1. Kunnasi ka mabbalin tu madukko nga kofun na tanakuan?

MARUDDU nga i ollu nga dakkua tapenu mabbalin tu madukko nga kofun na tanakuan ay i pangiyawa tu tiempo tapenu makavulu yatun nga tolay. Durante nga pabbidannu i nononopan anna mataga-tagenonu, mabbalikkamu tu makkofun. Ngem nu meyannung ta madukko nga pakikkofun kani Jesus, egga ira makefugag nittam. Anni i karuan tatun?

2. Anni i ollu nga makefugag nittam?

² I ollu nga makefugag nittam ay ariattam vuluvuga nasingan si Jesus. Aru nga Cristiano ta ollu-siglo i neparubang ta parehu nga situasion. Maski kunnatun, kinagi ni apostol Pedro: “Ariannu paga nga nasingan si Jesus ngem ayatan nu yaya. Adde sangoye ay arian nu nga nasingan yaya, ngem kurugan nu.” (1 Ped. 1:8) Yatutta posible lagapa nga mabbalin ittam nga madukko nga kofun ni Jesus maski nu ariattam yayya vuluvuga masingan.

3. Anni i mekadua nga makefugag nittam?

³ I mekadua nga makefugag nittam ay ariattam makibbida si Jesus. Nu makimallo ittam, makibbida ittam kani Jehova. Siempre, makimallo ittam ta ngagan ni Jesus, ngem ariattam direkta nga makibbida nisa. Kakuruganna, manaki ni Jesus nga makimallo ittam nisa. Ngatta? Megafu ta tadday nga klase na paddayaw i pakimallo, anna si Jehova laman i mawag nga madayaw. (Mat. 4:10) Maski paga kunnatun, mepasingattam lagapa i aya tam kani Jesus.

4. Anni i mekatallu nga makefugag nittam, anna anni i gigiammuattam taw nga artikulo?

 ⁴ I mekatallu nga makefugag nittam ay egga si Jesus ta langi, yatutta ariattam yayya makavulu. Ngem aru lagapa i mammuattam meyannung kani Jesus maski nu ariattam yayya makavulu. Gigiammuattam i appa nga makua tam tapenu malladda i pakikkofuttam nisa. Ngem ikonsidera tam labbi nu ngatta importante para nittam nga mabbalin tu madukko nga kofun ni Cristo.

5. Ngatta makikkofun ittam kani Jesus? (Innan gapa i kahon nga “ Makikkofukka Kani Jesus Tapenu Mabbalikka nga Kofun ni Jehova” anna i “ Balanse nga Pagimamma ta Papel ni Jesus.”)

⁵ Mawag nga kofuttam si Jesus nu kayà tam nga mapeggan tu makasta nga relasion kani Jehova. Ngatta? Ikonsidera i dua nga rason. Ollu, kinagi ni Jesus ta disipulosna: “I yama mismu ay ayatan nakamu. Ayatan nakamu megafu ta ayatan nù.” (Juan 16:27) Kinagina paga: “Awan tu makangay ta Yama nu ari labbi nga umay niakan.” (Juan 14:6) Nu kayà tam nga mabbalin tu kofun ni Jehova ngem ari ittam nga madukko nga kofun si Jesus, gittana pattallung yatun ta balay nga ariattam iyusa i trangkana. Nangiyusa si Jesus ta parehu nga ilustrasion turi ta dineskribana nga yayya “i trangka nga attallungan na karneru ira.” (Juan 10:7) I mekadua nga rason ay megafu ta perfekto nga naparigan ni Jesus i kualidad ira na Yamana. Kinagina ta disipulosna: “I nakasingan niakan ay nasingan na ngana gapa i Yama.” (Juan 14:9) Tadday gafu ta importante nga dakkua tapenu mammuan si Jehova ay gukaban na paggigiammu ta pattolay ni Jesus. Durante nga magigiammu tam i meyannung kani Jesus, mas dumakal i aya tam nisa. Anna durante nga mas maddukko i  pakikkofuttam kani Jesus, mas maponag i aya tam ta Yamana.

6. Anni i tadday paga nga rason nu ngatta mawag nga makikkofun ittam kani Jesus? Iyesplika.

⁶ Mawag tu kofuttam si Jesus tapenu matabbag i pakimallo tam ira. Ariattam laman vuyatan i “ta ngagan ni Jesus” ta ultimu na pakimallo tam ira. Mawag gapa nga malippawa tam nu kunnasi usu-usan ni Jehova si Jesus ta panabbagna ta pakimallo tam ira. Kinagi ni Jesus ta apostoles: “Kuak-ku i anni laman nga ikiddaw nu ta ngagak-ku.” (Juan 14:13) Maski nu si Jehova i maggigginna anna manabbag ta pakimallo tam ira, niddanna si Jesus tu autoridad tapenu ituppal i desisionna ira. (Mat. 28:18) Yatutta nige tabbagan na Dios i pakimallo tam ira, innanna labbi nu neyaplika tam i tabarang ni Jesus. Angngariganna, kinagi ni Jesus: “Nu pakoman nu i nakaliwa ira nikamu, pakoman nakamu gapa na Yama nu ta langi. Ngem nu arian nu ira nga pakoman, arian nakamu gapa nga pakoman na Yama nu ta katagarulian nu.” (Mat. 6:14, 15) Kuruga importante gafu nga tratuattam i tanakuan kagitta na masippo nga pattratu ni Jehova anna ni Jesus nittam!

7. Sinni i mabbenefisio ta sakrifisio nga tavvu ni Jesus?

⁷ Danuri laman madukko i pakikkofudda kani Jesus i mabbenefisio ta sakrifisiona nga tavvu. Ngatta? Kinagi ni Jesus nga ‘iyawana i inangona megafu ta kakkofunna.’ (Juan 15:13) Danuri nasserbi kani Jehova anna nattolay nige nga minay si Jesus ta davvun ay mawag nga gigiammuadda i meyannung kani Jesus anna ayatadda yayya. Mapaginnolay danatun nga lallaki anna babbay gitta da Abraham, Sara, Moises, anni Rahab, ngem maski danaw nga matunung nga aripan ni Jehova ay mawagda i makikkofun kani Jesus tapenu malada i mannanayun nga inango.​—Juan 17:3; King. 24:15; Heb. 11:8-12, 24-26, 31.

8-9. Kagitta na neyesplika ta Juan 15:4, 5, anni i makua tam nu kofun ittam ni Jesus, anna ngatta pattalupaddianattam yatun nga pakikkofun?

⁸ Magayayya ittam nga makipattrabahu kani Jesus ta pangilayyagayya anna pangituddu ta mapia nga dumug na Pappatulan. Ta kegga ni Jesus ta davvun, nanuddu yayya. Maski nanoli ngana si Jesus ta langi, bilang ulu na kongregasion, nitulu-tuloyna lagapa nga igiya i trabahu nga pallayyagayya anna panuddu. Masingi-singan anna appresian ni Jesus i appursigim nga uffunan i mas aru nga totolay tapenu makannammuadda yayya anna i Yamana. Kakuruganna, metuppal tam laman yaw nga trabahu ta uffun ni Jehova anna ni Jesus.​—Bibbigan i Juan 15:4, 5.

⁹ Manawag nga ituddu na Uvovug na Dios nga mawag nga ayatan anna pattalupaddianattam i aya tam kani Jesus tapenu mapagayayya tam si Jehova. Yatutta ikonsidera tam i appa nga makua tam tapenu mabbalin nga kokkofun ni Jesus.

10. Anni i ollu nga dakkua tapenu mabbalin ittam tu kofun ni Jesus?

¹⁰ (1) Ammuan si Jesus. Makua tam yatun gukaban na pabbibbig ta libru ira na Biblia nga Mateo, Marcos, Lucas, anna Juan. Durante nga monag nga pannonopattam i rekord ira na Biblia ta pattolay ni Jesus, magigiammu tam nga ayatan anna irespeto si Jesus megafu ta masippo nga pinattratuna ta totolay. Angngariganna, maski nu yayya i Yafuda, arianna minammatan i disipulosna bilang aripan. Lallagu, kinagina nira i nononopan anna mataga-tagenona ira. (Juan 15:15) Nakipaddaddam anna nakipattangi yayya nira. (Juan 11:32-36) Rekunnisian maski danuri  kumokkontra kani Jesus nga nabbalin tu kofunna danuri nangalawa ta mensahena. (Mat. 11:19) Nu parigattam i pinattratu ni Jesus ta disipulosna, mas makkasta i relasiottam ta tanakuan, mas kontentu anna magayayya ittam, anna mas dumakal i aya anna respeto tam kani Cristo.

11. Anni i mekadua nga dakkua tapenu mabbalin nga kofun ni Jesus, anna ngatta importante yatun?

¹¹ (2) Mannono anna magguyu kagitta ni Jesus. Nu mas ammu tam i appana-panonona anna paparigattam yatun, mas nga maddukko i pakikkofuttam nisa. (1 Cor. 2:16) Kunnasi tam maparigan si Jesus? Pannonopan i tadday nga angngarigan. Mas nga nononopan ni Jesus i panguffun ta tanakuan anne ta pamagustu ta baggina. (Mat. 20:28; Roma 15:1-3) Megafu ta kunnatun i appana-panonona, minassakrifisio anna minammakoma yayya. Ari insigida nattaki i nonona ta kakkagian na totolay meyannung nisa. (Juan 1:46, 47) Arianna gapa nannegatibo megafu ta nabayag ngana nga liwa nga nakua natun nga tolay ta nappasa. (1 Tim. 1:12-14) Kinagi ni Jesus: “Nu egga nikamu i pakka-aya-aya, kannammuan ngamin na totolay tu disipulo takamu.” (Juan 13:35) Iyavu ta baggim, “Tuttuttulakku kari i ehemplo ni Jesus gukaban na pangngua ta adde na mawayyà tapenu mapattalupaddian i imammo ta wawwaragì?”

12. Anni i mekatallu nga dakkua tapenu mabbalin nga kofun ni Jesus, anna kunnasi tam makua yatun?

¹² (3) Suportan i wawwaragi ni Cristo. Imammatan ni Jesus i kuattam para ta nazelugan nga wawwaragina nga kunna kingngua tam yatun para nisa. (Mat. 25:34-40) I primeru nga makua tam tapenu suportan i nazelugan ay gukaban na pangngua tam ta adde na mawayya tam ta pallayyagayya anna panuddu ta tanakuan kagitta na nibilin ni Jesus nga kuattam. (Mat. 28:19, 20; King. 10:42) Metuppal laman na wawwaragi ni Cristo i dakal anna interu-mundo nga pallayyagayya ta maddaggun gukaban na uffun na “tanakuan nga karneru.” (Juan 10:16, NW ) Nu tadday ka ta tanakuan nga karneru, kada makiparte ka tatun nga trabahu, ipasingammu i aya mu ta wawwaragi ni Cristo anna kani Jesus mismu.

13. Kunnasi tam meyaplika i tabarang ni Jesus ta Lucas 16:9?

¹³ Makikkofuttam gapa kani Jehova anna kani Jesus gukaban na paddona tu kuartu tapenu suportan i trabahu nga igiggiyada. (Bibbigan i Lucas 16:9.) Angngariganna, awayya tam maddona ta interu-mundo nga trabahu, nu sitaw meyusa danaw nga donasion ta pangilayyagayya ta mapia nga dumug ta arayyu ira nga lugar, pamataddag anna pammentena ta fasilidad ira nga meyusa ta kurug nga paddayaw, anna pangiyawa tu material nga uffun para ta biktima ira na kalamidad onu trahedia. Awayya tam gapa suportan i kongregasiottam ta finansial anna uffunan danuri ammu tam nga magawag tu uffun. (Prov. 19:17) Danaw i makua tam tapenu suportan i wawwaragi ni Cristo.

14. Gitta na mabibbig ta Efeso 4:15, 16, anni i meka-appa nga dakkua tapenu mabbalin tu kofun ni Jesus?

¹⁴ (4) Suportan i unnug ira ta Cristiano nga kongregasion. Mas maddukko ittam kani Jesus bilang ulu na kongregasion nu makikoopera ittam ta sinunnona ira nga manangngal nittam. (Bibbigan i Efeso 4:15, 16.) Angngariganna, siguraduattam nga meyusa ta kapianan i Kingdom Hall ira. Tapenu makua yatun, netadday i karuan nga kongregasion ta tanakuan nga kongregasion anna nanguli i pagaddetan ira na teritorio. Aru nga fundu i natipid na organisasion megafu taw nga unnug. Ngem megafu gapa tatun, nekiddaw ta karuan nga publisher nga makibagay ira ta bagu nga sirkumstansia.  Danatun nga matalo nga publisher ay awayyana nga piga dagun ngana nga nasserbi ta tadday nga kongregasion yatutta naddukko ngana ta wawwaragi tatun. Ngem sangawe, nekiddaw nira nga masserbi ta tanakuan nga kongregasion. Kuruga magayayya si Jesus ta pakasinganna nga makikoopera tatun nga unnug danaw nga matalo nga disipulos!

15. Kunnasi nga mas maddukko i pakikkofuttam kani Jesus ta mappange?

¹⁵ Egga i iddanama danuri zinelugan na masanto nga espiritu nga makavulu si Jesus tu mannanayun anna makipammaguray nisa ta Pappatulan na Dios. Masingadda noka si Cristo, maka-uvovug, anna makavuluda yayya. (Juan 14:2, 3) Makalawa gapa tu aya anna panangngal ni Jesus danuri neravvunan i iddanamada. Maski nu ariadda masingan si Jesus, mas mabbalin ira tu madukko nga kofunna durante nga magayayya ira ta pattolay nga pinapposible ni Jehova anna ni Jesus para nira.​—Isa. 9:6, 7.

16. Anni ira nga bendision i malawa tam ta pakikkofun kani Jesus?

¹⁶ Nu alawatattam i imbitasion ni Jesus nga mabbalin tu kokkofunna, aru nga bendision i malawa tam. Angngariganna, mabbenefisio ittam ta aya anna suportana ta maddaggun. Egga i tiansa tam nga mattolay tu mannanayun. Anna pinaka-importante, i pakikkofuttam kani Jesus ay marresulta ta pinakanabalor nga pakikkofun ta ngamin, i pakikkofuttam ta Yamana, si Jehova. Kuruga dakal nga pribilehio nga magalan bilang kokkofun ni Jesus!