1. Sonaha ase sasahalak boi marhasoman orot pakon na legan?

SOMALNI, sanggah sasahalak sihol marhuan-huan atap marhasoman orot pakon na legan, maningon gati do sidea marbuali, mansaritahon pangalamanni bei, ampa na ibagas uhurni. Tapi sanggah hita sihol marhasoman pakon Jesus lang boi sonai ibahen hita. Dong piga-piga tantanganni. Aha ma ai?

2. Aha ma tantangan na parlobei laho marhasoman pakon Jesus?

² Tantangan na parlobei, lang ongga hita pajumpah pakon Jesus. Bani abad na parlobei, bahat do halak Kristen na lang ongga pajumpah pakonsi. Hassi pe sonai nini apostel Petrus do hubani sidea, “Ihaholongi nasiam do ia, age pe seng ididah nasiam ia, ihaporsayai nasiam do ia, age pe seng ididah nasiam ia sonari.” (1 Ptr. 1:8) Jadi hassi pe lang ongga hita pajumpah pakon Jesus, tapi boi do hita marhasoman orot pakonsi.

3. Aha ma tantangan na paduahon laho marhasoman pakon Jesus?

³ Tantangan na paduahon, hita lang boi marsahap pakon Jesus. Sanggah martonggo, hubani Jahowa do hita marsahap. Tongon, marhitei goran ni Jesus do hita martonggo. Tapi sedo hu bani ipadas hita tonggonta ai. Sasintongni, lang ra ia anggo  hita martonggo hu bani. Mase? Halani sanggah martonggo, doskon na manombah Naibata do ai, janah pitah Jahowa do na talup isombah. (Mat. 4:10) Hassi pe sonai, boi do totap ipatuduh hita holongta bani Jesus.

4. Aha ma tantangan na patoluhon laho marhasoman pakon Jesus janah aha ma na laho iulas hita?

⁴ Tantangan na patoluhon, i surga do Jesus sonari, jadi lang boi hita marsaor pakonsi. Hassi pe sonai, boi do itanda hita Jesus. Holi iulas hita ma ompat cara na boi ibahen hita laho patoguhkon parhasomananta pakon Jesus. Tapi paima ai, ulas hita ma mase hita maningon marhasoman pakon Jesus.

5. Mase hita maningon marhasoman pakon Jesus? (Tongor homa kotak “ Marhasoman pakon Jesus Gabe Marhasoman pakon Jahowa” ampa “ Maningon Holongan do Hita bani Jahowa Marimbangkon bani Jesus.”)

⁵ Maningon marhasoman pakon Jesus do hita ase boi marhasoman pakon Jahowa. Mase sonai? Siotikanni dong dua alasan. Na parlobei, nini Jesus do hubani susianni, “Bapa in sandiri mangkaholongi hanima, halani na dob holong uhurnima bangku.” (Joh. 16:27) Nini use, “Seng dong na das hubani Bapa in, anggo seng marhiteihon ahu.” (Joh. 14:6) Anggo hita sihol marhasoman pakon Jahowa hape lang marhasoman hita pakon Jesus, usih ma ai hita masuk hu sada rumah tapi lang humbani labahni. Janah ipausih Jesus do homa dirini songon ‘labah hubani biribiri in’. (Joh. 10:7) Alasan na paduahon, iusihi Jesus do paruhuran ni Bapani. Nini do bani susianni, “Na mangidah ahu, na mangidah Bapa in do.” (Joh. 14:9) Jadi, ase boi itanda hita Jahowa, maningon iparlajari hita ma sonaha hagoluhan ni Jesus. Anggo lambin itanda hita Jesus, lambin holong ma uhurta  hu bani. Janah anggo domma lambin orot hita pakonsi, gabe lambin bagas ma homa holongta hubani Bapani.

6. Patorang ma alasan na legan mase hita maningon marhasoman pakon Jesus.

⁶ Maningon marhasoman pakon Jesus do hita ase ibalosi tonggonta. Sanggah martonggo, ulang ma pitah hasomalan dassa ibahen hita sanggah mangkatahon “marhitei goran ni Jesus”. Tapi maningon iarusi hita do homa sonaha Jahowa manggunahon Jesus sanggah mambalosi tonggonta. Nini Jesus do bani apostelni, “Barang aha pe sipindoonnima marhitei goranku, bahenonku do.” (Joh. 14:13) Hassi pe pitah Jahowa dassa na manangar anjaha mambalosi tonggonta, tapi domma iondoskon Ia kuasa hubani Jesus laho mandalankon haputusan-Ni. (Mat. 28:18) Leganni ai, paima ibalosi Naibata tonggonta, ididah Ia do lobei ra do hita mandalankon podah ni Jesus atap lang. Umpamani, Jesus mangkatahon, “Anggo isasap hanima salah ni halak dompak hanima, sasapon ni Bapanima na i nagori atas ai do age dousanima. Tapi anggo seng isasap hanima salah ni halak dompak hanima, seng sasapon ni Bapanima age salahnima.” (Mat. 6:14, 15) Halani ai, maningon bujur ma hita hubani na legan, songon na dob ibahen Jahowa pakon Jesus hubanta!

7. Ise do na boi mandapot guna humbani tobusan?

⁷ Pitah halak na marhasoman orot pakon Jesus do na boi mandapot guna humbani tobusan. Hunja ibotoh hita ai? Jesus mangkatahon ra do ia ‘mamberehon hosahni laho mangkopkop hasomanni’. (Joh. 15:13) Tapi dong do homa halak na setia mangidangi Jahowa paima Jesus roh hu tanoh on. Umpamani, si Abraham, si Sarah, si Musa, pakon si Rahab. Holi dobkonsi ipapuho, maningon itanda sidea do Jesus janah mangkaholongisi. Ase boi dapot sidea hagoluhan na sadokah ni dokahni, maningon marhasoman pakon Jesus do sidea.​—Joh. 17:3; Lah. 24:15; Heb. 11:8-12, 24-26, 31.

8-9. Songon na ipatugah bani Johannes 15:4, 5, sonaha hita boi marhasoman pakon Jesus, janah mase hita maningon totap marsada pakonsi?

⁸ Malas uhurta rap marhorja pakon Jesus sanggah marbarita ampa mangajarhon pasal Harajaon ni Naibata hubani halak. Sanggah i tanoh on, mangajari halak do Jesus. Dobkonsi naik hu surga, gabe ulu ni kuria ma Jesus. Dobkonsi ai pe, totap do ia na mangatur horja parambilanonta. Ididah ia do haringgasonta mangurupi buei halak laho mananda ia pakon Bapani, janah ihargai ia do ai. Sasintongni, halani iurupi Jahowa pakon Jesus do hita ase boi tarhorjahon hita tugas ai.​—Basa Johannes 15:4, 5.

⁹ Tangkas ma, ase malas uhur ni Jahowa, maningon marhasoman pakon Jesus do hita janah mangkaholongisi. Jadi, ulas hita ma ompat cara na boi ibahen hita ase boi marhasoman pakon Jesus janah patoguhkon parhasomananta pakonsi.

10. Aha ma cara na parlobei ase boi marhasoman pakon Jesus?

¹⁰ (1) Marusaha ma mananda Jesus. Hita boi mananda Jesus marhitei buku Mateus, Markus, Lukas, pakon Johannes. Ijai ipatugah bujur do ia hubani halak. Anggo irimangi hita pasal hagoluhan ni Jesus, lambin holong ma uhurta hu bani. Umpamani, hassi pe sahalak Tuan ia, tapi lang songon jabolon ibahen ia susianni. Ra do ia patugahkon sonaha pangahapni ampa aha na ipingkirhon ia. (Joh. 15:15) Sanggah pusok uhur ni sidea, pusok do homa uhurni janah rap tangis do  ia pakon sidea. (Joh. 11:32-36) Gari munsuhni pe mambotoh dohor do ia bani halak na ra manangihon baritani. (Mat. 11:19) Anggo itiru hita Jesus, lambin orot ma homa parhasomananta pakon na legan janah lambin marmalas ni uhur ma homa hita. Dob ai, lambin banggal ma homa holongta hubani Kristus.

11. Aha ma cara na paduahon ase boi marhasoman pakon Jesus, janah mase ponting ai?

¹¹ (2) Tiru ma pambahenan ampa pingkiran ni Jesus. Gabe lambin orot do parhasomananta pakon Jesus anggo itiru hita pambahenan ampa pingkiranni. (1 Kor. 2:16) Sonaha carani? Rimangi ma sada contoh. Halani holong ni uhurni, rahanan do iahap ia mangurupi halak marimbangkon pasonangkon dirini. (Mat. 20:28; Rom 15:1-3) Halani ai, gabe sirsir ma ia mambere hosahni janah ra manalpuhon hasalahan ni halak. Anggo dong na lepak marsahap lang mintor borit uhurni. (Joh. 1:46, 47) Anjaha lang iahap ia jahat do halak na ongga mambahen hasalahan. (1 Tim. 1:12-14) Halani ai Jesus mangkatahon, “Hunjon ma botohon ni ganup halak susianku hanima, anggo marsihaholongan hanima.” (Joh. 13:35) Jadi, dear do anggo irimangi hita sungkun-sungkun on, “Ai marusaha do ahu maniru Jesus ase boi mardamei pakon sanina botou?”

12. Aha ma cara na patoluhon ase boi marhasoman pakon Jesus, janah sonaha hita mangkorjahon ai?

¹² (3) Urupi ma sanina ni Kristus. Jesus mangkatahon anggo iurupi hita saninani, dos songon na mangurupisi do ai. (Mat. 25:34-40) Cara na sipontingan laho mangurupi sidea ai ma marhitei mambaritahon pasal Harajaon ni Naibata janah mangurupi halak ase gabe susianni Jesus. Ai do homa na iparentahkon Jesus hubanta. (Mat. 28:19, 20; Lah. 10:42) Sasintongni, boi pe ipadas sanina ni Kristus barita ai hu sab dunia on halani iurupi ‘biribiri na legan’ do sidea. (Joh. 10:16) Jadi, sanggah marbarita biribiri na legan, on patuduhkon lang pitah sanina ni Kristus na ihaholongi sidea, tapi dihut do homa Kristus.

13. Sonaha hita mandalankon podah ni Jesus na isurat bani Lukas 16:9?

¹³ Hita boi marhasoman pakon Jahowa ampa Jesus marhitei mambere sumbangan. Anggo ibahen hita sonai, dos do homa ai hita mangurupi sanina ni Kristus. (Basa Lukas 16:9.) Umpamani, boi do ibere hita sumbangan laho mangurupi horja parambilanon i sab dunia on. Sumbangan ai igunahon laho mangurupi horja parambilanon i huta-huta bagas, pajongjongkon ampa mangurus Balei Harajaon atap bangunan sisonai, ampa mangurupi sanina botou na hona bencana alam. Boi do homa ibere hita sumbangan hu kurianta, atap pe mangurupi sanina botou na mamorluhon.​—Pod. 19:17.

14. Domu bani Epesus 4:15, 16, aha ma cara na paompathon ase boi marhasoman pakon Jesus?

¹⁴ (4) Unduk ma bani pangaturan na ibahen kuria Kristen. Anggo ra hita unduk hubani sanina na mambobahon hita ibagas holong, lambin orot ma hita pakon Jesus, halani ia do ulu ni kuria. (Basa Epesus 4:15, 16.) Umpamani, marusaha do hita ase dear manggunahon ganup Balei Harajaon. Halani ai, dong ma piga-piga kuria na ipasada. Janah daerah pangidangionni pe gabe marubah. Halani pangaturan ai, gabe boi ma organisasi pangkei manggunahon sumbangan. Tapi halani pangaturan ai, ra do adong piga-piga parbarita na porlu mambahen penyesuaian. Ra, sadokah martahun-tahun sidea domma mangidangi sada kuria. Janah domma orot sidea  pakon sanina botou na ijai. Tapi sonari, ipindo ma ase sidea mangidangi hu kuria na legan. Tontu malas tumang uhur ni Jesus anggo ra sidea unduk bani pangaturan ai!

15. Lambin sonaha ma holi parhasomananta pakon Jesus?

¹⁵ Holi ganup halak na iminaki boi mamarentah rap pakon Jesus i Harajaon ni Naibata. Rap pakon Jesus ma sidea sadokah ni dokahni, boi mangidahsi janah marbuali pakonsi. (Joh. 14:2, 3) Ihaholongi Jesus do homa ganup halak na marpangarapan manggoluh i tanoh on. Hassi pe lang boi mangidah Jesus, tapi lambin orot do holi parhasomanan ni sidea. Janah ibere Jahowa pakon Jesus ma hagoluhan na sadokah ni dokahni bani sidea.​—Jes. 9:5, 6.

16. Pasu-pasu aha ma na dapot hita halani marhasoman pakon Jesus?

¹⁶ Anggo ra hita marhasoman pakon Jesus, bahat do pasu-pasu na dapot hita. Umpamani, ihaholongi anjaha iurupi Jesus do hita sonari. Ibere do pangarapan hagoluhan na sadokah ni dokahni. Na sipontingan, halani marhasoman pakon Jesus, gabe marhasoman ma homa hita pakon Jahowa, Bapani ai. Tontu sada hasangapon do boi gabe hasoman ni Jesus!