1. Afo esinam didie enen̄ede adiana ye owo?

AKPA n̄kpọ emi esiwakde ndinam fi ye owo ẹdi ata nti ufan edi mbufo ndisidu kiet. Nte mbufo ẹnemede nneme, afo eyetịn̄ se afo ekerede ye nte etiede fi ke idem ọnọ enye, enye onyụn̄ etịn̄ esie, mbufo mbiba ẹyekabade ufan. Edi enyene mme n̄kpọ emi ẹkemede ndinam ọsọn̄ nnyịn ndidi ata ufan Jesus. Nso idi oro?

2. Nso idi akpa n̄kpọ emi ekemede ndinam ọsọn̄ nnyịn ndidi ata ufan Jesus?

² Akpa n̄kpọ emi ekemede ndinam ọsọn̄ nnyịn ndidi ata ufan Jesus edi ke akananam nnyịn ikwe enye iso ye iso. Ediwak mme Christian ke eyo mme apostle ikekwe enye n̄ko. Kpa ye oro, apostle Peter ọkọdọhọ ete: “Okposụkedi akanam mbufo mîkwe enye, mbufo ẹmema enye. Okposụkedi mbufo mîkwe enye idahaemi, mbufo ẹmebuọt idem ye enye.” (1 Pet. 1:8) Ntre imosụk ikeme ndidi ata ufan Jesus kpa ye emi nnyịn mîkwe enye iso ye iso.

3. Nso idi ọyọhọ n̄kpọ iba emi ekemede ndinam ọsọn̄ nnyịn ndidi ata ufan Jesus?

³ Ọyọhọ n̄kpọ iba emi ekemede ndinam ọsọn̄ nnyịn ndidi ata ufan Jesus edi ke nnyịn ikemeke nditịn̄ ikọ ye enye. Ini ibọn̄de akam, isitịn̄ ikọ ye Jehovah. Kpa ye emi isibọn̄de akam ke enyịn̄ Jesus, nnyịn isitịn̄ke ikọ ye enye. Jesus ke idemesie inyụn̄ iyomke-yom ibọn̄ akam inọ imọ.  Ntak-a? Sia akam edi usụn̄ kiet emi ituakde ibuot inọ Jehovah, ndien Jehovah kpọt ke ikpatuak ibuot inọ. (Matt. 4:10) Kpa ye oro, imosụk ikeme ndiwụt ke imama Jesus.

4. Nso idi ọyọhọ n̄kpọ ita emi ekemede ndinam ọsọn̄ nnyịn ndidi ata ufan Jesus? Nso ke idineme ke ibuotikọ emi?

⁴ Ọyọhọ n̄kpọ ita emi ekemede ndinam ọsọn̄ nnyịn ndidi ata ufan Jesus edi ke Jesus odụn̄ ke heaven, ntre nnyịn ikemeke ndidu ye enye. Edi imosụk ikeme ndifiọk ediwak n̄kpọ mban̄a Jesus kpa ye emi nnyịn mîdụhe ye enye. Iyeneme n̄kpọ inan̄ emi ikemede ndinam man idi ata ufan esie. Edi yak ibem iso ineme ntak emi enen̄erede ọfọn idi ata ufan Jesus.

5. Ntak emi ikpedide ufan Jesus? (Se n̄ko mme ekebe emi “ Ndidi Ufan Jesus Ayanam Idi Ufan Jehovah” ye “ Nnennen Usụn̄ Emi Ikpadade Jesus.”)

⁵ Ana idi ufan Jesus edieke iyomde ndidi ata ufan Jehovah. Nso inam edi ntre? Se ntak iba mi. Akpa, Jesus ọkọdọhọ mme mbet esie ete: “Ete amama mbufo, koro mbufo ẹmade mi.” (John 16:27) Enye ama onyụn̄ ọdọhọ ete: “Baba owo kiet itieneke Ete ibọhọke ebe ke ami.” (John 14:6) Ndidomo ndidi ufan Jehovah ke ini nnyịn mîdịghe ufan Jesus etie ukem ukem nte owo ndidomo ndidụk ufọk edi isan̄ake enyịnusụn̄. Jesus ama ada mbiet ikọ oro etịn̄ aban̄a idemesie ete ke imọ idi ‘enyịnusụn̄ inọ mme erọn̄.’ (John 10:7) Ọyọhọ ntak iba edi ke Jesus ama enen̄ede ekpebe mme edu ete esie. Enye ọkọdọhọ mme mbet esie ete: “Owo eke okụtde mi okụt Ete n̄ko.” (John 14:9) Ntre akpan n̄kpọ kiet emi edinamde nnyịn ifiọk Jehovah edi ndikpep mban̄a  uwem Jesus. Nte isụk ikpepde iban̄a Jesus, iyetetịm ima enye. Ndien nte itịmde-tịm ima Jesus, ntre ke iditetịm ima Ete esie.

6. Nso idi ntak en̄wen emi anade idi ufan Jesus? Nam an̄wan̄a.

⁶ Ana idi ufan Jesus man Abasi okop akam nnyịn. Emi ikụreke ke ndidọhọ “ke enyịn̄ Jesus” ke utịt akam. Ana an̄wan̄a nnyịn nte Jehovah esidade Jesus ọbọrọ akam nnyịn. Jesus ọkọdọhọ mme apostle esie ete: “Se ededi oro mbufo ẹben̄ede ke enyịn̄ mi, ami nyanam.” (John 14:13) Kpa ye emi edide Jehovah esikop onyụn̄ ọbọrọ akam nnyịn, enye ọnọ Jesus odudu ndinam se imọ ibierede. (Matt. 28:18) Ntre mbemiso Abasi ọbọrọde akam nnyịn, enye esise m̀mê nnyịn imanam se Jesus ọkọdọhọde. Ke uwụtn̄kpọ, Jesus ọkọdọhọ ete: “Edieke mbufo ẹfende ẹnọ mme owo ke mme idiọkn̄kpọ mmọ, Ete mbufo eke heaven eyefen n̄ko ọnọ mbufo; edi edieke mbufo mîfenke inọ mme owo ke mme idiọkn̄kpọ mmọ, Ete mbufo idinyụn̄ ifenke inọ mbufo ke mme idiọkn̄kpọ mbufo.” (Matt. 6:14, 15) Omokụt ntak emi ọfọnde inam n̄kpọ ye mme owo nte Jehovah ye Jesus ẹnamde n̄kpọ ye nnyịn!

7. Mmanie ke n̄kpa Jesus edinen̄ede enyene ufọn inọ?

⁷ N̄kpa Jesus edinen̄ede enyene ufọn inọ mbon emi ẹdide ata ufan esie kpọt. Inam didie ifiọk? Jesus ọkọdọhọ ke imọ ‘iyayak uwem imọ inọ ke ibuot mme ufan imọ.’ (John 15:13) Oyoyom nti ikọt Abasi emi ẹkedude mbemiso Jesus edi isọn̄ ẹkpep ẹban̄a Jesus ẹnyụn̄ ẹma enye. Mme asan̄autom Abasi nte Abraham, Sarah, Moses, ye Rahab ẹyeset, edi oyoyom mmọ ẹdi ufan Jesus man ẹkeme ndidu uwem ke nsinsi.—John 17:3; Utom 24:15; Heb. 11:8-12, 24-26, 31.

8-9. John 15:4, 5 owụt ke nnyịn ndidi ufan Jesus anam nnyịn inam nso? Ntak emi edide akpan n̄kpọ?

⁸ Enem nnyịn etieti ndidiana ye Jesus n̄kwọrọ eti mbụk Obio Ubọn̄ Abasi nnyụn̄ n̄kpep mme owo n̄kpọ. Jesus ekedi andikpep ini enye okodude ke isọn̄. Tọn̄ọ Jesus akafiak ọnyọn̄ heaven ekedi ibuot esop, enye aka iso ndida usụn̄ ke utom ukwọrọikọ ye ndikpep mme owo n̄kpọ. Enye okụt onyụn̄ ama ukeme emi afo esịnde man an̄wam ediwak owo nte ekekeme ẹdifiọk enye ye Ete esie. Se idude edi ke Jehovah ye Jesus mîkpan̄wamke nnyịn, nnyịn ikpekemeke ndinam utom emi n̄kụt unen.—Kot John 15:4, 5.

⁹ Ikọ Abasi enen̄ede ekpep ke ana ika iso ima Jesus man inem Jehovah esịt. Ntre, ẹyak ineme ndien n̄kpọ inan̄ emi ẹkemede ndinam nnyịn idi ata ufan Jesus.

10. Nso idi akpa n̄kpọ emi edinamde nnyịn idi ufan Jesus?

¹⁰ (1) Diọn̄ọ Jesus. Imekeme ndidiọn̄ọ Jesus edieke ikotde n̄wed Matthew, Mark, Luke, ye John. Nte itiede ikere se Bible etịn̄de aban̄a uwem Jesus, iyokụt nte Jesus ekesifọnde uwem ye mme owo, oro ayanam ima enye inyụn̄ ikpono enye. Ke uwụtn̄kpọ, kpa ye emi enye ekedide Eteufọk mme mbet esie, enye ikanamke n̄kpọ ye mmọ nte mme ifịn. Edi ama esidọhọ mmọ se enye ekerede ye nte etiede enye ke idem. (John 15:15) Ini mmọ ẹfụhọde, Jesus ama esitiene ofụhọ, enye ama akam etiene mmọ atua. (John 11:32-36) Idem mbon emi ẹkekọbọde  enye ẹma ẹkụt ke enye ekedi ufan ye mbon emi ẹkenamde se enye ekpepde. (Matt. 11:19) Ima ikpebe nte Jesus ekesinamde n̄kpọ ye mme mbet esie, iyetetịm idiana ye mbon en̄wen, iyụhọ ye se inyenede inyụn̄ ikop inemesịt, iyonyụn̄ idọdiọn̄ ima Jesus inyụn̄ ikpono enye.

11. Nso idi ọyọhọ n̄kpọ iba emi edinamde nnyịn idi ufan Jesus? Ntak emi edide akpan n̄kpọ?

¹¹ (2) Kere n̄kpọ nte Jesus nyụn̄ nam n̄kpọ nte enye. Nte idiọn̄de-diọn̄ ifiọk Jesus inyụn̄ ikpebe enye, ntre ke ididọdiọn̄ idi ufan esie. (1 Cor. 2:16) Idinam didie ikpebe Jesus? Se usụn̄ kiet mi. Se ikesinen̄erede ibehe Jesus ekesidi ndin̄wam mme owo, idịghe ndinam se inemde enye. (Matt. 20:28; Rome 15:1-3) Sia enye eketiede ntre, enye ama esiwa idem anam n̄kpọ ọnọ mme owo onyụn̄ efen ọnọ owo. Enye ikesisọpke iyat esịt iban̄a se mme owo ẹtịn̄de ẹban̄a enye. (John 1:46, 47) Enye ikesidịghe owo ama anam n̄kpọ edue enye omụm esịn ke edọn̄, onyụn̄ anam n̄kpọ ye owo oro etiene ndudue oro. (1 Tim. 1:12-14) Jesus ọkọdọhọ ete: “Edieke mbufo ẹnyenede ima ke otu idem mbufo, kpukpru owo ẹyeda emi ẹfiọk ẹte mbufo ẹdi mbet mi.” (John 13:35) Bụp idemfo ete, “Ndi ke n̄kpebe Jesus nnyụn̄ nnam kpukpru se n̄kemede man n̄ka iso ndu ke emem ye nditọete mi?”

12. Nso idi ọyọhọ n̄kpọ ita emi edinamde nnyịn idi ufan Jesus? Didie ke idinam emi?

¹² (3) N̄wam nditọete Christ. Jesus ada se inamde inọ nditọete esie emi ẹyetde aran nte inam inọ imọ. (Matt. 25:34-40) N̄kponn̄kan usụn̄ emi in̄wamde nditọete Christ edi ndisịn idem n̄kwọrọ ikọ nnyụn̄ nnam mme owo ẹdi mbet Christ nte Jesus ọkọdọhọde mbet esie ẹnam. (Matt. 28:19, 20; Utom 10:42) Nditọete Christ oro ẹyetde aran ikpekemeke ndikwọrọ ikọ ke ofụri ererimbot nte ikwọrọde emi ekpedi “mme erọn̄ en̄wen” in̄wamke mmọ. (John 10:16) Ekpedi afo esịne ke otu mme erọn̄ en̄wen, ini ekededi emi anamde utom emi, afo owụt ke imama nditọete emi ẹyetde aran, afiak owụt ke imama Jesus.

13. Didie ke ikeme ndinam se Jesus eketịn̄de ke Luke 16:9?

¹³ N̄kpọ en̄wen emi edinamde nnyịn idi ufan Jehovah ye Jesus edi nditịp okụk ẹda ẹnam utom emi mmọ ẹdade usụn̄. (Kot Luke 16:9.) Ke uwụtn̄kpọ, imekeme nditịp okụk ẹda ẹnam utom ofụri ererimbot, utọ nte ndin̄wam ẹkwọrọ eti mbụk ke nsannsan ebiet, ẹbọp mme itie emi ẹdade ẹtuak ibuot ẹnọ Jehovah ẹnyụn̄ ẹtịm mmọ ẹkama, ye nditịp okụk ẹda ẹn̄wam nditọete emi afanikọn̄ esịmde. Imonyụn̄ ikeme nditịp okụk ẹda ẹnam n̄kpọ ke esop nnyịn inyụn̄ in̄wam mbon esop nnyịn emi idiọn̄ọde ke ẹyom un̄wam. (N̄ke 19:17) Nsio nsio usụn̄ emi ikemede ndin̄wam nditọete Christ ẹdi emi.

14. Nte ikụtde ke Ephesus 4:15, 16, nso idi ọyọhọ n̄kpọ inan̄ emi edinamde nnyịn idi ufan Jesus?

¹⁴ (4) Nam se esop Abasi ẹdọhọde. Iyetetịm idiana ye Jesus emi edide ibuot esop ke ini inamde se mbon emi ẹmekde ẹte ẹda nnyịn usụn̄ ẹdọhọde. (Kot Ephesus 4:15, 16.) Ke uwụtn̄kpọ, ke idomo ndikụt ete ke owo iwakke ke Ufọkmbono Obio Ubọn̄ kiet ikaha ke ini owo mîkemke-kem ke en̄wen. Oro esinam ẹtọ ndusụk esop ẹdọn̄ kiet ẹnyụn̄ ẹfiak ẹsịk efakutom ndusụk esop. Ndutịm emi iyakke esop Abasi ẹbiat okụk nte mîkpabiatke. Edi, ndutịm emi esinyụn̄ oyom ndusụk nditọete ẹkpụhọde ndusụk n̄kpọ. Ekeme  ndidi nditọete emi ẹsọn̄ọde ẹda ye Abasi do ẹma ẹdu ke esop mmọ ke ediwak isua ẹnyụn̄ ẹkabade ẹdi itai ye aban̄ ye ndusụk nditọete do. Edi idahaemi ẹdọhọ mmọ ẹwọrọ ẹka esop en̄wen. Esinem Jesus etieti ndikụt nditọete emi ẹsọn̄ọde ẹda ye Abasi do ẹnamde se esop Abasi ẹdọhọde.

15. Didie ke idikpere Jesus ke ini iso ikan nte ikperede idahaemi?

¹⁵ Mbon emi ẹdade edisana spirit ẹyet aran ẹdori enyịn ndikodu ye Jesus ke nsinsi nnyụn̄ ndiana ye enye n̄kara ke Obio Ubọn̄ Abasi. Mmọ ẹyedu ye Christ—ẹkụt enye, ẹneme nneme ye enye, ẹnyụn̄ ẹdiana ye enye ẹnam n̄kpọ. (John 14:2, 3) Jesus oyonyụn̄ ama mbon emi ẹdoride enyịn ndidu ke isọn̄ n̄ko onyụn̄ ese aban̄a mmọ. Kpa ye emi mmọ mîdikwe Jesus, nte mmọ ẹsụk ẹkopde inem n̄kpọ emi Jehovah ye Jesus ẹdinamde ẹnọ mmọ, mmọ ẹyekpere Jesus ẹkan nte ẹkperede idahaemi.—Isa. 9:6, 7.

16. Mme edidiọn̄ ewe ke isinyene edieke idide ufan Jesus?

¹⁶ Imesinyene ediwak edidiọn̄ ima inyịme ndidi ufan Jesus nte enye ọdọhọde. Ke uwụtn̄kpọ, enye ama nnyịn onyụn̄ an̄wam nnyịn idahaemi. Enye anam nnyịn idori enyịn ndidu uwem ke nsinsi. Ndien n̄kponn̄kan edi ke nnyịn ndidi ufan Jesus anam inyene mfọnn̄kan n̄kpọ ke ererimbot emi, oro edi, ndidi ata ufan Jehovah Ete Jesus. Edi ata n̄kpọ ukpono ndidi ufan Jesus!