥ» тоозына кирип турган болзогор, бу ишке туружып турганаарла јӱк ле майлаткандарды эмес, је Иисусты да сӱӱп турганаарды кӧргӱзип јадыгар.

13. Лука 16:9-та бичилген Иисустыҥ јӧбин бис канайып тузаланар аргалу?

¹³ Анайда ок бис Иегованыҥ ла Иисустыҥ најызы болорго, организацияныҥ ижине акча-јӧӧжӧбисле болужар аргалу. (Лука 16:9 кычырыгар.) Темдектезе, бис организацияныҥ бастыра телекейлик ижине берӱ (пожертвование) эдер аргалу. Бу берӱлер сӱӱнчилӱ јарды ыраак јерлерде јарлаарына, Иеговага бажырарга керектӱ туралар тударына ла олорды обслуживать эдерине тузаланылат, ол эмезе ар-бӱткенниҥ тӱбегине ле оноҥ до ӧскӧ тӱбекке туштаган улуска болужарына тузаланылат. Анайда ок бис акча-манадысты јууныстыҥ чыгымдарына ла јуунда кемге-кемге болужарга тузаланар аргалу (Укаа 19:17). Анайып бис Христостыҥ карындаштарына јӧмӧжип јадыс.

14. Ефестегилерге 4:15, 16-ла болзо, Иисусла најылажарга болужатан тӧртинчи алтам кандый?

¹⁴ 4. Иегованыҥ организациязыныҥ башкартуларына јӧмӧжип туругар. Бистерди кичеерге кӧстӧлгӧн акаларга јӧмӧжип турзаас, бис Иисуска — јуунныҥ бажына, јуук болуп каладыс. (Ефестегилерге 4:15, 16 кычырыгар.) Темдектезе, эмди бис Каандыктыҥ Тураларын оноҥ јакшы тузаланарга албаданадыс. Оныҥ учун кезик јуундарды бириктирип саларда, олордыҥ территориязы солына берген. Мынаҥ улам кезик јарчыларга ӧскӧ јуунга кӧчӱп, јаҥы айалгаларга ӱренижерге келишкен. Бу чындык христиандар кӧп јылдардыҥ туркунына бир јуунда болуп, ака-эјелерле јуук најылажып калган болор. Је мындый солынталардаҥ организацияныҥ чыгымы астаган. Иисус чындык христиандардыҥ Иегованыҥ  башкартуларына јӧмӧжип турганын кӧрӱп, тыҥ сӱӱнип јат!

15. Иисусла најылашканыс келер ӧйдӧ нениҥ учун оноҥ бек болуп калар?

¹⁵ Агару тынла майлаткан улус Христосло кожо Кудайдыҥ Каандыгында башкарар. Олор јаантайын Иисусла кожо болуп, оны кӧрӧр дӧ, оныла куучындажар да (Иоанн 14:2, 3). Јерде јадатан ижемјилӱ улус Иисустыҥ сӱӱжин ле болужын база кӧрӧр. Олор Иисусты кӧзиле кӧрбӧйтӧн дӧ болзо, оныҥ ла Иегованыҥ шылтузынаҥ улам болотон јӱрӱмге сӱӱнип јӱрер. Анайып, олордыҥ Иисусла најылашканы кӱннеҥ кӱнге тыҥып барар (Иса. 9:6, 7).

16. Иисуска најы болзоос, кандый алкыштар аладыс?

¹⁶ Бис Иисуска најы болзоос, кӧп алкыштар аладыс. Темдектезе, бис оныҥ сӱӱжин ле болужын эмди де кӧрӱп јадыс. Анайда ок ӱргӱлји јӱрӱм алатан арга ачылат. Је Иисусла кожо најылашканыстаҥ улам алып турган эҥ баалу эрјине — Иисустыҥ Адазыла, Иеговала, јуук колбуларлу болоры. Иисуска најы болоры — сӱрекей јаан ырыс!