1. Whọ tẹ gwọlọ wo usu okpekpe kugbe ohwo, eme who re ru?

WHỌ TẸ gwọlọ mu usu kugbe ohwo jọ, o gwọlọ nọ whẹ avọ ohwo na wha rẹ jọ kugbe je ru eware kugbe. Nọ whẹ avọ iẹe wha bi gbiku kẹ ohwohwo jẹ ta eva kẹ ohwohwo na, usu rai o vẹ te kpekpe ziezi. Rekọ u wo eware jọ nọ e rẹ sai ru ei jọ bẹbẹ re ma wo usu okpekpe kugbe Jesu. Eware vẹ eye?

2. Eme họ ẹbẹbẹ ọsosuọ nọ ma wo?

² Ẹbẹbẹ ọsosuọ họ, ma re ruẹ Jesu ẹdẹvo ho. Ileleikristi ikpe-udhusoi ọsosuọ buobu a rọ ẹro ruẹ Jesu gbe he. Ghele na, Pita ukọ na ọ ta kpahe ae nọ: “Dede nọ wha ruẹ e riẹ vievie he, wha you rie. Dede nọ wha be ruẹ e riẹ obọnana ha, wha fi ẹrọwọ họ iẹe.” (1 Pita 1:8) Fikiere, ma rẹ sai mu usu okpekpe kugbe Jesu dede nọ ma re ruẹ e riẹ ẹdẹvo ho.

3. Eme họ ẹbẹbẹ avọ ivẹ nọ ma wo?

³ Ẹbẹbẹ avọ ivẹ họ, ma rẹ sai lele Jesu ta ẹme he. Nọ ma tẹ be lẹ, Jihova ma rẹ lẹ se. Dede nọ odẹ Jesu ma rẹ rọ lẹ, ọye ma be lẹ se he. Jesu ọ tubẹ gwọlọ nọ ma lẹ sei hi. Fikieme? Keme olẹ yọ abọjọ egagọ mai, yọ Jihova ọvo u fo nọ ma rẹ gọ. (Mat. 4:10) O make rrọ ere na, ma rẹ sai gbe dhesẹ nọ ma you Jesu.

4. Eme họ ẹbẹbẹ avọ esa, kọ eme ma te ta kpahe evaọ uzoẹme nana?

 ⁴ Ẹbẹbẹ avọ esa họ, obọ odhiwu Jesu ọ rrọ, fikiere ma sae jọ kugbei hi. Rekọ ma sae gbẹ riẹ eware buobu kpahe Jesu dede nọ ma rrọ kugbei hi. Ma te ta kpahe eware ene nọ ma rẹ sai ru re ma wo usu okpekpe kugbe Jesu. Rekọ joma kake ta kpahe oware nọ u ro wuzou re ma wo usu okpekpe kugbei.

5. Fikieme u ro wuzou re ma jọ egbẹnyusu Jesu? (Rri ekpẹti nana re, “ Ma te Wo Usu Kugbe Jesu U re Ru Omai Wo Usu Kugbe Jihova” gbe “ Joma Rri Jesu Epanọ U Fo.”)

⁵ Ma tẹ rrọ egbẹnyusu Jesu, ẹsiẹe ma sae rọ jọ egbẹnyusu Jihova. Fikieme o rọ rrọ ere? Joma ta kpahe eware ivẹ jọ. Orọ ọsosuọ, Jesu ọ ta kẹ ilele riẹ nọ: “Ọsẹ na omariẹ o you owhai fikinọ wha you omẹ.” (Jọn 16:27) Ọ ta re nọ: “Ohwo ọvo ọ rẹ nyabru Ọsẹ na ze he ajokpaọ ẹkwoma mẹ.” (Jọn 14:6) Ohwo nọ ọ gwọlọ jọ ogbẹnyusu Jihova ababọ ogbẹnyusu Jesu nọ ọ rẹ jọ, ọ wọhọ ohwo nọ ọ gwọlọ ruọ eva uwou rekọ ọ gwọlọ rọ unuẹthẹ ruọ eva ha. Jesu ọ ta oghẹrẹ ẹme otiọnana nọ ọ ta nọ ọyomariẹ yọ “unuẹthẹ nọ igodẹ na e rẹ rọ ruọ eva.” (Jọn 10:7) Orọ avọ ivẹ, Jesu ọ rọ aro kele iruemu Ọsẹ riẹ gbagba. Ọ ta kẹ ilele riẹ nọ: “Ohwo kpobi nọ ọ ruẹ omẹ ọ ruẹ Ọsẹ na no re.” (Jọn 14:9) Fikiere, edhere jọ nọ o wuzou nọ ma rẹ rọ riẹ Jihova họ, ma re wuhrẹ kpahe oghẹrẹ uzuazọ nọ Jesu o yeri. Nọ ma bi wuhrẹ kpahe Jesu na, ma ve ti you rie vi epaọ ọsosuọ. Yọ epanọ ma you Jesu te, ere uyoyou nọ ma wo kẹ Ọsẹ riẹ o rẹ ga te re.

6. Ẹjiroro ọfa vẹ o rọ gwọlọ nọ ma rẹ jọ egbẹnyusu Jesu? Ru ei vẹ.

 ⁶ Ma rẹ jọ egbẹnyusu Jesu re Jihova o te yo elẹ mai. Orọnikọ thakpinọ ma jọ ekuhọ elẹ mai ta nọ “evaọ odẹ Jesu” ọvo ho. O gwọlọ nọ ma rẹ riẹ oghẹrẹ nọ Jihova ọ be rọ rehọ ẹkwoma Jesu yo elẹ mai. Jesu ọ ta kẹ ikọ riẹ nọ: “Oware kpobi nọ wha yare evaọ odẹ mẹ, me ti ru ei.” (Jọn 14:13) Dede nọ Jihova họ ọnọ ọ rẹ gaviezọ kẹ elẹ mai jẹ kiyo rai, ọ kẹ Jesu udu nọ o re ro ru oware nọ Ọsẹ obọ odhiwu riẹ na ọ gwọlọ. (Mat. 28:18) Fikiere, taure Jihova ọ tẹ te kuyo elẹ mai, o re rri sọ ma ru lele ohrẹ nọ Jesu ọ kẹ omai. Wọhọ oriruo, Jesu ọ ta nọ: “Otẹrọnọ wha rọ iruthọ amọfa rọvrẹ rai, Ọsẹ obọ odhiwu rai ọ te rọvrẹ owhai re; rekọ otẹrọnọ wha gbẹ rọ iruthọ amọfa rọvrẹ rai hi, Ọsẹ rai ọ te rọ iruthọ rai rọvrẹ owhai gbe he.” (Mat. 6:14, 15) Oyejabọ nọ u ro wuzou gaga re ma yerikugbe amọfa epanọ Jihova avọ Jesu a bi yerikugbe omai.

7. Amono a ti wo erere no idhe ẹtanigbo Jesu na ze?

⁷ Ahwo nọ a rrọ egbẹnyusu Jesu ọvo a ti wo erere no idhe ẹtanigbo riẹ ze. Ẹvẹ ma rọ riẹ? Jesu ọ ta nọ o ti “siobọno uzuazọ riẹ fiki egbẹnyusu riẹ.” (Jọn 15:13) O gwọlọ nọ idibo Ọghẹnẹ nọ e rria no taure Jesu ọ tẹ te ze otọakpọ a re wuhrẹ kpahe iẹe je you rie. A te kpare ahwo wọhọ Abraham, Sera, Mosis, gbe Rehab zihe ziọ uzuazọ, ghele na o gwọlọ nọ idibo Jihova nana nọ i wo ẹrọwọ na a re wo usu okpekpe kugbe Jesu re a sai wo uzuazọ ebẹdẹ bẹdẹ.​—Jọn 17:3; Iruẹru 24:15; Hib. 11:8-12, 24-26, 31.

8-9. Wọhọ epanọ o rrọ Jọn 15:4, 5, ma te wo usu kugbe Jesu, erere vẹ o re noi ze, kọ fikieme onana u ro wuzou?

⁸ Ma bi kuomagbe Jesu ta usi uwoma Uvie na je fiobọhọ kẹ ahwo zihe ruọ ilele riẹ, yọ onana o be kẹ omai evawere. Okenọ Jesu ọ jọ otọakpọ, ọ jọ owuhrẹ. Anwẹnọ o ro zihe kpobọ odhiwu na, Jesu nọ o wuzou ukoko Ileleikristi na ọye ọ be kpọ iruo usi uwoma ota gbe ilele-iruo na. Ọ be ruẹ epanọ whọ be daoma te re whọ ruẹsi fiobọhọ kẹ ahwo buobu riẹ kpahe ọyomariẹ gbe Ọsẹ riẹ, yọ onana o da riẹ ẹro fia. Uzẹme riẹ họ, ababọ obufihọ Jihova avọ Jesu, ma rẹ sai ru iruo usi uwoma ota na ha.​—Se Jọn 15:4, 5.

⁹ Ebaibol na ọ ta vevẹ nọ re ma sai ru Jihova eva were, o gwọlọ nọ ma re wo usu okpekpe kugbe Jesu jẹ daoma ru re usu na o tọ. Fikiere joma ta kpahe eware ene jọ nọ ma rẹ sai ru re ma jọ egbẹnyusu Jesu.

10. Eme họ oware ọsosuọ nọ ma re ru re ma wo usu okpekpe kugbe Jesu?

¹⁰ (1) Riẹ Jesu. Ma sae riẹ oghẹrẹ ohwo nọ Jesu ọ rrọ nọ ma tẹ be hai se obe Matiu, Mak, Luk, gbe Jọn. Ma te roro didi kpahe iku Jesu nọ e rrọ Ebaibol na jẹ ruẹ oghẹrẹ nọ ọ rọ rehọ edhere owowou yerikugbe ahwo, onana o te lẹliẹ omai you rie jẹ kẹe adhẹẹ. Wọhọ oriruo, Jesu o je ru ilele riẹ wọhọ erigbo ho dede nọ ọye ọ jọ Olori rai. Ukpoye, ọ ta eva kẹ ae. (Jọn 15:15) Oware nọ o kẹ ilele riẹ uye, o jẹ kẹ Jesu uye re, yọ o lele i rai viẹ. (Jọn 11:32-36) Makọ enọ e jẹ wọso ẹe dede a ruẹ vevẹ nọ Jesu ọ jọ ogbẹnyusu enọ e  gaviezọ kẹe. (Mat. 11:19) Ma tẹ rọ aro kele Jesu evaọ oghẹrẹ nọ o ro yerikugbe ilele riẹ, usu mai kugbe amọfa o te ga ziezi, ma ti wo evawere vi epaọ ọsosuọ, ma ve ti je you Jesu jẹ kẹe adhẹẹ vi epaọ anwẹdẹ kpobi.

11. Eme họ oware avọ ivẹ nọ ma re ru re ma wo usu okpekpe kugbe Jesu, kọ fikieme onana u ro wuzou?

¹¹ (2) Wo ọkpọ iroro Jesu gbe uruemu riẹ. Ma tẹ riẹ oghẹrẹ nọ Jesu o re roro jẹ daoma wo ọkpọ iroro riẹ, ma ti wo usu okpekpe kugbei. (1 Kọr. 2:16) Ẹvẹ ma sae rọ rehọ aro kele Jesu? Joma ta kpahe oriruo jọ. Epanọ Jesu o re ro fiobọhọ kẹ amọfa o mae jariẹ oja vi omobọ riẹ nọ o re ru eva were. (Mat. 20:28; Rom 15:1-3) Fiki oghẹrẹ iroro nana nọ o wo na, u no rie eva ze inọ ọ rẹ ruẹ uye fiki amọfa jẹ rọvrẹ ahwo. Ẹme nọ amọfa a ta kpahe iẹe ọ rẹ kake dhae eva ha. (Jọn 1:46, 47) Ọ jẹ rọ ekpehre ubiẹro rri ohwo ọvo ho fiki iruthọ rai evaọ okenọ u kpemu nọ ọyomariẹ o fihọ eva. (1 Tim. 1:12-14) Jesu ọ ta nọ: “Ẹkwoma onana ahwo kpobi a te rọ riẹ nọ whai yọ ilele mẹ, otẹrọnọ wha te wo uyoyou evaọ udevie rai.” (Jọn 13:35) U ti woma re whọ nọ omara nọ, “Wọhọ Jesu, kọ mẹ be dawo ẹgba mẹ kpobi, re mẹ ruẹ nọ udhedhẹ o rrọ udevie mẹ avọ ibe Ileleikristi mẹ?”

12. Eme họ oware avọ esa nọ ma re ru re ma wo usu okpekpe kugbe Jesu, kọ ẹvẹ ma sai ro ru oyena?

¹² (3) Tha inievo Kristi uke. Oware kpobi nọ ma ru kẹ Ileleikristi nọ a rọ ẹzi wholo na, Jesu o re rri rie nọ ọyomariẹ ma ru rie kẹ. (Mat. 25:34-40) Edhere nọ ọ mai wuzou nọ ma re ro fiobọhọ kẹ enọ a rọ ẹzi wholo na họ, ajọwha nọ ma re wo ziezi evaọ iruo usi uwoma ota gbe ilele-iruo nọ Jesu ọ ta nọ ma ru na. (Mat. 28:19, 20; Iruẹru 10:42) Re inievo Kristi a sai ru iruo usi uwoma ota akpọ-soso nọ a bi ru nẹnẹ na gba, o gwọlọ nọ “igodẹ efa” na a re fiobọhọ kẹ ae. (Jọn 10:16) Otẹrọnọ whẹ yọ omọvo igodẹ efa na, oke kpobi nọ who kpohọ usi uwoma ota yọ who bi dhesẹ nọ who you enọ a rọ ẹzi wholo na gbe Jesu omariẹ.

13. Ẹvẹ ma sai ro ru lele ohrẹ Jesu nọ o rrọ Luk 16:9 na?

¹³ Ma sae jẹ jọ egbẹnyusu Jihova avọ Jesu nọ ma tẹ be hae rọ ugho ru unevaze rọ tha iruo Uvie na uke. (Se Luk 16:9.) Wọhọ oriruo, ma rẹ sai ru unevaze kẹ iruo akpọ-soso na, a vẹ rọ igho nana wha iruo usi uwoma ota na haro evaọ eria nọ i siomano, bọ iwou egagọ, rẹrote ai, je fiobọhọ kẹ enọ eware okpẹtu e via kẹ. Ma rẹ sai je ru unevaze rọkẹ araha ukoko mai, je fiobọhọ kẹ inievo nọ ma riẹ nọ a gwọlọ obufihọ evaọ ukoko na. (Itẹ 19:17) Idhere nana ma sae rọ tha inievo Kristi uke.

14. Wọhọ epanọ o rrọ Ahwo Ẹfisọs 4:15, 16, eme họ oware avọ ene nọ ma re ru re ma wo usu okpekpe kugbe Jesu?

¹⁴ (4) Ru lele ọruẹrẹfihotọ nọ ọ rrọ ukoko Ileleikristi na. Usu mai kugbe Jesu nọ o wuzou ukoko na o te ga ziezi nọ ma te bi yoẹme kẹ enọ a ro mu re a rẹrote omai na. (Se Ahwo Ẹfisọs 4:15, 16.) Wọhọ oriruo, enẹna ma gwọlọ nọ ma rẹ rọ Ọgwa Uvie kpobi ruiruo ziezi. Fikiere, a ku ikoko jọ gbe re a jọ ọvo, a te je ru ekwotọ usi uwoma ota jọ rro hayo kawo vi epanọ o jọ. Ọruẹrẹfihotọ nana u ru nọ a gbẹ be rọ raha igho unevaze kufiẹ hẹ. Onana o wha riẹ ze nọ o rọ gwọlọ nọ inievo jọ a re nwene lele ọruẹrẹfihotọ ọkpokpọ  nana. O sae jọ nọ iwhowho-uvie nana a rrọ ukoko rai na kri no je si kẹle inievo ukoko yena no. Rekọ obọnana, a rehọ e rai kpohọ ukoko ofa no. Eva e be were Jesu gaga nọ ọ be ruẹ nọ inievo nana a bi ru lele ọruẹrẹfihotọ na.

15. Ẹvẹ usu mai kugbe Jesu o te rọ kpekpe ziezi evaọ obaro?

¹⁵ Enọ a rọ ẹzi wholo na a wo ẹruore inọ a te jọ kugbe Jesu bẹdẹ bẹdẹ, je lele iei su evaọ Uvie Ọghẹnẹ. A te ruẹ e riẹ, lele iei ta ẹme, yọ ahwo nana avọ Jesu a ti ru eware kugbe. (Jọn 14:2, 3) Jesu o ti je dhesẹ uyoyou kẹ enọ i wo ẹruore otọakpọ na je fiobọhọ kẹ ae. Dede nọ a te ruẹ Jesu hu, usu rai kugbei o te kpekpe ziezi nọ a te reawere uzuazọ nọ Jihova avọ Jesu a ruẹrẹhọ kẹ ae na.​—Aiz. 9:6, 7.

16. Eghale vẹ i re te omai nọ ma tẹ rrọ egbẹnyusu Jesu?

¹⁶ Ma tẹ ginẹ rrọ egbẹnyusu Jesu wọhọ epanọ o zizie omai na, eghale buobu i re te omai. Wọhọ oriruo, o re you omai enẹna je fiobọhọ kẹ omai. Ma wo ẹruore uzuazọ ebẹdẹ bẹdẹ. Oghale nọ o mae rro nọ u re te omai nọ ma tẹ rrọ egbẹnyusu Jesu họ, ma ti wo usu okpekpe kugbe Ọsẹ riẹ, Jihova. Uvẹ-ọghọ riẹ o rro kẹhẹ nọ Jesu o bi ro se omai egbẹnyusu riẹ!