1. Edena bamona emu hetura karana ma ta ida oi hagoadaia diba?

MA TA IDA emu hetura karana ia goada totona, gau ginigunana be nega oi atoa unai tauna oi bamoa. Umui ta ta dekenai emui lalohadai bona hemami umui herevalaia neganai, umui be tura namodia ai do umui lao. To, nega haida ita davaria hekwakwanai dainai ia auka iseda hetura karana Iesu ida ita hagoadaia totona. Unai hekwakwanai haida be dahaka?

2. Ita davaria hekwakwanai ginigunana be dahaka?

² Hekwakwanai ginigunana be, ita be Iesu ita do hedavari henia lasi. Aposetolo taudia edia negai, Keristani taudia haida danu be unai bamona hekwakwanai idia davaria. To, aposetolo Petero ia gwau: “Ena be nega ta Keriso umui itaia lasi, to ia umui lalokau henia. Bona ena be hari ia umui itaia lasi, to ia umui abidadama henia.” (1 Pet. 1:8) Unai dainai ena be Iesu ita hedavari henia lasi, to dala ia noho iena turana ai ita lao totona.

3. Ita davaria hekwakwanai iharuana be dahaka?

³ Hekwakwanai iharuana be, Iesu ita hereva henia diba lasi. Ita guriguri neganai, ita be Iehova ita hereva henia. Momokani, ena be Iesu ena ladana ai ita guriguri, to ia ita hereva henia lasi. Oibe, Iesu ia ura lasi ia ita guriguri henia. Dahaka dainai?  Badina guriguri be tomadiho karana ta, bona Iehova sibona ita tomadiho henia be namo. (Mat. 4:10) To, Iesu ita lalokau henia diba.

4. Ita davaria hekwakwanai ihatoina be dahaka, bona inai atikol ai dahaka do ita herevalaia?

⁴ Hekwakwanai ihatoina be, Iesu be guba dekenai ia noho, unai dainai ia ida ita noho diba lasi. To, Iesu ita dibaia diba herevana ita be ia kahirakahira ita noho lasi. Iseda hetura karana Iesu ida ia hagoadaia diba gaudia foa do ita riviulaia. Ginigunana, mani ita itaia dahaka dainai iseda hetura karana Keriso ida ita hagoadaia be namo.

5. Dahaka dainai Iesu ena turana ai ita lao? (Maua ladana, “Iesu Ena Turana ai Ita Lao Neganai Iehova Ita Tura Henia Diba” bona “Iesu Ena Gaukara Ita Laloa Namonamo” oi itaia.)

⁵ Namona be Iesu ena turana ai ita lao bema ita ura Iehova ida hetura karana namona ita moalelaia. Dahaka dainai unai be momokani? Mani badina rua oi laloa. Ginigunana, Iesu ese ena hahediba taudia ia hamaoroa: “Tamana be umui ia ura henia bada, badina umui ese lau umui ura henia bada.” (Ioa. 16:27) Ma ia gwau: “Tau ta be Tamana dekenai ia mai diba lasi, to lau sibona amo.” (Ioa. 14:6) Bema oi ura Iehova ena turana ai lao, to Iesu oi tura henia lasi, unai be hegeregere bildin ta ai oi ura vareai, to iduara oi gaukaralaia lasi. Iesu be unai bamona haheitalai ta ia gaukaralaia unai amo sibona ia gwauraia “mamoe edia iduara.” (Ioa. 10:7) Badina iharuana be, Iesu ese ena Tamana ena kara ia hahedinaraia goevagoeva. Ia ese ena hahediba taudia ia hamaoroa: “Lau ia itaia tauna be Tamana danu ia itaia vadaeni.” (Ioa. 14:9) Mai anina bada gauna be Iehova ita dibaia totona Iesu ena mauri dalana ita stadilaia be  namo. Iesu ena mauri dalana ita dibaia neganai, iseda lalokau ia dekenai do ia goada ia lao. Bona iseda hetura karana Iesu ida ia goada neganai, iena Tamana do ita lalokau henia bada.

6. Dahaka badina ma ta dainai Iesu ita tura henia be namo? Herevalaia.

⁶ Namona be Iesu ena turana ai ita lao, unai amo iseda guriguri ena haere do ita abia. Anina be iseda guriguri ena dokona ai, inai hereva “Iesu ena ladana ai” ita gwauraia sibona be hegeregere lasi. Namona be Iehova ese Iesu amo iseda guriguri ia haerelaia dalana ita lalopararalaia. Iesu ese ena aposetolo taudia ia hamaoroa: “Herevana egu ladanai dahaka umui noia, do lau karaia.” (Ioa. 14:13) Ena be Iehova ese iseda guriguri ia kamonai henia bona ia haerelaia, to Iesu dekenai siahu ia henia Iena ura ia hagugurua totona. (Mat. 28:18) Unai dainai Dirava ese iseda guriguri ia do haerelaia lasi neganai, ia itaia bema Iesu ia henia sisiba ita badinaia noho. Hegeregere, Iesu ia gwau: “Bema taunimanima edia dika umui gwauatao, emui guba Tamana ese emui kerere danu do ia gwauatao, to bema taunimanima edia dika umui gwauatao lasi, emui guba Tamana ese emui dika danu do ia gwauatao lasi.” (Mat. 6:14, 15) Unai dainai gau badana be Iehova bona Iesu ese ita idia kara henia hegeregerena ma haida ita kara henia!

7. Daidia be Iesu ena mauri davalaia boubouna amo namo do idia abia?

⁷ Iesu ida hetura karana namona idia moalelaia taudia sibona be iena mauri davalaia boubouna amo namo do idia abia. Edena dala ai unai ita diba? Iesu ia gwau ia be “ena turadia totona ena mauri ia atoa diho.” (Ioa. 15:13) Iesu be tanobada dekenai ia do mai lasi neganai idia noho abidadama taudia be ia idia dibaia bona idia lalokau henia be namo. Idia haida hegeregere Aberahamo, Sara, Mose, bona Rahaba be do idia toreisi lou, to idia ese Iesu idia tura henia be namo, unai amo mauri hanaihanai idia abia.​—Ioa. 17:3; Kara 24:15; Heb. 11:8-12, 24-26, 31.

8-9. Ioane 15:4, 5 ena hereva bamona, Iesu tura henia karana ese ita ia durua dahaka ita karaia, bona dahaka dainai unai be mai anina bada?

⁸ Ita moale bada badina Iesu ida Basileia ena sivarai namona harorolaia bona hadibaia gaukarana ita karaia. Iesu be tanobada ai ia noho neganai ia be hahediba tauna. Bona Iesu, kongrigeisen ena kwarana, be guba dekenai ia giroa lou negana amo, haroro bona hahediba gaukarana ia gunalaia noho. Iesu ia moale bada bema ia itaia oi be momo oi durua ia bona ena Tamana idia dibaia totona. Momokani, unai gaukara ita hagugurua totona, Iehova bona Iesu edia heduru ita abia be namo.​—Ioane 15:4, 5 duahia.

⁹ Dirava ena Hereva ese ita ia hadibaia, Iehova ena lalonamo ita abia totona, Iesu ita lalokau henia noho be namo. Unai dainai Iesu ena turadia ai ita lao totona, do ita karaia gaudia foa mani ita herevalaia.

10. Iesu ena turana ai ita lao totona, ita karaia gauna ginigunana be dahaka?

¹⁰ (1) Iesu oi dibaia namonamo. Unai ita karaia totona, Baibel bukadia Mataio, Mareko, Luka, bona Ioane ita duahia be namo. Iesu ena mauri idia herevalaia Baibel sivarai ita laloa dobu neganai, ia do ita lalokau henia bona matauraia badina taunimanima ia kara namo henia. Hegeregere, ena be Iesu be ena hahediba taudia edia Biaguna, to idia be igui hesiai taudia bamona ia kara henidia lasi. Idia dekenai ena lalohadai bona hemami ia herevalaia. (Ioa. 15:15) Iesu be edia hisihisi ia  mamia bona idia ida ia tai. (Ioa. 11:32-36) Danu, ena inai taudia idia itaia Iesu ena hereva idia abia dae taudia be ena turana ai idia lao. (Mat. 11:19) Iesu ese ena hahediba taudia ia kara henidia bamona ita kara neganai, iseda hetura karana ma haida ida do ia goada, do ita moale, bona Keriso do ita lalokau henia bona matauraia bada.

11. Iesu ena turana ai ita lao totona, ita karaia gauna iharuana be dahaka, bona dahaka dainai ia be mai anina bada?

¹¹ (2) Iesu ena laloa dalana bona ena kara oi tohotohoa. Iesu ena laloa dalana ita dibaia bona ita badinaia neganai, iseda hetura karana ia ida do ita hagoadaia diba. (1 Kor. 2:16) Edena dala ai Iesu ita tohotohoa diba? Mani inai haheitalai oi laloa. Iesu be ma haida durua karana ia laloa bada to sibona ena namo ia laloa lasi. (Mat. 20:28; Roma 15:1-3) Ia be unai bamona laloa dalana ia badinaia dainai, sibona ena ura ia dadaraia bona ma haida edia dika ia gwauatao. Taunimanima ese ia dekenai idia gwauraia herevadia dainai ia lalohisihisi lasi. (Ioa. 1:46, 47) Danu, taunimanima ia kara namo henidia bona edia kara gunadia ia laloa lasi. (1 Tim. 1:12-14) Iesu ia gwau: “Taunimanima ibounai do idia diba umui be egu hahediba taudia, bema umui huanai lalokau ia noho.” (Ioa. 13:35) Namona be sibona oi nanadaia, “Lau be Iesu bamona egu tadikaka bona taihu ida maino lau karaia, a?”

12. Iesu ena turana ai ita lao totona, ita karaia gauna ihatoina be dahaka, bona edena bamona unai ita karaia diba?

¹² (3) Keriso ena tadikaka oi durua. Iesu be ena horoa tadikaka totona ita karaia gaudia ia laloa bada, unai be ia dekenai ita karaia bamona ia laloa. (Mat. 25:34-40) Horoa taudia ita durua dala badana ta be, Iesu ese ena murinai idia raka taudia dekenai ia henia Basileia harorolaia bona hahediba taudia halaoa gaukarana ita durua. (Mat. 28:19, 20; Kara 10:42) Momokani, “mamoe ma haida” edia heduru dainai hari, Keriso ena tadikaka ese tanobada hegegemadai haroro gaukarana idia hagugurua diba. (Ioa. 10:16) Bema oi be unai mamoe oreana amo, haroro gaukara oi karaia negadia ta ta ai horoa taudia sibona lasi, to Iesu dekenai emu lalokau oi hahedinaraia noho.

13. Edena dala ai Iesu ena sisiba Luka 16:9 ai ita badinaia diba?

¹³ Danu, Iehova bona Iesu ese idia gunalaia noho gaukarana durua totona iseda moni bona kohu ita henia neganai, ita be edia turana ai ita lao. (Luka 16:9 duahia.) Hegeregere, tanobada hegegemadai gaukarana durua totona kontribiusen ita henia diba, unai amo daudau gabudia (isolated areas) dekenai sivarai namona harorolaia gaukarana idia durua, Kingdom Hall bona bildin ma haida idia haginia bona hanamoa, bona disasta idia vara gabudia ai heduru idia henia. Danu, kontribiusen ita henia diba iseda kongrigeisen bona idia dabu taudia ma haida ita durua totona. (Aon. 19:17) Unai dala haida amo Keriso ena tadikaka ita durua diba.

14. Efeso 4:15, 16 ese ia hahedinaraia bamona, Iesu ena turana ai ita lao totona, ita karaia gauna namba foa be dahaka?

¹⁴ (4) Keristani kongrigeisen ena heau dalana oi durua. Iesu, kongrigeisen ena kwarana, ida iseda hetura karana ita hagoadaia diba bema ita idia gunalaia taudia edia hakaua dalana ita badinaia. (Efeso 4:15, 16 duahia.) Hegeregere, hari ita ura Kingdom Hall ibounai ita gaukaralaia namonamo. Unai ia vara totona, kongrigeisen haida be kongrigeisen ma haida ida idia hatamonaia bona teritori haida ai senisi idia karaia. Unai dala amo, Iehova ena orea ese kontribiusen idia gaukaralaia  namonamo. To unai ia vara dainai, pablisa haida ese edia noho dalana idia haidaua. Unai pablisa haida be reana lagani momo lalonai kongrigeisen ta idia bamoa bona unuseniai idia noho tadikaka taihu edia hebamo karana idia moalelaia. To hari idia noidia kongrigeisen ma ta dekenai idia lao totona. Iesu ia moale bada badina ia itaia unai abidadama hahediba taudia be mai edia ura ida unai dala matamata idia badinaia!

15. Edena dala ai vaira negai, Iesu ida hetura karana namona do ita moalelaia?

¹⁵ Lauma helaga amo idia horoa taudia be Iesu ida do idia noho hanaihanai, bona Dirava ena Basileia lalonai do idia lohia. Idia be Keriso ida do idia noho​—ia do idia itaia, do idia hereva henia, bona do idia bamoa. (Ioa. 14:2, 3) Tanobada helarona idia abia taudia danu be Iesu ese do ia lalokau henia bona laloa bada. Herevana Iesu do idia itaia lasi, to iena tura namodia ai do idia lao, badina Iehova bona Iesu ese idia henia mauri namona do idia moalelaia.​—Isa. 9:6, 7.

16. Iesu ena turana ai ita lao neganai, dahaka hahenamo ita abia?

¹⁶ Iesu ena turadia ai ita lao neganai hahenamo momo do ita davaria. Hegeregere, hari iena lalokau bona heduru amo namo ita davaria. Danu, dala ia kehoa mauri hanaihanai ita abia totona. Bona mai anina bada gauna be inai, Iesu ena turana ai ita lao karana ese dala ia kehoa iena Tamana, Iehova, ena turana ai do ita lao. Ita idia gwauraia Iesu ena turana be hahenamo badana!