1. Mi pakhat he zeitindah hawikom ṭha nan si khawh?

MI PAKHAT he hawikom ṭha si khawh awkah amah he caan hmanṭi a hau. Pakhat le pakhat nan ruahnak le nan intuarnak kong nan i chimh tikah hawikom ṭha nan hung si lai. Asinain Jesuh he hawikom ṭha si awkah zuamcawhnak cheukhat kan tong lai. Mah zuamcawhnak cheukhat cu zeidah an si?

2. Kan tonmi zuamcawhnak pakhatnak cu zeidah a si?

² Zuamcawhnak pakhatnak cu Jesuh kha kan mit in kan hmu lo. Kum zabu pakhatnak i Khrihfa tampi zong cu bantuk zuamcawhnak an rak tong ve. Asinain lamkaltu Peter nih hitin a ti: “Jesuh cu nan hmu na loin nan dawt, cun nan hmu ṭhiamṭhiam lo nain amah cu nan zumh.” (1 Pet. 1:8) Cucaah Jesuh cu kan hmu bal lo nain amah he hawikom ṭha kan si kho ko.

3. Kan tonmi zuamcawhnak pahnihnak cu zeidah a si?

³ Zuamcawhnak pahnihnak cu Jesuh he bia kan i ruah bal lo. Thla kan cammi cu Jehovah sinah direct in bia kan chimmi a si. Jesuh min in thla kan cam ti cu a hmaan ko, asinain direct in cun a sinah bia kan chim lo. A tak ti ah cun Jesuh nih a sinah thla kan cammi kha a duh lo. Zeicah? Zeicahtiah thlacamnak cu biaknak phunkhat a si i Jehovah lawng hi kan biak awk a si. (Matt. 4:10) Asinain Jesuh kan dawt kha kan langhter peng khawh ko.

4. Zuamcawhnak pathumnak cu zeidah a si, hi capar ah zei kong dah kan i ruah hna lai?

 ⁴ Zuamcawhnak pathumnak cu Jesuh cu van ah a um caah a sinah kan um kho lo. Pumpak in a pawngah kan um kho lo nain Jesuh kong kha tampi kan hngalh khawh ko. Jesuh he kan i hawikomhnak a fehter khomi thil pali kong kan i ruah hna lai. Asinain Khrih he hawikom ṭha si cu zeicah a biapit timi kong kha i ruah hmasa hna u sih.

5. Jesuh he zeicah hawikom kan si awk a si? (“ Jesuh He I Hawikomhnak nih Jehovah He Hawikom A Kan Siter” timi le “ Jesuh Rian He Aa Tlaiin A Tlarimi Hmuhnak” timi rinlikulh ah zoh)

⁵ Jehovah he a ṭhami pehtlaihnak ngeih kan duh ahcun Jesuh he hawikom kan si a hau. Zeicah? A ruang pahnih in i ruah hna u sih. Pakhatnak, Jesuh nih a zultu pawl kha hitin a ti hna: “Zeicahtiah ka Pa nih cun amah hrimhrim nih aan dawt hna. Nannih nih nan ka dawt caah” a si. (Johan 16:27) Hitin a ti chap: “Keimah sinin ti dah lo cun ahohmanh Pa sin an phan kho lo.” (Johan 14:6) Jesuh he a ṭhami pehtlaihnak ngeih loin Jehovah he hawikom ṭha si i zuam cu kutka loin innchung ah luh i zuam bantuk a si. Jesuh nih mah he aa lomi tahchunhnak kha amahle amah “tuu luhnak kutka” ka si tiah a ti lioah a rak hman. (Johan 10:7) Pahnihnak, Jesuh nih a Pa sining kha tling tein aa zohchunh. A zultu pawl kha “keimah a ka hmutu paoh nih cun ka Pa kha an hmuh ve ko” tiah a ti hna. (Johan 14:9) Cucaah Jehovah kong kan hngalh khawh nakhnga Jesuh a nunning kong cawn cu a biapi tukmi a si. Jesuh kong tam deuh kan cawn ahcun amah kha kan dawt deuh ve lai. Jesuh he kan i hawikomhnak a feh deuh tikah a Pa kan dawtnak cu a fek deuh ve lai.

6. Jesuh he a ṭhami pehtlaihnak kan ngeih awk a sinak a ruang dang cu zeidah a si? Fianter.

 ⁶ Kan thlacamnak leh kan si nakhnga Jesuh he a ṭhami pehtlaihnak kan ngeih a hau. Cutin tuah awkah kan thlacamnak a donghnak ah “Jesuh min” chimnak men lawngin a za lo. Kan thlacamnak leh awkah Jehovah nih Jesuh zei ti lam in dah a hman ti kha kan theihthiam a hau. Jesuh nih lamkaltu pawl kha “ka min in nan halmi paoh cu kaan tuahpiak hna lai” tiah a ti hna. (Johan 14:13) Jehovah lawng hi kan thlacamnak a ngaitu le a kan lettu a si ko nain a biakhiahnak kong he aa tlaiin Jesuh kha nawlngeihnak a pek. (Matt. 28:18) Cucaah Pathian nih kan thlacamnak a kan leh hlanah Jesuh pekmi ruahnak cheuhnak kan zul maw, zul lo ti kha a zoh hmasa. Tahchunnak ah, Jesuh hitin a ti: “Mi nih nan chungah an tuahmi ṭhatlonak kha nan ngaihthiam hna ahcun, vancung i a ummi nan Pa zong nih aan ngaihthiam ve hna lai, Sihmanhsehlaw mi ṭhatlonak kha nan ngaihthiam hna lo ahcun vancung khua i a ummi nan Pa zong nih ṭhatlonak nan tuahmi kha aan ngaithiam ve han lai lo.” (Matt 6:14, 15) Mah cu a biapi tukmi a si, midang kan pehtlaih hna ningin Jehovah le Jesuh nih a kan pehtlaih ve lai.

7. Jesuh tlanhnak man thawngin ahote nih dah ṭhatnak an hmuh lai?

⁷ Jesuh he a ṭhami pehtlaihnak a ngeimi hna lawng nih tlanhnak man in ṭhatnak an hmu kho lai. Zeitindah kan hngalh khawh? Jesuh nih ‘a hawile caah a nunnak a pek’ lainak kong kha a chim. (Johan 15:13) Jesuh vawileicung a rat hlanah a rak nungmi zumhfekmi pawl nih amah kong kha an cawn lai i an dawt lai. Abraham, Sarah, Moses le Rahab ti bantuk nu le pa pawl cu an tho ṭhan lai. Asinain mah a dingmi Jehovah salle pawl zong nih zungzal nunnak an hmuh khawh nakhnga Jesuh he hawikom an si a hau.—Johan 17:3; Lam. 24:15; Heb. 11:8-12, 24-26, 31.

8-9. Johan 15:4, 5 ningin Jesuh he kan i hawikomhnak nih zei tuah awkah dah a kan bawmh, mah cu zeicah a biapit?

⁸ Pennak kong thawngṭha chimnak ah Jesuh he phungchimnak le cawnpiaknak ah rian kan ṭuanti caah lunglawmhnak kan hmu. Vawileicung a um lioah Jesuh cu cawnpiaktu saya a si. Van a kai hnu zongah Jesuh nih Khrihfabu lu in phungchimnak le cawnpiaknak rian kha lam a hruai rih. Amah le a Pa kong hngalh dingin mi tampi na bawmhmi hna kha a hmuh i a sunsak. Jehovah le Jesuh bawmhnak thawng lawngin mah rian kha tlamtling tein kan liim khawh lai.—Johan 15:4, 5 rel.

⁹ Baibal nih Jehovah lunglawmhter awkah Jesuh kha kan dawt peng a hau tiah fiang tein a kan cawnpiak. Cucaah Jesuh hawikom kan si khawh nakhnga kan tuah khawhmi thil pali kong kha i ruah hna u sih.

10. Jesuh he hawikom si awkah kan tuah awk a simi a hmasa bik kehlan cu zeidah a si?

¹⁰ (1) Jesuh kong kha hngalh i zuam. Matthai, Marka, Luka le Johan Baibal cauk relnak thawngin cutin kan tuah khawh. Baibal chung i Jesuh nunnak kong kha kan ruah ahcun Jesuh nih mi pawl a pehtlaih hna ning kha kan hngalh lai, mah tikah Jesuh kha kan hun dawt lai i kan hun upat lai. Tahchunhnak ah, Jesuh cu an Saya a si ko nain a zultu pawl kha sal bantukin a pehtlaih hna lo. Mah canah a ruahnak le a intuarnak kha a chimh hna. (Johan 15:15) An ngaih a chiat tikah a ngaih a chia ve i an sinah a ṭap ve. (Johan 11:32-36) A ralchanhtu pawl hmanh nih Jesuh  le a chimmi thawngṭha a cohlangmi hna cu hawikom an hung si ti kha an hmuh. (Matt. 11:19) Jesuh nih a zultu pawl a pehtlaih hna ning kan i zohchunh tikah midang he a ṭhami pehtlaihnak kan ngei i kan i nuam deuh, cun Khrih kha a hlan nakin kan dawt deuh i kan upat deuh.

11. Jesuh he hawikom si awkah kan tuah awk a simi a pahnihnak kehlan cu zeidah a si, mah cu zeicah a biapit?

¹¹ (2) Jesuh ruah ning le tuahsernak kha i zohchunh. Jesuh a ruahning kha ṭha tein kan hngalh i kan i zohchunh tikah kan i hawikomhnak cu a fek chin lai. (1 Kor. 2:16) Jesuh kha zeitindah kan i zohchunh khawh? Tahchunhnak pakhat in zohhmanh hna u sih. Jesuh nih amah ca ṭhatnak nakin midang bawmh ding tu kha biapi deuh in a ruah. (Matt. 20:28; Rom 15:1-3) Cutin a ruah caah anih cu mahca ṭhatnak a hlawmi le mi a ngaihthiammi a rak si. Mi nih a kong an chim tikah fawi tein a thin a hung lo. (Johan 1:46, 47) Cun mi pawl kha hlanlio an rak tuahmi sualnak zoh in a pehtlai hna lo. (1 Tim. 1:12-14) Jesuh nih hitin a ti: “Pakhat le pakhat nan zawn nan i ruah ahcun mi vialte nih, hi hna hi amah a zultu kha an si, tiah an in hngalh hna lai.” (Johan 13:35) Hitin i hal: “Unau pawl karlak ah daihnak a um khawh nakhnga ka tuah khawhmi thil poah ka tuahnak thawngin Jesuh kha kaa zohchunh maw?”

12. Jesuh he hawikom si awkah kan tuah awk a simi a pathumnak kehlan cu zeidah a si, mah cu zeitindah kan tuah khawh?

¹² (3) Khrih unau pawl kha bawm hna. Jesuh nih chiti thuhmi unau pawl cungah kan tuahmi kha amah cungah kan tuahmi bantukin a hmuh. (Matt. 25:34-40) A bik in Jesuh nih a kan fial bantukin midang sinah kan si khawh chungin thawgṭha kan chimnak thawngin le zultu siternak rian kan ṭuannak thawngin chiti thuhmi unau pawl kha kan bawmh khawh hna. (Matt. 28:19, 20; Lam. 10:42) “Tuu dang” pawl bawmhnak thawng lawngin Khrih unau pawl nih vawleicung pumpi thawngṭha chimnak rian kha an liim khawh. (Johan 10:16) Tuu dang na si ahcun mah rian na ṭuan fatin chiti thuhmi unau pawl na dawt hna lawng si loin Jesuh na dawt zong na langhtermi a si.

13. Luka 16:9 i Jesuh ruahnak cheuhnak kha zeitindah kan zulh khawh?

¹³ Vawleicung pumpi thawngṭha chimnak rian caah thawhlawm kan peknak thawng zongin Jehovah le Jesuh hawikom kan si kho. (Luka 16:9 rel.) Tahchunhnak ah, mah thawhlawm kan pekmi kha lamhla i Pathian rian a ṭuanmi, biakinn asiloah a dang inn saknak le leiser ral a tongmi unau pawl bawmhnak caah an hman. Cun kan Khrihfabu caah thawhlawm kan pek khawh i kan Khrihfabu i bawmh a herhmi unau pawl zong kha pumpak in kan bawmh khawh hna. (Ptb. 19:17) Cutin tuahnak thawngin Khrih unau pawl kha kan bawmh khawh hna.

14. Efesa 4:15, 16 ah a langhter bantukin Jesuh hawikom si khawh awkah kan tuah awk a simi a palinak kehlan cu zeidah a si?

¹⁴ (4) Jehovah bupi timhtuahnak hna kha bawm. Kanmah zohkhenh awkah rian pek a simi pawl he rian kan ṭuanṭinak thawngin Khrihfabu lu a simi Jesuh he hawikom ṭha kan hung si kho. (Efesa 4:15, 16 rel.) Tahchunhnak ah, Biakinn kha a ṭha bikmi lam in hman kan i zuam. Cucaah Khrihfabu cheukhat cu a dang Khrihbu he fonh an si i lohmun zong thlennak tuah a si. Mah timhtuahnak thawngin Jehovah bupi ah pekmi tangka kha an khon khawh. Asinain mah timhtuahnak ruangah thil sining thar he aa tlak in thawngthanhtu cheukhat nih thlennak an tuah a hau. Mah zumhfekmi thawngthanhtu  pawl cu Khrihfabu pakhat ah kum saupi a ummi an si men lai i cuka i unau pawl he aa kom tukmi zong an si men lai. Asinain atu ahcun a dang Khrihfabu ah ṭhial an si men lai. Mah timhtuahnak ningin zumhfekmi zultu pawl nih an rian an ṭuanmi a hmuh tikah Jesuh cu aa lawm tuk ko lai.

15. Hmailei ah Jesuh he kan i hawikomhnak cu zeitindah a feh chin lai?

¹⁵ Thiang thlarau in chiti thuhmi hna cu Pathian Pennak ah Jesuh he a zungzal in uktu ṭuanṭi ding timi ruahchannak an ngei. Annih nih Khrih kha an mit in an hmuh lai, amah he bia an i ruah lai i caan an hmangṭi lai. (Johan 14:2, 3) Vawlei ruahchannak a ngeimi hna zong kha Jesuh nih a dawt hna lai i a zohkhenh hna lai. Annih nih Jesuh kha an mit in an hmu kho lai lo nain Jehovah le Jesuh nih an caah an timhpiakmi hna nunnak kha an i nuamhpi lai i Jesuh he an i hawikomhnak cu a fek chin lai.—Isa. 9:6, 7.

16. Jesuh he kan i hawikomhnak thawngin zei thluachuahnak dah kan hmuh lai?

¹⁶ Jesuh nih amah hawikom si dingin a kan sawmmi kha kan cohlan ahcun thluachuahnak tampi kan hmu lai. Tahchunhnak ah, atu hmanhah a dawtnak le a bawmhnak thawngin ṭhathnemhnak kan hmu. Zungzal nunnak ruahchannak zong kan ngei. A biapi bikmi cu Jesuh he kan i hawikomhnak thawngin Jesuh a Pa Jehovah he pumpak in a ṭhami pehtlaihnak kan ngei kho lai. Jesuh a hawikom tiah auh kan simi cu tinvo sung taktak a si.