1. Һун тʹәви мәрьва ча дьбьнә һәвал?

ЧАХЕ һун дьхԝазьн тʹәви кәсәки һәвалтийе бькьн, бәре әʹԝльн һун тʹәви ԝи ԝәʹдә дәрбаз дькьн. Һун һәврʹа хәбәр дьдьн, фькьред хԝә һәврʹа гьли дькьн у дьле хԝә һәврʹа вәдькьн, ӧса һун дьбьнә һәвалед һәв. Ле сәва бьбьнә достед Иса, һьнә чәтьнайи һәнә. Әԝ чь чәтьнайи нә?

2. Чәтьнайа пешьн чь йә, кӧ бьбьнә достед Иса?

² Чәтьнайик әԝ ә, кӧ мә Иса нәдитийә. Гәләк Мәсиһийед ԛьрʹна йәкеда жи Иса нәдитьбун. Ле Паԝлосе шанди гот: «Ԝә әԝ нәдитийә, ле һун ԝи һʹьз дькьн, ньһа жи набиньн, ле ԝи баԝәр дькьн» (1 Пәт. 1:8). Бәле, рʹаст ә мә Иса нәдитийә, ле йәкә әм дькарьн бьбьнә достед ԝийи незик.

3. Чәтьнайа дӧда кʹижан ә?

³ Йа дӧда әԝ ә, кӧ әм нькарьн тʹәви ԝи хәбәр дьн. Чахе әм дӧа дькьн, әм Йаһоԝарʹа хәбәр дьдьн. Рʹаст ә әм пе наве Иса дӧа дькьн, ле әв найе һʹәсабе, кӧ әм Исарʹа хәбәр дьдьн. У Иса хԝәха жи нахԝазә, ԝәки әм ԝирʹа дӧа бькьн. Чьрʹа? Чьмки дӧа дькʹәвә нава һʹәбандьне, у әм гәрәке тʹәне Йаһоԝа бьһʹәбиньн (Мәт. 4:10). Ле йәкә әм бь гәләк тьшта дькарьн избат кьн кӧ әм Иса һʹьз дькьн.

4. Чәтьнайа сьсийа кʹижан ә, у әме ве готареда дәрһәԛа чь шеԝьр кьн?

⁴ Чәтьнайа сьсийа әԝ ә, кӧ Иса сәр әʹзмана дьжи, у әм  нькарьн тʹәви ԝи ԝәʹдә дәрбаз кьн, сәва ԝи рʹьнд нас кьн. Ле йәкә әм дькарьн дәрһәԛа Иса пебьһʹәсьн, һәрге жи әм тʹәви ԝи ниньн. Әме ньһа шеԝьр кьн чар тьшта, йед кӧ әм гәрәке бькьн сәва бьбьнә достед Иса. Ԝәрә әм пешийе пебьһʹәсьн, кӧ чьрʹа гәләк фәрз ә ԝәки әм тʹәви Иса достийе бькьн.

5. Чьрʹа әм гәрәке бьбьнә достед Иса? (Ӧса жи бьньһерʹә ԝан чаргоша « Достийа Тʹәви Иса Дьбә бәрбь Достийа Тʹәви Йаһоԝа», у « Ньһерʹандьна Рʹаст Һьндава Иса».)

⁵ Һәрге әм дьхԝазьн һәләԛәтийа мә тʹәви Йаһоԝа незик бә, әм гәрәке бьбьнә достед Иса. Чьрʹа әԝ ӧса фәрз ә? Дина хԝә бьдьнә тʹәне дӧ мәʹнийа. Йа пешьн, Иса готә шагьртед хԝә: «Бав хԝәха ԝә һʹьз дькә, чьмки ԝә әз һʹьз кьрьм» (Йуһʹн. 16:27). Әԝи ӧса жи гот: «Тʹәне пе мьн йәк дькарә бе щәм Баве» (Йуһʹн. 14:6). Һәрге әм бьхԝазьн бе достийа тʹәви Иса бьбьнә достед Йаһоԝа, әԝ мина ве йәке йә, кӧ әм дьхԝазьн бькʹәвьнә авайи, ле дәрирʹа дәрбаз нәбьн (Йуһʹн. 10:7). Мәʹнийа дӧда әԝ ә, кӧ Иса бь тʹәмами чʹәʹв дьда хәйсәт-һʹӧнӧред Баве хԝә. Әԝи готә шагьртед хԝә: «Йе кӧ әз дитьмә, Бав дитийә» (Йуһʹн. 14:9). Ләма һәрге әм дьхԝазьн Йаһоԝа нас кьн, әм гәрәке дәрһәԛа жийина Иса пебьһʹәсьн. Чьԛас һе зедә әм дәрһәԛа Иса бьзаньбьн, һаԛас һе ԛайим әме ԝи һʹьз бькьн. У гава достийа мә тʹәви Иса незик бә, ԝе һʹьзкьрьна мә һьндава Баве ԝи жи ԛайим бә.

6. Кʹижан ә мәʹнийа дьн, кӧ чьрʹа әм гәрәке бьбьнә достед Иса? Шьровәкьн.

⁶ Әм гәрәке тʹәви Иса достийе бькьн, сәва кӧ Хԝәде щаба дӧайед мә бьдә. Бәс нинә кӧ әм тʹәне хьлазийа дӧайед хԝәда  бежьн «пе наве Иса». Әм гәрәке фәʹм кьн, кӧ чьрʹа Йаһоԝа пе Иса щаба дӧайед мә дьдә. Иса готә шандийед хԝә: «Пе наве мьн һун чь бьхԝазьн, әзе бькьм» (Йуһʹн. 14:13). Рʹаст ә тʹәне Йаһоԝа дӧайед мә дьбьһе, ле әԝи һʹӧкӧм да Иса сәва ԛьраред Ԝи бинә сери (Мәт. 28:18). Ләма жи һʹәта кӧ Йаһоԝа щаба дӧайед мә бьдә, әԝ дина хԝә дьдә һәла әм тʹәмийед кӧ Иса да, тиньн сери йан на. Мәсәлә, Иса гот: «Һәгәр һун нәһәԛийед мәрьвайә һьндава ԝәда кӧ дькьн бьбахшиньн, Баве ԝәйи Әʹзмана жи ԝе ԝә бьбахшинә. Ле һәгәр һун нәһәԛийед мәрьва нәбахшиньн, Баве ԝә жи нәһәԛийед ԝә набахшинә» (Мәт. 6:14, 15). Рʹасти жи чьԛас фәрз ә, ԝәки әм һьндава мәрьвада ӧса рʹәʹм бьн, ча Йаһоԝа у Иса һьндава мә!

7. Кʹе ԝе бь сайа ԛӧрбана Иса кʹәрәма бьстинә?

⁷ Тʹәне әԝед кӧ тʹәви Иса незик ьн, ԝе бь сайа ԛӧрбана ԝи кʹәрәма бьстиньн. Ле әм жь кʹӧ ве йәке заньн? Иса гот ԝәки әԝ ԝе «әʹмьре хԝә бәр достед хԝәва» бьдә (Йуһʹн. 15:13). Мәрьвед амьн йед кӧ дьжитьн пешийа һатьна Иса сәр әʹрде, гәрәке дәрһәԛа ԝи пебьһʹәсьн у ԝи һʹьз кьн. Чахе мәрьвед амьн, мәсәлә Бьраһим, Сәра, Муса, у Рʹәхаб жь мьрьне рʹабьн, һәла һе әԝана жи гәрәке бьбьнә достед Иса, сәва жийина һʹәта-һʹәтайе ԛазанщ кьн (Йуһʹн. 17:3; Кʹар. Шанд. 24:15; Ибрн. 11:8-12, 24-26, 31).

8-9. Ль гора Йуһʹәнна 15:4, 5, бь сайа достийа тʹәви Иса әм чь дькарьн бькьн, у чьрʹа әԝ йәк фәрз ә?

⁸ Әм шабуне дьстиньн кӧ шьхӧле бәлакьрьна мьзгинийеда у һинкьрьнеда тʹәви Иса һәвкʹарийе дькьн. Чахе Иса сәр әʹрде бу, әԝ дәрсдар бу. Ле чахе әԝ вәгәрʹийа ль әʹзмен, һьнгеда әԝ бәрдәԝам дькә ча сәре щьвате рʹебәрийа ԝи шьхӧли бькә. Әԝ щәфе мә дьвинә у ԛимәт дькә, чьмки әм чьԛас дькарьн али гәләка дькьн, ԝәки әԝана ԝи у Баве ԝи нас кьн. Бь рʹасти тʹәне пе аликʹарийа Йаһоԝа у Иса әм дькарьн әԝи шьхӧли биньн сери. (Бьхунә Йуһʹәнна 15:4, 5.)

⁹ Хәбәра Хԝәде әшкәрә мәрʹа әʹйан дькә, кӧ сәва Йаһоԝа мә ԛәбул кә, әм гәрәке Иса һʹьз бькьн. Ләма ԝәрә әм чар тьшта шеԝьр кьн, кʹижан кӧ ԝе али мә бькьн бьбьнә достед Иса.

10. Гава пешьн чь йә, сәва бьбьнә достед Иса?

¹⁰ 1) Иса нас кьн. Бь сайа хԝәндьна кʹьтебед Мәтта, Марԛос, Луԛа у Йуһʹәнна, әм дькарьн Иса нас бькьн. Чахе әм жь ԝан кʹьтеба дәрһәԛа жийина Иса дьхуньн, әм дәстпедькьн ԛәдьре ԝи бьгьрьн у ԝи һʹьз кьн, чьмки әԝ һьндава мәрьва һʹәйф у ԛәнщ бу. Бәʹса хәбәре, рʹаст ә әԝ Ахайе шагьртед хԝә бу, ле әԝ һьндава ԝанда ӧса нибу чаԝа һьндава хӧламада ньн. Дәԝсе, әԝи фькьред хԝә ԝанрʹа гьли дькьр у дьле хԝә ԝанрʹа вәдькьр (Йуһʹн. 15:15). Иса дәрдед ԝан незики дьле хԝә дькьр у тʹәви ԝан дьгьрийа (Йуһʹн. 11:32-36). Һәла һе дьжмьнед ԝи жи дьдитьн, ԝәки Иса ԝанрʹа, йед кӧ мьзгинийа ԝи ԛәбул дькьрьн, дьбу һәвал (Мәт. 11:19). Чахе әм чʹәʹв дьдьнә Иса кӧ әԝ һьндава шагьртед хԝәда ча бу, әм дьһа незики ԝи дьбьн, рʹази у бәхтәԝар дьбьн, у һʹьзкьрьна мә һьндава ԝида һе зедә дьбә.

11. Кʹижан ә гава дӧда кӧ дьбә бәрбь достийа тʹәви Иса, у чьрʹа әԝ йәк фәрз ә?

¹¹ 2) Мина Иса бьфькьрьн у рʹабун-рʹуньштьнеда чʹәʹв бьдьнә ԝи. Әм чьԛас рʹьнд бьзаньбьн щурʹе фькьрандьна Иса у чʹәʹв бьдьнә ԝи, һаԛас достийа мәйә тʹәви ԝи, ԝе ԛәԝи бә (1 Корн. 2:16). Ле ча чʹәʹв бьдьнә Иса? Мәсәлә, Иса кʹара хԝә нәдьгәрʹийа, ле кʹара мәрьва (Мәт. 20:28;  Рʹом. 15:1-3). Ләма әԝ дькʹәтә һʹәйра мәрьва, нә кӧ йа хԝә, у ӧса жи әԝ йәки рʹәʹм бу. Әԝи һьлнәдьда дьле хԝә чь кӧ мәрьва сәр ԝи дьготьн (Йуһʹн. 1:46, 47). Иса ньһерʹандьна хԝә һьндава мәрьва нәдьгӧһаст жь бо шашийед ԝанә бәре, чьмки бира хԝәда хԝәй нәдькьр (1 Тимтʹ. 1:12-14). Иса гот: «Бь ве йәке һʹәмуйе заньбьн һун шагьртед мьн ьн, һәгәр һун һәвдӧ һʹьз бькьн» (Йуһʹн. 13:35). Ԝе баш бә әм пьрсе бьдьнә хԝә: «Әз чʹәʹв дьдьмә Иса у алийе хԝәда һәр тьшти дькьм, сәва тʹәви хушк-бьра әʹдьлайе хԝәй кьм?»

12. Кʹижан ә гава сьсийа, йа кӧ дьбә бәрбь достийа тʹәви Иса, у чьрʹа әԝ йәк фәрз ә?

¹² 3) Пьштгьрийа бьред Мәсиһ бькьн. Әм чь жи бона бьред бь рʹӧһʹ кʹьфшкьри дькьн, Иса һʹәсаб дькә кӧ әм бона ԝи дькьн (Мәт. 25:34-40). Ле йа лапә фәрз кӧ чьда әм дькарьн али ԝан бькьн әԝ ә, кӧ бь хирәт мьзгинийа Пʹадшатийе бәла кьн у шагьрта һазьр кьн, демәк ԝи шьхӧли бькьн, рʹебәрийа кʹижани Иса дькә (Мәт. 28:19, 20; Кʹар. Шанд. 10:42). Әԝ бьред Мәсиһ бе аликʹарийа «пәзед . . . дьн» нькарьн ви шьхӧле мәзьнә һʹәмдьнйайе бькьн, кӧ иро те кьрьне (Йуһʹн. 10:16). Һәрге һун бь рʹӧһʹ кʹьфшкьри ниньн, һәр щар чахе һун хьзмәт дькьн, һун һʹьзкьрьна хԝә дьдьнә кʹьфше нә тʹәне һьндава бьред кʹьфшкьри, ле ӧса жи һьндава Иса.

13. Әм ча дькарьн ширәта Иса кӧ Луԛа 16:9-да ньвисар ә, бьдьнә хәбате?

¹³ Әм ӧса жи дьбьнә достед Йаһоԝа у Иса, чахе пʹәра ԛӧрбан дькьн бона шьхӧле кӧ әԝана рʹебәри дькьн. (Бьхунә Луԛа 16:9.) Мәсәлә, әм дькарьн ԛӧрбана бькьн сәва шьхӧле һʹәмдьнйайе, кʹижан кӧ те хәрщкьрьне бона авакьрьн у хԝәйкьрьна Одед Щьвата у авайед майин, аликʹарийа ԝәʹде хәзәба у тʹәшԛәлед тʹәбийәте, у ӧса жи бона бәлакьрьна мьзгинийе ль ԝан щийа, кʹидәре чәтьн ә бьгьһижьне. Әм дькарьн пʹәра ԛӧрбан кьн ӧса жи сәва щьвата хԝә у сәва аликʹарийа хушк-бьред дәсттәнг (Мәтʹлк. 19:17). Бь ԝан щурʹа әм пьштгьрийа бьред Мәсиһ дькьн.

14. Ль гора Әфәси 4:15, 16, кʹижан ә гава чара кӧ дьбә бәрбь достийа тʹәви Иса?

¹⁴ 4) Пьштгьрийа тʹәшкиләта Йаһоԝа бькьн. Чахе әм һәвкʹарийе дькьн тʹәви бьред щабдар, йед кӧ бь һʹьзкьрьне рʹебәрийе мә дькьн, әм дьһа незики Иса дьбьн, йе кӧ сәре щьвате йә. (Бьхунә Әфәси 4:15, 16.) Мәсәлә, ԝан пашԝәхтийа тʹәшкиләта мә сафи кьр, ԝәки Одед Щьвата бь тʹәмами бьдьнә хәбате. Бона ве йәке һьнә щьват тʹәви щьватед дьн дьбьнә йәк, у мьһалед хьзмәтийе жи тенә гӧһастьне. Бь сайа ве йәке, пʹәре ԛӧрбанкьри тенә хԝәйкьрьне, чьмки хәрщед тʹәшкиләта мә кем дьбьн. Ле жь бо ве йәке һьнә хьзмәткʹар гәрәке һини дәрәщед тʹәзә бьн. Дьбәкә әԝ хьзмәткʹаред амьн гәләк сала щьватәкеда ньн у ида һини хушк-бьред ве щьвате бунә, ле ньһа ԝанрʹа дьбежьн, ԝәки щьватәкә дьнда хьзмәт кьн. Иса гәләк ша дьбә чахе дьвинә, кӧ әԝ хушк-бьред амьн сафикьрьна тʹәзә ԛәбул дькьн.

15. Ахьрийеда достийа мә тʹәви Иса ԝе чь щурʹәйи бә?

¹⁵ Әԝед кӧ бь рʹӧһʹе пироз кʹьфшкьри нә, һевийа ԝана әԝ ә, кӧ һʹәта-һʹәтайе тʹәви Иса Пʹадшатийа Хԝәдеда пʹадшатийе бькьн. Әԝана ԝе тʹәви Иса бьн, ԝи бьвиньн, у тʹәви ԝи хәбәр дьн (Йуһʹн. 14:2, 3). Ле әԝед кӧ сәр әʹрде бьжин, әԝана жи ԝе һʹьзкьрьна Иса бьвиньн. Рʹаст ә әԝана ԝе Иса нәвиньн, ле ԝе мәщала ԝан һәбә бьбьнә достед ԝийи һе незик у жь жийина  һʹәта-һʹәтайе ләзәте бьстиньн, кʹижан Йаһоԝа у Иса ԝе бьдьнә ԝан (Иша. 9:6, 7).

16. Һәрге әм бьбьнә достед Иса, әме кʹижан кʹәрәма бьстиньн?

¹⁶ Чахе әм тʹәглифкьрьна Иса ԛәбул дькьн, кӧ бьбьнә достед ԝи, әм гәләк кʹәрәма дьстиньн. Мәсәлә, ида ньһада әм һʹьзкьрьна ԝи тʹәхмин дькьн у аликʹарийа ԝи дьстиньн. Һьн жи мәщала мә һәйә, кӧ жийина һʹәта-һʹәтайе бьстиньн. Ле йа лапә фәрз әԝ ә, кӧ бь сайа достийа тʹәви Иса, әм дькарьн һәләԛәтийа һәри ԛимәт ԛазанщ кьн, демәк достийа тʹәви Баве ԝи, Йаһоԝа. Рʹасти жи ԛәдьрәки чьԛас мәзьн ә, кӧ әм дькарьн бьбьнә достед Иса!