1. Kai si perlu silakoken gelah banci erteman ras sekalak jelma?

BIASANA, gelah banci erteman ras sekalak jelma, perlu kam rusur ngerana ras ia. Kenca icakapken kena kerna perasan ras pengalamen kena, dungna banci kam erteman ras ia. Tapi, mon-mon la menukah jadi teman Jesus. Lit piga-piga tantangenna. Kai saja e?

2. Kai nge tantangen si pertama?

² Tantangen si pertama, la pernah kita jumpa ras Jesus. Situhuna, nterem kalak Kristen bas abad pertama pe la pernah jumpa ras Jesus. Amin gia bage, nina Rasul Petrus, “Keleng ate kena ia aminna pe lenga idah kena. Aminna pe lenga idah kena ia gundari, tapi erkiniteken kena man bana.” (1 Pet. 1:8) Emaka, banci kita jadi teman Jesus amin gia la pernah kita jumpa ras ia.

3. Kai nge tantangen si peduaken?

³ Tantangen si peduaken, la banci kita ngerana man Jesus. Sanga kita ertoto, kita ngerana man Jahwe. Memang, ertoto kita i bas gelar Jesus, tapi labo kita ngerana man bana. Janah Jesus pe la atena kita ertoto man bana. Engkai? Perban toto e salah sada carata nembah Jahwe, janah Dibata Jahwe ngenca si arus sisembah. (Mat. 4:10) Amin  gia bage, banci tetap sibuktiken maka keleng ateta Jesus.

4. Kai nge tantangen si peteluken? Janah kai si man bahasenta bas artikel enda?

⁴ Tantangen si peteluken, Jesus tading i surga, emaka la banci sigunaken waktuta ras ia. Amin gia bage, melala denga si banci siteh kerna Jesus. Bas artikel enda, sibahas kari empat cara si banci silakoken gelah rembak hubungenta ras Jesus. Tapi si pertama, sibahas lebe ngkai maka perlu kita jadi teman Kristus.

5. Engkai maka arus kita jadi teman Jesus? (Nen ka kotak “ Adi Jadi Teman Jesus Kita, Banci Kita Jadi Teman Jahwe” ras “ Seimbanglah Perukurenta kerna Jesus.”)

⁵ Arus kita jadi teman Jesus gelah banci kita jadi teman Jahwe. Engkai? Lit piga-piga alasenna, tapi mari sibahas dua saja. Si pertama, nina Jesus man murid-muridna, “Keleng ate Bapak nandangi kena perban nggo ikelengi kena aku.” (Joh. 16:27) Nina ka, “Ise pe la banci ndahi Bapak adi la kin arah aku.” (Joh. 14:6) Adi ateta jadi teman Jahwe tapi la kita jadi teman Jesus, e bali bagi masuk ateta ku sada rumah tapi la arah pintuna. Igunaken Jesus ka perumpaman si bage sanga ikatakenna maka dirina “pintu guna biri-biri.” (Joh. 10:7) Alasen si peduaken, banci iusih Jesus sipat-sipat Bapakna alu sempurna. Nina Jesus man murid-muridna, “Ise si nggo ngidah aku, nggo ka idahna Bapak.” (Joh. 14:9) Emaka, salah sada cara gelah banci sitandai Jahwe eme alu erlajar kerna kegeluhen Jesus. Adi terus kita erlajar kerna Jesus, reh kelengna ateta ia. Janah adi nggo reh kelengna ateta Jesus, pasti reh kelengna ka ateta Bapakna.

6. Kai ka nge alasenna arus kita jadi teman Jesus? Jelasken.

 ⁶ Arus ka kita jadi teman Jesus gelah ijawap Jahwe totota. Enda ertina labo ngenca sikataken “i bas gelar Jesus” bas pendungi totota. Arus siangkai uga Jahwe nggunaken Jesus sanga njawap totota. Nina Jesus man rasul-rasulna, “Kai pe si ipindo kena i bas gelarku, kubereken nge.” (Joh. 14:13) Jelas me, aminna pe Jahwe si megiken ras njawap pertotonta, nggo iberekenNa kuasa man Jesus guna ndalanken keputusenNa. (Mat. 28:18) Selain si e, sope ijawap Jahwe totota, inenNa lebe nggo nge sidalanken pedah Jesus ntah lang. Misalna, nina Jesus, “Adi iampuni kena kesalahen kalak si deban, kena pe iampuni Bapak kena si i surga. Tapi adi la iampuni kena kesalahen kalak si deban, Bapak kena pe la ngampuni kesalahen kena.” (Mat. 6:14, 15) Emaka, arus mehuli perbahanenta man kalak si deban, bali bagi perbahanen Jahwe ras Jesus man banta!

7. Ise saja si banci ndatken manfaat arah korban tebusen Jesus?

⁷ Kalak si jadi teman Jesus ngenca si banci ndatken manfaat arah korban tebusenna. Ja nari banci siteh? Ikataken Jesus maka ‘iberekenna geluhna guna teman-temanna.’ (Joh. 15:13) Uga kerna umat Dibata si nggeluh sope Jesus reh ku doni, misalna Abraham, Sara, Musa, ras Rahap? Kalak e pe arus erlajar kerna Jesus ras ngkelengi ia kenca kalak e ipekeke pagi. Tapi, arus ka kalak e jadi teman Jesus gelah banci nggeluh rasa lalap.​—Joh. 17:3; Perb. 24:15; Heb. 11:8-12, 24-26, 31.

8-9. Bagi si ijelasken bas Johanes 15:4, 5, kai si banci silakoken adi kita jadi teman Jesus? Janah ngkai maka penting terus jadi teman Jesus?

⁸ Meriah kel ukurta banci erdahin ras Jesus bas mberitaken ras ngajarken berita si meriah kerna Kerajan Dibata. Sanga Jesus nggeluh i doni, iajarina nterem jelma. Kenca Jesus naik ku surga janah jadi kepala runggun, terus ipinpinna dahin erberita ras erban murid. Iperdiatekenna ras iergaina kerina si nggo silakoken guna nampati nterem jelma nandai ia ras Bapakna. Situhuna, banci silakoken dahin e perban kita isampati Jahwe ras Jesus.​—Baca Johanes 15:4, 5.

⁹ Iajarken Pustaka maka gelah banci meriah siban ukur Jahwe, arus keleng ateta Jesus janah terus sikelengi ia. Emaka gundari, sibahas empat cara si banci silakoken gelah jadi teman Jesus.

10. Kai nge cara si pertama si perlu silakoken gelah banci kita jadi teman Jesus?

¹⁰ (1) Usahakenlah nandai Jesus. Banci silakoken e adi sibaca Injil Matius, Markus, Lukas, ras Johanes. Adi siukuri alu mbages kegeluhen Jesus si itulis bas empat Injil e, reh kelengna ateta Jesus janah siergai ia perban mehuli kel perbahanenna man kalak si deban. Misalna, la pernah iban Jesus murid-muridna e bagi budak, aminna pe ia Tuan kalak e. Janah, Jesus pe nggit nceritaken isi pusuhna ras perukurenna man kalak e. (Joh. 15:15) Sanga sedih kalak e, Jesus pe sedih ka iakapna janah tangis ia. (Joh. 11:32-36) Kalak si nentang Jesus pe iakuina maka Jesus nggit erteman ras ise pe si ngaloken beritana. (Mat. 11:19) Adi siusih perbahanen Jesus man murid-muridna, banci reh ulina hubungenta ras kalak si deban, reh riahna ukurta, reh kelengna ateta Jesus janah reh bagesna pengerganta man bana.

11. Kai cara si peduaken si perlu silakoken gelah banci kita jadi teman Jesus? Janah ngkai?

 ¹¹ (2) Usihlah perukuren ras perbahanen Jesus. Adi siusahaken ngangkai ras ngusih perukuren Jesus, reh rembakna hubungenta ras ia. (1 Kor. 2:16) Uga kita banci ngusih Jesus? Mari sibahas salah sada contohna. Rusur iukuri Jesus kepentingen kalak si deban, labo kepentingenna saja. (Mat. 20:28; Rom. 15:1-3) Erkiteken si e, nggit Jesus erkorban janah nggit ia ngampuni. La mis kitik ukurna perban kai si ikataken kalak kerna ia. (Joh. 1:46, 47) Janah aminna pe mbarenda lit si ersalah man Jesus, la negatif perukurenna kerna kalak e. (1 Tim. 1:12-14) Engkai maka arus siusih Jesus? Perban nina Jesus, “Adi kena sikeleng-kelengen, kerina kalak meteh maka kena me murid-muridku.” (Joh. 13:35) Ukurilah penungkunen enda: ‘Kuusahaken nge asa ngasupku ngusih Jesus alu njaga hubungenku ras turang senina tetap dame?’

12. Kai cara si peteluken si perlu silakoken gelah banci kita jadi teman Jesus? Janah uga carata ngelakokenca?

¹² (3) Sampatilah turang senina Kristus. Adi sisampati turang senina Kristus si ipilih ku surga, ianggap Jesus penampatta e ibereken man bana. (Mat. 25:34-40) Cara si pentingna i bas nampati kalak e adi siusahaken asa ngasupta ndalanken tugas si ibereken Jesus, eme erberita ras erban murid. (Mat. 28:19, 20; Perb. 10:42) Adi la isampati ‘biri-biri si deban’ turang senina Kristus bas ndalanken tugas e, dahin erberita la banci seh ku sebelang doni bagi si ilakoken gundari. (Joh. 10:16) Biri-biri si deban nge kam? Adi bage, sanga kam erberita ras ngajar, ibuktikenndu me maka keleng atendu Jesus ras turang seninana.

13. Uga carata ndalanken nasehat Jesus bas Lukas 16:9?

¹³ Banci ka kita jadi teman Jahwe ras Jesus adi sibereken sumbangen guna ndukung pendahin si ipinpin Jahwe ras Jesus. (Baca Lukas 16:9.) Misalna, banci sibereken sumbangen guna pendahinta i sebelang doni. Dana sumbangen e ipake guna mbiayai dahin erberita bas ingan si seh kel dauhna, mbangun ras ngurus bangunen-bangunen organisasi, janah mereken penampat man korban bencana. Banci ka sibereken sumbangen guna nutupi pengeluaren bas runggunta ntah pe banci ka sisampati turang seninata si merluken penampat. (Kua. 19:17) Enda me piga-piga carata nampati turang senina Kristus.

14. Menurut Epesus 4:15, 16, kai cara si peempatken si perlu silakoken gelah banci kita jadi teman Jesus?

¹⁴ (4) Sidukunglah pengaturen bas runggun. Adi nggit kita kerja sama ras turang seninata si nggo ilantik guna njaga kita bas runggun, reh deherna me kita ras Jesus, kepala kerina runggun. (Baca Epesus 4:15, 16.) Misalna, iusahaken organisasi gelah kerina Bale Kerajan igunaken alu mehuli. Emaka, bas pudi wari enda, lit piga-piga runggun si igabungken janah batas wilayah runggun-runggun pe isesuaiken. Hasilna, banci melala kel dana sumbangen si ihemat organisasi. Tapi erkiteken perubahen e, piga-piga perberita arus ka erban penyesuaien. Kalak e nggo setia ngelayani bas sada runggun ertahun-tahun dekahna, janah nggo rembak kel kalak e ras turang senina bas runggun e. Aminna pe bage, sanga isuruh kalak e gelah pindah ku runggun si deban, nggit kalak e ngelakokenca. Pasti meriah kel ukur Jesus ngidah  kalak e nggit kerja sama ras ngikutken petunjuk!

15. Engkai maka banci reh rembakna hubungenta ras Jesus bas wari si pepagi?

¹⁵ Kalak si nggo ipilih alu kesah si badia ikut merentah pagi ras Kristus i bas Kerajan Dibata. Lit arapen kalak e nggeluh rasa lalap ras Kristus, janah banci terus idah kalak e ia, ngerana ras ia, janah banci melala waktu si igunaken kalak e ras ia. (Joh. 14:2, 3) Man kalak si arapenna nggeluh rasa lalap i doni, banci ka igejapkenna kekelengen Jesus ras uga ermediatena Jesus man kalak e. Meriah kel iakap kalak e pagi sanga idat kalak e kegeluhen si rasa lalap si ibereken Jahwe ras Jesus. (Jes. 9:6, 7) Aminna pe la banci idah kalak e Jesus, banci reh rembakna hubungen kalak e.

16. Kai saja nge pasu-pasu si banci sidat adi kita jadi teman Jesus?

¹⁶ Adi sialoken undangen Jesus guna jadi temanna, melala kel sidat pasu-pasu. Misalna, sigejapken gundari kekelengen ras dukungen Jesus. Sidat ka kesempaten nggeluh seh rasa lalap. Janah si pentingna, adi kita jadi teman Jesus, sidat me erta si mehergana, eme reh rembakna kita ras Bapakna, Jahwe. Sada kehamaten kel banta banci jadi teman Jesus!