1. Wukabya wuthi munywani w’omundu ow’okwa ndungu?

KUTSIBU-TSIBU, ekiika ky’erimbere eky’eribya munywani w’omundu ow’okwa ndungu ly’erighunza nayu buthuku. Mukabya munemukania, erihana amenge n’erikania okwa byo mwalhabiremo, obunywani bukongera. Aliwe hane ebitsibu, bikahika okw’ibya munywani wa Yesu. Ni byahi?

2. Ekitsibu ky’erimbere ni kyahi ekya thuwithe?

² Ekitsibu ky’erimbere ly’eribya sithuli thwathalholha oku Yesu. Abakristayo bangyi ab’omwa kighana ky’erimbere nabu mubathamulholhako. Nomwabine, omukwenda Petero mwabugha athi: “Mukanza Yesu Kristo nomomuthethamulholhako, kandi mukamwikiriraya nomomuthethamulhangira.” (1 Pet. 1:8) Neryo kithokekene eribya banywani ba Yesu ab’okwa ndungu nomwakine indi sithuli thwathamulholhako.

3. Ekitsibu ekyakabiri ni kyahi ekya thuwithe?

³ Ekitsibu kyakabiri ly’eribya isithwanga thoka erikania na Yesu. Thukabya thukasaba, Yehova ya thukakanaya nayu. Ni kwenene thukalhabaya emisabe yethu y’omwa lina lya Yesu, aliwe sithuli saba Yesu. Erithwalira haghuma, Yesu syanzire thukamusaba. Busana naki? Kundi erisaba n’iramya, kandi Yehova musa yutholere eriramibwa. (Mt. 4:10) Nomwabine bithya, thwangana kangania ku thwanzire Yesu.

4. Ekitsibu ekyakasathu ky’ekyahi, kandi thukendi kania okuki omo mwatsi ono?

 ⁴ Ekitsibu kyakasathu ly’eribya Yesu in’ikere elhubulha, neryo sithwangabya haghuma nayu. Aliwe thwangan’igha bingyi ebihambire oku Yesu nibya isithuli nayu. Thukendi lebya bindu bbini ebyo thwanga kolha erighumya obunywani bwethu nayu. Aliwe, thuthatsuka erilebya ekikaleka ikyabya ky’omughaso ithwe eribya banywani ba Kristo.

5. Busana naki thutholere ithwabya banywani ba Yesu? (Lebaya akasanduko “ Erinywana Yesu Kikaleka Ithwabya Banywani ba Yehova” na “ Erilhangira Olhukwamirwa Lhwa Yesu Omwa Nzira Eyitholere.”)

⁵ Thutholere ithwabya banywani ba Yesu thwamabya b’eribya bughuma ndeke na Yehova. Busana naki? Thalebya esyonzumwa ibiri hino. Ey’erimbere, Yesu mwabwira abigha biwe athi: ‘Thatha abanzire. Abanzire kusangwa munyanzire.’ (Yn. 16:27) Kandi mwabugha athi: “Sihali mundu oyukahika oku Thatha athe okw’ingye.” (Yn. 14:6) Erilengesya eribya munywani wa Yehova isiwuthatsuka eribya munywani wa Yesu liri ng’omundu oyukanza eringira omwa nyumba isyathalhaba omwa lhukyo. Yesu mwakolesya eky’erileberyako ekiri ng’ekyo omughulhu ayahulhamo “lhukyo lhw’esyombuli.” (Yn. 10:7) Enzumwa eyakabiri ly’eribya Yesu imwagherererya ndeke emibere ya Thatha wiwe. Mwabwira abigha biwe athi: “Oyuwamanyilhangira iniabirilhangira Thatha.” (Yn. 14:9) Neryo enzira ngulhu ey’eriminyiramo Yehova ly’erigha okwa ngebe ya Yesu. Thukabya thukongera erigha oku Yesu, thukongera erimwanza. Kandi obunywani bwethu na Yesu bukendibya bunemwongera, thukendiongera erianza Thatha wiwe ya kutsibu.

6. Ni yindi nzumwa yahi eyanga leka ithwabya bughuma na Yesu? Soborera.

 ⁶ Emisabe yethu erisubwamo, thutholere ithwabya ithune bughuma na Yesu. Eki sikirisubulira okw’ibugha thuthi “omwa lina lya Yesu” thukasaba. Thutholere ithwaminya emibere Yehova akakoleserayamu Yesu erisubirya emisabe yethu. Yesu mwabwira abakwenda athi: ‘Nasyakolha obuli mwatsi ogho mwasyabulya omo lina lyaghe.’ (Yn. 14:13) Nomwakine indi Yehova yukahulikirira n’erisubirya emisabe yethu, abiriha Yesu y’obuthoki bw’eriberererya ebya Yehova akathwamu. (Mt. 28:18) Neryo Nyamuhanga akabya athali asubirya emisabe yethu, akalebaya nga thune mughendera okw’ihano eryo Yesu aha. Ng’eky’erileberyako, Yesu mwabugha athi: “Mwamabuyira abandu kw’amalholho agho babiribakolha, Thatha wenyu w’elhubulha asyababuyira nibya. Nikwa mwamathendibuyira abandi b’amalholho bakabakolera, Thatha wenyu siendisyababuyira amalholho agho mwabirikolha.” (Mt. 6:14, 15) Neryo kwesi ni kikulhu erikangania abandi b’olhukeri olhuli ng’olhwa Yehova na Yesu bakathukanganaya!

7. Ni bahi abakaghasirawa omwa kihongwa kya Yesu eky’endongolya?

⁷ Abanywene ndeke Yesu basa bo bakaghasirawa omwa kihongwa kiwe eky’endongolya. Thukaminya thuthi? Yesu mwabugha athi iniakendi “sigha engebe yiwe busana n’abira biwe.” (Yn. 15:13) Abathaleghulha ababyaho Yesu isyali asa okwa kihugho bakendi syamwighako neryo ibamwanza. Abandu nga Abrahamu, Sara, Musa, na Rahabu bakendi syalhubuka, aliwe n’abaghombe ba Yehova abathaleghulha aba bakendi syayithagha eribya banywani ba Yesu imubathunga engebe y’erikotha.​—Yn. 17:3; Emib. 24:15; Ebr. 11:8-12, 24-26, 31.

8-9. Ngoku kiri omu Yoane 15:4, 5, obughuma bwethu na Yesu bukathuthokesaya erikolhaki, kandi busana naki ekyo ni kikulhu?

⁸ Thutsemire erikolha haghuma na Yesu omw’ithulira n’erikangirirya engulhu yuwene y’Obwami. Omughulhu Yesu abya okwa kihugho, abya mukangirirya. Kandi erilhua aho akathasubira elhubulha, Yesu ng’omuthwe w’ekithunga, abirilholha embere erisondolha omubiiri w’erithulira n’erikangirirya. Akalhangira kandi akasima akaghalha ako wukahiraho eriwathikya abangyi erimuminya n’eriminya Thatha wiwe. Erithwalira haghuma, thukathoka omubiiri oyu busana n’obuwathikya bwa Yehova na Yesu.​—Soma Yoane 15:4, 5.

⁹ Ekinywe kya Nyamuhanga kikathukangiriraya ndeke-ndeke ngoku thutholere ithwanza Yesu n’erilholha embere erimwanza erithoka eritsemesya Yehova. Neryo thulebaye bindu bbini ebyo thwangakolha eribya banywani ba Yesu.

10. Ekiika ky’erimbere eky’erithunga obunywani na Yesu ky’ekyahi?

¹⁰ (1) Minya Yesu. Eki thwangana kikolha omw’isoma ebitabu bye Biblia ebya Matayo, Mariko, Luka, na Yoane. Thukabya thukaghanirya okwa myatsi eyiri omwa Biblia eyihambire okwa ngebe ya Yesu, thukamwanza n’erimusikya busana n’emibere eyuwene eyo akolonganiramu n’abandu. Ng’eky’erileberyako, nomwakine indi abya Mukama w’abigha biwe, mwathabalhangira ng’abakobe. Omwakanya k’ekyo, iniakababwira amalengekania n’eriyowa liwe. (Yn. 15:15) Yesu iniakabya nabu omwa bulighe n’erilira haghuma nabu. (Yn. 11:32-36) Nibya n’abahakani biwe mubalhangira ngoku ni munywani w’abakahulikirira  omwatsi wiwe. (Mt. 11:19) Thukabya thukagherererya emibere Yesu akolonganiramu n’abigha biwe, obughuma bwethu n’abandi bukakamatha, ithwayowa buholho n’eritsema, kandi ithwongera erisima Kristo.

11. Ekiika kyakabiri eky’eribya munywani wa Yesu ky’ekyahi, kandi busana naki ekiika eki ni kikulhu?

¹¹ (2) Lengekanaya n’erikolha nga Yesu. Thukabya thukaminya ndeke n’erigherererya amalengekania wiwe, thukongera eribya banywani biwe. (1 Kor. 2:16) Thwanga gherererya thuthi Yesu? Lengekanaya okwa ky’erileberyako kino. Yesu iniakalengekanaya kutsibu okw’iwathikya abandi omwakanya k’eriyitsemesya. (Mt. 20:28; Abar. 15:1-3) Busana n’amalengekania aya, iniakayihayo busana n’abandi kandi ini mughanyiri. Isyalihithana lhuba-lhuba busana n’ebyo bandu bakamukanayako. (Yn. 1:46, 47) Kandi isyali lighira ebisobyo ebyo bandi bakolha kera bikahamba okwa malengekania agho abawitheko. (1 Tim. 1:12-14) Yesu mwabugha athi: “Mwamabya n’olhwanzo omughuma busana n’owundi, abandu bosi basyaminya ku muli bigha baghe.” (Yn. 13:35) Ni kibuya eriyibulya kino, “Nganemugherererya Yesu omw’ikolha ekyosi-kyosi eribya buholho n’abalikyethu?”

12. Ekiika kyakasathu eky’eribya munywani wa Yesu ky’ekyahi, kandi thwanga kikolha thuthi?

¹² (3) Sighika baghalha bobu Kristo. Yesu akalhangira ebya thukakolera baghalha babu abahakabibwa nga yathukabikolera. (Mt. 25:34-40) Enzira ngulhu eyo thukasighikiramo abahakabibwa ly’erisangira ndeke omwa mubiiri w’erithulha Obwami n’eriyira abigha, omubiiri ogho Yesu aha abigha biwe. (Mt. 28:19, 20; Emib. 10:42) Baghalha bobu Kristo bakathoka omubiiri w’erithulhughania omwa kihugho kyosi busana n’obuwathikya ‘bw’esindi mbuli.’ (Yn. 10:16) Wamabya iwuli w’okwa sindi mbuli, obul’isangira omwa mubiiri oyu, wukabya iwamakangania ku wanzire abahakabibwa na Yesu iyuwene-wene.

13. Thwanga kolesya thuthi erihano lya Yesu eriri omu Luka 16:9?

¹³ Kandi thukabya banywani ba Yehova na Yesu omw’ihayo esyosente erisighika omubiiri ogho bakasondolha. (Soma Luka 16:9.) Ng’eky’erileberyako, thwanganahayo esyosente erisighika omubiiri w’ekihugho kyosi kandi esyosente esyo sikawathikaya omw’ithulha engulhu yuwene omwa myanya ya haali, erihimba n’erisugha emyanya eyikakolesibawa omw’iramya ly’okwenene, n’eriwathikya kinyamubiri ababiriwako ebitsinduli. Kandi thwangana wathikya n’ekithunga kyethu omwa by’esyosente n’abandi abo thwasi ku bali omwa buyithawa. (Emi. 19:17) Esi ni nzira esyo thwanga wathikiryamo baghalha bobu Kristo.

14. Ngoku kiri omu Abanya Efeso 4:15, 16, ni kiika kyahi ekyakani eky’eribya munywani wa Yesu?

¹⁴ (4) Sighika esyondegheka sy’ekithunga ky’Ekikristayo. Thukakamathaya obunywani bwethu na Yesu iyo ng’omuthwe w’ekithunga thukakolongana ndeke n’abo abirisombolha erithutheya. (Soma Abanya Efeso 4:15, 16.) Ng’eky’erileberyako lino thunemulengaho erilhangira thuthi Ebisenge by’Obwami ebyosi bikakolesibawa ndeke. Neryo busana n’ekyo, ebindi bithunga byabirihirwa haghuma n’emithano y’awandi malhambu yabirisubwamo. Endegheka eyi yabirithasyakehya okwa syosente esyo kithunga kikahulhukaya. Aliwe kandi, eki kyabirileka abandi bathuliri ibayithagha erikolha esyombinduka. Abathuliri bathaleghulha abo banganabya ibabiribya omwa kithunga kirebe habw’emyaka mingyi, neryo ibabya ibabiribya banywani b’okwa ndungu b’abalikyethu ab’eyo. Aliwe neryo lero ibabya ini b’erighenda omwa kindi  kithunga. Yesu akatsema kutsibu akalhangira abigha bathaleghulha aba bakaghenda-ghendania n’emitheghekere eyi!

15. Obunywani bwethu na Yesu bukendisyongera buthi eryuwana omwa buthuku obukasa?

¹⁵ Ababirihakabibwa n’omulimu abuyirire bawithe amaha w’erisyabya na Yesu kera na kera, bakendi syathabalha nayu omo Bwami bwa Nyamuhanga. Bawithe amaha w’erisyabya na Kristo​—ibamulhangira, ibakania nayu, n’eribya haghuma nayu kera na kera. (Yn. 14:2, 3) Abawithe amaha w’erisyabya okwa kihugho bakendi syakanganibwa olhwanzo n’eritsomana lya Yesu. Nomwakine indi sibendisyalhangira Yesu, obunywani bwabu nayu bukendi syalholha embere erighuma bakatsemera engebe eyo Yehova na Yesu bamaleka ibathunga.​—Isa. 9:6, 7.

16. Ni mighisa yahi eyo thukabana busana n’eribya banywani ba Yesu?

¹⁶ Thukabana mighisa minene thukaligha eribya banywani ba Yesu. Ng’eky’erileberyako, thukalhangira olhwanzo n’obuwathikya bwiwe na lino. Thuwithe amaha w’erisyabyaho kera na kera. Kandi ekikulhu kutsibu, obunywani bwethu na Yesu bukendi syathukolya okwa kihembo kibuyanga omwa byosi​—eribya n’engolongana y’ahakuhi-kuhi na Yehova, Thatha wa Yesu iyuwene-wene. Thuwithe olhusunzo lhw’embaghane olhw’eryahulhwamo banywani ba Yesu!