1. Paano mo mangin abyan ang isa ka tawo?

PARA mangin abyan mo ang isa ka tawo, dapat makaupod mo sia. Samtang nagaistoryahanay kamo parte sa inyo ginahunahuna kag ginabatyag, nagasuod gid kamo. Pero indi mahapos kon kaisa nga mangin suod kay Jesus. Ngaa?

2. Ano ang una nga rason kon ngaa indi mahapos mangin abyan ni Jesus?

² Ang una nga rason amo nga wala naton makilala sing personal si Jesus. Amo sini ang kahimtangan sang madamo nga Cristiano sang unang siglo. Pero nagsiling si apostol Pedro: “Bisan pa wala gid ninyo sia makita, ginahigugma ninyo sia. Bisan pa sa karon wala ninyo sia makita, apang nagatuo kamo sa iya.” (1 Ped. 1:8) Gani puede kita mangin abyan ni Jesus bisan pa wala naton sia makilala sing personal.

3. Ano ang ikaduha nga rason kon ngaa indi mahapos mangin abyan ni Jesus?

³ Ang ikaduha nga rason amo nga indi naton maistorya si Jesus. Kon nagapangamuyo kita, si Jehova ang aton ginaistorya. Nagapangamuyo kita sa ngalan ni Jesus, pero wala kita nagaistorya sa iya. Ang matuod, indi gusto ni Jesus nga mangamuyo kita sa iya. Ngaa? Bangod ang pangamuyo isa ka paagi sang pagsimba, kag si Jehova lang ang dapat naton simbahon. (Mat. 4:10) Pero puede naton mapakita nga palangga naton si Jesus.

4. Ano ang ikatlo nga rason, kag ano ang binagbinagon naton sa sini nga artikulo?

⁴ Ang ikatlo nga rason amo nga si Jesus ara sa langit, gani indi naton sia makaupod. Pero madamo kita gihapon sang mabal-an  parte kay Jesus bisan pa indi naton sia kaupod. Binagbinagon naton ang apat nga puede naton himuon para mangin abyan niya kita. Pero hibaluon anay naton kon ngaa dapat kita mangin abyan sang Cristo.

5. Ngaa dapat kita mangin abyan ni Jesus? (Tan-awa man ang mga kahon nga “ Kon Abyan Kita ni Jesus, Mangin Abyan Man Kita ni Jehova” kag “ Husto nga Pagkilala kay Jesus.”)

⁵ Dapat kita mangin abyan ni Jesus kon gusto naton mangin abyan ni Jehova. Ngaa? Binagbinaga ang duha ka rason. Una, nagsiling si Jesus sa iya mga disipulo: “Ginahigugma kamo sang Amay, bangod ginahigugma ninyo ako.” (Juan 16:27) Nagsiling man sia: “Wala sing makakadto sa Amay kon indi paagi sa akon.” (Juan 14:6) Kon gusto naton nga mangin abyan ni Jehova pero indi kita abyan ni Jesus, daw pareho lang nga gusto naton nga magsulod sa isa ka bilding pero indi paagi sa puertahan. Gingamit ni Jesus ang pareho sa sini nga ilustrasyon sang ginsiling niya nga sia “ang puertahan para sa mga karnero.” (Juan 10:7) Ikaduha, gin-ilog ni Jesus sing perpekto ang mga kinaiya sang iya Amay. Nagsiling sia sa iya mga disipulo: “Ang bisan sin-o nga nakakita sa akon nakakita man sa Amay.” (Juan 14:9) Gani ang importante nga paagi para makilala naton si Jehova amo ang pagtuon parte sa kabuhi ni Jesus. Kon madamo kita sang mabal-an parte kay Jesus, palanggaon pa gid naton sia. Kag kon palangga gid naton si Jesus, palanggaon pa gid naton ang iya Amay.

6. Ano pa ang rason kon ngaa dapat kita mangin abyan ni Jesus? Ipaathag.

⁶ Dapat kita mangin abyan ni Jesus para sabton ang aton mga pangamuyo. Indi buot silingon sini nga maghambal lang kita sing “sa  ngalan ni Jesus” sa katapusan sang aton pangamuyo. Dapat nahangpan naton kon paano ginagamit ni Jehova si Jesus sa pagsabat sa aton mga pangamuyo. Nagsiling si Jesus sa mga apostoles: “Bisan ano ang pangayuon ninyo sa akon ngalan, ihatag ko ini.” (Juan 14:13) Si Jehova ang nagapamati kag nagasabat sa aton mga pangamuyo, pero ginhatagan niya si Jesus sang awtoridad para matuman ang Iya mga desisyon. (Mat. 28:18) Gani antes sabton sang Dios ang aton mga pangamuyo, makita niya kon ginsunod naton ang laygay ni Jesus. Halimbawa, nagsiling si Jesus: “Kon ginapatawad ninyo ang mga nakasala sa inyo, patawaron man kamo sang inyo langitnon nga Amay; apang kon wala ninyo ginapatawad ang mga nakasala sa inyo, indi man kamo pagpatawaron sang inyo Amay sa inyo mga sala.” (Mat. 6:14, 15) Gani dapat gid naton pakitaan ang iban sang kaayo pareho sang ginapakita sa aton ni Jehova kag ni Jesus!

7. Sin-o ang makabenepisyo sa halad-gawad ni Jesus?

⁷ Ang mga abyan lang ni Jesus ang makabenepisyo sa iya halad-gawad. Ngaa masiling naton ini? Nagsiling si Jesus nga ‘ihatag niya ang iya kabuhi para sa iya mga abyan.’ (Juan 15:13) Ang mga nag-alagad kay Jehova antes pa nangin tawo si Jesus sa duta dapat magtuon parte sa iya kag palanggaon sia. Ang mga alagad ni Jehova nga pagabanhawon pareho nanday Abraham, Sara, Moises, kag Rahab dapat man mangin abyan ni Jesus para mabuhi sila sing wala sing katapusan.—Juan 17:3; Binu. 24:15; Heb. 11:8-12, 24-26, 31.

8-9. Suno sa Juan 15:4, 5, ano ang mahimo naton kon abyan kita ni Jesus, kag ngaa dapat kita magpabilin nga nahiusa kay Jesus?

⁸ Nalipay kita nga kaupod naton si Jesus sa pagbantala kag pagtudlo sang maayong balita sang Ginharian. Nagpanudlo si Jesus sang ari pa sia sa duta. Kag sugod sang magbalik si Jesus sa langit, padayon niya nga ginadumalahan ang pagbantala kag pagtudlo bilang ulo sang kongregasyon. Makita kag ginapabaloran niya ang imo pagpanikasog nga buligan ang madamo nga tawo nga makilala sia kag ang iya Amay. Ang matuod, mahimo lang naton ini nga hilikuton paagi sa bulig ni Jehova kag ni Jesus.—Basaha ang Juan 15:4, 5.

⁹ Maathag nga ginatudlo sang Pulong sang Dios nga dapat naton palanggaon si Jesus kag padayon ini nga himuon para malipay sa aton si Jehova. Gani binagbinagon naton ang apat nga puede naton himuon para mangin abyan kita ni Jesus.

10. Ano ang una nga dapat naton himuon para mangin abyan kita ni Jesus?

¹⁰ (1) Kilalaha si Jesus. Makilala naton sia kon basahon naton ang mga libro sa Biblia nga Mateo, Marcos, Lucas, kag Juan. Kon pamalandungan naton ang mga kasaysayan sa Biblia parte sa kabuhi ni Jesus, magatubo ang aton gugma kag pagtahod kay Jesus bangod sang kaayo nga ginpakita niya sa mga tawo. Halimbawa, wala niya ginkabig nga mga ulipon ang iya mga disipulo bisan pa Agalon nila sia. Sa baylo, ginsugid niya sa ila ang iya ginahunahuna kag ginabatyag. (Juan 15:15) Sang nasubuan sila kag naghibi, nasubuan man sia kag naghibi. (Juan 11:32-36) Bisan ang iya mga kaaway nagsiling nga nangin abyan niya ang mga nagbaton sang iya mensahe. (Mat. 11:19) Kon ilugon naton ang ginhimo ni Jesus sa iya mga disipulo, mangin maayo ang kaangtanan naton sa iban kag mangin mas malipayon kita. Dayon, magabakod pa gid ang aton gugma kag mangin tudok pa gid ang aton pagtahod sa iya.

11. Ano ang ikaduha nga dapat naton himuon para mangin abyan kita ni Jesus, kag ngaa importante ini?

 ¹¹ (2) Iluga ang panghunahuna kag ginhimo ni Jesus. Kon nabal-an naton ang iya panghunahuna kag ginailog naton ini, mas magasuod pa gid kita sa iya. (1 Cor. 2:16) Paano naton mailog si Jesus? Binagbinaga ang isa ka halimbawa. Mas importante kay Jesus ang pagbulig sa iban sangsa unahon ang iya kaugalingon. (Mat. 20:28; Roma 15:1-3) Gani handa sia magsakripisyo kag magpatawad. Indi sia madali masaklaw sa ginasiling sang iban nga tawo parte sa iya. (Juan 1:46, 47) Kag wala niya ginatamod ang isa ka tawo base sa sala nga madugay na nga nahimo sini nga tawo. (1 Tim. 1:12-14) Nagsiling si Jesus: “Mahibaluan sang tanan nga mga disipulo ko kamo, kon nagahigugmaanay kamo.” (Juan 13:35) Pamangkuton naton ang aton kaugalingon, “Ginasunod ko bala ang halimbawa ni Jesus paagi sa paghimo sang akon bug-os nga masarangan nga makighidait sa akon mga kauturan?”

12. Ano ang ikatlo nga dapat naton himuon para mangin abyan kita ni Jesus, kag paano naton ini mahimo?

¹² (3) Sakdaga ang mga utod sang Cristo. Kon ginasakdag naton ang hinaplas nga mga utod ni Jesus, ginatamod niya ini nga ginahimo naton para sa iya. (Mat. 25:34-40) Ang pinakaimportante nga paagi nga masakdag naton ang mga hinaplas amo ang paghimo sang aton bug-os nga masarangan sa pagbantala kag pagtudlo sa mga tawo, nga ginsugo ni Jesus nga himuon naton. (Mat. 28:19, 20; Binu. 10:42) Subong, nahimo sang mga utod sang Cristo ang pagbantala sa bilog nga kalibutan paagi sa bulig sang “iban nga mga karnero.” (Juan 10:16) Kon bahin ka sang iban nga mga karnero, ginapakita mo ang imo gugma sa mga utod sang Cristo kag kay Jesus sa kada tion nga nagabantala ka.

13. Paano naton masunod ang laygay ni Jesus sa Lucas 16:9?

¹³ Nagapakig-abyan man kita kay Jehova kag kay Jesus paagi sa pag-amot sang kuarta para suportahan ang hilikuton nga ila ginadumalahan. (Basaha ang Lucas 16:9.) Halimbawa, makahatag kita sang donasyon para sa bug-os kalibutan nga hilikuton, nga ginagamit para masuportahan ang pagbantala sang maayong balita sa malayo nga mga lugar, ang pagpatindog kag pagmentinar sang mga Kingdom Hall kag iban pa nga mga pasilidad, kag ang pagbulig sa mga nahalitan sang kalamidad ukon trahedya. Makahatag man kita sang donasyon para sa mga galastuhan sang aton kongregasyon kag para sa mga nabal-an naton nga nagakinahanglan sang bulig. (Hulu. 19:17) Paagi sa sini, masakdag naton ang mga utod sang Cristo.

14. Suno sa Efeso 4:15, 16, ano ang ikap-at nga dapat naton himuon para mangin abyan kita ni Jesus?

¹⁴ (4) Sakdaga ang mga hilikuton sa Cristianong kongregasyon. Mangin suod pa gid kita kay Jesus nga ulo sang kongregasyon kon nagakooperar kita sa mga gintangdo sa pag-atipan sa aton. (Basaha ang Efeso 4:15, 16.) Halimbawa, ginasigurado naton nga magamit sa pinakamaayo nga paagi ang tanan nga Kingdom Hall. Gani may mga kongregasyon nga gintingob para mangin isa na lang ka kongregasyon kag gin-adjust ang mga teritoryo sang mga kongregasyon. Paagi sa sini, daku ang nakinot sa kuarta nga gin-amot sa organisasyon. Pero dapat man mag-adjust ang pila ka manugbantala sa sini nga mga pagbag-o. Mahimo nga madugay na nga nagaalagad sa isa ka kongregasyon ining matutom nga mga manugbantala kag suod  gid sila sa mga kauturan didto. Pero ginpangabay sila nga magsaylo sa lain nga kongregasyon. Nalipay gid si Jesus nga makita nga nagakooperar gid ining matutom nga mga disipulo!

15. Ano ang matabo sa aton pagpakig-abyan kay Jesus sa palaabuton?

¹⁵ Ang mga ginhaplasan sang balaan nga espiritu magagahom kaupod ni Jesus sa Ginharian sang Dios. Nagalaum sila nga mangin kaupod sang Cristo sing wala sing katapusan. Personal nila sia nga makita, maistorya, kag makaupod. (Juan 14:2, 3) Ang mga nagalaum nga mabuhi sing wala sing katapusan sa duta palanggaon man kag atipanon ni Jesus. Bisan pa indi nila makita si Jesus, magasuod pa gid sila sa iya kon maeksperiensiahan na nila ang kabuhi nga ginpaposible ni Jehova kag ni Jesus para sa ila.—Isa. 9:6, 7.

16. Ano nga mga pagpakamaayo ang mabaton naton kon abyan kita ni Jesus?

¹⁶ Madamo nga pagpakamaayo ang mabaton naton kon abyan kita ni Jesus. Halimbawa, ginapalangga niya kita kag ginabuligan subong. May paglaum kita nga mabuhi sing wala sing katapusan. Labaw sa tanan, kon abyan kita ni Jesus, mangin abyan man kita sang iya Amay nga si Jehova, kag amo ini ang pinakahamili nga pagpakig-abyan nga maeksperiensiahan naton. Gani isa gid ka kadungganan nga tawgon kita nga mga abyan ni Jesus!