1. Ebɛn kwan na efa do nye obi nya anyɛnkofa a no mu yɛ dzen?

MPƐN pii no, sɛ ihu obi na epɛ dɛ enye no nya anyɛnkofa a no mu yɛ dzen a, adze a odzi kan a ibotum ayɛ nye dɛ ebɛgye ber na enye no aabɔ nkɔmbɔ. Ber a nkɔmbɔ no rokɔ do na hom rekã hom nsusui nye mbrɛ hom si tse nka ho asɛm kyerɛ homho no, hom botum abɛyɛ anyɛnkofo. Naaso, sɛ ɔba no anyɛnkofa a no mu yɛ dzen a yɛnye Jesus benya a, ɔyɛ a yehyia nsɛndzendzen ahorow bi. Nsɛndzendzen a yehyia no, no mu bi nye dɛn?

2. Nsɛndzendzen a yehyia no, no mu dza odzi kan nye dɛn?

² Nsɛndzendzen a yehyia no, no mu dza odzi kan nye dɛ yennhun Jesus da. Christianfo a wɔtsenaa ase wɔ asomafo no hɔn aber do no, nna hɔn mu pii so nnhun Jesus da. Dɛm ntsi, ɔsomafo Peter kãa dɛ: “Ɔno na hom nnhu no dze, naaso hom dɔ no; na hom nnhu no sesei dze, naaso hom gye no dzi.” (1 Pet. 1:8) Ntsi, sɛ yennhun Jesus da mpo a, yebotum nye no enya anyɛnkofa a no mu yɛ dzen.

3. Nsɛndzendzen a yehyia no, dza otsĩa ebien nye dɛn?

³ Dza otsĩa ebien nye dɛ yenntum nnkasa nnkyerɛ Jesus. Sɛ yɛbɔ mpaa a, nna yɛrekasa akyerɛ Jehovah. Ɔwɔ mu dɛ yɛbɔ mpaa wɔ Jesus ne dzin mu dze, naaso yɛnnkasa nnkyerɛ Jesus. Nokwasɛm nye dɛ, Jesus mmpɛ dɛ yɛbɔbɔ no mpaa. Ebɛnadze ntsi a? Osiandɛ, mpaabɔ ka ɔsom ho, na Jehovah nkotsee na  ɔsɛ dɛ yɛsom no. (Matt. 4:10) Naaso, yebotum ayɛ biribi dze akyerɛ dɛ yɛdɔ Jesus.

4. Nsɛndzendzen a yehyia no, no mu dza otsĩa ebiasa nye dɛn? Ebɛnadze na yebosusu ho wɔ adzesua yi mu?

⁴ Dza otsĩa ebiasa nye dɛ Jesus tse sor, ntsi yerunntum nnkɔ ne nkyɛn ankasa. Ɔwɔ mu dɛ yerunntum nnkɔ Jesus ne nkyɛn ankasa dze, naaso yebotum esũa pii afa noho. Yerubosusu ndzɛmba anan bi a yebotum ayɛ ho. Dɛm ndzɛmba yi bɛma yɛahyɛ anyɛnkofa a yɛnye Jesus wɔ no mu dzen. Naaso, hom mma yendzi kan nhwɛ siantsir a no ho hia dɛ yɛdze hɛn adwen si anyɛnkofa a no mu yɛ dzen a yɛnye Christ benya no do.

5. Ebɛnadze ntsi na ɔsɛ dɛ yɛfa Jesus nyɛnko? (Ibotum so ahwɛ ndakaba a wɔato dzin dɛ “ Jesus A Yɛbɛfa No Nyɛnko No Bɛma Yɛabɛyɛ Jehovah N’anyɛnkofo” nye “ Nya Dwuma A Jesus Dzi Ho Adwen A Ɔfata.”)

⁵ Sɛ yɛnye Jehovah benya ebusuabɔ pa a, ɔsɛ dɛ yɛyɛ Jesus n’anyɛnkofo. Ebɛnadze ntsi a? Ma yensusu siantsir ebien bi ho nhwɛ. Odzi kan, Jesus kãa kyerɛɛ n’esuafo no dɛ: “Egya no ankasa dɔ hom, osiandɛ hom adɔ me.” (John 16:27) Ɔsaan so kãa dɛ: “Obi mmba Egya no hɔ, gyedɛ ɔnam mo do.” (John 14:6) Sɛ obi pɛ dɛ ɔbɛyɛ Jehovah ne nyɛnko, naaso ɔmmpɛ dɛ ɔnye Jesus benya anyɛnkofa a no mu yɛ dzen a, ɔtse dɛ mbrɛ ɔpɛ dɛ ɔhɛn ɔdan bi mu, naaso ɔmmpɛ dɛ odua dan no n’abow mu kɔ mu. Jesus dze mfatoho a ɔtse dɛm dzii dwuma ber a ɔkãa dɛ, “Emi nye nguan no abow no.” (John 10:7) Otsĩa ebien, Jesus daa n’Egya no suban edzi pɛpɛɛpɛr. Ɔkãa kyerɛɛ n’esuafo no dɛ: “Nyia oehu me no, oehu Egya no.” (John 14:9) Ntsi, ɔkwan a ohia a yebotum afa do ehu Jehovah nye dɛ, yebosũa Jesus n’asetsena ho adze. Ber a yɛkɔ do sũa Jesus ho adze no, ɔdɔ a yɛwɔ ma no no bɛyɛ kɛse. Na ber a ɔdɔ a yɛwɔ ma  Jesus reyɛ kɛse no, ɔdɔ a yɛwɔ ma n’Egya so bɛyɛ kɛse.

6. Ebɛnadze fofor ntsi na ɔsɛ dɛ yɛnye Jesus nya anyɛnkofa a no mu yɛ dzen? Kyerɛkyerɛ mu.

⁶ Ɔsɛ dɛ yɛnye Jesus nya anyɛnkofa a no mu yɛ dzen mbrɛ ɔbɛyɛ a Jehovah betsie hɛn mpaabɔ. Iyi kyerɛ dɛ, sɛ yɛrobɔ mpaa a, ɔsɛ dɛ yɛyɛ pii sen kã a yɛbɛkã dɛ “wɔ Jesus dzin mu.” Ɔsɛ dɛ yehu mbrɛ Jehovah fa Jesus do bua hɛn mpaabɔ. Jesus kãa kyerɛɛ n’asomafo no dɛ: “Biribiara a hom bɛserɛ wɔ me dzin mu no, ɔno na mebɛyɛ.” (John 14:13) Ɔwɔ mu dɛ Jehovah na otsie hɛn mpaabɔ na ɔma ho mbuae dze, naaso ɔama Jesus tum dɛ ondzi Ne tsirmpɔw ho dwuma. (Matt. 28:18) Dɛm ntsi, ansaana Nyankopɔn betsie hɛn mpaabɔ no, ɔhwɛ hu dɛ yɛdze afotu a Jesus dze mae no ayɛ edwuma. Dɛ nhwɛdo no, Jesus kãa dɛ: “Na sɛ hom dze nyimpa hɔn mfom kyɛ hɔn a, hom sor Egya so dze bɛkyɛ hom. Na sɛ hom ammfa nyimpa hɔn mfom annkyɛ hɔn a, hom Egya so remmfa hom mfom nnkyɛ hom.” (Matt. 6:14, 15) Hwɛ hia a ohia dɛ yɛnye afofor dzi no wɔ ayamuyie mu dɛ mbrɛ Jehovah na Jesus nye hɛn dzi no!

7. Woananom na wobenya Jesus no werdam afɔrbɔ no do mfaso?

⁷ Nyimpa a wɔnye Jesus wɔ anyɛnkofa a no mu yɛ dzen no nkotsee na wobenya no werdam afɔrbɔ no do mfaso. Yesi dɛn hu dɛm? Jesus kãa dɛ ɔdze “no nkwa bɔto hɔ ama ne nsɛfo.” (John 15:13) Nyimpa anokwafo a wɔtsenaa ase ansaana Jesus reba asaase do no, ɔwɔ dɛ wosũa noho adze na wonya noho dɔ. Wobenyan mbarimba na mbaa tse dɛ Abraham, Sarah, Moses, na Rahab efi owu mu. Naaso, Jehovah n’asomfo anokwafo yi mpo no, mbrɛ ɔbɛyɛ a wobenya onnyiewiei nkwa no, ɔsɛ dɛ wɔnye Jesus nya anyɛnkofa a no mu yɛ dzen.​—John 17:3; Andw. 24:15; Heb. 11:8-12, 24-26, 31.

8-9. Dɛ mbrɛ wɔakã wɔ John 15:4, 5 no, ebɛnadze na anyɛnkofa a yɛnye Jesus wɔ no ma yetum yɛ? Ebɛnadze ntsi na ɔsɛ dɛ yɛtsena Jesus no mu?

⁸ Hɛn enyi agye dɛ yɛnye Jesus bɔ mu kã Ahendzi no ho asɛmpa na yɛkyerɛkyerɛ. Ber a Jesus wɔ asaase do no, nna ɔyɛ ɔkyerɛkyerɛfo. Ber a Jesus kɔr sor no, dɛ asafo no ne tsir no, ɔakɔ do akyerɛ asɛnka na ɔkyerɛkyerɛ edwuma a yɛyɛ no kwan. Ohu mbɔdzen a erobɔ dɛ ebɔboa nyimpa pii ma woeehu ɔno nye n’Egya, na n’enyi sɔ mbɔdzen a ɔtse dɛm a erobɔ no. Nokwasɛm nye dɛ, ɔkwan kortsee a yebotum afa do ayɛ dɛm edwuma yi nye dɛ yɛbɔhwehwɛ Jehovah na Jesus hɔn mboa.​—Kenkan John 15:4, 5.

⁹ Nyankopɔn n’Asɛm kyerɛkyerɛ kofee dɛ, ɔsɛ dɛ yenya Jesus ho dɔ na yɛkɔ do hyɛ ɔdɔ no mu dzen, mbrɛ ɔbɛyɛ a yebenya Jehovah n’enyimpa. Dɛm ntsi, hom mma yɛnhwɛ ndzɛmba anan a yebotum ayɛ a ɔbɛma yɛayɛ Jesus n’anyɛnkofo.

10. Sɛ yebotum abɛyɛ Jesus n’anyɛnkofo a, adze a odzi kan a ɔwɔ dɛ yɛyɛ nye dɛn?

¹⁰ (1) Ɔsɛ dɛ yehu Jesus yie. Yebotum ehu Jesus yie ber a yɛkenkan Matthew, Mark, Luke, na John nwoma no. Sɛ yɛkenkan Jesus n’asetsena ho nsɛm wɔ Bible no mu na yɛdwendwen ho a, yebohu dɛ Jesus nye nkorɔfo dzii no wɔ ayamuyie mu. Iyi bɛma yenya ɔdɔ na obu ama no. Dɛ nhwɛdo no, esuafo no, nna hɔn Wura nye Jesus, naaso ɔnye hɔn enndzi no tse dɛ mbrɛ wɔyɛ nkowaa. Mbom, ɔkãa no nsusui nye mbrɛ osi tse nka ho asɛm kyerɛɛ hɔn. (John 15:15) Ber a hɔn werɛ howee no, Jesus so no werɛ howee na ɔnye hɔn sui. (John 11:32-36) Jesus n’atamfo mpo hun dɛ hɔn a wɔgyee n’asɛm dzii no bɛyɛɛ n’anyɛnkofo. (Matt. 11:19) Sɛ yesũasua mbrɛ Jesus nye n’esuafo no dzii no a, yɛnye afofor benya  ebusuabɔ pa, yebenya akomatɔyamu na enyigye, na ɔdɔ nye obu a yɛwɔ ma Christ no bɛyɛ kɛse.

11. Sɛ yebotum abɛyɛ Jesus n’anyɛnkofo a, adze a otsĩa ebien a ɔwɔ dɛ yɛyɛ nye dɛn? Ebɛnadze ntsi na ohia dɛ yɛbɛyɛ dɛm?

¹¹ (2) Ɔsɛ dɛ yesũasua Jesus wɔ hɛn nsusui nye hɛn ndzeyɛɛ mu. Sɛ yɛbɔ mbɔdzen dɛ yebenya Christ adwen a, yɛnye no ntamu anyɛnkofa no mu bɛyɛ dzen. (1 Cor. 2:16) Yebesi dɛn esũasua Jesus? Ma yɛnhwɛ nhwɛdo kor pɛr. Nna Jesus dwen mbrɛ obesi aboa afofor ho sen dɛ ɔbɔsɔ nankasa n’enyi. (Matt. 20:28; Rom. 15:1-3) Osian adwen a ɔtse dɛm a nna ɔwɔ ntsi, nna ɔdze noho bɔ afɔr ma afofor. Nkyii so, nna ɔdze bɔn kyɛ. Ɔamma no bo emmfuw wɔ nsɛm a nkorɔfo kãe faa noho no. (John 1:46, 47) Jesus annka nkorɔfo annhyɛ osian mfom ahorow a wodzii wɔ mber bi a abɛsen kɔ no. (1 Tim. 1:12-14) Jesus kãa dɛ: “Ɔnam yi do na nyimpa nyina bohu dɛ hom yɛ m’esuafo, sɛ hom wɔ ɔdɔ wɔ homho nkorkor a.” (John 13:35) Oye dɛ ibebisa woho dɛ, “Ana mereyɛ dza mubotum biara dɛ menye mo nuanom mbarimba na mbaa bɛtsena asomdwee mu dze esũasua Jesus?”

12. Sɛ yebotum abɛyɛ Jesus n’anyɛnkofo a, adze a otsĩa ebiasa a ɔwɔ dɛ yɛyɛ nye dɛn? Yebesi dɛn ayɛ adze a ɔtse dɛm?

¹² (3) Ɔsɛ dɛ yɛboa Christ no nuanom no. Jesus bu dza yɛyɛ ma no nuanom a wɔasera hɔn no dɛ yɛreyɛ ama nankasa. (Matt. 25:34-40) Jesus maa n’ekyirdzifo ahyɛdze dɛ wɔnkã Ahendzi no ho asɛmpa na wɔnyɛ esuafo. Ɔkwan tsitsir a yɛbɛfa do aboa hɔn a wɔasera hɔn no nye dɛ yebenya edwuma a ɔtse dɛm mu kyɛfa ekesi ase. (Matt. 28:19, 20; Andw. 10:42) Sɛ Christ no nuanom no botum ayɛ asɛnka edwuma a ɔrokɔ do ndɛ wɔ wiadze nyina no a, gyedɛ ‘nguan fofor’ no boa hɔn. (John 10:16) Sɛ eka nguan fofor no ho a, aber biara a edze woho bɛhyɛ edwuma a ɔtse dɛm mu no, nna ereda ɔdɔ edzi akyerɛ hɔn a wɔasera hɔn no nye Jesus.

13. Yebesi dɛn dze afotu a Jesus dze mae a wɔayɛ ho kyerɛwtohɔ wɔ Luke 16:9 no ayɛ edwuma?

¹³ Jehovah na Jesus na wɔkyerɛ asɛnka na esuafoyɛ edwuma a yɛyɛ no kwan. Ntsi, sɛ yɛdze hɛn sika boa edwuma a ɔtse dɛm a, ɔno so kyerɛ dɛ yɛrefa hɔn nyɛnko. (Kenkan Luke 16:9.) Dɛ nhwɛdo no, yebotum eyi ntoboa dze aboa wiadze nyina som edwuma no. Wɔdze ntoboa a yeyi no boa ma wɔkã asɛm no wɔ mbea ahorow a atsew no ho. Wɔdze bi so sisi Ahendzi Asa nye asafo adan afofor. Nkyii so, wɔdze bi boa hɔn a wohia mboa ber a atoyerɛnkyɛm anaa esian afofor esi no. Afei so, yebotum eyi ntoboa dze aboa ma woeetuatua kaw ahorow a hɛn asafo no bɔ no. Iyi da nkyɛn a, yebotum aboa hɔn a yenyim dɛ woehia hɔn no. (Mbɛ. 19:17) Iyinom nyina yɛ akwan a yebotum afa do aboa Christ no nuanom no.

14. Dɛ mbrɛ wɔakã wɔ Ephesusfo 4:15, 16 no, sɛ yebotum abɛyɛ Jesus n’anyɛnkofo a, adze a otsĩa anan a ɔwɔ dɛ yɛyɛ nye dɛn?

¹⁴ (4) Ɔsɛ dɛ yɛtaa nhyehyɛɛ a Jehovah n’ahyehyɛdze no yɛ no ekyir. Enuanom a woeyi hɔn dɛ wɔnhwɛ hɛn do no, ɔsɛ dɛ yedzi hɔn akwankyerɛ ekyir. Sɛ yɛyɛ dɛm a, yɛnye Jesus a ɔyɛ asafo no ne tsir no benya anyɛnkofa a no mu yɛ dzen. (Kenkan Ephesusfo 4:15, 16.) Dɛ nhwɛdo no, seseiara yɛrobɔ mbɔdzen dɛ yɛdze hɛn Ahendzi Asa ahorow no bedzi dwuma yie. Dɛm ntsi, wɔaka asafo ahorow bi abɔ mu, na nsaasesin a wɔyɛ mu edwuma no so, wɔayɛ nsesa ahorow wɔ mu. Dɛm nhyehyɛɛ yi ama ahyehyɛdze no esie sika pii. Naaso, osian iyi ntsi, no ho ebehia dɛ adawurbɔfo binom yɛ nsesa ahorow bi. Bi a, dɛm adawurbɔfo anokwafo yi dze mfe pii asom wɔ asafo ahorow bi mu. Dɛm ntsi, wɔnye enuanom  mbarimba na mbaa a wɔwɔ hɔ no enya anyɛnkofa a no mu yɛ dzen. Naaso, seseiara akwankyerɛ no nye dɛ wɔnkɔ asafo fofor bi mu. Sɛ Jesus hu dɛ dɛm adawurbɔfo anokwafo yi ridzi akwankyerɛ a ɔtse dɛm do a, ɔma n’enyi gye papaapa!

15. Daakye, ebɛn kwan do na anyɛnkofa a yɛnye Jesus wɔ no mu bɛyɛ dzen?

¹⁵ Hɔn a wɔdze sunsum krɔnkrɔn asera hɔn no wɔ enyidado dɛ wɔnye Jesus bɛtsena daa. Wɔnye no bɔbɔ mu edzi adze wɔ Nyankopɔn n’Ahendzi no mu. Wɔnye Christ bɛtsena ankasa. Wobohu no, wɔnye no bɛkasa na wɔnye no aabɔ. (John 14:2, 3) Nyimpa a wɔwɔ enyidado dɛ wɔbɛtsena asaase yi do no, Jesus bɛda ɔdɔ edzi akyerɛ hɔn so na ɔaahwɛ hɔn. Ɔwɔ mu dɛ worunnhu Jesus dze, naaso wɔnye no ntamu anyɛnkofa no mu bɛyɛ dzen ber a wonya enyigye wɔ asetsena a Jehovah na Jesus bɛma woenya no mu.​—Isa. 9:6, 7.

16. Ebɛn nhyira na yenya fi anyɛnkofa a yɛnye Jesus wɔ no mu?

¹⁶ Jesus ato nsa afrɛ hɛn dɛ yɛmbɛyɛ n’anyɛnkofo. Sɛ yɛgye nsato yi to mu a, yebenya nhyira pii. Dɛ nhwɛdo no, seseiara mpo no, ɔda ɔdɔ edzi kyerɛ hɛn, na ɔdze mboa a yehia no ma hɛn. Afei so, yeenya ho kwan dɛ yɛbɛtsena ase daa. Na dza ɔkyɛn ne nyinara no, anyɛnkofa a yɛnye Jesus wɔ no bɛma yenya egyapadze a ɔsen biara. Dɛm egyapadze no nye ebusuabɔ a no mu yɛ dzen a yɛnye Jesus n’Egya Jehovah benya. Hwɛ ho kwan ara a yeenya dɛ wɔbɛfrɛ hɛn Jesus n’anyɛnkofo!