1. ¿Ni nibu ja ketadre kwin jabe yekäre rabadre dre nuainne?

NI NIBU ja ketadre jabe yekäre rabadre kä denkä jai blitakäre tä töbike ño, ja ruin ño ietre aune dre nuainbare kwetre ye kädriekäre jabe; akwa ye erere ni ñan raba nuainne ja ketakäre Jesube. Ñobätä ye ani mike gare jai.

2. ¿Kukwe meden kena abokänbätä ñan raba nemen nuäre ni kräke ja ketakäre Jesube?

² Kena, ni ñan ja tuani Jesube. Nitre kristiano siklo kena kwati ñan Jesús tuani ja okwä jeñebiti arato. Yebätä apóstol Pedro niebare ietre: “Jesukristo abko munkwe ñan tuabare ja okwä jenbti, akwa munta tarere. Erere arato, mtare munta tuen ñakare, akwa munta mike era jae, käta tödeke bti” (1 Ped. 1:8). Aisete ja ketakäre Jesube nikwe tuadre ja okwäbiti ye ñan ribeta nie.

3. ¿Kukwe meden ketebukärebätä ñan raba nemen nuäre ni kräke ja ketakäre Jesube?

³ Ketebukäre, ni ñan raba blite Jesube. Nita orare ngwane nita nuainne Jesús käbiti akwa ni ñan tä blite metrere ben, ñakare aune nita blite Jehovabe. Jesús ñan tö ni tuai orare jai ñobätä ñan aune orasion yebiti nita Jehová mike täte (Mat. 4:10). Akwa Jesús tare nikwe ye ni raba bämike ie.

4. a) ¿Kukwe meden ketamäkärebätä ñan raba nemen nuäre ni kräke ja ketakäre Jesube? b) ¿Dre rabai gare nie kukwe ja tötikara nekänti?

 ⁴ Ketamäkäre, Jesús tä nüne kä kwinbiti ye medenbätä ñan raba nemen nuäre ni kräke ja ketakäre ben. Ni ñaka tä Jesube kä kwinbiti akwa ni raba kukwe mike gare jai niarabätä. Kukwe ketabokä ni raba nuainne ja ketakäre kwin Jesube ye rabai gare nie kukwe ja tötikara nekänti. Akwa ja ketadre Jesube ye ñobätä ütiäte krubäte ye ani mike gare käne jai.

5. ¿Ñobätä nikwe ja ketadre Jesube? (Recuadro “ Ja ketabätä Jesube nita nemen ja ketamuko Jehovakwe” aune “ Jesús taredre akwa ñaka Ngöböbiti ta” ye mikadre ñärärä arato).

⁵ Ja ketakäre kwin Jehovabe yekäre ja ketadre Jesube. ¿Ñobätä nita ne niere? Ani kukwe ketebu mike gare jai. Kena, Jesukwe niebare nitre ja tötikaka kwe ie: “Munta ti tarere [...]. Yebtä abko ti Rün ara jire käta mun tarere” (Juan 16:27). Aune, “ti ne aibe köböire ni rabadre ti Rün känti” niebare kwe arato (Juan 14:6). Töbike kukwe nebätä: ni tö rabadre niken gwä akwa ni ñan rikadre jukwete ta ngwane ni ñan rabai gwi. Ye erere arato ni ñaka ja kete kwin Jesube ngwane ni ñan raba ja kete Jehovabe. “Ti abrä jukwe känti ta oveja niken kä teri” niebare Jesukwe ngwane kukwe ye erere bämikani kwe (Juan 10:7, NGT). Ketebukäre, Jehová töi ño ye Jesukwe bämikani metre. Yebätä niebare kwe nitre ja tötikaka kwe ie: “Nire nire käta ti tuen, ye abko tä ti Rün tuen arato” (Juan 14:9). Jehová rabadre gare nie yekäre Jesús mikadre gare jai. Nikwe ja tötikai bäribätä ngwane bäri ni rabai tarere. Aune ni rökrai bäri Jesús ken ngwane bäri ni rabai Rün kwe tarere.

6. ¿Kukwe medenbätä mada nikwe ja ketadre Jesube?

 ⁶ Nikwe ja ketadre Jesube ne kwe nita dre ribere orasionte ye rabadre nemen bare. Ye tä mike gare nikwe ñaka orasion nuaindre Jesús käbiti jerekäbe, ñakare aune nita dre ribere Jehovai orasionte ye niarata mike nemen bare ño Jesús yebiti ye nikwe mikadre gare jai. Jesús niebare nitre apóstol ie: “Mun tö raba dre dre käräi ti Rünye ti käbti, ye abko tikwe nuendi mun kräke” (Juan 14:13). Jehová ye orasion kukwe nuaka aune nita dre ribere ie ye tä bien nie, akwa Jesús kädekani kwe ye nuainkäre (Mat. 28:18). Nita Jesús kukwe mike täte ye Jehová tä mike ñärärä käne biti nita dre ribere ie ye tä bien nie. Ñodre Jesukwe niebare: “Ni mda tä ja mike ngite mun rüere angwane, munta den jökrä bti ta ne ngwane, munta ja mike ngite Ngöbö mun Rün rüere, ye mun Rün kä käinbti käkwe diandikä jökrä mento munbtä arato. Akwa ni mda tä ja mike ngite mun rüere abko munkwe ñan diandre bti ta amne mun rabadre romon janknu kräke ne ngwane, mun ngite Ngöbö rüere, ye mun Rün kä käinbti käkwe ñan diandrekä mento munbtä arato” (Mat. 6:14, 15). Jehová bätä Jesús töita kwin ni kräke ye erere nikwe ja töi mikadre kwin ni jökrä kräke, ¿ñan ererea?

7. ¿Jesukwe ja nire biani ye köböire kukwe kwin rabadre nikwe yekäre dre nuaindre?

⁷ Nitre ja ketamuko Jesukwe ye aibe kräke kukwe kwin rabai nemen bare niara ja nire biani ni ütiäre ye köböire. ¿Ñokänti kukwe ye gare nie? Jesukwe ja nire biain nitre ja ketaka ben ütiäre niebare kwe (Juan 15:13). Nitre Ngöbö mikaka täte nünanbare Jesús känenkri ye rabadre ja tötike niarabätä aune tarere. Ñodre Abrahán, Sara, Moisés o Rahab ye rükaita nire, akwa nünandre kärekäre kwetre yekäre rabadre ja kete Jesube (Juan 17:3; Hech. 24:15, TNM; Heb. 11:8-12, 24-26, 31).

8, 9. Juan 15:4, 5 tä niere erere, ¿nita ja kete Jesube ye köböire ni raba dre nuainne aune ñobätä nikwe sribidre gwairebe ben?

⁸ Nita sribire Jesube, ñodre, nita kukwe driere aune nitre mada tötike ye köböire käta juto nibätä. Jesús nünanbare kä tibienbätä ngwane kukwe metre Ngöböbätä driebare kwe. Nikaninta kä kwinbiti yete ja käne tä konkrekasion aune sribi nuainta ye jie ngwen nükebe ni näire. Nita ja di ngwen niara aune Rün kwe mike gare ni madai ye tuin ie aune tä mike ütiäte jai. Jehová aune Jesús ñaka ni dimikadre akräke sribi ne ñaka raba nemen bare nie (ñäkädre Juan 15:4, 5 yebätä).

⁹ Ni tö Jehová mikabätä täte ngwane nikwe Jesús taredre ye Biblia tä mike gare nie. Yebätä nikwe kukwe ketabokä nuaindre ja ketakäre Jesube ye ani mike gare jai.

10. ¿Kukwe meden kena nikwe nuaindre ja ketakäre Jesube?

¹⁰ Kena, nikwe Jesús mikadre gare jai. Yekäre ni rabadre ñäke tärä Mateo, Marcos, Lucas aune Juan yebätä. Jesukwe dre nuainbare, ja ngwani ño kwe aune ja töi mikani kwin kwe nitre kräke yebätä nikwe töbikadretari ngwane ni rabai tarere aune mike ütiäte jai. Ñodre niara nämäne nitre ja tötikaka kwe ye jie ngwen, akwa ñaka mikani klabore kwe ja kisete, ñakare aune ja ketabare kwe bentre aune niara töi nämäne ño, ja nämäne ruin ño ie ye mikani gare kwe ietre (Juan 15:15). Niaratre nämäne ja tare  nike ngwane nämäne nemen tare ie aune nämäne muen bentre (Juan 11:32-36). Nitre nämäne niara kukwe nuin yebe nämäne ja kete ye nükani gare nitre ja mikaka niara rüere yei (Mat. 11:19). Jesukwe ja töi mikani kwin nitre ja tötikaka kwe kräke ye erere nikwe ja töi mikadre ngwane, nikwe ja ngwain kwin ja mräkätre ben, kä täi juto nibätä aune nikwe Jesús taredi bäri aune mikai ütiäte jai.

11. ¿Kukwe meden ketebukäre nikwe nuaindre ja ketakäre Jesube aune ñobätä ye ütiäte?

¹¹ Ketebukäre, nikwe töbikadre aune ja ngwandre Jesús erere. Jesús tä töbike ño ye nikwe mikadre gare jai aune ye erere nikwe ja töi mikai ngwane nikwe ja ketai bäri kwin ben (1 Cor. 2:16). ¿Ni raba ja töi mike ño niara erere? Ani mike gare keteiti jai. Niara ñaka töi nämäne ja aibebätä ñakare aune töi nämäne nitre mada dimikabätä (Mat. 20:28; Rom. 15:1-3). Niara töi nämäne nitre mada dimikabätä yebätä nämäne ja töi mike kwin kräke aune nämäne ngite juen ta bititre. Kukwe ngwarbe nie nämänebätä ye ngwane ñaka nämäne nemen rubun jötrö ngwarbe (Juan 1:46, 47). Nitre ja mikani ngite yebätä ñan nämäne töbike blo aune ñaka nämäne ngwen törö jai bati bobu (1 Tim. 1:12-14). Nikwe ja ngwandre niara erere ye ütiäte krubäte ñobätä ñan aune niebare kwe: “Munkwe ja taredre kwärikwäri tita niere munye, ne kwrere munkwe ja taredre ne ngwane, mun abko ja töitikaka tibe ye rabadi gare ni jökräye” (Juan 13:35). Yebätä ni rabadre ngwentari jai: “¿Tita ja di ngwen ja ketakäre jäme ja mräkätre jökrä ben Jesús erere?”.

12. ¿Kukwe meden ketamäkäre nikwe nuaindre ja ketakäre Jesube aune nuaindre ño?

¹² Ketamäkäre, Kristo etebatre tä sribi nuainne ye dimikadre. Nitre dianinkä nänkäre kä kwinbiti tä sribi nuainne ye nita dimike ngwane, Kristo ara kräke nita nuainne tä nemen tuin ie (Mat. 25:34-40). Nikwe Gobran Ngöbökwe ye driedre aune nitre mikadre ja tötikaka ye kukwe bäri ütiäte nikwe nuaindre niaratre dimikakäre (Mat. 28:19, 20; Hech. 10:42). Ütiäte krubäte nitre oveja mada mada Kristo etebantre ye dimikadre ne kwe kukwe driedre kä jökräbiti tibien (Juan 10:16). Nita oveja mada mada ngätäite ngwane batire batire nita kukwe driere yebiti nita bämike nitre dianinkä nänkäre kä kwinbiti tare nikwe aune Jesús tare nikwe arato.

13. ¿Jesús tä kukwe ribere nie Lucas 16:9 ye ni raba mike ño täte?

¹³ Jehová aune Jesús tä sribi jie ngwen ye nita dimike ngwianbiti ngwane ni raba nemen ja ketamuko kwetre arato (ñäkädre Lucas 16:9 yebätä). Ñodre, ni raba ngwian bien kukwe drieta mente ye dimikakäre, Ju Ja Ükarakrö sribekäre aune ngübakäre aune ja mräkätre tä ja tare nike ye dimikakäre. Arato ni rabadre ngwian bien konkrekasion nikwe yete aune ja mräkätre meden tä jondron ribere jai ye nikwe dimikadre (Prov. 19:17). Nita ne erere nuainne ngwane, Kristo etebantre dimikata nikwe.

14. Efesios 4:15, 16 tä niere erere, ¿kukwe meden ketabokäkäre nikwe nuaindre ja ketakäre Jesube?

¹⁴ Ketabokäkäre, juta Ngöbökwe tä kukwe ükete ye nikwe mikadre täte. Jesús tä konkrekasion jie ngwen aune niara käkwe ja mräkätre ruäre kädekani ni ngübakäre ye nita mike täte ngwane, nita nemen ja ketamuko kwe (ñäkädre Efesios 4:15, 16 yebätä). Ñodre, Ju Ja Ükarakrö kwatire kwatire te nitre nibe raba ja ükökrö ye ükaninte. Ja mräkätre nämäne ja ükökrö konkrekasion  jene jene te ye mikani konkrekasion keteitibe aibe te aune kä dirikäre ietre ye ükaninte bäri kwin. Ye köböire juta Ngöbökwe ñaka tä ngwian kitekä ngwarbe. Ye medenbätä ja mräkätre ruäre nämäne ja ükökrö konkrekasion keteitibe te aune ja nämäne tare kwetre, akwa matare juani konkrekasion madate yebätä rabadre ja töi ükete kukwe keta kabrebätä. Tätre ye erere nuainne ngwane tä kä mike juto krubäte Jesubätä.

15. ¿Ñobätä nikwe ja ketai bäri kwin Jesube ja känenkäre?

¹⁵ Nitre kristiano dianinkä üai demebiti tö nünain kärekäre Jesube kä kwinbiti aune gobrane ben Gobran Ngöbökwe yete. Ja tuai kwetre ben, blitai kwetre ben aune rabaitre keteitibe ben (Juan 14:2, 3). Nitre nünain kä tibienbätä ye Jesukwe taredi aune ngübai kwin arato. Ñaka ja tuai kwetre ben akwa Jehová aune Jesús niaratre mikai nüne kwin ye käkwe kä mikai juto bätätre. Ye köböire rabai ja kete bäri kwin ben (Is. 9:6, 7).

16. ¿Nikwe ja ketadre Jesube ye köböire dre dre kwin raba nemen nikwe?

¹⁶ Jesús tä ni nübaire ja kete jabe ye nita kain ngäbiti ngwane, kukwe kwin keta kabre ta nemen nikwe. Ñodre, tä ni tarere aune tä ni dimike. Ne madakäre, ja känenkäre nikwe nünain kärekäre. Aune bäri ütiäte, ja ketabätä Jesube ja ketamuko bäri kwin rabai nikwe, ye abokän Jehová. Ye medenbätä ja ketadre Jesube ye ütiäte krubäte.