MUTWE WAKULILONGESA 17
“Ngunanuvuluka Ngwami Masepa”
“Ngunanuvuluka ngwami, Masepa; mumu hingunanunyingikisa yeswe yize nevwile kuli Tata.”—YOA. 15:15. MW 1991.
MWASO 13 Kristu, Chilweza Chetu
CHIKUMA CHILEMU *
1. Yuma yika atu waze anazange kupwa masepa atamba kulinga?
NYI TUNAZANGE kupwa sepa lia umwe mutu, twatamba kulinga yimwe. Chuma chitangu twatamba kulinga, chili kupalika mashimbu ni mutu wacho. Muze munuhanjika, munulilweza yuma ya ku mwono wenu, ha chino, munupwa masepa apema. Alioze, kupwa ni usepa ukolo ni Yesu, muchihasa kusoloka ngwe chikalu chinji. Mumu liaka?
2. Kapinda muka mutangu tuli nenyi?
2 Kapinda mutangu, kutushi kumona Yesu. Akwa-Kristu anji ku sekulu yitangu kakamwene Yesu. Chipwe chocho, postolo Petulu yamba ngwenyi: “Chipwe kunwamumwene, hindu nunamuzange. Chipwe haliapwila kunushi kumumona, hindu nunamufuliela.” (1 Petu. 1:8) Yino yinasolola ngwo, chipwe ngwe kutushi kumona Yesu, mutuhasa kupwa ni usepa ukolo ni iye.
3. Kapinda muka wamuchiali tuli nenyi?
3 Kapinda wamuchiali, yetu kutushi kuhasa kuhanjika ni Yesu. Muze twakulemba, twakuhanjika wika ni Yehova. Chipwe ngwe twakulemba mu jina lia Yesu, kuchalumbunukine ngwo twakuhanjika nenyi. Kwamba pundu, Yesu kazangile hanga tulembe kuli iye. Mumu liaka? Mumu kulemba chili uwayilo, twatamba kuwayila wika Yehova. (Mateu 4:10) Chipwe chocho, mutuhasa kusolola zango lize tukwete hali Yesu.
4. Kapinda muka wamuchitatu tuli nenyi, nawa yika mutulilongesa ha mutwe uno?
4 Kapinda wamuchitatu, Yesu katwama mu malilu; kashika, kutuchi kuhasa kupwa nenyi hakamwihi. Alioze, chipwe ngwe Yesu kali mu malilu, nihindu mutuhasa kunyingika yuma yinji hali iye. Ha mutwe uno, mutwiwuluka yuma yiwana yize mutuhasa kulinga mba tukolese usepa wetu ni Yesu. Alioze, chitangu mutulilongesa mumu liaka chili chilemu kuli yetu eswe kupwa ni usepa upema ni Kristu.
MUMU LIAKA TWATAMBA KUPWA MASEPA JA YESU?
5. Mumu liaka twatamba kupwa masepa ja Yesu? (Tala mushete unambe ngwo, “ Usepa Upema ni Yesu Wakutukwasa Hanga Tupwe Masepa ja Yehova” ni mushete unambe ngwo, “ Nyonga Lialita Hakutwala Kuli Yesu.”)
5 Twatamba kupwa masepa ja Yesu mba tuhase kupwa ni usepa upema ni Yehova. Mumu liaka chikuma chino chili chilemu? Mumu lia yitela yaali. Chitela chitangu, Yesu kambile kuli tumbaji twenyi ngwenyi: “Tata iye mwene kananuzange, mumu hinunanguzange.” (Yoa. 16:27) Yamba nawa ngwenyi: “Niumwe meza kuli Tata shina ni yami.” (Yoa. 14:6) Kweseka kupwa sepa lia Yehova chakuhona kupwa ni usepa upema ni Yesu, chili ngwe kweseka kunjilila ha kapenda. Yesu kalitesele mwene ngwo, kali “chikolo cha mapanga.” (Yoa. 10:7) Chitela chamuchiali, Yesu kembulwile kanawa yitanga ya Tato. Iye yamba kuli tumbaji twenyi ngwenyi: “Yoze wangumona, hamona mwe Tata.” (Yoa. 14:9) Kashika, chuma chilemu chize twatamba kulinga mba tunyingike kanawa Yehova, chili kulilongesa sango ja Yesu. Muze mutulilongesa chinji hakutwala kuli Yesu, zango lietu muli iye mulikola. Nyi mutuzanga chinji Yesu, zango lietu hali Tato mulikola.
6. Chitela chikwo chika tuli nacho hanga tupwe masepa ja Yesu? Lumbununa.
6 Twatamba kupwa masepa ja Yesu mba Zambi akumbulule yilemba yetu. Kulemba chinalumbunuka yuma yinji, hi wika ko kwamba mashimbu eswe ngwo, “mu jina lia Yesu.” Twatamba kunyingika chize Yehova akutuma Yesu ha kukumbulula yilemba yetu. Yesu kambile kuli apostolo jenyi ngwenyi: “Cheswacho munwita mu jina liami, kumunguchilinga.” (Yoa. 14:13) Yehova mwe wakwivwa ni kukumbulula yilemba yetu. Alioze, muze Yehova akuzanga kukumbulula yilemba yetu, kakutuma Yesu hanga achilinge. (Mateu 28:18) Tunyongenu ha chino, shimbu Zambi kanda achikumbulula yilemba yetu, chitangu kakutala hanga amone nyi tunakaula chiyulo cha Yesu nyi ka. Chakutalilaho, Yesu kambile ngwenyi: “Nyi kachi yenu munukonekena atu milonga yo, kachi Tatenu wa mwilu nawa kumanukonekena. Alioze nyi kachi yenu kunushi kukonekena atu milonga yo ni Tatenu wa mwilu neye kechi kunukonekena milonga yenu.” (Mateu 6:14, 15) Kwamba pundu, chili chilemu kusolwela akwetu umbovu, ngwe chize Yehova ni Yesu akutusolwela!
7. Aya makazuka yiwape ya chitapo cha ukuule wa Yesu?
7 Waze ali ni usepa upema ni Yesu, e wika makatambula yiwape ya chitapo cha ukuule wenyi. Kuchi tunachinyingika? Mumu Yesu kambile ngwenyi, mahana “mwono wenyi hali tusendo twenyi.” (Yoa. 15:13) Chipwe tuvumbi twa Zambi ashishika waze apwile hano hashi shimbu Yesu te kanda achisemuka, no makalilongesa hakutwala kuli Yesu ni kumuzanga. Tuvumbi jacho, kali malunga ni mapwo ashishika, ngwe Apalahama, Sara, Mose, ni Rahape. Muze makaahindwisa no makalilongesa hakutwala kuli Yesu ni kupwa masepa jenyi, mba akapwe ni mwono wa mutolo.—Yoa. 17:3; Yili. 24:15; Hepre. 11:8-12, 24-26, 31.
8-9. Kulita ni Yoano 15:4, 5, usepa wetu ni Yesu muutukwasa kulinga mulimo uka, nawa mumu liaka mulimo uno uli ulemu?
8 Tunawahilila ha kukalakala hamuwika ni Yesu mu mulimo wa kwambujola ni kulongesa atu sango jipema ja Wanangana. Muze Yesu apwile hano hashi, kapwile longeshi. Chize muze Yesu ahilukile mu malilu, hanapu mutwe wa chikungulwila, nawa kananungu ni kusongwela mulimo wa kwambujola ni kulongesa. Kakumona ni kulemesa yuma yeswe yize twakulinga ha kukwasa atu anji hanga anyingike iye ni Tato. Kwamba pundu, twakuhasa kulinga mulimo wacho ni ukwaso wa Yehova ni Yesu.—Tanga Yoano 15:4, 5.
9 Liji lia Zambi linasolola ngwo, mba tupemene Yehova, twatamba kuzanga Yesu ni kununga ni zango liacho. Kashika, mutulilongesa yuma yiwana yize mutuhasa kulinga hanga tupwe masepa ja Yesu.
CHIZE MUTUHASA KUPWA MASEPA JA YESU
Mutuhasa kupwa masepa ja Yesu (1) ha kumunyingika kanawa, (2) kwimbulula manyonga ni yitanga ya Yesu, (3) kukwasa mandumbu ja Kristu ni (4) kwononokena usongwelo wa ululikiso wa Yehova (Tala maparagrafu 10-14) *
10. Yika twatamba kulinga chitangu mba tupwe masepa ja Yesu?
10 (1) Nyingika Yesu. Mutuhasa kunyingika Yesu hakutanga mikanda ya mu Mbimbiliya ngwe, Mateu, Marku, Luka ni Yoano. Muze mutupukuna ha sango ja Yesu jili mu Mbimbiliya, mutumuzanga chinji ni kumuvumbika. Yesu kapwile ni kutwama kanawa ni akwo. Chakutalilaho, chipwe ngwe kapwile Mwene wa tumbaji twenyi, nihindu te keshi kwamona ngwe ndungo jenyi. Alioze, kapwile ni kwalweza yize apwile ni kwivwa. (Yoa. 15:15) Muze tumbaji apwile ni kulila, Yesu neye kapwile ni kulila no. (Yoa. 11:32-36) Chipwe akwa-kole jenyi kapwile ni kwamba ngwo, Yesu kapwile sepa lia waze apwile ni kupanjika sango jenyi. (Mateu 11:19) Muze twakwimbulula Yesu, twakutwama kanawa ni akwetu, twakuwahilia chinji, chikwo nawa, zango lietu hali Yesu liakwoka ni kumusakwilila chinji.
11. Chuma chika chamuchaali twatamba kulinga mba tupwe masepa ja Yesu, nawa mumu liaka kulinga chino chili chilemu?
11 (2) Imbulula manyonga ni yitanga ya Yesu. Muze mutunyingika ni kwimbulula chize Yesu apwile ni kunyonga, usepa wetu ni iye muukola chinji. (1 Kori. 2:16) Kuchi mutuhasa kwimbulula Yesu? Tutalenu chilweza chimuwika. Yesu kapwile ni kulihulumba hali akwo, kuhiana hali iye mwene. (Mateu 20:28; Roma 15:1-3) Kunyonga chino, chamukwashile kuhondanganyina akwo, ni kwakonekena. Yesu kapwile ni kulengulula yuma yimwe yize apwile ni kumwamba kuli atu. (Yoa. 1:46, 47) Iye kakapwile ni kutulikila toto atu ni kunyonga ngwe, kechi kwalumuka. (1 Timo. 1:12-14) Yesu yamba ngwenyi: “Eswe makanyingika yenu nuli tumbaji twami, nyi munupwa ni zango umwe kuli mukwo ni mukwo.” (Yoa. 13:35) Lihule ngwe: “Shina ngunembulula Yesu hakulinga cheswacho munguhasa hanga ngupwe ni sambukila ni mandumbu jami?”
12. Chuma chika chamuchitatu twatamba kulinga mba tupwe masepa ja Yesu, nawa kuchi mutuhasa kuchilinga?
12 (3) Kwasa mandumbu ja Kristu. Kuli Yesu yuma yeswe yize twakulinga hanga tukwase mandumbu jenyi akuwayisa, iye tunakwase. (Mateu 25:34-40) Yesu katumine akwa-Kristu akuwayisa hanga ambujole Wanangana ni kutayisa tumbaji. Muze twakulinga mulimo uno, tunakwasa mandumbu ja Kristu. (Mateu 28:19, 20; Yili. 10:42) Akwa-Kristu akuwayisa te kechi kuhasa kwambujola sango jipema hashi heswe, chakuhona kwakwasa kuli “mapanga akwo.” (Yoa. 10:16) Nyi uli mukwa-kwambujola wa mapanga akwo, ewuluka ngwo, muze wakwambujola, kuushi kukwasa wika akwa-Kristu akuwayisa, alioze wakukwasa nawa Yesu.
13. Kuchi mutuhasa kukaula chiyulo cha Yesu chili ha Luka 16:9?
13 Kuli nawa mulali ukwo wakukwashilamo mandumbu ja Kristu. Mulali wacho, uli kuhana mbongo jetu hanga tukwase mulimo uze Yehova ni Yesu anasongwela. (Tanga Luka 16:9.) Chakutalilaho, mutuhasa kuhana milambu hanga tukwase milimo yetu ya hashi heswe. Milambu yetu, yakukwasa mulimo wa kwambujola, kutunga Mazuwo ja Wanangana, kwalulieka ni kukwasa mandumbu jetu waze akupalika mu luyinda. Nawa mutuhasa kulambula hanga tukwase mu chikungulwila chetu, hanji kukwasa mandumbu waze anafupu ukwaso. (Yishi. 19:17) Muze mutulinga chino, mutupwa masepa akolo ja Yesu ni Yehova.
14. Kulita ni A-Efwesu 4:15, 16, chuma chika chamuchiwana twatamba kulinga mba tupwe masepa ja Yesu?
14 (4) Ononokena usongwelo wa ululikiso wa Yehova. Yesu kali mwata wa chikungulwila, iye hanatongola malunga ajama hanga atufunge. Muze mutwononokena malunga wano ajama, mutukolesa usepa wetu ni Yesu. (Tanga A-Efwesu 4:15, 16.) Chakutalilaho, haliapwila tunase shindakenyo ngwetu, Mazuwo eswe a Wanangana tunaafungu kanawa. Ha mukunda wa chino, yikungulwila yimwe kayichinga, nawa njiza jimwe kajiteta cheka. Kulinga chino, chatukwasa kufunga kanawa milambu. Alioze, chino nawa chinakaneha umwe kapinda kuli akwa-kwambujola. Akwa-kwambujola wano ashishika kota kapwile ha miaka yinji mu chikungulwila chimuwika, nawa te hanapu masepa. Alioze, haliapwila haateta ni kwasa mu yikungulwila yalisa. Yesu kota kanawahilila hakumona chize akwa-kwambujola wano ashishika anakaula kanawa usongwelo wa ululikiso wa Yehova!
KUPWA MASEPA JA YESU NDO KU MIAKA YESWE
15. Kuchi usepa wetu ni Yesu muukakola chinji kulutwe lia matangwa?
15 Akwa-Kristu akuwayisa ni spiritu yisandu, kali ni kutalatala cha kupwa hamwe ni Yesu ndo ku miaka ya mutolo ni kuyula nenyi mu Wanangana wa Zambi. Kwamba pundu, ayo makaliwana ni Kristu, makamumona ni meso, makahanjika nenyi ni kutwama nenyi hamuwika. (Yoa. 14:2, 3) Waze anashimbwila kutwama hano hashi ku miaka yeswe, no makaasolwela zango kuli Yesu ni kutambula yiwape. Alioze, ayo kechi kamona Yesu. Chipwe chocho, usepa wo ni Yesu muukanunga ni kukola muze makatwama mu Paraisu yize Yehova ni Yesu makaneha hano hashi.—Iza. 9:6, 7.
16. Yiwape yika twazuka hakupwa masepa ja Yesu?
16 Yesu kanatusanyika hanga tupwe masepa jenyi. Muze twakutayiza kupwa masepa jenyi, twakuzuka yiwape yinji. Chakutalilaho, kakutuzanga ni kutukwasa. Hitwapwa ni kutalatala cha mwono wa mutolo. Kuyuka chikwo chahiana tuli nacho, chili usepa wetu ni Yesu, uze muutukwasa kupwa ni usepa ukolo ni Tato, Yehova. Kwamba pundu, chili kuyuka chinene kutuvuluka ngwo, masepa ja Yesu!
MWASO 17 “Ngunapale”
^ kax. 5 Apostolo katwamine chimwika ni Yesu muze apwile ni kukalakala nenyi. Kashika ahashile kupwa masepa jenyi apema. Yesu kanazange hanga ni yetu tupwe masepa jenyi. Alioze, yetu tuli ni umwe kapinda yoze apostolo kakapwile nenyi. Ha mutwe uno, mutulilongesa hakutwala ku kapinda wacho, ni chize mutuhasa kupwa ni usepa upema ni Yesu.
^ kax. 55 ULUMBUNWISO WA YIZULIE: (1) Mu uwayilo wetu wa mu usoko, mutuhasa kulilongesa sango ja mwono ni mulimo wa kwambujola wa Yesu. (2) Mu chikungulwila, mutuhasa kusa tachi hanga tupwe ni sambukila ni mandumbu jetu. (3) Muze twakulikolweza chinji mu munda, twakukwasa mandumbu ja Kristu. (4) Muze matusa mu chikungulwila cheka, mutuhasa kwononokena yiyulo ya makulwana a mu chikungulwila.
