1. Mwakonsha kuba byepi pa kuba’mba mwikale balunda na muntu?

PA KUBA’MBA mwikale balunda na muntu ye mwanonaña nanji kimye kitanshi, kikebewa kwikala nanji kimye kyabaya. Kimye kyo mubena kwisamba, kwibuula byo mulanguluka ne bintu byo mwapitamo mu bwikalo, mwikala balunda. Pano bino, kimye kimo kikatazha kwikala balunda ne Yesu na mambo mikiika imo. Ñanyi mikiika yonkayo?

2. Ñanyi mukiika mutanshi wakonsha kwitulengela kubula kwikala balunda ne Yesu?

² Mukiika mutanshi ke wa kuba’mba tukyangye kumonañanapo kala ne Yesu. Bena Kilishitu bavula bajingako mu kimye kya batumwa nabo kechi bamumwenepo Yesu ne. Nangwa byonkabyo, mutumwa Petelo waambile’mba: “Nangwa kya kuba kechi mwamumwenepo ne, mwamutemwa. Nangwa kya kuba kechi mubena kumumona pa kino kimye ne, mwamwitabila.” (1 Pe. 1:8) Onkao mambo, nangwa kya kuba tukyangye kumumonapo Yesu, twakonsha kwikala balunda nanji.

3. Ñanyi mukiika wa bubiji?

³ Mukiika wa bubiji ke wa kuba’mba kechi twakonsha kwisamba ne Yesu ne. Pa kulomba, twisamba ne Yehoba. Ibyo kuba’mba twingijisha jizhina ja Yesu pa kulomba, pano bino, kechi twisamba ne aye ne. Ne Yesu mwine kechi ukeba’mba tulombenga kwi aye ne. Mambo ka? Mambo kulomba ke lubaji lwa  mpopwelo, kabiji Yehoba ye yenkatu ye twafwainwa kupopwela. (Mat. 4:10) Nangwa byonkabyo, twakonsha kumwesha byo twatemwa Yesu.

4. Ñanyi mukiika wa busatu, kabiji tusakwisamba pa ka mu uno mutwe?

⁴ Mukiika wa busatu ke wa kuba’mba Yesu wikala mwiulu, onkao mambo, kechi twakonsha kwikala nanji ne. Bino twakonsha kuyuka byavula pe Yesu nangwa kya kuba kechi twikala nanji ne. Tusa kupituluka mu bintu bina byo twakonsha kuba pa kuba’mba tukoseshe bulunda bwetu ne aye. Patanshi, twayai twisambe ene mambo o kyanemena atweba kwikala balunda ne Kilishitu.

5. Mambo ka o twafwainwa kwikela balunda ne Yesu? (Monai ne tubitenguluzha twa kuba’mba “ Kwikala Balunda ne Yesu ko Kuketulengela Kwikala Balunda ne Yehoba” ne “ Yukai Bulongo Mwingilo wa kwa Yesu.”)

⁵ Twafwainwa kwikala balunda ne Yesu pa kuba’mba twikale na bulunda bwawama ne Yehoba. Mambo ka? Langulukai pa bino bishinka bibiji. Kitanshi, Yesu wafunjishe baana banji ba bwanga amba: “Batata abo bene bemutemwa, mambo anweba mwantemwa.” (Yoa. 16:27) Kabiji waambile’mba: “Kafwako wiya kwi Batata ne, poso wapichila mwi amiwa.” (Yoa. 14:6) Kukeba kwikala balunda ne Yehoba saka mwabula kwikala balunda ne Yesu kijitu nobe kutwela mu kishimikwa kwa kubula kupichila pa kibelo. Yesu waingijishe ino ñambilo byo elumbulwile aye mwine amba ye ‘kibelo kya mikooko.’ (Yoa. 10:7) Kishinka kya bubiji ke kya kuba’mba Yesu wamwesheshetu suka byubilo bya Shanji. Waambijile baana banji ba bwanga amba: “Awa wammona, wamona ne Batata.” (Yoa. 14:9) Onkao mambo, jishinda jawama kuyukilamo Yehoba ke kufunda bwikalo bwa kwa Yesu. Inge twafunda byavula  pe Yesu, butemwe bo twamutemwa bukabaya. Kabiji inge bulunda bwetu ne Yesu bwakosa, butemwe bo twatemwa Shanji bukabayilako.

6. Ñanyi kishinka kikwabo kyafwainwa kwitulengela kwikala balunda ne Yesu. Lumbululai.

⁶ Twafwainwa kwikala balunda ne Yesu pa kuba’mba milombelo yetu ikumbulwe. Kino kibena kulumbulula’mba twafwainwa kuba byavula kechi kwambatu byambo bya kuba’mba “mu jizhina ja Yesu” konka mu milombelo yetu ne. Twafwainwa kuyuka Yehoba byo engijisha Yesu pa kukumbula milombelo yetu. Yesu wabuujile batumwa banji amba: “Kyonse kyo mukalomba mu jizhina jami, nkekyuba.” (Yoa. 14:13) Nangwa kya kuba Yehoba ye umvwa milombelo yetu ne kwiikumbula, bino wapa Yesu luusa lwa kuba byo afuukulapo. (Mat. 28:18) Onkao mambo, Lesa saka akyangye kukumbula milombelo yetu umona inge twalondela lujimuno lwapaine Yesu. Yesu waambile’mba: “Umvwe saka mwibalekelako bantu mambo, Shenu wa mwiulu naye ukemulekelako mambo; pakuba inge mwabula kwibalekelako bantu mambo o bemulenga, ne aye Shenu wa mwiulu kechi ukemulekelako mambo enu ne.” (Mat. 6:14, 15) Onkao mambo, kyanema bingi kubilanga bakwetu bintu byawama byonkatu Yehoba ne Yesu byo betubila.

7. Bañanyi bamwenamo mu kitapisho kya bukuzhi kya kwa Yesu?

⁷ Bonkatu baji na bulunda bwakosa ne Yesu bo bakamwenamo mu kitapisho kya bukuzhi. Twayuka byepi? Yesu waambile’mba ‘ukapaina balunda nanji bumi bwanji.’ (Yoa. 15:13) Bantu baingijilanga Yehoba bajingako Yesu saka akyangye kwiya pano pa ntanda bakafunda pe aye ne kumutemwa. Bano banabalume ne banabakazhi nabiji Abalahama, Sala, Mosesa, ne Lehaba bakasangulwa. Bino nangwatu bano bakalume ba Yehoba baoloka nabo bakakebewanga kwikala balunda ne Yesu pa kuba’mba bakekale na bumi bwa myaka ne myaka.—Yoa. 17:3; Byu. 24:15; Hebe. 11:8-12, 24-26, 31.

8-9. Kwesakana na byaamba Yoano 15:4, 5, kwikala balunda ne Yesu kuketulengela kuba ka, kabiji mambo kino o kyanemena?

⁸ Tuji bingi na lusekelo pa kwingijila pamo ne Yesu mwingilo wa kusapwila ne kufunjisha mambo awama a Bufumu. Yesu byo ajinga pano pa ntanda, wajinga mufunjishi. Kabiji kufumatu kimye kyo abwelele mwiulu, Yesu byo aji mutwe wa kipwilo, watwajijila kutangijila mwingilo kusapwila ne kufunjisha bukine. Umona byo mwibikako kukwasha bantu bavula kumuyuka aye ne Shanji, kabiji wimunemeka bingi na mambo a kino. Kabiji uno mwingilo twakonshatu kumwingila bulongo na bukwasho bwa Yehoba ne Yesu.—Tangai Yoano 15:4, 5.

⁹ Mambo a Lesa etufunjisha byo twafwainwa kutwajijila kutemwa Yesu pa kuba’mba tutokeshenga Yehoba ku muchima. Onkao mambo, twayai twisambe bintu bina byo twafwainwa kuba pa kuba’mba twikale balunda ne Yesu.

10. Ñanyi kintu kitanshi kyo twafwainwa kuba pa kuba’mba twikale balunda ne Yesu?

¹⁰ (1) Yukai Yesu. Twakonsha kuyuka Yesu kupichila mu kutanga mabuku a mu Baibolo, ko kuba’mba Mateo, Mako, Luka, ne Yoano. Inge ke tulanguluke-languluke pa byo tutanga mashimikila a mu Baibolo aamba pa bwikalo bwa kwa Yesu, tukatemwa Yesu ne kumunemeka na mambo a kifyele kyo amwesheshe bantu. Nangwa kya kuba wajinga Nkambo ya baana banji ba bwanga, bino kechi wibamonanga nobe bazha ne. Pakuba wibabuujile byo alangulukanga ne byo aumvwanga. (Yoa. 15:15) Inge baikala na bulanda, Yesu naye waumvwanga bulanda. (Yoa. 11:32-36) Nangwatu balwanyi ba kwa Yesu nabo bamwene kuba’mba  aba baswile byambo byo asapwijilenga baikele ke balunda nanji. (Mat. 11:19) Inge ke tulondele Yesu byo aubanga na baana banji ba bwanga, tukekala mu mutende na bakwetu ne kwikala na lusekelo, kabiji tukamutemwa bingi Kilishitu ne kumunemeka.

11. Ñanyi kintu kya bubiji kyo twafwainwa kuba pa kuba’mba twikale balunda ne Yesu, kabiji mambo ka kuba kino o kwanemena?

¹¹ (2) Langulukainga ne kuba bintu byonka byaubanga Yesu. Inge twayuka byo alanguluka ne kulondela milanguluko yanji, bulunda bwetu ne aye bukakosa. (1 Ko. 2:16) Twakonsha kulondela byepi Yesu? Akilangulukaitu pa jishinda jimo. Yesu walangulukanga pa kukwasha bantu kukila kwisangajika aye mwine. (Mat. 20:28; Loma 15:1-3) Na mambo a kulanguluka bino, wajinga na muchima wa kwipana ne kulekelako bantu mambo. Kechi wazhingilanga bukiji pa bintu byaambanga bantu pe aye ne. (Yoa. 1:46, 47) Kabiji kechi wamonanga bantu kutama na mambo byubilo byatama byo baubile kala ne. (1 Timo. 1:12-14) Yesu waambile’mba: “Kino kyo kyo bakayukilako bonse amba mwi baana bami ba bwanga, umvwe mwitemwa anwe bene na bene.” (Yoa. 13:35) Kyanema kwiipuzha anweba bene amba, “Abya mbena kulondela Yesu kupichila mu kwibikako kwikala mu mutende na balongo ne banyenga nyi?”

12. Ñanyi kintu kya busatu kyo twafwainwa kuba pa kuba’mba twikale balunda ne Yesu, kabiji twakonsha kuba byepi kino kintu?

¹² (3) Kwashainga balongo ba kwa Kilishitu. Yesu umona bintu byo tubila balongo banji bashingwa nobe ye tubena kubila bino bintu. (Mat. 25:34-40) Jishinda janema jo tukwashishamo bashingwa ke kwingila na mukoyo mwingilo wa kusapwila mambo awama a Bufumu ne kufunjisha bantu kwikala baana ba bwanga byonka byakambizhe Yesu. (Mat. 28:19, 20; Byu. 10:42) Balongo ba kwa Kilishitu pa kuba’mba bengile bulongo mwingilo wa kusapwila ubena kubiwa mwaya ntanda, bafwainwa kwibakwasha ku “mikooko ikwabo.” (Yoa. 10:16) Inge muji mu jibumba ja mikooko ikwabo, kimye kyonse kyo mwingila uno mwingilo, mumwesha kuba’mba mwatemwa Yesu ne balongo banji bashingwa.

13. Twakonsha kulondela byepi mukambizho wa kwa Yesu wanembwa pa Luka 16:9?

¹³ Kabiji twakonsha kwikala balunda ne Yehoba ne Yesu kupichila mu kwingijisha mali etu kutundaika mwingilo ye babena kutangijila. (Tangai Luka 16:9.) Twakonsha kupana mali ku mwingilo wa ntanda yonse, kabiji ano mali engila ku mwingilo wa kusapwila mambo awama ku mapunzha aji mwalepa, kushimika ne kuwamisha bishimikwa bya kupopwelamo Lesa, ne kukwasha boba baponenwa na bya malwa. Kabiji twakonsha kupanako mali a kukwasha kipwilo kyo tujimo ne kukwasha boba bo twayuka’mba bakajilwa. (Maana 19:17) Ano o mashinda o twakonsha kukwashishamo balongo ba kwa Kilishitu.

14. Kwesakana na byaamba Efisesa 4:15, 16, ñanyi kintu kya buna kyo twafwainwa kuba pa kuba’mba twikale balunda ne Yesu?

¹⁴ (4) Tundaikainga jibumba ja Yehoba. Tukosesha bulunda bwetu ne Yesu byo aji mutwe wa kipwilo kupichila mu kukookela boba bo atongola kwitutangijila. (Tangai Efisesa 4:15, 16.) Ano moba tubena kwesekesha kumona kuba’mba Mazubo a Bufumu babena kwiengijisha ku bipwilo byavula. Na mambo a kino, bipwilo bimo bebivwanga pamo kabiji manyaunda a kwingijilamo nao beapimpulako. Luno lunengezho lwakwasha jibumba ja Lesa kwingijisha bulongo mali. Kabiji kino kibena kulumbulula’mba basapwishi bamo bafwainwa kufunda bya kwingijila mu manyaunda a katataka. Bano basapwishi ba kishinka kampe babanjile bingi mu bipwilo byo bajingamo  kabiji baji na balunda bavula mu bino bipwilo. Bino luno bebavilwila mu bipwilo bikwabo. Yesu umvwa bingi bulongo pa kumona baana banji ba bwanga ba kishinka byo babena kukookela luno lunengezho.

15. Bulunda bwetu ne Yesu bukela byepi kulutwe?

¹⁵ Aba bashingwa mupashi wazhila baji na luketekelo lwa kwikala pamo ne Yesu myaka ne myaka ne kulama nanji mu Bufumu bwa Lesa. Bakekalanga ne Kilishitu, bakamumonaga, kwisamba nanji, ne kubila pamo bintu. (Yoa. 14:2, 3) Aba baji na luketekelo lwa kwikala pano pa ntanda nabo bakebatemwa kwi Yesu ne kwibata muchima. Nangwa kya kuba kechi bakamunonanga Yesu ne, bulunda bwabo ne aye bukakosa bingi byo bakeyowanga bwikalo bwawama bukebapa Yehoba ne Yesu.—Isa. 9:6, 7.

16. Ñanyi bintu byawama byo tumwenamo mu kwikala balunda ne Yesu?

¹⁶ Inge twaswa lwito lwa kwa Yesu lwa kwikala balunda nanji, tumwenamo bintu byavula bingi. Tumwenamo mu butemwe bwanji kabiji witukwasha lonka luno. Tuji na luketekelo lwa kukekala na bumi bwa myaka ne myaka. Kabiji kyakilamo kunema, kwikala balunda ne Yesu kwitulengela kwikala na kintu kyanemesha, ko kuba’mba kwikala na bulunda bwakosa na Shanji Yesu aye Yehoba. Onkao mambo, kwikala balunda ba kwa Yesu ke kintu kyanema bingi.