1. Ko na kangaa ni karekea am iraorao ae kaan ma temanna?

N ANGIIN te tai, te moani mwaneka ibukini karekean te iraorao ae kaan ma temanna, boni kabanean am tai ma ngaia. Ngkana kam uaia ni mamaroro ni kaotii ami iango ao ami namakin, kam nang riki bwa raao ni koaua. Ma iai kangaanga aika ti kaaitarai ni kaineti ma karekean ara iraorao ma Iesu. Baikara tabeua mai iai?

2. Tera te kangaanga ae te moan ae ti kaaitara ma ngaia?

² Te moan, ti tuai n nora Iesu. A bati Kristian n te moan tienture aika kaaitara naba ma te kangaanga anne. Ma e ngae n anne, e taku te abotoro Betero: “E ngae ngke kam tuai n noria, ma kam tangiria. E ngae ngke kam aki noria ngkai, ma kam onimakinna.” (1Bet. 1:8) Ngaia are ti boni kona ni karekea ara iraorao ae kaan ma Iesu, e ngae ngke ti tuai n noria.

3. Tera te kangaanga ae te kauoua ae ti kaaitara ma ngaia?

³ Te kauoua, ti aki kona n taetae ma Iesu. Ngkana ti tataro, ti bon taetae nakon Iehova. E koaua ae ti tataro n aran Iesu, ma ti aki taetae nakoina. Ni koauana, e aki tangiria Iesu bwa ti na tataro nakoina. Bukin tera? Ibukina bwa te tataro bon iteran te taromauri, ao bon tii Iehova ae riai n taromauriaki. (Mat. 4:10) Ma e ngae n anne, ti boni kona ni kaota tangiran Iesu.

4. Tera te kangaanga ae te katenua, ao tera ae ti na rinanona n te kaongora aei?

 ⁴ Te katenua, e mena i karawa Iesu ngaia are ti aki kona ni kabanea ara tai ma ngaia. Ma ti boni kona ni kinaa riki Iesu e ngae ngke ti aki mena i rarikina. Ti na rinanoni baika aua ake ti kona ni karaoi, ake a na karikirakea ara iraorao ma ngaia. Ma ti na noria moa bwa e aera ngkai e kakawaki karekean ara iraorao ae kaan ma Kristo.

5. E aera ngkai ti riai ni karekea ara iraorao ma Iesu? (Nora naba te bwaoki ae “ Te Iraorao ma Iesu E Karekea te Iraorao ma Iehova” ao “ Iangoa Iesu n te Aro ae Riai.”)

⁵ Ti riai n riki bwa raoraon Iesu ngkana ti kani karekea ara iraorao ae kaan ma Iehova. Bukin tera? Iangoi bukina aika uoua. Te moan, e tuangia taan rimwina Iesu ni kangai: “E bon tangiringkami te Tama, ibukina bwa kam tangirai.” (Ioa. 16:27) E taku naba: “Akea ae e na nakon te Tama ma tii ane e rirou.” (Ioa. 14:6) Ngkana ti na kataia n riki bwa raoraon Iehova ao ti aki karekea ara iraorao ae kaan ma Iesu, ai aron ae ti kataia n rin n te auti ma ti aki rin man te mataroa. E kamanena naba te aeka ni kaikonaki anne Iesu ni kabwarabwaraa iai bwa boni ngaia “te mataroa ibukia tiibu.” (Ioa. 10:7) Bukina ae te kauoua, bwa Iesu e kaotiota raoi aroaron Tamana n te aro ae kororaoi. E taku nakoia taan rimwina: “Ane e a tia n norai ao e a tia naba n nora te Tama.” (Ioa. 14:9) Ngaia are te anga ae kakawaki ibukini kinaakin Iehova, boni man reiakinani maiun Iesu. Ngkana ti reiakina taekana, e na rikirake riki tangirana. Ao ngkana e a ririkirake tangiran Iesu,  e nang korakora naba tangiran Tamana iroura.

6. Tera riki bukina teuana ae ti riai ni karekea iai ara iraorao ma Iesu? Kabwarabwaraa.

⁶ Ti riai ni karekea ara iraorao ma Iesu bwa e aonga ni kaekaaki ara tataro. E kainnanoaki ae bati riki nakon ae tii taekinan, “i nanon aran Iesu” ni banen ara tataro. Ti riai n ataia bwa tera aron Iehova ni kamanena Iesu ibukini kaekaan ara tataro. E taku Iesu nakoia ana abotoro: “Te bwai naba ane kam bubutii n arau, ao N na karaoia.” (Ioa. 14:13) E ngae ngke bon Iehova ae ongoraei ao ni kaekai ara tataro, ma e mwiokoa Iesu bwa e na kakororaoi Ana babaire. (Mat. 28:18) Ngaia are imwain ae e kaekai ara tataro te Atua, e taraia moa bwa ti maiuakina ana reirei Iesu ke ti aki. N te katoto, e taku Iesu: “Ngkana kam kabwarai aia bure akana bure nakoimi, ao e na kabwarai naba ami bure Tamami are i karawa, ma ngkana kam aki kabwarai aia bure, ao e na aki naba kabwarai ami bure Tamami.” (Mat. 6:​14, 15) Ai kakawakira ngkanne bwa ti na karaoa nakoia aomata te baere a karaoia naba nakoira Iehova ao Iesu!

7. Antai aika kakabwaiaaki man ana karea ni kaboomwi Iesu?

⁷ Bon tii naake iai aia iraorao ae kaan ma Iesu ae a na kakabwaiaaki man ana karea ni kaboomwi. Ti kangaa n ataia? E taku Iesu bwa e na “anga maiuna ibukia raoraona.” (Ioa. 15:13) Aomata aika kakaonimaki ake a maiu imwain rokon Iesu i aon te aba, a na bon reiakina naba taekan Iesu ao ni karikirakea tangirana. A na kautaki aomata akanne n aron Aberaam, Tara, Mote, ao Raaba, ma a bon riai naba naakai ni karekea aia iraorao ma Iesu bwa a aonga ni maiu n aki toki.​—Ioa. 17:3; Mwa. 24:15; Ebera 11:8-12, 24-26, 31.

8-9. Ni kaineti ma Ioane 15:​4, 5, tera ae ti kona ni karaoia ngkana iai ara iraorao ma Iesu, ao e aera ngkai e kakawaki anne?

⁸ Ti kimwareirei ngkai ti uaia ni mwakuri ma Iesu n tataekina te rongorongo ae raoiroi ae taekan te Tautaeka n Uea, ao n angareirei iai. Bon te tia reirei Iesu ngke e mena i aon te aba. Ao imwin okina nako karawa ni karokoa ngkai, e teimatoa Iesu ni kaira te mwakuri n uarongorongo ao n angareirei, ngkai atun te ekaretia ngaia. Am kakorakora ni buokiia aika bati bwa a na kinaa ma Tamana, e noria ao e kakawaki irouna. Ni koauana, te anga ae tii teuana ae ti kona iai ni kakororaoa te mwakuri aei, boni man ana ibuobuoki Iehova ao Iesu.​—Wareka Ioane 15:4, 5.

⁹ E kaotaki raoi n Ana Taeka te Atua bwa ti riai ni karekea tangiran Iesu ao ni kateimatoa, bwa e aonga ni kukurei Iehova. Ti na rinanoi ngkai baika aua ake ti kona ni karaoi bwa ti aonga n riki bwa raoraon Iesu.

10. Tera te anga ae te moan ibukini karekean ara iraorao ma Iesu?

¹⁰ (1) Kinaa raoi Iesu. Ti kona ni karaoa aei mani warekani bokin te Baibara aika Mataio, Mareko, Ruka, ao Ioane. Ngkana ti kananoi ara iango i aon rongorongoni maiun Iesu n te Baibara, ti a karikirakea iai tangiran ao karinean Iesu ibukin arona n akoiia aomata. N te katoto, e ngae ngke bon te Toka, ma e aki kairiia taan rimwina n aroia tooro. Ma e kaotii nakoia baike e iangoi ao ana namakin. (Ioa. 15:15) E uataboa naba  rawawataia Iesu ao e tang ma ngaiia. (Ioa. 11:​32-36) A kona naba n noria taani kairiribai nakoina, bwa e bon riki bwa raoraoia naake a butimwaea ana rongorongo. (Mat. 11:19) Ngkana ti kakairi n aroaron Iesu nakoia taan rimwina, e na nakoraoi riki reitakira ma tabemwaang, ti na kukurei riki, ao e na rikirake riki tangiran ao karineani Kristo iroura.

11. Tera te anga ae te kauoua ae ko kona iai n riki bwa raoraon Iesu, ao e aera ngkai e kakawaki?

¹¹ (2) Kakairi n aron Iesu n iango ao ni mwakuri. Ngkana ti a kinaa riki Iesu ao ni kakairi n arona n iango, e nang kaan riki ara iraorao ma ngaia. (1Kor. 2:16) Ti na kangaa ni kakairi iroun Iesu? Nora te katoto teuana. E iaiangoa riki buokaia aomata Iesu nakoni kakukureiana i bon irouna. (Mat. 20:28; IRom 15:​1-3) Ibukina bwa e iaiango n aron anne, e kukurei n anga boni ngaia ao e kabwarai buure. E aki waekoa n un ni baike a taekin aomata ibukina. (Ioa. 1:​46, 47) Ao e aki teimatoa n iangoiia aomata bwa a buakaka ibukin aia bure ake a karaoi rimoa. (1Tim. 1:​12-14) E taku Iesu: “Ane a na ataingkami aomata ni kabane bwa bon taan rimwiu ngkami, n aei: ngkana kam itangitangiri.” (Ioa. 13:35) E aera bwa ko aki titirakiniko ni kangai: “I kakairi n ana katoto Iesu ni kabanea au konaa ni kateimatoa te rau i marenau ma tariu n te onimaki?”

12. Tera te anga ae te katenua ae ti kona iai n riki bwa raoraon Iesu, ao ti na kangaa ni karaoia?

¹² (3) Boutokaiia tarini Kristo. E iangoi Iesu baike ti karaoi ibukia tarina aika kabiraki, bwa ai bon ibukina naba. (Mat. 25:​34-40) Te anga ae moan te kakawaki ae ti boutokaiia iai taani kabiraki, boni kabanean ara konaa n uataboa tataekinan te Tautaeka n Uea ao karekeaia taan rimwin Iesu, n aron are e tuangira bwa ti na karaoia. (Mat. 28:​19, 20; Mwa. 10:42) Bon tii man aia ibuobuoki “tiibu tabemwaang” ae a kona iai tarini Kristo ni kakororaoa te mwakuri n uarongorongo ae e a karaoaki ngkai ni kabutaa te aonnaba. (Ioa. 10:16) Ngkana ngkoe temanna i buakoia tiibu tabemwaang, ko kaota tangiraia taani kabiraki ao Iesu ni katoaa te tai are ko uataboa iai te mwakuri aei.

13. Ti na kangaa ni maiuakina ana reirei ni kairiri Iesu are n Ruka 16:9?

¹³ Ti kona naba n riki bwa raoraon Iehova ao Iesu ngkana ti kamanena kaubwaira ni boutokaa iai te mwakuri are a kaira karaoana. (Wareka Ruka 16:9.) N te katoto, ti kona ni bwaintangira nakon te mwakuri ni katobibia te aonnaba, ae mwaane ake iai a kamanenaaki ibukin te uarongorongo n taabo aika tionako, katean ao onobwaiani kateitei aika boutokaa te taromauri ae koaua, ao karekean te ibuobuoki ibukia ake a rotaki ni kabuanibwai aika karina. Ti kona naba n anga ara mwane ibukini boutokaan ara ekaretia ao buokaia naake ti ataia bwa a kainnanoa te ibuobuoki. (TaeRab. 19:17) Aikai aanga ake ti kona iai ni boutokaiia tarini Kristo.

14. Ni kaineti ma I-Ebeto 4:​15, 16, tera te anga ae te kaaua ae ti kona iai n riki bwa raoraon Iesu?

¹⁴ (4) Boutokai babaire n te ekaretia ni Kristian. Ti kakorakoraa reitakira ma Iesu ngkai atun te ekaretia, ngkana ti ongeaba irouia naake a mwiokoaki bwa a na tararuaira. (Wareka I-Ebeto 4:​15, 16.) N te katoto, ti a taraia raoi ngkai bwa a na kamanenaaki raoi Taabo n Taromauri ni kabane. Ibukin anne, a a ikotaki ekaretia tabeua ma ake tabeua, ao a a bitaki naba tian taian aono ni mwakuri. E a  tikotikonaki riki te mwane ae bati ake taiani bwaintangira, n te babaire aei. Ma irarikin anne, a a riai naba taan uarongorongo tabeman ni kaangaraoi aroia nakoni bitaki aika boou. Tao a a tia taari aika kakaonimaki aikai ni kaaina te ekaretia teuana i nanon ririki aika bati, ao a a rangi n tangiriia taari iai. Ma a a tuangaki ngkai bwa a nang mwaing nakon te ekaretia ae kaokoro. Ai kukureira Iesu n norakia taan rimwina aika kakaonimaki aikai n ongeaba nakon te babaire aei!

15. E na kangaa n nakoraoi riki reitakira ma Iesu n te tai ae e na roko?

¹⁵ A kantaningaia naake a kabiraki n te taamnei ae raoiroi bwa a na raona Iesu n aki toki, n tautaeka ma ngaia n Ana Tautaeka n Uea te Atua. A nang boni mena i rarikini Kristo, a na noria, a na taetae ma ngaia, ao ni kabanea aia tai ma ngaia. (Ioa. 14:​2, 3) Naake a kantaningaa te maiu i aon te aba, a na bon tangiraki ao n tabeakinaki naba iroun Iesu. E ngae ngke a na aki nora Iesu, ma e na rikirake ni korakora reitakia ma ngaia ngkai e a reke irouia te maiu are a katauraoia Iehova ao Iesu ibukia.​—Ita. 9:6, 7.

16. Baikara kakabwaia aika ti karekei ngkai ti riki bwa raoraon Iesu?

¹⁶ Ngke ti butimwaea ana kakao Iesu ao n riki bwa raoraona, ti karekei kakabwaia aika bati. N te katoto, ti namakina ana tangira ao ana boutoka nakoira ngkai. Ti a kona ni karekea te maiu are aki toki. Ao ae kakawaki riki, ara iraorao ma Iesu e na karekea nakoira te kaubwai ae akea n ai arona, ae bon ara iraorao ae kaan ma Tamana ae Iehova. Ai kakabwaiaakira ngaira ngkai ti aranaki bwa raoraon Iesu!