1. Ka pou nou fè pou nou vin bon zanmi èvè on moun ?

PI SOUVAN ki rarman, lèwvwè ou vé vin zanmi èvè on moun, prèmyé biten ou ka fè sé pasé tibwen tan èvè-y. Pi 2 moun ka palé dè sa yo ka rèsanti, dè sa yo ka pansé é dè sa yo ja viv, pi yo ka vin bon zanmi. Men pou nou vin bon zanmi èvè Jézi, fò-nou rivé about a sèwten difikilté. Ki difikilté ésa ?

2. Fò-nou rivé about a on prèmyé difikilté. Kilès la ?

² Prèmyé difikilté-la sé kè nou po’o jen vwè Jézi èvè 2 zyé an nou. O 1^é syèk osi, ni onlo krétyen ki pa jen vwè-y nonplis. Men lapòt Pyè di : « Menmsi zò pò’ò jen vwè-y, zò enmé-y kanmenm. Menmsi konnyéla zò pa’a vwè-y, magrésa zò ka montré zò ni fwa adan-y » (1 Pyè 1:8). Sa ka montré kè ni mwayen vin zanmi a Jézi menmsi nou pò’ò jen vwè-y.

3. Fò-nou rivé about a on dézyèm difikilté. Kilès la ?

³ Dézyèm difikilté-la sé kè nou pé pa palé ba Jézi. Lè nou ka priyé, sé ba Jéova nou ka palé. É menmsi sé an non a Jézi nou ka voyé priyè-la monté, a pa pou Jézi nou ka palé. Dayè pou yonn, Jézi vé pa nou priyé-y. Poukwa sa ? Pas lè nou ka priyé sé adoré nou ka adoré, é sèl moun pou nou adoré sé Bondyé (Mat. 4:10). Men ni mwayen nou montré Jézi kè nou enmé-y kanmenm.

4. a) Fò-nou rivé about a on twazyèm difikilté. Kilès la ? b) Ka nou ké vwè adan awtik-lasa ?

 ⁴ Twazyèm difikilté-la sé kè Jézi ka viv an syèl-la, kifè pa ni mwayen pasé pon ti moman èvè-y. Men menmsi i pa akoté an nou, nou pé aprann onlo biten asi-y. Adan awtik-lasa, nou ké palé dè 4 biten ki ké édé-nou vin pibon zanmi èvè Jézi ankò. Men pou koumansé, an-nou vwè poukwa sa enpòwtan kè nou vin bon bon zanmi èvè Jézi.

5. Poukwa fò-nou vin zanmi èvè Jézi ? (gadé sé ti karé-la «  Vin zanmi èvè Jézi ka pèwmèt-nou vin zanmi èvè Jéova » é «  Ba Jézi valè-la pou ou ba-y la »).

⁵ Fò-nou vin zanmi èvè Jézi si nou vé vin bon zanmi èvè Jéova. Poukwa nou ka di sa ? An-nou vwè 2 rézon ki ka fè-nou di sa. Prèmyèwman, mi sa Jézi di disip a-y : « Papa-la limenm ni afèksyon pou zòt, paskè zò enmé-mwen » (Jan 16:27). I di osi : « Ponmoun pé pa ay owa Papa-la si i pa pasé pa mwen » (Jan 14:6). Si ou vé vin zanmi a Jéova san vin bon bon zanmi èvè Jézi, sé konsi ou ka éséyé rantré adan on batiman san pasé pa pòt-la. Jézi sèvi èvè on ègzanp kon tala lè i di kè i sé ‘on pòt pou sé timouton-la’ (Jan 10:7). Dézyèmman, Jézi imité kalité a Pap’a-y a san pou san. Sé pousa i jous di disip a-y : « Sila ki vwè-mwen la vwè Papa-la osi » (Jan 14:9). Kifè, yonn adan sé méyè mwayen-la ki ni la pou aprann konnèt Jéova sé étidyé vi a Jézi. Pi nou ké aprann konnèt Jézi é pi nou ké enmé-y fò. Anplisdisa, pi nou ké bon bon zanmi èvè Jézi, é pi nou ké enmé Pap’a-y fò osi.

6. Fò-nou bon bon zanmi èvè Jézi pou ondòt rézon ankò. Ki rézon ésa ? Bay on ti èsplikasyon.

⁶ Fò-nou vin bon bon zanmi èvè Jézi,  si nou vé kè Jéova réponn a priyè an nou. Kifè, lè nou ka fin priyè an nou é kè nou ka di « an non a Jézi », a pa on biten pou nou pran alaléjè. Fò-nou byen konprann kijan Jéova ka itilizé Jézi pou réponn a priyè an nou. Mi sa Jézi di apòt a-y : « Tousa zò ké mandé an non an mwen, an ké fè-y » (Jan 14:13). Menmsi sé Jéova ki ka kouté é ki ka réponn a priyè an nou, sé Jézi i bay pouvwa pou fè sa i désidé (Mat. 28:18). Avan Jéova fè sa nou ka mandé-y an priyè an nou, i ka gadé pou vwè si nou ka mèt an pratik on konsèy Jézi té ban-nou. Konsèy-lasa sé : « Si zò ka padonné lézòt lè yo fè on érè, Pap’a zòt ki an syèl-la ké padonné-zòt osi. Men si zò pa’a padonné lézòt lè yo fè érè, Pap’a zòt pé’é padonné érè a zòt nonplis » (Mat. 6:14, 15). Alò, fò-nou janti èvè lézòt, menmjan Jéova é Jézi janti èvè nou. Sa enpòwtan toubònman !

7. Kimoun ki pé bénéfisyé dè sakrifis a Jézi ?

⁷ Sé yenki moun ki bon bon zanmi èvè Jézi ki pé pwofité dè sakrifis a-y. Kijan nou fè sav sa ? Jézi di konsa kè i té’é « bay vi a-y pou zanmi a-y » (Jan 15:13). Sèwvitè a Bondyé ki mò fidèl é ki viv avan Jézi té vin si latè ké résisité, men fò-yo ké aprann konnèt-li é fò-yo ké enmé-y osi. Menm dé moun kon Abraam, Sara, Moyiz é Rahab ké oblijé vin zanmi èvè Jézi pou yo pé sa ni lavi étèwnèl (Jan 17:3 ; Akt 24:15 ; Ébr. 11:8-12, 24-26, 31).

8-9. Dapré sa Jan 15:4, 5 ka di, lè nou bon bon zanmi èvè Jézi ka sa ka pèwmèt-nou fè, é poukwa sa nésésè kè nou rété bon zanmi èvè Jézi ?

⁸ Lè nou ka préché é nou ka anségné bon nouvèl a Wayòm-la, sé kolaboré nou ka kolaboré èvè Jézi. É a pa ti kontan nou kontan sa ! Lè Jézi té asi latè, i té ka anségné moun. É dépi i viré an syèl-la, sé-y ki chèf a lasanblé-la. I ka kontinyé dirijé travay a prédikasyon-la é tout éfò ki fèt pou anségné moun. I ka vwè é i ka aprésyé tout éfò ou ka fè pou édé on maksimòm dè moun a konnèt-li é a konnèt Pap’a-y. Si nou ka rivé fè sa sé yenki pas Jéova é Jézi ka édé-nou (li Jan 15:4, 5).

⁹ Labib ka montré on mannyè ki klè kè si nou vé fè Jéova plézi, fò-nou enmé Jézi é fò-nou fè ansòt pou lanmou-lasa vin pi fò. Ében, an-nou vwè 4 biten nou pé fè pou nou vin zanmi a Jézi.

10. Si nou vé vin zanmi a Jézi, ki prèmyé biten pou nou fè ?

¹⁰ 1) Aprann konnèt Jézi. Pou nou rivé konnèt Jézi pibyen, fò-nou li sé 4 évanjil-la (Matyé, Mawk, Lik é Jan). Lè nou ka pran tan réfléchi asi sa ki maké adan sé liv-lasa anrapò èvè vi a Jézi, nou ka rann-nou kont kè Jézi té ka aji èvè onlo bonté épi lézòt é tousa ka pousé-nou enmé-y é rèspèkté-y. Pa ègzanp, menmsi sé-y ki té Mèt-la, i pa té ka pran sé disip-la pou èsklav a-y. Okontrè, i té ka di-yo tousa i té ka pansé é tousa i té ka rèsanti (Jan 15:15). Lè yo té tris, i té tris osi, é lè yo té ka pléré, i té ka pléré ansanm èvè-yo (Jan 11:32-36). Jous lènmi a-y té ka vwè kè i té ka vin zanmi èvè moun ki té ka aksèpté mésaj a-y (Mat. 11:19). Si nou ka aji kon Jézi té ka aji èvè disip a-y, nou ké antann-nou pibyen èvè lézòt, nou ké ni tchè-kontan, nou ké pi enmé Jézi é nou ké ni plis rèspé pou-y ankò.

11. Pou vin zanmi a Jézi, nou ni on dézyèm biten a fè. Ki biten ésa, é poukwa sa enpòwtan kè nou fè-y ?

 ¹¹ 2) Fè éfò pou ni menm mantalité ki Jézi é pou aji menmjan ki-y. Fò-nou aprann konnèt mantalité a Jézi é fò-nou lésé-y détenn asi nou. Pas pi nou ké fè sa é pi nou ké vin bon bon zanmi èvè-y (1 Kor. 2:16). Ka nou pé fè pou imité Jézi ? An-nou pran on ègzanp. Lè Jézi té ka réfléchi, i té ka sonjé entéré a lézòt avan i té sonjé ta-y (Mat. 20:28 ; Wom. 15:1-3). Sé mantalité-lasa ki té ka pousé-y a fè sakrifis pou lézòt é a padonné-yo. Lè yo té ka di bétiz asi-y, i pa té ka pran sa mal (Jan 1:46, 47). Menmsi on moun té ja fè érè avan, i pa té ka mèt an tèt a-y kè moun-lasa pé’é jen chanjé (1 Tim. 1:12-14). Poukwa sa enpòwtan kè nou fè kon Jézi ? Pas mi sa i di : « Sé konsa toutmoun ké sav zò sé disip an mwen : si zò ni lanmou yonn pou lòt » (Jan 13:35). Alò pozé-w kèsyon-lasa : « Ès an ka fè tousa an pé pou antann-mwen byen èvè frè é sè an mwen kon Jézi té ka fè ? »

12. Pou vin zanmi a Jézi, nou ni on twazyèm biten a fè. Ki biten ésa é kijan nou pé rivé fè sa ?

¹² 3) Soutyenn frè a Kris. Pou Jézi, lè nou ka soutyenn frè a-y ki wen sé konsi sé li nou ka soutyenn (Mat. 25:34-40). Méyè biten nou pé fè pou soutyenn sé krétyen wen la, sé fè tousa nou pé pou préché é fè disip, kon Jézi mandé (Mat. 28:19, 20 ; Akt 10:42). Sé grasa « sélézòt mouton-la » si frè a Kris ka rivé préché toupatou si latè konnyéla (Jan 10:16). Si ou ka fè pawti a sélézòt mouton-la, chakfwa ou ka pawtisipé adan travay-lasa, ou ka montré kè ou enmé sé wen-la men kè ou enmé Jézi osi.

13. An Lik 16:9 Jézi ka ban-nou on konsèy, kijan nou pé mété-y an pratik ?

¹³ Ondòt biten nou pé fè pou vin zanmi a Jéova é zanmi a Jézi sé sèvi èvè lajan an nou pou soutyenn sé aktivité-la yo ka dirijé la (li Lik 16:9). Pa ègzanp, nou pé fè ofrann pou soutyenn travay-la òwganizasyon an nou ka fè la toupatou si latè. Sé grasa sé don-lasa kè prédikasyon-la ka fèt toupatou asi latè, menm sé koté-la ki pli lwen la. Sé grasa sé don-lasa osi kè nou ka pòté sèkou, kè nou ka konstwi é kè nou ka pran swen a batiman kè nou ka itilizé pou adoré Bondyé. Nou pé itilizé lajan an nou pou soutyenn lasanblé lokal an nou osi. É lè nou sav kè ni frè é sè alantou an nou ki bizwen on biten, nou pé ba-yo on monné pou édé-yo (Pwov. 19:17). Tousa nou sòti vwè la, sé diféran mannyè nou pé soutyenn frè a Kris.

14. Sèlon Éfézyen 4:15, 16, pou vin zanmi a Jézi nou ni on katriyèm biten a fè. Ki biten ésa ?

¹⁴ 4) Soutyenn tout dispozisyon kè òwganizasyon a Jéova ka pran. Jézi sé chèf a lasanblé-la é nou pé vin pibon zanmi èvè-y lè nou ka kolaboré èvè séla i chwazi la pou pran swen an nou (li Éfézyen 4:15, 16). Pa ègzanp, nou ka fè ansòt pou plen sé Sal di Wayòm la a san pou san. Sé pousa yo fè plizyè lasanblé fè onsèl é sé nouvo lasanblé-lasa ka vin touvé-yo èvè on nouvo téritwa. Dispozisyon-lasa ka pèwmèt lòwganizasyon fè on bèl ékonomi. Men akòz dè sé chanjman-lasa, sèwten pwoklamatè oblijé fè kò èvè on nouvo sitiyasyon. Pétèt kè ni sa ki té adan menm lasanblé-la dépi plizyè lanné é kè yo vin bon bon zanmi èvè frè é sè a yo. Men konnyéla,  yo ka mandé-yo ay adan ondòt lasanblé. Jézi dwèt tèlman kontan lè i ka vwè jan disip a-y ki fidèl ka soutyenn dispozisyon-lasa !

15. Plita, kijan nou ké pé vin pibon zanmi èvè Jézi ankò ?

¹⁵ Bondyé voyé lèspri sen a-y asi sèwten moun pou yo vin wen. Sé moun-lasa ni lèspwa dè ay viv èvè Jézi pou touttan é dè gouvèné èvè-y adan Wayòm a Bondyé. Yo ni lèspwa kè yo ké èvè Jézi kivédi yo ké vwè-y, yo ké palé èvè-y, é yo ké pasé onlo bèl moman èvè-y (Jan 14:2, 3). Jézi ké okipé-y dè moun ki ni lèspwa dè viv asi latè osi é yo ké pé bénéfisyé dè lanmou a-y. Alò menmsi yo pa’a vwè Jézi, nou ka tou konprann kè yo ké vin pibon zanmi èvè-y jou apré jou, pas si a pa té Jéova é Jézi, yo pa té’é pé pwofité dè bèl vi-lasa (Iz. 9:6, 7).

16. Lè nou bon bon zanmi èvè Jézi, ki bénédisyon sa ka pwokiré-nou ?

¹⁶ Lè nou dakò pou vin zanmi èvè Jézi, sa ka pwokiré-nou onlo bénédisyon. Pa ègzanp, dépi konnyéla i enmé-nou é i ka soutyenn-nou. Nou ni lèspwa dè viv pou touttan. Men sa ki pi enpòwtan ankò sé kè nou ka vin bon bon zanmi èvè Jéova, Pap’a Jézi. É sé pi bèl kado on moun pé risivwè ! Lè Jézi ka di kè nou sé zanmi a-y, sé on gran lonnè toubònman !