1. Nemene la nyine tro sa kuca matre troa nyi sineene la ketre atr?

 MAINE easa ajane troa nyi sineene la ketre atr, loi e troa lapa ce tro me angeic. Ame la easa iqajakeune la itre aliene hni së me itre hne së hna melën, easë hi lai a easenyi trootro matre nyipi sinee hë së. Ngo maine easa ajane troa nyi sinee i Iesu, loi e troa pane cile kow la itre jol. Nemene la itre jole cili?

2. Nemene la pane jol hne së hna cile kow?

² Ame la pane jol, tre, tha hne së kö hna iöhnyi me Iesu. Ame ngöne lo hneijine i ange aposetolo, nyimutre la itre Keresiano ka tha hane kö öhnyi Iesu. Ngo öni Peteru aposetolo: “Nge maine tha öhnyi Keriso kö nyipunie, ngo nyipunieti a hnimi nyidrë. Nge ngacama tha öhnyi nyidrëti kö enehila, ngo nyipunieti pe a lapaune koi nyidrë.” (1 Pet. 1:8) Nyipici laka, tha hne së kö hna iöhnyi me Iesu. Ngo ijije hi tro sa acatrene la aqane imelekeu së me nyidrë, me nyi sinee i nyidrë.

3. Nemene la hnaaluene jol?

³ Ame la hnaaluene jol, tre thatreine kö së troa ithanata koi Iesu. Ame la easa thith, ke, easa ithanata koi Iehova. Nyipici laka, easa nyi jëne Iesu la thithi së. Ngo tha easë kö a ithanata meköti koi nyidrë. Tha aja i Iesu kö tro sa thithi  koi nyidrë. Pine nemen? Pine laka, ame la thith, ke ketre igötranene la hmi. Iehova hmekuje hi la nyine tro sa thili kow me atrun. (Mat. 4:10) Ngo ijije fe hi tro sa amamane la ihnimi së koi Iesu.

4. Nemene la hnaakönine jol, nge nemene la hne së hna troa ce wang?

⁴ Ame la hnaakönine jol, tre, Iesu a mel e koho hnengödrai, matre thatreine kö së troa ceme nyidrë. Ngacama tha ce nyidrëti kö me easë, ngo ijije hi tro sa atrepengöi Iesu hnyawa. Tro sa ce wang la foa lao ewekë ka troa xatua së troa acatrene la aqane imelekeu së me Iesu. Tro sa pane ce ithanatane la kepin, matre ka nyipiewekë troa acatrene la aqane imelekeu së me Iesu.

5. Pine nemene matre nyipiewekë troa nyi sinee i Iesu? (Wange ju fe la hna eköhagen, “ Troa Nyi Sinee i Iesu Matre Troa Nyi Sinee i Iehova” me “ Loi e Troa Atreine Waiewekë Göne La Hnëqa i Iesu.”)

⁵ Nyipiewekë troa nyi sinee i Iesu, matre troa lolo la aqane imelekeu së me Iehova. Pine nemen? Hanawang la lue kepin. Ame la hnapan, öni Iesu kowe la itretre drei nyidrë: “Kakati fe a hane hnimi nyipunie, ke hnei nyipunieti hna hnimi ni.” (Ioane 16:27) Öni nyidrëti fe: “Pëkö atr ka atreine troa tro koi Kaka, e tha hna jëne ni.” (Ioane 14:6) Thatreine kö troa nyi sinee i Iehova hmekuje hi, nge tha nyi sinee i Iesu pe. Ceitune hi lai memine la troa lö hnine la uma, ngo tha lö pe së qa ngöne la qëhnelö. Hnei Iesu hna aceitunë nyidrë me “qëhnelö ne la itre mamoe.” (Ioane 10:7) Ame la hnaaluene kepin, tre, hnei Iesu hna amamane hnyawa la itre thiina ne la Keme i nyidrë. Öni nyidrë kowe la itretre dreng: “Ame la atre öhnyi ni, ketre öhne fe hë angeic la Kem.” (Ioane 14:9) Haawe, maine  easa ajane troa atrepengöi Iehova hnyawa, loi e tro sa pane thel troa atrepengöi Iesu. E cili, troa kökötre la ihnimi së koi nyidrë me koi Iehova, Keme i nyidrë.

6. Nemene la ketre kepin matre nyipiewekë troa nyi sinee i Iesu? Qejepengöne jë.

⁶ Loi e tro sa acatrene la aqane imelekeu së me Iesu, matre troa sa la itre thithi së. Tha tro hi sa qaja ka hape, “jëne Iesu” ngöne la easa nyipun la thithi së. Loi e tro fe sa trotrohnine la hnëqa i Iesu qaathei Iehova, matre troa sa la itre thithi së. Öni Iesu kowe la itre aposetolo: “Ame la nöjei ewekë hnei nyipunieti hna troa sipon ngöne la ëjeng, tro ni a eatrën.” (Ioane 14:13) Iehova la ka dreng me sa la itre thithi së. Ngo hnei Nyidrëti hna nue koi Iesu troa eatrëne la itre mekuna i Nyidrë. (Mat. 28:18) Qëmekene tro Akötresieti a sa la itre thithi së, Nyidrëti a pane goeën e hne së hna trongëne lo eamo hna hamën hnei Iesu. Öni Iesu: “Maine nyipunieti a nue la ngazo hna kuca koi nyipunie, tro la Keme i nyipunie e koho hnengödrai a hane nue la ngazo i nyipunie. Ngo maine tha hnei nyipunieti kö hna nue la ngazo hna kuca koi nyipunie, ketre tha tro kö la Keme i nyipunie a nue la ngazo i nyipunie.” (Mat. 6:14, 15) Celë hi kepin matre loi e tro sa thiina ka loi koi itre xan, tui Iehova me Iesu!

7. Drei la itre ka troa kepe eloine qa ngöne la mel hna huujën hnei Iesu?

⁷ Ame la itre ka imelekeu hnyawa me Iesu, tre, tro angatr a kepe eloine qa ngöne la thupene mel. Nemene la ka anyipicine lai? Öni Iesu ka hape, tro nyidrëti “a meci pine la sinee i [nyidrë].” (Ioane 15:13) Ame la itre hlue i Iehova ka mel qëmekene tro Iesu a traqa e celë fen, tre, tro angatr elanyi a thel troa atrepengöi Iesu hnyawa me hane hnimi nyidrë. Kola qaja la itre trahmanyi me föe hna troa amelene hmaca, tui Aberahama, Sara, Mose, me Rahaba. Nyipiewekë tro angatr a acatrene la aqane imelekeu i angatr me Iesu, matre troa hane mel epine palua.—Ioane 17:3; Itre hu. 24:15; Heb. 11:8-12, 24-26, 31.

8-9. Thenge la Ioane 15:4, 5, nemene la hna aijijë së troa kuca hnene la aqane imelekeu së me Iesu, nge pine nemene matre ka nyipiewekë?

⁸ Easa madrin troa ce huliwa me Iesu, ngöne la easa cainöjëne la itre maca ka lolo ne la Baselaia me inine la itre atr. Ame lo Iesu e celë fen, hnei nyidrëti hna hamë ini. Ame hë lo nyidrëti a bëeke hmaca hnengödrai eë, hna acili nyidrë troa elemekene la ekalesia me xomiujine la huliwa ne cainöj. Öhne hi Iesu la itre trengecatre hne së hna kuca, matre troa xatuane la itre atr troa atrepengöi nyidrë me Iehova. Ngo tro sa atreine eatrëne la huliwa cili, e tro Iehova me Iesu a xatua së.—E jë la Ioane 15:4, 5.

⁹ Öni Tusi Hmitrötr, loi e tro palahi sa akökötrene la ihnimi së koi Iesu, matre troa amadrinë Iehova. Haawe, tro sa ce wang la foa lao ewekë ka xatua së troa nyi sinee i Iesu.

10. Nemene la nyine troa pane kuca matre troa acatrene la aqane imelekeu së me Iesu?

¹⁰ (1) Troa thele troa atrepengöi Iesu. Tro sa atrepengöi nyidrëti hnyawa, jëne la itre tusi Mataio, Mareko, Luka, me Ioane. Maine tro sa lapa mekun la mele i Iesu hna qaja e hnine la Tusi Hmitrötr, tro ha kökötre la ihnim me metrötre së koi nyidrë. Eje hi, lolo la aqane ujë i nyidrëti kowe  la itre atr. Ngacama Iesu la maseta ne la itretre dreng, ngo tha hnei nyidrëti kö hna thahluë angatr. Hnei nyidrëti pe hna qaja koi angatr la itre mekun me aliene hni nyidrë. (Ioane 15:15) Hnei Iesu hna ce akötr me ce treij me angatr. (Ioane 11:32-36) Ketre, öhne fe hi la itre ithupëjia me Iesu laka, kola nyi sinee i nyidrë hnene la itre ka kapa la maca. (Mat. 11:19) Maine tro sa nyitipune la aqane ujë i Iesu kowe la itretre dreng, tro ha lolo la aqane imelekeu së me itre xan, nge tro hë sa madrin. Ketre, troa kökötre la ihnim me metrötre së koi Iesu.

11. Nemene la hnaaluene ewekë matre troa hane nyi sinee i Iesu, nge pine nemene matre ka nyipiewekë?

¹¹ (2) Troa nyitipune la aqane mekun me aqane ujë i Iesu. Maine tro sa catre nyitipune la aqane mekune i Iesu, tro ha acatrene la aqane imelekeu së me nyidrë. (1 Kor. 2:16) Nemene la aqane tro sa nyitipu Iesu? Hanawang la ketre ceitun. Sisitria catre kö koi Iesu troa xatuane la itre xan, hune la troa kuca la sipu aja i nyidrë. (Mat. 20:28; Rom. 15:1-3) Hnei Iesu palahi hna nue xecie la mele i nyidrë me nue la itre ngazo itre xan. Tha hnei Iesu kö hna dreng akötrëne la itre hna qaja hnei itre xan. (Ioane 1:46, 47) Ketre, tha hnei nyidrëti kö hna nue la itre tria hna kuca ekö hnene la itre atr, troa saze la aqane ujë i nyidrë. (1 Tim. 1:12-14) Öni Iesu: “Tro la nöjei atr asë a wangatrehmekune laka, nyipunieti la itretre drei ni, e tro nyipunie a ihnimikeu.” (Ioane 13:35) Loi e tro sa isa hnying ka hape: “Eni kö a nyitipu Iesu me thele tingeting me iloi memine la itre trejin?”

12. Nemene la hnaakönine ewekë matre troa nyi sinee i Iesu, nge nemene la nyine tro sa kuca?

¹² (3) Troa sajuëne la itre trejin me Keriso. Ame la itre hne së hna kuca koi angatr, easë hi lai a kuca koi Iesu. (Mat. 25:34-40) Ame la pane aqane tro sa sajuëne la itre hna iën, tre, ene la troa catre cainöj me inine la itre atr, tune lo hna ahnithe hnei Iesu. (Mat. 28:19, 20; Itre hu. 10:42) Jëne la ixatua ne la “itre xa mamoe,” itre trejin me Iesu a eatrën la huliwa ka tru cili e cailo fen. (Ioane 10:16) Maine easa catre cainöjëne la maca ka loi memine la itre xaa mamoe, easë fe hi lai a amamane la ihnimi së koi Iesu me kowe la itre trejin me nyidrë.

13. Nemene la aqane tro sa trongëne la eamo i Iesu ngöne Luka 16:9?

¹³ Easë fe a thele troa ce sinee me Iehova me Iesu, ngöne la easa kuië ahnahna. Easa amamane la aja së troa sajuëne la huliwa i nyidro. (E jë la Luka 16:9.) Ijije hi tro sa kuië ahnahna thatraqane la huliwa i Iehova e cailo fen. Celë hi manie thatraqane la huliwa ne cainöj, me xupi uma ne Baselaia me itre xaa uma ju kö. Kolo fe a xatuane la itre trejin hna lepe hnei hulö. Ame fe e hnine la ekalesia, easa kuië ahnahna matre troa nyithupene la itre ejolen, nge thatraqane la itre trejin ka aja ixatua. (Ite Edomë 19:17) Celë hi itre aqane troa sajuëne la itre trejin me Keriso.

14. Thenge la Efeso 4:15, 16, nemene la hnaafoane ewekë matre troa nyi sinee i Iesu?

¹⁴ (4) Troa drengethenge la itre hna amekötin e hnine la ekalesia. Easa thele troa nyi sinee i Iesu ngöne la easa metrötrë nyidrë, he ne la ekalesia. Easë fe a ce huliwa memine la itre hna acil matre troa thupëne la ekalesia. (E jë la Efeso 4:15, 16.) Ijije hi tro sa huliwane hnyawa la itre Uma Ne Baselaia. Celë hi kepin matre hna acasine la itre xaa ekalesia, nge hna saze la itre ifego ne la itre  teritoar. Itre aqane kuca lai ka aijijëne la organizasio i Iehova, troa huliwane hnyawa la itre manie hna kuiën. Ketre, hnene la itre trejin hna saze la itre hnei angatr hna majemin. Ame la itre xan, itre macatre ne angatr a huliwa ngöne la ketre ekalesia, nge hetre sinee i angatr e cili. Ngo hna sipo angatr troa saze ekalesia. Drei la madrine i Iesu troa goeëne la itre sine huliwa i nyidrë ka nyipici me ka idrengethenge!

15. Nemene la itre eloine hne së hna troa kapa, e tro palahi sa acatrene la aqane imelekeu së me Iesu?

¹⁵ Ame la itre hna iën hnei uati hmitrötr, tre, angatr a mejiune troa ce me Iesu uti hë epine palua, me ce musi me nyidrë ngöne la Baselaia i Akötresie. Tro angatr a öhnyi Iesu, me ithanata koi nyidrë, me ce mel me nyidrë. (Ioane 14:2, 3) Ame la itre ka mejiune troa mel e celë fen, tre, tro fe Iesu a hane thupë angatr me hnimi angatr. Nyipici laka, tha öhnyi Iesu kö hnei angatr, ngo ijije hi tro angatr a hane nyi sinee i nyidrë. Tro fe angatr elanyi a kapa la mel hna hnëkëne hnei Iehova me Iesu.—Is. 9:6, 7.

16. Nemene la itre manathithi hne së hna troa kapa, e tro palahi sa nyi sinee i Iesu?

¹⁶ Nyimutre la itre manathithi hne së hna kapa, ngöne la easa thele troa nyi sinee i Iesu. Iesu a hnimi së me xatua së. Ketre, ijije hi tro sa mel epine palua. Ngo ame la ka sisitria catr, tre, ene la troa nyi sinee i Iesu me Iehova Keme i nyidrë. Drei la ketre manathith ka tru, ene la troa ketre sinee i Iesu!