1. Sakalawidangaw to tamdaw, sasamaan ko hademak iso hani?

TOCERID, sakalawidangaw kiso to tamdaw, isalakat mamipalak to toki malacafay cingranan. Masasowal tatosa, maka mihadak to maharatengay ato nafalocoˈan no niyah, wa ngaˈayto malawidang kamo. Kawra sakalawidangaw ci Yisan cowa ko madoloay, o maanan ko pasangaray hani?

2. Sakalawidangaw ci Yisan, o saka 1 pasangaray o maanan hani?

² Saka 1 pasangaray i, cowa pakaˈaraw kita ci Yisan. Hatiraayto, itini saka 1 hahekalan iraay ko malecaday pasangaray no ˈalomanay Krisciyang, kawra sanay ko sowal no tarokos ci Pitiro: ‘Cowaho pakaˈaraw kamo cingraanan, kawra maolahay cingraanan, cowa pakaˈaraw nohatini, kawra mihakelongay cingraanan.’ (1 Pitiro 1:8) Mihaenay, soˈlin cowa pakaˈaraw ko tamdaw ci Yisan, ngaˈayayho a malo ngaˈayay widang ningra.

3. O masiˈayaway ita a saka 2 pasangaray o maanan hani?

³ O saka 2 pasangaray i, awaay ko pakayraan ita a masasowal ci Yisan. Ano mitolon kita i, mifanaˈay to harateng no niyah ci Yihofaan. Manaokaniw, pakayniay kita i ngangan ni Yis a mitolon, kawra cowa ko pasayraay cingraanan a mitolon. Soˈlinay i, cowa pitokel ci Yis kitaanan pasayra cingraanan a mitolon. Samanen o mitolonay o midokoay a demak, dengan ci Yihofa ko dadokoen ita. (Matay 4:10) Soˈlin mahaen, wa ngaˈayho kita paihkal to olah ci Yisan.

4. O masiˈayaway ita a saka 3 pasangaray o maanan hani? Oniya lalakaw wa milengo to maanan?

 ⁴ O saka 3 a pasangaray i, itiniay i kakarayan ci Yis, cowa ka ngaˈay kita soˈlin a kalacafay cingraanan. Soˈlin cowa kangaˈay kita a mingata cingranan, wa ngaˈayho a mafanaˈ cingraanan. Oniya lalakaw wa milengo, palahad to tangongolay kalawidang ci Yisan hano kalimlaan, wa milengoho mamidemak kita to maanan sepat a demak patanektek to kalawidang cingraanan.

5. Hano kalimlaan ko kalawidang ita ci Yisan? (Nengnengen ko “ Mamalawidang Kita ci Yisan Ngaˈ, Ngaˈay Malawidang ci Yihofaan” ato “ Matatodong ko Pinengneng ci Yisan.”)

⁵ O mamalawidang kita ci Yisan ngaˈ, ngaˈay a miingid ci Yihofaan. Misamanay? Salakat, pasowalan ni Yis ko nisawawaan: ‘Tangongolay ko olah no Wama tamowanan, samanen padotocay kamo tangongol ko olah takowanan.’ (Yohani 16:27) Sanayho ko sowal ningra: ‘Ano caay pakayni takowanan, awaay ko tatahira i Wamaan.’ (Yohani 14:6) Mihaenay, sapalahadaw to kalawidang ci Yihofaan, salakatho malo widang ni Yis, malecad sapicomodaw i cecay lomaˈ salakatho mikilim to fawahan. Na somowalay ci Yis, o ‘picomodan no lopayˈay siri a fawahan’ ko niyah.’ (Yohani 10:7) Dotoc, malefotay ci Yis paihkal to makapahay capeling no kakarayan Wama. Sanay ko sowal ningra to nisawawaan: ‘Pakaˈaraw takowanan, o pakaˈaraway to Wamaan.’ (Yohani 14:9) Mihaenay, cipinang kita to nalifetan ni Yis, wa mafanaˈto ci Yihofaan. Ano matongal ko kacipinang ci Yisan, matongal ko tangongol  no kalawidang cingraanan, matongal ko kaolah ci Yihofaan.

6. O roma lalangian ita malawidang ci Yisan o manan hani?

⁶ O mamalawidang kita ci Yisan ngaˈ, pacaˈofen ni Yihofa ko satolon no mita. Dengan ˈayaw no mahererek ko satolon somowal to ‘pakayni ngangan ni Yis’ cangoˈotayho. O mamihapinang kita to samanan ni Yihofa a misaka dademak ci Yis a pacaˈof to satolon no mita. Sowal ni Yis to tarokos: ‘Pakayni kamo i ngangan ako, ano o mananto ko micangacangan, o lalahecien ako maemin.’ (Yohani 14:13) Soˈlin ci Yihofa ko mitengilay ato pacaˈofay to satolon ita, kawra wa ocoren Ningra ci Yis a midemak to saˈosi Ningra. (Matay 28:18) Mihaenay, ˈayaw no pacaˈof ko Kawas to satolon ita i, wa minengneng to midofdofay kita to limoˈot ni Yis hokira. Sowal ni Yis: ‘Ano misodod kamo to raraw no tao, o Wama namo i kakarayan wa misodod tamowanan; ano eca pisodod kamo to raraw no tao i, cowa ko mamisodod ko Wama namo to raraw namo.’ (Matay 6:14, 15) Palecaden ita ko picada ni Yihofa aci Yis kitaanan, sidaˈit a micada to tao, mihaen ngaˈ pacaˈofen ni Yihofa ko satolon ita ato misodod kitaanan.

7. Cima ko ngangaˈay mikitini sapatefoc ni Yis milifok to epoc hani?

⁷ O mamalawidang kita ci Yisan ngaˈ, ngaˈay mikitini sapatefoc milifok to epoc. Samanen sowal ni Yis, ‘pakayniay i widang kinafalah to ˈorip’ cingra. (Yohani 15:13) ˈAyaw no tayni i hekal ci Yis a midokoay to Kawas a tamdaw, misaaliayto sakafanaˈaw ato maolah ci Yisan. Tinakoen, ci Apraham, Sara, Mosi aci Rahap o madimadiay ci Yihofaan, papatikolen maˈorip cangra no ikor, itiya o mamalawidang cangra ci Yisan ngaˈ, ngaˈay midaˈoc a maˈorip.—Yohani 17:3; Dmak 24:15; Hipray 11:8-12, 24-26, 31.

8-9. Pakayni Yohani 15:4, 5, malawidang kita ci Yisan ngaˈ, ngaˈay midemak to maanan demak? Kalacafay ci Yisan hano masakalimlaan hani?

⁸ Mahemekay kita ngaˈay mikitini sadama ni Yis, mitenak to ngaˈayay lihaf no Hongti Kitakit no Kawas, pasifanaˈ to tamdaw to soˈlinay kimad. Itiniho i hekal ci Yis misarocoday a pasifanaˈ to tamdaw, ikor no patikol i kakarayan, malo ˈaˈideman no kasakopang, padadotocay mikayat toniya kalimlaan a demak. Misarocod kiso pasifanaˈ to tamdaw mafanaˈ cingraanan aci Yihofaan, maedeng misalimla cingra to mihadakan iso a ˈicel, kawra oniya demak dengan mitadiˈec to sapadama ni Yihafo aci Yis ngaˈ ngaˈay malaˈosi.—ˈOsien ko Yohani 15:4, 5.

⁹ Ano somowalay ko Fangcalay Cudad, sapakahemekaw ci Yihofaan, papalahaden ita ato padadotoc a malawidang ci Yisan, dotoc nengnengen ita wa midemak kita to maanan sepat a demak.

10. Sakalawidangaw ci Yisan, salakat mamidemak to maanan?

¹⁰ (1) Mafanaˈ ci Yisan. Miasip ato midotim kita to maˈoningay no Sepat Ratoh a cudad, mafanaˈ to sidaˈitay ko pakayraan ni Yis micada to tamdaw, wa masemer, maolah cingraanan. Tinakoen, soˈlin o tapang no nisawawaan ci Yis, kawra cowa palakoli cangranan a minengneng, pasowalan cangra to harateng ato nafalocoˈan no niyah. (Yohani 15:15) Malacafayay ci Yis cangranan a mararom, malacafay a tomangic. (Yohani 11:32-36) Ano misafelitay ci Yisan a tamdaw  pakahapinangay, kalawidang hananay ni Yis ko polong mihakelongay cingraanan a tamdaw. (Matay 11:19) Minanam kita to pakayraan ni Yis a micada to tamdaw, wa matongal ko kangaˈay no kalalaˈed to tao, wa matongal ko lipahak no niyah. Mihaen, wa matongal ko kaolah ci Yisan.

11. Sakalawidangaw ci Yisan, mamidemakho kita to maanan? Mihaen to demak hano masakalimlaan hani?

¹¹ (2) Minanam to pakayraan ni Yis a misimsim ato dademak. Micalep ko kacipinang ita ato mitodong ci Yisan, mamatongal ko tanektek no kalawidang cingraanan. (1 Korinto 2:16) Haratengen ko pakayraan ni Yis micada to tamdaw. O miharatengan ningra sahtoay o sasamaan padama to tao, cowa ko niyah aca ko miharatengan. (Matay 20:28; Loma 15:1-3) Mihaenay, makahiay cingra mihadak to niyah, hanaca mikifalocoˈ a misodod to tao. Soˈlin cakangodo ko tao pasowal cingraanan, cowa ka lanikay a maketer. (Yohani 1:46, 47) Cowa ko pakayni i raraw no tamdaw i salakat a misakakinih to tamdaw. (1 Timoti 1:12-14) Palecaden ita ci Yis a micada to tamdaw, kalimlaan mihaen, samanen sanay cingra: ‘Ano masasiolah kamo, mamafanaˈ ko polong a tamdaw to nisawawaan ako kamo.’ (Yohani 13:35) Ngaˈayay licayen ko niyah: “Mitodongay kako ci Yisan, misarocod a rihaday to salikaka han?”

12. Sakalawidangaw ci Yisan, o saka 3 dademaken ita o maanan hani? Sasamaan ko demak ita hani?

¹² (3) Midama to salikaka ni Kristo. Pinengneng ni Yis, midama kita to salikaka ningra malecaday o midamaay cingraanan. (Matay 25:34-40) O kalimlaan a pakayraan ita midama cangraanan i, mihakelong to limoˈot ni Yis misarocod a mitenak to lihaf no Hongti Kitakit, halo padama to tao malo Krisciyang. (Matay 28:18, 19; Dmak 10:42) Ano awaay ko sadama no ‘roma lopayˈay siri,’ cowa ko mamalaheci no salikaka ni Kristo koniya miedefay to cikiw a tayal. (Yohani 10:16) Ano masalalomaˈay no ‘roma lopayˈay siri’ kiso, o pitosil iso misawacayay to maolahay ko niyah to salikaka ni Kristo, maolahayho ci Yis Kristoan.

13. Samaan kita midofdof to sapasifanaˈ ni Yis i Luka 16:9 a midemak hani?

¹³ O roma pakayraan ita malawidang ci Yihofaan aci Yisan i, midama to mikayatan nangra a demak. (ˈOsien ko Luka 16:9.) Tinakoen, ngaˈayay pakiyaho kita midama to polong no hekal a tayal, oniya payci sakadademakan i maraayay pitosilan a kilac, patireng ato mitomadaw to pidokoan to Kawas a kitiraan, ato padama to tahapadesay a salikaka. Roma i, ngaˈayay pakiyaho kita midama to mapalakay no kasakopang, anca itini sakaˈorip padama to kafanaˈan ita a salikaka. (Taneng 19:17) Onini sahtoay o midamaay to salikaka ni Kristo a pakayraan.

14. Pakayni i Ifiso 4:15, 16, sakalawidangaw ci Yisan, o saka 4 dademaken ita to maanan hani?

¹⁴ (4) Midofdof to masakenaay limasmas no likakawa no Kawas. Makakomod kita to mikayatay a salikaka, wa patanektek to kalalaˈed ita to ˈaˈideman no kasakopang. (ˈOsien ko Ifiso 4:15, 16.) Tinakoen, tokel no likakawa no Kawas songilaˈen misaka dademak ko Hongti Kitakit kasaˈopoan, mansa o roma kasakopang makakadepay, o kilac mitosil misalofan. Oniya pisalof maˈesalay ko mapalakay a payci, kawra o roma salikaka maminanam to kafalic. Halafinayto cangra i cecay kasakopang a matayal  alatek, hanaca tangongolayto ko kalawidang to salikaka. Kawra madimadiay cangra a midofdof to limasmas no likakawa no Kawas, makahi a malinah tayra faelohay kasakopang, madeng lipahakay ci Yis minengneng.

15. Itini faelohay hekal i, o kalawidang ita aci Yis hano mamatongal ko tangongol hani?

¹⁵ O manilnilay no fangcalay saocor a tamdaw iraay ko tokel malacafay ci Yisan mala hongti i Hongti Kitakit no Kawas, hanaca tahadaˈoc a malacafay cingraanan. Wa soˈlin cangra i tihi ni Yis, pakaˈaraw cingraanan, masasowal cingraanan. (Yohani 14:2, 3) Itiniay fafekang no sera ko tokel tahadaˈoc maˈorip a tamdaw wa milifok to olah ato sadipot ni Yis. Soˈlin cowa pakaˈaraw cangra ci Yisan, kawra wa ngaˈay milifok to sapalemed ni Yihofa aci Yis lipahak ko kaˈorip, mihaenay o kalawidang nangra aci Yis mamatongal ko tangongol.—Isaya 9:6, 7.

16. Malawidang kita aci Yis wa milifok to maanan a sapalemed hani?

¹⁶ Malawidang kita aci Yis wa milifok to adihayay a sapalemed. Tinakoen, aniniho ngaˈayto malifok ita ko kaciharateng ato sadipot ningra, noikor wa tahadaˈoc a maˈorip. Sakakaay i, malawidang ci Yisan papaira to kalimlaan a hafay i hakelong no kaˈorip ita, ngaˈay patireng to ngaˈayay kalalaˈed to Wama ningra ci Yihofaan. Ngaˈay kita malo widang ni Yis, tada kalipahakanto!