1. ¿Kasa waaʼinrajatka süpüla aleewain maʼin waya nümaa wanee wayuu?

SÜPÜLA aleewain maʼin waya nümaa wanee wayuu, nümaainjana waya, yootiraainjana waya nümaa süchiki tü jülüjakat waaʼin, süchiki tü kasa alatüitkat wamüin otta jamüin waaʼin saalinjee wanee kasa. Eepejeʼe kapüleerü saaʼin wamüin aleewainjanain waya nümaa Jesuu. Wekirajaa sünain waneirua kasa kapüleeka atuma tia.

2. ¿Jarat tü palajatkat kasa kapüleeka atuma aleewain waya nümaa Jesuu?

² Tü palajatkat kasa kapüleeka atuma aleewain waya nümaa Jesuu shia süka nnojolitchin weʼrüin nia. Kapüleesia namüin na anoujashii namaiwajanakana aleewainjanain naya nümaa Jesuu. Anuujese nünüiki chi aluwataaushikai Pedro: «Jaʼitaichi nnojolin jiʼrüin Jesucristo paala, ayatshia neʼe nia alin jüpüla. Otta müsia maaʼulu yaa, jaʼitaichi nnojoyülin jiʼrüin, ayatshiʼiya neʼe jia eʼitaain jaaʼin sünain anoujaa nünain» (1 Ped. 1:8). Nnojoipejeʼe weʼrüinjachin Jesuu süpüla aleewainjanain waya nümaa.

3. ¿Jarat tü piamakat kasa kapüleeka atuma aleewain waya nümaa Jesuu?

³ Tü piamakat kasa shia süka nnojoliin waashajaain nümaa Jesuu. Wanaa sümaa woʼuraajüin, oʼuraajüshii waya nümüin Jeʼwaa. Mayaainjeʼe wachuntuin saaʼu nünülia Jesuu, nnojoishii waya aashajaain nümaa. Nüküjain Jesuu niainjachin neʼe Jeʼwaa woʼuraajüin amüin. Waaʼinrüinjatü tia süka niain neʼe waʼwaajüinjachin nümüiwaʼa (Mat. 4:10). Mayaainjeʼe müin tia, weeʼiyatüinjatü naalin Jesuu wapüla.

4. (1) ¿Jarat tü apünüinkat kasa kapüleeka atuma aleewain waya nümaa Jesuu? (2) ¿Kasa wekirajaainjatka anain sünain ekirajaayakat tüü?

⁴ Tü apünüinkat kasa shia süka chain Jesuu iipünaa. Mayaainjeʼe  chain nia iipünaa, eeshii süpüla wekirajaain süchiki tü nukuwaʼipakat. Sünain ekirajaayakat tüü, wekirajaweerü anain pienchisü kasa waaʼinrajatka süpüla aleewainjanain maʼin waya nümaa Jesuu. Süpülapünaa tia, wekirajaa sünain jamüin aleewainjanaka maʼin waya nümaa Jesuu.

5. ¿Jamüshii aleewainjanaka waya nümaa Jesuu? (Paashajeʼera tü pütchikat « Aleewale waya nümaa Jesuu aleeweena waya nümaa Jeʼwaa» otta « Nnojotsü alanaʼaleeinjatüin naalin Jesuu wapüla nuulialeʼeya Jeʼwaa»).

⁵ Aleewainjana waya nümaa Jesuu süpüla aleewainjanain waya nümaa Jeʼwaa. ¿Jamüsü waaʼinrajatka tia? Waaʼinrajatü tia sünainjee piamasü kasa. Anuu nünüiki Jesuu süchiki tü palajatkat: «Aishii jia nüpüla chi Tashikai süka alin taya jüpüla» (Juan 16:27). Anuu wane nünüikiya: «Tayakai, taya chi süntajachikai akajee wayuu nünainmüin Maleiwa» (Juan 14:6). Süpüla aleewainjanain waya nümaa Jeʼwaa, aleewainjana waya nümaa Jesuu. Tia müsü aka saaʼin wekerolüinjanale suluʼumüin wanee miichi. Ekerotushii waya palajana soʼuluʼupünaa. Shiajaʼa nümaka Jesuu mayaa: «Tayakai, müshi aka saaʼin wane soʼu sükulaatse anneerü» (Juan 10:7). Tü piamakat kasa shia süka pansaain maʼin nukuwaʼipa Jesuu sümaa nukuwaʼipa chi Nüshikai. Anuu nünüiki namüin na nikirajüinkana: «Chi eekai niʼrüin taya, niʼrüin chi Tashikaʼiya» (Juan 14:9). Wanee sukuwaʼipa süpüla weʼraajüin Jeʼwaa, shia wekirajaale süchiki nukuwaʼipa Jesuu. Wekirajaale maʼin süchiki nukuwaʼipa Jesuu, aijeechi maʼin nia wapüla. Aleewale maʼin waya nümaa Jesuu, aijeechi maʼin wapüla chi Nüshikai.

6. Püküja süchiki jamüin aleewainjanaka waya nümaa Jesuu.

⁶ Aleewainjana waya nümaa Jesuu süpüla nusoutuin Jeʼwaa shiʼipajee tü wachuntakat  nümüin. Nnojoishii waya achuntuinjanain neʼe süpaʼa mma saaʼujee nünülia Jesuu. Watüjaainjatü saaʼu jamüin amén wamaka saaʼujee tü nünüliakat. Anuu nünüiki Jesuu namüin na nikirajüinkana: «Süpüshua tü kasa jüchunteetkat nümüin chi Tashikai saaʼu tapüshin jia, taaʼinreerü shia» (Juan 14:13). Nia Jeʼwaa aapajakai wanüiki jee asoutakai shiʼipajee tü wachuntakat nümüin. Naapapejeʼe Jeʼwaa laülawaa nümüin Jesuu süpüla naaʼinrüinjatüin tü nüchekakat Jeʼwaa (Mat. 28:18). Süpülapünaa nusoutuin Maleiwa shiʼipajee tü wachuntakat nümüin, jülüjasü naaʼin müleka waaʼinrüle tü nuluwataakalü anain Jesuu. Anuu süpüshi tia: «Müleka motüle jaaʼin tü saainjalakat wayuu eekai kaainjalain juulia, alatinneerü jaainjala juuliaya nütüma chi Jüshikai Maleiwa. Otta müleka nnojorule motüin jaaʼin tü saainjalakat, nnojoleeria alatinnüin jaainjala juulia nütüma» (Mat. 6:14, 15). Anasü maʼin motule waaʼin naainjala na waneinnua maʼaka naaʼinrüin shia Jeʼwaa nümaa Jesuu.

7. ¿Kasa waaʼinrüinjatka süpüla weʼrüin kasa anasü saaʼujee naapajiraain nikii Jesuu?

⁷ Na aleewakana maʼin nümaa Jesuu, eʼreena kasa anasü saaʼujee naapajiraain nikii naaʼu. ¿Jamüsü watüjaaka saaʼu tia? Naashin Jesuu aapajiraashi nia nikii saaʼujee nütünajutüirua (Juan 15:13). Na wayuu aʼyataakana nümüin Maleiwa, na anaajaakana süpülapünaa nüntüin Jesuu Mmapaʼamüin, ekirajaweena naya nüchiki süpüla alinjachin nia napüla. Naʼaka naya wayuukana eejeechi Abraham, Moisés, eejeerü Rahab sümaa Sara. Aleewainjanapejeʼe naya nümaa Jesuu süpüla katüin noʼu waneepia (Juan 17:2, 3; Aluw. 24:15; Heb. 11:8-12, 24-26, 31).

8, 9. (1) Saashin Juan 15:4, 5, ¿kasa waaʼinraka saaʼujee aleewain waya nümaa Jesuu? (2) ¿Jamüshii paaʼinwajiraainjanaka waya nümaa Jesuu?

⁸ Talatüsü waaʼin süka waʼyanaajiraain nümaa Jesuu sünain aküjaa pütchi jee sünain ekirajaa wayuu süchiki tü Aluwatawaa eeinjatkat nutuma Maleiwa. Wanaa sümaa yaajachin nia saaʼu tü Mmakat, ekirajüshi nia wayuu süchiki tü shiimainkat nüchiki Maleiwa. Ayatsia nuʼunirüin sukuwaʼipa tia aʼyatawaakat chejee iipünaajee, jama niain Wekiipüʼüin. Jülüjasü naaʼin jee kojutusü nümüin tü waaʼinrakat süpüla wakaalinjain wayuu sünain eʼraajaa nia nümaa chi Nüshikai. Paaʼinwajiraale waya nümaa Jesuu, nükaalinjeena waya süpüla wountuin wekeraajüin tia aʼyatawaakat jee nükaalinjeena waya Jeʼwaa (paashajeʼera Juan 15:4, 5).

⁹ Saashin tü Wiwüliakat alinjachi wapüla Jesuu süpüla talatüin naaʼin Jeʼwaa wamaa. Wekirajaa sünain pienchisü kasa waaʼinrajatka süpüla aleewain waya nümaa Jesuu.

10. ¿Jarat tü palajatkat kasa waaʼinrajatka süpüla aleewain waya nümaa Jesuu?

¹⁰ Tü palajatkat kasa waaʼinrajatka: weʼraajüinjatü nukuwaʼipa. Süpüla waaʼinrüin tia, waashajeʼerüinjatü tü karaloʼutakat Mateo, Marcos, Lucas otta Juan. Jülüjale waaʼin tü sümakat tü Wiwüliakat süchiki tü nukuwaʼipapuʼukat Jesuu namüin na wayuukana, aijeechi nia wapüla jee kojuteechi nia wamüin. Mayaainjeʼe Laülaain nia naaʼu na nikirajüinkana, nnojoishii müin aka saaʼin achepchiee nutuma, «tatünajutü», müshi nia namüin. Nüküjain Jesuu namüin tü jülüjakat naaʼin jee tü kasa suluʼukat naaʼin (Juan 15:15). Aisü nümüin namüliala jee aʼyalajüshi nia saalinjee tü kasa alatakat namüin (Juan 11:32-36). Jaʼitakajeʼe na wayuu nnojoliikana acheküin süchiki tü nikirajakalü anain, neʼrüin aleewain Jesuu namaa na achekakana tü nümakat (Mat. 11:19). Kojutule wamüin na waneinnua maʼaka kojutuin nümüin Jesuu na nikirajüinkana, aneerü  wakuwaʼipa namaa, talateerü waaʼin, aijeechi maʼin Jesuu wapüla otta kojuteechi nia wamüin.

11. (1) ¿Jarat tü piamakat kasa waaʼinrajatka süpüla aleewain waya nümaa Jesuu? (2) ¿Jamüsü washatüinjatka nukuwaʼipa Jesuu?

¹¹ Tü piamakat kasa waaʼinrajatka: jülüjainjatü waaʼin tü jülüjakat naaʼin Jesuu jee washatüinjatü nukuwaʼipa. Watüjaale saaʼu tü jülüjakat naaʼin Jesuu jee washatüle nukuwaʼipa, aleeweena maʼin waya nümaa (1 Cor. 2:15, 16). Washatüinjatü tü nukuwaʼipakat. Jamüshijaʼa nia, kapülasü naaʼin nakuwaʼipa na waneinnua suulialeʼeya nukuwaʼipa neʼe nümüiwaʼa (Mat. 20:28; Roma 15:1-3). Sünainjee müin nukuwaʼipa, wainma kasa naainjaka napüleerua na waneinnua otta motusü naaʼin naainjala. Nnojoishi nia jashichijaamaatüin sünainjee tü aküjünakat nüchiki (Juan 1:46, 47). Nnojotsü sotokuʼu müin naaʼin Jesuu naainjala wanee wayuu eekai mojulaapuʼuin nümaiwa (1 Tim. 1:12-14). Waaʼinrüinjatü tü nümakat Jesuu, anuujeseʼe nünüiki: «Müleka shiimüinre sünain aijiraain jia jüpüla, ayaawatüneena jia sütüma wayuu süpüshua sünain tekirajanain jia» (Juan 13:35). Anashii wasakirüle waaʼin sünain tüü: «¿Tachajaainche sukuwaʼipa süpüla anajiraain taya namaa na tawalayuukana maʼaka naaʼinrüin shia Jesuu?».

12. (1) ¿Jarat tü apünüinkat kasa waaʼinrajatka süpüla aleewain waya nümaa Jesuu? (2) ¿Jamüsü sukuwaʼipa watuma?

¹² Tü apünüinkat kasa waaʼinrajatka: wakaalinjainjana na nuwalayuukana Kürisüto. Naashin Jesuu, wakaalinjain nia müleka wakaalinjale na nuwalayuukana (Mat. 25:34-40). Wanee sukuwaʼipa süpüla wakaalinjain naya shia waaʼinmaale maʼin tü aküjaakat pütchi jee wekirajüle wayuu (Mat. 28:19, 20; Aluw. 10:42). Süpüla nekeraajüinjatüin maaʼulu na nuwalayuukana Kürisüto tü aküjaakat pütchi sainküin mmakat, choʼujaasü kaalin naya natuma na yaainjanakana kepiain saaʼu tü Mmakat (Juan 10:16). Yaainjanale waya kepiain saaʼu tü Mmakat, aijeena wapüla na chainjanakana iipünaa jee aijeechi wapüla Jesuu, waaʼinmaale maʼin tü aküjaakat pütchi.

13. ¿Kasa waaʼinrajatka süpüla woonooin sümaa tü nümakat Jesuu suluʼu Lucas 16:9?

¹³ Wasülajüle nneerü süpüla tü aʼyatawaa noʼunirakalü akuwaʼipa na nuwalayuukana Kürisüto, aleeweena waya nümaa Jeʼwaa jee nümaa Jesuu (paashajeʼera Lucas 16:9). Eeshii süpüla wasülajüin nneerü süpüla süküjünüin tü pütchikat wattapünaa, süpüla sukumajünüin otta sunoutunuin tü miichi süpülajatkat aʼyatawaa nümüin Maleiwa otta süpüla nakaaliinjünüin na wawalayuu eʼrakana müliaa. Eeshiʼiya süpüla wasülajüin nneerü eere woutkajaain otta wakaalinjain na wawalayuu eʼrakana choʼujawaa (Prov. 19:17). Waaʼinrüle tia, wakaalinjain na nuwalayuukana Kürisüto.

14. Sünainjee tü sümakat Éfeso 4:15, 16, ¿jarat tü pienchikat kasa waaʼinrajatka süpüla aleewain waya nümaa Jesuu?

¹⁴ Tü pienchikat kasa waaʼinrajatka: oonooinjana waya sümaa tü sümakat wamüin nupueulose Jeʼwaa. Woonoole sümaa tü naneekakat na wawalayuu laülaakana wapüleerua, na aaʼinmajakana waya, aleeweena maʼin waya nümaa Jesuu, chi wekiipüʼükai (paashajeʼera Éfeso 4:15, 16). Jamüsüjaʼa tü nupueulosekat Jeʼwaa, süneeküin nalateʼennajanain waneinnua wawalayuu naʼakamüin waneinnua jee müsia eeʼiratünüsü eeinjanale naküjain pütchi. Tia süpülajatü nnojoluinjatüin sukumajünüin sooʼomüin Piichi Outkajaalee. Suluʼujee tia, nnojotsü wainmain tü nneerü oʼunakat sünain tü kasa choʼujaakat. Wainma na wawalayuu ekiʼralaakana eemüinre naluwataanüin. Eesüjaʼa kapüleere namüin nalataain süka kakaliainnain naya namaa na noutkajaapuʼukana amaa jee kiʼrainnain naya namaa.  Talatakajasaʼa maʼin naaʼin Jesuu süka noonooin na wawalayuukana sümaa tü münakat namüin.

15. Püküja süchiki müleka ayateenale waya aleewain nümaa Jesuu mapeena.

¹⁵ Na chainjanakana aluwataain iipünaa nümaa Jesuu, neʼreechi nia, aashajaweena naya nümaa otta nümaajeena naya waneepia (Juan 14:2, 3). Na yaainjanakana kepiain saaʼu tü Mmakat aijeena naya nüpüla Jesuu jee naaʼinmajeena naya. Mayaainjeʼe nnojoleechin neʼrüin nia, ayateenaʼaya aleewain nümaa shiʼipaʼaya neʼrüin tü kasa anasü eejeetkat nutuma Jeʼwaa otta nutuma Jesuu (Is. 9:6, 7).

16. ¿Kasa weʼreetka sünainjee aleewaa nümaa Jesuu?

¹⁶ Wainma tü kasa anasü weʼreetkat sünainjee wacheküin süchiki aleewaa nümaa Jesuu. Jamüshiijaʼa waya maaʼulu, aishii waya nüpüla otta nükaalinjain waya. Jee müsia, eʼreena waya kataa oʼuu mapeena süpüla kaʼikat süpüshuaʼa. Tü alanaʼaleekat maʼin sünainjee aleewain waya nümaa Jesuu, shia aleeweenain waya nümaa Jeʼwaa. Anakatche maʼin aleewaa nümaa Jesuu.