1. Wu akiswa kutxani wungana?

NGU mtolovelo, txo khata txi lavekako ti to u va mngana wa m’thu wo kari, ngu heta mbimo mi di motshe. Mbimo yi mi mananako mi bhula mi gelana ta mbiluni, mi aka wungana. Kambe ka wungana wathu ni Jesu, ku ni sikarato. Ngu sihi?

2. Ngu txihi txikarato txo khata atxi hi mananako natxo?

² Txikarato txo khata ngu ti to athu kha hi mu woni Jesu ngu maso. Makristu mamwani a mbimo ya vapostoli ni ona ma ti natxo txikarato txonetxo. Hambi keto, mpostoli Pedro a wombile tiya: “Ene wu mi m’randako, hambiko mi sinziko ku mu wona, ene wu mi kholwako kwakwe.” (1 Pedro 1:8) Ngu toneto, hambiku hi si khaliko kuwona Jesu ngu maso, ta koteka to hi va vangana vakwe.

3. Ngu txihi txikarato txa wumbidi atxi hi mananako natxo?

³ Txa wumbidi ngu ti to kha hi nge sikoti kuwomba-womba ni Jesu. Mbimo yi hi mahako mkombela hi wu mkongomisa ka Jehovha. Ditshuri ti to hi kombela ngu ditina dakwe, kambe hi nge womba-wombi nayo. Nem ene Jesu kha hi tumeleli ku hi womba-womba nayo. Ngu kutxani? Nguko mkombelo mbukhozeli, kuveti awu a fanelwako ku khozelwa hi Jehovha dwe. (Mat. 4:10) Hambi  keto, hi nga sikota kukombisa lirando ka Jesu.

4. Ngu txihi txikarato txa wuraru atxi hi mananako natxo? Hi na bhula ngu txani ka msungo wuwa?

⁴ Txa wuraru ngu ti to Jesu a zumba nzumani, se ti nge koteki to hi zumba nayo. Kambe eto kha ti lavi kuwomba to hi nge sikoti ku mziva kwati nguko hi si mu woniko. Konkuwa hi na wona mune wa timhaka ati hi nga ti mahako ti to hi tsanisa wungana wathu ni Jesu. He khati ngu kuxolisisa to ngu kutxani ti di ni lisima kuaka wungana ni Kristu.

5. Ngu txihi txivangelo txo va vangana va Jesu? (Wona dibhokiso di di ku “ Ngako hi di vangana va Jesu hi na va vangana va Jehovha” ni di ku “ U nga teki Jesu kota Txizimu.”)

⁵ Ngako hi txi lava ku va ni wuxaka wa wunene ni Jehovha, hi fanete hi va vangana va Jesu. Ngu kutxani? Ngu mhaka ya sivangelo simbidi. Txo khata, Jesu a gete vagondiswa vakwe a txi khene: “Ene Tate apune wa mi randa, nguko nanu mi ni randile.” (Joh. 16:27) A tshumete a txi khene: “Kha nga ho awule a tako ka Tata, i singa ngu ngani.” (Joh. 14:6) Kuduketa kuaka wungana ni Jehovha na hi si pfani ni Jesu ti fana ni kubela nyumbani ngu kufaya diseta, i si nga ngu ditimba. Jesu a thumisile txikombiso txo fana mbimo yi a nga khene ene ‘njike txa tinvuta.’ (Joh. 10:7) Txa wumbidi ngu ti to Jesu a kombisile tifanelo ta Tate wakwe ngu kuhetiseka. Ene a wombile tiya: “Awule a ni wonako, a woni Tate.” (Joh. 14:9) Ngu toneto, nzila ya lisima yo ziva kwati Jehovha, ngu gonda ngu wutomi wa Jesu. Mbimo yi hi gondako ngu Jesu, lirando  lathu ngu ngene li na kula. Ngako wungana wathu ni Jesu wu txi kula, lirando lathu ngu Tate wakwe li na engeteleka.

6. Ngu txihi txivangelo tximwani txo hi va ni wungana ni Jesu? Txhamusela.

⁶ Ti to mikombelo yathu yi xamulwa ti lava hi va ni wuxaka ni Jesu. Atiya kha ti lavi kugwitela kuwomba ku “ngu ditina da Jesu” ka mikombelo yathu. Ti lava hi pfisisa nzila yi Jehovha a xamulako ngu yona mikombelo yathu ngu kuthumisa Jesu. Jesu a gete vapostoli vakwe atiya: “Sotshe si mi no kombela ngu ditina dangu, ni na si maha.” (Joh. 14:13) Hambiku Jehovha i ku ene a engisako mikombelo yathu, ene a thumisa Jesu ti to e maha ati Ene a ti lavako. (Mat. 28:18) Na Jehovha a si hi divalelwa sionho sathu, ene a khata ngu kuwona to ina hi engisile txirumo txa Jesu, se i di kona a hi divalelako. Ngu txikombiso Jesu a ti khene: “Ngako mi txi divalela vathu sionho sawe, Tate wanu wa nzumani a na mi divalela nanu sionho sanu. Aniko ngako mi si divaleli vathu sionho sawe, Tate wanu nene kha na mbi mi divalela sionho sanu.” (Mat. 6:14, 15) Se ti ni lisima ku hi ñola vamwani nga ti Jehovha ni Jesu va hi ñolisako tona.

7. Mba mani va va wuyelwako ngutu ngu digandelo da Jesu?

⁷ Ava va ku ni wungana wa hombe ni Jesu ngu vona va no wuyelwa ngutu ngu digandelo da mtirulo. Hi ti zivisa kutxani? Jesu a wombile to a ndi na ‘ningela wutomi wakwe ngu mhaka ya vangana vakwe.’ (Joh. 15:13) Vathu vo thembeka ava va nga hanya na Jesu a se ta ha mafuni ti na lava ve ta gonda ngu ngene ni kutshumela ve aka wungana nayo. Vathu vonevo va no ta wuswa vo fana ni Abrahamu, Sara, Mosi ni Rahabhe hambiku va nga fa va di thembekile ka Jehovha ti na lava ve ta aka wungana ni Jesu ti to ve hanya ngu ha ku si gumiko.—Joh. 17:3; Mith. 24:15; Vaheb. 11:8-12, 24-26, 31.

8-9. Nga ha ti nga kombiswa ngu kona ka dibhuku da Johani 15:4, 5, kuva ni wuxaka ni Jesu ti na hi vhuna kumaha txani, ni ku ngu kutxani i di ta lisima?

⁸ Hi ni lungelo yo thuma kumweko ni Jesu ka mthumo wo txhumayela mahungu a manene a Mfumo. Mbimo yi Jesu a nga ti ha mafuni i ti mgondisi. Kambe, kukhukhela a di tsute nzumani, Jesu kota msungo wa dibanza da Wukristu a simama e thangela mthumo wo txhumayela ni kugondisa. Ene wa ninga lisima mizamo yako yo vhuna vamwani ngu ha u nga ti kotako ngu kona ti to ve mu ziva ene ni Tate wakwe. Kuwomba ditshuri, mthumo wuwa hi wu mahako hi wu kota ngu ko na ha ko vhunwa ngu Jehovha ni Jesu.—Lera Johani 15:4, 5.

⁹ Dipswi da Txizimu di ti veka hakubasani ti to mbimo yotshe ti lava hi va ni lirando ngu Jesu ti to hi tsakisa Jehovha. Se konkuwa he wone mune wa tinzila ati ti nga hi vhunako ku hi va vangana ni Jesu.

10. Ngu yihi nzila yo khata yo aka wungana ni Jesu?

¹⁰ 1) Ziva kwati Jesu. Hi nga maha tiya ngu kulera mabhuku ya Matewu, Marku, Luka ni Johani. Mbimo yi hi alakanyisisako ngu matimu a wutomi wa Jesu, ti na hi vhuna ku hi randa ni kuxonipha Jesu ngu kuwona nzila yi a nga txi ñola ngu yona vathu. Ngu txikombiso, hambiku i nga ti  M’gondisi a si nõli vagondiswa nga o va sithumi. Hahanze keto, a txi va bhulela ta mbiluni. (Joh. 15:15) Jesu a txi kupfa kupanda kwawe e tshumela e dila navo. (Joh. 11:32-36) Hambi valala vakwe va txi ti wona to ene a ti maha wunga ni va va nga ti tumela tigondo takwe. (Mat. 11:19) Ngako hi txi etetela Jesu ka nzila yi a nga txi ñola ngu yona vangondiswa vakwe, wuxaka wathu ni vamwani wu na tshukwala, hi na va ni litsako ni kutshumela hi kulisa wuxaka wathu ni Jesu.

11. Ngu yihi nzila ya wumbidi yo aka wungana ni Jesu? Ngu kutxani i di ya lisima?

¹¹ 2) Etetela Jesu ka mapimiselo ni simaho. Ngako hi txi mu ziva kwati Jesu ni ku etetela mapimiselo akwe wungana wathu ni nene wu na kula. (1 Vak. 2:16) Hi nga etetelisa kutxani Jesu? Wona txikombiso txiya, Jesu a txi pimisa ngutu ngu kuvhuna vamwani i si nga ku ti tsakisa. (Mat. 20:28; Var. 15:1-3) Aku a nga ti ni mapimiselo yawa, ene a ti khatala ngutu ngu vamwani ni ku va divalela. A si na txi henyelani ngu mhaka ya sibwabwata sa vathu. (Joh. 1:46, 47) Ene kha ñola vathu ngu kuya ngu sionho si va nga ti si maha kale. (1 Tim. 1:12-14) Jesu a wombile tiya: “Ngu toneto va no mi zivisa tona ti taku mi vagondiswa vangu: Ngako mi txi randana.” (Joh. 13:35) Ti wotise tiya: “Ina ni maha totshe ti ni ti kotako ti to ni sakulela kudikha ni vanathu?”

12. Ngu yihi nzila ya wuraru yo aka wungan ni Jesu? Ni ku hi nga ti mahisa kutxani?

¹² 3) Vhuneta vanathu va Kristu. Ati hi mahelako vasawuleki kasi ku va vhuneta, Jesu a ti wona hi txi mahela ene apune. (Mat. 25:34-40) Nzila yo khata yo kombisa ti to ha vhuneta vanathu vonevo ngu kupateka ka mthumo wu Jesu a nga ninga vagondiswa vakwe i ku wo txhumayela ni kugondisa mahungu a manene a Mfumo. (Mat. 28:19, 20; Mith. 10:42) Vasawuleki va sikota kuhetisisa mthumo wuwa wa hombe wo txhumayela ha mafuni kotshe ngu kona ha ko vhunwa ngu “timwani tinvuta.” (Joh. 10:16) Ngako awe u di mmweyo wa tinvuta timwani, ditshiku ni ditshiku di u txhumayelako u kombisa lirando i si nga ka vasawuleki dwe, kambe ni ka Jesu apune.

13. Hi nga txi thumisisa kutxani txialakanyiso a txi txi ku ka Luka 16:9?

¹³ Hi tshumela hi maha wungana ni Jehovha ni Jesu ngu kuthumisa miningelo yathu ti to hi vhuneka ka mthumo wu va wu thangelako. (Lera Luka 16:9.) Ngu txikombiso, hi nga maha mingelo yo vhuneta mthumo wa ha mafuni kotshe, i ku miningelo yi yi vhunetako ka mthumo wo txhumayela mahungu a manene ka makhalo a kule, ko aka ni kuwuseta tinyumba ta wukhozeli wa ditshuri, ni kuvhuneta ka va va nga manana ni tiphango. Hi nga tshumela hi maha mingelo yo vhuneta dibanza dathu ni kuvhuna vamwani ava va ku ka txilaveko. (Mav. 19:17) Atiya ngu tona tinzila to vhuneta vasawuleki.

14. Nga ha ti nga kombiswa ngu kona ka Vaefesu 4:15, 16, ngu yihi nzila ya wuraru yo va mngana wa Jesu?

¹⁴ 4) Seketela malulamiselo a sengeletano. Hi nga kulisa wungana wathu ni Jesu kota msungo wa dibanza da Wukristu ngu kuseketela ava va hi thangelako. (Lera Vaefesu 4:15, 16.) Ngu txikombiso, kumahilwe malulamiselo o kuthumiswa kwati Tinyumba  ta Mfumo. Eto ti lavile ku mabanza o kari me xalela mitshangano ka Nyumba yimweyo ya Mfumo ni ku mihingano ya tithembwe to txhumayela yi txitxwa. Malulamiselo onewo, ma vhuni ku ku si thumiswi male yo tala. Hambi keto, ti lavile ku vahuweleli vamwani ve ti toloveta ka siemo sa siphya. Vanathu vonevo vo thembeka ti nga maha va di tolovete kuthuma ka dibanza do kari malembe o tala, se ti nga maha va di vite ni vangana kona kheya. Kambe konkuwa va kombelwa ku ve va ka dibanza dimwani. Jesu wa tsaka ngutu mbimo yi a wonako vagondiswa vakwe va txi seketela malulamiselo awa!

15. Wuxaka wathu ni Jesu wu na kula ngu nzila yihi ka mafu a maphya?

¹⁵ Ava va nga tshatwa kuva vasawuleki va na ya va ni Jesu nzumani ngu ha ku si gumiko, va na fuma kumweko nayo. Vona va na sikota kuwona Kristu, ve bhula nayo ni kuzumba nayo. (Joh. 14:2, 3) Ava va ku ni lungelo yo ta hanya ha mafuni Jesu a na ta va khatalela. Hambiku va no mbi sikota kuwona Jesu, wuxaka wawe wu na ta ya masoni wu kula mbimo yi va ti dilako ngu wutomi wu Jehovha ni Jesu va nga va lulamisela wona.—Isaya 9:6, 7.

16. Ngu ahi makatekwa aya hi ma manako hi txi va vangana va Jesu?

¹⁶ Ngako hi txi amukela txirambo txa Jesu txo va vangana vakwe, hi mana makatekwa o tala. Ngu txikombiso, wa hi komba lirando ni ku hi vhuna konkuwa. Hi ni lungelo yo hanya kala kupinduka. Txa lisima ngutu ngu ti to wungana wathu ni Jesu u hi ninga mkhanjo wo sawuleka ka yotshe, i ku wo athu hi va vangana va Jehovha, Tate wa Jesu. Ngu ditshuri i lungelo ya hombe kuva vangana va Jesu!