1. Gurhe onahwanza obwira bukomere n’omuntu?

AHANENE, ech’oburhanzi onajira omu kukola obwira haguma n’omuntu wabuganene naye, kuli kugeza ebisanzi haguma. Oku muli mwaganira, n’okubwirana oku mawazo, n’ebimwagereremo omu kalamo buli muguma n’owindi, mwanazinda mwanaba bera. Aliko omu kukola obwira haguma na Yesu, hali ebibazo. Nka bihe biguma omubyo?

2. Chibazo chihe ch’oburhanzi rhuli rhwahurana nacho?

² Echibazo ch’oburhanzi, okuba rhurhabugananaga na Yesu masu oku masu. Bakristu banene b’omu myaka egana ya burhanzi, nabo balihurene echola chibazo. Eju y’echola, Petro aderha ntya: “Chiro akaba oku murhamubonaga ko, mumusima. Chiro akaba oku murhali mwamubona, aliko muyerekene obwemere mu Yewe.” (1 Pe. 1:8) Echola chiyerekene oku byakashobokana kujira obwira haguma na Yesu buzira okubuganana naye masu oku masu.

3. Chibazo chihe cha kabiri yirhwahurana nacho?

³ Echibazo cha kabiri, okuba rhurhakagala kuderha na Yesu. Eyi rhwasalira, rhunayerekeza amawazo merhu emunda Yehova ali. Kweri, rhunasalira omu zino lya Yesu, s’aliko arhali yi rhuba eyi rhuli rhwabwira. Chirhuma? Bulala esala chili chigabi ch’obuharamye, na Yehova yenyine yi rhukwanene rhuharamye. (Mt. 4:10) Chiro akaba ntyo, rhwakayerekana oku rhusimire Yesu.

4. Chibazo chihe cha kasharhu yirhwahurana, na bichi rhwashambalako mugunola mwazi?

 ⁴ Echibazo cha kasharhu, okuba Yesu alamire omu mbingu, rhurhakagala kugeza ebisanzi haguma naye omu mubiri. Aliko rhwakamenya binene kuyerekera Yesu buzira kushiba rhwaba haguma naye omu mubiri. Rhukala kulola bintu bine rhwakajira byakarhurhabala rhukomeze obwira bwerhu haguma na Yesu. Sasa, ech’oburhanzi, leka rhulole bulagurhe bili bya ngombwa okujira obwira bukomere na Kristu.

5. Bulagurhe rhukwanene rhube bera ba Yesu? (Olole ebisanduku “ Obwira Haguma na Yesu Bunayerekeza oku Bwira Haguma na Yehova” na “ Okubona Bwinja Akasi ka Yesu.”)

⁵ Akaba rhusimire rhugwarhe obunvikane na Yehova rhukwanene kuba bera ba Yesu. Bulagurhe obola b’obukweri? Waza chiro ahubwe ku mpanvu ebiri zonyine. Ey’oburhanzi, Yesu alibwirire abanafunzi bage ntya: “Darha yewe yenyine abaherhe k’obuzigire, bulala mwangwarhire k’obuzigire.” (Yoh. 16:27) Ashuba kuderha: “Intaye w’akayinja emwa Darha buzira kungererako.” (Yoh. 14:6) Okulonza kuba mwira wa Yehova buzira kukola obwira bukomere na Yesu, kuli nka kulonza kuyumbaka enju buzira mulyango. Yesu alikoleseze omufano guli nk’ogola, amango aliri achifasiriya nka “mulyango gw’entama.” (Yoh. 10:7) Empanvu ya kabiri, okuba Yesu aliyerekene engeso z’Eshe loshi-loshi. Abwira entumwa ntya: “Owambwene eyi anabwene Darha naye.” (Yoh. 14:9) Che chirhumire enjira nyinja y’okumenya Yehova kuli kuyiga akalamo ka Yesu. Oku rhuli rhwayiga kuyerekera Yesu, kun’obuzigire bwerhu kuye bwanakula. Oku rhuli rhwagenderera  kugwarha obwira na Yesu kun’obuzigire bwerhu kw’Eshe bwanakomera.

6. Yindi mpanvu ehe erhumire rhukwanene rhugwarhe obunvikane ne Yesu? Ofasiriye.

⁶ Rhukwanene rhuyunvikane na Yesu y’amasala merhu mashubizwa. Echola chirhuhemere binene ahali h’okufa hanza rhwaderha omu masala merhu mpu “omu zino lya Yesu” owamenya mpu kasimu konyine. Rhukwanene rhumenye okuntu Yehova anakolesa Yesu omu kushubiza oku masala merhu. Yesu alibwirire entumwa ntya: “Buli choshi mwakahema omuzino lyani, inji nachikola.” (Yoh. 14:13) Chiro akaba oku Yehova yenayunviriza amasala merhu n’okumashubiza ko, ahere Yesu oburhwali b’okuyeneza emihigo yage. (Mt. 28:18) Nantyo, embere Mungu ashubize oku masala merhu, analola akaba kweri rhunakenga empanulo Yesu ahanaga. Omufano, Yesu aliderhere ntya: “Akaba munababalira abandi ebyaha byabo, Yisho w’embingu naye abababalira; aliko akaba murhababalira abantu ebyaha byabo, na Yisho w’embingu arhakababalira ebyaha byenyu.” (Mt. 6:14, 15) Obwene kangana gurhe bili by’akamaro okujirira abandi nk’oku Yehova na Yesu banarhujirira!

7. Bande nji bayunguka n’enterekero y’enchungu ya Yesu?

⁷ Balala baherhe obwira bukomere na Yesu bonyine bakayunguka n’enterekero y’enchungu. Bichi birhuyerekere ntyo? Yesu aliderhere oku “akahanire akalamo kage ku bera bage.” (Yoh. 15:13) Abantu baliri bakolera Yehova balilamire embere Yesu ayinje oku gulu nabo nji bayiga eju yage n’okumusima. Abalume n’abakazi bali nka Abrahamu, Sara, Musa, na Rahabu nji bafuka, aliko abo bakozi ba Yehova b’okunali nji baba eyi bakenere okujira obwira na Yesu yi bagwarha akalamo k’esiku n’amango.​—Yoh. 17:3; Mdo. 24:15; Ebr. 11:8-12, 24-26, 31.

8-9. Nk’oku olwandiko lwa Yohana 15:4, 5 lufasiriye, bichi obunvikane bwerhu na Yesu bwakarhuma rhwagala kujira, na bulagurhe bili by’akamaro?

⁸ Rhuherhe obusime b’okukola haguma na Yesu omu kasi k’okuhubiri n’okuyigiriza emyazi minja y’Obwami. Amango Yesu aliri oku gulu, aliri mwalimu. Na kurhenga agalukire embingu, Yesu, yewe nka rhwe ly’echibaga, agenderere kuyerekeza akasi k’okuhubiri n’okuyigiriza. Anabona n’okusima bwenene obushiru boshi onajira y’orhabala bantu banene okwawe koshi, bamumenye bamenye n’Eshe. Kweri, enjira nguma yonyine y’okugala kuyeneza akala kasi kuli kurhabalwa na Yehova na Yesu.​—Osome Yohana 15:4, 5.

⁹ Echinwa cha Mungu chiyigirize omu bulyo bugalagere, oku yirhugala kusimisa Yehova rhukwanene rhugenderere kugwarha obuzigire ku Yesu. Che chirhumire leka rhulole bintu bine rhwakajira yirhuba bera ba Yesu.

10. Ntambu ehe y’oburhanzi rhukwanene kujira omu kukola obwira na Yesu?

¹⁰ (1) Ochihangane omenye Yesu. Rhwakagala kujira ntyo omu kusoma echitabu cha Matayo, Marko, Luka, na Yohana. Amango rhuli rhwawaza oku ngani ze Biblia ziderhere akalamo ka Yesu, rhwanazinda rhwanasima n’okukenga Yesu bwenene eju y’okuntu aliri akolera abantu omu bulyo bukwirire. Omufano, chiro akaba oku aliri n’Ahamwabo, arhaliri arhola abanafunzi bage nka baja. S’ahubwe ahanza ababwira ebi awazize byoshi n’okuntu achiyunvirhe. (Yoh. 15:15) Amango baliri bachiyunva bagayire Yesu  naye anachiyunva kubi. (Yoh. 11:32-36) Chiro n’abashombanyi bage baliyemerere oku aba mwira wa balala banayemera oburhumwa bwage. (Mt. 11:19) Amango rhwamayiganya obulyo Yesu aliri ajirira abanafunzi bage, obunvikane bwerhu n’abandi bwanayushuka, rhwanayunva rhutoshekere n’okusima bwenene, obuzigire n’obukenge bwerhu kuye bwanaluga.

11. Ntambu ehe ya kabiri eyerekere okujira obwira na Yesu, na bulagurhe eli ntambu y’akamaro?

¹¹ (2) Oyiganye emiwazize n’emikolere ya Yesu. Oku rhuli rhwagenderera kumenya n’okuyiganya obulyo bwa Yesu b’okuwaza, kun’obwira bwerhu haguma naye bwanakomera. (1 Ko. 2:16) Gurhe rhwakayiganya Yesu? Ba nka wawaza k’ogula mufano; Yesu aliri awaza bwenene okuntu akarhabala abandi kulusha okuntu akachisimisa. (Mt. 20:28; Ro. 15:1-3) Bulala aliherhe obola bwenge buli ntyo, achihana yenyine anababalira. Arhaliri agayira busha oku bi abantu baliri bamuderhako. (Yoh. 1:46, 47) Arhanaliri akangula abantu amagosa mabo ma mira buli kasanzi. (1 Ti. 1:12-14) Yesu aderha: “Boshi nji bamenya oku muli banafunzi bani​—nka muherhe obuzigire ahakagarhi kenyu mwenyine oku mwenyine.” (Yoh. 13:35) Kuli kwinja ochibaze, “Inandi nakulikira olwiganyo lwa Yesu, omu kujira okwani koshi yi ngwarha omurhula na bene-berhu na bali-berhu si?”

12. Ehe y’entambu ya kasharhu elolere okuba mwira wa Yesu, na gurhe rhwakayijira?

¹² (3) Ogwase bene-babo Kristu. Yesu anabona ebirhuli rhwajira omu kugwasa bene-babo bashigwa-mavurha nka yirhunali rhwabijirira. (Mt. 25:34-40) Enjira y’oburhanzi y’okugwasa abashigwa-mavurha kuli kushangira akasi bali bajira k’okuhubiri Obwami n’okujira abanafunzi nk’oku Yesu anaderhaga. (Mt. 28:19, 20; Mdo. 10:42) Buzira burhabale “bw’ezindi ntama”, bene-babo Kristu bonyine barhakagala kuyeneza akampanye kazibu-zibu k’okuhubiri omu gulu lyoshi, kali kakolwa zene. (Yoh. 10:16) Akaba oli muguma w’omuzindi ntama, amango moshi onakola kw’akala kasi, orhaba eyi oli wayerekana obuzigire bwawe oku bashigwa-mavurha bonyine, si ku na Yesu naye.

13. Gurhe rhwakakolesa empanulo ya Yesu eli omu Luka 16:9?

¹³ Rhunashuba kujira obwira na Yehova na Yesu omu kukolesa ebirugu byerhu omu kurhabala oku kasi bali bayerekeza. (Osome Luka 16:9.) Omufano, Rhwakashololera akasi k’omugulu lyoshi kahirirwe m’okuhana efuranga z’okugendereza akasi k’okuhubiri entambi za hale-hale, okuyumbaka n’okukwiza byoshi rhunakolesa omu kugwasa obuharamye b’okuli, n’okuha abagererwe n’obuhanya ebintu by’engenzi. Rhwakagwasa kandi oku bulagirire bw’efuranga omu chibaga cherhu, n’okurhabala abantu bali omu bulagirire. (Mez. 19:17) Z’enjira ezola rhwakagwasa mu bene-babo Kristu.

14. Nk’oku biyerekenwe omu Waefeso 4:15, 16, ntambu ehe ya kane elolere okujira obwira na Yesu?

¹⁴ (4) Ogwase oku mihigo y’olubaga lw’Echikristu. Rhunakomeza obuguma bwerhu na Yesu nka rhwe ly’olubaga amango rhwamakola bwinja haguma n’abashimikire barhulwe ko. (Osome Waefeso 4:15, 16.) Omufano, mu manola mango rhuli rhwachihangana kulola akaba Amachumbi m’Obwami moshi yimanakoleswa nk’okubihemere. Eju y’echola, hali ebibaga byachangirwe haguma n’ebindi, n’embibi z’eneo zabo zagerwamo. Echola charhumire olubaga lwagala kuteneza efuranga zinene z’enshololo. Aliko omu kujira ntyo, byachigombere ehali ya bahubiri  banene ehindamuke. Abola bahubiri bimana bakaba eyi bakolere omu chibaga chilebe oku myaka minene, n’okukomerana na bene-berhu na bali-berhu bamo bwenene. Aliko sasa banababwira oku baje kukolera omu chindi chibaga. Binasimisa Yesu bwenene okubona gurhe abola banafunzi baherhe obwemere banali bimana, banayemera eyola mipango!

15. Gurhe obwira bwerhu na Yesu nji bwakomera bwenene amango mayinjire?

¹⁵ Balala bashigirwe amavurha n’eroho lichesibwa baherhe obunihire b’okuba na Yesu esiku zoshi, eyi bali barhambula haguma naye omu Bwami bwa Mungu. Kweri nji baba na Kristu, eyi bali bamubona, baderha naye, n’okugeza ebisanzi haguma naye. (Yoh. 14:2, 3) Abaherhe obunihire b’okulama oku gulu nabo nji bayunguka n’obuzigire n’okuntu Yesu nji abalaga ko. Chiro akaba oku nji barhamubona ko, obuzigire bwabo ku Yesu nji bwakomera oku bali bagenderera kusimira akalamo Yehova na Yesu nji babarhabala bagwarhe.​—Isa. 9:6, 7.

16. Migisho ehe rhwakapata omu kujira obwira na Yesu?

¹⁶ Amango rhwamayemera empamagalo ya Yesu y’okuba bera bage, rhwanapata emigisho kamama. Omufano, rhwabona obuzigire bwage, nagurhe ali arhurhabala mu manola mango. Rhwanahabwa obulenga-njira b’okulama esiku n’amango. N’ech’engezi bwenene, obwira bwerhu na Kristu bwarhuyerekeza oku buhirhi bw’akamaro kulusha boshi, k’okuderha obwira bukomere bwa buli muguma werhu haguma na Yehova, Eshe wa Yesu. Orhabwene oku luli lukengo lunene bwenene rhuherhe okuyirikwa bera ba Yesu si?