ARTÍKULO OJESTUDIÁVA 17
“Che koʼág̃a pohenói che amígo”
“Che koʼág̃a pohenói che amígo, pórke aikuaauka peẽme entéro mbaʼe che Túa heʼi vaʼekue chéve” (JUAN 15:15).
PURAHÉI 13 Jasegi Cristo pypore
¿MBAʼE REHEPA ÑAÑEʼẼTA? *
1. ¿Mbaʼépa jajapo vaʼerã jareko hag̃ua peteĩ persónape ñane amigoitéramo?
JAREKO hag̃ua peteĩ persónape ñane amigoitéramo, tekotevẽ ñañemotiémpo jaikuaa hag̃ua chupe. Ñañemongetáramo oñondive umi mbaʼe ñapensa ha jahasávare oikóta ñandehegui oñoamígo. Péro sapyʼánte ndahaʼéi la ifasilpáva jareko hag̃ua Jesúspe ñane amigoitéramo. ¿Mbaʼérepa jaʼe upéva?
2. ¿Mbaʼépa hína pe primera situasión ñambohováiva?
2 Primeroite voi ñambohovái ko situasión: Ñande ndajajotopáiva Jesús ndive personálmente. Péro heta kristiáno síglo primérope guare ndojotopáinte vaʼekue avei Jesúsndi. Upéicharõ jepe, apóstol Pedro heʼi chupekuéra: “Peẽ ndapehecháiramo jepe arakaʼeve Crístope, pehayhu chupe. Ndapehecháiramo jepe chupe koʼág̃a, pejerovia hese” (1 Ped. 1:8). Jahechakuaa upéicharõ ikatuha oiko ñandehegui Jesús amigoite ndajajotopáiramo jepe hendive.
3. ¿Mbaʼépa hína pe segunda situasión ñambohováiva?
3 Segunda situasión ñambohováiva: Ñande ndaikatúi ñañeʼẽ Jesús ndive. Ñañemboʼe jave, ñande ñañeʼẽ hína Jehovaitépe voi. Ha ñañemboʼéramo jepe Jesús rérape, ñande nañañeʼẽi chupe. Añetehápe Jesús ndoipotái voi ñañemboʼe chupe. ¿Mbaʼérepa? Pórke ñañemboʼe jave ñameʼẽ hína adorasión, ha Jehovápe añoite jaadora vaʼerã (Mat. 4:10). Péro lomímonte ikatu jahechauka jahayhuha Jesúspe.
4. a) ¿Mbaʼépa hína pe tercera situasión ñambohováiva? b) ¿Mbaʼépa jahecháta ko artíkulope?
4 Tercera situasión ñambohováiva: Jesús oiko yvágape, upévare ndaikatúi jahasa tiémpo hendive. Péro ñande ikatu gueteri jaikuaa heta mbaʼe Jesúsgui nañaiméiramo jepe hendive. Koʼág̃a jahecháta 4 mbaʼe ikatúva jajapo ñamombarete hag̃ua ñane amista Jesús ndive. Primerorã ñaanalisáta mbaʼérepa iñimportantete jareko chupe ñane amigoitéramo.
¿MBAʼÉREPA TEKOTEVẼ OIKO ÑANDEHEGUI JESÚS AMÍGO?
5. ¿Mbaʼérepa oikómante vaʼerã ñandehegui Jesús amígo? (Ehecha avei umi rrekuádro “ Jesús haʼéramo ñane amígo, ikatúta oiko ñandehegui Jehová amígo” ha “ Ñamombaʼe Jesúspe hendápe porã”).
5 Oikómante vaʼerã ñandehegui Jesús amígo jarekoséramo peteĩ amista iporãva Jehovándi. ¿Mbaʼérepa jaʼe upéva? Primero, Jesús heʼi vaʼekue idisipulokuérape: “Pe Túa voi penderayhu, peẽ cherayhúgui” (Juan 16:27). Haʼe heʼi vaʼekue avei: “Che rupive añoite ikatu oñeg̃uahẽ pe Túa rendápe” (Juan 14:6). Ñañehaʼãramo oiko hag̃ua ñandehegui Jehová amígo jarekoʼỹre Jesúspe ñane amígoramo, haʼete ku ñañehaʼãva jaike peteĩ edifísiope jahasaʼỹre pe okẽrupi. Jesús oipuru vaʼekue peichagua komparasión oñeʼẽrõ guare ijehe, ha heʼi: “Che hína pe okẽ umi ovecha ohasaha” (Juan 10:7). Segundo, ndaipóri ótro ohechauka porãvéva umi kualida Jehová orekóva Jesús ojapo haguéicha. Haʼe heʼi vaʼekue idisipulokuérape: “Upe chéve cherecháva ohecháma avei pe Túape” (Juan 14:9). Upévare, jaikuaa hag̃ua Jehovápe iñimportanteterei jastudia umi mbaʼe Jesús ojapo vaʼekue. Péicha jaikuaavévo Jesúspe, jahayhuvéta chupe, ha amáske jahayhuve Jesúspe, jahayhuvéta avei Itúape.
6. ¿Mbaʼérepa jarekómante vaʼerã avei Jesúspe ñane amígoramo? Emyesakã.
6 Ñande jarekómante vaʼerã avei Jesúspe ñane amígoramo ikatu hag̃uáicha oñekontesta ñandéve ñane ñemboʼe. Upéva ndeʼiséi ñañemboʼénte vaʼerãha Jesús rérape, síno ñantende porã vaʼerã mbaʼéichapa Jehová ojevale hese okontesta hag̃ua ñandéve ñane ñemboʼe. Jesús heʼi vaʼekue ijapostolkuérape: “Oimeraẽ mbaʼe pejeruréva che rérape, ameʼẽta peẽme” (Juan 14:13). Jehová haʼéramo jepe pe ohendúva ha okontestáva umi ñane ñemboʼe, haʼe omeʼẽ autorida Jesúspe ohecha hag̃ua mbaʼéichapa ojapóta upe Jehová odesidi vaʼekue (Mat. 28:18). Péro okontesta mboyve ñandéve ñane ñemboʼe, Jehová ohecha raẽ jasegímapa hína pe konsého Jesús omeʼẽ vaʼekue. Por ehémplo, Jesús heʼi: “Peẽ peperdonáramo pende rapichápe hembiapo vai, pende Ru oĩva yvágape peneperdonáta avei. Péro napeperdonáiramo pende rapichápe hembiapo vai, pende Ru oĩva yvágape noperdonamoʼãi avei pene rembiapo vai” (Mat. 6:14, 15). ¡Ajépa iñimportantete upéicharõ jatrata porã ótrope Jehová ha Jesús ñandetrataháicha!
7. ¿Mávapa oñevenefisiáta pe sakrifísio Jesús ojapo vaʼekuégui?
7 Umi orekóva añoite Jesúspe iñamigoitéramo ikatúta oñevenefisia pe sakrifísio haʼe ojapo vaʼekuégui. ¿Mbaʼéichapa jaikuaa upéva? Pórke Jesús voi heʼi vaʼekue haʼe ‘ontregataha hekove iñamigokuéra rehehápe’ (Juan 15:13). Umi Jehová siervokuéra oiko vaʼekue Jesús ou mboyve ko yvy ape ári, oikuaa ha ohayhu vaʼerã avei chupe. Por ehémplo, Abrahán, Sara, Moisés ha Rahábpe oñemoingove jeýta, ha koʼã kuña ha kuimbaʼe ihústova jepe tekotevẽta oreko Jesúspe iñamígoramo ikatu hag̃uáicha oikove pára siémpre (Juan 17:3; Hech. 24:15; Heb. 11:8-12, 24-26, 31).
8, 9. Ohechaukaháicha Juan 15:4, 5, ¿mbaʼépa ñande ikatu jajapo haʼe rupi Jesús amígo, ha mbaʼérepa iñimportánte jasegi Jesús poguýpe?
8 Ñande javyʼaiterei ikatu haguére ñambaʼapo Jesús ndive, japredika ha ñamboʼévo umi notísia porã. Jesús oĩrõ guare ko yvy ape ári, omboʼe vaʼekue umi héntepe. Ha oho guive yvágape haʼe omoakã pe kongregasión, ha osegi odirihi ko tembiapo ojepredika ha oñemboʼe hag̃ua la héntepe. Jesús ningo omombaʼeterei ohechávo ñañehaʼãmbaiteha ñaipytyvõ opa ikatúvape oikuaa hag̃ua chupe ha Itúape. Ha añetehápe Jehová ha Jesús ñanepytyvõ rupínte ikatu jajapo ko tembiapo (elee Juan 15:4, 5).
9 Ñandejára Ñeʼẽ ohechauka porã ñande jahayhu vaʼerãha Jesúspe ikatu hag̃uáicha Jehová ñandeguerohory. Jahechamína upéicharõ 4 mbaʼe ikatúva jajapo oiko hag̃ua ñandehegui Jesús amígo.
MBAʼÉPA IKATU JAJAPO JAREKO HAG̃UA JESÚSPE ÑANE AMÍGORAMO
¿Mbaʼéichapa ikatu oiko ñandehegui Jesús amígo? 1) Jaikuaa porã vaʼerã Jesúspe, 2) ñapensa ha jaiko vaʼerã Jesús ojapo haguéicha, 3) jaapoja vaʼerã Cristo ermanokuérape, ha 4) jaapoja vaʼerã umi mbaʼe odesidíva Jehová organisasión (Ehecha párrafo 10-14) *
10. ¿Mbaʼépa hína pe primer mbaʼe jajapo vaʼerã jareko hag̃ua Jesúspe ñane amígoramo?
10 Primero, jaikuaa vaʼerã Jesúspe. Upearã ikatu jalee umi lívro de Mateo, Marcos, Lucas ha Juan. Jajepyʼamongetávo umi mbaʼe oñemombeʼúvare koʼã lívrope Jesús rekove rehe, jahechakuaáta mbaʼéichapa haʼe otrata porã vaʼekue la héntepe ha péicha jahayhu ha jarrespetavéta chupe. Por ehémplo, haʼe omoakãramo jepe idisipulokuérape, ndotratái vaʼekue chupekuéra esklávoramo. Upéva rangue, Jesús omombeʼu chupekuéra mbaʼépa haʼe opensa ha oñandu (Juan 15:15). Haʼekuéra ombyasy jave álgo, Jesús ombyasy ha hasẽ avei hendivekuéra (Juan 11:32-36). Umi iñenemígo jepe ohechakuaa umi ohendu vaʼekue umi notísia porã Ñandejára Rréinore oikoha chuguikuéra Jesús amígo (Mat. 11:19). Ñande jatratáramo ñande rapichakuérape Jesús otrata haguéicha idisipulokuérape, jajogueraha porãvéta, javyʼave, jajoayhuve ha jarrespetavétantema Crístope.
11. ¿Mbaʼépa hína pe segundo mbaʼe ikatúva jajapo jaiko hag̃ua Jesús amígoramo, ha mbaʼérepa iñimportantete jajapo upéva?
11 Segundo, ñapensa ha jaiko Jesús ojapo haguéicha. Amáske jaikuaa porãve chupe ha ñapensa haʼe opensaháicha, ñane amista hendive imbaretevéta (1 Cor. 2:16). ¿Mbaʼéichapa ikatu jasegi Jesús ehémplo? Ñapensamínte ko mbaʼére. Jesúspe g̃uarã iñimportanteve vaʼekue oipytyvõ ótrope opensa rangue ijehe (Mat. 20:28; Rom. 15:1-3). Opensa rupi upéicha, haʼe ojesakrifika vaʼekue ótro rehehápe ha oporoperdona. Chupe nombopochýi vaʼekue péicha péichante umi mbaʼe heʼíva hese la hénte (Juan 1:46, 47). Ha oiméramo peteĩ persóna ofalla rakaʼe yma, haʼe ndohejái upéva oafekta otrata lája chupe (1 Tim. 1:12-14). Jesús heʼi: “Peẽ pejoayhúramo, entéro umi hénte oikuaáta peẽ haʼeha che disípulo” (Juan 13:35). Upévare iporãta ñañeporandúramo: “¿Asegípa hína Jesús ehémplo ha ajapo ikatúva guive aiko hag̃ua pyʼaguapýpe che ermáno ha ermanakuérandi?”.
12. ¿Mbaʼépa hína pe tercer mbaʼe ikatúva jajapo jaiko hag̃ua Jesús amígoramo, ha mbaʼéichapa ikatu jajapo upéva?
12 Tercero, jaapoja Cristo ermanokuérape. Jesúspe g̃uarã umi mbaʼe jajapóva iñermanokuéra unhído rehehápe haʼetévaicha jajapóva chupe g̃uarã (Mat. 25:34-40). Ñande ningo jaapoja chupekuéra prinsipálmente ñasẽ memévo predikasiónpe ha ñamboʼévo umi héntepe Jesús omanda haguéicha (Mat. 28:19, 20; Hech. 10:42). Umi “ótro ovechakuéra” oipytyvõ rupínte Cristo ermanokuérape ikatu ojepredika ko tiémpope ko yvy tuichakuére (Juan 10:16). Oimérõ ñande ñaĩ umi ótro ovechakuéra apytépe, ñasẽ jave japredika térã ñamboʼe jave ñande rapichápe, jahechauka hína jahayhuha Cristo ermanokuérape ha Jesúspe voi.
13. ¿Mbaʼéichapa ikatu jasegi pe konsého Jesús omeʼẽ vaʼekue Lucas 16:9-pe?
13 Ñande avei ikatu jareko Jehová ha Jesúspe ñane amígoramo jaipurúvo ñande pláta jaapoja hag̃ua pe tembiapo haʼekuéra odirihíva (elee Lucas 16:9). Por ehémplo, ikatu ñameʼẽ ñane kontrivusión jaapoja hag̃ua umi traváho ojapóva Jehová organisasión ko múndo tuichakuére. Koʼã kontrivusión ojepuru oñemog̃uahẽ hag̃ua umi notísia porã umi lugár mombyryvehápe, oñemopuʼã ha oñemantene hag̃ua umi lugár ojepurúva ojeadora hag̃ua Jehovápe, ha oñepytyvõ hag̃ua umi oikotevẽvape oiko rire peteĩ desástre naturál térã peteĩ sarambi guasu. Ñande ikatu avei ñameʼẽ ñane kontrivusión ojepaga hag̃ua umi gásto orekóva ñane kongregasión, térã ñaipytyvõ umi jaikuaávape ohasaha hína nesesida (Prov. 19:17). Jajapóramo koʼã mbaʼe, jaapojáta avei Cristo ermanokuérape.
14. Ohechaukaháicha Efesios 4:15, 16, ¿mbaʼépa pe cuarto mbaʼe ikatúva jajapo jaiko hag̃ua Jesús amígoramo?
14 Cuarto, jaapoja umi mbaʼe odesidíva Jehová organisasión. Jesús ningo omoakã pe kongregasión, ha ñande ñamombarete ñane amista hendive jaapoja jave umi ermáno haʼe omoĩ vaʼekuépe oñangareko hag̃ua ñanderehe (elee Efesios 4:15, 16). Por ehémplo, koʼág̃a ñañehaʼã jaipuru porãve umi Salón del Reino. Upévare heta kongregasión oñeuni ha oñekambia moõite pevépa og̃uahẽta iterritoriokuéra. Upéicha rupi, tuichaiterei ojeaorra ha ojepuru porãve umi kontrivusión oñemeʼẽva Jehová organisasiónpe. Ojejapo rupi koʼã mbaʼe, heta puvlikadór ojadapta vaʼerã ko situasión pyahúre. Koʼã ermáno ifiélva ningo oiméne oservíma raʼe heta áñore peteĩ kongregasiónpe, ha oiméne oreko raʼe upépe umi ermána ha ermáno iñamigoitéva. Péro koʼág̃a ojejerure chupekuéra oservi hag̃ua ótra kongregasiónpe. ¡Katuete ningo Jesús ovyʼaiterei ohechávo koʼã ermáno ifiélva oapojaha koʼã mbaʼe ojedesidíva!
IKATU OIKO ÑANDEHEGUI JESÚS AMÍGO PÁRA SIÉMPRE
15. ¿Mbaʼéichapa amo gotyove imbaretevéta pe amista ojeguerekóva Jesús ndive?
15 Umi ojeporavo vaʼekue espíritu sánto rupive, oreko la esperánsa oikotaha Jesús ndive pára siémpre ha ogovernataha hendive Ñandejára Rréinope. Haʼekuéra ohecháta chupe, oñeʼẽta ha ohasáta hendive tiémpo (Juan 14:2, 3). Péro Jesús ohechaukáta avei ohayhuha umi orekóvape esperánsa oiko hag̃ua ko yvy ape ári, ha oñangarekóta avei hesekuéra. Jepe haʼekuéra ndohechamoʼãi Jesúspe, pe amista orekóva hendive amás día imbaretevéta oiko aja hikuái vyʼápe Jehová ha Jesús oipotaháicha (Is. 9:6, 7).
16. ¿Mbaʼe vendisiónpa jahupyty jareko rupi Jesúspe ñane amígoramo?
16 Jaaseptávo Jesús invitasión oiko hag̃ua ñandehegui iñamígo, jahupyty hetaiterei vendisión. Por ehémplo, jahechakuaa haʼe ñanderayhu ha ñandeapojaha koʼág̃ama voi. Oñemeʼẽ avei ñandéve la oportunida jaiko hag̃ua pára siémpre. Ha iñimportanteveha, ñande haʼe rupi Jesús amígo ikatu jareko Itúa Jehovápe ñane amigoitéramo, ha upéva haʼe pe amista iporãvéva ikatúva jareko. Añetehápe ningo peteĩ priviléhio tuichaitereíva jaiko Jesús amígoramo.
PURAHÉI 17 Vyʼápe ñañopytyvõ
^ párr. 5 Umi apóstol ningo ohasa vaʼekue heta áño Jesúsndi. Haʼekuéra oñemongeta ha ombaʼapo hendive, ha upévare oiko chuguikuéra oñoamigoite. Jesús oipota avei oiko ñandehegui iñamigoite, péro ñandéve g̃uarã ikatu ijetuʼuve hína umi apostolkuéragui. Ko artíkulope jahecháta mbaʼérepa jaʼe upéva, ha mbaʼéichapa ikatu oiko ñandehegui Jesús amigoite.
^ párr. 55 JAHECHÁVA UMI TAʼANGÁPE: 1) Jajapo aja ñande estúdio de família, ikatu jastudia Jesús rekovekue ha mbaʼéichapa haʼe opredika ha oporomboʼe vaʼekue. 2) Kongregasiónpe ñañehaʼãmbaite vaʼerã jaiko pyʼaguapýpe ermanokuérandi. 3) Jajapóramo ikatúva guive predikasiónpe jaapoja hína Cristo ermanokuérape. 4) Umi kongregasión oñeuni jave, jaapoja vaʼerã ansianokuéra odesidíva.
