1. Ka lunbei hadügüni bián gürigia lun gamadagua hamá?

LIBE-AGEI dan, lun gamadagua hamá bián gürigia, mosu hásügürün dan úara luma lun ayanuha luagu le hasaminarubei, luagu le hasandirubei luma luagu le winwan hamaalibei. Ligíati, dan le wasaminarun gamadagua wamá luma Hesusu, másiñati genege lan woun hénrengubei lan katei le. Ariha wamá fiu resun ka lan uagu.

2. Ka furumiñetibei resun adügübei lun genege lan hénrengubei lan lun gamadagua wamá luma Hesusu?

² Le furumiñeti resun, marihin wamuti Hesusu lau wagu guánarügü. Añahein meha furumiñeti kristiánugu ha lánina furumiñeti sígulu ligiaméme meha asuseredubei houn. Íbini ítara, ariñagati apostolu Féduru houn: “Hínsiñeti Hesukrístu hun lau sun marihin humagili lan; ani lau sun lira, afiñeedün luagu” (1 Fe. 1:8). Ligíati, mama mosu warihini Hesusu lau wagu guánarügü lun gamadagua wamá luma.

3. Ka libiamanbei resun?

³ Le libiaman resun, siñá lan wayanuhan luma Hesusu. Dan le wafurieidun, lun Heowá wadügei. Inarüni lidan lan liri Hesusu wafurieida, gama lumoun, mama lun wayanuha. Ani mabusenrunti Hesusu lun wafurieidun lun. Ka uagu? Ladüga furíei, ligía aban lídangiñe fánreinti lani wáhuduragun, ani lúnrügüba Heowá wáhuduragua (Mat. 4:10). Íbini ítara, gayaraati warufuduni hínsiñe lan Hesusu woun.

4. a) Ka lǘrüwanbei resun? b) Kaba wariha lidan arütíkulu le?

 ⁴ Le lǘrüwan resun, siñá lan wásügürün dan luma Hesusu ladüga sielun lan lawinwanda. Íbini sielun lan lawinwanda, gayaraati wasubudirun saragu luagu. Lidan arütíkulu le, warihuba gádürü katei le lunbei wadügüni lun buidu lan wamadagua luma. Furumiñe, ariha wamá ka lan uéigiñe súdini lubéi lun gamadagua wamá luma Kristu buidu.

5. Ka uagu mosu lubéi gamadagua wamá luma Hesusu? (Ariha huméi giñe rekuáduru “ Adügati gamadagua wamá luma Hesusu lun gamadagua wamá luma Heowá” luma “ Ariha waméi Hesusu lau lubudubu”).

⁵ Mosu gamadagua wamá luma Hesusu lun gamadagua wamá luma Heowá buidu. Ka uagu wariñagei le? Ariha wamá bián resun. Furumiñe, aba lariñagun Hesusu houn lani disipulugu: “Hínsiñetün lun [Núguchi]. Hínsiñetün lun ladüga hínsiñe nan hun” (Huan 16:27). Ariñagati giñe: “Úati achülürüti lumoun Bungiu Úguchili anhein mama lubéi nuéigiñe” (Huan 14:6). Hénrengubei lun gamadagua wamá luma Heowá sin gamadagua wamá luma Hesusu, ítara liña katei le kamá hamuga busentiwa lun webelurun tidoun aban muna sin wásügürün luéigiñe bena. Yúsuti Hesusu aban sügǘ lenege lira dan le lariñagubei ligía lan bénabei “le ñéingiñe lubéi hebelura mudún” (Huan 10:7). Le libiaman resun, arufuda lumuti Hesusu ligaburi Lúguchi sunsuinagubei. Aba lariñagun houn lani disipulugu: “Le arihitina, larihiñein giñe Bungiu Úguchili” (Huan 14:9). Ligíati, aban lídangiñe igaburi le súdinitimabei lun lasubudiruniwa Heowá, lau wasubudiruni Hesusu. Eibu wafurendeirun luagu, éibume línsiñedun woun. Éibume wayarafadun lun Hesusu, éibume giñe línsiñedun Lúguchi woun.

6. Ka amu resun adügübei lun gamadagua wamá luma Hesusu?

 ⁶ Mosu gamadagua wamá luma Hesusu lun lounabún wafurieidun. Mini lan le ua lan buídurügü lan láurügü wariñagun “lidan liri Hesusu” dan le lagumuchun wafurieidun. Lunti giñe gunfuranda wamani ida liña lan layusuruni Heowá Hesusu lun lóunabuni wafurieidun. Aba lariñagun Hesusu houn lani apostolugu: “Sun le hamuriahan lidan niri, nadügübei” (Huan 14:13). Heowá aganbubalin wafurieidun ani óunabalei, ani ru haali üma lun Lisaani lun ladügüni le lariñagun lun (Mat. 28:18). Lubaragiñe lóunabuniwa, ariha lumuti anhein gaganbadi wabéi lun adundehani le líchugubei Hesusu, kei hénpulu aba lariñagun: “Ítara liña lubeiti, ánhaña feruduna humá amu luagu wuribati le adüga hamaalibei hun, feruduna lubadün giñe Húguchi Bungiu le siélubei; anhein ua feruduna humá amu, úabei giñe feruduna lani Húguchi Bungiu hifigoun” (Mat. 6:14, 15). Ma inarüni súdini lan lun warufudun gudemehabu houn amu libe le larufudubei Heowá luma Hesusu?

7. Ka lunbei wadügüni lun weresibiruni buiti le lanügübei esefuruni le ladügübei Hesusu?

⁷ Hárügübaña gamadaguabaña buidu luma Hesusu hagíarügübaña eresibirei buiti le lanügübei esefuruni. Ida liña wasubudiruni le? Lugundun ariñagati Hesusu líchigaali lan “libagari hawagu lumadagu” (Huan 15:13). Ha meha lubúeingu Heowá ha úaraguabaña ha meha awinwandubaña lubaragiñe liabin Hesusu ubouagun mósume hafurendeirun luagu Hesusu luma lun línsiñedun houn. Dandu wügüriña kei würiña ha úaraguabaña kei burí Abüraámü, Sara, Moisesi, o Raabü sun gürigia ha hawinwandayaba, íbinime hagía mósume gamadagua hamá luma Hesusu lun gayaraabei lan heresibiruni ibagari magumuchaditi (Huan 17:3; Adü. 24:15; Ebü. 11:8-12, 24-26, 31).

8, 9. Ítara kei larufuduni Huan 15:4, 5, ka gayaraabei wadügüni seremei gamadagua wamá luma Hesusu, ani ka uagu lunti lubéi lidan wamá aban luma?

⁸ Anihein aban lubuidun chansi wama lun wídehan luma Hesusu lidan apurichihani luma lun warufudahani uganu buiti lánina Larúeihan. Dan le ubouagu lubéi, arufudaha lumuti inarüni luagu Bungiu. Lúmagiñe lagiribudun sielun, anihamémegua kei Lichügüdina damuriguaü, abugurei dasi le. Ariha lumuti Hesusu ani gebegiti áfaaguni le wadügübei lun lun wíderaguniña sun ha wayaraatiña lun hasubudiruni luma lun hasubudiruni Lúguchi. Siñá wabéi dasi le anhein mama lubéi lau lídehan Heowá luma Hesusu (aliiha huméi Huan 15:4, 5).

⁹ Arufudaha tumuti Bíbülia woun furangu lunti lan hínsiñe lan Hesusu woun anhein busén wabéi wagundaaragüdüni Heowá. Ligíati, ariha wamá gádürü katei súdiniti lun gamadagua wamá luma Hesusu.

10. Ka furumiñeti katei lunbei wadügüni lun gamadagua wamá luma Hesusu?

¹⁰ Furumiñe, subudi waméi Hesusu. Lun lira, aliiha wamóun líburu to tídanboun Bíbülia liliburun Matéu, Márükosu, Lúkasi luma Huan. Lau wasaminarun hulili luagu abahüdaguni luáguti libagari Hesusu luma lau warihini óusera lániña gürigia lau areini, wasandiruba ínsiñeni luma inebesei luagu. Kei hénpulu, móuserun lumutiña lani disipulugu kamá hamuga idamuni hagía íbini ligía lan Haburemebei. Óuserarügü lumutiña kei lumadagu ani ariñaga lumuti le lasaminarubei luma le lasandirubei houn (Huan 15:15). Sandí lumuti le hasandirubei ani ayahuahati hama (Huan 11:32-36). Íbini lumadagu rútiña fe gamadagua lan hama ha ánharubaña lun luganute (Mat. 11:19). Ánhawa óuseraaña  amu kei lóuseruniña lani disipulugu, buídubei wanügagun woungua hama, gúndaatimabadiwa ani hínsiñetimabei Hesusu woun ani inebetimaabei giñe woun.

11. Ka libiamanbei katei lun gamadagua wamá luma Hesusu, ani ka uagu súdini lubéi?

¹¹ Le libiaman, samina wamá ani adüga waméi katei kei ladügüni Hesusu. Eibu wasubudiruni Kristu buidu ani áyeiha waméi ligaburi lisaminan, derebugutimaabei wamadagua luma (1 Ko. 2:16). Ida luba wáyeihani Hesusu? Ariha wamá aban hénpulu. Súdinitimati meha lun líderagun amu sügǘ luéi líchugun ugundani lúniwagua (Mat. 20:28; Rom. 15:1-3). Kei le ítara liña lan ligaburi lisaminan, adügati saragu katei luagu hafulesein ani feruduna lumutiña giñe. Magañidunti lau lóufudagun luagu le hariñagubei luagu (Huan 1:46, 47). Mareidahati meha igarihabu habá gürigia (1 Tim. 1:12-14). Súdiniti wáyeihani, ladüga ariñagati: “Anhaün hínsiñegua húmagua, hasubudirubei sun gürigia luagu nani humá disipulugu” (Huan 13:35). Ligíati, álügüdagua wamá woungua: “Ítara kei Hesusu, nadügüñein san sun niyaraati lun lidan nan darangilaü hama níbirigu?”.

12. Ka lǘrüwanbei katei lun gamadagua wamá luma Hesusu, ani ida luba wadügüni?

¹² Lǘrüwan, íderagua wamaña líbirigu Kristu. Ariñagati Hesusu le lan wadügübei lidan wíderaguniña kritiánugu anuadirúaaña, ha líbirigu, ítara liña kamá ligía wíderagubei (Mat. 25:34-40). Aban igaburi le buídubei lun wíderaguniña lau wadügüni dasi le líchugubei houn ha afalarubalin lun hadügüni: lapurichihóun luáguti Larúeihan Bungiu luma lun hadügǘn disipulugu (Mat. 28:19, 20; Adü. 10:42). Huuti ídemuei le híchugubei “amu mudún” lun gayara lan hagunfulirun líbirigu Kristu lau dasi lánina apurichihani le adügǘbei lidan sun ubóu uguñe weyu (Huan 10:16). Anhein hádangiñetiwa lubéi amu mudún, sagü wapurichihan lidan dasi le, warufuduñein hínsiñe hamá kristiánugu anuadirúaaña woun ani hínsiñe lan giñe Hesusu woun.

13. Ida luba wafalaruni adundehani le líchugubei Hesusu le adarirúbei lidan Lúkasi 16:9?

¹³ Adügatiwa giñe dandu umadaguaü luma Heowá kei luma Hesusu lau wayusuruni waseinsun lun wídehan lidan dasi le habugurubei (aliiha huméi Lúkasi 16:9). Kéiburi gayaraati wíchugun seinsu lun lamainirún apurichihani lidan fulasu díseti, tábunawagun luma taransehóun muna to tayusuruboun lóundarun Heowá ani seriwiti giñe lun hiderawagún gürigia ha asufurirubaña ladüga somu liñawan dan. Gayaraati giñe wíchugun budagia lidan adamuridaguni le ñein wabéi luma lun wíderaguniña íbirigu ha wasubudirubaña megei hamá hiderawagún (Ari. 19:17). Ítara luba wíderaguniña líbirigu Kristu.

14. Según Éfesuna 4:15, 16, ka ligadürünbei katei lun gamadagua wamá luma Hesusu?

¹⁴ Le ligadürün, ídeha wamá lidan aransehani le ladügübei damuriguaü. Aba lederebugudun wamadagua luma Hesusu, le lichügüdina damuriguaü, dan le wídehan hama íbirigu ha iridúbaña lun hóunigiruniwa lau saragu ínsiñeni (aliiha huméi Éfesuna 4:15, 16). Kei hénpulu, tadügüñein lóundarun Heowá sun tiyaraati lun tachoururuni tayusurún Luban Adamuridaguni buidu. Lau saminaü le lóundarawaguña le líbiri damuriguaü luma amu lun lidan lan aban, ani adügǘwaali aransehani luáguti fulasu le ñein lubéi lapurichihóua. Le lanügübei aransehani libe le lun mibe lan seinsu agastaruti. Luagu le aban oubaü, ladüga asansiruni le, añahein amu apurichihatiña mosu héchudun luagu iseri gádantiña. Másiñati lǘhaña lan íbirigu úaraguatiña ha lidan damuriguaü le ñein habéi ani héchuhaña hawagu íbirigu ha ñéinbaña. Ani guentó amuriahóuwaali  hama lun heseriwidun lidan amu damuriguaü. Ma funa lugundan Hesusu larihiniña íbirigu úaraguatiña ha ídeha lidan le aransewaalibei.

15. Kaba asusereda lun wamadagua luma Hesusu ámuñegü?

¹⁵ Sun kristiánugu anuadirúaaña lau sífiri sandu agurabatiña luma hamá Hesusu lun súnwandan luma lun harúeihan luma lidan Larúeihan Bungiu. Harihibei, hayanuhaba luma ani hásügürüba dan luma (Huan 14:2, 3). Ha giñe agurabubaña hawinwandun ya ubouagu, hagundaaruba giñe lau línsiñehabu Hesusu ani leteniruba houn. Íbini marihin habéi lan lederebuguduba hamadagua luma saragu sun añaha lan agundaara lau ibagari le lunbei líchuguni Heowá luma Hesusu houn (Isa. 9:6, 7).

16. Ka abiniruni wibihibei luagu gamadagua wamá luma Hesusu?

¹⁶ Dan le wánharun lun amisurahani le ladügübei Hesusu lun wamada lan, ibihatiwa saragu abiniruni. Kei hénpulu, guentó ru lumuti línsiñehabu woun luma lídehan. Ani gachansintiwa lun wawinwandun lun súnwandan. Ani lanwoun lira, lau gamadagua wamá luma Hesusu, ladügüba lun gamadagua wamá luma Heowá le Lúguchi, aban umadaguaü le gebegitimabei. Ma lubuidun chansi gamadagua wamá luma Hesusu!