1. Modi ki dôs algen pode ten un amizadi fórti ku kunpanheru?

TXEU bês, pa nu ten un amizadi fórti ku un algen, primeru kuza ki nu meste faze é pasa ténpu ku el. Sima nhos ta ba ta pâpia i ta fla kunpanheru kuzê ki nhos ta pensa i xinti, nhos ta bira amigu. Má alvês, é ka fásil ten un amizadi fórti ku Jizus. Pamodi?

2. Kal ki é kel primeru razon ki pode bira difísil nu ser amigu di Jizus?

² Primeru, pode ser difísil nu ser amigu di Jizus pamodi nunka nu ka odja-l. É kel-li ki kontise ku txeu kriston na ténpu di apóstlus. Má simé, apóstlu Pedru fla: ‘Nbóra nunka nhos ka odja-l, nhos ta ama-l. Nbóra nhos ka sta odja-l gósi, nhos mostra fé na el’. (1 Ped. 1:8) Kel-li ta mostra ma sikrê nunka nu ka odja Jizus, nu pode ten un amizadi fórti ku el.

3. Kal ki é sugundu razon ki pode bira difísil nu ser amigu di Jizus?

³ Sugundu, pode ser difísil nu ser amigu di Jizus pamodi nu ka ta konsigi pâpia ku Jizus. Óras ki nu ta faze orason, nu ta pâpia sô ku Jeová. É klaru ki nu ta faze orason na nómi di Jizus, má nu ka ta pâpia ku Jizus. Na verdadi Jizus ka krê pa nu faze orason pa el. Pamodi? Pamodi orason é un fórma di adorason, i nu debe adora sô Jeová. (Mat. 4:10) Má simé, nu pode mostra nos amor pa Jizus.

4. Kal ki é tirseru razon ki pode bira difísil nu ser amigu di Jizus, i kuzê ki nu sta ben odja na kel studu li?

 ⁴ Tirseru, pode ser difísil nu ser amigu di Jizus pamodi el ta vive na Séu. Nton nu ka ta pode pasa ténpu ku el. Má, sikrê nu ka ta pode sta pértu di Jizus, nu pode sabe txeu kuza di el. Na kel studu li, nu sta ben lenbra kuatu kuza ki pode djuda-nu ten un amizadi más fórti ku Jizus. Má primeru, nu sta ben odja pamodi ki é inportanti nu ten un amizadi fórti ku Jizus.

5. Pamodi ki nu debe ser amigu di Jizus? (Tanbê odja kuadrus “ Amizadi ku Jizus ta djuda-nu ten amizadi ku Jeová” i “ Ka bu ama Jizus más di ki se Pai”.)

⁵ Si nu krê ten un amizadi fórti ku Jeová, nu debe ser amigu di Jizus. Pamodi ki nu meste faze kel-li? Nu ben odja dôs razon. Primeru, Jizus fla se disiplus: ‘Pai ta ama nhos, dja ki nhos ama-m’. (João 16:27 ) Tanbê el fla: ‘Ningen ka ta txiga na nha Pai si ka é através di mi.’ (João 14:6 ) Si nu tenta ser amigu di Jeová, sen ten un amizadi fórti ku Jizus, é mésmu kuza ki tenta entra na un prédiu sen pasa pa pórta. Jizus uza un ilustrason sima kel-li kantu el txoma se kabésa di ‘kel pórta pa ovelhas.’ (João 10:7 ) Kel sugundu razon, é pamodi Jizus imita kualidadis di se Pai di manera perfetu. El fla se disiplus: ‘Kenha ki odja-m, dja odja Pai tanbê.’ (João 14:9 ) Pur isu, un manera inportanti di nu konxe Jeová, é óras ki nu ta studa vida di Jizus. Sima nu ta ba ta prende di vida di Jizus, nos amor pa el ta fika más fórti. I sima nos amor pa Jizus ta ba ta fika  más fórti, nos amor pa se Pai tanbê ta fika más fórti.

6. Kal ki é kel otu razon ki ta mostra pamodi ki nu meste ser amigu di Jizus? Splika.

⁶ Pa Jeová responde nos orason, nu ten ki ser amigu di Jizus. Nu meste faze más di ki sô fla na fin di nos orason: “Na nómi di Jizus.” Nu meste ntende modi ki Jeová ta uza Jizus pa responde nos orason. Jizus fla apóstlus: ‘Tudu kuza ki nhos pidi na nha nómi, N ta ben faze-l’. (João 14:13 ) Jeová é kel ki ta obi i ta responde nos orason. Má, óras ki el disidi responde nos orason, el ta uza Jizus pa faze kel-la. (Mat. 28:18) Pur isu, antis di Deus responde nos orason, el ta odja si nu sigi konsedju ki Jizus da. Pur izénplu, Jizus fla: ‘Si nhos púrdua ómis ses fadjas, nhos Pai na Séu tanbê ta púrdua nhos; má, si nhos ka púrdua fadjas di ómis, nhos Pai tanbê ka ta púrdua nhos nhos fadja.’ (Mat. 6:14, 15) Pur isu, é inportanti trata otus ku kel mésmu bondadi ki Jeová ku Jizus ta trata-nu!

7. Kenha ki ta ben resebe kes benson di resgati di Jizus?

⁷ Sô kes ki ten un amizadi fórti ku Jizus, ki ta ben resebe bensons di se sakrifisiu di resgati. Modi ki nu sabe kel-li? Pamodi Jizus fla ma el ta ben daba ‘se vida pa se amigus.’ (João 15:13 ) Tanbê, kes algen fiel ki vive antis di Jizus ben pa Téra, ta ben prende sobri el i ama-l. Alguns ómi ku mudjeris sima Abraon, Sara, Muizés i Raabi ta ben resusitadu. Má ti es tanbê, es ten ki ben ser amigu di Jizus pa es pode ganha vida pa tudu ténpu. — João 17:3; Atos 24:15 ; Heb. 11:8-12, 24-26, 31.

8-9. Sima sta na João 15:4, 5, nos amizadi ku Jizus ta djuda-nu faze ki trabadju, i pamodi ki kel trabadju é inportanti?

⁸ Nu ta fika kontenti di trabadja djuntu ku Jizus na prega i inxina kes notísia sábi di Reinu. Kantu Jizus staba na Téra, el éra un instrutor. Désdi ki el bai pa Séu, Jizus é kabésa di kongregason i el sta kontinua ta kuida di trabadju di prega i inxina. El ta odja i el ta da valor pa tudu kuza ki bu ta faze pa djuda tudu kes algen ki bu pode, pa konxe-l i pa konxe se Pai. Nu pode ten sertéza ma nu ta konsigi faze es trabadju sô ku ajuda di Jeová i Jizus. — Lé João 15:4, 5.

⁹ Bíblia ta mostra klaru ma si nu krê agrada Jeová, nu meste ama Jizus i kontinua ta ama-l. Pur isu, nu sta ben odja kuatu kuza ki nu pode faze pa nu bira amigu di Jizus.

10. Kal ki é primeru kuza ki nu ten ki faze pa nu ser amigu di Jizus?

¹⁰ (1 ) Konxe Jizus. Nu pode faze kel-li óras ki nu ta lé livrus di Bíblia sima Mateus, Marcos, Lucas i João. Óras ki nu ta pensa txeu na kuzê ki Bíblia ta fla sobri vida di Jizus, nu ta xinti amor i ruspetu pa Jizus, pamodi el ta trataba pesoas ku bondadi. Pur izénplu, Jizus éra Sinhor di se disiplus, má el ka trata-s sima skravu. Envês di kel-li, el fla-s kuzê ki el ta pensaba i kuzê ki el ta xintiba. (João 15:15 ) Óras ki es ta staba tristi, Jizus tanbê ta fikaba tristi i el ta txoraba ku es. (João 11:32-36 ) Ti kes inimigu di Jizus ta odjaba ma el éra amigu di kes algen ki ta obiba se mensaji. (Mat. 11:19) Óras ki nu ta imita manera ki  Jizus trata se disiplus, nu ta ten un bon amizadi ku otus, nu ta fika más kontenti i nos amor i gratidon pa Jizus ta fika más fórti.

11. Kal ki é kel sugundu kuza ki nu ten ki faze pa nu ser amigu di Jizus, i pamodi ki é inportanti faze kel-li?

¹¹ (2 ) Pensa i aji sima Jizus. Sima nu ta ba ta konxe Jizus kada bês más midjór i imita se manera di pensa, nos amizadi ku el ta fika más fórti. (1 Cor. 2:16) Modi ki nu pode imita Jizus? Odja sô un izénplu. Jizus ta preokupaba más ku djuda otus di ki agradaba se kabésa. (Mat. 20:28; Rom. 15:1-3) Pur isu, el faze sakrifisius i el ta purduaba otus. Jizus ka ta maguaba faxi ku kuzas ki pesoas ta flaba di el. (João 1:46, 47 ) I el ka ta pensaba mal di un algen sô pamodi un kuza mariadu ki kel algen faze dja ten txeu ténpu. (1 Tim. 1:12-14) Jizus fla: ‘Tudu algen ta fika ta sabe ma nhos é nha disiplus: si nhos ten amor pa kunpanheru.’ (João 13:35 ) Pamodi ki bu ka ta pergunta bu kabésa: “N sta ta sigi izénplu di Jizus, di faze tudu kel ki N pode pa sta na pas ku nhas irmons i irmans?”

12. Kal ki é kel tirseru kuza ki nu ten ki faze pa nu ser amigu di Jizus, i modi ki nu pode faze-l?

¹² (3 ) Apoia kes irmon di Kristu. Jizus ta atxa ma tudu kuza ki nu ta faze pa se irmons skodjedu ku spritu santu, é sima ki nu sta faze pa el. (Mat. 25:34-40) Kel manera más inportanti di nu djuda kes kriston skodjedu, é óras ki nu ta faze nos midjór na trabadju di prega i inxina, sima Jizus manda-nu pa nu faze. (Mat. 28:19, 20; Atos 10:42 ) Irmons di Kristu ta konsigi faze kel grandi trabadju di pregason ki sta fazedu oji na mundu interu, sô ku ajuda di ‘otus ovelha’. (João 10:16 ) Si bo é un di kes otu ovelha, ka bu skese ma tudu bês ki bu partisipa na es trabadju, bu sta ta mostra bu amor pa irmons di Kristu i tanbê pa Jizus.

13. Modi ki nu pode sigi konsedju di Jizus ki sta na Lucas 16:9 ?

¹³ Tanbê nu ta ser amigu di Jeová ku Jizus, óras ki nu ta uza kes kuza ki nu ten pa apoia trabadju ki es sta ta orienta. (Lé Lucas 16:9.) Pur izénplu, nu pode faze kontribuison pa apoia trabadju ki sta fazedu na mundu interu. Kes kontribuison ta uzadu pa djuda prega kes notísia sábi na kes lugar lonji, pa faze i konpo lugaris di adorason i pa djuda óras ki kontise algun disgrasa. Tanbê, nu pode faze kontribuison na nos própi kongregason i nu pode djuda algun irmon ki sta meste. (Pro. 19:17) Kes-li é maneras ki nu pode apoia irmons di Kristu.

14. Sima sta na Efésios 4:15, 16, kal ki é kel kuartu kuza ki nu ten ki faze pa nu ser amigu di Jizus?

¹⁴ (4 ) Apoia disizons di organizason di Jeová. Nu ta bira más amigu di Jizus, ki é kabésa di kongregason, óras ki nu ta apoia kes algen ki skodjedu pa kuida di nos. (Lé Efésios 4:15, 16.) Pur izénplu, gósi nu sta faze nos midjór pa djobe si tudu Salons di Reinu sta ta uzadu dretu. Pur isu, djuntadu alguns kongregason i torna organizadu tiritórius. Di kel manera li, organizason konsigi popa txeu dinheru di kes kontribuison ki ta fazedu. Má, pamodi kel-li, alguns publikador tevi ki lida ku kel mudansa. Talvês, kes publikador fiel dja tinha txeu ténpu na ses kongregason i es tinha amizadi  fórti ku irmons di la. Má gósi es pididu pa es bai sirbi na otu kongregason. Jizus ta fika uma kontenti di odja kes disiplu lial li ta apoia disizons di organizason!

15. Modi ki nos amizadi ku Jizus ta ben fika más fórti na futuru?

¹⁵ Kes ki é kristons skodjedu ku spritu santu, ten speransa di sta ku Jizus pa tudu ténpu i di governa ku el na Reinu di Deus. Es ta ba sta ku Kristu, es ta odja-l, es ta pâpia ku el i es ta pasa ténpu ku el. (João 14:2, 3 ) Kes ki ten speransa di vive na Téra tanbê ta ben resebe amor i atenson di Jizus. É klaru ki es ka ta pode ben odja-l. Má, es ta ben xinti ses amizadi ku Jizus ta fika más fórti, óras ki es ben vive sábi na Paraízu ki Jeová i Jizus tene priparadu pa es. — Isa. 9:6, 7.

16. Ki bensons nu ta ganha pamodi nos é amigu di Jizus?

¹⁶ Óras ki nu seta konviti di Jizus pa nu ser se amigu, nu ta ganha txeu benson. Pur izénplu, nu sta xinti se amor i ajuda désdi gósi. Nu ten xansi di ben vive pa tudu ténpu. I más inportanti inda, nos amizadi ku Jizus ta djuda-nu ten kel kuza di más valor: un amizadi fórti ku Jeová, ki é Pai di Jizus. Fórti priviléjiu grandi ser txomadu amigu di Jizus!