1. Fa yu anga wan sama e toon mati?

TE I wani meke mati anga wan sama yu e du sani makandaa anga a sama. Te wi e gi toli, da wi e taki fa wi e pakisei fu son sani. A so wi anga a sama e toon mati. Ma a á makiliki fu toon Yesesi mati. Saide a á makiliki fu toon en mati?

2. San na a fosi sani di sa meke a taanga gi u fu toon Yesesi mati?

² A fosi sani di sa meke a taanga gi u fu toon Yesesi mati, a fu di wi á si en noiti. A omen Kelesten aini a ten fu den apostel á be si Yesesi noiti tu. Toku Peitilisi be taki: „Noiti wi á si en, ma tokuso u lobi en. Anga ala fa u nai si en nownow, tokuso wi e biibi en” (1 Peit. 1:8). Neen meke winsi fa wi á si Yesesi noiti, tokuso u sa toon en mati.

3. San a du fu tu sani di sa meke a taanga gi u fu toon Yesesi mati?

³ Du fu tu sani na a taki di wi á poi taki anga Yesesi. Te wi e begi, anga Yehofa wi e taki. Winsi fa wi e begi aini a nen fu Yesesi, tokuso a Yehofa wi e begi. Yesesi á wani sama begi en tu. Saide? Bika begi a wan fasi fa wi e dini Gadu. A Yehofa na a wan kodo Sama di u mu dini (Mat. 4:10). Ma winsi fa wi á poi taki anga Yesesi, tokuso u sa soi taki u lobi en.

4. San a du fu dii sani di sa meke a taanga gi u fu toon Yesesi mati? San wi o luku aini a artikel ya?

 ⁴ Du fu dii sani a taki Yesesi e tan a hemel, neen meke wi á poi de makandaa anga en. Tokuso u sa kon sabi omen sani fi en winsi fa wi á poi de makandaa anga en. Wi o luku fo sani di u sa du fu wi anga Yesesi toon moo bun mati. Ma wi o luku fosi saide a de taanga fanowdu fu toon Yesesi mati.

5. Saide u meke moiti fu toon Yesesi mati? (Luku a faki „ Te u toon Yesesi mati, wi anga Yehofa e toon mati tu” anga a faki „ Wi á mu lobi Yesesi moo Yehofa”.)

⁵ Efu u wani wi anga Yehofa de bun, u mu toon Yesesi mati. Saide? Meke u luku tu sani. A fosiwan na a sani di Yesesi be taigi den disipel fi en. A be taki: „Nda seefi lobi u, fu di u be lobi mi” (Yoh. 16:27). A be taki tu: „Sondee mi, nawan sama poi doo na a Dda” (Yoh. 14:6). Wan sama di wani toon Yehofa mati sondee fu sabi Yesesi bun fosi, de enke wan sama di wani go aini wan osu sondee fu a pasa na a doo. Yesesi be taigi den bakaman fi en taki neen na „a doo pe den sikapu mu pasa” (Yoh. 10:7). Du fu tu sani a taki Yesesi abi denseefi manii fi en Dda. A be taigi den disipel fi en taki: „A sama di si mi, si a Dda tu” (Yoh. 14:9). Den sani ya e soi taki wan fasi fa u sa toon Yehofa mati, a te u sabi Yesesi bun. O moo wi o sabi Yesesi, o moo wi o lobi en. O moo wi o lobi Yesesi, o moo wi o lobi Yehofa.

6. San a wan taa sani di e soi taki u mu meke moiti fu toon Yesesi mati?

⁶ Efu u wani Yehofa aliki den begi fu u, u mu toon Yesesi mati fosi. A na te wi e  taki „aini a nen fu Yesesi” na a kaba fu den begi fu u namo da Yehofa o aliki u. U mu fusutan fosi fa Yehofa e koboloiki Yesesi fu piki den begi fu u. Yesesi be taigi den apostel fi en taki: „Winsi san wi akisi aini mi nen, mi o du en gi u” (Yoh. 14:13). Winsi fa a Yehofa na a Sama di e aliki begi, tokuso a Yesesi a gi a wooko fu du san a abi a pakisei (Mat. 28:18). Pakisei san Yehofa e du te u begi en fu a gi u paadon fu den fowtu di wi e meke. Fosi a gi u paadon, ai luku efu useefi e gi taawan paadon enke fa Yesesi leli u. Yesesi be taki: „Efu yu e gi taawan paadon fu den fowtu fu den, i Dda a hemel o gi i paadon fu den fowtu fi i tu. Efi i nai gi taawan paadon fu den fowtu fu den, da i Dda ná o gi i paadon fu den fowtu fi i tu” (Mat. 6:14, 15). A sani ya e soi taki u mu e libi bun anga taawan, leti enke fa Yehofa anga Yesesi e libi bun anga u.

7. Sama o fende wini fu a dede di Yesesi dede gi u?

⁷ A den mati fu Yesesi wawan o fende wini fu a dede di a dede gi u. Fa u du sabi a sani ya? Yesesi taki a be o „dede gi den mati fi en” (Yoh. 15:13). Den sama di be e dini Yehofa fosi Yesesi be kon a goontapu, mu leli sabi Yesesi da den toon en mati. Na a sani ya o meke den fende teego libi. Sama enke Abalaham, Sala, Mosesi anga Rakab o weki baka, bika den be e dini Yehofa anga den hii ati. Ma efu den wani libi fu teego, den mu toon Yesesi mati.​—Yoh. 17:3; Toli 24:15; Heb. 11:8-12, 24-26, 31.

8-9. Enke fa Yohanisi 15:4, 5 e soi, da san u poi du fu di wi anga Yesesi a mati? Saide u mu meke moiti fu wi anga Yesesi á poli?

⁸ Ai bigi gi u fu wooko makandaa anga Yesesi, te wi e paati a bun nyunsu fu a Kownukondee. Di Yesesi be de a goontapu a be e leli sama. A Yesesi na a edeman fu a kemeente, neen meke winsi fa a go a hemel ai tii a peleikiwooko ete. Ai si a moiti di wi e meke fu yeepi sama fu kon sabi en anga en Dda. Efu Yehofa anga Yesesi a be e yeepi u, wi á be o poi du a wooko ya.​—Leisi Yohanisi 15:4, 5.

⁹ A Wowtu fu Gadu e leli u taki efu u wani Yehofa lobi u, u mu lobi Yesesi. U mu meke moiti tu fu wi anga Yesesi á poli. Meke u luku fo sani di o yeepi u fu toon Yesesi mati.

10. San na a fosi sani di u mu du efu u wani wi anga Yesesi toon mati?

¹⁰ (1) Meke moiti fu sabi Yesesi. Efu u wani sabi Yesesi, u sa leisi den Beibel buku Mateyesi, Malikisi, Lukasi, anga Yohanisi. Te wi e leisi den buku ya, wi o si fa Yesesi be e libi bun anga taawan. A sani ya o meke u lesipeki en. Wi o lobi en tu. Winsi fa a be abi makiti, tokuso a á be e si den bakaman fi en enke saafu. A peesi fu dati, a be e taigi den fa a be e denki anga fa a be e fii (Yoh. 15:15). Te sani be e moo den bakaman fu Yesesi, a be e fii en tu. Son leisi a be e kee anga den (Yoh. 11:32-36). Den feyanti fu Yesesi seefi be e si taki en anga den bakaman fi en a be mati (Mat. 11:19). Efu wi e libi anga taawan enke fa Yesesi be e libi anga den bakaman fi en, a sani ya o meke wi anga den toon mati, a o meke u piisii, boiti dati wi o abi lesipeki gi Yesesi. Wi o moo lobi en tu.

11. San a du fu tu sani di o yeepi u fu toon Yesesi mati? Saide a sani ya pelensipali?

 ¹¹ (2) Meke moiti fu denki enke fa Yesesi e denki. Meke moiti fu du sani enke en. Efu u wi e meke moiti fu sabi fa Yesesi e denki, da u meke moiti fu denki enke en, a sani ya o meke wi anga en toon moo bun mati (1 Kor. 2:16). Fa u sa waka a Yesesi baka? Meke u luku wan fasi fa u sa du a sani ya. Yesesi be e booko en ede anga taawan moo enseefi (Mat. 20:28; Rom. 15:1-3). Fu di a be e denki so, meke a be de kabakaba fu yeepi taawan. A be e gi taawan paadon tu. En ati á be e boon gaw te a be yee san sama be e taki fi en (Yoh. 1:46, 47). A á be e libi wan fasi anga taawan te den be du hati sani anga en (1 Tim. 1:12-14). Yesesi be taki: „A so ala sama o sabi taki wi a mi bakaman, te u lobi useefi” (Yoh. 13:35) Neen meke a bun fu akisi useefi taki: „Mi e waka a Yesesi baka? Mi e du ala san mi poi fu libi bun anga mi baala anga sisa?”

12. San a du fu dii sani di u mu du efu u wani toon Yesesi mati? Fa u sa du a sani ya?

¹² (3) Holibaka gi den baala fu Kelestesi. Te wi e holibaka gi den salufu Kelesten, da a leti enke a Yesesi seefi wi e yeepi (Mat. 25:34-40). A moo bun fasi fa u sa holibaka gi den salufu Kelesten, a te wi e paati a Kownukondee bosikopu, anga te wi e yeepi taawan fu toon Yesesi bakaman enke fa a taigi den bakaman fi en (Mat. 28:19, 20; Toli 10:42). Efu den „taa sikapu” á be e yeepi den baala fu Kelestesi, den á be o poi paati a bun nyunsu na a hii goontapu (Yoh. 10:16). Efi yu a wan fu den taa sikapu, ala yuu te yu e du a wooko ya, yu e soi taki i lobi Yesesi anga den baala fi en.

13. Fa u sa du a sani di Yesesi taki a Lukasi 16:9?

¹³ Wan taa fasi fa u sa meke mati anga Yehofa anga Yesesi, a te wi e gi moni fu holibaka gi a wooko di den gi u fu du. (Leisi Lukasi 16:9.) U sa gi moni fu holibaka gi a wooko di e du a hii goontapu. Na a moni ya den baala e koboloiki fu du a peleikiwooko a faawe peesi, fu meke Kownukondee zaal anga taa peesi pe wi e kon makandaa. Den e koboloiki a moni ya tu fu yeepi baala anga sisa a peesi pe wan gaan ogii pasa. U sa gi moni tu fu yeepi tapu den kosutu fu a kemeente. Boiti dati, u sa yeepi sama di de a nowtu (Odo 19:17). Disi a wantu fasi fa u sa holibaka gi den baala fu Kelestesi.

14. Enke fa Efeisesama 4:15, 16 e soi, da san a du fu fo sani di u mu du efu u wani toon Yesesi mati?

¹⁴ (4) Holibaka gi a olikanisâsi fu Yehofa. Wan sani di o yeepi u fu wi anga Yesesi toon moo bun mati, a te wi e holibaka gi den sama di Yesesi poti fu teke fesi. (Leisi Efeisesama 4:15, 16.) Nownow a olikanisâsi e meke moiti fu koboloiki den Kownukondee zaal moo bun. Fu man du a sani ya, da son leisi den e mokisa tu efuso moo kemeente kon a wan. Den e seeka den pisi pe den kemeente mu peleiki taa fasi tu. A sani ya e yeepi a olikanisâsi fu a á lasi moni tumisi. Ma fu man du a sani ya, den baala anga sisa abi fu teke gwenti. Den baala anga sisa ya be gwenti fa sani be de aini a kemeente di den be de  fosi. Den anga den baala anga sisa be toon bun mati tu. Ma now den baala akisi den efu den sa go a wan taa kemeente. Yesesi e piisii tuutuu, te a si taki den bakaman fi en e wooko anga san den baala taigi den, winsi a á makiliki.

15. Saide u sa taki wi anga Yesesi o toon moo bun mati aini a ten di e kon?

¹⁵ Den salufu Kelesten abi a howpu fu tii makandaa anga Yesesi fu teego aini a Kownukondee fu Gadu. Den o de makandaa anga Yesesi. Den o go e si en, den o poi taki anga en tu (Yoh. 14:2, 3). Yesesi o soi den sama di abi a howpu fu libi fu teego a goontapu taki a lobi den. Winsi fa den ná o man si Yesesi, tokuso den anga en o toon moo bun mati. Den o fende a libi di Yehofa anga Yesesi paamisi den.​—Yes. 9:6, 7.

16. Sowtu wini wi o fende te wi anga Yesesi toon mati?

¹⁶ A omen wini wi e fende te wi anga Yesesi toon mati. Ai holibaka gi u nownow kaba. A soi u tu taki a lobi u. Wi o fende a okasi fu libi fu teego. Ma a moo gaan wini di wi e fende te wi anga Yesesi toon mati, a taki wi anga Yehofa, a Dda fu Yesesi e toon mati tu. A wan gaandi wi abi fu de wan mati fu Yesesi.