1. Unsay imong himoon aron masuod sa usa?

SAGAD, ang una nimong himoon aron masuod ka sa usa mao ang paggahin ug panahon uban kaniya. Samtang mag-estoryahay mo bahin sa inyong mga hunahuna ug mga eksperyensiya, mahimo mong managhigala. Pero kon bahin sa pagpakigsuod kang Jesus, dunay mga kalisdanan. Unsa ang pipila niana?

2. Unsa ang unang kalisdanan nga atong giatubang?

² Ang unang kalisdanan mao nga dili nato makita si Jesus. Ingon ana sab ang kahimtang sa daghang Kristohanon sa unang siglo. Bisan pa niana, si apostol Pedro miingon: “Bisag wala mo makakita niya, gihigugma ninyo siya. Bisag wala mo makakita niya karon, nagpakita mog pagtuo kaniya.” (1 Ped. 1:8) Busa posibleng masuod kang Jesus bisag dili nato siya makita.

3. Unsa ang ikaduhang kalisdanan nga atong giatubang?

³ Ang ikaduhang kalisdanan mao nga dili nato maestorya si Jesus. Dihang mag-ampo ta, si Jehova ang atong kaestorya. Tinuod, mag-ampo ta sa ngalan ni Jesus, pero wala ta makig-estorya kaniya. Gani, dili gusto ni Jesus nga moampo ta kaniya. Ngano? Tungod kay ang pag-ampo maoy matang sa pagsimba, ug si Jehova lang ang angayng simbahon. (Mat. 4:10) Bisan pa niana, mapakita gihapon nato ang atong gugma kang Jesus.

4. Unsa ang ikatulong kalisdanan, ug unsay atong hisgotan niining artikuloha?

 ⁴ Ang ikatulong kalisdanan mao nga si Jesus nagpuyo sa langit, busa dili ta literal nga makagahin ug panahon uban kaniya. Pero daghan gihapon tag makat-onan bahin kang Jesus bisag dili nato siya kauban. Hisgotan nato ang upat ka butang nga atong mahimo aron mas masuod kaniya. Pero hisgotan una nato kon nganong kinahanglan tang makigsuod sa Kristo.

5. Nganong angay tang makighigala kang Jesus? (Tan-awa sab ang mga kahong “ Makighigala Kang Jesus Aron Mahimong Higala ni Jehova” ug “ Balanseng Panglantaw sa Papel ni Jesus.”)

⁵ Kinahanglan tang makighigala kang Jesus aron makabaton tag maayong relasyon kang Jehova. Ngano? Konsideraha ang duha sa mga rason. Una, giingnan ni Jesus ang iyang mga tinun-an: “Ang Amahan nagmahal kaninyo, tungod kay kamo nagmahal man kanako.” (Juan 16:27) Miingon sab siya: “Walay makaadto sa Amahan kon dili pinaagi kanako.” (Juan 14:6) Kon gusto natong makighigala kang Jehova pero dili ta makigsuod kang Jesus, sama kanag pagsulod sa bilding nga dili moagig pultahan. Si Jesus migamit ug susamang ilustrasyon dihang gihisgotan niya ang iyang kaugalingon ingong “pultahan alang sa mga karnero.” (Juan 10:7) Ang ikaduhang rason mao nga bug-os nga gisundog ni Jesus ang mga hiyas sa iyang Amahan. Giingnan niya ang iyang mga tinun-an: “Kadtong nakakita kanako nakakita usab sa Amahan.” (Juan 14:9) Busa aron mailhan nato si Jehova, kinahanglang tun-an nato ang kinabuhi ni Jesus. Samtang magkalawom ang atong kahibalo kang Jesus, magkalawom sab ang atong apresasyon kaniya. Ug samtang mag-anam  ta ka suod kang Jesus, magkalawom sab ang atong gugma sa iyang Amahan.

6. Unsay laing rason kon nganong makigsuod ta kang Jesus? Ipatin-aw.

⁶ Kinahanglang makigsuod ta kang Jesus aron dunggon ang atong mga pag-ampo. Nagpasabot ni nga dili lang kay moingon tag “sa ngalan ni Jesus” sa tumoy sa atong mga pag-ampo. Kinahanglang masabtan nato kon sa unsang paagi gigamit ni Jehova si Jesus sa pagtubag sa atong mga pag-ampo. Giingnan ni Jesus ang iyang mga apostoles: “Bisan unsay inyong ihangyo pinaagi sa akong ngalan, ako kining buhaton.” (Juan 14:13) Bisag si Jehova ang maminaw ug motubag sa atong mga pag-ampo, iyang gihatag kang Jesus ang awtoridad sa pagpatuman sa Iyang mga desisyon. (Mat. 28:18) Busa, sa dili pa tubagon sa Diyos ang atong mga pag-ampo, tan-awon una niya kon gipadapat ba nato ang tambag ni Jesus. Pananglitan, si Jesus miingon: “Kon inyong pasayloon ang mga tawo sa ilang kasaypanan, pasayloon usab kamo sa inyong langitnong Amahan; apan kon dili ninyo pasayloon ang mga tawo sa ilang kasaypanan, dili usab pasayloon sa inyong Amahan ang inyong kasaypanan.” (Mat. 6:14, 15) Busa importante gyod nga trataron nato ang uban sama sa maayong pagtratar ni Jehova ug Jesus kanato!

7. Kinsay makabenepisyo sa halad lukat ni Jesus?

⁷ Kadto lang suod kang Jesus ang makabenepisyo sa iyang halad lukat. Giunsa nato pagkahibalo? Si Jesus miingon nga siya “andam mohatag sa iyang kinabuhi alang sa iyang mga higala.” (Juan 15:13) Ang matinumanong mga tawo nga nabuhi sa wala pa moanhi si Jesus sa yuta kinahanglang mokat-on bahin kaniya ug mahigugma kaniya. Ang mga tawo sama ni Abraham, Sara, Moises, ug Rahab banhawon, pero bisan kining matarong nga mga alagad ni Jehova kinahanglang makigsuod kang Jesus aron ilang madawat ang kinabuhing walay kataposan.​—Juan 17:3; Buh. 24:15; Heb. 11:8-12, 24-26, 31.

8-9. Base sa Juan 15:4, 5, unsay atong mahimo kon higala ta ni Jesus, ug nganong importante kana?

⁸ Kalipay nato ang pagpakig-uban kang Jesus sa pagsangyaw ug pagtudlo sa maayong balita sa Gingharian. Sa dinhi pa si Jesus sa yuta, siya usa ka magtutudlo. Ug sukad sa iyang pagbalik sa langit, si Jesus, ingong ulo sa kongregasyon, padayong naggiya sa buluhatong pagsangyaw ug pagpanudlo. Iyang nakita ug gipabilhan ang imong mga paningkamot sa pagtabang sa mga tawo nga makaila kaniya ug sa iyang Amahan. Ang tinuod, molampos lang ta niining buluhatona sa tabang ni Jehova ug Jesus.​—Basaha ang Juan 15:4, 5.

⁹ Ang Pulong sa Diyos klarong nagtudlo nga kinahanglang higugmaon nato si Jesus ug mentinahon ang maong gugma aron mapalipay nato si Jehova. Busa hisgotan nato ang upat ka butang nga atong mahimo aron mahimong higala ni Jesus.

10. Unsa ang unang paagi aron mahimong higala ni Jesus?

¹⁰ (1) Ilha si Jesus. Mahimo nato ni pinaagi sa pagbasa sa mga basahon sa Bibliya nga Mateo, Marcos, Lucas, ug Juan. Samtang atong pamalandongon ang mga asoy sa Bibliya bahin sa kinabuhi ni Jesus, makakat-on ta sa paghigugma ug pagtahod kaniya tungod sa iyang maayong pagtratar sa mga tawo. Pananglitan, bisag Agalon siya sa iyang mga tinun-an, wala niya sila tratara ingong mga ulipon. Iya hinuong gisulti kanila ang iyang mga hunahuna ug pagbati. (Juan 15:15) Gibati ni  Jesus ang ilang kasakit ug mihilak siya uban kanila. (Juan 11:32-36) Bisan ang iyang mga magsusupak nakaingon nga higala siya niadtong midawat sa iyang mensahe. (Mat. 11:19) Dihang sundogon nato ang pagtratar ni Jesus sa iyang mga tinun-an, mas masuod ta sa uban, mahimo tang mas kontento ug malipayon, ug mas molawom ang atong apresasyon sa Kristo.

11. Unsa ang ikaduhang paagi aron mahimong higala ni Jesus, ug nganong importante kana?

¹¹ (2) Sundoga ang panghunahuna ug binuhatan ni Jesus. Samtang magkalawom ang atong kahibalo bahin sa iyang panghunahuna ug mas maningkamot ta nga sundogon siya, mas masuod ta kaniya. (1 Cor. 2:16) Unsaon nato pagsundog si Jesus? Niay usa ka pananglitan. Mas gihunahuna ni Jesus kon unsaon pagtabang sa uban kay sa pagpahimuot sa iyang kaugalingon. (Mat. 20:28; Roma 15:1-3) Tungod niana, andam siyang magsakripisyo ug magpasaylo. Dili siya daling masilo sa isulti sa uban bahin kaniya. (Juan 1:46, 47) Ug wala niya tugoti nga maapektohan ang iyang pagtratar sa usa ka tawo tungod sa sayop nga dugay nang nahimo niini. (1 Tim. 1:12-14) Si Jesus miingon: “Kon kamo dunay gugma sa usag usa, ang tanan makaila nga kamo akong mga tinun-an.” (Juan 13:35) Maayong pangutan-on nimo ang kaugalingon, “Gisundog ba nako si Jesus pinaagi sa paghimo sa tanan nakong maarangan aron mamentinar ang malinawong relasyon uban sa mga igsoon?”

12. Unsa ang ikatulong paagi aron mahimong higala ni Jesus, ug unsaon nato kana paghimo?

¹² (3) Suportahi ang mga igsoon sa Kristo. Giisip ni Jesus ang atong pagsuportar sa iyang dinihogang mga igsoon ingong pagsuportar nato kaniya. (Mat. 25:34-40) Ang pangunang paagi nga nagsuportar ta sa mga dinihogan mao ang bug-os nga pagpakigbahin sa buluhaton nga gisugo ni Jesus sa iyang mga sumusunod​—ang pagsangyaw sa Gingharian ug paghimog mga tinun-an. (Mat. 28:19, 20; Buh. 10:42) Sa tabang lang sa “ubang mga karnero” nga mahimo sa mga igsoon sa Kristo kining dakong buluhaton sa tibuok kalibotan. (Juan 10:16) Kon apil ka sa ubang mga karnero, matag higayon nga makigbahin ka niining buluhatona, gipakita nimo ang imong gugma dili lang sa mga dinihogan kondili kang Jesus usab.

13. Unsaon nato pagpadapat ang tambag ni Jesus sa Lucas 16:9?

¹³ Nakighigala pod ta kang Jehova ug Jesus pinaagi sa paggamit sa atong materyal nga mga butang sa pagsuportar sa buluhaton nga ilang gidumala. (Basaha ang Lucas 16:9.) Pananglitan, makahatag tag donasyon sa tibuok kalibotang buluhaton, ug kini nga mga donasyon gigamit sa pagsangyaw sa maayong balita sa lagyong lugar, pagtukod ug pagmentinar ug mga pasilidad para sa matuod nga pagsimba, ug paghatag ug hinabang niadtong biktima sa kalamidad o trahedya. Makahatag pod tag donasyon para sa galastohan sa atong kongregasyon ug makatabang niadtong nahibaloan nato nga nanginahanglan. (Prov. 19:17) Kini maoy mga paagi nga makasuportar ta sa mga igsoon sa Kristo.

14. Sumala sa Efeso 4:15, 16, unsa ang ikaupat nga paagi aron mahimong higala ni Jesus?

¹⁴ (4) Suportahi ang mga kahikayan sa kongregasyon. Mas masuod ta kang Jesus, ang ulo sa kongregasyon, kon mokooperar ta niadtong gihatagag responsibilidad sa pag-atiman kanato sa espirituwal. (Basaha ang Efeso 4:15, 16.) Pananglitan, gipaningkamotan gyod nato karon nga magamit pag-ayo ang tanang Kingdom Hall. Busa, gitapo ang pipila ka kongregasyon ug gi-adjust ang mga teritoryo. Tungod niini, dako ang nadaginot sa organisasyon.  Pero tungod sab niini, ang pipila ka magmamantala kinahanglang mo-adjust sa bag-ong mga kahimtang. Ang maong matinumanong mga magmamantala tingali dugay na sa usa ka kongregasyon ug nasuod na pag-ayo sa mga igsoon didto. Pero karon, gihangyo sila sa pagbalhin sa laing kongregasyon. Seguradong malipay si Jesus dihang makita niya ang iyang maunongong mga tinun-an nga nakigkooperar niini nga kahikayan!

15. Sa unsang paagi mas masuod pa ta kang Jesus sa umaabot?

¹⁵ Kadtong gidihogan sa balaang espiritu dunay paglaom nga makauban si Jesus hangtod sa hangtod ug magmando kauban niya sa Gingharian sa Diyos. Makita gyod nila siya, makaestorya, ug makagahin silag panahon uban kaniya. (Juan 14:2, 3) Kadtong dunay yutan-ong paglaom makadawat sab sa gugma ug atensiyon ni Jesus. Tinuod, dili nila makita si Jesus, pero mas masuod pa sila kaniya samtang matagamtam nila ang kinabuhi nga gipaposible ni Jehova ug Jesus para kanila.​—Isa. 9:6, 7.

16. Unsang mga panalangin ang atong madawat sa pagpakighigala kang Jesus?

¹⁶ Dihang dawaton nato ang imbitasyon ni Jesus nga mahimo niyang higala, makadawat tag daghang panalangin. Pananglitan, iya tang higugmaon ug suportahan karon. Mabatonan nato ang paglaom nga mabuhi hangtod sa hangtod. Ug labaw sa tanan, ang atong pagpakighigala kang Jesus moresultag kinamaayohang panalangin​—masuod ta sa Amahan ni Jesus, si Jehova. Pagkadakong pribilehiyo nga mahimong higala ni Jesus!