1. Icopo theyo mer ku ng’atini nenedi?

WANG’ ma pol, kan ibemito ibed jarimb ng’atini, gin ma kwong’a m’ilar itimo utie nibedo kude karacelo saa ma pol. I kind saa maeno, wuweco i kindwu, ng’atuman koro paru pare man lembe m’ekadhu kud i ie ni wadi; eno ketho wudoko jurimo. Ento ka wabemito wadok jurimb Yesu, saa moko ebedo iwa yot ungo. Dong’ wakenen thelembe moko m’uketho ebedo iwa tek nidoko jurimb Yesu.

2. Thelembe mi kwong’o m’uketho ebedo iwa tek nidoko jurimb Yesu utie ang’o?

² Thelembe mi kwong’o m’uketho ebedo iwa tek nidoko jurimb Yesu utie nia wagam wakwo ngo kude karacelo. Jukristu ma dupa mi rundi ma kwong’a de gikwo ngo karacelo ku Yesu. Re kadok kumeno de, jakwenda Petro uyero kumae: ‘Wumare, ma fodi wukunene ngo; man kadok wunene ngo kawono, ento wuyie.’ (1 Pet. 1:8) Pieno, ecopere iwa nibedo jurimb Yesu kadok wakwo ngo karacelo kude.

3. Thelembe mir ario m’uketho ebedo iwa tek nidoko jurimb Yesu utie ang’o?

³ Thelembe mir ario m’uketho ebedo iwa tek nidoko jurimb Yesu utie nia wacopo weco ngo kude. Kinde ma waberwo, waweco wang’ acel i bang’ Yehova. Andha re warwo ku nying’ Yesu, ento wakoro ngo lembe mwa ire. Yesu en gire de ubemito ngo nia warwo i bang’e. Pirang’o? Pilembe rwo utie theng thier acel ma zoo, thier ke jutimo ni Yehova kende. (Mat. 4:10) Re kadok kumeno de, wacopo nyutho nia wamaru Yesu.

4. Thelembe mir adek m’uketho ebedo iwa tek nidoko jurimb Yesu utie ang’o? Wabineno lembang’o i thiwiwec maeni?

 ⁴ Thelembe mir adek m’uketho ebedo iwa yot ungo nidoko jurimb Yesu utie nia Yesu ubekwo i polo, pieno wacopo bedo ngo kude calu ma wabedo ku jurimbwa mange. Ento kadok watie ngo karacelo de, re wacopo ng’eyo lembe dupa i wie. I thiwiwec maeni, wabineno lembe ang’wen ma wacopo timo kara wathei mer ku Yesu. Re mi kwong’o, wakenen nia pirang’o pire tie tek iwa nitheyo mer ku Yesu Kristu.

5. Pirang’o wacikara nibedo jurimb Yesu? (Nen sanduku ma thiwie yero, “ Nibedo jurimb Yesu ketho wadoko jurimb Yehova” man ma thiwie yero, “ Wabed ku nen ma ber iwi Yesu.”)

⁵ Wacikara nibedo jurimb Yesu ka wabemito wabed jurimb Yehova. Pirang’o? Wakenen thelembe moko ario kende. Mi kwong’o, Yesu uyero ni julub pare kumae: “Wego maruwu gire, kum wumara, man wuyio nia aai ba Wego.” (Yoh. 16:27) Eyero bende kumae: “Ng’atu acel de mbe ma bino ba Wego, ndhu ni kuma re.” (Yoh. 14:6) Ka wabemito wabed jurimb Yehova ma ke watie ngo jurimb Yesu, etie ve wabemito wamond i ot moko kud i dhugolane ngo. I lapor moko ma Yesu utio ko, ewacu nia etie “dhugola mi rombe.” (Yoh. 10:7) Thelembe mir ario utie nia Yesu ubed unyutho kite pa Won tap tap. Eyero ni julubne kumae: “Ng’atu m’uneno an nwang’u eneno Wego [bende].” (Yoh. 14:9) Pieno, yo acel ma romo konyowa ning’eyo Yehova utie niponjo lembe m’utimere i kwo pa Yesu. Kinde ma wabeponjo lembe i wie, mer ma wamare  ko bimedere. Ka mer ma wamaru ko Yesu udoko tek, wabilund maru Won nisagu.

6. Wacikara nibedo jurimb Yesu pi thelembe mange ma kani? Kekor.

⁶ Wacikara nibedo jurimb Yesu kara Mungu udwok wang’ rwo mwa. Eno nyutho nia wacikara ngo kende kende niyero nia “ku nying’ Yesu” kinde ma wabedaru rwo mwa. Ento wacikara ning’eyo nia Yehova ubetio ku Yesu i ayi ma nenedi pi nidwoko wang’ rwo mwa. Yesu uyero ni jukwenda pare kumae: “Gin ma tek wubikwayu ku nyinga e abitimo ginde.” (Yoh. 14:13) Kadok Yehova kende re ma winjo rwo mwa man en re m’edwoko wang’ rwone de, re emio ni Yesu dito mi timo calku yub m’emaku. (Mat. 28:18) Pieno, i wang’ nidwoko wang’ rwo mwa, elar eneno ka nyo watio ku juk ma Yesu umio. Ku lapor, Yesu uwacu kumae: “Kum tek wuweko kier mi dhanu, Wegwu ma ni i polo biweko mu bende. Ento tek wuweko kier mi dhanu ngo, kadok Wegwu de biweko kier mu ngo.” (Mat. 6:14, 15) Dong’ pire tie tek lee mandha nia watim lembe ni jumange calu ma Yehova giku Yesu de gitimo ko iwa!

7. Jukani ma gibinwang’u bero mi jamgony ma Yesu uthiero?

⁷ Ju ma gitie ku mer ma ceng’ini ku Yesu kendgi re ma gibinwang’u bero mi jamgony ma Yesu uthiero. Pirang’o wayero kumeno? Yesu uyero nia ebimio “kwo pare pi jurimbe.” (Yoh. 15:13) Weg bedopwe ma gilar gikwo ma fodi Yesu ubino ngo iwi ng’om gibiponjo lembe dupa iwi Yesu man gibimare. Jumaco ku jumamon ma calu ve Abraham, Sara, Musa, man Rahab gibicer; ento kara gikwo rondo ku rondo, bikwayu nia gin de githei mer ku Yesu.​—Yoh. 17:3; Tic. 24:15; Ebr. 11:8-12, 24-26, 31.

8-9. Nimakere ku Yohana 15:4, 5, ka watie jurimb Yesu wabitundo nitimo ang’o? Pirang’o wacikara nimedara nibedo jurimb Yesu?

⁸ Watie kud anyong’a ma lee dit nitimo tic mi rweyo lembanyong’a mi Ker man mi ponjo dhanu karacelo ku Yesu. Kinde ma Yesu ubino iwi ng’om, en de ebed eponjo dhanu. Niai m’edok i polo, etie jawi cokiri, man ebemedere nitelo wi tic mi rweyo lembanyong’a man mi ponjo dhanu. Eneno kero m’ibetimo pi nikonyo dhanu dupa kara gitund ning’eye man ging’ei Won, man anyong’a nege lee i kumi. I andha, Yehova giku Yesu kendgi re ma gikonyowa nitimo tic maeno.​—Som Yohana 15:4, 5.

⁹ Lembe pa Mungu ubeponjo kamaleng’ nia wacikara nibedo ku mer ma ceng’ini ku Yesu kara wafoi i Yehova. Pieno, wakenen lembe ang’wen ma wacopo timo kara wadok jurimb Yesu.

10. Lembe mi kwong’o ma wacikara nitimo kara wathei mer ku Yesu utie ang’o?

¹⁰ (1) Tim kero ning’eyo Yesu. Kara watund ning’eyo Yesu, ukwayu wasom buku pa Matayo, Marko, Luka man Yohana. Kinde ma wabenyamu i lembe ma Biblia ukoro iwi kwo pa Yesu, wabituc nimare, man wabiwore pilembe wabineno kamaleng’ nia ebed etimo bero ni dhanu man ekwo kugi ma ber. Ku lapor, kadok nwang’u Yesu ubino rwoth mi julub pare de, re ebed ekwo ngo kugi ve gitie ng’eca. Ento ebed ekoro igi paru pare man kite m’ewinjere ko. (Yoh. 15:15) Ka gitie ku can, en de ebedo ku can, man  saa moko egam ewak bende. (Yoh. 11:32-36) Kadok judegi pare de gigam gineno kamaleng’ nia ju ma giwinjo lembe pare gidoko jurimbe. (Mat. 11:19) Wan bende ka wabekwo ku dhanu mange calu ma Yesu ukwo ko ku julub pare, wabibedo ku winjiri ma ber kugi, wabibedo jumutoro, man mer ma wamaru ko Yesu bimedere.

11. Lembe mir ario ma wacikara nitimo kara wathei mer ku Yesu utie ang’o, man pirang’o pire tie tek nitimo kumeno?

¹¹ (2) Bed ku paru man timo ma calu pa Yesu. Ka wabetimo tego ning’eyo kite ma Yesu ubed uparu ko lembe man wabe ii niparu calu en, mer m’i kindwa kude bidoko tek. (1 Kor. 2:16) Dong’ wacopo timo ang’o kara wabed ku paru man timo ma calu pa Yesu? Kenen lapor moko acel kende. Yesu ubed uparu akeca kite m’ecopo konyo ko jumange kakare niparu kwa pi yeny pare gire. (Mat. 20:28; Rum. 15:1-3) Kit paru maeno ubed ucwale nimiere pi jumange man nitimo igi kisa. Ng’ecwiny ubed umake ngo nyaswaswa pi lembe ma dhanu gibeyero ku nyinge. (Yoh. 1:46, 47) Bende, ebed ebedo ngo ku paru ma rac iwi ng’atini pi dubo moko ma ng’atune ular utimo i wang’e. (1 Tim. 1:12-14) Yesu uyero kumae: “Dhanu ceke bing’eyo nia wu julubna tek wumeru.” (Yoh. 13:35) Dong’ kepenjiri kumae: “Nyo abed atimo kero para ceke pi nikwo ku kwiocwiny kud umego ku nyimego calu ma Yesu ubed utimo?”

12. Lembe mir adek ma wacikara nitimo kara wathei mer ku Yesu utie ang’o, man wacopo timo lembene nenedi?

¹² (3) Kony umego pa Kristu. Yesu neno lembe ceke ma wabetimo ni umego pare ma tipo wiro ni lembe ma wabetimo ire. (Mat. 25:34-40) Yo acel ma pire tek mandha ma wakonyo ko Jukristu ma tipo wiro utie nimiara zoo i tic ma Yesu ubetelo wi julub pare kara gitim, niwacu tic mi rweyo lembanyong’a man mi ketho dhanu udok julub. (Mat. 28:19, 20; Tic. 10:42) Tin kan umego pa Kristu gibetuc nirweyo lembanyong’a i wang’ ng’om ngung’ utie pilembe ‘rombe mange’ ubekonyogi. (Yoh. 10:16) Kan itie rombe mange, ng’ei nia saa ceke m’iberweyo lembanyong’a, nwang’u ibenyutho nia imaru umego pa Yesu man imaru Yesu bende.

13. Icopo tio nenedi ku juk pa Yesu ma nwang’ere i Luka 16:9?

¹³ Ayi mange ma waromo theyo ko mer ku Yehova giku Yesu utie nimio sente mwa pi nikonyo tic ma gibetelo wie. (Som Luka 16:9.) Ku lapor, wacopo mio giramia pi nitielo tic m’ubetimere i wang’ ng’om zoo. Jutio ku giramiane pi nikonyo tic mi rweyo lembanyong’a i kabedo ma bor, pi nigiero udi ma jutimo thier i igi man niyiko kumgi, man pi ning’iewo jamtic ma tung’ tung’ ma copo konyo ju ma peko ma wok rek unwang’ugi. Wacopo mio bende sente pi nipong’o yeny mi cokiri mwa, man wacopo konyo bende dhanu ma wang’eyo nia gitie ku yeny mi kony. (Rie. 19:17) I ayi maeno re ma wacopo konyo umego pa Kristu.

14. Nimakere ku Juefeso 4:15, 16, lembe mir ang’wen ma wacikara nitimo kara wathei mer ku Yesu utie ang’o?

¹⁴ (4) Wor telowic ma judong cokiri gimio. Kara wadok jurimb Yesu ma tie jawi cokiri, wacikara niworo telowic mir umego ma jung’io pi nitelo wiwa. (Som Juefeso 4:15, 16.) Ku lapor, tin wabetimo kero nitio ma ber ku Udi Ker. Pi thelembe maeno re ma judiko cokiri moko,  man judok juyiko bende kiew mi teritwar migi mi rweyo lembanyong’a. Yub maeno ukonyo dilo pa Yehova nigwoko kum sente ma lee m’umego gimio ni giramia. I kind nindo ma rom eno, ugam ukwayu bende nia jurwei moko gitim alokaloka. Copere nia i kind jurwei maeno, jumoko gitimo oro ma dupa i cokiri migi, man gitwio mer kud umego ku nyimego mi cokirine. Re jukwayu nia gidok i cokiri mange. Anyong’a nego Yesu lee nineno kite ma jurwei maeno gibeworo ko telowic maeno ma judong cokiri gimio!

15. Mer m’i kindwa ku Yesu bidoko ber magwei nenedi i nindo m’ubino?

¹⁵ Jukristu ma tipo wiro gitie ku genogen mi kwo rondo ku rondo karacelo ku Yesu, man gibibimo kugi i Ker mi polo. Gibinene, gibiweco kude, man gibibedo karacelo kude. (Yoh. 14:2, 3) Dhanu ma gitie ku genogen mi kwo i ng’om de Yesu bimarugi man ebitimo igi bero dupa. Kadok gibineno ngo Yesu de, re gibibedo jurimbe ma ceng’ini, kinde ma gibefoyo ku kwo ma Yehova giku Yesu gimio igi.​—Isa. 9:6, 7.

16. Wanwang’u mugisa ma kani ka watie jurimb Yesu?

¹⁶ Ka wayio lwong’o ma Yesu ulwong’o kowa nia wadok jurimbe, wanwang’u mugisa dupa. Ku lapor, tin eni emaruwa man ebekonyowa. Watie ku genogen mi kwo rondo ku rondo. M’usagu zoo, mer ma wamaru ko Yesu biketho wabibedo jurimb Ng’atu ma pire tek nisagu i polo kud i ng’om zoo, niwacu Yehova ma tie Won Yesu. M’umbe jiji, etie rwom ma lee mi tuko ngo nibedo jurimb Yesu!